ᐃᓄᐃᑦ ᐊᕐᓇᐃᑦ ᓈᒻᒪᙱᓕᐅᕈᑎᖃᖃᑦᑕᕐᒪᑕ ᐊᔾᔨᒌᙱᑎᑕᐅᓂᒃᑯ ᐸᓖᓯᓕᕆᓂᕐᒥᒃ ᑲᓇᑕᐅᑉ ᐅᑭᐅᕐᑕᖅᑐᖓᓂᒃ, ᐅᓂᒃᑳᑦ ᐅᖃᕐᓯᒪᔪᑦ.

ᓄᑖᑦ ᐅᓂᒃᑳᓕᐊᖑᔪᑦ ᐅᑯᓇᙵᑦ ᐸᐅᒃᑑᑎᑦ ᐃᓄᐃᑦ ᐊᕐᓇᐃᑦ ᑲᓇᑕᒥ ᐅᖃᕐᓯᒪᔪᑦ ᐋᖅᑭᒃᓯᒋᐊᖁᔨᓪᓗᑎᒃ ᖃᓄᖅ ᐸᓖᓯᓕᕆᓂ ᐱᓕᕆᓂᐅᕙᖕᓂᖓᓂᒃ ᐃᓄᐃᑦ ᓄᓇᖓᓂ.

ᐅᓂᒃᑳᑦ, ᓵᙵᔭᖃᓐᓂᖅ ᐊᐃᑉᐸᒥᓄᑦ ᓂᖓᕆᔭᐅᓲᖑᓂᖏᓐᓂᒃ ᐃᓄᐃᑦ ᐊᕐᓇᖏᑦ, ᐱᖁᔨᓯᒪᒍᑎᐅᔪᖅ ᓄᓇᓕᕐᔪᐊᓅᙵᙱᑦᑐᓂᒃ ᐸᓖᓯᓕᕆᔾᔪᑎᖃᖁᔨᓂᕐᒥᒃ.

“ᓯᕗᒧᑦ ᐱᒋᐊᕐᓂᐊᕐᓗᓂ, ᐃᒻᒪᖄᑦ, ᐱᓕᕆᐊᖃᖅᐸᓪᓕᐊᓂᕐᒥ ᓄᓇᓕᕐᔪᐊᓅᙵᙱᑦᑐᓂᒃ ᐸᓖᓯᓕᕆᔾᔪᑎᒥ ᑐᙵᕕᖃᕐᓗᓂ ᐃᓄᐃᑦ ᖃᐅᔨᒪᔭᖏᓐᓂᒃ ᐊᒻᒪ ᓄᓇᕐᔪᐊᒥᑦ ᐃᓱᒪᒋᔭᐅᓯᒪᔪᓂᒃ, ᐊᒻᒪ ᐅᒃᐱᕆᔭᐅᓯᒪᔪᓂ ᑲᑎᕐᖓᐅᕐᓯᒪᓂᒃᑰᕐᓂᒃᑯᑦ, ᐊᒻᒪᓗ ᐊᐃᑉᐸᕇᖕᓂᕐᒨᖓᓯᒪᔪᓂᒃ. ᐃᒪᓐᓇᐅᙱᙶᕐᓗᑎ ᐸᓖᓯᓕᕆᔾᔪᑎᖃᕐᓗᑎᒃ ᑕᒫᙶᒃᓯᒪᖏᑦᑐᓄᑦ ᒪᓕᒐᓕᕆᓂᕐᒥᒃ ᐊᒻᒪ ᐱᕋᔭᒃᑎᑦᑎᑦᑕᐃᓕᑎᑦᑎᓂᕐᒥᒃ, ᑕᒪᒃᑯᐊ ᐸᓖᓯᒃᑯᑦ ᐱᓕᕆᖃᑎᖃᕈᓐᓇᕐᓗᑎᒃ ᐃᓄᓕᕆᓂᕐᒧᑦ ᐱᓕᕆᕝᕕᐅᖃᑕᐅᔪᓂᒃ ᑕᒪᒃᑯᐊ ᓄᓇᖃᖅᑐᑦ ᐅᓗᕆᐊᓇᙱᑦᑐᒦᒍᓐᓇᖁᓪᓗᒋ ᐊᒻᒪ ᖃᓄᐃᓐᓇᙱᑦᑐᒦᒍᓐᓇᕐᓗᑎᒃ ᒪᐅᓇ ᓈᒻᒪᙱᓕᐅᕈᑎᓂᒃ ᐋᖅᑭᒃᓱᐃᓇᓱᖃᑦᑕᕐᓂᒃᑯᑦ ᐊᒻᒪ ᐊᑲᐅᙱᓕᐅᕈᑎᓂᒃ ᓈᒻᒪᙱᓕᐅᕈᑎᓂᒃ—ᑕᐃᒪᐃᓕᐅᕐᑎᓪᓗᒋ ᐃᓄᖕᓂ ᐃᑲᔪᖅᑕᐅᕙᓪᓕᐊᓗᑎᒃ, ᐱᓗᐊᕐᑐᒥ ᐃᓄᐃᑦ ᐊᕐᓇᖏᓐᓂᒃ ᐋᓐᓂᖅᑕᐅᓯᒪᔪᓂᒃ ᐊᐃᐸᕇᖕᓂᕐᒧᑦ ᓂᖓᕆᔭᐅᓯᒪᓂᕐᒧᑦ,” ᐅᓂᒃᑳᑦ ᐅᖃᕐᓯᒪᔪᑦ.

ᑎᑎᕋᖅᑎᒋᔭᐅᔪᑦ ᐅᓂᒃᑳᓂᒃ ᐊᐱᕐᓱᓚᐅᕐᓯᒪᔪᑦ 45-ᓂ ᐃᓄᖕᓂ ᐊᕐᓇᓂᒃ ᐊᒻᒪ 40-ᓂᒃ ᐱᔨᑦᑎᕋᐅᑎᓕᕆᔨᐅᔪᓂᒃ ᐅᑯᓇᙵᑦ ᑎᓴᒪᓂᒃ ᐊᕕᒃᑐᕐᓯᒪᓂᒃᑰᖓᔪᓂᒃ. ᐊᐱᖅᓱᑲᑕᒃᖢᑎᒃ ᖃᐅᔨᓕᓚᐅᕐᑐᑦ ᐊᔾᔨᒌᙱᑎᑦᑎᓂᒃᑯᑦ ᐸᓖᓯᓕᕆᓂᑕᖃᖃᑦᑕᕐᓂᖓᓂᒃ ᓱᓕ ᐃᓄᐃᑦ ᐸᓖᓯᓄᑦ ᐅᐸᒃᑕᐅᔭᕌᖓᑕ.

“ᐊᔾᔨᒌᙱᑎᑦᑎᓂᒃᑯᑦ ᐸᓖᓯᓕᕆᓂᒃᑯᑦ ᐊᑐᖅᑕᐅᖃᑦᑕᐃᓐᓇᖅᐳᖅ ᐃᓄᐃᑦ ᐊᕐᓇᖏᓐᓂᒃ ᐃᖅᑲᓇᑐᐃᕕᓕᕆᓂᕐᒥᑦ ᐱᓕᕆᐊᖃᓕᕌᖓᑕ ᐊᒻᒪᓗ ᑕᐃᒪᐃᑉᐸᒃᖢᓂ ᐅᖓᑖᓄ ᐸᓖᓯᑯᑦ ᐃᓄᖕᓂ ᐃᓱᒪᒋᔭᖃᓕᕐᓯᒪᓂᖏᓐᓂᒃ,” ᐅᖃᖅᑐᖅ ᐅᓖᐱᑲ ᑲᓪᓗ, ᐊᖓᔪᖅᑳᕆᔭᐅᔪᖅ ᐸᐅᒃᑑᑎᑦ ᐃᓄᐃᑦ ᐊᕐᓇᐃᑦ ᑲᓇᑕᒥ, ᑐᓴᒐᒃᓴᓕᐅᕐᑎᓪᓗᒋᑦ. “ᐸᓖᓯᒃᑯᑦ ᐱᓕᕆᐊᖃᕈᓐᓇᕐᓂᕐᓴᐅᓕᕈᓐᓇᖅᑐᑦ ᐊᐃᑉᐸᕇᓄᑦ ᐱᑦᑎᐊᙱᓐᓂᐅᕙᒃᑐᓂ ᐊᑐᖃᑦᑕᖔᓕᕈᑎᒃ “ᓄᓇᓕᕐᔪᐊᓅᖓᙱᑦᑐᓂᒃ ᐱᓕᕆᓕᕈᑎᒃᓴᑎᒍᑦ” ᐃᑲᔪᕋᔭᕐᓗᓂ ᐸᓖᓯᓂ ᐊᓯᐊᓂᙶᕐᓯᒪᔪᓂᒃ ᐱᓕᕆᖃᑎᖃᕈᓐᓇᕐᓂᕐᓴᐅᓕᕐᓗᑎᒃ ᐅᑭᐅᕐᑕᖅᑐᕐᒥ ᓄᓇᓕᖕᓂ ᐱᓕᕆᐊᖏᑦᑎᒍ.”

ᐅᓂᒃᑳᖅ 15-ᓂᒃ ᐃᓱᒪᓕᐅᕆᓯᒪᔪᓂᒃ ᐅᖃᐅᓯᖃᖅᑐᖅ ᐊᓯᙳᕈᑎᐅᔪᓐᓇᖅᑐᓂ ᖃᓄᖅ ᐸᓖᓯᓕᕆᔾᔪᓯᖅ ᐱᓕᕆᐊᖑᔭᕆᐊᖃᕐᓂᖓᓂᒃ ᐃᓄᐃᑦ ᓄᓇᖓᓂᒃ. ᑕᒪᒃᑯᐊ ᐃᓱᒪᓕᐅᕆᔭᐅᔪᑦ ᐃᓚᖃᖅᑐᑦ ᖁᐊᕐᓵᕐᓇᖅᑐᓂᒃ ᑐᓴᐅᒪᑎᑦᑎᓂᒃᑯᑦ ᐸᓖᓯᓕᕆᓂᕐᒥᒃ, ᐊᕐᓇᓄᓪᓘᓐᓃᑦ ᐊᖑᑎᓄᓪᓘᓐᓃᑦ ᐋᓐᓂᕐᓱᐃᕆᕙᖕᓂᕐᒥ ᖃᐅᔨᒪᑎᑦᑎᓂᖅ, ᐃᓄᐃᑦ ᐃᖅᑲᓇᐃᔭᖅᑎᑕᐅᕙᒡᓗᑎᒃ ᐸᓖᓯᓕᕆᓂᒃᑯᑦ, ᓄᓇᓖᑦ ᐱᓕᕆᐊᖃᖅᑎᓪᓗᒋᑦ ᐃᓚᐅᑎᑕᐅᕙᒡᓗᑎᒃ ᐊᒻᒪ ᐋᖅᑭᒃᓱᐃᓗᑎᒃ ᐃᓄᖕᓂᒃ ᐅᖃᐅᔾᔪᐃᔨᐅᒐᔭᖅᑐᓂᒃ ᐸᓖᓯᒃᑯᓐᓄᑦ.

ᐅᓖᐱᑲ ᑲᓪᓗ, ᐊᖓᔪᖅᑳᖅ ᐅᑯᓄᖓ ᐸᐅᒃᑐᑎᑦ ᐃᓄᐃᒃ ᐊᕐᓇᐃᒃ ᑲᓇᑕᒥ, ᐅᖃᓚᐅᕐᑐᖅ ᐸᓖᓯᒃᑯᑦ ᓄᓇᓕᕐᔪᐊᓅᖓᓯᒪᙱᑦᑐᓂᒃ ᐋᖅᑭᒃᓱᐃᔭᕆᐊᖃᕐᓂᖏᓐᓂᒃ ᐱᓕᕆᐊᖃᕐᓂᕐᒥᑦ ᐱᑦᑎᐊᖃᑦᑕᐅᑎᙱᔾᔪᑎᓄᑦ ᐊᕐᓇᓄᑦ/ᐊᖑᑎᓄᓪᓗ ᐱᓕᕆᐊᖃᕐᓂᒃᑯᑦ.

ᓇᓗᓇᐃᖅᑕᐅᓯᒪᓂᖓᒍᑦ ᐅᓂᒃᑳᓂᒃ ᐅᕙᓂ ᑲᓇᑕᒥ ᖃᐅᔨᓇᓱᖕᓂᖅ ᐊᓯᐅᓯᒪᔪᓂᒃ ᐊᒻᒪ ᐃᓄᐊᕐᑕᐅᓯᒪᔪᓂᒃ ᓄᓇᖃᖅᑳᖅᑐᓂᒃ ᐊᕐᓇᓂᒃ ᐊᒻᒪ ᓂᕕᐊᕐᓵᓂᒃ, ᐊᕐᓇᐅᓂᕐᒧᑦ/ᐊᖑᑕᐅᓂᕐᒧᑦ ᐊᒻᒪ ᐊᔾᔨᒌᙱᑎᑦᑎᓂᕐᒧᑦ ᐋᓐᓂᕐᓱᐃᕙᖕᓂᖅ “ᐱᒋᐊᕈᑎᖃᕐᓯᒪᔪᖅ ᐊᑐᖅᑕᐅᖃᑦᑕᕐᓯᒪᐃᓐᓇᖅᑐᓄᑦ ᑲᑎᓯᒪᐅᓕᕐᓯᒪᔪᓂᒃ ᑲᓇᑕᒥ ᐃᓅᖃᑎᒌᖕᓂᕐᒧᑦ.”

ᐊᕐᓇᐃᑦ ᓄᓇᕗᒥᑦ ᐱᑦᑎᐊᖅᑕᐅᖃᑦᑕᕐᓯᒪᙱᑦᑐᑦ 13-ᖏᕐᓱᖅᖢᓂ ᖁᑦᑎᖕᓂᕐᓴᒻᒪᕆᐅᕗᑦ ᒪᑯᓇᙵᓪᓕ ᐊᓯᐊᓃᑦᑐᓂᒃ ᑲᓇᑕᒥ. ᐊᒻᒪᓗ ᐊᕐᓇᖅ ᖁᓄᔪᕐᓂᐊᖅᑕᐅᒐᔭᕐᓂᖓ 12-ᖏᕐᓱᖅᖢᓂ ᖁᑦᑎᖕᓂᕐᓴᒻᒪᕆᐅᕗᖅ ᐳᕌᕕᓐᓯᑎᒍᑦ/ᑎᐅᕆᑑᕆᑎᒍᑦ ᐊᑐᖅᑕᐅᔾᔪᑎᐅᕙᖕᓂᕐᓴᓂᒃ.

2016-ᒥᑦ, ᓄᓇᕗᑦ ᖁᑦᑎᖕᓂᖅᐹᖑᓚᐅᕐᑐᑦ ᐊᕐᓇᓄᑦ ᐱᑦᑎᐊᖅᐸᖏᓐᓂᐅᔪᖅ ᐅᖃᐅᓯᐅᓯᒪᔪᓂᒃ ᐸᓖᓯᒃᑯᓐᓄᑦ ᑲᓇᑕᓕᒫᒥᓪᓕ.

ᐅᓂᒃᑳᖑᔪᖅ ᑎᑎᕋᐅᓯᖃᓚᐅᕐᒥᔪᖅ ᐅᓄᕐᑐᐃᑦ ᐊᕐᓇᐃᑦ ᐊᐱᖅᓱᖅᑕᐅᔪᑦ ᓄᓇᕗᒥᑦ ᐸᓖᓯᒃᑯᓐᓂᑦ ᑕᑎᖃᕈᓐᓇᕋᓱᒋᓗᐊᓚᐅᙱᓐᓂᖏᓐᓂᒃ. ᐊᕐᓇᐃᑦ ᐅᖃᓪᓚᖃᑦᑕᓚᐅᕐᒪᑕ ᖃᓄᐃᓕᐅᖅᑕᐅᖃᑦᑕᕐᓯᒪᓂᖏᓐᓂᒃ ᐸᓖᓯᒃᑯᓐᓄᑦ ᐊᐃᑉᐸᖏᓐᓄᑦ ᐱᑦᑎᐊᖅᑕᐅᖏᓐᓂᒃᑯᑦ ᐊᒻᒪᓗ ᒫᓐᓇ ᑕᑎᖃᒻᒪᕆᒍᓐᓇᐃᓪᓕᓪᓗᑎᒃ ᖃᓄᐃᑕᐅᓂᑰᓂᖏᓐᓄᑦ ᐸᓖᓯᓂᒃ.

“ᐸᓖᓯᒃᑯᑦ ᓄᓇᓕᖕᓂ ᓴᖅᑭᔮᑦᑎᐊᕋᓗᐊᕐᑎᓪᓗᒋᑦ ᓄᓇᓕᖕᓂᒃ, ᐃᓚᖏᑦ ᐊᐱᖅᓱᖅᑕᐅᔪᑦ ᐅᒃᐱᕈᓱᓚᐅᕐᒪᑕ ᐃᒪᓐᓇᑐᐃᓐᓇᖅ ᓄᓇᓯᐅᑎᒃᑯᑦ ᐃᖏᕐᕋᔭᒃᖢᑎᒃ ᓴᕿᔮᕐᓂᕐᒥᖕᓂ ᑕᑯᑎᑦᑎᑐᐃᓐᓇᖅᐸᒃᖢᑎᒃ. ᐊᐱᖅᓱᖅᑕᔪᑦ ᐃᓚᖏᑦ ᐃᓱᒫᓘᑎᖃᓚᐅᕐᒥᔪᖅ ᐸᓖᓯᒃᑯᑦ ᓱᒃᑲᐃᓗᐊᖃᑦᑕᕐᓂᖏᓐᓂᒃ ᑭᐅᓇᓱᖕᓂᖏᑦᑎᒍᑦ, ᑕᒪᓐᓇᓕ ᐱᔾᔪᑎᖃᓗᐊᕋᓱᒋᔭᐅᓚᐅᕐᑐᖅ ᐃᖃᓗᒃᑎᒎᕆᐊᖃᕐᓂᕐᒧᑦ ᐊᒻᒪᓗ ᓄᓇᓕᖕᓂᑦ ᐸᓖᓯᓄᑦ ᑐᓴᖅᑕᐅᓕᑕᐃᓐᓇᖅᖢᓂ,” ᐅᓂᒃᑳᑦ ᐅᖃᕐᓯᒪᔪᑦ.

ᐃᓚᐅᑎᔪᑦ ᐊᒻᒪ ᐅᖃᓚᐅᕐᒥᔪᑦ ᖃᐅᔨᒪᓂᕋᖅᖢᑎᒃ ᐸᓖᓯᒃᑯᑦ ᖃᓄᐃᓕᐅᕆᐊᖃᖃᑦᑕᕐᓂᖏᓐᓂᒃ ᐅᑭᐅᕐᑕᖅᑐᕐᒥᑦ, ᐃᓚᖃᖅᖢᓂ ᐱᓕᕆᐊᖃᕐᓂᕐᒥᒃ ᖁᐊᕐᓵᕐᓇᓚᐅᐸᒃᑐᓂᒃ, ᐃᖅᑲᓇᐃᔭᖅᑎᖏ ᓄᖃᖅᓴᕋᐃᓐᓂᖏᓐᓂᒃ, ᐃᑲᔫᑎᒃᓴᖃᙱᓗᐊᕐᓂᖅ ᐊᒻᒪᓗ ᐃᓄᖕᓂ ᐸᓖᓯᓂᒃ ᐱᓯᒪᐃᓐᓇᕈᓐᓇᙱᓐᓂᖅ.

ᐊᒻᒪ ᐃᓚᒋᓪᓗᒍ ᐃᓱᒫᓘᑎᖏᓐᓂᒃ ᐅᖃᐅᓯᖃᕐᓂᕐᒧᑦ, ᓄᓇᕗᒥᑦ ᐃᓚᐅᔪᑦ ᐊᒻᒪ ᐃᓱᒪᓕᐅᕆᓚᐅᕐᒥᔪᖅ ᖃᓄᖅ ᐸᓖᓯᒃᑯᑦ ᓄᓇᓕᖕᓂ ᐃᑲᔪᒃᑲᓐᓂᕈᓐᓇᕋᔭᕐᓂᖏᓐᓂᒃ, ᐃᓚᖃᖅᓗᒍ “ᐃᓄᐃᑦ ᐃᓕᖁᓯᖏᓐᓂᒃ, ᐅᖃᐅᓯᖏᓐᓂᒃ ᐊᑐᖅᐸᒃᑕᖏᓐᓂᒡᓗ ᖃᐅᔨᑎᑕᐅᓯᒪᓗᑎᒃ; ᐱᓕᕆᖃᑎᖃᕈᓐᓇᕐᓯᓗᑎᒃ ᓄᓇᓕᖕᓂᒃ ᓯᕗᓕᐅᕐᑎᐅᓯᒪᔪᓂᒃ; ᐅᔾᔨᕈᓱᓕᖅᑎᑕᐅᓯᒪᓗᑎᒃ ᓄᓇᓕᖕᓄᑦ ᖃᓄᐃᓕᐅᕈᓯᕆᔭᕆᐊᖃᖅᑕᖏᓐᓂᒃ; ᐊᒻᒪᓗ ᓄᓇᖃᖅᑐᓂᒃ ᖃᐅᔨᒪᓕᕋᓱᒃᐸᒡᓗᑎᒃ ᑲᑉᐱᐊᒋᔭᐅᙱᓐᓂᕐᓴᐅᔪᓐᓇᓕᕐᓗᑎᒃ ᐊᒻᒪ ᐅᒃᐱᕆᔭᐅᓂᕐᓴᐅᔪᓐᓇᕐᓗᑎᒃ ᐸᓖᓯᒃᑯᑦ.”

ᐃᓚᐅᔪᑦ ᐅᖃᓚᐅᕐᒥᔪᑦ ᓄᓇᖃᖅᑐᑦ ᓯᕗᓪᓕᐅᓗᑎᒃ ᑐᙵᓱᒃᑎᑦᑎᖃᑦᑕᕆᐊᖃᕐᓂᖏᓐᓂᒃ ᐸᓖᓯᓂᒃ ᓄᓇᖏᓐᓄᐊᕌᖓᑕ, ᐱᓕᕆᖃᑎᖃᓕᕋᓱᒃᐸᒡᓗᑎᒃ ᐊᒻᒪ ᐃᑲᔪᖃᑦᑕᐅᑎᕙᒡᓗᑎᒃ ᓈᒻᒪᙱᓕᐅᕈᑎᖃᕐᕕᐅᔪᓄᑦ ᐱᔨᑦᑎᕋᐅᑎᑎᒍᑦ.

ᓄᓇᕕᒃᒥᑦ, ᐃᓚᐅᓯᒪᔪᑦ ᐊᔾᔨᐸᓗᐊᒍᑦ ᐊᑐᕐᓯᒪᓂᕋᓚᐅᕐᒥᔪᑦ ᐅᑯᓇᓂ ᑲᑎᕕᒃ ᓄᓇᓕᓕᒫᑦ ᐸᓖᓯᖏᓐᓂᒃ.

“ᐸᓖᓯᒃᑯᑦ ᓄᓇᓕᖕᓂᖃᑦᑕᕐᒪᑕ ᕿᓚᒥᕈᓗᒃ, ᖃᐅᔨᒪᙱᓗᐊᖅᐸᒃᖢᑎᒃ ᐊᒻᒪ ᐊᔪᕈᓐᓃᕐᓯᒪᙱᓗᐊᖅᖢᑎᒃ, ᐊᒻᒪᓗ ᑐᑭᓯᓯᒫᓂᙱᓗᐊᖅᖢᑎᒃ ᐃᓄᐃᑦ ᐃᓕᖁᓯᖏᓐᓂ ᓄᓇᖏᓐᓂᒃ ᐊᒻᒪᓗ ᐱᒋᐊᕈᑎᐅᓯᒪᔪᓂᒃ ᓈᒻᒪᙱᓕᐅᕈᑎᒋᔭᐅᔪᓄᑦ, ᐱᓗᐊᖅᑐᒥᑦ ᒪᑯᓄᖓ ᐋᖓᔮᕐᓇᖅᑐᓄᑦ ᓱᐴᖅᑐᒐᕐᓄᑦ ᐊᒻᒪ ᐃᒥᐊᓗᓗᐊᕐᓂᕐᒧᑦ ᐊᒻᒪᓗ ᓂᖓᖃᑦᑕᕐᓂᕐᒥᒃ,” ᐅᓂᒃᑳᑦ ᐅᖃᕐᓯᒪᔪᑦ.

ᐃᓚᖏᑦ ᓄᓇᕕᒃᒥᑦ ᐊᐱᖅᓱᖅᑕᐅᔪᑦ ᐃᓱᒫᓘᑎᖃᓚᐅᕐᑐᑦ ᐸᓖᓯᒃᑯᑦ ᖃᐅᔨᓇᓱᒍᑎᒋᕙᒃᑕᖏᓐᓂᒃ ᐊᐃᑉᐸᕇᖕᓂᒃᑯᑦ ᐱᑦᑎᐊᖅᑐᖃᕈᓐᓃᕌᖓᑦ.

“ᐊᕐᓇᐃᑦ ᐋᓐᓂᕐᓱᖅᑕᐅᕙᒃᑯᑦ ᐅᖃᖃᑦᑕᓚᐅᕐᒪᑕ ᑖᒃᑯᐊᖔᖅ ᐃᒡᓗᖏᓐᓂᑦ ᐊᓂᑕᐅᕙᖕᓂᖏᓐᓂᒃ, ᑖᓐᓇᐅᙱᑦᑐᕐᓕ ᐱᑦᑎᐊᖏᑦᑐᐊᓗᒃ. ᐊᓯᖏᑦ ᐅᖃᓚᐅᕐᒥᔪᑦ ᒪᑯᐊ ᐅᖃᖃᑎᖃᕆᐊᖃᙱᓐᓂᕐᒧᑦ ᐱᖁᔭᐅᔪᑦ ᐊᑑᑎᖃᙱᓐᓂᖏᓐᓂᒃ ᐃᓄᑭᑦᑐᓂᒃ ᓄᓇᓕᖕᓂ ᐱᔾᔪᑎᖃᖅᖢᑎᒃ ᐱᔨᑦᑎᕋᐅᑎᖃᙱᓗᐊᕐᓂᖅ ᐊᒻᒪ ᐃᓄᐃᓪᓚᒦᓗᐊᕐᓂᖅ,” ᐅᓂᒃᑳᑦ ᐅᖃᕐᓯᒪᔪᑦ.

ᐅᓚᐅᔪᑦ ᓄᓇᕕᒃᒥᑦ ᐅᖃᓚᐅᕐᒥᔪᖅ ᐸᓖᓯᒃᑯᑦ ᐅᖃᖃᑎᒋᔭᒃᓴᐅᓂᕐᓴᐅᓕᕐᓂᖏᓐᓂᒃ ᐊᒻᒪᓗ ᓄᓇᓕᖕᓂ ᐃᓚᐅᓂᕐᓴᐅᓕᕐᓂᖏᓐᓂᒃ. ᑕᐃᒪᐃᑦᑐᓐᓇᖅᑐᑦ ᐱᔨᑦᑎᕋᐅᑎᖏᓐᓄᑦ ᐱᒃᑯᒋᔭᐅᓂᕐᓴᐅᕙᒃᑯᑎ, ᑐᓵᔨᖃᖅᐸᒡᓗᑎᒃ ᐊᒻᒪᓗ ᓈᒻᒪᙱᓕᐅᕈᑎᓄᑦ ᐃᓄᖕᓂᒃ ᐃᓚᐅᑎᑦᑎᓂᕐᓴᐅᕙᒡᓗᑎᒃ.