ᐃᓂᒋᔭᐅᑲᐃᓐᓇᕐᕕᒃᓴᖅ ᐊᖏᕐᕋᖃᙱᑦᑐᓄᑦ ᐃᓄᖕᓄᑦ ᒪᓐᑐᕆᐊᒥ ᓴᐳᔨᓯᒪᒍᑎᐅᕗᖅ ᓄᕙᒡᔪᐊᕐᓇᖅ-19-ᒥᑦ

“ᐱᓕᕆᐊᖃᕋᓱᒻᒪᕆᒃᑲᑦᑕ ᑕᒪᓐᓇ ᐱᒋᐊᖅᑎᑦᑕᐃᓕᓪᓗᑎᒍᑦ”

ᐊᑐᖅᑕᐅᓚᐅᑲᖕᓂᐊᖅᑐᖅ ᐊᖏᕐᕋᖃᙱᑦᑐᓄᑦ ᒪᑐᕆᐊᒥ ᓄᓇᖃᖅᑳᖅᑐᓂᒃ, ᑖᓐᓇᓗ ᒪᑐᐃᖓᓂᐊᖅᖢᓂ ᒪᐃ 19 ᑎᑭᓪᓗᒍ, ᐅᕙᓃᑦᑐᖅ ᓕᑐᓪ ᐳᒐᓐᑎ ᐱᙳᐊᕈᑎᑖᕐᕕᒃᒥᑦ. (ᐊᔾᔨᙳᐊᖅ ᐅᑯᓇᙵᑦ Projets Autochtones du Québec)

By ᔭᐃᓐ ᔪᐊᔾ

For an English version of this story, see Temporary shelter offers homeless Inuit in Montreal protection from COVID-19

ᒪᓐᑐᕆᐊᒥ ᐊᒻᒪᓗ ᑕᒪᐅᖓ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᑲᑎᒪᔨᖏᑦ ᐱᓕᕆᖃᑎᒌᒃᖢᑎᒃ ᒪᑐᐃᕐᓯᓚᐅᕐᑐᑦ ᐃᓂᒋᔭᐅᓂᐊᕐᑐᒥ ᓄᓇᖃᖅᑳᖅᑐᓄᑦ ᓴᐳᔾᔭᐅᓯᒪᓇᓱᒃᖢᑎᒃ ᓄᕙᒡᔪᐊᕐᓇᖅ-19-ᒥ ᐋᓐᓂᐊᖅᑖᖅᑕᐃᓕᖁᔨᙱᖢᑎᒃ.

“ᐱᓕᕆᐊᖃᕋᓱᒻᒪᕆᒃᑲᑦᑕ ᑕᒪᓐᓇ ᐱᒋᐊᖅᑎᑦᑕᐃᓕᓪᓗᑎᒍᑦ. ᐅᓄᖅᑑᖕᒪᑕ ᐋᓐᓂᐊᖃᕐᓂᕐᒧᑦ ᐊᒻᒪ ᐃᒡᓗᖃᙱᓐᓂᕐᒧᑦ ᓈᒻᒪᙱᓕᐅᕈᑎᖃᖅᑐᑦ, ᑭᓯᐊᓂ ᐱᓕᕆᐊᖃᕋᓱᒻᒪᕆᒃᑐᒍᑦ ᑕᒪᓐᓇ ᑕᐃᒪᐃᑎᑦᑕᐃᓕᑎᓐᓇᓱᒃᖢᒍ,” ᐅᖃᖅᑐᖅ ᕼᐃᐊᑐ ᔮᓐᔅᑕᓐ, ᐊᐅᓚᑦᑎᔨ ᑐᑭᒧᐊᖅᑎᑦᑎᔨ ᐅᑯᓄᖓ ᑯᐸᐃᒃᒥ ᓄᓇᖃᖅᑳᖅᑐᓕᕆᔨᒃᑯᓐᓂᑦ, ᑖᒃᑯᐊ ᒫᓐᓇ ᐊᐅᓚᑦᑎᔨᐅᖕᒪᑕ ᐃᓂᒋᔭᐅᓚᐅᑲᒃᑐᒥ, ᐊᒻᒪᓗ ᐃᓂᒋᔭᐅᕙᒃᑐᒥ ᐊᖏᕐᕋᖃᙱᑦᑐᓄᑦ ᓄᓇᓖᑦ ᐊᑯᓐᓂᐊᓃᑦᑐᒥᓐ.

ᐅᓇ ᓄᑖᖅ ᐃᓂᒃᓴᐅᔪᖅ ᒪᑐᐃᓚᐅᕐᑐᖅ ᐄᐳᕈᓪ 25-ᒥ ᐅᕙᓂ 1825 Notre-Dame W.

“ᐱᒋᐊᓕᓵᕐᓂᖓ ᓱᒃᑲᐃᓚᐅᕐᑑᒐᓗᐊᖅ, ᑭᓯᐊᓂᓕ ᓄᓇᓕᐸᐅᔭᐃᑦ ᐊᒻᒪ ᑯᐸᐃᒃ ᐱᓇᓱᒃᓯᒪᒻᒪᕆᖕᒪᑕ ᑖᒃᑯᓂᖓ ᓄᓇᖃᖅᑳᖅᑐᓂᒃ ᑲᒪᒋᔭᖃᕋᓱᒃᖢᑎᒃ,” ᔮᓐᔅᑕᓐ ᐅᖃᖅᑐᖅ.

ᐅᓇ ᐅᐸᒡᕕᒃᓴᖅ ᐅᕙᓃᖢᓂ ᓕᑐᓪ ᐴᒐᓐᑎ ᐱᙳᐊᕈᑎᑖᕐᕕᒃᒥ ᐃᒡᓕᖃᖅᑐᖅ 40-ᓂᒃ.

ᑖᒃᑯᐊ ᐃᒡᓖᑦ ᐅᖓᓯᒌᒃᑎᑕᐅᓯᒪᔪᑦ 2 ᒦᑕᓂ ᐊᒻᒪᓗ ᐊᑭᓐᓇᖃᖅᖢᑎᒃ ᐱᖓᓱᓂᒃ. ᑕᓪᓕᒪᓂᒃ ᐃᓂᒃᓴᖅᑕᖃᕐᒥᔪᖅ ᐊᐃᑉᐸᕇᓄᑦ.

ᑖᒃᑯᐊ ᐅᐸᒡᕕᖕᒥᑦ ᐱᓕᕆᔨᐅᔪᑦ ᑕᕝᕙᓂ ᐊᐱᕐᓱᖅᐸᓗᐊᙱᑦᑐᑦ ᑕᕝᕗᙵᖅᐸᒃᑐᑦ ᓇᓂᒥᐅᑕᐅᔭᕆᐊᒃᓴᖏᓐᓂᒃ, ᑭᓯᐊᓂᓕ 40 ᐳᓴᓐᑎᖏ ᐃᓄᐃᑦ, ᐅᖃᖅᑐᖅ ᔮᓐᔅᑕᓐ.

ᐅᓇ ᐳᓴᓐᑎᑎᒍᑦ ᐊᔾᔨᐸᓗᖓ ᐅᑯᐊ PAQ-ᑯᑦ ᐊᖏᕐᕋᖃᙱᑦᑐᓄᑦ ᐃᓂᒃᓴᖏᓐᓂᒃ, ᑖᒃᑯᐊᓗ ᐃᓄᒋᐊᙱᓐᓂᕐᓴᐅᑎᑕᐅᓕᓚᐅᕐᒥᔪᑦ ᐊᐃᑦᑐᖅᓯᑦᑕᐃᓕᑎᑦᑎᓂᕐᒧᑦ ᐊᒻᒪ ᐅᖓᓯᒌᑲᑕᒋᐊᖃᕐᓂᕐᒧᑦ.

ᐃᓂᒋᔭᐅᑲᐃᓐᓇᖅᑐᖅ ᒪᑐᐃᕐᐸᒃᑐᖅ 2-ᒥ ᐅᓪᓗᒃᑯᑦ ᐊᒻᒪ ᒪᑐᕙᒃᖢᓂ 10-ᒥᑦ ᐅᓪᓛᒃᑯᑦ ᐃᑲᕐᕋᓂ ᑎᓴᒪᓂ ᓴᓗᒻᒪᖅᓴᖅᑕᐅᕙᒃᖢᓂ. ᐃᓯᓚᐅᙱᓐᓂᖏᓐᓂᒃ ᑕᕝᕗᙵᖅᐸᓪᓕᐊᔪᑦ ᖃᐅᔨᓴᖅᑕᐅᕙᒃᖢᑎᒃ ᐋᓐᓂᐊᖃᙱᒃᑲᓗᐊᕆᐊᒃᓴᖏᓐᓂᒃ ᓄᓇᒡᔪᐊᕐᓇᖅ-19-ᒥᑦ.

ᖃᐅᔨᓴᖅᑕᐅᕙᒃᑐᑦ ᐊᐱᖅᓱᖅᑕᐅᓪᓗᑎᒃ ᓱᐴᖅᑐᖅᐸᖕᓂᕐᒧᑦ ᓄᕙᖃᑦᑕᕐᓂᖏᓐᓄᑦ ᐊᒻᒪᓗ ᐊᓂᕐᑎᕆᕙᖕᓂᖓᑕ ᒥᒃᓵᓄᑦ.

ᓗᐃᓴ ᑭᓕᒃᑎ, ᐅᐸᒡᕕᖕᒥ ᐃᖅᑲᓇᐃᔭᖅᑎᐅᕗᖅ ᐃᓅᓪᓗᓂ ᐊᒻᒪ ᐃᑲᔪᖅᑎᐅᕙᒃᖢᓂ.

“ᑕᕝᕗᖓᕐᓂᕈᕕᑦ, ᖃᐅᔨᔪᓐᓇᖅᑐᒍᑦ ᖃᐅᔨᓴᖅᑕᐅᒋᐊᖃᕆᐊᒃᓴᐃᑦ ᓄᕙᒡᔪᐊᕐᓇᖅ-19-ᒧ,” ᔮᓐᔅᑕᓐ ᐅᖃᖅᑐᖅ.

ᑭᓯᐊᓂᓕ ᓄᕙᒡᔪᐊᕐᓇᖅ-19-ᒧᑦ ᖃᐅᔨᓴᖅᑕᐅᔪᒪᓪᓗᓂ ᐱᑐᐃᓐᓇᐅᙱᒻᒥᔪᖅ ᐊᖏᕐᕋᖃᙱᒃᑯᕕᑦ ᐊᒻᒪ ᖃᓪᓗᓈᑐᑦ ᐅᖃᕈᓐᓇᙱᒃᑯᕕᑦ. ᑕᒪᓐᓇ ᐱᓕᕆᓂᕐᒨᖓᕐᔪᐊᕐᒪᓐ, ᐅᖃᖅᑐᖅ, ᐊᒻᒪᓗ “ᑕᒪᒃᑯᓄᖓ ᖃᓪᓗᓇᐅᔭᕈᓐᓇᑦᑎᐊᙱᑦᑐᓄ ᐊᔪᕐᓇᕐᓂᕐᓴᐅᖕᒪᑦ ᕿᓂᑲᑕᒋᐊᒃᓴᖅ.”

ᐃᓚᖏ ᐅᐸᒡᕕᖕᒧᐊᖅᐸᒃᑐᑦ ᖃᐅᔨᓴᖅᑕᐅᕝᕕᖕᒥᙶᖅᖢᑦ ᖃᐅᔨᓴᖅᑕᐅᔭᕆᐊᒃᓴᖏᓐᓂᒃ ᖃᐅᔨᒪᓗᐊᕐᐸᙱᑦᑐᑦ—ᑭᓯᐊᓂᓕ ᐊᖏᕐᕋᖃᙱᑦᑐᑦ ᖃᐅᔨᓴᖅᑕᐅᓯᒪᔪᑦ ᓄᕙᒡᔪᐊᕐᓇᖅ 19-ᒧᑦ ᑐᔪᕐᒥᕕᖕᓄᐊᖅᑕᐅᕙᒃᑐᑦ ᐅᑕᕿᑎᑕᐅᓪᓗᑎᒃ ᖃᐅᔨᓴᖅᑕᐅᔾᔪᑎᖏᓐᓂᒃ.

ᒫᓐᓇᒧᓪᓕ ᖃᐅᔨᒪᔭᖓᒍᑦ ᓄᕙᒡᔪᐊᕐᓇᖅ-19-ᒥᑦ ᐋᓐᓂᐊᖃᕐᓂᕋᐃᓚᐅᙱᑦᑐᑦ ᒪᓐᑐᕆᐊᒥ ᐊᖏᕐᕋᖃᙱᑦᑐᒃᑯᕕᖕᓂ.

ᑭᓯᐊᓂᓕ ᐅᖓᓯᒌᒃᑎᑦᑎᑲᑕᖕᓂᖅ ᓱᓕ ᐊᔪᕐᓇᕈᔪᒃᑐᖅ, ᑭᓯᐊᓂ “ᐊᖏᕐᕋᖃᙱᒃᑯᕕᑦ ᐊᔪᕐᓇᕐᓂᕐᓴᐅᖕᒪᑦ ᐃᓄᖃᙱᑦᑐᒦᓐᓇᓱᒋᐊᒃᓴᖅ,” ᑕᐃᒪᐃᖁᔭᐅᒐᓗᐊᖅᑎᓪᓗᒋᑦ ᐋᓐᓂᐊᖃᕐᓇᙱᑦᑐᓕᕆᔨᒻᒪᕆᐅᔪᑦ, ᐅᖃᖅᑐᖅ ᔮᓐᔅᑕᓐ.

ᓴᓗᒪᔭᕆᐊᖃᕐᓂᖅ ᖃᐅᔨᒪᔭᐅᑎᑕᐅᔪᖅ ᐊᖏᕐᕋᖃᙱᑦᑐᒃᑯᕕᖕᒥᓐ. ᐊᒡᒐᖕᓄᑦ ᐅᐊᓴᕐᕕᒃᑕᖃᖅᖢᓂ ᐃᓯᕆᐊᕐᕕᖕᒥᑦ ᐊᒻᒪᓗ ᓴᓗᒻᒪᖅᓴᖅᑕᐅᖏᓐᓇᖅᖢᓂ ᐅᓪᓗᓕᒫᖅ ᐊᒻᒪ ᒪᑐᔭᕌᖓᑦ, ᐅᖃᖅᑐᖅ.

“ᐃᓄᒃᑕᖃᐃᓐᓇᖅᑐᖅ 7-ᓂ ᐱᓕᕆᑲᑕᐃᓐᓇᖅᑐᓂᒃ ᐊᓪᓚᖅᑐᐃᕆᑲᑕᒃᖢᑎᒃ. ᐊᑕᐅᓯᖅ ᐊᓇᕐᕕᖕᒦᑦᑕᕆᐊᖃᖅᖢᓂ ᐊᒻᒪᓗ ᓴᓗᒻᒪᕐᓴᖅᑕᐅᑲᐅᑎᒋᓪᓗᓂ,” ᐅᖃᒃᑲᓐᓂᖅᑐᖅ.

ᑖᓐᓇ ᐅᐸᒡᕕᒃ ᒪᑐᓯᒪᔭᕌᖓᑦ ᐊᕐᓇᐃᑦ ᐅᓪᓗᒃᑯᑦ ᐅᕗᙵᕈᓐᓇᖅᑐᑦ ᓴᔾ ᑐᐊᕆᔅᒧᑦ, ᑕᕝᕙᓂ ᐅᓪᓗᕈᒻᒥᑕᕐᓇᖅᖢᓂ, ᐊᓯᖏᓐᓂᒃ ᐊᓐᓄᕌᕐᑐᕐᓇᖅᖢᓂ ᐊᒻᒪ ᐅᖃᓪᓚᒡᕕᐅᓐᓇᖅᖢᓂ.

ᓄᓇᓯᐅᑎᒃᑯᑦ ᐅᕙᙵᑦ ᓴᔾ ᑐᐊᕆᔅᒥ ᓴᒥᑎ ᐊᑐᕆᐊᒥᑦ ᑕᐃᑯᖓ ᐅᐸᒡᕕᖕᒧᑦ 2-ᒧᐊᕌᖓᑦ.

“ᑮᓇᐅᔭᓂ ᑕᒪᑐᒧᖓ ᐊᑐᕐᔪᐊᕐᓇᕐᒪᓐ,” ᔮᓐᔅᑕᓐ ᐅᖃᖅᑐᖅ, ᐅᖃᒃᑲᓐᓂᖅᖢᓂ ᓴᓗᒻᒪᕐᓴᐃᕙᓪᓕᐊᓂᖅ ᑕᐅᓴᑲᓪᓚᖕᓂ ᑮᓇᐅᔭᓂ ᐊᑐᕐᓇᖅᖢᓂ.

“ᐱᐅᓇᔭᕐᑐᕐᓕ ᑕᒪᒃᑯᐊ ᑮᓇᐅᔭᑦ ᐊᑐᖅᑕᐅᖃᑦᑕᐃᓐᓇᕈᓐᓇᖅᑐᒧᑦ ᐊᑐᖅᑕᐅᒃᐸᑕ ᓲᕐᓗ ᐃᒡᓗᒃᓴᓄᑦ ᐊᒻᒪ ᐃᑲᔪᕈᑎᒃᓴᓄᑦ.”

ᒫᓐᓇᓕ ᑕᐃᒪᐃᑎᓪᓗᒍ, ᑖᓐᓇ ᐅᐸᒡᕕᒃ ᐃᑲᔫᑎᐅᓚᐅᑲᑐᐃᓐᓇᐅᖕᒪᓐ ᐊᒻᒪᓗ ᒪᑐᐃᖓᓂᐊᖅᖢᓂ ᑭᓯᐊᓂ ᐃᓕᓐᓂᐊᕐᓇᖅ ᐱᒋᐊᒃᑲᓐᓂᕈᓂ ᒪᓐᑐᕆᐊᒥ ᒪᐃ 19-ᒥᑦ. ᑕᐃᑲᓂᓕ ᒪᑐᓂᐊᖅᑐ ᐃᒻᒪᖄᓪᓘᓐᓃᑦ ᐊᓯᐊᓅᖅᑕᐅᓗᓂ, ᔮᓐᔅᑕᓐ ᐅᖃᖅᑐᖅ.

Share This Story

(0) Comments