ᐃᓄᐃᑦ ᐅᓄᕐᑎᑕᐅᓗᐊᕐᑐᖅ ᒐᕙᒪᑐᖃᒃᑯᑦ ᑎᒍᔭᐅᓯᒪᕝᕕᖏᓐᓂ ᓄᕙᒡᔪᐊᕐᓇᖅ-19-ᒥ ᐋᓐᓂᐊᖃᕐᓂᖏᑦ

“ᑲᑉᐱᐊᓱᖕᒪᑕ, ᐃᓱᒫᓘᑎᖃᓗᐊᖅᖢᑎᒃ, ᐃᓄᑑᓐᓇᖅᑐᒦᑎᑕᐅᓪᓗᑎᒃ”

ᓄᕙᒡᔪᐊᕐᓇᖅ-19-ᒥᑦ ᐋᓐᓂᐊᖃᖅᑐᑦ ᐃᓄᐃᑦ ᐃᓚᒋᔭᐅᓪᓗᑎᒃ ᐅᕙᓂ ᒐᕙᒪᑐᖃᒃᑯᑦ ᐃᑲᔪᖅᑕᐅᕝᕕᖓᓂᒃ, ᑕᕝᕙᓂ 30-ᓂᒃ ᐃᓄᖕᓂ ᑎᒍᔭᐅᓯᒪᔪᓂᒃ, 13 ᖃᐅᔨᓴᖅᑕᐅᓂᒃᑯᑦ ᐋᓐᓂᐊᖃᕐᓂᕋᖅᑕᐅᓚᐅᕐᑐᑦ ᐅᐱᕐᙶᖑᓚᐅᕐᑐᒥᑦ. (ᐊᔾᔨᙳᐊᖅ ᐃᑲᔪᖅᑕᐅᕝᕕᓕᕆᔨᒃᑯᑦ ᑲᓇᑕᒥ)

By ᓴᐃᕋ ᕌᔾᔪᔅ

For an English version of this story, see Inuit overrepresented in federal prisons’ COVID-19 cases

ᐃᑲᔪᖅᑕᐅᕝᕕᓕᕆᔨᒃᑯᑦ ᖃᐅᔨᓴᖅᑎᐅᑉ ᑎᑎᕋᕐᕕᖓ ᐅᖃᐅᓯᖃᓕᓚᐅᕐᐳᖅ ᐅᓄᓗᐊᖅᑐᐊᓘᓂᖏᓐᓂᒃ ᓄᕙᒡᔪᐊᕐᓇᖅ-19-ᒥᑦ ᐊᐃᑦᑐᕐᓗᒃᑕᐅᓯᒪᔪᑦ ᐃᓄᐃᑦ ᑎᒍᔭᐅᓯᒪᔪᑦ ᒐᕙᒪᑐᖃᒃᑯᑦ ᑎᒍᔭᐅᓯᒪᕝᕕᖏᓐᓂᒃ.

ᐅᓄᕐᓂᕐᓴᐃᑦ ᐋᓐᓂᐊᖃᖅᑐᑦ ᓇᓂᕈᓘᔭᖅ ᐃᓂᖃᖅᑎᑕᐅᓚᐅᕐᑐᑦ ᐅᕙᓂ ᒐᕙᒪᑐᖃᒃᑯᑦ ᐃᑲᔪᖅᑕᐅᕝᕕᖓᓂᒃ (Federal Training Centre) ᓚᕚᓪ, ᑯᐸᐃᒃᒥᑦ, ᐃᓂᖃᕐᕕᖃᕐᒪᑕ ᐃᓄᖕᓄᑦ ᐊᖑᑎᓄᑦ—ᓇᑉᐸᓪᓗᐊᑲᓴᖏᓪᓗ ᖃᐅᔨᓴᖅᑕᐅᓂᒃᑯᑦ ᐋᓐᓂᐊᖃᖅᖢᑎ ᑕᐃᒪᙵᓂᑦ ᒫᓯᐅᓚᐅᕐᑐᒥᓐ.

ᐱᔾᔪᑎᒋᔭᐅᓯᒪᔪᕐᓕ ᑕᒪᑐᒧᖓ ᐊᕕᑎᑕᐅᓯᒪᓪᓗᑎᒃ ᐊᓯᖏᓐᓂᒃ ᑎᒍᔭᐅᓯᒪᖕᒥᔪᓂᒃ, ᒪᓐᑐᕆᐊᒥ ᓗᐊᐃᔭ ᐅᖃᓚᐅᕐᑐᖅ, ᐊᒻᒪᓗ ᐃᓕᖁᓯᖏᓐᓂᒃ ᐊᒻᒪ ᐃᓄᒃᑎᑐᑦ ᐱᔨᑦᑎᕋᐅᑎᖃᙱᓐᓂᖏᓐᓂᒃ ᐊᓯᐊᓂᒃ ᐱᖃᑦᑕᕋᔭᖅᑕᖏᓐᓂᒃ.

“ᖃᐅᔨᒪᔭᐅᔭᕆᐊᖃᖅᑐᖅ ᐅᓄᓗᐊᕐᑐᐊᓘᖕᒪᑕ ᐃᓄᐃᑦ ᑎᒍᔭᐅᓯᒪᔪᑦ ᐊᐃᑦᑐᖅᑕᐅᓯᒪᔪᑦ ᑖᔅᓱᒥᖓ ᐋᓐᓂᐊᕐᓇᒥᑦ, ᑕᐅᑐᙳᐊᖅᖢᒍᓕ ᐊᓯᖏᓐᓃᑦᑐᑦ ᑎᒍᔭᐅᓯᒪᕙᒃᑐᑦ,” ᐃᑲᔪᖅᑕᐅᕝᕕᖕᓂᑦ ᖃᐅᔨᓴᖅᑎᐅᑉ ᐅᓂᒃᑳᖏ ᔫᓂ 19-ᒥᑦ ᐅᖃᕐᓯᒪᓚᐅᕐᑐᖅ.

“ᐱᓗᐊᕐᑐᒥᓐ, ᐃᓄᐃᑦ 1 ᐳᓴᓐᑎᐅᑉ ᑐᖔᓃᒃᑲᓗᐊᖅᑎᓪᓗᒋᑦ ᑲᑎᖢᑎᒃ ᑎᒍᔭᐅᓯᒪᔪᑦ, ᒐᕙᒪᑐᖃᒃᑯᑦ ᐃᑲᔪᖅᑕᐅᕝᕕᖏᓐᓂᒃ ᓄᕙᒡᔪᐊᕐᓇᖅ-19-ᒥᑦ ᐋᓐᓂᐊᖃᖅᑐᓂᒃ, ᐃᓄᐃᑦ 5 ᐳᓴᓐᑎᖏᑦ ᐋᓐᓂᐊᖅᑖᕐᓯᒪᕗᑦ ᑖᒃᑯᓇᓂ.”

ᐅᓄᕐᓂᕐᓴᐃᑦ ᓄᕙᒡᔪᐊᕐᓇᖅ-19-ᒥᑦ ᐋᓐᓂᐊᖃᖅᑐᓂᒃ ᐃᓄᖕᓂᑦ ᐅᕙᓃᓚᐅᕐᑐᑦ ᒐᕙᒪᑐᖃᒃᑯᑦ ᐃᑲᔪᖅᑕᐅᕝᕕᖓᓂᒃ, ᑕᕝᕙᓂᓕ 13 ᐅᑯᓇᙵᑦ 30-ᓂᒃ ᐃᓄᖕᓂ ᑎᒍᔭᐅᓯᒪᔪᑦ ᐋᓐᓂᐊᖅᑖᕐᓯᒪᓚᐅᕐᑐᑦ, ᐃᑲᔪᖅᑕᐅᕝᕕᓕᕆᔨᒃᑯᑦ ᑲᓇᑕᒥ ᐅᖃᓚᐅᕐᑐᑦ ᔫᓂ 23-ᒥ ᖃᕋᓴᐅᔭᒃᑯᑦ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ.

ᒐᕙᒪᑐᖃᒃᑯᑦ ᐃᑲᔪᖅᑕᐅᕝᕕᓕᕆᔨᖏᑦ ᑕᑯᓯᒪᖕᒪᑕ 162-ᓂᒃ ᓇᓗᓇᐃᕐᑕᐅᓯᒪᔪᓂᒃ ᓄᕙᒡᔪᐊᕐᓇᖅ-19-ᒥᑦ ᐋᓐᓂᐊᓕᖕᓂᒃ ᐊᒻᒪᓗ ᐊᑕᐅᓯᕐᒥ ᐃᓅᔪᓐᓃᖅᑐᖃᕐᓯᒪᓪᓗᓂ ᓄᕙᒡᔪᐊᕐᓇᖅ-19-ᒧᑦ ᑕᐃᒪᙵᑦ ᐋᓐᓂᐊᕐᓈᓗᒃ ᐱᒋᐊᓚᐅᕐᓯᒪᑎᓪᓗᒍ. ᑕᒪᕐᒥᒃ ᐊᑕᐅᓯᖅ ᐃᓚᐅᙱᖢᓂ ᐋᓐᓂᐊᖅᑖᖅᓯᒪᓂᒃᑯ ᒪᒥᓯᒪᓕᕐᑐᑦ, ᐃᑲᔪᖅᑕᐅᕝᕕᓕᕆᔨᒃᑯᑦ ᑲᓇᑕᒥ ᐅᖃᓚᐅᕐᑐᑦ.

ᐃᓄᐃᑦ ᐱᕋᔭᒃᓯᒪᔪᑦ ᐃᓂᖃᖅᑎᑕᐅᓚᐅᖃᑦᑕᕐᒪᑕ ᐊᓯᖏᓐᓂᒃ ᒪᕐᕉᖕᓂ ᒐᕙᒪᑐᖃᒃᑯᑦ ᑯᐸᐃᒃᒥ ᑎᒍᔭᐅᓯᒪᕝᕕᖏᓐᓂᒃ ᑖᒃᑯᓇᓂᓗ ᓄᕙᒡᔪᐊᕐᓇᖅ-19-ᒥᑦ ᐋᓐᓂᐊᖅᑖᖅᑐᖃᕐᓯᒪᓪᓗᓂ: ᔮᓕᐊᑦ ᐃᑲᔪᖅᑕᐅᕕᒃ ᐊᕐᓇᓄᑦ ᑎᒍᔭᐅᓯᒪᔪᓄᑦ—ᑕᕝᕙᓂᓗ ᐃᑲᔪᖅᑕᐅᕝᕕᓕᕆᔨᒃᑯᑦ ᑲᓇᑕᒥ ᒫᓐᓇ ᐃᓄᒃᑕᖃᙱᓐᓂᕋᖅᖢᓂᔾᔪᑦ—ᐊᒻᒪᓗ ᑎᒍᔭᐅᓯᒪᓪᓚᕆᒃᑐᓄᑦ ᐳᐊᑦ-ᑳᑎᐃ ᑎᒍᔭᐅᓯᒪᕝᕕᖕᒥᑦ.

ᑖᒃᑯᐊ ᑎᒍᔭᐅᓯᒪᕝᕕᐅᔪᑦ ᓄᑖᓂᒃ ᐋᓐᓂᐊᖃᓕᖅᑐᓂᒃ ᐅᖃᐅᓯᖃᕐᓯᒪᔪᓐᓃᕋᓗᐊᕐᑎᓪᓗᒋᑦ ᓱᓕ ᐃᒪᐃᓕᖓᔪᑦ “ᐃᓱᒪᒋᔭᐅᔪᑦ ᐋᓐᓂᐊᕐᒥᑦ ᐱᒋᐊᕐᕕᐅᑐᐃᓐᓇᕆᐊᖃᕐᓂᖏᓐᓂᒃ,” ᐃᑲᔪᖅᑕᐅᕝᕕᓕᕆᔨᒃᑯᓐᓄᑦ ᖃᐅᔨᓴᖅᑎᐅᑉ ᑎᑎᕋᕐᕕᖓ ᐅᓂᒃᑳᖏᓐᓂᒃ ᐅᖃᕐᓯᒪᓚᐅᕐᑐᑦ.

“ᐅᖃᕈᓐᓇᖅᑐᖓᓕ ᑲᑉᐱᐊᓇᖅᑐᕕᖕᒦᖂᔨᓐᓇᕐᓂᖓᓂᒃ”

ᐊᓕᒃᓵᑐᕋ ᐸᑭᐊᑦ, ᒫᓐᓂᕆᐊᒥᑦ ᓗᐊᐃᔭ ᐱᓕᕆᖃᑎᖃᖃᑦᑕᖅᑐᖅ ᐃᓄᖕᓂ ᑎᒍᔭᐅᓯᒪᔪᓂ ᒐᕙᒪᑐᖃᒃᑰᖓᔪᓂᒃ, ᐅᖃᓚᐅᕐᑐᖅ ᒐᕙᒪᒃᑯᑦ ᓄᕙᒡᔪᐊᕐᓇᖅ-19 ᒥᒃᓵᓄᑦ ᐱᓕᕆᑲᐅᖅᑐᙱᓐᓂᕕᓂᖏᓐᓄᑦ ᐋᓐᓂᐊᖅᑖᓚᐅᕐᓂᖏᑦ ᑎᒍᔭᐅᓯᒪᔪᓄᑦ ᐃᓱᒫᓘᑎᐅᓗᐊᕐᓂᖏᓐᓂᒃ.

ᐊᐱᕆᔭᐅᑎᓪᓗᒍᑦ ᐋᓐᓂᐊᖅᑖᖅᑐᑦ ᒥᒃᓵᓄᑦ ᒐᕙᒪᑐᖃᒃᑯᑦ ᐃᑲᔪᖅᑕᐅᕝᕕᖓᓂᒃ, ᐸᑭᐊᑦ ᐅᖃᓚᐅᕐᑐᖅ ᐃᑲᔪᖅᑕᐅᕝᕕᓕᕆᔨᒃᑯᑦ ᐊᕕᒃᓯᒪᑎᑦᑎᖃᑦᑕᕐᓂᖏᓐᓂᒃ ᐃᑲᕐᕋᓂᒃ 23 ᐊᒻᒪ ᓇᑉᐸᕐᒥᓐ ᐅᓪᓗᕐᒥᑦ, ᐃᑲᕐᕋᐅᑉ ᓇᑉᐸᖓᓂ ᐊᓃᓚᐅᑲᒍᓐᓇᖅᖢᑎᒃ, ᐅᕕᓂᖕᓂᐊᕐᓗᑎᒡᓘᓐᓃᑦ ᐅᕝᕙᓘᓐᓃᑦ ᐃᓚᖏᓐᓄᑦ ᐅᖄᓚᒍᓐᓇᖅᖢᑎᒃ.

“ᐅᖃᕈᓐᓇᖅᑐᖓᓕ ᑲᑉᐱᐊᓇᖅᑐᕕᖕᒦᖂᔨᓐᓇᕐᓂᖓᓂᒃ,” ᐸᑭᐊᑦ ᐅᖃᓚᐅᕐᑐᑎᖅ ᐃᓄᐃᑦ ᑎᒍᔭᐅᓯᒪᔪᑦ ᖃᓄᐃᓚᐅᕐᓂᖏᑦᑎᒍᑦ ᐋᓐᓂᐊᕕᒡᔪᐊᕐᓇᖅᑕᖃᓗᐊᓕᕐᑎᓪᓗᒍ ᒐᕙᒪᑐᖃᒃᑯᑦ ᐃᑲᖃᔪᖅᑕᐅᕝᕕᖓᓂ.

“ᑲᑉᐱᐊᓱᓚᐅᕐᒪᑕ, ᐃᓱᒫᓘᑎᖃᓗᐊᖅᖢᑎᒃ, ᐃᓄᑑᓐᓇᖅᑐᒦᑎᑕᐅᓪᓗᑎᒃ,” ᐅᖃᖅᑐᖅ. “ᐅᖃᐅᓯᖃᖅᑐᒍᑦ ᐃᑲᕐᕋᓂᒃ 23 ᐊᒻᒪ ᓇᑉᐸ ᑎᒍᔭᐅᓯᒪᕝᕕᖕᒦᖢᑎᒃ, ᐃᓄᑑᓪᓗᑎᒃ, ᖃᓄᐃᓕᐅᒐᒃᓴᖃᙱᖢᑎᒃ, ᐃᓚᖏᓐᓂᒃ ᑕᑯᔪᓐᓇᙱᖢᑎᒃ … ᐃᓕᖁᓯᓕᕆᓂᕐᒨᖓᔪᓂᒃ ᖃᓄᐃᓕᐅᕈᑎᒃᓴᓄᑦ ᐊᑐᕈᓐᓇᙱᖢᑎᒃ, ᑕᒪᓐᓇᓗ ᐱᔪᓐᓇᕈᑎᖃᖅᖢᑎᒃ ᑕᒪᒃᑯᓂᖓ.”

“ᐃᓱᒪᓕᕆᔭᐅᓂᑰᒍᑎ ᑕᐃᒪᓕ ᖃᐅᔨᔭᐅᓯᒪᓇᔭᕐᑐᖅ ᖃᓄᐃᓕᐅᕈᑎᕕᓂᕐᓄᑦ ᐃᓱᒫᓘᑎᖃᕐᓯᒪᓗᐊᒧᑦ ᓈᒻᒪᙱᓕᐅᕈᑎᖃᕐᓂᖏᓐᓂᒃ.

ᑕᒪᒃᑯᐊ ᐃᓚᒋᔭᐅᓚᐅᕐᑐᑦ ᐃᖅᑲᖅᑐᐃᕕᒃᑰᖅᑎᑦᑎᔪᒪᓂᕐᒧᑦ ᐃᑲᔪᖅᑕᐅᕝᕕᓕᕆᔨᒃᑯᑦ ᑲᓇᑕᒥ ᑲᒪᒋᔭᖃᕐᓯᒪᓂᖏᓐᓂᒃ ᐋᓐᓂᐊᕕᒡᔪᐊᕐᓇᓕᕆᓂᖅ ᑯᐸᐃᒃ ᑎᒍᔭᐅᓯᒪᕝᕕᖏᓐᓂᒃ, ᑕᒪᓐᓇᓗ ᐄᐳᕈᒥ ᐱᒋᐊᖅᑕᐅᓚᐅᕐᓯᒪᓪᓗᓂ.

ᐃᖅᑲᖅᑐᐃᕕᒃᑰᖅᑎᑦᑎᓇᓱᖕᓂᐅᔪᖅ ᑭᒡᒐᖅᑐᐃᓪᓗᑎᒃ ᑕᒪᐃᓐᓂ ᒐᕙᒪᑐᖃᒃᑯᓐᓂ ᑎᒍᔭᐅᓯᒪᔪᓂᒃ ᑯᐸᐃᒃᒥᑦ ᑕᐃᒪᙵᑦ ᒫᑦᓯ ᕿᑎᐊᓂᒃ, ᐅᖃᕐᓯᒪᓪᓗᑎᒃ ᒐᕙᒪᑐᖃᒃᑯᑦ ᑎᒍᔭᐅᓯᒪᕝᕕᓕᕆᔨᖏᑦ ᐊᑐᓕᖅᑎᑦᑎᓚᐅᕐᓯᒪᙱᓐᓂᖏᓐᓂᒃ ᓴᐳᑎᓯᒪᒍᑎᒃᓴᓂᒃ ᑎᒍᔭᐅᓯᒪᔪᓂᒃ ᐋᓐᓂᐊᕕᒡᔪᐊᕐᓇᒥᓐ.

ᒪᑭᕕᒃ ᐃᓕᖁᓯᓕᕆᓂᕐᒧᑦ ᖃᓄᐃᓕᐅᒐᒃᓴᖏᑦ ᑎᒍᔭᐅᓯᒪᔪᓄᑦ ᒫᓐᓇ ᓄᖅᑲᖓᑎᑕᐅᔪᑦ

ᐃᑲᔪᖅᑕᐅᕝᕕᓕᕆᔨᒃᑯᑦ ᑲᓇᑕᒥᑦ ᐱᓕᕆᖃᑎᒌᖕᓂᖃᕐᒪᑕ ᒪᑭᕕᒃᑯᓐᓂᒃ ᑐᓵᔨᖃᖅᑎᑦᑎᓂᒃᑯᑦ ᐊᒻᒪᓗ ᐃᓕᖁᓯᓕᕆᓂᕐᒧᑦ ᖃᓄᐃᓕᐅᒐᒃᓴᓄᑦ ᐃᓄᖕᓄᑦ ᑎᒍᔭᐅᓯᒪᔪᓂᒃ ᑯᐸᐃᒃ ᒐᕙᒪᑐᖃᒃᑯᑦ ᑎᒍᔭᐅᓯᒪᕝᕕᖏᓐᓂᒃ—ᐅᓄᕐᓂᕐᓴᐃᓪᓗ ᓄᖅᑲᖅᑎᑕᐅᓯᒪᓪᓗᑎᒃ ᒫᑦᓯ ᕿᑎᐊᓂᒃ ᐱᒋᐊᖅᖢᑎᒃ.

ᐋᓐᓂᐊᕕᒡᔪᐊᕐᓇᖅᑕᖃᖅᑎᓪᓗᒍᓕ, ᐃᑲᔪᖅᑕᐅᕝᕕᓕᕆᔨᒃᑯᑦ ᑲᓇᑕᒥ ᐅᖃᓚᐅᕐᑐᑦ ᒪᑭᕕᒃᑯᓐᓂ ᑐᓴᐅᒪᑎᑦᑎᓚᐅᕐᓂᖏᓐᓂᒃ ᑖᒃᑯᐊᓗ ᐃᑲᔪᓕᖅᖢᑎᒃ ᐅᖄᓚᐅᑎᒃᑯᑦ ᑐᓵᔨᖃᖅᑎᑦᑎᓂᕐᒥᓐ ᑎᒍᔭᐅᓯᒪᔪᓂᒃ ᐋᓐᓂᖃᕐᓇᙱᑦᑐᓕᕆᔨᓂᒡᓗ ᑐᓵᔨᖃᕆᐊᖃᓕᕌᖓᑕ.

ᒪᑭᕕᒃᑯᑦ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ ᐊᐱᖅᓱᖅᑕᐅᔪᒪᑎᓪᓗᒋᑦ ᐊᐱᖅᓱᖅᑕᐅᔪᒪᓚᐅᙱᑦᑐᑦ ᑭᓯᐊᓂᓕ ᖃᕋᓴᐅᔭᒃᑯᑦ ᔫᓂ 23-ᒥᑦ ᐃᒪᓐᓇ ᑎᑎᕋᓚᐅᕐᑐᑦ.

“ᐃᓱᒪᒋᓪᓗᒍ ᐅᓂᒃᑳᑦ ᑐᓂᔭᐅᓂᑯᑦ ᐃᑲᔪᖅᑕᐅᕝᕕᖕᓂ ᖃᐅᔨᓴᖅᑎᒥ ᐊᒻᒪᓗ ᒪᑯᓂᖓ ᐅᓄᕐᑎᑕᐅᓗᐊᕐᓂᖏᑦ ᐃᓄᐃᑦ ᓄᕙᒡᔪᐊᕐᓇᖅ-19-ᒥ ᐋᓐᓂᐊᖃᕐᓂᕋᖅᑕᐅᔪᑦ, ᑭᓯᐊᓂᓕ ᐃᒪᓐᓇ ᐃᓄᐃᑦ ᑲᑎᒪᑎᑕᐅᖃᑦᑕᕐᓂᖏᓐᓂᒃ ᐃᓂᒃᓴᕆᑎᑕᐅᔪᓂᒃ,” ᒪᑭᕕᒃᑯᑦ ᐅᖃᓚᐅᕐᑐᑦ.

“ᐃᓕᖅᑯᓯᕆᔭᐅᖕᒪᑦ ᑎᒎᑎᖃᑦᑕᕐᓂᖅ ᐊᒻᒪᓗ ᖃᑎᒌᖃᑦᑕᐅᑎᔭᓐᓂᕐᒥᒃ, ᑕᐃᒪᓕ ᑕᐃᒪᐃᓐᓂᖓᓄᑦ ᑕᒪᓐᓇ ᐱᔾᔪᑎᐅᖃᑕᐅᔪᒃᓴᐅᕗᖅ ᐊᐃᑦᑐᖅᑕᐅᓯᒪᔪᑦ ᐃᓄᐃᑦ ᐅᓄᓗᐊᕐᓂᖏᓐᓄᑦ.”

Share This Story

(0) Comments