ᐃᓄᐃᑦ ᐅᖃᐅᓯᖓᒍᑦ ᓴᕿᑎᑦᑎᔨᐅᔪᑦ ᓱᓕ ᓂᕆᐅᒋᔭᖃᖅᐳᑦ ᑏᕖ ᓄᓇᕗᒥᑦ

For an English version of this story, see Inuit language producers still hold out hope for TV Nunavut.

ᐱᑕᖃᕆᐊᖃᕐᓂᖅ ᐱᔪᒪᑦᑎᐊᖅᑐᒥᑦ 100 ᐳᓴᓐᑎᒥ ᐃᓄᒃᑎᑐᑦ ᐃᓕᓐᓂᐊᕈᑎᒃᓴᒥᑦ ᑕᓚᕖᓴᒃᑯᑦ ᓴᕿᔮᕐᕕᒃᓴᒥᑦ ᐊᒃᓱᕉᑎᒃᑲᓐᓂᕈᑎᐅᒻᒪᕆᓕᕐᐳᖅ, ᓄᓇᕗᒥᑦ ᑐᓴᒐᒃᓴᓕᐅᕐᑎᑦ ᐅᖃᓚᐅᕐᑐᑦ ᓴᓇᑦᒥᑦ ᑲᑎᒪᔨᕋᓛᓄᑦ ᓄᓇᕗᒧᑦ ᐱᓇᓱᐊᕈᓯᐅᓚᐅᕐᑐᒥ.

“ᑕᒪᓐᓇ ᓯᓐᓇᒃᑐᒐᑐᐃᓐᓇᖅ, ᑭᓯᐊᓂᓕ ᓴᕿᓪᓚᕆᒍᓐᓇᕐᒪᑦ,” ᑕᐱ ᐳᕆᔅᐳᐊ, ᐊᐅᓚᑦᑎᔨ ᑐᑭᒧᐊᖅᑎᑦᑎᔨ ᐃᓄᐃᑦ ᑕᑯᓐᓇᒐᒃᓴᓕᕆᔨᓄᑦ ᐅᖃᓚᐅᕐᑐᖅ ᓴᓂᑦᒧᑦ ᑲᑎᒪᔨᕋᓛᓄᑦ ᓇᒐᔾᔭᐅᒥᑦ, ᕕᕝᕗᐊᕆ 4.

ᑖᓐᓇ ᐃᓱᒪᒋᔭᐅᓕᕐᓯᒪᓂᖓ 2007-ᒥ, ᖃᔅᓯᒐᓴᐃᑦ ᓄᓇᕗᒦᑦᑐᖅ ᑕᓚᕖᓴᓕᕆᔨᐅᔪᑦ ᐊᒻᒪ ᑕᕐᕆᔭᒐᒃᓴᓕᐅᕐᑎᐅᔪᑦ ᑕᐃᔭᐅᓪᓗᑎᒃ ᑏᕖ ᓄᓇᕗᒥᑦ ᐃᓕᓐᓂᐊᒐᒃᓴᓕᕆᓂᕐᒧᑦ ᑐᓴᒐᒃᓴᓕᕆᔨᑦ ᓂᕆᐅᓚᐅᕐᓂᖏᓐᓄᑦ, 2014-ᒥᑦ ᐊᒻᒪ 2015-ᒥᑦ, ᐋᕿᒃᓯᒪᓕᕈᓐᓇᕐᓗᑎᒃ ᐱᒋᐊᕈᓐᓇᓗᑎᒃ ᓴᕿᔮᕐᕕᒋᓂᐊᖅᑕᖓᓂᒃ 2017-ᒥᑦ.

ᐅᓇᓕ ᑕᐃᒪᐃᓚᐅᕐᑐᖅ ᓈᓚᐅᓯᕆᔨᒃᑯᑦ CRTC ᓇᓗᓇᐃᖅᓯᑎᓪᓗᒋᑦ ᑕᐃᒪᐃᑦᑐᖅ ᓴᕿᔮᒐᒃᓴ ᖃᐅᔨᒪᔭᐅᓕᕋᔭᕐᑐᖅ “ᑲᔪᓰᓐᓇᕆᐊᖃᕐᓂᕐᒥᒃ” ᑲᐃᐳᑯᑦ ᐊᒻᒪᓗ ᑕᓚᕖᓴᓄᑦ ᓴᕿᔮᕈᑎᐅᔪᓐᓇᖅᑐᓄᑦ.

ᑭᓯᐊᓂᓕ ᑖᓐᓇ ᐱᒋᐊᓕᓚᐅᕐᓯᒪᙱᑦᑐᖅ, ᑕᒪᑐᒧᖓ ᖃᐅᔨᓴᕐᓂᒃᑯᑦ ᓇᓗᓇᙱᒃᑲᓗᐊᖅᖢᓂ ᐃᓕᓐᓂᐊᖅᑐᓕᕆᓂᕐᒧᑦ ᑕᓚᕖᓴᓐᑯᑦ ᓴᕿᔮᕐᕕᖃᕈᓐᓇᕐᓂᖅ ᓄᓇᕗᒥᑦ ᑲᔪᓯᔪᓐᓇᕋᔭᕐᓂᖓᓂᒃ.

“ᐅᓇ ᐊᔪᕐᓇᕋᔭᙱᑦᑎᐊᖅᑐᖅ ᓄᓇᕗᑦ ᓴᕿᔮᒐᖃᕐᕕᖃᕈᓐᓇᕐᓗᓂ. ᓄᖃᕈᑎᒋᓯᒪᔭᕗᓪᓕ ᐱᓕᕆᔨᑐᐃᓐᓇᐅᒐᑦᑕ ᖃᐅᑕᒫᑦ ᐱᓕᕆᐊᒃᓴᖃᖅᖢᑕ ᐊᒻᒪᓗ ᑏᕖ ᓄᓇᕗᑦ ᐃᑲᔪᖅᑕᐅᓯᒪᙱᖢᓂ,” ᐳᕆᔅᐳᐊ ᐅᖃᖅᑐᖅ.

ᑭᖑᓂᐊᒍᑦ ᐅᖃᓕᓚᐅᕐᑐᖅ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ ᑖᓐᓇ ᐱᒋᐊᒻᒪᕆᖕᓂᐊᕐᓗᓂ, ᑏᕖ ᓄᓇᕗᑦ ᐃᓕᓐᓂᐊᕐᑐᓕᕆᓂᕐᒧᑦ ᑕᓚᕖᓴᓐᑯᑦ ᑲᑐᔾᔨᖃᑎᒌᖓ ᐃᑲᔫᑎᒃᓴᖅᑖᕆᐊᖃᕋᔭᖅᑐᖅ ᑎᑎᕋᕐᕕᒃᓴᒧᑦ ᐊᒻᒪ ᐃᖅᑲᓇᐃᔭᖅᑎᒃᓴᒧᑦ.

ᐃᓄᐃᑦ ᑕᑯᓐᓇᒐᒃᓴᓕᕆᔨᒃᑯᑦ, ᐊᐅᓚᔾᔪᑎᒃᓴᖃᖅᖢᑎᒃ ᒫᓂ $2.5 ᒥᓕᐊᓐᑖᓚᓂᒃ ᐊᕐᕌᒍᒧᑦ ᐊᒻᒪ 25-ᓂ ᐃᖅᑲᓇᐃᔭᖅᑎᖃᖅᖢᑎᒃ, ᓴᕿᑎᑦᑎᕙᖕᒪᑕ ᑕᓪᓕᒪᓂᒃ ᐃᓄᒃᑎᑐᑦ ᑕᑯᔭᒐᒃᓴᓂᒃ ᒫᓐᓇᐅᔪᖅ.

ᑭᓯᐊᓂᓕ ᑖᒃᑯᓇᙵᑦ ᒪᕐᕉᒃ, ᑕᑯᒋᓇᐃ ᐊᒻᒪ ᐱᑐᖃᐃᑦ ᐊᑐᐃᓐᓇᐅᔪᑦ ᖃᕋᓴᐅᔭᒃᑯᑦ ᑭᓯᐊᓂ ᐅᕙᓂ ᐃᓱᒪ ᑏᕖ ᓴᕿᔮᒐᖓᒍᑦ.

ᑖᓐᓇ ᐱᔾᔪᑎᖃᖅᑐᖅ ᓄᓇᖃᖅᑳᖅᑐᑦ ᑕᓚᕖᓴᓐ APTN, ᓴᕿᔮᒐᖃᕈᓐᓇᖅᑐᓂᒃ ᐊᑐᐃᓐᓇᖃᖅᑐᑐᐊᑦ ᐃᓄᐃᑦ ᑕᑯᓐᓇᒐᒃᓴᓕᕆᔨᓄᑦ, ᐊᒻᒪᓗ ᐃᓂᒃᓴᖃᖅᖢᑎᒃ ᒪᕐᕉᖕᓄᑦ ᓴᕿᔮᒐᕆᔭᐅᔪᓄᑦ ᐃᓚᖃᖅᖢᓂ ᖃᓄᖅ ᐃᓱᒪᕕᒃ ᐅᖄᓚᕝᕕᐅᔪᓐᓇᖅᑐᒥᑦ.

ᐱᓕᕆᐊᖑᐃᓐᓇᓪᓚᕆᒃᑐᒥᑦ ᐃᓄᐃᑦ ᐅᖃᐅᓯᖓᒍᑦ ᑕᓚᕖᓴᓐᑯᑦ ᓴᕿᔮᕐᕕᖃᕈᓐᓇᕐᓂᖅ ᐋᕿᒍᑎᐅᔪᓐᓇᕋᔭᖅᐳᖅ ᑖᔅᓱᒥᖓ, ᐳᕆᔅᐳᐊ ᐅᖃᖅᑐᖅ.

ᐊᒻᒪᓗ ᑕᐅᑐᒃᑐᖃᖃᑦᑕᕋᔭᖅᑐᒃᓴᐅᓪᓗᓂ ᐃᓄᐃᑦ ᐅᖃᐅᓯᖃᓂᒃ ᑕᓚᕖᓴᒥᑦ ᑲᓇᑕᐅᑉ ᓯᓚᑖᓃᑦᑐᓂᒃ, ᓄᓇᕗᑦ ᑐᓴᒐᒃᓴᓕᕆᔨᖏᑦ ᐅᖃᓚᐅᕐᑐᑦ ᑲᑎᒪᔨᕋᓛᓄᑦ.

ᐱᕐᓇᑎ ᑏᓐ, ᐃᒃᓯᕙᐅᑕᖅ ᐃᓄᐃᑦ ᑕᑯᓐᓇᒐᒃᓴᓕᕆᔨᒃᑯᓐᓄᑦ, ᐅᖃᓚᐅᕐᑐᖅ ᑭᐅᓯᓂᒃᑯᑦ ᐊᐱᖅᑯᑎᒋᔭᐅᔪᒥᒃ ᑲᑎᒪᔨᕋᓛᑦ ᐃᒃᓯᕙᐅᑕᖓᓄᑦ, ᓄᓇᕗᒧᑦ ᓴᓂᑐ ᑕᓂᔅ ᐹᑐᓴᓐᒥ, ᐅᒃᐱᕈᓱᖕᓂᕋᖅᖢᓂ ᑕᐅᑐᒃᑐᒃᓴᖃᕋᔭᕐᓂᖓᓂᒃ ᐃᓄᐃᑦ ᐅᖃᐅᓯᐊᒍᑦ ᑕᓚᕖᓴᒥ ᑲᓇᑕᐅᑉ ᓯᓚᑖᓃᑦᑐᓂᒃ.

ᓲᕐᓗ ᐃᒪᓐᓇ, ᑏᓐ ᐅᖃᐅᓯᖃᓚᐅᕐᑐᖅ ᒪᑯᒃᑐᖅ ᐃᓄᑉᐱᐊᑦ ᐊᕐᓇ ᐊᓛᔅᑲᒥᐅᑕ ᐅᖃᓚᐅᕐᑐᖅ ᑖᔅᓱᒧᖓ ᑕᐅᑐᒍᒪᖃᑦᑕᕐᓂᖓᓂ ᐃᓄᐃᑦ ᑕᑯᓐᓇᒐᒃᓴᓕᕆᔨᒃᑯᑦ ᓴᕿᔮᒐᕆᕙᒃᑕᖏᓐᓂᒃ, ᑭᓯᐊᓂᓕ ᐊᔪᖅᑐᖅ ᓚᐃᓴᓐᓯᓕᕆᓂᕐᒧᑦ ᐊᔪᕐᓇᕈᑎᓄᑦ.

“ᐊᓛᔅᑲ ᑕᑯᔪᒪᑦᑎᐊᕋᔭᖅᑐᖅ ᓄᓇᖃᖅᑳᖅᑐᑦ ᑕᑯᓐᓇᒐᒃᓴᓕᕆᔨᒃᑯᑦ ᓴᕿᔮᒐᖏᓐᓂᒃ ᐊᓛᔅᑲᒥᑦ,” ᐅᖃᖅᑐᖅ.

“ᐅᖃᓪᓚᖃᑎᖃᑲᑕᒃᖢᓂ ᐃᓄᖕᓂ ᐅᑭᐅᕐᑕᖅᑐᒥᑦ ᓄᓇᖃᕐᒥᔪᓂᒃ ᓄᓇᕐᔪᐊᒥ ᓇᓗᓇᙱᓚᖅ ᐃᓕᓐᓂᐊᕈᒪᓯᒪᓂᖏᓐᓂᒃ ᐃᓕᖁᓯᕆᔭᐅᔪᓂᒃ ᐊᒻᒪ ᖃᓄᐃᓕᐅᕈᓯᐅᕙᒃᑐᓂᒃ ᐊᓯᖏᓐᓄᑦ.”

ᓰᐲᓰᑯᑦ ᐊᑐᐊᒐᖓᑦ “ᐃᔪᕐᓇᑐᐃᓐᓇᖅᑐᖅ”

ᓂᐅᓪ ᑯᕆᔅᑕᕗ, ᐊᐅᓚᑦᑎᓂᕐᒧᑦ ᐱᓕᕆᖃᑕᐅᔪᖅ ᐅᑯᓇᓂ ᑕᖅᑯᑦ ᑐᓴᒐᒃᓴᓕᕆᔨᓄᑦ, ᓴᕿᑎᑦᑎᔨᐅᔪᖅ ᐊᓈᓇᐅᑉ ᑐᐱᖓᓂᒃ ᐃᓕᓐᓂᐊᕈᑎᒃᓴᓕᐊᓂᒃ ᓱᕈᓯᕐᓄᑦ, ᐅᖃᓚᐅᕐᒥᔪᖅ ᐃᓄᒃᑎᑑᑐᐃᓐᓇᖅᑐᒥᒃ ᑕᓚᕖᓴᓐᑯᑦ ᓴᕿᔮᒐᖅᑕᖃᕈᓂ ᐅᑯᑎᑐᓇᖅ ᑏᕖ ᓄᓇᕗᑦᑎᑐᑦ ᐱᕕᐅᓕᕈᓐᓇᖅᑐᖅ ᓴᕿᑎᑦᑎᔨᐅᔪᓂᒃ ᐅᑯᑎᑐᓇᖅ ᑕᖅᑯᑦ ᐱᓕᕆᐊᖏᓐᓄᑦ ᓴᕿᑎᑦᑎᔨᐅᔪᓐᓇᕐᓗᑎᒃ.

ᑭᓯᐊᓂᓕ, ᐅᐱᒋᔭᖃᖅᑐᖅ ᓄᓇᖃᖅᑳᖅᑐᑦ ᑕᑯᓐᓇᒐᒃᓴᓕᕆᔨᒃᑯᑦ APTN-ᒥᑦ ᐊᒻᒪ ᐅᖃᖅᖢᓂ ᒫᓐᓇᓕ, “ᑖᒃᑯᐊ ᐱᐅᓂᖅᐹᖑᔪᑦ ᐱᓕᕆᖃᑎᒋᔭᕆᐊᒃᓴᖅ ᐅᕙᑦᑎᓐᓄᑦ.”

“ᐊᓯᖏᓪᓕ ᐃᓱᒪᒋᔭᖃᙱᑦᑎᐊᕐᒪᑕ ᐅᑭᐅᕐᑕᖅᑐᓕᕆᓂᕐᒥᒃ,” ᐅᖃᖅᑐᖅ.

ᓈᒻᒪᒃᓴᙱᖢᓂ ᐅᖃᐅᓯᖃᓚᐅᕐᒥᔪᖅ ᓰᐲᓰᑯᑦ ᐃᓕᓐᓂᐊᕈᑎᐅᔪᓐᓇᖅᑐᓂᒃ ᓱᕈᓯᕐᓄᑦ ᓴᒃᑯᐃᓯᒪᓕᕐᓂᖏᓐᓂᒃ.

“ᐅᖃᐅᔾᔭᐅᓚᐅᕐᑐᖓ ᓱᕈᓯᕐᓄᑦ ᐃᓕᓐᓂᐊᕈᑎᒃᓴᐅᓇᔭᖅᑐᓂᒃ ᐃᓱᒪᒋᔭᖃᕈᓐᓃᕐᓂᖏᓐᓂᒃ. ᑕᒪᓐᓇᓗ ᐱᔭᒃᓴᕆᙱᖢᓂᔾᔪᒃ. ᐅᕙᓐᓄᓪᓕ ᑕᒪᓐᓇ ᐃᔪᕐᓇᑐᐃᓐᓇᖅᑐᖅ ᑭᒃᑯᓕᒫᓅᖓᔪᓂᒃ ᓴᕿᔮᒐᖃᖅᑎᑦᑎᔨ ᓱᕈᓯᕐᓂ ᓴᒃᑯᐃᑦᑎᑐᐃᓐᓇᕐᓂᖏᑦ. ᑖᓐᓇᓕ ᓈᒻᒪᒋᙱᓪᓚᕆᒃᑲᒃᑯ,” ᑯᕆᔅᑕᕗ ᐅᖃᖅᑐᖅ.

ᐅᖃᓚᐅᕐᑐ ᓴᓂᑐᓄᑦ, ᑖᔅᓱᒥᖓ ᐱᔾᔪᑎᖃᖅᖢᓂ, ᐃᖃᓪᓚᒍᒪᔪᓐᓃᕐᓂᕋᖅᖢᓂ ᑖᒃᑯᓄᖓ.

“ᐊᑐᕈᓐᓇᖅᑐᒥᑦ ᑲᑎᒪᓂᖃᙱᓐᓇᑦᑕ. APTN-ᑐᐊᖅ ᑭᓯᐊᓂ.”

ᑖᔅᓱᒧᖓᓕ, ᑏᕖ ᓄᓇᕗᑦ ᐱᐅᓂᖅᐹᒥᑦ ᑭᐅᔾᔪᑎᖃᖅᐳᖅ.

“ᐱᖃᕆᐊᖃᕋᑦᑕ ᑏᕖ ᓄᓇᕗᑦᒥᑦ. ᐱᖃᕆᐊᖃᕋᑦᑕ 100 ᐳᓴᓐᑎᒥ ᐃᓄᒃᑎᑐᑦ ᐅᖃᓪᓚᒍᓐᓇᖅᑐᒥ ᑲᑎᒪᔨᖃᕐᓗᑎᒃ ᐃᓱᒪᓕᐅᕆᔪᓐᓇᖅᑐᓂᒃ ᐅᑭᐅᕐᑕᖅᑐᒧᑦ. ᐅᑭᐅᕐᑕᖅᑐᖅ ᐃᓱᒪᓕᐅᕆᔭᕆᐊᖃᕐᒪᑦ ᐅᑭᐅᕐᑕᖅᑐᕐᒧᑦ,”

ᑯᕆᔅᑕᕗ ᐊᒻᒪ ᐱᓕᕆᖃᑎᒋᔭᖏ ᐊᐅᓚᑦᑎᖃᑦᑕᕐᒥᔪᑦ ᓱᕈᓯᕐᓄᑦ ᐅᖃᓕᒫᒐᓂᒃ ᓴᕿᑎᑦᑎᔨᓂᒃ Inhabit Media, ᐊᒻᒪᓗ ᓄᑖᒥᒃ ᑕᐃᔭᐅᒧᒥᑦ Inhabit Education, ᐅᖃᐅᓯᕆᔭᖓᓕ ᐋᕿᒃᓱᐃᕙᓪᓕᐊᓂᖏᓐᓂᒃ ᐅᖃᓕᒫᒐᒃᓴᓂᒃ ᐃᓄᒃᑐᑦ ᐅᖃᓕᒫᕈᓐᓇᖅᑐᓄᑦ.

ᐱᖁᔨᕗᖔᕈᑎᓕᐅᓚᐅᕐᑎᓪᓗᒍ ᓵᓕ ᕗᐊᑦ, ᓴᓂᑑᓱᖓᕐᑎᓪᓗᒍ, ᓴᓂᑦᑯᑦ ᓂᕈᐊᓚᐅᕐᓯᒪᔪᑦ ᓯᑎᐱᕆ   2017-ᒥᑦ ᐋᕿᒃᓯᔪᒪᓪᓗᑎᒃ ᑲᑎᒪᔨᕋᓛᒃᓴᓂᒃ ᐅᑭᐅᕐᑕᖅᑐᕐᒧᑦ ᑖᒃᑯᐊ ᐃᓚᓕᐅᔾᔭᐅᔪᓐᓇᕐᓂᐊᕐᒪᑕ ᓕᐳᕈᓪ ᒐᕙᒪᒃᑯᑦ ᐅᑭᐅᕐᑕᖅᑐᕐᒥᑦ ᐊᑐᐊᒐᓕᕆᓂᕐᒧᑦ ᐋᕿᒃᓱᐃᕙᓪᓕᐊᓂᖏᓐᓄᑦ.

ᐹᑐᓴᓐ, ᓴᓂᑐ ᓄᓇᕗᒧᑦ, ᐃᒃᓯᕙᐅᑕᐅᔪᖅ ᑲᑎᒪᔨᕋᓛᓄᑦ, ᐅᓇᓕ ᐹᑐᕇᓯᐊ ᐴᕕ ᐃᒻᒥᒃᑯᖓᔪᓂᑦ ᓴᓂᑐᓂᒡᓃᖃᑕᐅᔪᖅ ᐃᒃᓯᕙᐅᑕᒧᑦ ᑐᒡᓕᐅᕙᒃᖢᓂ.