ᐃᒡᓗᕐᔪᐊᖅ ᒥᑭᑦᑐᑯᓗᒃ ᑕᑯᔭᒃᓴᖅ ᑎᑭᑉᐳᖅ ᑰᔾᔪᐊᖅᒧᑦ

ᓄᓇᕕᒃ ᐃᒡᓗᓕᐅᕐᑎᑦ ᒪᓂᒻᒪᐃᓕᕐᐳᑦ ᒥᑭᑦᑐᑯᓗᖕᓂᒃ ᐃᒡᓗᓕᐅᕐᓂᕐᒥᓐ

ᐃᒡᓗᕐᔪᐊᖅ ᒥᑭᑦᑐᑯᓗᒃ ᑕᑯᔭᒃᓴᖅ, ᐅᑯᓇᙵᑦ ᓄᓇᕕᒃ ᐃᒡᓗᓕᐅᕐᑎᓂᒃ, ᑰᔾᔪᐊᕐᒧᑦ ᑎᑭᑎᑕᐅᓂᑯ ᐅᒥᐊᕐᔪᐊᒃᑯᑦ ᐊᐅᔭᐅᕋᑖᕐᑐᖅ. (ᐊᔾᔨᙳᐊᖅ ᓄᓇᕕᒃ ᐃᒡᓗᓕᐅᕐᑎᓂᒃ)

By ᐃᓚᐃᓐ ᐋᓐᓱᒥ

For an English version of this story, see Model tiny home arrives in Kuujjuaq

ᓯᕗᓪᓕᖅᐹᖑᔪᑦ ᒥᑭᑦᑐᑯᓗᖕᓂᑦ ᐃᒡᓗᒃᓴᓂᒃ ᓴᓇᔭᐅᓯᒪᔪᓂᒃ ᓄᓇᕕᒃᒧᑦ ᑎᑭᓚᐅᕐᐳᑦ ᐅᒥᐊᕐᔪᐊᒃᑯᑦ ᑰᔾᔪᐊᕐᒧᑦ ᐊᐅᔭᐅᓚᐅᕐᑐᖅ.

“ᑕᑯᑎᑦᑎᔪᒪᓚᐅᕐᕋᒪ ᖃᓄᖅ ᐱᐅᑎᒋᔪᓂᒃ ᐃᒡᓗᓕᐅᓚᐅᕐᓂᑦᑎᓐᓂᒃ ᐅᐊᖕᓇᕐᒥᐅᓄᑦ,” ᐅᖃᖅᑐᖅ ᕗᐃᓕ ᒐᑦᐳᐊ, ᐱᒋᐊᖅᑎᑦᑎᔨᐅᖃᑕᐅᔪᖅ ᓄᓇᕕᒃ ᐃᒡᓗᓕᐅᕐᑎᓂᒃ, ᐊᖏᕐᕋᕆᔭᐅᔪᓂᒃ ᖃᓄᐃᓕᖓᓂᒃᓴᖓᓂᒃ ᐋᖅᑭᒃᓱᐃᔨ ᐊᒻᒪ ᓴᓇᔨ ᑎᑎᕋᕐᕕᖕᓂᒃ ᑰᔾᔪᐊᕐᒥᑦ ᐊᒻᒪ ᓇᐃᐳᕕᐅᓪ, ᑯᐸᐃᒃᒥᑦ.

ᐊᕐᕌᒍ ᖁᓖᑦ ᓯᕗᓂᐊᓂᑦ, ᒑᑦᐳᐊ, ᑰᔾᔪᐊᖅᒥᑦ ᓱᓪᓗᓕᕆᔨ, ᑭᐊᒃᓴᐅᑎᓂᒃ ᓴᓇᔨᐅᓪᓗᓂ ᐊᒻᒪᓗ ᐃᒡᓗᓕᐅᕐᑎᐅᓪᓗᓂ ᐊᐴᑎᖃᓚᐅᕐᓯᒪᕗᖅ ᐃᒡᓗᓕᕆᓂᕐᒥᑦ ᖃᐅᔨᒪᑦᑎᐊᖅᑐᒥᑦ ᑯᓘᑦ ᔭᓂᐅᓪᒥᑦ.

“ᐅᖃᐅᓯᖃᓕᓚᐅᕐᓯᒪᒐᑦᑕ ᐊᑭᓕᒐᕐᓂᖅᑐᓂᒃ ᐃᒡᓗᖃᕐᓂᕐᒥᑦ ᐅᑭᐅᕐᑕᖅᑐᕐᒥᑦ,” ᒐᑦᐳᐊ ᐅᖃᖅᑐᖅ. “ᐃᒡᓗᐃᑦ ᐅᑭᐅᕐᑕᖅᑐᕐᒥᑦ ᐊᑭᑐᓗᐊᖅᑐᐊᓘᖕᒪᑕ. ᑕᐃᑲᙵᑦ ᐱᒋᐊᓚᐅᕐᓯᒪᔪᖅ.”

ᑕᕝᕙᙵᑦ ᐋᖅᑭᒃᓱᐃᓯᒪᓕᕐᑐᑦ ᖃᓄᐃᓕᖓᓂᐊᕐᓂᖏᑦ ᒥᑭᑦᑐᑯᓗᐃᑦ ᐃᒡᓗᒃᓴᐃᑦ ᐃᓱᒪᒋᔭᖃᖅᖢᑎᒃ ᐅᑭᐅᕐᑕᖅᑐᕐᒥᑦ ᓯᓚᒋᔭᐅᕙᒃᑐᓂᑦ.

ᐃᒡᓗᐃᑦ ᓴᕕᕋᔭᖕᒥᑦ ᓴᓂᕋᖃᖅᑐᑦ ᐊᒻᒪ ᖁᓕᖃᖅᖢᑎᒃ ᐊᓄᕌᖅᑐᒥᑦ ᖃᓄᐃᑕᐅᔪᓐᓇᙱᖢᑎᒃ ᐊᒻᒪᓗ ᐊᑐᑯᑖᖕᓂᕐᓴᐅᔪᓐᓇᖅᖢᑎᒃ ᐊᑐᖅᑕᐃᓂᕐᓴᐅᕙᒃᑐᓂᒃ. ᓴᓇᔭᐅᓯᒪᔪᑦ ᐃᑭᐊᕐᒥᖃᖅᖢᓂ ᐊᖅᑭᑦᑐᔮᓂᒃ ᓴᑎᖏᓐᓄᑦ, ᖁᓕᖏᓐᓄᑦ ᐊᒻᒪ ᖁᓛᓅᖃᖅᑕᐅᓯᒪᔪᓂᒃ ᐊᒻᒪᓗ ᐱᖓᓱᓂᒃ ᖃᓕᕇᒃᑐᓂᒃ ᐃᒐᓛᓕᕐᓱᖅᓯᒪᓪᓗᑎᒃ ᐅᖅᑰᓂᖅ ᓯᓚᒧᐊᖅᑎᑕᐃᓕᒪᓪᓗᒍ.

ᓇᑎᒃᑰᖅᑐᓂᒃ ᐅᖅᑰᓴᐅᑎᖃᖅᑐᑦ, ᒪᑯᓂᖓᐅᙱᑦᑐᖅ ᐊᑭᓐᓇᒧᑦ ᐊᑕᔭᕆᐊᓕᖕᓂᑦ ᐅᖅᑰᓴᐅᑎᓂᒃ, ᐅᖅᑰᓂᖓ ᓇᓕᒋᒃᑎᒐᓱᒃᖢᒍ ᐃᒡᓗᓕᒫᒥᑦ.

“ᐃᓱᒪᔪᖓ ᑕᐃᒪᓐᓇ ᑭᓯᐊᓂ ᐅᑭᐅᕐᑕᖅᑐᕐᒥᓐ,” ᒐᑦᐳᐊ ᐅᖃᖅᑐᖅ. “ᓈᒻᒪᙱᓕᐅᕈᑎᑕᖃᕈᓘᔭᖃᑦᑕᕐᒪᑦ ᐅᖅᑰᓴᐅᑎᓂᒃ ᐊᒻᒪ ᐅᖅᑰᒍᑎ ᐃᓚᐃᓐᓇᖓᓅᓗᐊᖅᐸᒃᖢᑎᒃ. ᐃᓄᐃᑦ ᐅᖃᕐᓂᕐᓴᐅᕙᒃᑐᑦ ᐃᓯᒐᖏᑦ ᖁᐊᖅᐸᓪᓕᐊᓕᕐᓂᕋᖅᖢᓂᒋᑦ. ᐃᒡᓗᖏᑦ ᐃᑭᐊᕐᒥᖃᑦᑎᐊᖅᑑᒐᓗᐊᖅ ᑭᓯᐊᓂᓕ ᐃᓯᒐᐃᔭᖅᑐᑦ.”

ᖃᓄᐃᓕᖓᓂᐊᕐᓂᖓᓄᑦ ᐋᖅᑭᒃᓱᖅᑕᐅᓯᒪᔪᖅ ᓄᓇᕕᒃ ᐃᒡᓗᓕᐅᕐᑎᑦ ᐊᑕᐅᓯᕐᒥ ᐃᒡᓗᕈᓯᓕᒃ ᐃᒡᓗᕋᓛᖅ. (ᐊᔾᔨᙳᐊᖅ ᓄᓇᕕᒃ ᐃᒡᓗᓕᐅᕐᑎᓂᒃ)

ᓴᓇᓯᒪᓂᑰᓂᖓᓄᑦ ᐅᖅᑰᓴᐅᑎᓂᒃ ᐊᒻᒪ ᓱᓪᓗᓕᖕᓂᑦ ᓄᓇᕕᒥᐅᓕᒫᒥᑦ, ᒑᑦᐳᐊ ᑲᒪᒋᔭᖃᖃᑦᑕᖅᑐᖅ ᐃᒡᓗᐃᑦ ᓴᓇᔭᐅᒐᓗᐊᕆᐊᒃᓴᖏᓐᓂᒃ ᐋᖅᑭᒃᓯᒪᓂᕆᓂᐊᖅᑕᖏᑦᑎᒍᑦ, ᑭᓱᓕᒫᑦ ᐋᖅᑭᒃᓱᖅᑎᐊᖅᓯᒪᒐᓗᐊᕆᐊᒃᓴᖏᓐᓂᒃ ᐊᒻᒪ ᑲᒪᒋᔭᕐᓂᕐᓗᑎᒃ.

ᓄᓇᕕᒃ ᐃᒡᓗᓕᐅᕐᑎᑦ ᐊᔾᔨᒌᙱᑦᑑᑎᓂᒃ ᖃᓄᐃᓕᖓᓂᖏᓐᓂ ᒥᑭᑦᑐᑯᓗᖕᓂ ᐃᒡᓗᒃᓴᖁᑎᖃᖅᑐᑦ, ᑎᓴᒪᓂᒃ ᐃᒡᓗᕈᓯᓕᖕᓄᑦ, ᐊᒻᒪ ᐊᓯᐊᓃᕝᕕᒃᓴᑦ ᖃᑎᑎᒐᒃᓴᐅᓪᓗᑎᒃ ᑖᒃᑯᓄᖓ.

ᐃᒡᓗᕈᓯᒃᑲᓐᓂᕐᒥᑦ ᐃᓚᓯᔪᓐᓇᖅᑐᑦ ᐊᒻᒪ ᐊᖏᒡᓕᒋᐊᖅᑕᐅᔪᓐᓇᖅᖢᓂ, ᓲᕐᓗ, ᐊᖏᔫᑎᐅᓂᕐᓴᐅᓕᕈᑎᒃ ᓱᕈᓯᖏᑦ.

ᐃᒡᓗᕐᔪᐊᖅ ᓴᖅᑭᔮᖅᑎᑕᐅᔪᖅ ᑰᔾᔪᐊᕐᒥᑦ ᐊᑕᐅᓯᕐᒥ ᐃᒡᓗᕈᓯᖃᖅᑐᖅ, ᐊᖏᓂᖃᖅᖢᓂ 5 ᒦᑕᔅ ᓴᓂᒧᑦ ᐊᒻᒪ 10 ᒦᑦᑕᔅ ᑐᑭᒧᑦ.

ᐃᓯᕐᕕᖃᖅᑐᖅ ᐃᒡᓘᑉ ᐃᓱᐊᒍᑦ ᓂᕿᓕᐅᕐᕕᖕᒧᑦ ᐊᒻᒪ ᐃᓄᖃᕐᕕᖕᒧᑦ. ᐃᒡᓗᕈᓯ ᐅᖓᑎᑦᑎᐊᖓᓃᑦᑐᖅ ᐊᒻᒪ ᐅᖓᑖᓂ ᐊᓇᕐᕕᒃ. ᐊᐅᓚᐅᑎᖃᕐᕕᖓ ᐊᓯᐊᓂ ᐃᒡᓗᒦᑦᑐᒥ ᐅᖓᑎᑦᑎᐊᖓᓃᑦᑐᒥᒃ.

ᐃᑲᕐᕌᖕᓂ ᒪᕐᕈᓪᓗᐊᕐᓂᒃ ᐃᒡᓗ ᐱᐊᓂᒃᑕᐅᓇᓱᓚᐅᕐᑐᖅ ᐃᓂᖓᓄᐊᖅᑕᐅᓪᓗᓂ ᐊᒻᒪ ᐅᐊᔭᖏᑦ ᐊᒻᒪ ᓱᓪᓗᓕᖏᑦ ᐋᖅᑭᒃᓱᖅᑕᐅᓪᓗᑎᒃ.

ᐅᓇ ᐃᒡᓗ ᓂᐅᕕᖅᑕᐅᔪᓐᓇᖅᑐᖅ $228,000-ᒧᑦ, ᐊᑦᑕᑕᖅᑕᐅᓂᖓᓄᑦ ᐊᒻᒪ ᐃᓗᐊᓃᑦᑐᓕᒫᓄᑦ, ᐅᖃᖅᑐᖅ ᒑᑦᐳᐊ. ᓄᓇᕕᒻᒥ ᐃᒡᓗ ᐊᑭᖃᖃᑦᑕᖅᑐᖅ ᒫᓂ $500,000 ᐊᒻᒪ $600,000 ᐊᑯᓐᓂᖓᓂᒃ, ᐅᖃᖅᑐᖅ.

“ᐃᒡᓗᓕᐅᕋᓱᒃᑲᑦᑕ ᐊᑭᓕᒐᒃᓴᐅᔪᓐᓇᖅᑐᓂᒃ ᐃᓂᖃᑦᑎᐊᕐᓇᖅᑐᓂᒃ ᐊᒻᒪᓗ ᓈᒻᒪᙱᓕᐅᕈᑎᓕᖕᓂ ᐃᒪᕐᒧᑦ ᐊᖅᑯᑎᖏᓐᓄᑦ,” ᐅᖃᖅᑐᖅ ᒑᑦᐳᐊ.

“ᓱᓪᓗᓕᕆᔨᐅᓯᒐᒪᒐ, ᑭᐊᒃᓴᐅᑎᓕᕆᔨᐅᓪᓗᖓᓗ ᐊᒥᓱᓂᒃ ᐊᕐᕌᒐᓂ ᐊᒻᒪ ᐊᒥᓱᑦ ᓴᓇᔭᐅᓯᒪᔪᑦ ᐋᖅᑭᒃᑕᐅᑦᑎᐊᖃᑦᑕᒋᒻᒪᑕ, ᓱᓪᓗᓕᖏᑦ ᓈᒻᒪᙱᖢᑎᒃ, ᐅᖂᓴᐅᑎᓕᕆᓂᖏᑦ ᓈᒻᒪᙱᖢᑎᒃ. ᑕᐃᒪᐃᑦᑐᓂ ᐊᕐᕌᒍᓂ ᐊᒥᓱᓂ ᓴᓇᓯᒪᒐᒪ ᐊᒻᒪ ᐊᓱᐃᓛᒃ ᐱᖃᓕᖅᐳᒍ ᓈᒻᒪᖕᓂᕐᓴᐅᓇᔭᖅᑐᒥᑦ ᐅᑭᐅᕐᑕᖅᑐᕐᒧᑦ.”

ᐃᒡᓗᐃᑦ ᓴᓇᔭᐅᕙᒃᑐᑦ ᓲᐳᕈᒃ, ᑯᐸᐃᒃᒥᑦ, ᐊᒻᒪ ᑕᕿᒥᑦ ᓴᓇᔭᐅᓪᑎᒃ, ᒑᑦᐳᐊ ᐅᖃᖅᑐᖅ, ᐊᒻᒪ ᓄᓇᓯᐅᑎᒃᑯᑦ ᐅᓂᐊᖅᑕᐅᓚᐅᖅᖢᑎᒃ ᐅᒥᐊᕐᔪᐊᒃᑰᓕᖅᐸᒃᖢᑎᒃ. ᑎᑭᓴᐃᒍᑎᓂᒃ ᐱᓚᐅᕐᑎᓪᓗᑕ ᐊᒻᒪᓗ ᐃᓂᒃᓴᓕᐅᕐᓂᖅ ᓈᒻᒪᓈᕐᓯᒪᒍᑎ ᐅᒥᐊᕐᔪᐊᒃᑰᖅᑎᑦᑎᓂᕐᒧᑦ, ᑖᓐᓇ ᐃᒡᓗ ᐃᓂᒃᓴᖓᓃᓕᕈᓐᓇᖅᑐᖅ ᐊᐅᔭᐅᒃᑲᓐᓂᓕᖅᐸᑦ.

“ᓯᕗᓂᒃᓴᑦᑎᓐᓂᓪᓕ, ᑕᒪᓐᓇ ᑲᔪᓯᑦᑎᐊᕈᓂ, ᐃᓱᒪᒋᔭᖃᖅᑐᒍᑦ ᓴᓇᕝᕕᒃᓴᓕᐅᕈᒪᓪᓗᑕ ᐅᑭᐅᕐᑕᖅᑐᕐᒥᓐ,” ᐅᖃᖅᑐᖅ. “ᑭᓯᐊᓂᓕ ᑕᒪᓐᓇ ᑮᓇᐅᔭᑲᓪᓚᖕᓂ ᐊᑐᕆᐊᖃᕐᓇᖅᑐᖅ.”

ᐅᖃᒃᑲᓐᓂᕐᖢᓂ ᑕᒪᒃᑯᐊ ᐃᒡᓗᐃᑦ ᐅᑭᐅᕐᑕᖅᑐᓕᒫᓂ ᓈᒻᒪᒐᔭᖅᑐᖅ ᐊᒻᒪ ᖁᕕᐊᓱᒻᒪᕆᒃᑲᔭᖅᖢᑎᒃ ᑎᑭᓴᐃᔪᖃᕈᓂ ᓄᓇᕗᒥᑦ ᐅᕙᙵᓪᓘᓐᓃᑦ ᑲᓛᖡᑦ ᓄᓇᖓᓂᑦ.

“ᒪᑐᐃᖓᔪᒍᑦ ᐊᒻᒪ ᐅᑕᕿᑐᐃᓐᓇᖅᖢᑕ ᐊᑭᓕᐅᑎᐅᓇᔭᖅᑐᓄᑦ ᖃᐅᔨᔪᒪᔪᓂᒃ ᐊᒻᒪ ᐸᕐᓇᒃᓯᒪᓪᓗᑎ ᐃᒡᓗᓕᐅᕐᓂᕐᒧᑦ,” ᐅᖃᖅᑐᖅ ᒑᑦᐳᐊ. “ᐸᕐᓇᒃᓯᒪᓕᖅᑐᒍᑦ ᐃᑲᔪᕈᓐᓇᖅᖢᑕ ᐃᓄᖕᓂ ᐃᒡᓗᑖᕆᐊᖃᖅᑐᓂᒃ.”

Share This Story

(1) Comment:

  1. Posted by qatsigaartuq? how much is it to buy it one shot? on

    How much is it to buy it completely or rentable?

Join the Conversation

Your email address will not be published. Required fields are marked *

*


Protected with IP Blacklist CloudIP Blacklist Cloud