ᐃᓄᐃᑦ ᑲᑉᐱᐊᓱᖕᒪᑕ ᓴᖅᑭᑎᑦᑎᔭᕆᐊᒃᓴᖅ ᐃᑲᔪᖅᑐᐃᓂᖏᓐᓂᒃ ᐹᕙᓐᓛᓐᒥ: ᑲᑎᒪᔨᐅᓂᑯ

ᐃᓄᖕᓂ ᐃᑲᔪᖅᑐᐃᔪᖃᐅᕐᒪᑦ ᐹᕙᓐᓛᓐ ᓴᕕᕋᔭᒃᓴᒥᒃ ᐅᔭᕋᒃᓯᐅᖅᕕᒃ ᐊᖏᒡᓕᒋᐊᕈᒪᓂᖓᓂᒃ, ᑭᓯᐊᓂᓕ ᓂᐱᖃᒻᒪᕆᒡᓗᑎᒃ ᐅᖃᕈᒪᙱᑦᑐᑦ, ᐅᖃᓚᐅᕐᓯ ᒥᑦᑎᒪᑕᓕᒃᒥ ᕼᐋᒻᒪᓚᒃᑯᓐᓄᑦ ᑲᑎᒪᔨᐅᓂᑯ.

“ᐅᓄᕐᓂᕐᓴᐃᑦ ᐃᓄᐃᑦ ᐃᑲᔪᖅᑐᐃᓯᒪᔪᑦ ᐱᓕᕆᓂᖅ 2-ᒥ ᐅᖃᔾᔮᙱᒻᒪᑕ,” ᔪᐊᓇ ᐃᓄᐊᓗᒃ-ᑯᓄᒃ ᐅᖃᓚᐅᕐᑐᖅ ᐊᐱᖅᓱᖅᑕᐅᓪᓗᓂ.

“ᐊᔪᖅᓴᖅᖢᓂ ᐊᒻᒪ ᑳᖃᑦᑕᖅᖢᓂ ᓂᐱᖃᕐᓇᙱᒻᒪᑦ. ᐊᒻᒪᓗ ᑕᒪᒃᑯᐊ ᐃᓄᐃᑦ ᐊᔪᕐᓴᙱᓐᓂᕐᓴᐃᑦ ᐅᖃᐅᓯᖏᑦ ᑐᓵᔭᐅᓂᕐᓴᐅᕙᒃᖢᑎᒃ, ᓲᖃᐃᒻᒪ ᐃᖕᒥᖕᓂᒃ ᑕᑯᖅᑯᑎᓯᒪᖕᒪᑕ ᐊᔪᕐᓴᙱᓐᓂᖏᓐᓂᒃ ᑕᐃᒪᐃᙱᑎᓪᓗᑎᑦ.”

ᒪᐃ 13-ᒥ, ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑦ ᐃᓱᒪᓕᐅᕆᓚᐅᕐᒪᑕ ᒐᕙᒪᑐᖃᒃᑯᑦ ᐅᑭᐅᕐᑕᖅᑐᓕᕆᓂᕐᒧᑦ ᒥᓂᔅᑕ ᑖᓂᐅᓪ ᕚᓐᑐᓪ ᐊᖏᖁᔭᐅᙱᖢᓂ ᐹᕙᓐᓛᓐ ᓴᕕᕋᔭᒃᓴᒥᒃ ᐅᔭᕋᒃᓯᐅᖅᕕᒃᒧᑦ ᐸᕐᓇᐅᑎᖏᓐᓂᒃ ᓴᓇᔪᒪᓂᕐᒥᒃ 110 ᑭᓛᒥᑕᓂ ᑕᑭᓂᓕ ᓄᓇᓯᐅᑎᑯᑖᖕᒧᑦ ᐊᖅᑯᑎᒥ ᓄᓘᔮᑦ ᓴᕕᕋᔭᒃᓴᒥ ᐅᔭᕋᒃᓯᐅᖅᕕᒃᒧᑦ ᐊᒻᒪᓗ ᐊᐅᓪᓚᖅᑎᑕᐅᕙᒃᑐᑦ ᐊᖏᓂᕐᓴᐅᓕᕐᓗᓂ ᓄᓘᔮᑦ ᕿᙳᐊᓂᒃ ᒫᙵᑦ 6 ᒥᓕᐊᓐ ᑕᓐᔅᓂᒃ ᒪᐅᖓ 12 ᒥᓕᐊᓐ ᑕᓐᔅᓄ ᓴᕕᕋᔭᒃᓴᒥ ᐊᕐᕌᒍᒥ.

ᕚᓐᑐᓪ ᐃᓱᒪᓕᐊᕆᔭᖓ ᓂᕆᐅᒋᔭᐅᔪᖅ ᐊᐅᔭᐅᓂᐊᕐᑐᖅ.

ᑲᑎᒪᔩᑦ ᐃᓱᒪᓕᐊᕆᔭᖏ ᐃᓱᖃᕈᑎᖃᓚᐅᕐᑐᑦ ᐊᕐᕌᒍᑦ ᑎᓴᒪᓄᑦ ᑭᒃᑯᓕᒫᓂ ᑲᑎᒪᑎᑦᑎᓂᕐᒥᒃ ᓄᓇᓕᖕᓂ ᑐᓴᑲᑕᒃᖢᑎᒃ, ᐃᓄᐃᑦ ᑲᑐᔾᔨᖃᑎᒌᖏᓐᓂᒃ, ᐹᕙᓐᓛᓐᑯᓐᓂᒃ, ᕼᐋᒻᒪᓚᓂᒃ, ᐊᒻᒪᓗ ᐊᖑᓇᓱᒃᑐᓕᕆᔨᒃ ᑲᑎᒪᔨᖏᓐᓂᒃ ᓄᓇᓕᖕᓂ ᐊᒃᑐᖅᑕᐅᓇᔭᖅᑐᓂᒃ ᐊᖏᒡᓕᒋᐊᕈᑎᒧᑦ.

ᐹᕙᓐᓛᓐᑯᑦ ᐅᖃᓚᐅᕐᑐᑦ ᑲᑎᒪᑲᑕᒃᑎᓪᓗᒋᑦ ᒪᑐᓯᒪᓚᐅᑲᖕᓂᐊᕐᓂᖓᓂᒃ ᐅᔭᕋᒃᓯᐅᖅᕕᒃ ᐅᓇ ᕚᓐᑐᓪ ᐊᖏᙱᑉᐸᑦ ᐊᖏᒡᓕᒋᐊᕈᒪᔾᔪᑎᓂᒃ.

ᐊᖏᕐᑕᐅᒃᐸᑦ, ᑲᒻᐸᓂᐅᔪᖅ ᐃᓱᒪᖕᒪᑦ ᐊᖏᒡᓕᒋᐊᖅᑎᑦᑎᓂᖅ 127-ᓂ ᐃᖅᑲᓇᐃᔮᒃᓴᓂᒃ ᓴᖅᑭᑎᑦᑎᔾᔪᑎᐅᓇᔭᕐᓂᖓᓂ ᓄᓇᓕᖕᓄᑦ. ᐃᓄᐊᓗᒃ-ᑯᓄᒃ ᐅᖃᓚᐅᕐᑐᖅ ᑕᑯᔪᒪᓂᕋᖅᖢᓂ ᐊᖏᒡᓕᒋᐊᖅᑎᑦᑎᓂᖅ ᓱᒃᑲᐃᑦᑐᒥᒃ ᐊᒻᒪ ᐅᔾᔨᕈᓱᑦᑎᐊᕐᓂᒃᑯᑦ ᐱᓕᕆᐊᖑᓗᓂ ᑕᐃᒪᓐᓇ ᓄᓇᒥᒃ ᐊᒻᒪ ᓂᕐᔪᑎᓄᑦ ᓈᒻᒪᙱᓕᐅᕈᑎᓂᒃ ᐱᑕᖃᓗᐊᔾᔮᙱᒻᒪᑦ.

“ᐅᓇ ᐅᔭᕋᒃᓯᐅᖅᕕᒃ ᐱᕈᕐᑐᖅ ᑕᑯᔪᒪᔭᕋ, ᑭᓯᐊᓂ ᓱᒃᑲᓗᐊᖅᑐᐊᓗᖕᒥ ᐱᕈᖁᙱᑕᕋ ᐱᐅᔪᓐᓃᕈᑎᒋᓗᑎᒍ ᐊᒻᒪ ᓄᓇᑦᑎᓐᓄ ᓄᓇᒧᓪᓗ ᓂᕐᔪᑎᓄᓪᓗ,” ᐃᓄᐊᓗᒃ-ᑯᓄᒃ ᐅᖃᕐᑐᖅ.

ᐅᖃᓚᐅᕐᑐᖅ ᐃᓅᓱᒃᑐᓂᒃ ᓄᓇᓕᖕᓃᑦᑐᓂᒃ ᐃᖅᑲᓇᐃᔮᖅᑖᕈᓐᓇᖁᔨᓪᓗᓂ ᐊᒻᒪᓗ ᐊᖑᓇᓱᒍᑎᑖᕈᓐᓇᕐᓯᓗᑎᒃ, ᐊᒻᒪᓗ ᐅᐱᒍᓱᖕᓂᕋᖅᖢᓂ ᒫᓐᓇ ᐅᔭᕋᒃᓯᐅᖅᕕᒃᒥ ᐃᖅᑲᓇᐃᔭᓕᖅᑐᓂᒃ.

“ᐃᕐᖑᑕᒃᑲ ᐊᒻᒪ ᐃᓗᓕᒃᑲ ᓄᓇᖃᖁᒐᒃᑭ ᐊᒻᒪ ᐊᖑᓇᓱᒃᐸᒡᓗᑎᒃ ᐊᒻᒪ ᐊᔪᕈᓐᓃᕐᓴᕐᑎᓪᓗᒋ ᐃᓕᖅᑯᓯᑦᑎᓐᓂᒃ,” ᐅᖃᕐᑐᖅ.

“ᑭᓯᐊᓂᓕ ᐃᓕᖅᑯᓯᕗᑦ ᐱᑕᖃᖁᒍᑦᑎᒍᑦ ᑕᐃᒪᓕ ᐱᕙᓪᓕᐊᔪᓂᒃ ᐱᑕᖃᕆᐊᖃᕐᒥ ᓄᓇᓕᕗᑦ ᐱᕈᕈᓐᓇᕐᓂᐊᕐᒪᑕ ᐊᒻᒪ ᓂᐅᕕᕈᓐᓇᓕᕐᓗᑕ ᐊᐅᓪᓚᕈᑎᒋᓇᔭᖅᑕᑦᑎᓐᓂᒃ.”

ᐅᒃᐱᕈᓱᒍᓃᕐᓯᒪᓂᖅ ᐃᓚᖏᑦ ᐃᓄᐃᑦ ᐊᒻᒪ ᑲᒻᐸᓂᐅᔪᑦ ᐱᒋᐊᕈᑎᖃᕐᑐᑦ ᑎᓯᐱᕆ 2012-ᒥ, ᐅᑯᐊ ᐹᕙᓐᓛᓐᑯ ᐱᓕᕆᐊᒃᓴᒧᑦ ᓇᓗᓇᐃᒃᑯᑎᑖᖅᑎᓪᓗᒋᑦ ᐅᒥᐊᕐᔪᐊᒃᑯᑦ 18 ᒥᓕᐊᓐ ᑕᓐᔅᓂ ᓴᕕᕋᔭᒃᓴᓂᒃ ᐊᕐᕌᒍᒧ ᐅᕘᓇ ᐃᒃᐱᑭᑦᑐᕐᔪᐊᒃᑯᑦ ᐊᒻᒧ ᓴᓇᓗᑎᒃ 149 ᑭᓛᒥᑕ ᑕᑭᓂᓕᖕᒥᑦ ᓄᓇᓯᐅᑎᑯᑖᒧᑦ ᐊᖅᑯᑎᒃᓴᒥ ᐊᑦᑕᑕᕈᑎᐅᓂᐊᕐᑐᒥᓐ ᑐᓚᒃᑕᕐᕕᒃᒥ ᐅᔭᕋᒃᓯᐅᖅᕕᒃᒧᑦ, ᐅᖃᓚᐅᕐᑐᖅ ᐃᓄᐊᓗᒃ-ᑯᓄᒃ.

ᑕᖅᑭ ᐊᓂᒍᕐᑎᓪᓗᒍ ᑖᒃᑯᐊ ᑲᒻᐸᓂᒃᑯᑦ ᐅᖃᓚᐅᕐᑐᑦ ᐊᑭᓕᕈᓐᓇᕋᔭᙱᓐᓂᖏᓐᓂᒃ ᐊᖅᑯᑎᐅᓂᐊᕐᑐᖅ ᑭᓯᐊᓂᓕ ᓄᓇᓯᐅᑎᒃᑯᑦ ᐅᓯᔭᕆᐊᖃᕐᓂᐊᖅᖢᑎᒃ 3.5 ᒥᓕᐊᓐ ᑕᓐᔅ ᓴᕕᕋᔭᒃᓴᓂᒃ ᓄᓘᔮᑦ ᕿᙳᐊᓄᑦ.

“ᐃᓐᓇᑐᖃᐃᑦ ᐊᒻᒪᓗ ᐃᓄᐃᑦ ᒥᑦᑎᒪᑕᓕᒃᒥ ᐅᖃᓚᐅᕐᑐᑦ,: ‘ᐄ, ᐊᑏ ᐱᓕᕆᐊᕆᑐᐃᓐᓇᕐᓗᒍ’ [ᐆᒥᖓ ᐃᒃᐱᑭᑦᑐᕐᔪᐊᕐᒧᑦ ᐸᕐᓇᐅᑎᓂᒃ],” ᐃᓄᐊᓗᒃ-ᑯᓄᒃ ᐅᖃᕐᑐᖅ.

“ᑭᓯᐊᓂᓕ ᑲᒻᐸᓂᐅᔪᖅ ᐊᓯᙳᖅᖢᓂ ᐊᒻᒪᓗ ᐹᕙᓐᓛᓐᑯᑦ ᐅᕙᑦᑎᓐᓂ ᐱᕋᔭᒃᓯᖅᑰᔨᓪᓗᑎᒃ.”

ᐹᕙᓐᓛᓐᑯᑦ ᐅᖃᓪᓚᒃᑎᖓ ᐲᑕ ᐋᒃᒪᓐ ᓇᓗᓇᐃᓚᐅᕐᑐᖅ ᑲᒻᐸᓂᒃᑯᑦ ᓱᓕ ᐊᐅᓪᓚᖅᑎᑦᑎᓂᐊᕈᒪᓪᓗᑎᒃ 30 ᒥᓕᐊᓐ ᑕᓐᔅ ᓴᕕᕋᔭᒃᓴᓂᒃ ᐊᕐᕌᒍᑕᒫᓐ — ᐅᓇ 12 ᒥᓕᐊᓐ ᐊᐅᓪᓚᖅᑎᑦᑐᒪᔭᖓ ᓄᓘᔮᑦ ᑭᙳᐊᒍᑦ ᐊᒻᒪᓗ 18 ᐊᖏᖅᑕᐅᓯᒫᓂᒃᑐᓂᒃ ᐃᒃᐱᑭᑦᑐᕐᔪᐊᕐᒥᓐ.

ᑭᓯᐊᓂᓕ ᕚᓐᑐᓪᒧ ᐊᖏᕐᑕᐅᙱᑉᐸᑦ ᐊᖏᒡᓕᒋᐊᖅᑎᑦᑎᔪᒪᔾᔪᑎ, ᑲᒻᐸᓂᐅᔪᖅ ᖃᐅᔨᓇᓱᒃᑲᓐᓂᕆᐊᖃᕐᓂᐊᖅᑐᑦ ᓯᕗᓂᒃᓴᕆᓂᐊᖅᑕᖏᓐᓂᒃ ᓄᓇᕗᒥᑦ.

ᑲᐅᔾᔭᒃ ᖁᒪᖔᐱᒃ, ᐃᓐᓇᑐᖃ, ᐊᓈᓇᐅᔪᖅ ᐊᒻᒪ ᑲᑎᒪᔨᐅᖃᑕᐅᔪᖅ ᒥᑦᑎᒪᑕᓕᒃᒥᑦ ᐊᖑᓇᓱᒃᑐᓕᕆᔨᓄᑦ ᐅᖃᓚᐅᕐᑐᖅ ᑕᑯᔪᒪᓂᕋᖅᖢᓂ ᐹᕙᓐᓛᓐ ᐅᑎᕐᓗᓂ ᐃᒃᐱᑭᑦᑐᕐᔪᐊᖅᒧᑦ ᑐᒃᓯᕋᐅᑎᖏᓐᓂᒃ, ᓲᖃᐃᒻᒪ ᓄᓘᔮᑦ ᕿᙳᐊ ᐅᔭᕋᒃᓯᐅᕐᕕᒃᒧᑦ ᒪᑐᐃᖓᔭᕆᐊᖃᙱᒻᒪᓐ.

“ᓄᓘᔮᑦ ᕿᙳᐊᑦ ᐅᒥᐊᕐᔪᐊᓂ ᑎᑭᕝᕕᐅᖃᑦᑕᖁᙱᑕᕋ ᓲᖃᐃᒻᒪ ᕿᓚᓗᒐᐃᑦ ᑑᒑᓖᑦ ᑕᒪᐅᓈᖃᑦᑕᕐᒪᑕ,” ᐅᖃᕐᑐᖅ, ᐅᖃᒃᑲᓐᓂᖅᖢᓂ ᖁᕕᐊᒋᓂᕋᖅᖢᓂᐅᒃ ᑲᑎᒪᔩᑦ ᐃᓱᒪᓕᐊᕆᔭᖏᓐᓂᒃ ᓲᖃᐃᒻᒪ ᐅᑯᐊ ᑲᒻᐸᓂᐅᔪᖅ “ᓱᕋᒃᑎᕆᓗᐊᓕᕐᒪ ᒫᓐᓇ ᓄᓇᒥ.”

ᐹᕙᓐᓛᓐ ᐊᑐᓕᖅᑎᑦᑎᓚᐅᕐᑐᖅ ᖃᐅᔨᓴᕈᑎᓕᕆᓂᕐᒥᒃ ᐊᐅᓚᑕᐅᓪᓗᓂ ᐃᓚᖓᒍᑦ ᐃᓄᖕᓄᑦ ᐊᕙᑎᒋᔭᒥᒃ ᐊᒃᑐᐃᔾᔪᑎᓄᑦ, ᒪᑯᑎᑐᓇᖅ ᑕᕆᐅᕐᒥᐅᑕᓂᒃ ᐊᒻᒪ ᓄᓇᒥ ᐱᓕᕆᔨᐅᔪᓂᒃ. ᓇᓗᓇᐃᕐᓯᓚᐅᕐᓗᑎᒃ ᐊᒻᒪ ᐱᓕᕆᐊᕆᓕᕐᓗᒍ ᐊᒃᑐᐃᔾᔪᑎᐅᑐᐃᓐᓇᕆᐊᓕᖕᓂ ᐅᔭᕋᒃᓯᐅᖅᕕᒃᒧᑦ ᐊᕙᑎᒋᔭᐅᔪᓂᒃ, ᐋᒃᒪᓐ ᐅᖃᕐᑐᖅ.

ᒪᐅᓇᓕ ᕿᓚᓗᒐᐃᑦ ᑐᒑᓖᑦ ᒥᒃᓵᓄᑦ, ᑲᒻᐸᓂᐅᔪᖅ ᓴᖅᑭᑎᑦᑎᓯᒪᓕᕐᑐᖅ ᐊᕐᕌᒍᓂᒃ ᐱᖓᓱᓂ ᑐᒡᓕᕇᓂᒃ ᖃᖓᑕᓲᒃᑯᑦ ᖃᐅᔨᓴᕈᑎᐅᓂᑯᓂᒃ ᒐᕙᒪᑐᖃᒃᑯᓐᓂᒃ ᐱᓕᕆᐊᖑᕙᒃᑐᓂᒃ ᐊᕐᕌᒍ 7 ᐊᓂᒍᕌᖓᑕ, ᐊᒻᒪᓗ ᐋᖅᑭᒃᓯᔪᒪᓪᓗᑎᒃ ᓂᕕᙵᑕᓕᖅᓯᑲᑕᖕᓂᕐᒥᒃ 2022-ᒥ, ᐋᒃᒪᓐ ᐅᖃᕐᑐᖅ.

“ᐊᕙᑎᒋᔭᑦᑎᓐᓂ ᖃᐅᔨᓴᑲᑕᖕᓂᖅ ᓇᓗᓇᐃᕐᓯᔾᔪᑎᐅᔪᖅ ᐊᒃᑐᐃᔾᔪᑎᒋᔭᐅᔪᑦ ᐃᓱᒪᒋᔭᐅᓯᒪᔪᑦ ᓱᓕ ᐃᓗᐊᓃᓐᓂᖏᓐᓂᒃ,” ᐅᖃᕐᑐᖅᓗ

“ᐅᓇ ᑐᑭᖃᙱᑦᑐᖅ ᓄᓇᓕᖕᓄ ᐊᒃᑐᐃᔾᔪᑎᐅᓂᐊᕋᓱᒋᔭᐅᔪᑦ ᓱᓕ ᑕᐃᒪᐃᙱᒻᒪᑕ, ᑭᓯᐊᓂᓕ ᐱᓕᕆᐊᒧᑦ ᑕᒪᓐᓇ ᑕᐃᒪᐃᑎᑕᐅᙱᒻᒪᑦ.ᓄ”