ᐃᓄᐃᑦ ᐃᖅᑲᓇᐃᔭᕈᓐᓃᖅᑎᑕᐅᔪᑦ ᐅᓄᕈᓐᓃᖅᐹᓪᓕᕐᐳᑦ 96-ᓂᒃ 48-ᓄᑦ, ᐹᕕᓐᓛᓐᑯᑦ ᐅᖃᖅᑐᑦ
ᐅᓇ 6 ᒥᓕᐊᓐ ᑕᓐᔅᓂᒃ ᓴᖅᑭᑎᑦᑎᔪᓐᓇᕐᓂᖏᓐᓂᒃ ᐊᖏᖅᑕᐅᒃᐸᑦ, ᑲᒻᐸᓂᐅᔪᑦ ᐅᖃᖅᑐᑦ ᐃᓄᖕᓂᒃ ᓄᖅᑲᖅᑎᑦᑎᒃᑲᓐᓂᔾᔮᙱᓐᓂᕋᖅᖢᑎᒃ
For an English version of this story, see Number of laid-off Inuit reduced from 96 to 48, Baffinland says
ᐃᓄᐃᑦ ᐱᓕᕆᑎᑕᐅᓂᒃᑯ ᑦᑳᓐᑐᕌᑎᒍᑦ ᐃᖅᑲᓇᐃᔭᖅᑎᐅᔪᑦ ᐃᖅᑲᓇᐃᔭᕈᓐᓃᖅᑎᑕᐅᓚᐅᕐᑐᑦ ᓄᓘᔮᖕᓂᒃ ᓴᕕᕋᔭᒃᓴᒥᑦ ᐅᔭᕋᒃᓯᐅᕐᕕᖕᒥᑦ ᐅᓄᕈᓐᓃᖅᑎᑕᐅᒃᑲᓐᓂᕐᐳᑦ 96-ᓂᑦ 48-ᓄᑦ, ᐹᕕᓐᓛᓐᑯᑦ ᓴᕕᕋᔭᒃᓴᒥᒃ ᐅᔭᕋᒃᓯᐅᕐᕕᒃᑯᑦ ᐅᖃᓚᐅᕐᑐᑦ ᓄᓇᕗᒻᒥ ᐊᕙᑎᓕᕆᔨᒃᑯᓐᓄᑦ ᑕᕿᖅ ᐱᒋᐊᓕᓵᖅᑎᓪᓗᒍ.
ᑖᒃᑯᐊ ᑲᒻᐸᓂᐅᔪᑦ ᑖᔅᓱᒥᖓ ᑐᓴᒐᒃᓴᒥ ᐃᓚᓕᐅᔾᔨᓯᒪᓚᐅᕐᑐᑦ ᑎᓯᐱᕆ 6-ᒥᑦ ᑎᑎᖃᓂᒃ ᐊᐱᕆᓯᒪᔪᓂᒃ ᓄᓇᕗᒻᒥ ᐊᕙᑎᓕᕆᔨᒃᑯᑦ ᐃᓱᒪᓕᐅᕆᓯᒪᔭᖓᑦ ᐊᕐᕌᒍᒥ ᐊᑕᐅᓯᕐᒥᒃ ᐅᖓᕙᕆᐊᖅᑕᐅᖁᔨᓯᒪᔪᓂᒃ ᓴᖅᑭᑦᑎᕙᓪᓕᐅᔪᓐᓇᕐᓂᕐᒥᒃ, ᑖᓐᓇᓗ ᐊᑐᕈᓐᓃᕐᓂᐊᖅᖢᓂ ᑎᓯᐱᕆ 31-ᒥᑦ.
ᐹᕕᓐᓛᓐᑯᑦ ᐅᖓᕙᕆᐊᕈᑎᑖᙱᒃᑯᑎ, ᐊᕐᕌᒍᒧᑦ ᓴᕿᑎᑦᑕᕆᐊᖃᖅᑕᖏᓐᓄᑦ ᐃᓱᓕᕝᕕᖓᓄᑦ ᑐᖓᐅᑦᑎᓯᒪᓂᐊᕐᑐᖅ ᒪᐅᖓ 4.2 ᒥᓕᐊᓐ ᑕᓐᔅᓂᒃ ᐊᕐᕌᒍᒧᑦ, ᐋᖅᑭᒃᑕᐅᓯᒪᓂᖓᒍᓪᓕ ᓯᕗᓪᓕᕐᒥ ᐱᓕᕆᐊᒧᑦ ᐱᔪᓐᓇᐅᑎᖏᓐᓄᑦ ᒪᓕᒐᖏᑦ ᑖᒃᑯᐊ ᐊᐅᓚᑦᑎᒍᑎᐅᓪᓗᑎᒃ ᑲᒻᐸᓂᐅᔫᑉ “ᓯᕗᓂᐊᒍᑦ ᑮᓇᐅᔭᓕᐅᕈᑎᖏᓐᓄᑦ” ᐅᓯᑲᖅᑕᕐᓂᕐᒧᑦ ᓴᕕᕋᔭᒃᓴᒥᑦ ᓄᓇᓯᐅᑎᒃᑯᑦ ᓄᓘᔮᑦ ᕿᙳᐊᓄᑦ.
ᑭᓯᐊᓂᓕ ᑲᒻᐸᓂᐅᔪᖅ ᐊᖏᖅᑕᐅᒍᑎᒃ ᑖᔅᓱᒥᖓ, ᐅᖃᓚᐅᕐᑐᑦ ᐃᓄᖕᓂ ᐃᖅᑲᐃᔭᖅᑎᓂᒃ ᓄᖃᖅᑎᑦᑎᑲᑕᔾᔮᙱᓐᓂᕋᖅᖢᑎᒃ.
“ᓯᕗᒧᑦ ᐱᕙᓪᓕᐊᓂᒃᑯᑦ, ᐹᕕᓐᓛᓐ ᑲᔪᓯᓂᐊᖅᑐᖅ ᐃᓄᖕᓂᑦ ᓯᕗᓪᓕᐅᑎᑦᑎᖃᑦᑕᕐᓂᕐᒥᒃ ᐃᖅᑲᓇᐃᔮᓄᑦ ᓄᓘᔮᖕᓂᒃ ᐅᔭᕋᒃᓯᐅᕐᕕᒃᒥᑦ ᐊᒻᒪᓗ ᓄᖃᖅᑎᑦᑎᒃᑲᓐᓂᔾᔮᙱᖢᑎᒃ ᐱᓕᕆᕙᓪᓕᐊᑎᓪᓗᒋᑦ 6 ᒥᓕᐊᓐ ᑕᓐᔅᓂᒃ ᓴᖅᑭᑎᑦᑎᔭᕆᐊᖃᕐᓂᕐᒥᒃ ᐊᕐᕌᒍᒥᑦ ᐅᖓᕙᕆᐊᕐᕕᒋᔭᐅᔪᒃᑯᑦ,” ᑲᒻᐸᓂᐅᔪᑦ ᑲᑎᒪᔨᓄᑦ ᐅᖃᓚᐅᕐᑐᑦ.
ᑕᐃᒪᐃᓕᖓᑎᓪᓗᒋᑦ. ᐃᒪᓐᓇᐅᖂᔨᖕᒪᑦ ᐹᕕᓐᓛᓐᑯᑦ ᐃᓱᒪᓕᐅᕆᑎᑕᐅᓯᒪᔭᕆᐊᒃᓴᖏᓐᓂᒃ ᒪᐃᔭᓄᑦ ᑕᓪᓕᒪᓂᒃ ᓄᓇᓕᖕᓂ ᐊᒃᑐᖅᑕᐅᓯᒪᔪᓂᒃ ᕿᑭᖅᑖᓘᑉ ᐅᐊᖕᓇᖓᓂᒃ ᓄᓇᓕᖕᓂᑦ.
ᑖᒃᑯᐊ ᒪᐃᔭᐃᑦ, ᓄᓇᓕᖕᓂ ᑲᑎᒪᑲᑕᓚᐅᕐᖢᑎᒃ ᓄᕕᐱᕆ ᓄᖑᓕᕐᑎᓪᓗᒍ, ᑕᒪᕐᒥ ᐃᑲᔪᖅᑐᐃᓂᕋᓚᐅᕐᑐᑦ ᑲᔪᓯᑎᑕᐅᓂᖓᓂ ᑲᒻᐸᓂᐅᔪᖅ ᑎᑭᒐᓱᖕᓂᖏᓐᓂᒃ 6 ᒥᓕᐊᓐᑕᓐ ᐃᓱᖃᕐᕕᖓ—ᑭᓯᐊᓂ ᐃᓄᖕᓂ ᓄᖅᑲᖅᑎᑦᑎᑲᑕᒍᓐᓃᕈᑎᒃ.
ᑕᒪᐅᓈᖓᔪᓂᒃ ᑎᑎᖃᓂᒃ, ᒪᐃᔭᐅᔪᑦ ᐃᒃᐱᐊᕐᔪᒃᒥᑦ, ᑲᖏᖅᑐᒑᐱᖕᒥᑦ, ᓴᓂᕋᔭᒃᒥᑦ, ᐃᒡᓗᓕᒃᒥᑦ ᐊᒻᒪ ᒥᑦᑎᒪᑕᓕᒃᒥᑦ ᐅᖃᖅᑐᐃᓐᓇᐅᓚᐅᕐᑐᑦ ᐅᖓᕙᕆᐊᖅᑎᑦᑎᔪᒪᓂᖏᓐᓂᒃ ᐃᓱᓕᕝᕕᐊᓄᑦ “ᐃᖅᑲᓇᐃᔭᖅᑎᓂᒃ ᓄᖃᖅᑎᑦᑎᔮᔪᓐᓃᕈᑎᒃ ᓄᓇᑦᑎᓐᓃᑦᑐᓂᒃ, ᐊᒻᒪᓗ ᓄᖅᑲᖅᑎᑕᐅᓂᑯᑦ ᐅᑎᖅᑎᑕᐅᒍᑎᒃ ᐊᒻᒪ ᐱᓕᕆᑎᑕᐅᖃᑕᐅᓗᑎᒃ ᒫᓐᓇ ᐱᓕᕆᐊᖑᔪᒥᒃ.”
ᒐᕙᒪᑐᖃᒃᑯᑦ ᐹᕕᓐᓛᓐᑯᓐᓂᒃ ᐱᔪᓐᓇᕐᓂᕋᐃᑎᓪᓗᒋ ᓴᖅᑭᑎᑦᑎᕙᓪᓕᐊᓂᕐᒧᑦ ᐅᓄᕐᓯᕚᓪᓕᖅᑎᑦᑎᓂᕐᒥᒃ ᒪᐅᖓ 6 ᒥᓕᐊᓐ ᑕᓐᔅᓄᑦ 2018-ᒥᑦ, ᑖᓐᓇ ᐃᓱᖃᕐᕕᒃᓴᖅ ᑐᕌᖓᑐᐃᓐᓇᓚᐅᕐᓯᒪᖕᒪᑦ 2018-ᒧᑦ ᐊᒻᒪ 2019-ᒧᑦ.
ᐱᔾᔪᑎᖃᓚᐅᕐᑐᓪᓗ ᑕᒪᒃᑯᐊ ᐱᖁᔭᓕᕆᔨᐅᔪᑦ, ᐊᒻᒪᓗ ᑲᒻᐸᓂᐅᔪᖅ, ᐅᒃᐱᕈᓱᓚᐅᕐᓯᒪᖕᒪᑕ ᐅᓇ ᐹᕕᓐᓛᓐᑯᑦ ᐊᓯᐊᒎᖓᔪᖅ ᐊᒻᒪ ᐊᖏᓂᕐᓴᐅᓂᐊᕐᓗᑎ ᐱᓕᕆᓂᖅ 2 ᐊᖏᓂᕐᓴᒥᑦ ᐱᔪᒪᓂᕐᒧᑦ ᑐᒃᓯᕋᐅᑎ ᐊᖏᖅᑕᐅᓂᐊᕋᓱᒋᔭᐅᓚᐅᕐᓯᒪᖕᒪᑦ 2020 ᐱᒋᐊᓕᓵᖅᑎᓪᓗᒍ.
ᑭᓯᐊᓂᓕ ᑕᐃᒪᐃᔾᔮᙱᑦᑐᖅ. ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑦ ᑭᖑᓕᖅᐹᒥᑦ ᑭᒃᑯᓕᒫᓂᑦ ᑐᓴᖅᑎᑦᑎᓂᕐᒧᑦ ᑲᑎᒪᓂᖓ ᐱᓕᕆᓂᖅ 2-ᒥᑦ ᑐᒃᓯᕋᐅᑎᓂᒃ ᓄᖅᑲᑳᓪᓚᓚᐅᕐᓯᒪᖕᒪᑦ ᓄᕕᐱᕆ 6-ᖑᓚᐅᕐᑐᒥᑦ ᐊᒻᒪᓗ ᑲᑎᒪᔨᒃᑯᑦ ᒫᓐᓇ ᐃᓱᒪᒃᓴᕐᓯᐅᖅᖢᑎᒃ ᖃᖁᒍ ᑲᑎᒪᒃᑲᓐᓂᓛᕐᓂᖏᓐᓂᒃ.
ᑕᐃᒪᐃᓐᓂᖓᓄᑦ ᐹᕕᓐᓛᓐᑯᑦ ᐅᖓᕙᕆᐊᕈᑎᖃᕆᐊᖃᓕᕐᑐᑦ ᑖᒃᑯᐊ ᐱᖁᔭᓕᕆᔨᐅᔪᑦ ᐱᓕᕆᐊᖃᕐᓂᖏᓐᓂᒃ ᐱᓕᕆᓂᖅ 2-ᒥᑦ ᑐᒃᓯᕋᐅᑎᓂᒃ.
“ᖃᐅᔨᒪᑦᑎᐊᕐᓇᓕᕐᑐᖅ ᐱᓕᕆᓂᖅ 2-ᒥᑦ ᐱᕙᓪᓕᐊᓂᕐᒧᑦ ᑐᒃᓯᕋᐅᑎᓕᕆᓂᖅ ᑎᓯᐱᕆ 31, 2019 ᐅᖓᑖᓅᕐᓂᐊᕐᓂᖓᓂᒃ,” ᐹᕕᓐᓛᓐᑯᑦ ᑎᑎᕋᓚᐅᕐᑐᑦ ᑎᓯᐱᕆ 6-ᒥᑦ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓄᑦ.
ᐊᒻᒪᓗ ᓄᕕᐱᕆᒥ, ᐹᕕᓐᓛᓐ ᑐᓴᖅᑎᑦᑎᓚᐅᕐᓯᒪᔪᐃ ᐃᖅᑲᓇᐃᔭᖅᑎᓂ 586-ᓂᒃ ᑳᓐᑐᕌᒃᑯ ᐃᖅᑲᓇᐃᔭᖅᑎᑦᑎᔪᓐᓃᓚᐅᕐᓯᒪᓂᖏᓐᓂᒃ ᐃᓚᖃᖅᖢᑎᒃ 96-ᓂᒃ ᐃᓄᖕᓂᒃ, ᑖᒃᑯᐊᓗ ᐃᖅᑲᓇᐃᔭᕋᔭᓚᐅᕐᑐᑦ ᑎᓯᐱᕆ ᑎᑭᓪᓗᒍ ᐊᒻᒪ ᐃᖅᑲᓇᐃᔭᖅᑎᑕᐅᒃᑲᓐᓂᓕᕐᓗᑎᒃ 2020-ᒥᑦ.
ᑖᒃᑯᐊ ᑲᒻᐸᓂᐅᔪᑦ ᐅᖃᓕᕐᑐᑦ ᒐᕙᒪᒃᑯᓐᓂᒃ ᐱᓕᕆᖃᑎᖃᕐᓂᖏᓐᓂ ᐃᑲᔪᕋᓱᒃᖢᑎᒃ ᐃᖅᑲᓇᐃᔭᖅᑎᐅᓚᐅᕐᑐᓂᒃ ᐃᖅᑲᓇᐃᔮᓂᒃ ᐊᓯᖏᓐᓂᒃ ᕿᓂᕐᖢᑎᒃ.
“ᐹᕕᓐᓛᓐ ᐱᓕᕆᖃᑎᖃᓚᐅᕐᑐᑦ ᑳᓐᑐᕌᒃᑎᓂᒃ ᐊᒻᒪ ᒐᕙᒪᒃᑯᓐᓂ ᕿᓂᕋᓱᒃᖢᑎᒃ ᐊᒃᑐᖅᑕᐅᓯᒪᔪᑦ ᐃᖅᑲᑐᐃᔨᑦ ᐊᓯᖏᓐᓂᒃ ᐃᖅᑲᓇᐃᔭᓕᕈᓐᓇᕋᔭᕆᐊᒃᓴᖏᓐᓂᒃ ᐊᒻᒪᓗ ᒫᓐᓇᒧᑦ ᐃᓚᖏᓐᓂᒃ ᐃᖅᑲᓇᐃᔭᓕᖅᑎᑦᑎᒃᑲᓐᓂᖅᖢᑎᒃ ᐃᓄᖕᓂᑦ,” ᑲᒻᐸᓂ ᐅᖃᖅᑐᖅ.
2018-ᒥᑦ, ᓯᕗᓪᓕᕐᒥᑦ ᐹᕕᓐᓛᓐᑯᑦ ᐊᐱᕆᑎᓪᓗᒋ ᐱᓕᕆᐊᖏᑦ ᐊᖏᒡᓕᒋᐊᖅᑕᐅᑎᑕᐅᔪᒪᓂᖓᓂᒃ 4.2 ᒥᓕᐊᓐᓂᒃ 6 ᒥᓕᐊᓐ ᑕᓐᓄᑦ, ᐅᖃᕐᓯᒪᓚᐅᕐᑐᑦ ᑕᐃᒪᐃᑦᑕᕆᐊᖃᕐᓂᖏᓐᓂᒃ ᐃᖅᑲᓇᐃᔭᖅᑎᑦᑏᓐᓇᕐᓂᐊᕈᑎᒃ ᐊᕐᕌᒍᓕᒫᖅ.
ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑦ ᓯᕗᓪᓕᕐᒥᑦ ᐊᖏᓚᐅᕐᓯᒪᙱᑦᑐᑦ ᐊᖏᒡᓕᒋᐊᕈᑎᒋᔭᐅᔪᒥᑦ.
ᑭᓯᐊᓂᓕ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐊᒻᒪᓗ ᓄᓇᕗᑦ ᒐᕙᒪᒃᑯᑦ ᐱᓕᕆᐊᖃᓕᖔᓚᐅᕐᑎᓪᓗᒋ ᐅᑯᓄᖓ ᐹᕕᓐᓛᓐᑯᓐᓄᑦ, ᒐᕙᒪᑐᖃᒃᑯᑦ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔩ ᐃᓱᒪᓕᐊᕕᓂᖓᓂᒃ ᐊᓯᙳᖅᑎᑦᑎᓚᐅᕐᓯᒪᔪᑦ ᐊᒻᒪᓗ ᐊᖏᖅᖢᑎᒃ ᐃᓱᒪᒋᔭᐅᔪᒥᒃ.
ᑕᐃᒪᐃᓕᐅᕐᑎᓪᓗᒋᓪᓕ, ᐹᕕᓐᓛᓐᑯᑦ ᐅᖃᓚᐅᕐᑐᑦ ᐃᓱᒪᓕᐅᕆᔪᖃᕆᐊᖃᕐᓂᖓᓂᒃ ᐱᓕᕆᓂᕐᒧᑦ ᐅᖓᕙᕆᐊᕈᑎᒃᓴᓂ ᐅᓇ ᑎᑭᓪᓗᒍ ᕕᕝᕗᐊᕆ 28.
“ᐅᓇ ᓈᒻᒪᓈᕐᓯᒪᓇᓱᖕᓂᖓ ᐋᖅᑭᒃᓯᒪᔭᕆᐊᖃᖅᑐᖅ ᐅᑯᐊ ᐹᕕᓐᓛᓐᑯᑦ ᐱᕕᖃᕈᓐᓇᖁᓪᓗᒋ ᐅᒥᐊᕐᔪᐊᓂ ᖃᐅᔨᒪᕙᒌᖅᑎᑦᑎᓂᕐᒥᒃ 2020 ᐅᒥᐊᕐᔪᐊᓕᕆᓐᓇᒧᑦ,” ᐹᕕᓐᓛᓐᑯᑦ ᐅᖃᖅᑐᑦ.
ᐅᖃᓚᐅᕐᒥᔪᑦ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᑦ ᐃᓱᒪᓕᐊᕆᔭᖏ ᑭᖑᕙᕈᑎᐅᔭᕆᐊᖃᙱᓐᓂᒃ ᐃᓱᒪᓕᐅᕆᓂᕐᒥᒃ ᐊᓯᐊᒎᖓᔪᒥᒃ ᐊᒻᒪ ᐊᖏᓂᕐᓵᓗᖕᒥ ᐱᓕᕆᓂᖅ 2-ᒥᑦ ᐊᖏᒡᓕᒋᐊᖅᑎᑦᑎᔪᒪᓂᕐᒧᑦ ᑐᒃᓯᕋᐅᑎᓂᒃ.
(0) Comments