ᐃᒃᓯᕋᕐᔪᐊᖑᔪᓐᓃᖅᑎᑕᐅᓯᒪᔪᖅ ᐃᐅᕆᒃ ᑎᔭᐃᒍ ᐃᖃᓗᐃᑦ ᐃᖅᑲᖅᑐᐃᕕᖓᓄᐊᓚᐅᕐᑐᖅ

For an English version of this story, please see Defrocked priest Eric Dejaeger appears in Iqaluit court

ᐃᒃᓯᕋᕐᔪᐊᕕᓂᖅ ᐃᐅᕆᒃ ᑎᔭᐃᒍ, ᓯᕗᓂᐊᒍᑦ ᐸᓯᔭᒃᓴᖑᖅᑎᑕᐅᓚᐅᕐᓯᒪᔪᖅ ᐅᓄᕈᓘᔭᖅᑐᓄᑦ ᖁᓄᔪᕐᓂᐊᖃᑦᑕᕐᓂᑯᖏᓐᓄᑦ ᐊᒻᒪᓗ ᒫᓐᓇ 8ᓂ ᓄᑖᓂᒃ ᐸᓯᔭᒃᓴᖑᖅᑎᑕᐅᓚᐅᕐᓂᖓᓄᑦ ᐃᖃᓗᐃᑦ ᐃᖅᑲᖅᑐᐃᕕᖓᓃᓚᐅᕐᑐᖅ ᔫᓂ 8ᖑᑎᓪᓗᒍ.

6 ᐃᓄᐃᑦ ᑎᔭᐃᒍᒧᑦ ᖁᓄᔪᕐᓂᐊᖅᑕᐅᓂᕋᓚᐅᕐᑐᑦ ᐃᒡᓗᓕᒃᒥ 1978ᓗ ᐊᒻᒪ 1982 ᐊᑯᓐᓂᖓᒍᑦ, ᑕᐃᑲᓂ ᐃᒃᓯᕋᕐᔪᐊᖑᑎᓪᓗᒍ ᐃᒡᓗᓕᒃᒥ.

ᐃᖅᑲᖅᑐᐃᕕᒃᒥ ᕿᓚᒥᕈᓗᒃ ᐱᓕᕆᐊᖑᓚᐅᕐᑐᖅ. ᐊᓐᓄᕌᕐᓯᒪᓪᓗᓂ ᓯᐊᕐᓇᕐᒥ ᐅᕕᓂᕈᕐᒥ ᖃᐅᓪᓗᖅᑐᓂᒃ ᐊᒻᒪ ᐊᐅᐸᖅᑐᒥ ᑕᕐᓴᖃᖅᖢᓂ ᐊᐃᖏᑦ, ᑎᔭᐃᒍ ᓂᐱᖃᓚᐅᙱᑦᑐᖅ ᐊᒻᒪ ᖃᓄᐃᓐᓂᕐᒥᓂᒃ ᓴᕿᑎᑦᑎᓯᒪᙱᖢᓂ ᑖᓐᓇ ᐃᖅᑲᖅᑐᐃᕕᒃ ᑐᓴᒐᒃᓴᓕᕆᔨᓂ ᐃᓄᖃᕈᓘᔭᖅᖢᓂ ᖁᙱᐊᖅᑐᓂᒃ.

ᑎᔭᐃᒍ, 76, ᑎᒍᔭᐅᓚᐅᕐᓯᒪᔪᖅ ᑭᖕᔅᑕᓐ, ᐋᓐᑎᐅᕆᐅᒥ ᔫᓂ 7ᒥ ᑲᓇᑕᓕᒫᒥ ᕿᓂᖅᑕᐅᑎᓪᓗᒍ.

ᑐᓴᖅᑎᑦᑎᑎᓪᓗᒋᑦ ᑎᒍᔭᐅᓂᖓᓂᒃ, ᓄᓇᕗᒥᑦ ᐸᓖᓯᒃᑯᑦ ᐸᓯᔭᒃᓴᐅᔾᔪᑎᖏᑦ ᐃᓚᒋᔭᐅᓂᖏᓐᓂᒃ ᖃᐅᔨᓴᕈᑎᐅᓚᐅᕐᓯᒪᔪᓄᑦ 2011ᒧ ᐊᒻᒪ 2015 ᐊᑯᓐᓂᖓᓂᒃ.

ᑎᔭᐃᒍ ᐸᓯᔭᒃᓴᐅᓂᕋᖅᑕᐅᓚᐅᕐᓯᒪᔪᖅ 2015ᒥ 30 ᐅᖓᑖᓃᑦᑐᓄᑦ ᖁᓄᔪᕐᓂᐊᕈᑎᕕᓂᖏᓐᓄᑦ 1974ᓗ 1989ᓗ ᐊᑯᓐᓂᖓᓂᒃ.

ᐊᕐᕌᓂ ᐊᓂᑎᑕᐅᒪᐅᕐᓯᒪᔪᖅ ᑎᒍᔭᐅᓯᒫᓪᓚᓚᐅᖅᖢᓂ ᐊᕐᕌᒍᓂᒃ 6ᓂ ᑎᒍᔭᐅᓯᒪᓪᓗᓂ ᐊᕐᕌᒍᓂ 19ᓂ ᑎᒍᔭᐅᓯᒪᓂᐊᓚᐅᕐᓯᒪᓪᓗᓂ, ᑖᓐᓇᓗ ᐃᓚᖃᓚᐅᖅᖢᓂ ᑎᒍᔭᐅᓯᒪᓂᑯᖏᓐᓂᒃ ᐸᓯᔭᒃᓴᐅᓂᕐᒧᑦ ᐱᓕᕆᐊᖑᕙᓪᓕᐊᑎᓪᓗᒍ.

ᐱᕋᔭᒃᓯᒪᔭᖏ ᐊᕐᕌᒍᖃᓚᐅᕐᓯᒪᔪᑦ 9ᓂ 13ᒧ.

ᑎᔭᐃᒍ ᓱᕈᓯᓕᕆᔨᐅᓂᕋᖅᑕᐅᓚᐅᕐᓯᒪᔪᖅ ᐃᖅᑲᖅᑐᐃᕕᒃᑯᑦ ᖃᐅᔨᓴᖅᑕᐅᖁᔭᐅᓚᐅᕐᓯᒪᑎᓪᓗᒍ ᐃᓱᒪᓕᕆᔨᒃᑯᓐᓂᒃ 1989ᒥ.

ᑎᒍᔭᐅᓯᒪᓚᐅᕐᓯᒪᖕᒥᔪᖅ 1990ᒥ 1995ᒧ ᖁᓄᔪᕐᓂᐊᖅᓯᓯᒪᓂᕐᒨᖓᔪᓄᑦ ᐱᕋᔭᐅᑎᓄᑦ.

ᑎᔭᐃᒍ ᑭᖑᓪᓕᕐᒥ ᐃᖅᑲᖅᑐᐃᕕᒃᒥ ᐱᓕᕆᐊᖑᓂᐊᕐᔪᖅ ᔫᓂ 27ᐅᓕᕐᐸᑦ.