ᐃᒪᖓᓂᒃ ᒥᐊᓂᖅᓯᔩᑦ ᓴᐳᔾᔨᕗᑦ ᐃᖃᓪᓕᐊᖅᑎᐅᖃᑕᐅᔪᒥ ᐃᓚᒋᔭᐅᔪᒥ ‘ᐋᓐᓂᐊᕐᓂᕐᒧᑦ ᖃᓄᐃᓐᓂᐅᔪᒥ’ ᑕᕆᐅᕐᒦᑎᓪᓗᒋᑦ

ᕿᑭᖅᑖᓗᖕᒥ ᐃᖃᓗᓕᕆᔩᑦ ᐊᐅᓚᑦᑎᔨᒻᒪᕆᖓ ᐅᖃᖅᐳᖅ ᐃᖅᑲᓇᐃᔭᖅᑎᐅᔪᖅ ‘ᖃᓄᐃᓗᐊᙱᓚᖅ’; ᐅᐱᒋᔭᖃᖅᐳᖅ ᐃᒪᖓᓂᒃ ᒥᐊᓂᖅᓯᔨᓂᑦ ᓴᐳᔾᔨᓂᐅᔪᒥ

ᓯᕗᓪᓕᐅᓪᓗᑎᒃ ᑭᐅᔨᐅᕙᒃᑐᑦ ᒥᑦᑎᒪᑕᓕᖕᒥ ᐅᑕᖅᑭᔪᑦ ᑎᑭᓐᓂᐊᕐᓂᖓᓂ ᐃᖃᓪᓕᐊᖅᑎᐅᔪᒥ ᐃᓚᒋᔭᐅᔪᒥ ᐊᑐᕐᓂᖃᓚᐅᖅᑐᒥ ᐋᓐᓂᐊᕕᓕᐊᕆᐊᖃᕐᓂᐅᔪᒥ ᖃᓄᐃᓐᓂᐅᔪᒥ ᑕᕆᐅᕐᒥ ᐋᒍᔅᑎ 8−ᒥ. ᐃᓚᒋᔭᐅᔪᖅ ᖃᓄᐃᓗᐊᙱᓚᖅ ᓅᑕᐅᓚᐅᖅᑎᓪᓗᒍ ᕿᑭᖅᑖᓗᖕᒥ ᐃᖃᓗᓕᕆᔩᑦ ᓯᕗᓪᓕᖅ ᑲᓕᒐᓕᒃ ᐃᖃᓗᒐᓲᑎ ᑲᓇᑕᐅᑉ ᐃᒪᖓᓂᒃ ᒥᐊᓂᖅᓯᔩᑦ ᐅᒥᐊᕐᔪᐊᖓ ᑎᐊᕆ ᕚᒃᔅ, ᑕᑯᒃᓴᐅᔪᒥ ᐅᖓᓯᒃᑐᒥ ᐆᒪᙵᑦ ᐊᔾᔨᖁᑕᐅᔪᒥ. (ᓯᐊᑦ ᑕᑎ ᐊᔾᔨᖁᑎᖓ/ᕙᐃᔅᐳᒃ)

By ᔨᐊᕝ ᐱᓚᑦᑎᐊᐃᒧᑦ
ᓄᓇᓕᖕᓂ ᑐᓴᒐᒃᓴᓕᐅᕐᓂᕐᒧᑦ ᐱᒋᐊᕈᑕᐅᔪᒥ ᑐᓴᒐᒃᓴᓕᐅᖅᑎ

For English version, see Coast guard rescues fishing crew member after ‘health incident’ at sea

ᐃᖃᓪᓕᐊᖅᑎᐅᖃᑕᐅᔪᒥ ᕿᑭᖅᑖᓗᖕᒥ ᐃᖃᓗᓕᕆᔩᑦ ᐅᒥᐊᕐᔪᐊᖓᓂ ᖃᓄᐃᑦᑐᓐᓃᖅᐸᓪᓕᐊᓕᖅᐳᖅ ᐸᓴᒋᔭᐅᓂᕐᒥ ᐆᒻᒪᓯᕆᓂᖓᓂ ᑕᕆᐅᕐᒦᑎᓪᓗᒍ ᐱᒋᐊᖅᑎᑦᑎᓚᐅᖅᑐᒥ ᓴᐳᔾᔨᓂᐅᔪᒥ ᑲᓇᑕᐅᑉ ᐃᒪᖓᓂᒃ ᒥᐊᓂᖅᓯᔨᓂᑦ.

ᓴᐳᔾᔨᓂᖃᓚᐅᖅᐳᖅ ᐋᒍᔅᑎ 8−ᒥ ᐃᖃᓗᓕᕆᔨᒃᑯᑦ ᑲᒻᐸᓂᖓ ᑲᓕᒐᓕᒃ ᐃᖃᓗᒐᓲᑎ ᓯᕗᓪᓕᖅ ᕿᑭᖅᑖᓘᑉ ᑕᕆᐅᖓᓃᑎᓪᓗᒍ, ᐅᖃᐅᓯᐅᓪᓗᓂ ᓕᐊᕋᒥ ᕼᐊᓇᓯ, ᐃᖃᓗᓕᕆᔨᒃᑯᓐᓂ ᑲᓇᑕᒥ ᑕᕆᐅᕐᒥᓗ ᐅᖃᖅᑎᐅᔪᒥ.

ᑲᑐᔾᔭᐅᓪᓗᓂ ᓴᐳᔾᔨᓂᐅᔪᒥ ᐊᐅᓚᑕᐅᓂᖓᓂ ᑐᕋᓐᑎᓐ, ᐋᓐᑎᐊᕆᐅᒥ ᑐᓴᖅᑎᑕᐅᑲᐅᑎᒋᓚᐅᖅᐳᖅ ᖃᓄᐃᓐᓂᐅᔪᒥ ᐃᖏᕐᕋᑎᑦᑎᔪᒥ ᑲᓇᑕᐅᑉ ᐃᒪᖓᓂᒃ ᒥᐊᓂᖅᓯᔨᓂᑦ ᑭᐅᓂᖏᓐᓂ.

“[ᑲᓇᑕᐅᑉ ᐃᒪᖓᓂᒃ ᒥᐊᓂᖅᓯᔩᑦ ᐅᒥᐊᕐᔪᐊᖓ] ᑎᐊᕆ ᕚᒃᔅ ᐱᓕᕆᐊᒃᓴᖃᓚᐅᖅᐳᖅ JRCC ᑐᕋᓐᑕᓐᒥ ᑭᐅᓂᕐᒧᑦ, ᐲᖅᑕᐅᓪᓗᓂ ᐃᓚᒋᔭᐅᔪᖅ ᐅᒥᐊᕐᔪᐊᒥ ᐊᒻᒪ ᐅᓯᔭᐅᓪᓗᓂ ᒥᑦᑎᒪᑕᓕᒃ ᓄᓇᕗᒻᒧᑦ, ᓅᑕᐅᓪᓗᓂ ᓄᓇᓕᖕᓄᑦ ᑐᐊᕕᕐᓇᖅᑐᒥ ᐃᓅᓕᓴᖅᑕᐅᓂᕐᒧᑦ ᐱᔨᑦᑎᕋᕐᓂᐅᔪᒥ,” ᕼᐊᓇᓯ ᐅᖃᓚᐅᖅᐳᖅ ᖃᕋᓴᐅᔭᑎᒍᑦ ᑎᑎᕋᕐᓂᐅᔪᒥ.

“ᓄᓇᓕᖕᓂ ᐃᒪᖓᓂᒃ ᒥᐊᓂᖅᓯᔩᑦ ᐱᓕᕆᔨᐅᔪᓂ ᒥᑦᑎᒪᑕᓕᖕᒥ ᐃᑲᔪᓚᐅᖅᐳᑦ ᓅᑕᐅᓂᖓᓂ ᐋᓐᓂᖅᓯᒪᔪᒧᑦ ᐃᓚᒋᔭᐅᔪᒥ ᑐᐊᕕᕐᓇᖅᑐᓕᕆᔨᒃᑯᓐᓄᑦ.”

ᑐᑭᓯᓇᓗᐊᙱᓚᖅ ᐃᓅᓕᓴᖅᑕᐅᔭᕆᐊᖃᕐᓂᖓᓂ ᖃᓄᐃᓐᓂᐅᓚᐅᖅᑐᒥ, ᑭᓯᐊᓂ ᕿᑭᖅᑖᓗᖕᒥ ᐃᖃᓗᓕᕆᔩᑦ ᐊᐅᓚᑦᑎᔨᒻᒪᕆᖓ ᐅᓂᒃᑳᕆᓚᐅᖅᐸᖓ “ᐸᓴᒋᔭᐅᔪᒥ ᐆᒻᒪᓯᕆᓂᐅᔪᒥ” ᑭᓯᐊᓂ ᐃᓚᒋᐊᖅᓯᓚᐅᖅᐳᖅ ᓇᓗᓇᐃᖅᑕᐅᓚᐅᙱᓐᓂᖓᓂ.

ᐅᒥᐊᕐᔪᐊᒥ ᐃᓚᒋᔭᐅᔪᖅ “ᖃᓄᐃᓗᐊᙱᓚᖅ,”ᐅᖃᓚᐅᖅᐳᖅ.

ᑎᐊᕆ ᕚᒃᔅ “ᐊᖏᓂᖅᓴᐅᔪᒥ ᐃᓅᓕᓴᐃᓂᐅᔪᒥ ᐋᖅᑭᒃᑕᐅᓂᖃᖅᐳᖅ” ᑖᔅᓱᒪᙵᑦ ᓯᕗᓪᓕᕐᒥ, ᕙᓛᓂᒐᓐ ᐅᖃᓚᐅᖅᐳᖅ, ᑕᐃᒫᒃ ᓂᐅᑎᑦᑎᓂᕐᒥ ᐃᓚᒋᔭᐅᔪᒥ ᐃᒪᖓᓂᒃ ᒥᐊᓂᖅᓯᔨᓄᑦ ᓯᕗᓪᓕᐅᔾᔭᐅᑎᑕᐅᓪᓗᐊᓚᐅᖅᐳᖅ.

“ᖃᓄᐃᓐᓂᖃᖅᑎᓪᓗᒍ, ᑳᑉᑕᒋᔭᐅᔪᖅ ᐊᒻᒪ ᐃᖅᑲᓇᐃᔭᖅᑎᖏᑦ ᐃᑭᒪᔪᓂ ᓯᕗᓪᓕᕐᒥ ᐃᕐᙲᓐᓇᑲᐅᑎᒋ ᖃᐅᔨᒋᐊᓚᐅᖅᐳᑦ ᐃᓅᓕᓴᐃᓂᕐᒥ ᐃᑲᔪᖅᓱᐃᓂᐅᔪᒥ ᐱᔨᑦᑎᕋᖅᑎᐅᔪᓄᑦ ᐊᒻᒪ ᐱᓚᐅᖅᐳᑦ ᒪᓕᒃᑕᐅᔭᕆᐊᓕᖕᓂ, ᐃᓚᖃᓚᐅᖅᑐᒥ ᑐᓂᓯᓂᕐᒥ ᐋᓐᓂᐊᖅᑐᒥ ᐊᓂᖅᓵᖅᑑᑎᒥᒃ, ᐃᓅᓕᓴᐅᑎᒥᒃ ᐊᒻᒪ ᐊᓯᖏᓐᓂ ᐱᓕᕆᓂᐅᔪᓂ,” ᕙᓛᓂᒐᓐ ᐅᖃᓚᐅᖅᐳᖅ ᖃᕋᓴᐅᔭᑎᒍᑦ ᑎᑎᕋᕐᓂᐅᔪᒥ.

“ᑎᐊᕆ ᕚᒃᔅ ᐊᒻᒪ ᓯᕗᓪᓕᖅ ᐃᖏᕐᕋᓯᓚᐅᖅᐳᑦ ᑲᑎᓐᓂᐅᔪᒥ ᕿᓚᒻᒥᐅᓛᖑᔪᒥ, ᐃᒪᖅᐱᖕᒥ ᒥᑦᑎᒪᑕᓕᖕᒧᑦ.”

ᐃᓚᒋᔭᐅᔪᖅ ᒥᑦᑎᒪᑕᓕᒃ ᐋᓐᓂᐊᕕᖓᓅᕈᔾᔭᐅᓚᐅᖅᐳᖅ ᓯᒡᔭᒧᐊᕋᒥᒃ, ᐊᒻᒪ ᖃᖓᑕᓲᒃᑯᑦ ᑐᐊᕕᕐᓇᖅᑐᒃᑯᑦ ᐊᐅᓪᓚᖅᑎᑕᐅᓚᐅᖅᐳᖅ ᐃᖃᓗᖕᓄᑦ ᑕᐃᑲᓃᓚᐅᕐᓂᖓᓂ ᐋᒍᔅᑎ 9−ᒥ.

ᕙᓛᓂᒐᓐ ᐅᐱᒋᔭᖃᓚᐅᖅᐳᖅ ᑭᒃᑯᓕᒫᓂ ᐃᓚᐅᖃᑕᐅᔪᓂ ᓴᐳᔾᔨᓂᐅᔪᒥ.

“ᐃᓱᒪᕗᖓ, ᖁᔭᓐᓇᒦᒃ ᓱᒃᑲᔪᒥ ᖃᓄᐃᓕᐅᕐᓂᐅᔪᒥ ᑭᒃᑯᓕᒫᓂ ᕿᑭᖅᑖᓗᖕᒥ ᐃᖃᓗᓕᕆᔨᒃᑯᓐᓂ, ᐃᒪᖓᓂᒃ ᒥᐊᓂᖅᓯᔩᑦ, ᐊᒻᒪ ᒥᑦᑎᒪᑕᓕᖕᒥ ᐋᓐᓂᐊᕕᖓᓐᓂ, ᖃᓄᐃᓗᐊᙱᓚᖅ,” ᕙᓛᓂᒐᓐ ᐅᖃᓚᐅᖅᐳᖅ.

ᓯᕗᓪᓕᖅ ᑭᖑᖕᓄᑦ ᐊᒻᒪ ᖃᓕᕋᓕᖕᓄᑦ ᑲᓕᒐᓕᒃ ᐃᖃᓗᒐᓲᑎᐅᕗᖅ, ᐃᓄᖃᖅᖢᓂ ᐱᓕᕆᔨᐅᔪᓂ 28−ᓂ 30−ᓄᑦ ᐃᓄᖕᓄᑦ, ᐅᖃᐅᓯᐅᓪᓗᓂ ᑕᑯᒃᓴᐅᓂᖓᓂ ᐅᖃᐅᓯᖃᕐᓂᐅᔪᒥ ᕿᑭᖅᑖᓗᖕᒥ ᐃᖃᓗᓕᕆᔩᑦ ᐃᑭᐊᖅᑭᕕᖓᓐᓂ.

ᑭᐊᕆ ᕚᒃᔅ, ᐊᑦᑎᖅᑕᐅᓯᒪᔪᒥ ᖃᐅᔨᒪᔭᐅᕐᔪᐊᖅᑐᒥ ᑲᓇᑕᒥ ᐅᓪᓚᒃᑎᐅᔪᒥ ᐊᒻᒪ ᑳᓐᓱᒧᑦ ᑮᓇᐅᔭᓂ ᐱᕈᖅᓴᐃᔨᐅᔪᒥ, ᐅᖁᒪᐃᑦᑐᒥ ᓯᑯᐃᖅᓯᔾᔪᑕᐅᕗᖅ ᐱᔨᑦᑎᕋᖅᓯᒪᔪᒥ ᑕᐃᒪᙵᓂ 1983−ᒥ, ᐊᒻᒪ ᐃᖅᑲᓇᐃᔭᖅᑎᖃᖅᐳᖅ 23−ᓂ.

Share This Story

(0) Comments