ᐃᓄᐃᑦ ᑲᑐᔾᔨᖃᑎᒌᖑᔪᑦ ᖁᕕᐊᓱᒃᑐᑦ ᐊᒡᓃᑯ ᐄᑯᒧᑦ TMAC-ᒥᑦ ᓂᐅᕕᕐᓂᖏᓐᓂᒃ

“ᐊᒡᓃᑯ ᐄᑯᓪ ᐱᓕᕆᓯᒪᑦᑎᐊᕐᓯᒪᓂᖏᓐᓂᒃ ᖃᐅᔨᒪᔭᐅᖕᒪᑕ ᓄᓇᕗᒥᑦ”

TMAC Resources Inc.’s ᐊᐅᓚᑕᖓᑦ ᐅᕙᓂ ᑐᐊᕆᔅ ᓄᐊᑦ ᐅᔭᕋᒃᓯᐅᕐᕕᒃᒥᑦ 2017 ᐅᑭᐊᒃᓵᖓᓂ. (ᐊᔾᔨᖁᑎᒋᔭᐅᔪᖅ)

By ᔨᒻ ᐱᐊᓪ

For an English version of this story, see Inuit groups say they’re happy about Agnico Eagle’s TMAC purchase

ᒪᕐᕉᒃ ᐊᕕᒃᑐᕐᓯᒪᓂᒃᑯᑦ ᐃᓄᐃᑦ ᑲᑐᔾᔨᖃᑎᒌᖏᑦ ᖁᕕᐊᓱᖕᓂᕋᖅᑐᑦ ᐅᑯᐊ ᐊᒡᓃᑯ ᐄᑯᑯᑦ (Agnic-Eagle) ᓂᐅᕕᖅᐸᓪᓕᐊᓂᖏᓐᓂᒃ TMAC Resources Inc-ᑯᓐᓂᒃ.

TMAC-ᑯᑦ ᐊᐅᓚᑦᑎᔨᐅᔪᑦ ᕼᐆᑉ ᐸᐃᒥ ᒎᓗᒥ ᐅᔭᕋᒃᓯᐅᕐᕕᒃᒥᑦ ᐃᖃᓗᒃᑑᑦᑎᐊᑉ ᓂᒋᖅᐸᓯᐊᑕ ᐅᐊᖕᓇᖓᓂᒃ.

ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᖏᑦ, ᑖᒃᑯᐊ ᕼᐆᑉ ᐸᐃᒥ ᐱᓕᕆᕝᕕᐅᔪᓂᒃ ᓄᓇᓂ ᐊᐅᓚᑦᑎᔨᐅᔪᑦ, ᐅᖃᓚᐅᕐᑐᑦ “ᓂᕆᐅᖕᓂᖃᖅᖢᑎᒃ ᐊᒻᒪ ᐃᑲᔪᖅᑐᐃᓯᒪᓪᓗᑎᒃ.”

“ᐊᒡᓃᑯ ᐄᑯᑯᑦ ᐱᓕᕆᓯᒪᑦᑎᐊᕐᓂᖏᓐᓂᒃ ᖃᐅᔨᒪᔭᐅᖕᒪᑕ ᓄᓇᕗᒥᑦ,” ᐅᖃᖅᑐᖅ ᐊᖓᔪᖅᑳ ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᓄᑦ, ᓯᑖᓐᓕ ᐊᓇᑉᓚᒃ. ᐅᖃᒃᑲᓐᓂᖅᖢᓂ ᖁᕕᐊᓱᖕᓂᕋᖅᖢᓂ ᐅᔭᕋᒃᓯᐅᕐᕕᑐᖃᐅᓕᕐᑐᑦ ᐊᐅᓚᑦᑎᓂᐊᓕᕐᓂᖏᓐᓂᒃ ᕼᐆᑉ ᐸᐃᒥᑦ.

ᑕᒪᐅᓇᑦᑕᐃᓐᓇ ᐅᖃᕆᓪᓗᓂ ᑖᓐᓇ ᐱᓕᕆᐊᒃᓴᖅ ᐊᓂᒍᐃᑦᑎᐊᕐᓂᐊᕐᓗᓂ ᐅᑯᐊ ᐱᓇᓱᒻᒪᕆᒋᐊᖃᕐᓂᖏᓐᓂᒃ ᐃᓄᐃᑦ, ᒐᕙᒪᑐᖃᒃᑯᑦ ᐊᒻᒪᓗ ᐊᒡᓃᑯ ᐄᑯᑯᑦ.

ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᖏᑦ, ᑖᒃᑯᐊ ᑭᒡᒐᖅᑐᐃᔨᐅᔪᑦ ᐃᓄᖕᓂ ᓄᓇᖃᕐᑐᓂᒃ ᑕᓪᓕᒪᓄᑦ ᓄᓇᕗᑦ ᐱᖓᖕᓇᖓᓂᒃ ᓄᓇᓕᖕᓂᒃ, ᑎᒍᒥᐊᕐᓂᖃᕐᒪᑕ ᐃᓚᖓᓂᒃ TMAC-ᑯᓐᓂᒃ ᐊᒻᒪᓗ ᐅᖃᖃᑎᖃᕐᓯᒪᓕᕐᖢᑎᒃ ᒪᑐᒧᖓ ᐃᓄᐃᑦ ᐊᒃᑐᖅᑕᐅᓂᐊᕐᓂᖏᓐᓄᑦ ᐊᒻᒪ ᐃᑲᔫᓯᐊᖅᑖᕈᓐᓇᐅᑎᖏᓐᓄᓪᓗ ᐊᖏᖃᑎᒌᒍᑎᒥᒃ ᑖᒃᑯᓂᖓ ᑲᒻᐸᓂᓂᒃ.

ᐊᓯᐊᒍᑦ ᐅᖃᓪᓚᖕᓂᒃᑯᑦ, ᐅᑯᐊ ᑭᕙᓪᓕᖅ ᐃᓄᐃᑦ ᑲᑐᔾᔨᖃᑎᒌᖏᑦ, ᑖᒃᑯᐊᑦᑕᐅᖅ ᐱᓕᕆᖃᑎᖃᕐᓯᒪᔪᑦ ᐊᒡᓃᑯ ᐄᑯᑯᓐᓂ ᐊᕐᕌᒍᒐᓴᐅᓕᕐᑐᓂᒃ ᑭᕙᓪᓕᐅᑉ ᒪᑐᐹᖕᒃ ᐊᒻᒪ ᒥᓕᐊᑏᓐ ᒎᓗᒥ ᐅᔭᕋᒃᓯᐅᕐᕕᖏᓐᓂᒃ, ᖁᕕᐊᓱᒍᑎᖃᕐᓂᕋᓚᐅᕐᑐᑦ ᑖᒃᑯᓂᖓ.

“ᑭᕙᓪᓕᖅ ᐃᓄᐃᑦ ᑲᑐᔾᔨᖃᑎᒌᖏᑦ ᖃᐅᔨᒪᕗᑦ ᐅᑯᐊ ᐊᒡᓃᑯ ᐄᑯᑯᑦ ᓄᓇᕐᔪᐊᒥ ᒎᓗᒥ ᐅᔭᕋᒃᓯᐅᕐᓂᕐᒧᑦ ᐱᓕᕆᐊᖃᓛᖑᓯᒪᓂᖏᓐᓂᒃ ᐊᒻᒪᓗ ᓂᕆᐅᖕᒪᕆᒃᖢᑕ ᑕᒪᓐᓇ ᖃᓄᖅ ᑐᑭᖃᕐᓂᐊᕐᓂᖓᓂᒃ ᐃᓄᖕᓄᑦ ᓄᓇᕗᒦᑦᑐᓄᑦ ᐱᓗᐊᕐᑐᒥᑦ ᐱᓕᕆᖃᑎᒋᔭᕗᑦ ᕿᑎᕐᒥᐅᓄᑦ,” ᐅᖃᖅᑐᖅ ᑭᕙᓪᓕᖅ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ ᐊᖓᔪᖅᑳᖅ, ᑯᓄ ᑕᑦᑐᐃᓂ. ᑕᕝᕘᓇᓕ ᐊᖏᕈᑎᑎᒍᑦ, ᑐᓴᖅᑎᑦᑎᒍᑎᐅᓚᐅᕐᑐᖅ ᔭᓄᐊᕆ 5-ᒥᑦ, ᐊᒡᓃᑯ ᐄᑯᓪ ᐊᑭᓖᓂᐊᕐᓂᖏᓐᓂᒃ $286 ᒥᓕᐊᓐᑖᓚᓂᒃ ᐅᑯᐊ TMAC-ᑯᑦ ᑎᒍᒥᐊᕈᑎᒋᔭᖏᓐᓂᒃ.

ᐊᒡᓃᑯ ᐄᑯᑯ ᐅᖃᕐᓯᒪᖕᒥᔪᑦ ᐅᑯᐊ TMAC-ᑯᑦ ᐊᑭᓕᒃᓴᑐᖃᖏᓐᓂᒃ ᐊᑭᓖᓂᐊᕐᓂᕋᖅᖢᑎᒃ, ᑖᒃᑯᐊᓗ ᑲᑎᖢᑎᒃ $170 ᒥᓕᐊᓐ ᒥᒃᓵᓃᖢᑎᒃ ᐊᒻᒪᓗ ᐊᑭᓕᕐᓯᒪᔭᕆᐊᖃᓚᐅᖅᖢᑎᒃ ᔪᓚᐃ 1-ᒥᑦ.

ᐅᑯᐊ TMAC-ᐊᒃᓂᑯ ᐄᑯᑯᑦ ᐊᖏᕈᑎᖓᑦ, ᑖᓐᓇᓗ ᐋᓐᑎᐅᕆᐅᒥ ᐃᖅᑲᖅᑐᐃᕕᒡᔪᐊᒃᑰᖅᑎᑕᐅᓂᐊᖅᖢᓂ ᐊᖏᖅᑕᐅᒐᓱᖕᓂᕐᒧᑦ ᔭᓄᐊᕆ 20-ᒥᑦ, ᐊᔪᓕᖅᑕᐅᓯᒪᔪᒥᒃ ᐱᓕᕆᐊᖃᕐᓂᐊᓕᕐᓂᖏᓐᓂᒃ.

ᒪᐃᖑᓚᐅᕐᑐᒥᑦ, ᐅᑯᐊ ᓵᓐᑖᖕ ᒎᓗᒥ ᐅᔭᕋᒃᓯᐅᕐᕕᒃ ᓕᒥᑎᑦᑯᑦ (Shandong Gold Mining Co.), ᓇᖕᒥᓂᕆᔭᐅᔪᑦ ᓴᐃᓇᐅᑉ ᒐᕙᒪᖏᓐᓄᑦ, ᐊᖏᓚᐅᕐᓯᒪᔪᑦ ᓂᐅᕕᕈᒪᓪᓗᑎᒃ TMAC-ᑯᓐᓂᒃ ᒪᐅᓇ “ᐸᕐᓇᐅᑎᑎᒍᑦ ᖃᓄᐃᓕᐅᕈᑎᒃᓴᑎᒍᑦ” ᑖᒃᑯᐊᓗᑦ TMAC-ᑯᑦ ᑎᒍᒥᐊᖅᑎᖏᓐᓄᑦ ᐱᐅᒋᔭᐅᒻᒪᕆᓚᐅᕐᓯᒪᓪᓗᓂ.

ᑭᓯᐊᓂᓕ ᒐᕙᒪᑐᖃᒃᑯᑦ, ᓴᐳᓐᓂᐊᖅᑐᓕᕆᓂᒃᑯᑦ ᕿᒥᕐᕈᐊᓚᐅᕐᖢᑎᒃ, ᑕᒪᑐᒥᖓ ᓵᓐᑖᖕᑯᓐᓂ ᐊᖏᕈᑎᒥ ᓄᖅᑲᖅᑎᑦᑎᓚᐅᕐᓯᒪᔪᑦ ᑎᓯᐱᕆ ᐃᓱᓕᓕᕐᑎᓪᓗᒍ.

ᐋᓐᑎᐅᕆᐅᒥ ᐃᖅᑲᖅᑐᐃᕕᒃᑰᕈᑎᐅᓂᐊᕐᑐᒥ ᑕᒪᑐᒪ ᑕᖅᑭᐅᑉ ᐃᓚᖓᓂᒃ, ᑖᒃᑯᐊᒃ ᒪᕐᕉᒃ ᐃᖅᑲᖅᑐᐃᔨᒥ ᐱᔪᒪᓂᐊᕐᑐᑦ ᓵᓐᑖᖕᑯᓐᓄᑦ ᐊᖏᕈᑎᓕᐊᕕᓂᐅᔪᖅ ᑭᐳᒃᑎᑕᐅᖁᔭᐅᓪᓗᓂ ᐊᒡᓃᑯ ᐄᑯᓐᓄᖕᓅᖓᓕᕐᓗᓂ.

ᐊᒡᓃᑯ ᐄᑯᓪ ᓄᓇᕗᒥᑦ ᐱᓕᕆᓯᒪᓕᕐᒪᑕ 2007-ᒥᑦ ᐱᒋᐊᖅᖢᑎᒃ.

ᐅᓇ ᕼᐆᑉ ᐸᐃᒥ ᒎᓗᓕᕆᕝᕕᐅᔪᖅ ᐊᖏᓂᖃᓪᓗᐊᕐᑐᖅ 80 ᑭᓛᒥᑕᓂᒃ ᑕᑭᓂᖃᖅᖢᓂ ᐊᒻᒪ 20 ᑭᓛᒥᑕᓂᒃ ᓴᓂᒧᑦ. ᒫᓃᖢᓂ ᓄᓇᕗᑦ ᓄᓇᖓᓂ 65 ᑭᓛᒥᑕ ᑲᓇᖕᓇᖓᓂᒃ ᑭᙵᐅᑦ, 150 ᑭᓛᒥᑕ ᓂᒋᐊᑕ ᐱᖓᖕᓇᖅᐸᓯᐊᓂᒃ ᐃᖃᓗᒃᑑᑦᑎᐊᑉ ᐊᒻᒪᓗ 700 ᑭᓛᒥᑕᓂ ᔭᓗᓇᐃ ᐅᐊᖕᓇᖓᑕ ᑲᓇᖕᓇᖅᐸᓯᐊᓂᒃ.

TMAC-ᑯᑦ ᐅᖃᓚᐅᕐᑐᑦ ᑕᒪᓐᓇ ᐱᑕᖃᓪᓗᐊᕐᓂᖓᓂᒃ ᒫᓂ 5.1 ᒥᓕᐊᓐ ᐊᐅᓐᓴᔅᓂᒃ ᒎᓗᒥ, ᐃᓚᖃᒃᑲᓐᓂᖅᖢᓂ 2.1 ᒥᓕᐊᓐ ᐊᐅᓐᓴᔅᓂᒃ ᐊᑦᑎᖕᓂᕐᓴᒦᑦᑐᒥᑦ.

Share This Story

(0) Comments