ᐃᒡᓗᓕᒃᒥᐅᑕᖅ ᐊᖑᑎ ᐸᓯᔭᒃᓴᖅ ᑲᐱᓯᓪᓗᓂ ᑐᖁᑎᑦᑎᓂᕐᒥᒃ ᐃᓅᓱᒃᑐᒥᒃ ᐊᕐᓇᕐᒥ

For the English version of this story, please see Igloolik man guilty in stabbing death of teenage girl.

ᐃᑉᐸᒃᓴᖓᓂ ᔨᐅᕆ ᐅᓛᔪᕈᓗᒃ ᑲᐱᓯᓚᐅᕐᑎᓐᓇᒍ ᐃᓅᓱᒃᑐᒥ ᐊᕐᓇᕐᒥ ᑐᖁᖢᓂᐅᒃ ᐃᒡᓗᖓᓂ 2018ᒥ, ᐅᓇ ᐊᕐᕌᒍᓕᒃ 43ᓂ ᐃᒡᓗᓕᒃᒥᐅᑕᖅ ᒪᕐᕉᖕᓂ ᐃᓅᖕᓂ ᐋᓐᓂᕐᓯᕆᓛᓘᓚᐅᕐᓯᒪᔪᑦ ᐊᒃᓱᐊᓗᒃ ᐊᒻᒪ ᐅᐸᖃᑕᐅᓯᒪᔪᓂᒃ ᐅᖃᐅᓯᐅᓪᓗᓂ ᐋᖓᔮᖅᑰᔨᓂᖓᓂᒃ ᐊᒻᒪ ᓂᙵᐅᒪᓂᖓᓂᒃ.

ᐋᒐᓯ 3ᒥ ᐅᓛᔪᕈᓗᒃ ᓂᐱᖃᙱᖢᓂ ᐃᒃᓯᕚᖅᑐᖅ ᐃᖃᓗᐃᑦ ᐃᖅᑲᖅᑐᖅᑕᐅᕝᕕᖓᓂᒃ ᒪᓕᒐᓕᕆᔨ ᑯᕆᔅᑎᐊᓐ ᓚᐃᐊᓐᔅ ᐅᖃᓪᓚᒃᑎᓪᓗᒍ ᐅᓛᔪᕈᓗᒃ ᑐᖂᑦᑎᓂᖓᓂᒃ ᐃᖅᑲᖅᑐᖅᑕᐅᑎᓪᓗᒍ: ᐸᓯᔭᒃᓴᐅᔪᖅ.

ᐅᓛᔪᕈᓘᑉ ᓗᐊᐃᔭᖓ, ᒍᕆᒡ ᕌᔾᔪᔅ, ᐃᓱᒪᓚᐅᕐᑐᖅ ᓚᐃᐊᓐᔅ ᐸᓯᔭᒃᓴᐅᑎᑦᑎᖁᓪᓗᓂᐅᒃ ᐱᔮᕆᓇᓂ ᑐᖂᑦᑎᓂᒃᑯᑦ, ᑭᓯᐊᓂᓕ ᐃᖅᑲᖅᑐᐃᔨ ᖃᓄᐃᓕᐅᕐᓂᖓᓄᑦ ᑐᖂᑦᑎᓂᕐᒧᑦ ᑎᒍᔭᐅᔭᕆᐊᖃᕐᓂᕋᖅᖢᓂᐅᒃ.

ᐅᕙᓂ ᐃᓱᒪᓕᐊᖓᓂ ᒪᒃᐱᒐᓕᒃ 20-ᓂ ᑎᑎᕋᖅᓯᒪᔪᓂᒃ, ᓚᐃᐊᓐᔅ ᐅᖃᐅᓯᖃᓚᐅᕐᑐᖅ ᖃᓄᐃᑉᐸᓪᓕᐊᒍᑦ ᓂᑰᓂᖏᓐᓂᒃ ᐅᒃᑑᐱᕆ 25, 2018 ᐅᓐᓄᖓᓂᒃ, ᐊᒻᒪᓗ ᐅᓐᓄᐊᖓᓂ ᖃᐅᒃᐸᙳᓕᖅᑎᓪᓗᒍ ᐅᖃᐅᓯᐅᑲᑕᖕᓂᖏᑦᑎᒍᑦ ᐃᖅᑲᖅᑐᖅᑕᐅᑎᓪᓗᒍ.

ᐃᖅᑲᖅᑐᐃᕕᒃ ᑐᓴᓚᐅᕐᓯᒪᔪᑦ ᐅᓛᔪᕈᓗᒃ ᐃᓚᐅᓚᐅᕐᓂᖓᓂᒃ ᑲᑎᖃᑎᒌᒃᑐᓂ ᐱᖃᓐᓇᖏᓐᓂᒃ ᐊᒻᒪ ᐃᓚᖏᓐᓂᒃ ᑕᐃᑲᓂᓗ ᑖᒃᑯᐊ ᓴᙱᔪᒥᒃ ᐃᒥᐊᓗᒃᖢᑎᒃ ᐅᓐᓄᓕᒫᖅ.

ᑕᕝᕙᓂ ᐅᓛᔪᕈᓗᒃ ᐋᓐᓂᕐᓯᕆᒻᒪᕆᓚᐅᕐᓯᒪᔪᖅ ᒪᕐᕉᖕᓂ ᐃᓅᖕᓂ ᐊᒻᒪ ᐊᓂᓪᓗᓂ ᐸᓖᓯᑦ ᖃᐃᓚᐅᙱᓐᓂᖏᓐᓂᒃ, ᐅᖃᕐᓯᒪᔪᖅ ᐃᓱᒪᓕᐅᕈᑎᒋᔭᐅᔪᖅ.

ᓯᕗᓂᐊᓂᒃ 4:00 ᐅᓪᓛᒃᑯᑦ ᐅᒃᑑᐱᕆ 26ᒥ ᐅᓛᔪᕈᓗᒃ ᐸᓖᓯᓄᑦ ᐅᖄᓚᓚᐅᕐᓯᒪᔪᖅ, ᐅᖃᖅᖢᓂ “ᑐᖂᑦᑎᔪᖃᒻᒪᑦ ᐃᒡᓗᓕᒃᒥ ᐊᒻᒪ ᐃᒻᒥᓂᐅᓂᕋᖅᖢᓂ,” ᓚᐃᐊᓐᔅ ᐅᖃᓚᐅᕐᑐᖅ ᐅᖃᓕᒫᖅᖢᓂ ᐃᓱᒪᓕᐅᕈᑎᒋᔭᖏᓐᓂᒃ.

ᐸᓖᓯᒃᑯᑦ ᕿᓚᒥᕈᓗᒃ ᐅᐸᒍᑎᓚᐅᕐᓯᒪᔪᑦ ᑕᑯᓪᓗᑎᒃ ᐃᓅᓱᒃᑐᒥᒃ ᑲᐱᔭᐅᓯᒪᔪᒥᒃ ᓂᕿᓕᐅᕐᕕᒃᒥ ᓴᕕᐅᓲᒧᑦ ᑕᑭᓂᖃᓪᓗᐊᖅᖢᓂ 20 ᓴᓐᑎᒦᑕᓂᒃ.

ᑖᓐᓇ ᐋᓐᓂᐊᕐᕕᓕᐊᕈᔾᔭᐅᓚᐅᕐᓯᒪᔪᖅ ᑭᓯᐊᓂᓕ ᐃᓅᔪᓐᓃᕋᓱᒋᔭᐅᓚᕐᑐᖅ 2 ᒥᓂᑦᔅ ᑲᐱᔭᐅᕌᓂᒃᑎᓪᓗᒍ, ᑖᓐᓇ ᐃᖅᑲᖅᑐᐃᕕᒃᒥ ᐅᖃᐅᓯᐅᓪᓗᓂ.

ᓚᐃᐊᓐᔅ ᐃᓱᒪᓕᐅᖅᑕᖏᓐᓂᒃ ᐅᖃᓕᒫᕐᑎᓪᓗᒍ, ᐃᓚᖓ ᑭᐅᓗᒍᑎᕕᓂᖅ ᕌᔾᔪᔅᒧ ᐃᒪᐃᓕᖓᓚᐅᕐᑐᖅ ᐅᓇ ᑲᐱᓯᓂᖓ ᐱᔮᖅᑯᒨᙱᓐᓂᕋᖅᖢᓂᐅᒃ ᐊᒻᒪ ᐅᓛᔪᕈᓗᒃ ᐊᖔᔮᓗᐊᒥ ᖃᐅᔨᒪᓚᐅᙱᒻᒪ ᖃᓄᐃᓕᐅᕐᓂᖏᑦ ᐃᓅᔪᓐᓃᕈᑎᐅᓇᔭᕆᐊᒃᓴᖓᓂᒃ.

ᐃᖅᑲᖅᑐᐃᕕᒃᒥ ᑐᓴᓚᐅᕐᑐᑦ ᐅᓛᔪᕈᓗᒃ ᒪᒥᐊᓪᓚᕆᒃᓯᒪᓂᖓᓂᒃ ᒪᒥᐊᓈᑲᑕᖕᓂᖓᓂᒃ ᑎᒍᔭᐅᓚᐅᕐᑎᓪᓗᒍ ᐊᒻᒪᓗ ᐊᐱᕆᑲᑕᐃᓐᓇᖅᖢᓂ ᐆᒪᒐᓗᐊᕐᒪᖔᑦ ᑲᐱᔭᖓ.

ᐸᓯᔭᒃᓴᙳᖅᑎᑕᐅᓚᕋᓂ, ᐸᓖᓯᓄᑦ ᐅᖃᐅᔾᔭᐅᓚᐅᕐᑐᖅ ᐸᓯᔭᒃᓴᐅᑎᑕᐅᓂᐊᕐᓂᖓᓂᒃ ᐋᓐᓂᕐᓱᐃᕆᓂᕐᒧᑦ. ᑕᐃᒪᐃᓐᓂᖓᓄᑦ ᐅᓇ ᐱᔮᕆᓇᓂ ᐃᓅᔪᓐᓃᖅᑎᑦᑎᓂᕐᒧᑦ ᐸᓯᔭᒃᓴᙳᕈᓂ ᑕᐃᒪᓕ ᓈᒻᒪᖕᓂᕐᓴᐅᓇᔭᕐᑐᖅ, ᕌᔾᔪᔅ ᑭᐅᓗᒃᖢᓂ ᐅᖃᕐᑐᖅ.

ᑕᐃᒪᓕ ᐸᓯᔭᒃᓴᐅᑎᑦᑎᓂᕐᒧᑦ ᐃᖅᑲᖅᑐᐃᔨ ᔮᓐ ᒪᒃᕚᓚᓐ ᑭᐅᓚᐅᕐᒥᔪᖅ ᐊᓯᖏᑦ ᖃᐅᔨᔭᐅᔾᔪᑎᑦ ᓇᓗᓇᐃᕐᓯᔾᔪᑎᑐᐃᓐᓇᐅᓚᐅᙱᒻᒪᑕ ᑐᖂᑦᑎᓂᖓ ᐱᔮᕆᓂᕐᒨᖓᓂᖓᓂᒃ ᑭᓯᐊᓂᓕ ᐅᓛᔪᕈᓗᒃ ᖃᐅᔨᒪᓪᓗᐊᓚᐅᕐᑐᖅ ᖃᓄᐃᓕᐅᕐᓂᖓ ᐃᓅᔪᓐᓃᕈᑎᐅᓇᔭᕐᓂᖓᓂᒃ.

ᓴᖅᑭᑎᑦᑎᔾᔪᑎᐅᔪᑦ ᓴᖅᑭᑎᑦᑎᓯᒪᓚᐅᕐᒪᑦ ᐊᑕᐅᓯᖅ ᑲᐱᔭᖓ ᓴᒡᕕᐊᒎᖓᓚᐅᕐᒪᑦ ᐊᒻᒪᓗ ᑕᐃᒪᐃᑎᑦᑎᔪᓐᓇᖅᖢᑎᒃ ᐊᒃᓱᕈᒻᒪᕆᒡᓗᓂ ᓴᕕᖕᒧᑦ ᑲᐱᓯᓗᓂ.

ᐃᖅᑲᖅᑐᐃᔨ ᕿᐅᓚᐅᕐᒥᔪᖅ ᐅᓛᔪᕈᓗᒃ ᐊᖓᔮᓗᐊᙱᓐᓂᕐᓴᐅᓚᐅᕐᓂᖓᓂᒃ ᐅᓄᓵᖑᓚᐅᕐᑐᒥᑦ ᐃᒥᕐᑎᓪᓗᒋᑦ.

ᐃᓱᒪᓕᐊᖓᓂ, ᓚᐃᐊᓐᔅ ᐅᖃᓚᐅᕐᑐᖅ ᐅᓛᔪᕈᓗᒃ “ᑖᖅᑎᓯᒪᓚᐅᙱᒻᒪᑦ” ᐸᓖᓯᒃᑯᑦ ᐃᒡᓗᖓᓄᐊᖅᑎᓪᓗᒋᑦ.

ᐃᖅᑲᖅᑐᐃᔨ ᐅᖃᓚᐅᕐᑐᖅ ᑲᐱᐊᓪᓚᓚᐅᖅᖢᓂᐅᒃ, ᐅᓛᔪᕈᓗᒃ ᐅᖄᓚᔪᓐᓇᓚᐅᕐᓂᖓᓂᒃ ᖁᓕᓂ ᓇᐃᓴᐅᑎᓕᒃᒥ ᐸᓖᓯᑦ ᑐᐊᕕᕐᓇᖅᑐᓄᑦ ᐅᖄᓚᐅᑎᖓᓄᑦ ᐊᒻᒪᓗ ᐸᓖᓯᒃᑯᑦ ᓄᓇᓯᐅᑎᖓᓄᙵᐅᓪᓗᓂ ᐃᑲᔪᖅᑕᐅᙱᖢᓂ ᐊᒻᒪᓗ ᑎᒍᔭᐅᓯᒪᑎᓪᓗᒍ ᑭᐅᑦᑎᐊᖃᑦᑕᓚᐅᕐᓂᖓᓂᒃ ᐊᒻᒪ ᐅᔾᔨᕈᓱᑦᑎᐊᖅᖢᓂ.

ᐅᓛᔪᕈᓗᒃ ᑭᖑᙱᓚᐅᕐᑐᖅ ᐊᒻᒪ ᓂᐊᖁᓂ ᐊᐅᓚᑎᖢᓂᐅᒃ ᐸᓯᔭᒃᓴᐅᓂᖓ ᐅᖃᐅᓯᐅᓕᕐᑎᓪᓗᒍ.

ᐸᓯᔭᒃᓴᐅᓂᖓᓄᑦ ᐃᖅᑲᖅᑐᖅᑕᐅᒃᑲᓐᓂᓛᖅᑐᖅ ᐋᒐᓯ 25ᒥ, ᑕᐃᑲᓂᓕ ᐃᓅᔪᓐᓃᖅᑑᑉ ᐃᓚᖏ ᐅᖃᕈᓐᓇᓛᖅᖢᑎᒃ ᐊᒃᑐᖅᑕᐅᓯᒪᔾᔪᑎᖏᓐᓂᒃ.

ᑲᓇᑕᒥ ᑐᖂᑎᓂᕐᒧᑦ ᐸᓯᔭᒃᓴᐅᔪᑦ ᐃᓅᓯᓕᒫᖏᓐᓂ ᑎᒍᔭᐅᓯᒪᑎᑕᐅᕙᒃᑐᑦ ᐊᒻᒪ ᐊᓂᔪᓐᓇᕐᓗᑎᒃ ᐊᕐᕌᒍᓂ ᖁᓕᓂᑦ (10) ᐊᕙᑎᓂ ᐊᒻᒪ ᑕᓪᓕᒪᓂᒡᓗ (25).

ᐅᓛᔪᕈᓗᒃ ᑎᒍᔭᐅᓯᒪᓕᕐᑐᖅ ᐊᕐᕌᒍᓂᑦ ᑎᓴᒪᓂ ᑕᐃᒪᙵᑦ ᑎᒍᔭᐅᓚᐅᕋᒥ.