ᐃᓄᐃᑦ ᐅᖃᐅᓯᐅᑉ ᐱᔪᓐᓇᐅᑎᖏᓐᓂ ᓴᖅᑭᑎᑦᑎᒻᒪᕆᓚᐅᕐᐳᑦ ᒪᓐᑐᕆᐊᒥ ᑲᑎᒪᕕᒡᔪᐊᕐᓇᒥ ᐃᓄᒃᑐᑦ ᐅᖃᓪᓚᑐᐃᓐᓇᖅᑐᓂᒃ ᑲᑎᒪᑎᑦᑎᔪᓂᒃ

ᒪᓐᑐᕆᐊᒥ ᑐᔪᒥᕕᐅᑉ ᑲᑎᒪᕕᖓᓂᒃ ᓂᐱᖃᕈᓘᔭᓚᐅᕐᑐᖅ ᑎᓴᒻᒥᕐᒥᓐ, ᐅᒃᑑᐱᕆ 3, ᐃᓄᐃᑦ ᐅᐸᒍᑎᔪᑦ 21-ᒋᓕᖅᑕᖓᓂᒃ ᐃᓄᐃᑦ ᐃᓕᖁᓯᖏᓐᓂᒃ ᐃᓕᓐᓂᐊᕐᓂᒧᑦ ᑲᑎᒪᕕᒡᔪᐊᕐᓇᒥ ᐃᓯᖅᐸᓪᓕᐊᑎᓪᓗᒋ ᑐᓵᔭᖅᑐᖅᖢᑎᒃ ᒪᕐᕉᖕᓂ ᐃᓅᖕᓂ ᓯᕗᓕᐅᖅᑎᐅᔫᖕᓂ ᐅᖃᓪᓚᒃᑎᓪᓗᒋᑦ ᖃᓄᐃᒻᒪᑦ ᐃᓄᒃᑐᑦ ᐅᖃᓪᓚᒍᓐᓇᕐᓂᖅ ᓄᓇᕗᒥᑦ ᐃᓅᓂᕐᒧᑦ ᐱᔪᓐᓇᐅᑎᐅᔭᕆᐊᒃᓴᖓᓂᒃ ᐊᒻᒪᓗ ᑖᓐᓇ ᐱᔪᓐᓇᐅᑎ ᐊᖏᖅᑕᐅᙱᑐᐃᓐᓇᕐᓯᒪᖂᔨᓯᒪᓪᓗᓂ.

ᓄᓇᕗᑦ ᑐᙵᕕᒃᑯᑦ ᐊᖓᔪᖅᑳᖓ ᐊᓗᑭ ᑰᑦᑎᖅ ᐊᒻᒪ ᓗᐃ ᑕᐹᕐᔪᒃ, ᓄᓇᕗᑦ ᒐᕙᒪᒃᑯᓐᓄᑦ ᒥᓂᔅᑕᐅᓚᐅᕐᓯᒪᔪᖅ ᐊᒻᒪᓗ ᑲᑎᒪᔨᐅᖃᑕᐅᔪᖅ ᐃᓄᐃᑦ ᐅᖃᐅᓯᖏᓐᓂᒃ ᑕᐃᒎᓯᓕᐅᖅᑎᓄᑦ, ᓄᓇᕗᒥᑦ ᐅᖃᐅᓯᕐᓂᒃ ᐱᔪᓐᓇᐅᑎᓕᕆᔨᐅᔪᑦ, ᐅᐸᒍᑎᓚᐅᖅᑑᒃ ᑭᖑᕙᙱᖢᑎᒃ ᐊᒻᒪᓗ ᐃᖏᖢᑎᒃ ᐃᒃᓯᕙᐅᑕᓄᑦ ᐃᓄᐃᑦ ᓵᑦᑎᐊᖓᓄᑦ.

ᐊᔾᔨᓕᐅᕆᔩᑦ ᐋᖅᑭᒃᓱᖅᖢᑎᒃ ᓴᖅᑭᔮᑲᐅᑎᒋᑎᑦᑎᓂᐊᕐᒪᑕ ᓄᓇᕗᑦ ᑐᙵᕕᒃᑯᑦ ᕙᐃᔅᐳᒃᑯᑦ ᓴᖅᑭᔮᒐᖓᒍᑦ, ᓴᖅᑭᔮᖅᑐᖃᖅᖢᓂ ᑕᕐᕆᔭᕈᓐᓇᐅᑎᒃᑯᑦ ᐊᔾᔨᒌᙱᑦᑑᑎᓂᒃ ᖃᕋᓴᐅᔭᒃᑯᑦ ᐊᑦᑕᑕᕈᑎᐅᔪᓐᓇᖅᑐᓂᒃ ᖃᓪᓗᓈᑐᑦ ᐅᖃᓪᓚᒃᐸᒃᑐᓄᑦ ᑎᑎᕋᖅᑕᐅᓯᒪᔪᓂᒃ ᐅᖃᓪᓚᒃᑐᓂᒃ, ᐊᒻᒪᓗ ᐅᐸᒍᑎᓯᒪᔪᑦ ᐃᓄᐃᓐᓇᐸᓘᓪᓗᑎᒃ ᐃᓂᓪᓚᑦᑎᐊᖅᖢᑎᒃ ᐅᖃᓪᓚᒃᑐᓂᒃ ᑐᓵᓕᓚᐅᕐᑐᑦ.

ᑰᑦᑎᖅ ᑐᙵᓱᒃᑎᑦᑎᓚᐅᕐᑐᖅ ᐅᐸᒍᑎᔪᓂᒃ ᐊᒻᒪ ᐅᖃᓪᓚᓯᒋᐊᖅᖢᓂ ᐃᓄᒃᑎᑐᑦ, ᑕᒪᒃᑯᐊᓗ ᐃᓄᒃᑎᑐᑦ ᐅᖃᕈᓐᓇᖅᑐᑦ ᐃᓛᓐᓂ ᓂᐊᖁᕐᒥᓄᑦ ᐊᖏᓚᐅᖅᐸᒃᖢᑎᒃ ᐊᒻᒪ ᐸᑦᑕᒃᑯᓕᓚᐅᖅᐸᒃᖢᑎᒃ. ᑕᒪᒃᑯᐊᓕ ᐃᓄᒃᑎᑐᑦ ᐅᖃᕈᓐᓇᙱᑦᑐᑦ, ᐅᓇ ᑎᑎᕋᖅᑐᖅ ᐃᓚᐅᓪᓗᓂ, ᐃᒃᓯᕚᑐᐃᓐᓇᓚᐅᖅᐳᑦ ᐃᔨᒋᐊᓗᑐᐃᓐᓇᖅᖢᑎᒃ. ᐃᓚᖏ ᐃᓄᐃᑦ ᐊᓂᑐᐃᓐᓇᓕᓚᐅᕐᑐᑦ. ᐃᓚᖏᑦ ᑐᓵᓇᓱᑐᐃᓐᓇᖅᑐᑦ ᐅᖄᓚᐅᑎᖏᓐᓂᒃ ᐱᓕᕆᐊᖃᖅᖢᑎᒃ ᖃᓪᓗᓈᑎᑑᓕᕐᓂᐊᖅᑐᓂᒃ ᐅᑕᕿᓂᖏᓐᓂᒃ.

ᖃᓪᓗᓈᑑᖓᔪᖃᓚᐅᙱᑦᑐᖅ.

ᑐᙵᓱᒋᑦᑐᑦ ᑲᒪᓇᕈᓘᔭᖅᐸᒃᑐᒥ ᓄᓇᒋᔭᐅᔪᒧᑦ ᐊᒥᓱᓄᑦ ᐃᓄᖕᓄᑦ ᓄᓇᕗᒥᑦ.

“ᐊᑎᖃᖅᑐᖅ ᐅᓇ ᐃᓄᐃᑦ ᐃᓕᖁᓯᖏᓐᓂᒃ ᐃᓕᓐᓂᐊᕐᓂᕐᒧᑦ ᑕᐃᒪᓕ ᐃᒪᐃᑦᑐᒥᓇᓚᐅᕐᒪᑦ, ᐱᓗᐊᖅᑐᒥᓐ ᐅᖃᐅᓯᖃᖅᑎᓪᓗᑕ ᐃᓄᐃᑦ ᐅᖃᐅᓯᖏᓐᓂᒃ, ᐊᑐᕈᒪᓕᓚᐅᕋᑦᑕ ᐃᓄᐃᑦ ᐅᖃᐅᓯᖓᓂᒃ,” ᑰᑦᑎᖅ ᐅᖃᓚᐅᕐᑐᖅ ᐱᒋᐊᓕᖅᑎᓪᓗᒋᑦ.

“ᓗᐃᓗ ᐅᖃᐅᓯᕆᓚᐅᕋᑦᑎᒍᑦ ᑕᒪᓐᓇ ᐊᒻᒪ ᖃᐅᔨᒪᓪᓗᓄ ᑐᓵᔨᑕᖃᔾᔮᙱᓐᓂᖓᓂᒃ ᑭᓯᐊᓂᓕ ᐃᓱᒪᓕᓚᐅᕋᑦᑕ ᐱᒻᒪᕆᐊᓘᓂᖓᓂᒃ ᐅᖃᐅᓯᑦᑎᓐᓂ ᐊᑐᕐᓗᑕ ᐅᖃᐅᓯᖃᓕᕌᖓᑦᑕ ᐃᑲᔪᖅᑕᐅᔭᕆᐊᖃᕐᓂᕐᒥᒃ ᐊᒻᒪᓗ ᑲᔪᓯᑎᑦᑎᒐᓱᖕᓂᕐᒥᑦ ᐅᖃᐅᓯᕗᑦ ᐱᕙᓪᓕᐊᑎᓐᓂᕐᒥᑦ.”

ᓄᓇᕐᔪᐊᒥ ᑲᑎᒪᓂᕐᔪᐊᖅ, ᑲᑎᑎᑦᑎᒍᑎᐅᕙᒃᑐᖅ ᐅᑭᐅᕐᑕᖅᑐᕐᒥ ᖃᐅᔨᒪᔨᒻᒪᕆᖕᓂᒃ ᐅᑭᐅᕐᑕᖅᑐᕐᒥᐅᓂᒃ ᐊᒻᒪ ᓂᒋᕐᒥᐅᓂᒃ, ᖃᖓᑦᑎᐊᕈᓗᖕᓂᑦ, ᐱᒋᐊᓚᐅᕐᓯᒪᖕᒪᑕ ᐃᓚᐅᑎᑦᑎᓂᕐᓴᐅᕙᒃᖢᑎᒃ ᐃᓄᒃᑐᑦ ᐅᖃᓪᓚᒃᑎᓂᒃ ᐊᒻᒪ ᖃᓄᐃᓕᐅᖅᑎᑦᑎᔨᒃᓴᓂᒃ, ᑲᑎᒪᓂᕐᒥ ᐱᓕᕆᐊᖃᖅᑎᑦᑎᓂᕐᓴᐅᓪᓗᑎᒃ ᐃᓄᐃᑦ ᒥᒃᓵᓄᑦ ᐱᔭᐅᔭᕆᐊᓕᖕᓄᑦ ᐊᒻᒪᓗ ᐱᓕᕆᐊᑎᒌᖕᓂᕐᓴᐅᓕᖅᖢᑎᒃ ᐃᓄᐃᑦ ᐊᒻᒪ ᐃᓅᙱᑦᑐᑦ ᐃᓕᓐᓂᐊᕐᓯᒪᔪᓂᒃ. ᐅᓇ ᐃᓄᒃᑎᑐᑦ ᑲᑎᒪᑎᑦᑎᓂᖅ, ᐱᔾᔪᑎᖃᖅᖢᓂ ᐅᖃᐅᓯᖅ ᐃᓅᓂᕐᒧᑦ ᐱᔪᓐᓇᐅᑎᐅᓂᖓᓂᒃ, ᐃᒪᐃᓕᖓᖅᑰᔨᓚᐅᕐᑐᖅ ᑕᒪᑐᒥᖓ ᐋᖅᑭᒃᓱᐃᕙᓪᓕᐊᓕᕐᓂᕐᒥᓐ.

ᑰᑦᑎᐅᑉ ᐅᖃᐅᓯᕆᓂᐊᖅᑕᖏᓐᓄᑦ ᓇᓗᓇᐃᔭᕐᓯᒪᔪᑦ ᐅᖃᐅᓯᖃᐅᓚᐅᕐᑐᑦ ᐊᒥᓱᓂᒃ ᒪᓕᒐᕐᔪᐊᓂᒃ ᓴᖅᑭᑎᑦᑎᒃᑲᓐᓂᕈᑎᐅᔭᕆᐊᓕᖕᓂᒃ ᐊᒻᒪ ᓴᐳᔾᔨᓯᒪᔾᔪᑎᓂᒃ ᐃᓄᒃᑐᑦ ᐅᖃᐅᓯᕐᒥ ᓄᓇᕗᒥᑦ ᑕᒫᓂᓗ ᐅᓄᕐᓂᕐᓴᐅᓪᓗᑎᒃ ᐃᓄᐃᑦ ᐊᒻᒪᓗ ᐅᖃᓪᓚᖕᓂᕐᓴᐅᓪᓗᑎᒃ ᐃᓄᒃᑐᑦ.

ᑕᒪᒃᑯᐊ ᒪᓕᒐᕐᔪᐊᑦ ᒪᑯᓇᖓᑦ ᓄᓇᕐᔪᐊᒥᑦ ᑲᑐᔾᔨᖃᑎᒌᑦ (ᔫᓇᐃᑕᑦ ᓇᐃᓴᓐᔅ) ᐱᖁᔭᒻᒪᕆᖓᓂᒃ ᐆᒥᖓ ᐱᔪᓐᓇᐅᑎᖏᑦ ᓄᓇᖃᖅᑳᖅᑐᑦ ᐃᓄᖏᑦ (ᐊᓪᓚᐃᓪᓗ) ᒪᐅᖓ ᖃᓄᐃᓕᐅᖁᔨᓯᒪᓂᖅ ᐊᒻᒪ ᒪᓕᒐᓕᕆᓂᒃᑯᑦ ᐱᓕᕆᐊᕆᔭᐅᖁᔭᐅᔪᓄᑦ ᐅᑯᓇᙵᑦ ᓱᓕᔪᓂᒃ ᐊᒻᒪ ᑲᑎᖃᑎᒌᖕᓂᕐᒧᑦ ᑲᒥᓴᓐᑯᓐᓂᑦ ᐊᒻᒪᓗ ᑲᓇᑕᒥ ᖃᐅᔨᓇᓱᖕᓂ ᐃᓄᐊᖅᑕᐅᓂᑯᓂᒃ ᐊᒻᒪ ᐊᓯᐅᓯᒪᔪᓂᒃ ᓄᓇᖃᖅᑳᖅᑐᑦ ᐊᕐᓇᓂᒃ ᐊᒻᒪ ᓂᕕᐊᕐᓵᓂᒃ, ᐊᒻᒪᓗ ᓄᓇᕗᒥᑦ ᐅᖃᐅᓯᕐᓄᑦ ᐱᖁᔭᕐᔪᐊᓂᒃ.

ᑰᑦᑎᖅ ᓇᓗᓇᐃᔭᐃᓚᐅᕐᑐᖅ ᐊᒥᓱᒻᒪᕆᖕᓂ ᖃᖓᑦᑎᐊᓕᓴᕐᓂᒃ ᐃᓄᐃᑦ ᐃᓅᔪᓐᓃᕈᑎᖏᓐᓂᒃ, ᐃᓚᐃᓐᓇᖓᒍᑦ, ᒪᐅᖓ ᐅᖃᐅᓯᕐᓄᑦ ᐊᒻᒪ ᐃᓕᖅᑯᓯᕐᒧᑦ ᑐᓚᒃᑕᕐᕕᐅᕙᒃᑐᓂᒃ, ᒪᑯᑎᑐᓇᖅ ᓲᕐᓗ ᐋᓂ ᑰᑑ, ᑖᓐᓇ ᐃᓅᔪᓐᓃᕐᓂᑯ ᑎᖑᖓ ᐊᑐᕈᓐᓃᕐᓂᖓᓄᑦ 2017-ᒥᑦ, ᐊᒻᒪᓗ ᐅᓇ 15-ᓂ ᐅᑭᐅᓕᒃ ᐊᐃᓖᓐ ᑰᓂᓘᓯ, ᐃᓅᔪᓐᓃᓚᐅᕐᓯᒪᖕᒥᔪᖅ ᐳᕙᒡᓗᖕᓇᒧᑦ ᑕᕝᕙᓂᑦᑕᐃᓐᓇᖅ ᐅᑭᐅᕐᒥᑦ.

“ᐃᓄᐃᑦ ᓈᒻᒪᒃᑐᓂᒃ ᐃᓅᓯᖃᕈᒪᖕᒪᑕ ᐊᒻᒪᓗ ᐃᓅᓂᕐᒧᑦ ᐱᔪᓐᓇᐅᑎᖃᖅᖢᑎᒃ. ᑲᓇᑕᒥᐅᑕᑦ ᐃᓄᐃᑦ ᐃᓅᔪᓐᓃᖃᑦᑕᕆᐊᖃᙱᑦᑐᑦ ᐊᑐᐃᓐᓇᖃᙱᓐᓂᕐᒧᑦ ᐊᒻᒪ ᐱᔨᑦᑎᕋᐅᑎᖃᙱᓐᓂᕐᒥ ᓇᓕᒧᒃᓯᐅᑎᔪᓂ ᐊᓯᖏᓐᓂᒃ ᑲᓇᑕᒥᐅᑕᓂᒃ,” ᑰᑦᑎᖅ ᑎᑎᕋᕐᓯᒪᓚᐅᕐᑐᖅ ᐅᖃᓪᓚᒍᑎᒋᓂᐊᖅᑕᖏᓐᓂᒃ.

ᐅᖃᐅᓯᕆᓂᐊᖅᑕᖏᓐᓄᑦ ᑎᑎᕋᕐᓯᒪᔭᖏᓐᓂᒡᓕ, ᑕᐹᕐᔪᒃ ᐅᖃᐅᓯᖃᓚᐅᕐᑐᖅ ᖃᖓᑦᑎᐊᓵᖅ ᐃᖃᓗᖕᓂ ᖃᓄᐃᓕᐅᕈᓯᕕᓂᕐᒥᒃ ᑕᕝᕙᓂᓕ ᐸᓖᓯᑦ ᐃᓐᓇᑐᖃᕐᒧᑦ ᐅᖃᕆᐊᖅᑐᖅᖢᑎᒃ ᑎᒍᐊᖓ ᐃᕐᓂᖓᑦ ᑲᐱᔭᐅᓪᓗᓂ ᐃᓅᔪᓐᓃᓚᐅᕐᓂᖓᓂᒃ ᐃᓅᓱᒃᑐᓕᕆᕝᕕᒃᒥᑦ. ᑖᓐᓇ ᐊᕐᓇᖅ ᐃᓄᑑᓪᓗᓂ ᐊᒻᒪ ᖃᓪᓗᓈᑐᑦ ᐅᖃᕈᓐᓇᙱᖢᓂ. ᑕᐹᕐᔪᒃ ᐅᖃᓚᐅᕐᑐᖅ ᐸᓖᓯᒃᑯᑦ ᓄᓇᓯᐅᑎᒥ ᓄᖅᑲᖅᑎᑦᑎᔭᕆᐊᖃᓚᐅᕐᑐᑦ ᐃᑲᔪᖅᑕᐅᔪᒪᓪᓗᑎᒃ ᑐᓴᖅᑎᑦᑎᓂᐊᖅᑎᓪᓗᒋᑦ ᑐᓴᕐᓂᙱᑦᑐᒥᓐ.

“ᖃᔅᓯᒐᓴᐅᖕᒪᑕ ᑕᕝᕘᓇ ᐅᓂᒃᑳᒃᑯᑦ ᖃᓄᐃᓕᐅᕈᑎᐅᔪᓐᓇᕋᔭᓚᐅᕐᑐᑦ ᒪᐅᓇ ᑖᓐᓇ. ᐃᓄᒃ ᐃᑲᔪᖅᑎᖃᖅᐸ ᐃᓅᓯᖓ ᐊᓯᙳᕐᔪᐊᕐᓂᐊᖅᑎᓪᓗᒎ, ᑐᓵᔨᖃᓚᐅᙱᑦᑐᕐᓘᓐᓃᑦ,” ᑰᑦᑎᖅ ᐅᖃᓚᐅᕐᑐᖅ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ.

“ᐊᒥᓱᑎᒍᑦ ᐃᓄᒃᑎᒍᑦ ᖃᓪᓗᓈᑐᑦ ᐊᒻᒪ ᐃᓄᒃᑎᑐᑦ ᐅᖃᕈᓐᓇᖅᑐᑦ ᖃᐃᖁᔭᐅᕙᖕᒪᑕ ᐱᓕᕆᐊᖃᖁᔭᐅᓪᓗᑎᒃ. ᐃᓱᒪᒋᔭᐅᒐᑦᑕ ᑐᓵᔨᐅᔪᓐᓇᕆᐊᒃᓴᑦᑎᓐᓂᒃ ᖃᖓᑐᐃᓐᓇᒃᑯᑦ, ᖃᐅᔨᒪᙱᒃᑲᓗᐊᕈᑦᑎᒍᑦ ᐃᓄᐃᑦ. ᐃᓛᓐᓂᒃᑯᑦ ᑐᓴᐅᒪᔭᐅᔭᕆᐊᖃᙱᑦᑐᓄᑦ. ᑕᐃᒪᓕ, ᑕᐃᒪᓐᓇ, ᐅᖃᕈᓐᓇᖅᑐᖓ ᓱᕋᐃᓯᒪᓂᐅᔪᖅ ᐃᓅᓂᕐᒧᑦ ᐱᔪᓐᓇᐅᑎᓂᒃ.”

ᑰᑦᑎᖅ ᐅᖃᓚᐅᕐᑐᖅ ᐊᒃᓱᓪᓘᓐᓃᑦ ᒪᑯᐊ ᐃᓄᒃᑐᑦ ᐅᖃᕈᓐᓇᖅᑐᑦ ᓄᓇᕗᒥᑦ ᐊᑐᐃᓐᓇᖃᕆᐊᖃᕐᓂᖏᓐᓂᒃ ᐱᓕᕆᔨᓂᒃ ᐱᔨᑦᑎᕋᐅᑎᓂᒃ ᐅᖃᐅᓯᖏᓐᓂᒃ ᐊᑐᕐᓗᑎᒃ ᒪᐅᓇ ᐋᓐᓂᐊᖃᕐᓇᙱᑦᑐᓕᕆᓂᒃᑯᑦ, ᒪᓕᒐᓕᕆᓂᒃᑯᑦ ᐊᒻᒪ ᐃᓕᓐᓂᐊᕐᓂᓕᕆᓂᒃᑯᑦ. ᑕᒪᒃᑯᐊᓘᓐᓃᑦ ᐊᑐᐃᓐᓇᐅᕙᙱᒻᒪᑕ.

ᑖᓐᓇᓕ ᐊᒻᒪ ᐊᓯᖏᑦ ᓯᕗᓕᐅᕐᑎᐅᖕᒥᔪᑦ ᑲᔪᓰᓐᓇᖅᑐᑦ ᒐᕙᒪᑐᖃᒃᑯᓐᓂᒃ ᓴᐳᔾᔨᓯᒪᖁᔨᓪᓗᑎᒃ ᐅᖃᐅᓯᖏᓐᓂᒃ ᐊᒻᒪ ᐃᓅᓂᖏᓐᓂᒃ ᐊᖏᕐᕋᖏᓐᓂᒃ. ᐋᑐᕚᒥᑦ ᐊᓂᒍᐃᑎᑦᑎᓚᐅᕐᑐᑦ ᓄᑖᒥᑦ ᓄᓇᖃᖅᑳᖅᑐᑦ ᐅᖃᐅᓯᖏᓐᓄᑦ ᐱᖁᔭᕐᔪᐊᖅᒥᑦ ᔫᓂᐅᑎᓪᓗᒍ ᑕᒪᓐᓇᓗ ᓈᒻᒪᒋᔭᐅᑲᑕᙱᖢᓂ ᓄᓇᕗᑦ ᑐᙵᕕᒃᑯᓐᓂᑦ ᐊᒻᒪ ᐃᓄᐃᑦ ᑕᐱᕇᑦ ᑲᓇᑕᒥ ᐅᖃᖅᖢᑎᒃ ᐃᓱᒪᓕᐊᕆᔭᖏᑦ ᓱᖁᑎᒋᔭᐅᓯᒪᙱᓐᓂᖏᓐᓂᒃ.

ᑰᑦᑎᖅ ᐅᖃᓚᐅᕐᑐᖅ ᐃᓄᖕᓂ ᖃᐅᔨᒪᖁᔨᓪᓗᓂ, “ᐅᕙᒍᑦ ᐱᔪᓐᓇᕐᓂᖃᖅᑎᐅᕗᒍᑦ. ᐅᖃᓪᓚᓚᐅᕐᑕ ᐃᓄᒃᑐᑦ ᓂᐅᕕᕐᕕᖕᒧᐊᕌᖓᑦᑕ. ᐃᓄᒃᑐᑦ ᐅᖃᓪᓚᓚᐅᕐᑕ ᑮᓇᐅᔭᒃᑯᕕᖕᒧᐊᕌᖓᑦᑕ. ᐃᓄᒃᑐᑦ ᐅᖃᓪᓚᓚᐅᕐᑕ ᐃᓕᓐᓂᐊᕐᕕᖕᒧᐊᕌᖓᑦᑕ. ᐃᓄᒃᑐᑦ ᐅᖃᓪᓚᖕᓂᕐᓴᐅᓕᕈᑦᑕ ᐊᒻᒪ ᑕᒪᒃᑯᐊ ᐃᓱᒪᒋᙱᓪᓗᒋᑦ ᑐᑭᓯᔪᓐᓇᙱᑦᑐᑦ, ᑕᐃᒪᓗ ᐊᖏᓂᕐᓴᒥᑦ ᑐᓂᔭᐅᔪᓐᓇᕋᔭᖅᑐᑦ ᐊᑐᖅᑕᐅᔭᕆᐊᓕᖕᓂᒃ.”