ᐃᓄᐃᑦ ᑕᐱᕇᑦ ᑲᓇᑕᒥ ᓂᕈᐊᒐᒃᓴᓕᐊᕐᓇᕐᒥᒃ ᒪᑐᐃᕐᓯᕗᑦ ᐊᖓᔪᖅᑳᒃᓴᒧᑦ

ᓂᕈᐊᒐᒃᓴᐅᓐᓇᖅᓯᕗᖅ ᑲᓇᑕᒥ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ ᐊᖓᔪᖅᑳᒃᓴᒧᑦ.

ᐃᓄᐃᑦ ᑕᐱᕇᑦ ᑲᓇᑕᒥ ᐊᖓᔪᖅᑳᒃᓴᖓᓂᒃ ᓂᕈᐊᖅᑎᑦᑎᓛᕐᒪᑕ ᓯᑎᐱᕆᒥ ᑲᑎᒪᕕᒡᔪᐊᖅᑎᑦᑎᓚᐅᕐᓗᑎᒃ, ᑖᒃᑯᐊ ᑐᓴᒐᒃᓴᓕᐊᒃᑯᑦ ᑐᓴᒐᒃᓴᓕᐅᓚᐅᖅᑐᑦ ᔪᓚᐃ 28-ᒥ.

ᖃᑯᒍ ᑲᑎᒪᕕᒡᔪᐊᓛᕐᒪᖔᑕ ᓱᓕ ᐋᖅᑭᒃᑕᐅᓯᒪᓚᐅᙱᑦᑐᖅ.

ᓂᕈᐊᒐᒃᓴᐃᑦ ᐊᖓᔪᖅᑳᒧᑦ ᐅᖃᓪᓚᒍᓐᓇᖅᑎᑕᐅᓛᖅᑐᑦ 10 ᒥᓂᑦᔅᓂᒃ ᑲᑎᒪᕕᒡᔪᐊᖅᑐᓂᒃ ᑭᓱᒧᑦ ᓂᕈᐊᒐᒃᓴᐅᔪᒪᔾᔪᑎᖏᓐᓂᒃ ᐊᕐᕌᒍᓂᒃ ᑎᓴᒪᓂᒃ ᐊᖓᔪᖅᑳᖑᔪᒪᔾᔪᑎᖏᓐᓂᒃ ᐃᓄᐃᑦ ᑕᐱᕇᑦ ᑲᓇᑕᒧᑦ.

ᑲᑎᒪᓂᐊᖅᐸᑕ ᐅᐸᒍᑎᓗᑎᒃ, ᓂᕈᐊᒐᒃᓴᐃᑦ ᐅᐸᒍᑎᓯᒪᓗᑎᒃ ᐅᖃᓪᓚᓛᖁᔭᐅᔪᑦ. ᑖᓐᓇᓕ ᑲᑎᒪᕕᒡᔪᐊᖅᑎᑦᑎᓂᖅ ᓴᖅᑭᔮᑲᐅᑎᒋᓐᓇᖅᑐᒃᑯᑦ ᑲᑎᒪᓂᐅᓂᐊᖅᐸᑦ ᑖᒃᑯᐊ ᐅᖃᓪᓚᒃᑎᑕᐅᓛᕐᒥᔪᑦ ᑕᒪᐅᓇ ᐅᖄᓚᐅᑎᑎᒍᓪᓘᓐᓃᑦ, ᑖᓐᓇ ᑐᓴᒐᒃᓴ ᐅᖃᖅᓯᒪᓚᐅᕐᑐᖅ.

ᓇᐃᑕᓐ ᐅᐱᐊᑦ ᐃᓄᐃᑦ ᑕᐱᕇᑦ ᑲᓇᑕᒥ ᐊᖓᔪᖅᑳᕆᔭᐅᓯᒪᔪᖅ 2015-ᒥᑦ ᐱᒋᐊᖅᖢᓂ. ᑕᒪᓐᓇ ᐊᕐᕌᒍ ᐱᒋᐊᕐᓯᒪᑎᓪᓗᒍ, ᑲᓇᑕᐅᑉ ᐊᖓᔪᖅᑳᖅᔪᐊᖓ ᔭᔅᑎᓐ ᑐᕉᑑ ᑖᔅᓱᒥᖓ ᑕᐃᓯᓚᐅᖅᓯᒪᔪᖅ ᐃᓚᐅᖁᔨᓪᓗᓂ ᒐᕙᓇ ᔭᓄᕈᒥᑦ ᓂᕈᐊᕋᓱᓕᖅᑎᓪᓗᒋᑦ. ᑐᕉᑑ ᓂᕈᐊᖅᖠᓚᐅᖅᓯᒪᔪᖅ ᒥᐊᓕ ᓴᐃᒪᓐᒥ, ᐃᓄᒃ ᓯᕗᓕᐅᖅᑎ ᐊᒻᒪ ᐃᓄᐃᑦ ᑕᐱᕇᑦ ᑲᓇᑕᒥ ᐊᖑᔪᖅᑳᖑᓚᐅᖅᓯᒪᓪᓗᓂ ᑖᓐᓇᓗ ᐱᓕᕆᐊᖃᓯᒋᐊᓚᐅᖅᖢᓂ ᔪᓚᐃ 26-ᖑᑎᓪᓗᒍ.

ᐃᓄᐃᑦ ᑕᐱᕇᑦ ᑲᓇᑕᒥ ᐊᖓᔪᖅᑳᖓ ᓂᕈᐊᕆᔭᐅᕙᒃᑐᖅ ᓂᕈᐊᖅᑎᑕᐅᓪᓗᑎᒃ ᐃᓄᐃᑦ ᑲᑐᔾᔨᖃᑎᒌᖏᑦ ᐅᑯᐊ ᓄᓇᕗᑦ ᑐᙵᕕᒃᑯᑦ, ᒪᒃᕕᒃᑯᑦ, ᐃᓄᕕᐊᓗᐃᑦ, ᐊᒻᒪᓗ ᓄᓇᑦᓯᐊᕗᑦ ᒐᕙᒪᖓ. ᐊᒻᒪᓗ, ᒪᕐᕉᖕᓂ ᐊᕕᒃᑐᖅᓯᒪᔪᓂᙶᖅᑐᓂᒃ ᑲᑎᒪᕕᒡᔪᐊᕆᐊᖅᑐᓂᒃ ᓂᕈᐊᖅᑎᑦᑎᕙᒃᖢᑎᒃ ᐊᖓᔪᖅᑳᒃᓴᒥᒃ ᐊᒻᒪ ᑐᒡᓕᒃᓴᒥᑦ.

ᐃᓄᐃᑦ ᐊᕐᕌᒍᖃᖅᑐᑦ 18-ᓂᒃ ᐅᖓᑖᓄᑦ ᐃᓄᐃᑦ ᑕᐱᕇᑦ ᑲᓇᑕᒧᑦ ᐊᖓᔪᖅᑳᒧᑦ ᓂᕈᐊᒐᒃᓴᐅᔪᓐᓇᖅᑐᖅ. ᓂᕈᐊᒐᒃᓴᓕᐊᖑᓗᑎ ᑭᒡᒐᖅᑐᐃᔨᐅᖃᑕᐅᔪᒧᑦ ᐃᓄᐃᑦ ᑲᑐᔾᔨᖃᑎᒌᓂᒃ ᐅᕝᕙᓘᓐᓃᑦ ᑎᑎᕋᖅᓗᑎᒃ ᓯᕗᓕᐅᖅᑎᐅᓂᕐᒧᑦ ᐱᓕᕆᐊᕆᓯᒪᔭᖏᓐᓂᒃ ᓇᓗᓇᐃᖅᓯᓯᒪᓗᓂ ᒪᓕᒃᓯᒪᓂᕐᒧᑦ ᓂᕈᐊᒐᒃᓴᐅᓂᖅᒧᑦ ᐱᖁᔭᕆᔭᐅᔪᓂᒃ.

ᓂᕈᐊᒐᒃᓴᐃᑦ ᐃᑲᔪᖅᑕᐅᓯᒪᔭᕆᐊᖃᖅᑐᖅ 20-ᓂᒃ ᐊᑎᓕᐅᖅᓯᒪᔪᓂᒃ.

ᓂᕈᐊᒐᒃᓴᓕᐅᕐᓂᖅ ᒪᓂᑐᓂᐊᖅᑐᖅ ᐱᖓᔪᐊᓐᓂ, ᐋᒐᓯ 18.