ᐃᒻᒥᓃᖅᑎᑦᑎᑦᑕᐃᓕᓂᕐᒧᑦ ᐅᖄᓚᕝᕕᒃᓴᖅ ᐱᒋᐊᖅᐳᖅ ᐃᑲᔪᕈᑎᒃᓴᐅᓪᓗᓂ ᐃᓄᖕᓂ ᖁᕕᐊᓱᙱᓗᐊᖅᑐᓂᒃ

For English version, see Canada-wide 988 suicide prevention helpline launched to aid people in distress

ᐱᖓᓱᓂ ᓇᐃᓴᐅᑎᓕᒃ ᐃᒻᒥᓃᖅᑎᑦᑎᑦᑕᐃᓕᓂᕐᒧᑦ ᐃᑲᔪᖅᑕᐅᕝᕕᒃ ᐊᑐᐃᓐᓇᐅᓕᕐᑐᖅ ᑲᓇᑕᓕᒫᒥ ᐃᓄᖕᓂ ᐃᑲᔪᕈᑎᒃᓴᐅᓪᓗᓂ ᑯᕕᐊᓱᙱᓗᐊᖅᑐᓂᒃ.

ᐅᓇ 988 ᐃᑲᔪᖅᑕᐅᔪᒪᕝᕕᒃ ᐱᒋᐊᓕᓚᐅᕐᓯᒪᔪᖅ ᓄᕕᐱᕆ 30ᒥ ᒪᑯᓄᖓ ᐃᓄᖕᓄ ᐃᓱᒪᔪᓄᑦ ᐃᒻᒥᓃᕈᒪᓂᕐᒥᒃ ᐅᕝᕙᓘᓐᓃᑦ ᐃᓱᒪᒃᑯᑦ ᖁᕕᐊᓱᙱᓗᐊᖅᑐᓂᒃ ᐅᖃᖃᑎᖃᕈᓐᓇᕐᓗᑎᒃ ᑎᐅᕆᑑᕆᖓᓂᒃ ᐳᕌᕕᓐᓯᖓᓂᓪᓘᓐᓃᑦ ᒪᑯᓄᖓ “ᐃᑲᔪᕈᓐᓇᖅᑐᓄᑦ ᖃᓄᐃᑦᑑᓂᖏᓐᓂᒃ ᐃᓱᒪᙱᑦᑐᓄᑦ,” ᐅᑯᐊ ᒐᕙᒪᑐᖃᒃᑯᑦ ᑕᐃᒪᓐᓇ ᑐᓴᒐᒃᓴᓕᐅᓚᐅᕐᑐᑦ.

ᐊᔾᔨᐸᓗᒋᓪᓗᓂᐅᒃ 911 ᐅᖄᓚᕝᕕᒃᓴᖅ ᑐᐊᕕᕐᓇᖅᑐᓄᑦ ᐋᓐᓂᐊᕕᖕᒧᑦ ᑲᒪᒋᔭᐅᔭᕆᐊᓕᖕᓄᑦ, ᐃᑭᑦᑐᓄᓪᓘᓐᓃᑦ ᐊᒻᒪᓗ ᐸᓖᓯᓄᑦ, ᐅᓇ 988 ᐃᑲᔪᖅᑕᐅᔪᒪᕝᕕᒃᒧᑦ ᐅᖄᓚᐅᑎ ᐊᑐᐃᓐᓇᐅᔪᖅ ᐊᑭᓕᕆᐊᖃᙱᖢᓂ ᐅᖄᓚᐅᑎᑎᒍᑦ ᑎᑎᕋᕐᕕᒋᓗᒍᓘᓐᓃᑦ ᐊᒻᒪᓗ ᑕᐃᒪᙵᓕᒫᖅ ᐊᑐᐃᓐᓇᐅᓪᓗᓂ ᐃᑲᕐᕋᓂ 24ᓂ ᐊᒻᒪ ᐅᓪᓗᕐᓂ 7ᓂ ᐱᓇᓱᐊᕈᓯᕐᒥ ᑲᓇᑕᒥᐅᑕᓄᑦ.

ᑲᓇᑕᒥ ᒫᓂ 12 ᒥᒃᓵᓂᑦ ᐃᓄᖕᓂ ᐃᒻᒥᓃᖅᑐᖃᖃᑦᑕᕐᒪᑦ ᑲᓇᑕᒥ ᖃᐅᑕᒫᓐ ᐅᕝᕙᓘᓐᓃᑦ 4,500 ᐃᓄᖕᓂ ᐊᕐᕌᒍᒥ, ᐅᕘᓇᓕ ᑲᓇᑕᒥ ᐋᓐᓂᐊᖃᕐᓇᙱᑦᑐᓕᕆᔨᒃᑯᑎᒍᑦ.

ᐅᓇ ᐃᑲᔪᖅᑕᐅᔪᒪᕝᕕᒃ ᐅᖄᓚᕝᕕᒃᓴᖅ ᐋᖅᑭᒃᓯᒪᔪᖅ ᕿᓚᒥᕈᓗ ᐃᑲᔪᕈᓐᓇᖅᑐᓂᒃ ᐅᖄᓚᔪᖅ ᐅᖃᖃᑎᖃᖅᑎᓐᓇᓱᒃᖢᒍ ᐊᔪᕈᓐᓃᕐᓴᖅᓯᒪᔪᓂᒃ ᐃᒻᒥᓃᖅᑎᑦᑎᑦᑕᐃᓕᓂᕐᒥᒃ.

ᐅᕘᓇ 988ᑯᑦ ᐱᓕᕆᖃᑎᒌᒃᑐᑦ ᑲᓇᑕᒥ ᐊᑐᐃᓐᓇᐅᑎᑦᑎᔪᑦ ᐃᑲᔪᕈᑎᒃᓴᓂᒃ ᖃᓪᓗᓈᑎᑐᑦ ᐅᕝᕙᓘᓐᓃᑦ ᐅᐃᕖᑎᑐᑦ. ᐊᒻᒪᓗ ᐅᕘᓇ 988ᒧᑦ ᓂᕈᐊᕐᕕᐅᔪᓐᓇᖅᑐᓂᒃ ᒪᑯᐊ ᐃᓄᐃᑦ, ᓄᓇᖃᖅᑳᖅᑐᑦ ᐊᓪᓚᐃᑦ ᐊᒻᒪ ᐊᓪᓚᖓᔪᐃᑦ (Hope for Wellness Helpline) ᐅᖃᕐᕕᐅᔪᓐᓇᖅᑐᑦ ᐅᕝᕙᓘᓐᓃᑦ ᐅᓇ ᐅᖄᓚᕝᕕᐅᓗᓂ 1-855-242-3310.

ᐅᓇ ᐅᖄᓚᕝᕕᒃ (Hope for Wellness Helpline) ᒪᓂᒻᒪᐃᓯᒪᔪᖅ ᐃᑲᔫᑎᖃᕈᓐᓇᖅᖢᑎᒃ ᐃᓄᒃᑎᑐᑦ, ᐊᓪᓚᑎᑐᑦ ᑯᕇᑐ ᐊᒻᒪ ᐅᑉᔨᑉᕗᐃᑐᑦ.

ᐆᒧᖓ 988 ᐱᒋᐊᓕᕐᓂᐊᕐᓗᓂ ᐅᑯᓇ ᒐᕙᒪᑐᖃᒃᑯᑦ ᐃᑲᔪᕐᓯᒪᔪᑦ $156 ᒥᓕᐊᓐ ᑖᓚᓂ ᐊᕐᕌᒍᓄᑦ ᐱᖓᓱᓄᑦ ᐅᑯᓄᖓ ᐊᑐᓗᐊᕐᓂᕐᒧᑦ ᐊᒻᒪ ᐃᓱᒪᒧᑦ ᐋᓐᓂᐊᖅᑐᓕᕆᔨᒃᑯᓐᓄᑦ.

“ᐊᑕᐅᓰᕐᓗᓂᓘᓐᓃᑦ ᐅᖃᓪᓚᖃᑎᖃᕐᓗᓂ ᐃᑲᔪᕈᑎᐅᔪᓐᓇᕐᒪᑦ ᐃᓄᖕᓂ ᓴᙱᒃᑎᑉᐹᓪᓕᖅᑎᑦᑎᔾᔪᑎᐅᓗᓂ ᐊᒻᒪᓗ ᓯᕗᒧᑦ ᐱᕙᓪᓕᐊᓕᕈᑎᐅᔪᓐᓇᖅᖢᓂ,” ᐅᖃᕐᑐᖅ ᓘᒃᑖᖅ ᐋᓕᓴᓐ ᑯᕌᕗᑦ, ᐃᓱᒪᓕᕆᔨ ᐊᒻᒪᓗ ᐊᖓᔪᖅᑳᕆᔭᐅᓪᓗᓂ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐅᖄᓚᕝᕕᐅᓕᖅᑐᒧᑦ, ᐅᖃᕐᓯᒪᓚᐅᕐᒥᔪᖅ ᑐᓴᒐᒃᓴᓕᐊᕆᔭᐅᔪᐃᑦ.

“ᓱᕙᓕᑭᐊᕆᓕᕈᕕᒃ ᐃᓱᒪᒃᑯᑦ ᑕᐃᒪᓕ ᑐᓴᐅᒪᖁᔨᕗᒍᑦ: ᐃᓄᑑᙱᑦᑐᑎᑦ.”