ᐃᓄᐃᑦ ᑎᑎᕋᐅᔭᒐᖏᑦ ᓴᖅᑭᔮᖅᑎᑕᐅᔪᑦ ᓴᓇᑦ ᓴᖅᑭᔮᒐᖏᓐᓂᒃ

8 ᑎᑎᕋᐅᔭᒐᐃᑦ ᓴᓇᔭᐅᓯᒪᔪᑦ ᐃᓄᖕᓄᑦ ᐊᒻᒪ ᐅᑭᐅᕐᑕᖅᑐᕐᒥ ᑎᑎᕋᐅᔭᒐᖅᑎᓄᑦ ᓴᖅᑭᔮᖅᑎᑕᐅᓂᐊᕐᑐᑦ ᓴᓇᑦᖃᕐᕕᒃᒥ ᑕᒪᑐᒪᓂ ᐊᕐᕌᒍᒥ, ᐅᓇ ᑕᐃᒪᐃᔾᔪᑎᖃᖅᖢᓂ ᓄᑖᖅ ᐱᓕᕆᐊᖑᔪᒧᑦ ᑲᓇᑕᒥ ᑎᑎᕋᐅᔭᒐᕐᓂᒃ ᓴᖅᑭᔮᖅᑎᑦᑎᑲᑕᖕᓂᕐᒧᑦ.

ᓴᖅᑭᔮᖅᑎᑕᐅᔪᑦ ᑲᑎᒪᔨᓄᑦ ᐃᒡᓗᕈᓯᕐᒥᒃ B-30 ᐅᕙᓂ ᑲᓇᑕᒥ ᓴᓇᑦ ᐱᓕᕆᕝᕕᖕᒥ ᑲᑎᕐᓱᒐᐃᑦ ᑎᑎᕋᐅᔭᒐᐃᑦ ᐅᑭᐅᕐᑕᖅᑐᕐᒥ ᐃᓅᓯᖏᓐᓂᒃ ᓴᖅᑭᔮᖅᑎᑦᑎᔪ ᐊᒻᒪᓗ ᒪᑯᓂᖓ ᓄᓇᓂᒃ, ᐊᖑᓇᓱᙳᐊᖅᑐᓂᒃ ᐊᒻᒪᓗ ᐊᖓᒃᑯᙳᐊᓂᒃ.

ᓴᓂᑐ ᐸᑐᕇᓯᐊ ᐴᕕ, ᐃᒃᓯᕙᐅᑕᖅ ᓴᓂᑦᒥ ᑎᑎᕋᐅᔭᒐᕐᓂᒃ ᐊᒻᒪ ᐃᑦᑕᕐᓂᓴᓕᕆᓂᕐᒧᑦ ᐱᓕᕆᔨᓄᑦ, ᑕᒪᑐᒥᖓ ᐱᒋᐊᖅᑎᑦᑎᓚᐅᕐᑐᖅ ᑕᑯᔭᒐᖃᕐᕕᖃᕐᓂᒃ ᓴᓇᑦᒥ.

“ᐱᓕᕆᔪᒪᓪᓚᕆᓚᐅᕋᒪ ᓴᓇᑦᒥ ᐱᓕᕆᐊᖑᔪᒪᔪᒥᒃ ᐅᑭᐅᕐᑕᖅᑑᑉ ᒥᒃᓵᓅᖓᔪᓂᒃ, ᑕᕝᕙᓂᓗ ᑎᑎᕋᐅᔭᒐᐃᑦ ᐱᒻᒪᕆᐅᓂᖏᓐᓂᒃ ᓴᖅᑭᔮᖅᑎᑦᑎᕙᒃᖢᑕ,” ᐴᕕ ᐅᖃᓚᐅᕐᑐᖅ.

“ᑐᓴᓚᐅᕋᑦᑕ ᐅᓄᕈᓘᔭᕐᑐᓂᒃ ᐃᓄᖕᓂᑦ ᖃᓄᖅ ᐱᒻᒪᕆᐅᑎᒋᓂᖓᓂᒃ ᑎᑎᕋᐅᔭᒐᕐᓂᒃ ᑕᒪᓐᓇᓗ ᐃᓚᒋᔭᐅᓪᓗᓂ ᐃᓄᐃᑦ ᐃᓕᖅᑯᓯᖓᓄᑦ … ᐊᒻᒪᓗ ᑐᓴᖃᑦᑕᕐᓯᒪᓪᓗᑕ ᐅᑭᐅᕐᑕᖅᑐᖅ ᐊᒻᒪ ᓂᒋᕐᒥᐅᑦ ᐱᓕᕆᖃᑎᒌᒋᐊᖃᕐᓂᖏᓐᓂᒃ ᑕᐃᒪᓕ ᑖᔅᓱᒥᖓ ᓂᕈᐊᕐᓯᒪᓂᒃᑯᑦ ᑕᒪᓐᓇ ᐃᓱᒪᒋᔭᐅᓯᒪᔪᖅ ᐊᑐᖅᑎᓐᓇᓱᒃᖢᑎᒍᑦ.”

8 ᑎᑎᕋᐅᔭᒐᐃᑦ ᓴᖅᑭᔮᖅᑎᑕᐅᔪᑦ ᐅᑯᓇᙶᓚᐅᕐᑐᑦ ᐅᐃᓂᐱᒡᒥ ᑎᑎᕋᐅᔭᒐᖃᕐᕕᒃᐅᑉ ᐃᓄᖕᓄᑦ ᓴᓇᐅᒐᖃᕐᕕᖓᓂᒃ, ᖃᐅᒪᔪᖅ, ᑕᕝᕙᓂᓗ ᐅᓄᓛᓂᒃ ᑲᑎᕐᓱᒐᖃᖅᑐᑦ ᐃᓄᐃᑦ ᑎᑎᕋᐅᔭᒐᕐᓯᒪᔭᖏᓐᓂᒃ. ᑎᑎᕋᐅᔭᒐᖃᕐᕕᐅᑦ ᑲᒪᔨᖓ. ᐅᑯᓄᖓ ᐃᓄᐃᑦ ᑎᑎᕋᐅᔭᒐᖏᓐᓄ ᑖᓖᓐ ᑲᐅᕙᑦ ᕗᐊᐃᑦ, ᓂᕈᐊᕐᓂᑯ ᓴᖅᑭᔮᕐᓂᐊᖅᑐᓂᒃ ᓴᓇᑦᒥ.

ᐴᕕ ᑎᑎᕋᐅᔭᒐᕐᓂᒃ ᖃᐅᔨᓴᖃᑦᑕᕐᓯᒪᔪᖅ ᐃᒻᒪᑲᓪᓚᓕᓴᕐᓂ ᐊᒻᒪᓗ ᑎᑎᕋᐅᔭᒐᖃᕐᕕᒃᒥ ᐊᐅᓚᑦᑎᔨᐅᓂᑰᓪᓗᓂ ᑲᒻᒪ ᑲᒪᔨᐅᓂᑰᓪᓗᓂ ᒫᓂᑑᒐᒥ ᓴᓂᑐᙳᓚᐅᙱᑎᓪᓗᒍ, ᐅᖃᓚᐅᖅᑐᖅ ᓂᕈᐊᖅᖠᓚᐅᕐᓂᖓᓂᒃ ᐊᓯᖏᓪᓗ ᑎᑎᕋᐅᔭᒐᕐᓂᒃ ᖃᐅᔨᒪᔨᓂᒃ ᑭᒃᑯᓐᓂ ᑎᑎᕋᐅᔭᒐᖅᑕᐅᔪᕕᓂᕐᓂᒃ ᓴᕿᔮᖅᑎᑦᑎᓂᐊᕐᓗᑎᒃ ᐅᑭᐅᕐᑕᖅᑐᕐᒥᐅᓂᒃ ᑖᒃᑯᐊᓗ ᐃᓚᖏᑦ ᐅᑯᓇᙶᕐᓯᒪᓪᓗᑎᒃ ᐃᒡᓗᓕᒃ, ᖃᒪᓂᑦᑐᐊᖅ, ᐸᖕᓂᕐᑑᖅ ᐊᒻᒪᓗ ᑭᙵᐃᑦ ᐊᒻᒪ ᐊᓯᖏᓐᓂ ᓄᓇᓂ.

ᑎᓴᒪᑦ ᑖᒃᑯᓇᙵᑦ 8-ᓂ ᑎᑎᕋᐅᔭᒐᕐᓂᒃ ᓴᖅᑭᔮᖅᑎᑕᐅᔪᓂᒃ ᐃᓚᒋᔭᐅᔪᑦ ᑕᑯᔭᒐᖃᕐᕕᒃᒥᑦ ᓴᓇᑦ ᐱᓕᕆᐊᖓᓂᒃ.

ᑲᑎᕐᓱᒐᕆᔭᐅᔪᑦ ᓴᖅᑭᔮᖅᑎᑦᑎᔾᔪᑎᐅᖕᒥᔪᑦ ᐊᑯᓂᐊᓗᒃ ᑎᑎᕋᐅᔭᒐᐃᑦ ᓴᓇᔭᐅᕙᖕᓂᖏᓐᓂᒃ ᐅᑭᐅᕐᑕᖅᑐᕐᒥ, ᒪᑯᓇᙵᑦ ᓴᓇᔭᐅᔪᓂ ᑭᙵᓂᒃ ᐅᑯᓇᙵᑦ ᑭᓄᐊᔪᐊᒃ ᐋᓯᕙᒃᒧᑦ ᐊᒻᒪ ᐱᑕᓘᓯ ᓴᐃᓚᒧ.

“ᐃᓱᒪᔪᖓᓕ ᐃᓄᐃᑦ ᖃᐅᔨᓂᐊᕐᓗᑎᒃ ᖃᓄᖅ ᑎᑎᕋᐅᔭᒐᓕᕆᓂᖅ ᐊᔾᔨᒌᙱᔾᔪᑎᖃᕆᐊᒃᓴᖏᓐᓂᒃ ᑲᓇᑕᐅᑉ ᐃᒡᓗᐊᓂᑦ ᐃᒡᓗᐊᓄᑦ… ᑕᑯᓇᔭᖅᑐᓯ ᒧᒥᖅᑐᓕᕆᓂᕐᒥᒃ, ᐃᓅᖃᑎᒌᖕᓂᕐᒥᒃ ᐊᒻᒪᓗ ᑕᑯᓇᔭᕆᕗᑎ ᐅᒃᐱᕐᓂᕆᔭᐅᔪᓂᒃ ᐊᒻᒪᓗ ᐊᖓᒃᑯᙳᐊᓂᒃ,” ᐅᖃᖅᑐᖅ ᐴᕕ, ᐅᖃᒃᑲᓐᓂᖅᖢᓂ ᑕᒪᒃᑯᐊ ᓴᖅᑭᔮᖅᑐᑦ ᐊᕙᑎᒋᔭᐅᔪᒥᒃ ᐊᒻᒪ ᐅᑭᐅᕐᑕᖅᑐᙳᐊᒥ ᓴᖅᑭᔮᖅᑎᑦᑎᖕᒥᖕᒪᑦ ᑖᒃᑯᐊᓗ ᑲᑎᕐᓱᒐᕐᓄ ᐊᑐᖅᑕᐅᓗᐊᕋᓱᒃᖢᑎᕐ.

ᐅᖃᓚᐅᕐᒥᔪᖅ ᓇᓄᐃᑦ ᓴᖅᑭᔮᖅᑐ ᐹᔅᒥ ᑎᑎᕋᐅᔭᒐᖅᑎᒧᑦ ᐋᓐᑐᕉ ᖄᐱᒃᒧᑦ — ᓄᓇᕗᑦ ᓴᐃᒻᒪᑎᖓᑕ ᑕᕐᓴᖓᓂᒃ ᑎᑎᕋᐅᔭᖅᓂᑯ — ᓇᓗᓇᐃᒃᑯᑎᒋᓪᓗᓂᐅ ᐃᓄᐃᑦ ᑎᑎᕋᐅᔭᒐᖏᑦ ᐊᒃᑐᐊᓂᖃᕐᓂᖏᓐᓂᒃ ᓄᓇᒥ.

“ᑕᑯᔭᒐᖃᕐᕕᓕᕆᓂᕐᒥ ᐱᓕᕆᐊᖃᕐᓂᓐᓂ ᐊᕐᕌᒍᑦ 50 ᐅᖓᑖᓂ, ᐊᒃᓱᐊᓗ ᐅᒃᐱᕈᓱᒃᑲᒪ ᑕᑯᒃᓴᐅᔪᓄᑦ ᖃᓄᐃᓕᐅᕈᑎᒃ ᑭᒃᑯᓕᒫᓄᑦ ᑐᑭᓯᔭᐅᓯᒪᓇᓱᒋᓪᓗᒍ, ᐊᒻᒪᓗ ᑖᒃᑯᐊ ᑲᓇᑕᒥᐅᑕᐃ ᓴᕿᑎᑦᑎᓯᒪᔪᑦ ᐃᒻᒥᓂᙶᖅᑐᓂᒃ ᑐᓴᕋᓱᒋᐊᖃᖅᖢᑎᒃ,” ᐴᕕ ᐅᖃᖅᑐᖅ ᑕᒪᑐᒪ ᐱᓕᕆᐊᖓᓄ ᐱᓇᓱᒍᑎᒋᓯᒪᔭᖓᓂᒃ.

“ᑕᐅᑐᒃᑲᒃᑯᓕ ᐱᒻᒪᕆᐊᓘᓂᖓᓂ ᐋᖅᑭᒋᐊᖅᐸᓪᓕᐊᒃᑲᓐᓂᕐᓂᕐᒧᑦ. ᐊᔪᕐᓇᖅᑐᕈᓘᖕᒪᑦ ᐅᑭᐅᕐᑕᖅᑐᕐᒥᐅᓄᑦ ᓴᓇᑦᒧ ᐅᐸᒍᑎᔭᕆᐊᒃᓴ ᑕᐃᒪᓕ ᐃᓱᒪᓕᓚᐅᕋᒪ ᑕᐃᒪᓐᓇ ᒪᑐᐃᕈᑎᐅᓕᕈᓐᓇᕐᓂᖓᓂᒃ,” ᐅᖃᖅᑐᖅ. “ᐅᑯᐊ ᐱᓇᓱᐊᕈᓯᕐᓂᒃ 8-ᓂ ᓴᖅᑭᔮᑐᐃᓐᓇᔾᔮᙱᑦᑐᑦ, ᑭᓯᐊᓂᓕ 8-ᖑᔪᑦ ᓴᖅᑭᔮᖅᑎᑦᑎᓯᒪᔪᑦ ᑐᕌᒐᕆᔭᐅᔪᓂᒃ ᐊᒻᒪ ᐱᓇᓱᐊᒐᕆᔭᐅᔪᓂᒃ ᑲᓇᑕᒥ ᓴᓇᑦᑯᓐᓄᑦ.”

“ᐊᒻᒪᓗ ᐱᓕᕆᐊᖃᓕᕐᓂᖅ ᖁᕕᐊᓇᖅᖢᓂ, ᐅᓇ ᓯᕗᓪᓕᖅᐹᖅ ᐃᓄᒃ ᒐᕙᓇ ᔭᓄᕈ ᒪᑐᐃᕐᓯᓂᐊᓕᖅᖢᓂ ᑲᑎᒪᕕᔨᔪᐊᕐᓇᒥᒃ, ᑕᐃᒪᓕ ᐅᕙᓐᓄ ᐱᒻᒪᕆᐊᓘᖕᒪᑦ… ᓄᓇᖓᓂᙶᖅᓯᒪᔪᓂ ᓴᖅᑭᔮᖅᑐᖃᐅᕐᓗᓂ ᐅᖃᓪᓚᒋᐊᖅᑐᖅᐸᑦ ᑯᐃᓐᒥᙶᖅᑐᓂᒃ,” ᐴᕕ ᐅᖃᖅᑐᖅ.

ᐃᓱᒪᖅᓱᑲᑕᙱᓐᓂᖓᓄᑦ ᒫᓐᓇ ᓴᓇᑦᒥ ᕿᒥᕐᕈᐊᕈᒪᓂᒃᑯᑦ ᐋᓐᓂᐊᕕᒡᔪᐊᕐᓇᐅᑎᓪᓗᒍ ᑕᐃᒪᓕ ᑭᒃᑯᓕᒫᑦ ᑕᑯᔪᓐᓇᔾᔮᙱᒻᒪᑕ ᑎᑎᕋᐅᔭᒐᓂᒃ ᐅᐸᒍᑎᓯᒪᓂᒃᑯᑦ, ᑭᓯᐊᓂᓕ ᑕᑯᔭᒃᓴᐅᔪᑦ ᖃᕋᓴᐅᔭᒃᑯᑦ ᔫᓂ 2022 ᑎᑭᒐᓱᖕᓂᖓᓂᒃ, ᑖᒃᑯᐊ ᓴᖅᑭᔮᖅᑎᑕᐅᓂᖏᑦ ᐱᐊᓂᒃᐸᑦ.

ᐴᕕ ᐅᖃᓚᐅᕐᑐᖅ ᐃᓱᒪᓂᕋᖅᖢᓂ ᑖᒃᑯᐊ ᑲᑎᕐᓱᒐᐃᑦ ᐅᓄᙱᑦᑐ ᑕᑯᑲᑕᒃᑐᓂᒃ ᖃᐅᔨᒃᑲᓐᓂᕋᓱᒍᑎᐅᔪᓐᓇᕐᓗᑎᒃ ᑎᑎᕋᐅᔭᒐᕐᓂᒃ ᐅᑭᐅᕐᑕᖅᑐᕐᒥᐅᑕᑦ ᓴᓇᔭᖏᓐᓂᒃ ᐊᒻᒪᓗ ᖃᓄᖅ ᐃᓄᐃᑦ ᐃᓅᓯᖏᓐᓂᒃ ᐃᓕᖅᑯᓯᖏᓐᓂᒡᓗ ᖃᐅᔨᕚᓪᓕᕈᒪᓂᕐᒥᒃ.

“ᐅᓇ ᖁᕕᐊᓱᒍᑎᖃᕈᑎᒻᒪᕆᒃ ᑲᓇᑕᐅᑉ ᐅᑭᐅᕐᑕᖅᑐᖓᓂᒃ, ᑭᓯᐊᓂᓕ ᐱᒻᒪᕆᐅᓂᕐᓴᒃᑯᑦ ᐃᓄᖏᓐᓂᒃ ᐊᒻᒪ ᐃᓅᓯᖏᓐᓂᓪᓗ ᐅᑭᐅᕐᑕᖅᑐᒥ,” ᐴᕕ ᐅᖃᖅᑐᖅ. “ᑕᐃᒪᓕ ᐃᓱᒪᔪᖓ ᑕᒪᑐᒥᖓ ᑕᑯᓇᓱᒃᑲᓐᓂᕈᓐᓇᕐᓗᑕ ᓲᖃᐃᒻᒪ ᑲᓇᑕᒧᑦ ᐱᒻᒪᕆᐊᓘᖕᒪᑕ.”