ᐃᓄᐃᑦ ᐅᑭᐅᕐᑕᖅᑐᕐᒥᐅᑕᑦ ᑲᑎᒪᔨᕐᔪᐊᖏᑦ ᐱᓇᓱᒍᑎᖃᕆᐊᖅᐳᑦ ᐃᒪᐅᑉ ᐃᓗᐊᒍᑦ ᓂᐱᖃᕈᑎᐅᓗᐊᖅᑐᓂᒃ
ᓄᓇᕐᔪᐊᕐᒥ ᑕᕆᐅᕐᒥᐅᑕᓕᕆᓂᕐᒧᑦ ᑲᑐᔾᔨᖃᑎᒌᖑᔪᑦ ᐊᖏᕐᑐᑦ ᓄᓇᖃᖅᑳᖅᑐᑦ ᐃᓱᒫᓘᑎᖏᓐᓂᒃ ᐃᓱᒪᒋᔭᖃᕐᓂᐊᕐᓂᕋᖅᖢᑎᒃ
ᐃᓄᐃᑦ ᐅᑭᐅᕐᑕᖅᑐᕐᒥᐅᑕᑦ ᑲᑎᒪᔨᕐᔪᐊᓄᑦ ᐃᒃᓯᕙᐅᑕᐅᑉ ᑐᒡᓕᖓ ᓖᓴ ᖁᐱᕐᕈᐊᓗᒃ, ᐅᕙᓂ ᐊᔾᔨᒦᑦᑐᖅ, ᐅᖃᓚᐅᕐᑐᖅ ᓂᕆᐅᖕᓂᕋᖅᖢᓂ ᓄᓇᕐᔪᐊᕐᒥ ᑕᕆᐅᕐᒥᐅᑕᓕᕆᔨᑦ ᑲᑐᔾᔨᖃᑎᒌᖏᑦ ᓄᓇᖃᖅᑳᖅᑐᑦ ᖃᐅᔨᒪᔭᖏᓐᓂᒃ ᐃᓱᒪᒋᔭᖃᕐᓂᐊᖁᓪᓗᓂᒋᑦ ᐃᓱᒪᓕᐅᕆᑎᓪᓗᒋᑦ ᐃᒪᐅᑉ ᐃᓗᐊᒍᑦ ᓂᐱᖃᕐᓂᐅᕙᒃᑐᓂᒃ. (ᐊᔾᔨᙳᐊᖁᑎᖓ ᓖᓴ ᒍᕆᒍᐊ)
For an English version of this story, see Inuit Circumpolar Council takes aim at underwater noise pollution
ᐅᑯᐊ ᓄᓇᕐᔪᐊᕐᒥ ᑕᕆᐅᕐᒥᐅᑕᓕᕆᓂᕐᒧᑦ ᑲᑐᔾᔨᖃᑎᒌᖑᔪᑦ ᐃᓱᒪᓕᐅᕆᓇᓱᒃᑎᓪᓗᒋᑦ ᖃᓄᖅ ᑕᕆᐅᑉ ᐃᓗᐊᒍᑦ ᓂᐱᖃᕈᑎᐅᓗᐊᖅᑐᓂᒃ ᐱᓕᕆᐊᖃᕐᓂᕐᒥᒃ, ᐃᓄᐃᑦ ᑭᒡᒐᖅᑐᐃᔨᖏᑦ ᐃᓱᒪᔪᑦ ᐃᓱᒫᓘᑎᖏᑦ ᐃᑲᔪᕈᑎᐅᓂᐊᖁᓪᓗᒋᑦ ᐱᓕᕆᐊᕆᔭᐅᔪᓄᑦ ᑐᑭᒧᐊᕈᑎᓕᐅᕐᓂᒃᑯᑦ.
“ᑐᓴᖅᑕᐅᖅᑰᔨᓚᐅᖅᑐᒍᑦ,” ᐅᖃᖅᑐᖅ ᓖᓴ ᖁᐱᕐᕈᐊᓗᒃ, ᐊᖓᔪᖅᑳᒧᑦ ᑐᒡᓕᕆᔭᐅᔪᖅ ᐃᓄᐃᑦ ᓄᓇᕐᔪᐊᕐᒥ ᑲᑎᒪᔨᕐᔪᐊᓄᑦ, ᓄᓇᕐᔪᐊᒥ ᑲᑐᔾᔨᖃᑎᒌᑦ ᑭᒡᒐᖅᑐᐃᔪᑦ ᒫᓂ 180,000 ᐃᓄᖕᓂ ᑲᓇᑕᒥ, ᑲᓛᖡᑦ ᓄᓇᖓᓂᒃ, ᐊᓛᔅᑲᒥᑦ ᐊᒻᒪ ᐅᕌᓯᐊᒥ.
ᑲᑎᒪᑎᓪᓗᒋᑦ ᐅᑯᐊ IMO, ᔫᓇᐃᑕᑦ ᓇᐃᓴᓐᑯᑦ ᐱᓕᕆᕝᕕᖓ ᐱᖁᔭᓕᐅᖅᑎᐅᕙᒃᑐᑦ ᐅᒥᐊᕐᔪᐊᒃᑯᑦ ᐅᓯᖃᑦᑕᕐᓂᕐᒥᒃ, ᖃᓄᖅ ᐱᑕᖃᕈᓐᓃᖅᐹᓪᓕᖅᑎᑦᑎᓇᔭᕆᐊᒃᓴᖏᓐᓂᒃ ᑕᕆᐅᑉ ᐃᓗᐊᒍᑦ ᓂᐱᖃᖃᑦᑕᕐᓂᐅᓗᐊᕐᑐᖅ ᐅᒥᐊᕐᔪᐊᓄᑦ, ᖁᐱᕐᕈᐊᓗᒃ ᐅᖃᓪᓚᓚᐅᕐᓯᒪᖕᒪᑦ ᑭᒡᒐᖅᑐᐃᓪᓗᓂ ᐃᓄᐃᑦ ᐅᑭᐅᕐᑕᖅᑐᕐᒥᑦ ᑲᑎᒪᔨᕐᔪᐊᖏᓐᓂᒃ ᑕᒪᒃᑯᐊ ᐸᕐᓇᐅᑎᐅᔪᑦ ᐱᑕᖃᕈᓐᓃᖅᐹᓪᓕᖅᑎᑦᑎᓂᕐᒥᒃ ᓂᐱᖃᕈᑎᐅᕙᒃᑐᓂᒃ ᐃᓱᒪᒋᔭᖃᖃᓯᐅᑎᖁᓪᓗᒋᑦ ᓄᓇᖃᖅᑳᖅᑐᑦ ᖃᐅᔨᒪᔭᖏᓐᓂᒃ. ᐃᓱᒪᓕᐊᕆᔭᖓ ᐊᑐᖅᑕᐅᔪᒪᓕᓚᐅᕐᑐᖅ.
ᐅᓇ ᐅᖃᓪᓚᒍᓐᓇᕐᓂᖅ ᓯᕗᓪᓕᖅᐹᕆᔭᐅᔪᖅ ᐅᑯᐊ ᐃᓄᐃᑦ ᐅᑭᐅᕐᑕᖅᑐᕐᒥ ᑲᑎᒪᔨᕐᔪᐊᑦ ᐊᓯᙳᖅᑎᑦᑎᓂᖏᓐᓂᒃ IMO ᐊᑐᐊᒐᓂᒃ ᑕᐃᒪᙵᑦ ᐃᓚᒋᔭᐅᓪᓚᕆᓕᓚᐅᕐᓯᒪᖕᒪᑕ.
ᐅᑯᐊ IMO ᑐᑭᒧᐊᕈᑎᒋᔭᐅᔪᓂᒃ ᖃᐅᔨᓴᒃᑲᓐᓂᕋᓱᖕᒪᑕ ᐆᒧᖓ ᐱᑕᖃᕈᓐᓃᖅᐹᓪᓕᖅᑎᑦᑎᓇᓱᖕᓂᕐᒥ ᐅᒥᐊᕐᔪᐊᓄᑦ ᓂᐱᖃᕈᑎᐅᕙᓗᐊᖅᑐᓂᒃ ᐋᖅᑭᒃᑕᐅᓚᐅᕐᓯᒪᔪᒥᒃ 2014-ᒥ. ᐃᓱᒪᓕᐊᕆᔭᐅᔪᑦ ᓄᑖᓄᑦ ᑐᑭᒧᐊᕈᑎᒃᓴᓄᑦ ᐱᔭᐅᓯᒪᔭᕆᐊᖃᕐᓂᐊᖅᑐᑦ 2023-ᒥ.
ᐅᑯᓄᖓᓕ ᐃᓄᐃᑦ ᐅᑭᐅᕐᑕᖅᑐᕐᒥ ᑲᑎᒪᔨᕐᔪᐊᓄᑦ, ᐱᓕᕆᐊᒃᓴᖃᖅᑐᑦ ᐃᓄᐃᑦ ᖃᐅᔨᒪᔭᖏᓐᓂᒃ ᑲᑎᕐᓱᐃᕙᓪᓕᐊᓗᑎᒃ ᐊᒻᒪᓗ ᖃᓄᖅ ᑕᕆᐅᑉ ᐃᓗᐊᓂᒃ ᐅᒥᐊᕐᔪᐊᓄᑦ ᓂᐱᖃᕐᓂᐅᔪᑦ ᑖᒃᑯᓂᖓ ᐊᒃᑐᐊᓂᖃᕆᐊᒃᓴᖏᓐᓂᒃ.
ᑕᕆᐅᑉ ᐃᓗᐊᒍᑦ ᓂᐱᖃᑲᑕᒃᑐᑦ ᓈᒻᒪᙱᓕᐅᕈᑎᐅᕙᓪᓕᐊᖕᒪᑕ ᐅᑭᐅᕐᑕᖅᑐᕐᒥ ᐃᒪᖏᓐᓂᒃ ᐊᒻᒪᓗ ᓄᓇᕗᒥᒃ ᐃᓚᒋᐊᕈᑎᐅᓪᓗᓂ. ᐆᒧᖓᓕ ᒥᓚᓂ ᓛᓐᑳᔅᑐᒧᑦ, ᐆᒪᔪᓂᒃ ᖃᐅᔨᓴᖅᑎᐅᔪᑦ ᓄᓇᕐᔪᐊᕐᒥᒃ ᐆᒪᔪᓕᕆᔨᕐᔪᐊᓄᑦ (WWF) ᐅᑭᐅᕐᑕᖅᑐᕐᒥ ᐱᓕᕆᐊᓄᑦ, ᑕᕆᐅᕐᒥᐅᑕ ᓂᕐᔪᑏ ᑐᓵᔭᖏᓐᓄᑦ ᐃᑲᔪᖅᑕᐅᕙᖕᒪᑕ ᓂᕆᓂᐊᖅᑕᖏᓐᓂᒃ ᕿᓂᕐᑎᓪᓗᒋᑦ, ᓴᐳᑎᓯᒪᓇᓱᒃᑎᓪᓗᒋᑦ ᒥᑭᑦᑐᖁᑎᖏᓐᓂᒃ ᐊᒻᒪᓗ ᐊᐃᑉᐸᖅᓯᐅᖅᖢᑎᒃ.
ᐅᑯᐊ ᓄᓇᕐᔪᐊᕐᒥᑦ ᐆᒪᔪᓕᕆᔨᕐᔪᐊᒃᑯᑦ ᐅᖃᓚᐅᕐᓯᒪᖕᒪᑕ ᐅᑭᐅᕐᑕᖅᑑᑉ ᑕᕆᐅᖓ (Arctic Ocean) ᐊᒃᑐᖅᑕᐅᓂᖃᔭᓗᐊᕐᓂᖓᓂᒃ ᐅᒥᐊᕐᔪᐊᑦ ᓂᐱᖃᕈᑎᖏᓐᓄᑦ, ᓲᖃᐃᒻᒪ ᓂᒡᓚᓱᖕᓂᖅ ᐅᖓᓯᒃᑐᒧᑦ ᑐᓴᕐᓴᐅᓐᓇᕐᓂᖅᓴᐅᖕᒪᑦ ᐊᒻᒪᓗ ᐃᒃᑲᓐᓂᕐᓴᐃᑦ ᐊᑭᐅᔭᓐᓂᖅᓴᐅᕙᒃᖢᑎᒃ.
2020-ᒥ, ᐅᑯᐊ ᐅᑭᐅᕐᑕᖅᑐᕐᒥ ᑲᑎᒪᔨᕐᔪᐊ ᐅᓂᒃᑳᓕᐊᓂᒃ ᑐᓂᓯᓚᐅᕐᓯᒪᖕᒪᑕ ᒪᑯᐊ ᐅᒥᐊᕐᔪᐊᑦ ᐅᑭᐅᕐᑕᖅᑐᒃᑯᑦ ᐃᖏᕐᕋᕙᒃᑐᑦ ᐅᓄᕐᓯᕚᓪᓕᒻᒪᕆᖕᓂᖏᓐᓂᒃ. 2013-ᒥᑦ 2019-ᒧᑦ ᐅᒥᐊᕐᔪᐊᑦ ᐅᑭᐅᕐᑕᖅᑐᒃᑰᖅᑐᑦ ᐅᓄᕐᓯᕚᓪᓕᓚᐅᕐᓯᒪᔪᑦ 25 ᐳᓴᓐᑎᒥᒃ ᐊᒻᒪᓗ ᐅᖓᓯᒃᑐᒧᑦ ᐃᖏᕐᕋᕙᒃᑐᑦ ᐅᓄᕐᓯᕚᓪᓕᕆᓪᓗᑎᒃ 75 ᐳᓴᓐᑎᒥᒃ, ᑖᒃᑯᐊ ᐅᓂᒃᑳᑦ ᐅᖃᖅᓯᒪᓪᓗᑎᒃ. ᐅᓇ ᐅᓄᕐᓯᕚᓪᓕᕐᓂᖅ ᐅᒥᐊᕐᔪᐊᑦ ᐅᑭᐅᕐᑕᖅᑐᒃᑰᖃᑦᑕᕐᓂᖏᑦ ᒪᓕᓗᐊᖅᑐᑦ ᓯᑰᑉ ᐊᐅᒃᐸᓪᓕᐊᓂᖓᓄᑦ.
ᑕᒪᒃᑯᐊ ᓂᐱᖃᕈᑎᐅᑲᑕᒃᑐᑦ ᐊᒃᑐᐃᓂᖃᖅᑐᑦ ᐃᓄᐃᑦ ᓄᓇᓕᖏᓐᓂᒃ ᐆᑐᓇᖅ ᒥᑦᑎᒪᑕᓕᒃ, ᑯᐱᕐᕈᐊᓗᒃ ᐅᖃᓚᐅᕐᑐᖅ. ᕿᓚᓗᒐᐃᑦ ᑑᒑᓖᑦ ᑕᒫᓃᑉᐸᒃᑐᑦ ᐊᖑᓇᓱᒃᑎᓄᑦ ᓂᕆᔭᒃᓴᕆᔭᐅᕙᒃᑐᑦ ᑕᒪᐅᙵᑲᑕᒍᓐᓃᖅᑐᑦ ᐅᓄᕐᓂᖅᓴᐃᑦ ᐅᒥᐊᕐᔪᐊᑦ ᑕᒪᐅᓈᑲᑕᓕᕐᓂᖏᓐᓄᑦ, ᐅᖃᖅᑐᖅ.
ᖁᐱᕐᕈᐊᓗᒃ ᐅᖃᓚᐅᕐᒥᔪᖅ ᐅᔭᕋᒃᓯᐅᕐᓂᖅ ᐊᒃᑐᐊᓂᖃᒻᒪᕆᖕᓂᖓᓂᑦᑕᐅᖅ ᐅᒥᐊᕐᔪᐊᓕᕆᓂᕐᒧᑦ ᓲᖃᐃᒻᒪ ᐅᔭᕋᒃᓯᐅᕐᕕᒃᒥᑦ ᖃᓄᐃᓕᐅᕈᑎᐅᔪᑦ ᐱᕙᓪᓕᐊᑎᓪᓗᒋᑦ ᐅᒥᐊᕐᔪᐊᖃᒃᑲᓐᓂᕈᑎᐅᓂᐊᖅᑐᖅ.
“ᑕᒪᑐᒥᖓ ᖃᐅᔨᒪᓇᓱᑦᑎᐊᕆᐊᖃᕋᑦᑕ,” ᐅᖃᖅᑐᖅ.
ᒫᓐᓇᓕ, ᐅᑯᐊ ᐃᓄᐃᑦ ᐅᑭᐅᕐᑕᖅᑐᕐᒥ ᑲᑎᒪᔨᕐᔪᐊᑦ ᖃᓄᐃᓕᐅᕈᑎᒃᓴᓂᒃ ᐋᖅᑭᒃᓱᐃᕙᓪᓕᐊᓕᕐᑐᑦ ᖃᓄᖅ ᐅᖃᖃᑎᖃᕈᓐᓇᕐᓂᐊᕐᒪᖔᑦ ᐃᓄᐃᑦ ᓄᓇᖏᓐᓂᒃ ᐊᒻᒪᓗ ᑐᑭᓯᕚᓕᕋᓱᒡᓗᑎᒃ ᖃᓄᖅ ᑕᕆᐅᑉ ᐃᓗᐊᒍᑦ ᓂᐱᐅᔪᑦ ᐊᒃᑐᐊᓂᖃᕐᒪᖔᑕ ᑖᒃᑯᓄᖓ, ᖁᐱᕐᕈᐊᓗᒃ ᐅᖃᓚᐅᕐᑐᖅ.
ᐃᓄᐃᑦ ᐅᑭᐅᕐᑕᖅᑐᕐᒥ ᑲᑎᒪᔨᕐᔪᐊᖏᑦ ᐱᔪᓐᓇᕐᓂᖃᖅᑎᓪᓗᒋᑦ ᐅᕙᓂ IMO ᑖᓐᓇᓗ ᐊᕐᕌᒎᖕᓂ ᒪᕐᕉᖕᓂ ᐊᑐᕐᓂᐊᖅᖢᓂ, ᖁᐱᕐᕈᐊᓗᒃ ᐅᖃᓚᐅᕐᑐᖅ ᐊᒃᑐᐃᒍᑎᓂᒃ ᖃᐅᔨᓇᓱᒃᓂᒃ ᒪᑯᓄᖓ ᐅᒥᐊᕐᔪᐊᑦ ᓂᐱᖏᓐᓄᑦ ᓄᓇᖃᖅᑳᖅᑐᑦ ᓄᓇᓕᖏᓐᓂᒃ ᐊᒃᑐᐃᓂᖃᕐᓂᐊᖅᑐᑦ ᓄᓇᕐᔪᐊᑎᒍᑦ ᐱᓕᕆᖃᑎᒌᓐᓄᑦ.
“ᐱᓕᕆᐊᖃᕋᓱᑦᑎᐊᖅᑐᒍᑦ ᐅᑯᐊ ᐃᓄᐃᑦ ᐅᑭᐅᕐᑕᖅᑐᕐᒥ ᑲᑎᒪᔨᕐᔪᐊᖏᑦ ᐱᓕᕆᔨᖃᕐᓂᐊᕐᓗᑎᒃ ᖃᐅᔨᒪᔪᓂᒃ ᐃᓄᖕᓂᒃ ᐅᑭᐅᕐᑕᖅᑐᕐᒥᐅᑕᕐᓂᒃ ᒪᑐᒧᖓ ᐱᓕᕆᐊᕆᔭᑦᑎᓐᓄᑦ,” ᖁᐱᕐᕈᐊᓗᒃ ᐅᖃᓚᐅᕐᑐᖅ.
(0) Comments