ᐃᒃᓯᕋᕐᔪᐊᕌᐱᒃ ᒪᒥᐊᑦᑐᖅ ᐱᑦᑎᐊᖃᑦᑕᙱᔾᔪᑎᕕᓂᐊᓗᖕᓄᑦ ᐃᓕᓐᓂᐊᕆᐊᕐᕕᕕᓂᕐᓂᒃ

ᒪᒥᐊᔾᔪᑎᐅᔪᑦ ᐃᓚᖃᕐᑐᖅ ᐅᓇ ᐊᑖᑕ ᔪᐊᓇᔅ ᕆᕗᐊ ᑲᓇᑕᒧᑦ ᐅᑎᖅᑎᑕᐅᓂᐊᕐᓗᓂ ᐃᖅᑲᖅᑐᖅᑕᐅᓂᐊᕐᒪ

ᐃᒃᓯᕋᕐᔪᐊᕌᐱᒃ ᕗᕌᓐᓯᔅ ᒪᒥᐊᑦᑐᖅ ᑳᑐᓕᒃ ᑐᒃᓯᐊᕐᕕᒃ ᖃᓄᐃᓕᐅᕈᓯᕆᕙᓚᐅᕐᑕᖏᓐᓂᒃ ᐃᓕᓐᓂᐊᕆᐊᑐᓕᕆᓂᒃᑯᑦ. ᐃᒃᓯᕋᕐᔪᐊᕌᓗᒃ ᕗᐃᓕᐊᒻ ᒪᒃᒍᕋᑕᓐ ᐅᖃᓚᐅᕐᑐᖅ ᐃᒃᓯᕋᕐᔪᐊᕌᐱᒃ ᑲᓇᑕᒧᑦ ᐳᓛᓛᕈᒪᓂᕋᖅᖢᓂᐅᒃ ᐅᐸᒍᑎᑦᑎᐊᒻᒪᕆᒡᓗᓂ ᒪᒥᐊᑦᑐᒪᒐᒥᒃ. (ᓴᖅᑭᔮᒐᕐᒥᒃ ᐅᕙᙵᑦ ᓵᑦ ᐊᒻᒪ ᓚᐃᑦ ᑐᓴᒐᒃᓴᓕᕆᔨᑦ)

By ᑕᐃᕕᑦ ᓛᕼᐃᑦ

For an English version of this story, please see Pope apologizes for abuse at residential schools.

ᐃᒃᓯᕋᕐᔪᐊᕌᐱᒃ ᕗᕌᓐᓯᔅ ᒪᒥᐊᓚᐅᕐᑐᖅ ᐊᐃᕆᓕ 1-ᒥ ᑳᑐᓕᒃ ᑐᒃᓯᐊᖅᑎᖏᑦ ᓄᓇᖃᖅᑳᖅᑐᑦ ᓱᕈᓯᖏᓐᓂᒃ ᐋᓐᓂᕐᓱᐃᕆᖃᑦᑕᓚᐅᕐᓯᒪᓂᖏᓐᓄᑦ ᑲᓇᑕᒥ ᐃᓕᓐᓂᐊᕆᐊᕐᕕᒋᔭᐅᓂᑯᓂᒃ ᐊᕐᕌᒍᑦ 100 ᐅᖓᑖᓂ.

“ᐅᖃᕈᒪᓪᓗᖓ ᐆᒻᒪᑎᓕᒫᓐᓄᑦ, ᐊᒃᓱᐊᓗᒃ ᒪᒥᐊᑉᐳᖓ,” ᐃᒃᓯᕋᕐᔪᐊᕌᐱᒃ ᐅᖃᓚᐅᕐᑐᖅ ᑭᖑᓪᓕᖅᐹᕐᒥ ᐅᕐᓗᒥ ᐱᓇᓱᐊᕈᓯᕐᒥ ᑲᑎᒪᑲᑖᓪᓚᓚᐅᖅᖢᑎᒃ ᓄᓇᖃᖅᑳᖅᑐᓪᓗ ᑲᓇᑕᒥᐅᑕᓂᒃ ᐃᓚᐅᓪᓗᑎᒃ 7 ᐃᓄᐃᑦ ᐅᐸᒍᑎᖃᑕᐅᔪᓂᒃ.

ᐃᒃᓯᕋᕐᔪᐊᕌᐱᒃ ᖃᐅᔨᓂᕋᓚᐅᕐᑐᖅ ᑐᒃᓯᐊᕐᕕᒃ ᐃᓚᒋᔭᐅᓚᐅᕐᓯᒪᓂᖓᓂᒃ ᐃᓕᓐᓂᐊᕆᐊᕐᕕᓄᑦ ᐱᓕᕆᐊᒃᓴᓄᑦ ᐊᒻᒪᓗ ᖃᓄᖅ ᓱᕋᒍᑎᒻᒪᕆᐅᓚᐅᕐᓯᒪᓂᖓᓂᒃ ᓄᓇᖃᖅᑳᖅᑐᓄᑦ ᑲᓇᑕᒥᐅᑕᓄᑦ ᐊᕐᕌᒎᓕᕐᑐᓂᒃ 100 ᐅᖓᑖᓂᒃ. ᐅᖃᓚᐅᕐᒥᔪᖅ ᓈᒻᒪᙱᓗᐊᖅᑐᐊᓘᓂᖓᓂᒃ ᖃᓄᖅ ᐃᓕᓐᓂᐊᕆᐊᕐᕕᐅᕙᓚᐅᕐᑐᑦ ᓄᓇᖃᖅᑳᖅᑐᑦ ᐃᓕᖅᑯᓯᖏᓐᓂᒃ ᐊᓯᐅᑎᑦᑎᓚᐅᕐᓯᒪᓂᖏᓐᓂᒃ ᐊᒻᒪᓗ ᖁᕕᐊᓇᙱᓗᐊᖅᑐᐊᓗᖕᒥ ᐊᑐᕈᑎᐅᓯᒪᓕᖅᑐᓂᒃ.

ᐃᒃᓯᕋᕐᔪᐊᕌᐱᐅᑉ ᒪᒥᐊᓐᓂᖓ ᓄᓇᖃᖅᑳᖅᑐᓂᒃ ᑲᓇᑕᒥᙶᖅᑐᓂᒃ ᐃᓚᖃᖅᖢᑎᒃ ᐃᓄᐃᑦ ᑕᐱᕇᑦ ᑲᓇᑕᒥᒃ, ᓄᓇᖃᖅᑳᖅᑐᓄᑦ ᑲᑐᔾᔨᖃᑎᒌᓂᒃ ᐊᒻᒪᓗ ᐊᓪᓚᖓᔪᐃᑦ ᑲᓇᑕᒥ ᑲᑎᒪᔨᕐᔪᐊᖏᑦ, ᐅᐸᖃᑕᐅᓚᐅᕐᓯᒪᖕᒪᑕ ᐃᒃᓯᕋᕐᔪᐊᕌᐱᒃᒥ ᕉᒻᒥ ᐱᓇᓱᐊᕈᓯᐅᓚᐅᕐᑐᒥᓐ. ᐅᐸᒃᑎᑕᐅᔪᑦ ᐱᔾᔪᑎᖃᓗᐊᓚᐅᕐᑐᑦ ᒪᒥᐊᕝᕕᐅᔭᖅᑐᕋᓱᒃᖢᑎᒃ ᑲᑐᓕᒃ ᑐᒃᓯᐊᕐᕖᑦ ᐃᓚᒋᔭᐅᓚᐅᕐᓯᒪᓂᖏᓐᓄᑦ ᐃᓕᓐᓂᐊᕆᐊᕐᕕᓕᐊᕐᕕᖕᓄᑦ ᖃᓄᐃᓕᐅᕈᓯᕐᓂᒃ.

ᐃᓕᓐᓂᐊᕆᐊᕐᕖᑦ ᐱᒋᐊᕐᑕᐅᓚᐅᕐᓯᒪᖕᒪᑕ 1880-ᖏᓐᓂ ᓄᓇᖃᖅᑳᖅᑐᓂᒃ ᐃᓕᖅᑯᓯᖏᓐᓂᒃ ᐊᑐᕈᓐᓃᖅᑎᑦᑎᓇᓱᒍᑎᐅᓪᓗᓂ, ᑭᒃᑰᓂᖏᓐᓂᒃ ᐊᒻᒪ ᐅᖃᐅᓯᖏᓐᓂᒃ. ᐃᓚᖏᑦ ᐃᓕᓐᓂᐊᕐᕖᑦ ᒪᑐᐃᖓᓚᐅᕐᑐᑦ 1990-ᖏᑦ ᑎᑭᑎᓪᓗᒋᑦ.

ᐊᕐᕌᓂ 1,800 ᐅᖓᑖᓂᒃ ᓇᓗᓇᐃᒃᑯᑎᖃᙱᑦᑐᓂᒃ ᐃᓗᕕᕐᓯᐊᓚᐅᕐᓯᒪᖕᒪᑕ ᐃᓕᓐᓂᐊᕆᐊᕐᕕᕕᓂᕐᓂᒃ, ᑕᐃᒪᓐᓇᓗ ᑳᑐᓕᒃ ᑐᒃᓯᐊᕐᕕᒃ ᐊᒻᒪ ᐊᓯᖏᑦ ᐱᓕᕆᕝᕕᐅᕙᒃᑐᑦ ᑖᒃᑯᓂᖓ ᑕᐃᒪᐃᑎᑦᑎᓂᕋᐃᖁᔭᐅᓕᓚᕐᓯᒪᓪᓗᑎᒃ ᐱᓕᕆᐊᖃᖃᑕᐅᓂᕐᒧᑦ.

ᐃᒃᓯᕋᕐᔪᐊᕌᐱᒃ ᒪᒥᐊᑕᐃᓐᓇᓚᐅᕐᑐᖅ ᑕᐃᒪᐃᖃᒻᒥᓪᓗᐊᓚᐅᕐᓯᒪᙱᖢᑎ, ᐃᓄᐃᑦ ᑕᐱᕇᑦ ᑲᓇᑕᒥ ᐊᖓᔪᖅᑳᖓ ᓇᐃᑕᓐ ᐅᐱᐊᑦ ᐅᖃᓚᐅᕐᑐᖅ ᕉᒻᒥ ᑐᓴᒐᒃᓴᓕᐅᕈᑎᓄ ᑲᑎᒪᑎᓪᓗᒋ ᓄᓇᖃᖅᑳᖅᑐᑦ ᓯᕗᓕᐅᕐᑎᖏ ᐅᐸᒍᑎᓯᒪᔪᑦ.

“ᓱᓕ ᖃᓄᐃᓕᐅᕈᓘᔭᕆᐊᖃᕋᑦᑕ,” ᐅᖃᖅᑐᖅ ᐅᐱᐊᑦ, ᑖᓐᓇ ᐃᓄᖕᓂ ᓯᕗᓕᐅᕐᑎᐅᓚᐅᕐᑐᖅ ᐅᐸᒍᑎᔪᓂᒃ ᐃᒃᓯᕋᕐᔪᐊᕌᐱᒃᒥ ᑕᑯᔭᖅᑐᖅᑐᓂᒃ ᒫᔅᓯ 28-ᒥ.

“ᑕᐃᒪᓕ ᒪᒥᐊᔾᔪᑎ ᐃᓚᒋᔭᐅᒻᒪᕆᒃᑐᖅ ᐊᖏᓂᕐᓵᓗᖕᒧᑦ.”

ᑲᓇᑕᒥ ᐅᑯᐊ ᓄᓇᕗᑦ ᑐᙵᕕᒃᑯᑦ ᐊᖓᔪᖅᑳᖓ ᐊᓗᑭ ᑰᑦᑎᖅ ᐅᖃᓚᐅᕐᑐᖅ ᐃᓄᐃᑦ ᐃᖕᒥᖕᓄᑦ ᐱᑦᑎᐊᖃᑦᑕᐅᑎᖁᓪᓗᓂᒋᑦ, ᓲᖃᐃᒻᒪ ᐊᒃᓱᕈᓘᔭᓇᕐᓂᐊᕐᒪᑦ ᐃᒃᓯᕋᕐᔪᐊᕌᐱᒃ ᒪᒥᐊᓚᐅᕐᑎᓪᓗᒍ.

“ᐃᓱᒪᒋᔭᒃᑯᓪᓕ, ᒪᒥᓴᖅᐸᓪᓕᐊᓇᓱᒃᖢᓂ ᐊᒃᓱᕈᕐᓇᓚᐅᑲᒃᐸᖕᓂᖓᓂᒃ,” ᐅᖃᕐᑐᖅ. “ᐊᒃᓱᕈᕐᓇᕐᓂᐊᕋᓗᐊᖅᑎᓪᓗᒍ ᐃᓄᖕᓄᑦ ᐅᓇ ᐱᒋᐊᕈᑎᑦᑎᐊᕚᓗᒃ.”

ᓄᓇᕗᒧᑦ ᓯᕗᓕᐅᕐᑎ ᐸᐅᓗᓯ ᐊᕿᐊᕈᖅ ᐅᖃᐅᓯᕆᓚᐅᕐᑕᖓ ᒪᒥᐊᔾᔪᑎᐅᔪᖅ ᒪᒥᓴᕐᐸᓪᓕᐊᓂᕐᒧᑦ ᐱᒋᐊᕈᑎᐅᓂᐊᕐᓂᖓᓂᒃ ᑭᓯᐊᓂᓕ ᐅᖃᖅᖢᓂ ᐅᖃᐅᓯᑐᐃᓐᓇᐃᑦ ᐲᕐᓯᔪᓐᓇᙱᓐᓂᖏᓐᓂᒃ ᓱᕋᐃᒍᑎᐅᓂᑯᓂᒃ ᐃᓕᓐᓂᐊᕆᐊᕐᕕᕕᓂᕐᓄᑦ ᐃᓄᖕᓄᑦ ᐅᐸᒃᑎᑕᐅᕙᓚᐅᕐᓯᒪᔪᓄᑦ ᐊᒻᒪᓗ ᑭᖑᓂᐊᒍᑦ ᓈᒻᒪᙱᓕᐅᕈᑎᐅᓯᒪᓪᓚᕆᒃᑐᓄᑦ.

ᑲᓇᑕᒥ ᐊᖓᔪᖅᑳᖅ ᒥᓂᔅᑕ ᔭᔅᑎᓐ ᑐᕉᑑ, ᐅᖃᓪᓚᒃᑎᓪᓗᒍ ᐊᐃᕆᓕ 1-ᒥ ᐃᑲᔫᑎᒃᓴᓂᒃ ᑐᓴᖅᑎᑦᑎᓇᓱᒃᑎᓪᓗᒋᑦ ᐃᖃᓗᖕᓄᑦ ᐃᒪᖃᐅᑎᖏᓐᓄᑦ, ᐃᓱᒪᒍᑎᖃᓚᐅᕐᒥᔪᖅ “ᐱᓇᓱᓪᓚᕆᒃᓯᒪᓂᖏᓐᓂᒃ ᐊᒻᒪ ᓴᙱᓂᖏᓐᓂᒃ” ᓄᓇᖃᖅᑳᖅᑐᑦ ᐱᓕᕆᔨᖓ ᐱᓕᕆᐊᖃᖅᑎᓪᓗᒋ ᒪᒥᐊᕝᕕᐅᔭᕆᐊᖃᕐᓂᕐᒥᒃ.

ᐃᒃᓯᕋᕐᔪᐊᕌᐱ ᐅᖃᓚᐅᕐᒥᔪᖅ ᑲᓇᑕᒧᑦ ᐅᐸᒍᒪᓂᕋᖅᖢᓂ ᐊᒻᒪ ᒪᒥᐊᑦᑕᕆᐊᕐᑐᕐᓗᓂ ᐅᐸᒍᑎᓯᒪᓗᓂ, ᐅᓇ ᐅᖃᓚᐅᕐᑐᖅ ᐃᒃᓯᕋᕐᔪᐊᕌᓗᒃ ᕗᐃᓕᐊᒻᒪ ᒪᒃᒍᕌᑕᓐ, ᐃᓚᒋᔭᐅᔪᖅ ᑲᓇᑕᒥ ᑲᑎᒪᔨᕐᔪᐊᑦ ᑲᑐᓕᒃ ᐃᒃᓯᕋᕐᔪᐊᕌᓗᖏᓐᓄᑦ, ᐊᒻᒪ ᐃᓚᒋᔭᐅᒋᓪᓗᓂ ᐱᓇᓱᐊᕈᓯᐅᓚᐅᕐᑐᒥ ᕉᒻᒧᐊᖃᑕᐅᔪᓂᒃ.

ᓇᓗᓇᕋᓗᐊᕐᑎᓪᓗᒍ ᖃᑯᒍ ᑕᒪᐅᙵᓛᕆᐊᒃᓴᖓ, ᐅᓇ ᒪᒃᒍᕌᑕᓐ ᐅᖃᓚᐅᕐᑐᖅ ᐃᒃᓯᕋᕐᔪᐊᕌᐱᒃ ᕗᕌᓐᓯᔅ ᑕᒪᑐᒪᓂ ᐊᕐᕌᒍᒥ ᐳᓛᑐᐃᓐᓇᕆᐊᖃᕋᓱᒋᔭᖓ.

ᑕᒪᐅᓈᖓᔪᒃᑯᑦᑕᐅᖅ ᐅᑯᐊ ᑳᑐᓕᒃ ᑐᒃᓯᐊᕐᕕᒃ ᐃᓄᖕᓂ ᐱᓕᕆᖃᑎᖃᕐᓂᐊᕐᓂᕋᖅᑐᑦ ᐃᒃᓯᕋᕐᔪᐊᕐᒥᒃ ᐊᑖᑕ ᔪᐊᓇᔅ ᕆᕗᐊ ᐃᖅᑲᖅᑐᖅᑕᐅᑎᓪᓗᒍ.

“ᐱᓕᕆᖃᑎᖃᕐᓯᒪᒐᑦᑕ ᑳᑐᓕᒃ ᑐᒃᓯᐊᕐᕕᒃᒥ ᐊᒻᒪᓗ ᐅᕙᑦᑎᓐᓂ ᐱᓕᕆᖃᑎᖃᕈᒪᓚᐅᕐᖢᑎᒃ ᑖᓐᓇ ᐃᖅᑲᖅᑐᖅᑕᐅᔭᕆᐊᖃᕐᓂᖓᒍᑦ,” ᐅᐱᐊᑦ ᐅᖃᕐᑐᖅ.

ᕆᕗᐊ ᐸᓯᔭᒃᓴᐅᑎᑕᐅᖕᒪ ᖁᓄᔪᕐᓂᐊᕐᓯᒪᓂᖓᓂᒃ ᐃᓄᐃᑦ ᓱᕈᓯᖏᓐᓂᒃ ᓄᓇᕗᒥᑦ ᐱᓕᕆᐊᖃᖅᑎᓪᓗᒍ     1960-ᖏᓐᓂᒃ 1992 ᑎᑭᖢᒍ ᑲᓇᑕᒥ ᐊᐅᓪᓚᖅᑎᓪᓗᒍ. ᒫᓐᓇᓕ ᕗᕌᓐᔅᒥ ᓄᓇᖃᕐᓂᕋᖅᑕᐅᔪᖅ.

ᐱᖓᓱᑦ ᐸᓯᔭᒃᓴᐅᔾᔪᑎᑦ ᖁᓄᔪᕐᓂᐊᕐᓯᒪᓂᖓᓄᑦ ᐅᓇ ᕆᕗᐊ ᓄᖅᑲᖅᑎᑕᐅᓚᐅᕐᓯᒪᖕᒪᑕ ᐅᑯᓇᙵᑦ Public Prosecution Service of Canada(ᐸᓯᔭᒃᓴᓕᕆᔨᒃᑯᑦ ᑲᓇᑕᒥ) 2017-ᒥ. ᑭᓯᐊᓂᓕ ᕕᕝᕗᐊᕆᒥ ᐸᓖᓯᒃᑯᑦ ᓄᓇᕗᒥᑦ ᓄᑖᓂᒃ ᐸᓯᔭᐅᔾᔪᑎᒃᓴᖃᓕᓚᐅᕐᓯᒪᔪᑦ ᑖᔅᓱᒧᖓ ᐊᒃᑐᐊᔪᒥᒃ ᖃᓄᐃᓕᐅᕈᑎᕕᓂᖏᓐᓂᒃ 47 ᐊᕐᕌᒍ ᓯᕗᓂᐊᓂᒃ.

Share This Story

(0) Comments

Join the Conversation

Your email address will not be published. Required fields are marked *

*