ᐃᓄᐃᑦ ᐃᓱᒫᓘᑎᖏᑦ ᐊᕙᑏᓪᓗ ᓴᐳᔾᔭᐅᓂᖏᑦ ᑐᙵᕕᐅᕗᑦ ᐹᕙᓐᓛᓐᑯᑦ ᐊᖏᒡᓕᒋᐊᕈᒪᓂᖏᓐᓄᑦ
Baffinland’s Mary River mine site, on Milne Inlet. (File photo)
For an English version of this story, see Op-ed: Inuit concerns and protection of environment central to Baffinland expansion plans
ᖃᖓᑦᑎᐊᖅ ᖃᓄᐃᓚᐅᖅᑐᑦ ᐅᖃᐅᓯᐅᔪᓪᓗ ᐃᓄᓕᒫᖅᑎᑦᑎᑎᓪᓗᒋᑦ ᓈᓚᖕᓂᕐᓂᑦ ᐹᕙᓐᓛᓐᑯᑦ ᐊᖏᒡᓕᒋᐊᕈᒪᔭᖓᓄᑦ ᓄᓘᔮᖕᓂᑦ ᐱᓕᕆᓂᕐᒥᑦ ᐱᕕᖃᖅᑎᑦᑎᓯᒪᕗᑦ ᐱᒻᒪᕆᐅᔪᒥᒃ ᕿᒥᕐᕈᓂᕐᒧᑦ ᐊᖏᒡᓕᒋᐊᕐᓂᕐᒧᑦ. ᑐᑭᓯᕗᒍᑦ ᐃᓚᖏᑦ ᐃᓄᐃᑦ ᐃᑲᔪᖅᑐᖅᐳᑦ ᐊᓯᖏᑦ ᐃᑲᔪᖅᑐᙱᑎᓪᓗᒋᑦ, ᐊᓯᖏᓪᓗ ᖃᐅᔨᒪᖏᑉᐳᑦ ᓱᓕ ᐊᐱᖅᑯᑎᒃᓴᖃᖅᖢᑎᒡᓘᓐᓃᑦ.
ᐱᕐᔪᐊᖑᕗᖅ ᑭᒃᑯᓕᒫᑦ ᑕᑯᔪᓐᓇᕐᓗᑎᒃ ᓱᓕᔪᓂᒃ ᖃᐅᔨᒪᔭᐅᔪᓂᒃ. ᐊᓂᒍᖅᑐᓂ 6 ᐊᕐᕌᒍᓂᑦ, ᐅᖃᖃᑎᖃᐃᓐᓇᖅᐳᒍᑦ ᕼᐋᒪᓚᓄᑦ, ᐊᖑᓇᓱᒃᑐᓕᕆᔨᓄᑦ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ (QIA) ᐊᐅᓚᑦᑎᔨᓂᓪᓗ ᖁᑦᑎᓕᕇᓂᒃ ᑐᓴᕋᓱᖕᓂᒃᑯᑦ, ᐋᖅᑭᑦᑎᐊᓯᒪᔪᓕᕆᓂᒃᑯᑦ ᑲᑎᒪᓂᖅᑎᒍᑦ, ᐃᓄᓕᒫᖅᑎᑦᑎᓂᒃᑯᓪᓗ ᓄᓇᓕᖕᓂᑦ, ᐊᓯᖏᓪᓗ ᑲᑎᒪᓪᓚᑦᑖᖅᑐᓂ ᐅᖃᖃᑎᒌᒃᑐᓂᓗ, ᐅᓄᖅᑐᑦ ᐃᓄᓕᒫᓄᑦ ᒪᑐᐃᖓᓪᓗᑎᒃ. ᐅᓄᖅᑐᑦ ᑎᑎᕋᖅᓯᒪᔪᑦ ᐸᐃᑉᐹᑦ ᑐᓂᔭᐅᓯᒪᖃᑦᑕᖅᑐᑦ ᐱᓕᕆᑎᓪᓗᒋᑦ ᑕᒪᒃᑯᓂᖓ ᕿᒥᕐᕈᓂᐅᔪᓂᑦ. ᐸᕐᓇᒃᓯᒪᔭᕗᑦ ᕿᒥᕐᕈᔭᐅᑦᑎᐊᖅᓯᒪᕗᑦ ᐃᓚᐅᖃᑕᐅᔪᓕᒫᓄᑦ ᐊᓯᔾᔩᓯᒪᕗᒍᓪᓗ ᒪᓕᒃᖢᒋᑦ ᑖᒃᑯᓇᙵᑦ ᑐᓴᖅᑕᑦᑎᓐᓂᑦ, ᐱᖃᓯᐅᖦᖢᒋᑦ ᑕᕝᕙᖓᑲᐅᑎᒋ ᐃᓄᖕᓂᑦ ᑐᓴᖅᑕᕗᑦ.
ᐹᕙᓐᓛᓐᑯᑦ ᐊᕙᑎᑎᒍᑦ ᑲᔪᓰᓐᓇᕈᓐᓇᓛᖑᕗᑦ ᓴᕕᕋᔭᒃᓴᓄᑦ ᐊᐅᓚᓂᕐᓂᑦ ᓄᓇᕐᔪᐊᒥ – ᐃᒋᑕᒃᓴᓂᒃ ᐅᔭᖅᑲᓂᒃ ᐱᑕᖃᖅᑎᑦᓗᐊᕋᓂ, ᐃᓚᐅᕈᑎᖃᕐᓇᓂ ᐃᒥᕐᓂᒡᓘᓐᓃᑦ ᐊᑐᖏᑦᑐᑦ ᐅᔭᕋᖕᓂᐊᖅᑕᐅᔪᓄᑦ. ᐱᐅᓯᒋᐊᕐᓂᐊᖅᑕᕗᑦ ᑖᓐᓇ ᐱᓕᕆᑦᑎᐊᕐᓂᖅ ᐊᖏᒡᓕᒋᐊᕈᒪᓂᖅ 2-ᒥᑦ ᑕᐃᑲᓂ ᐱᓕᕆᐊᖑᓚᐅᖅᓯᒪᖏᑦᑐᓂᒃ ᒪᓕᓛᕈᒪᒐᑦᑕ ᐅᔭᕋᖕᓂᐊᕐᕕᖕᓂᑦ ᓴᓇᕝᕕᐅᔪᓂᑦ.
ᑐᑭᓯᕗᒍᑦ ᐊᖑᓇᓱᖕᓃᑦ ᑐᒃᑐᓂᒃ, ᕿᓚᓗᒐᓂᒃ, ᓇᑦᑎᕐᓂᒃ ᐃᖃᓗᖕᓂᒡᓗ ᓂᕿᓪᓚᕆᐊᓘᖕᒪᑕ ᕿᑎᐊᓃᖦᖢᑎᒡᓗ ᐃᓄᐃᑦ ᐃᓕᖅᑯᓯᖏᓐᓄᑦ ᑭᓇᐅᓂᖏᓐᓄᓪᓗ. ᑲᔪᓰᓐᓇᖅᑎᓪᓗᒍ ᐃᒃᐱᒋᓗᒍᓗ ᑖᓐᓇ ᐃᓄᐃᑦ ᖃᓄᐃᖏᓐᓂᖏᓐᓄᑦ ᐊᑑᑎᖃᑦᑎᐊᖅᐳᖅ ᐸᕐᓇᖕᓂᑦᑎᓐᓄᑦ. ᕿᓚᓗᒐᕐᓄᑦ ᖃᐅᔨᓴᕐᓃᑦ ᓴᖅᑭᑦᑎᕗᑦ ᑕᐃᒪᐃᖏᓐᓇᖅᑐᓂᒃ ᕿᓚᓗᒐᖃᕐᓂᕐᓂᒃ ᑕᓯᐅᔭᕐᒥᑦ ᐊᑯᓐᓂᐊᓂ 2013 2019−ᓗ, ᐅᔭᕋᖕᓂᐊᕐᓂᕐᓄᑦ ᐊᐅᓚᔾᔭᒃᖢᑎᒃ 2015ᒥᑦ. 2016ᒥᑦ, ᑲᑎᖦᖢᒋᑦ ᕿᓚᓗᒐᖅᑕᐅᔪᓐᓇᖅᑐᑦ ᐅᓄᖅᓯᒋᐊᖅᑕᐅᓚᐅᖅᑐᑦ ᑕᐃᒪᙵᓂᓪᓗ ᐊᕐᕌᒍᑕᒫᑦ ᕿᓚᓗᒐᖅᑕᐅᒐᔪᒃᑐᑦ ᒥᑦᑎᒪᑕᓕᖕᒥᑦ ᐅᓄᓯᒋᐊᓪᓚᒃᓯᒪᕗᑦ.
ᑐᑭᓯᕗᒍᑦ ᐱᕐᔪᐊᖑᓂᖏᓐᓂᒃ ᕿᑭᖅᑖᓘᑉ ᐅᐊᖕᓇᖓᓂᑦ ᑐᒃᑐᐃᑦ ᐱᓕᕆᖃᑎᒋᔪᒪᓪᓗᒋᓪᓗ ᐃᓄᐃᑦ ᓴᐳᔾᔭᐅᓯᒪᖁᓪᓗᒋᑦ ᑖᒃᑯᐊ ᐱᒻᒪᕆᐅᔪᑦ ᓄᓇᒥᖔᖅᑐᑦ ᑭᓱᒃᓴᑦ. ᖃᔅᓯᒐᓚᖕᓂᒃ ᐱᓕᕆᒃᑲᓐᓂᕋᓱᒃᐳᒍᑦ ᐃᓚᒋᓪᓗᓂᒋᑦ ᐊᖏᒡᓕᒋᐊᕐᓂᕐᓄᑦ ᐸᕐᓇᐅᑎᓄᑦ, ᐅᓄᖅᑐᑦ ᑕᕝᕙᙶᑲᐅᑎᒋᓪᓗᑎᒃ ᐅᖃᖃᑎᒌᖕᓂᕐᓂᑦ ᐃᓄᖕᓂᑦ, ᓲᕐᓗ ᑐᒃᑐᓄᑦ ᐃᑳᕐᕕᐅᔪᓐᓇᖅᑐᓂᒃ ᓱᓪᓗᓕᓕᐅᖅᖢᑕ ᓴᓇᓯᒪᑎᖦᖢᒋᓪᓗ ᐊᖅᑯᑎᑯᑖᖕᒥᑦ ᓯᕕᖓᓃᑦ ᐃᑲᔪᖁᓪᓗᒋᑦ ᑐᒃᑐᑦ ᐃᑳᕐᓂᖏᑦ.
ᐃᓅᔪᑦ ᓇᓗᓇᙱᓐᓂᕐᒧᑦ ᐊᖏᖃᑎᒌᒍᑎ (ICA) ᐊᑎᓕᐅᖅᑕᐅᓚᐅᖅᑐᖅ 2020ᒥᑦ, ᐃᓄᐃᑦ ᐃᓚᐅᔪᓐᓇᕐᓂᖅᓴᐅᖁᓪᓗᒋᑦ ᖃᐅᔨᓴᐃᓐᓇᕐᓂᕐᓂᑦ ᕿᒥᕐᕈᓂᕐᓂᓗ ᐊᐅᓚᓂᑦᑎᓐᓂᒃ. ᐃᓄᐃᑦ ᑲᒪᖃᑦᑕᕐᓂᐊᖅᐳᑦ ᐊᐅᓚᓪᓗᒋᑦ ᐊᔾᔨᒌᙱᕈᓘᔭᖅᑐᓄᑦ ᖃᐅᔨᓴᐃᓐᓇᕐᓂᕐᓄᑦ ᐃᓄᐃᑦ ᐸᖅᑭᔨᐅᓂᖏᓐᓄᑦ ᐸᕐᓇᐅᑎᐊᒍᑦ, ᐱᖃᓯᐅᔾᔨᓗᓂ ᖃᐅᔨᓴᐃᓐᓇᕐᓂᕐᓂᒃ ᐊᓯᔾᔨᖅᑐᓄᑦ ᐃᓕᖅᑯᓯᒃᑯᑦ, ᓄᓇᒥᖔᖅᑐᓄᑦ, ᓄᓇᐃᓪᓗ ᐊᑐᖅᑕᐅᓂᖏᓐᓄᑦ ᐃᓅᓯᒃᑯᑦ ᖃᓄᐃᖏᓐᓂᕐᓄᓪᓗ. ᑖᒃᑯᐊ ᖃᐅᔨᓴᐃᓐᓇᕐᓃᑦ ᐊᒃᑐᐊᑲᐅᑎᒋᓂᐊᖅᑐᑦ ᐋᖅᑭᒋᐊᕈᓐᓇᖅᑐᒃᑯᑦ
ᐊᐅᓚᑦᑎᓂᕐᓄᑦ ᐸᕐᓇᐅᑎᒧᑦ, ᐃᓄᐃᑦ ᓇᓗᓇᐃᖅᓯᔪᓐᓇᖅᓯᑎᓪᓗᑎᒃ ᖃᓄᐃᔾᔭᐃᒃᑯᑎᒃᑲᓐᓂᕐᓂᒃ ᓴᐳᔾᔭᐅᓯᒪᖁᓪᓗᒍᑦ ᐊᕙᑏᑦ ᐊᒃᑐᐃᓂᕐᓂᒃ ᐊᖏᓂᖅᓴᐅᓐᓂᕈᑎᒃ ᒥᒃᓴᐅᓴᒃᑕᐅᓯᒪᔪᓂᑦ.
ᐹᕙᓐᓛᓐᑯᑦ ᐊᖏᓂᖅᐹᖑᕗᑦ ᓇᖕᒥᓂᕆᔭᐅᓪᓗᑎᒃ ᐃᖅᑲᓂᐊᔭᖅᑎᑦᑎᔨᐅᕗᖅ ᕿᑭᖅᑕᓂᒥᑦ ᑕᕝᕗᖓᑲᐅᑎᒋᓗ ᑕᕝᕗᖓᑲᐅᑎᒋᐅᖏᑦᑐᒃᑯᓪᓗ ᑐᓂᓯᓯᒪᓪᓗᑎᒃ 1.68 ᐱᓕᐊᓐᓂᒃ ᐃᓄᐃᑦ ᐱᓯᓇᓯᖏᓐᓄᑦ ᓄᓇᓕᖏᓐᓄᓪᓗ 2015 ᒥᓂᑦ. ᐊᖏᒡᓕᒋᐊᕈᒪᓂᖅ 2-ᑯᑦ, ᐹᕙᓐᓛᓐᑯᑦ ᓂᕆᐅᒋᔭᐅᔪᑦ ᑐᓂᓯᒃᑲᓐᓂᐅᔭᖃᑦᑕᓕᕐᓗᑎᒃ ᐊᐅᓚᓂᓕᒫᖓᓂᑦ ᐅᔭᕋᖕᓂᐊᕐᕕᒃ; $4.5 ᐱᓕᐊᓂᒃ ᒐᕙᒪᓄᑦ ᐃᓄᐃᓪᓗ ᑎᒥᖏᓐᓄᑦ, ᐱᖃᓯᐅᓪᓗᒋᑦ $1 ᐱᓕᐊᓐᑲᓴᑦ ᕿᑭᑕᓂᒃᑯᓐᓄᑦ, $1.4 ᐱᓕᐊᓐ ᓄᓇᕗᑦ ᑐᙵᕕᒃ ᐃᓐᑯᐊᐳᕇᑕᑦᑯᓐᓄᑦ, $679 ᒥᓕᐊᓐ ᓄᓇᕘᒃᑯᑦ ᒐᕙᒪᖓᓄᑦ, $1.5 ᐱᓕᐊᓐᓗ ᑲᓇᑕᐅᑉ ᒐᕙᒪᖓᓄᑦ.
ᐹᕙᓐᓛᓐᑯᑦ ᐊᖏᖅᓯᒪᕗᑦ ᐊᑐᕈᒪᓪᓗᑎᒃ ᑎᑭᓪᓗᒍ $15 ᒥᓕᐊᓐᓄᑦ ᓴᓇᖁᓪᓗᒋᑦ ᐱᐅᓯᒋᐊᕐᓗᒋᓪᓘᓐᓂᑦ ᐸᐃᕆᕝᕖᑦ ᒥᑦᑎᒪᑕᓕᖕᒥᑦ, ᐃᒃᐱᐊᕐᔪᖕᒥᑦ, ᑲᖏᖅᑐᒑᐱᖕᒥᑦ, ᐃᒡᓗᓕᖕᒥᑦ ᓴᓂᕋᔭᖕᒥᓗ. ᐃᑲᔪᕐᓂᐊᕆᕗᒍᑦ ᐸᐃᕆᓂᕐᓄᑦ ᑮᓇᐅᔭᑎᒍᑦ ᐹᕙᓐᓛᓐᑯᑦ ᐃᓄᖕᓂᒃ ᐃᖅᑲᓇᐃᔭᖅᑎᖏᓐᓄᒃ ᓄᓇᕘᒥᐅᑕᓄᑦ, ᖃᐅᔨᓴᖅᑕᐅᓂᖏᓐᓄᑦ ᒥᑦᑎᒪᑕᓕᖕᒥᑦ ᓂᕿᖏᓐᓄᑦ, ᐊᖑᓇᓱᒃᑐᓕᕆᔨᒃᑯᑦ ᒥᑭᒋᐊᕐᓂᐊᖅᑏᓪᓗ ᑲᑎᒪᔨᖏᓐᓂᒃ, ᑕᐃᒪᐃᓚᐅᖅᓯᒪᖏᑦᑐᓄᓪᓗ ᐊᑭᓕᐅᑎᓄᑦ ᕿᑭᖅᑕᓂᒃᑯᓐᓄᑦ ᑲᑎᓪᓗᒋᑦ $45 ᒥᓕᐊᓐ ᓯᕗᓪᓕᖅᐹᓄᑦ ᑕᓪᓕᒪᓄᑦ ᐊᕌᒍᓄᑦ ᐊᖏᒡᓕᒋᐊᕈᒪᓂᖅ 2-ᒥᑦ. ᑮᓇᐅᔭᑦ ᓂᖏᖅᑕᕐᓂᐊᖅᑐᑦ ᕿᑭᖅᑕᓂᒃᑯᓐᓄᑦ ᐅᓄᖅᓯᒋᐊᕐᓂᐊᕆᕗᑦ 1.19%ᒥᑦ 3.00%ᒧᑦ, ᐃᓚᖓ ᑐᓂᔭᐅᓗᓂ ᕿᑭᖅᑕᓂᒃᑯᓐᓂᑦ ᕿᑭᖅᑖᓘᑉ ᐅᐊᖕᓇᖓᓂᑦ ᓄᓇᓕᖕᓄᑦ ᓄᓇᓕᖕᓄᐊᑲᐅᑎᒋᔪᓄᑦ ᐱᕚᓪᓕᕈᑎᑎᒍᑦ.
ᐹᕙᓐᓛᓐᑯᑦ ᓄᑖᓂᒃ ᐊᑐᒐᓕᐅᕈᒪᕗᑦ ᑲᓇᑕᒥᑦ ᐅᔭᕋᖕᓂᐊᕐᓂᕐᒧᑦ ᓴᓇᕝᕕᐅᔪᓂᑦ ᓄᓇᓖᑦ ᐊᐅᓚᑦᑎᔨᐅᓗᑎᒃ ᐱᕚᓪᓕᕈᑎᑖᖅᑎᑦᑎᓂᒃᑯᓪᓗ. ᐸᕐᓇᐅᑎᕗᑦ ᓴᖅᑭᔮᖅᑎᑦᑎᕗᖅ ᐊᕐᕌᒍᒐᓚᖕᓄᑦ ᐅᖃᖃᑎᒌᖕᓂᕐᓂᒃ ᐹᕙᓐᓛᓐᑯᑦ, ᐃᓄᖕᓄᑦ ᒐᕙᒪᐃᓪᓗ ᖁᕝᕙᓯᓕᕇᒃᑐᓂᑦ ᑐᓂᓯᖁᓪᓗᒋᑦ ᐱᐅᔪᓂᒃ ᐱᕙᓪᓕᕈᑎᓂᒃ ᐊᕐᕌᒍᒐᓴᖕᓄᑦ, ᓴᐳᑎᐅᔮᕐᔪᒡᓗᒋᑦ ᐃᒃᐱᒋᓗᒍᓪᓗ ᐊᕙᑏᑦ.
ᐅᓇ ᐃᓄᒃᑎᑐᑦ ᑎᑎᕋᖅᑕᐅᔪᑦ ᐹᕙᓐᓛᓐᑯᓐᓂᒃ ᑐᓐᓂᖅᑯᑎᐅᓂᑯ.
(0) Comments