ᐃᓄᐃᑦ ᐅᓪᓗᖓᓂ ᓄᓇᕐᔪᐊᕐᒥ ᒐᕙᓇ ᔭᓄᕈᓪ ᒥᐊᓕ ᒪᐃ ᓴᐃᒪᓐ ᐅᖃᓚᐅᕐᑐᖅ ᐃᓄᖕᓄᑦ ᑲᔪᓯᖁᓪᓗᓂᒋᑦ ‘ᐱᓇᓱᐊᖅᑕᖏᓐᓂᒃ’ ᐊᓯᙳᖅᑎᑦᑎᓂᒧᑦ ᐊᒻᒪᓗ ᐅᖃᐅᓯᖏᓐᓂᒃ ᐊᑐᒃᑲᓐᓂᕈᓐᓇᕐᓗᑎᒃ ᐊᒻᒪ ᐃᓕᖅᑯᓯᖏᓐᓂᒃ. (ᐊᔾᔨᙳᐊᖅ ᐅᕙᙵᑦ ᕇᑑ ᕼᐋᓪ/ᓵᔾᔭᓐᑦ ᔪᐊᓂ ᒪᕼᐅ)

ᐃᓄᐃᑦ ᑲᔪᓯᔭᕆᐊᖃᖅᑐᑦ ‘ᐱᓇᓱᐊᖅᑕᖏᓐᓂᒃ’ ᒪᑯᓂᖓ ᐊᑐᕈᓐᓇᕐᓯᒃᑲᓐᓂᕐᓗᑎᒃ ᐃᓕᖅᑯᓯᒃᑯᑦ ᐱᒻᒪᕆᐅᒋᔭᖏᓐᓂᒃ ᐊᒻᒪ ᐱᔪᓐᓇᐅᑎᖏᓐᓂᒃ, ᒥᐊᓕ ᒪᐃ ᓴᐃᒪᓐ ᐅᖃᖅᑐᖅ

ᑲᓇᑕᒥ ᓯᕗᓪᓕᖅᐹᖅ ᓄᓇᖃᖅᑳᖅᑐᖅ ᒐᕙᓇ ᔭᓄᕈᓪ ᐊᑐᖅᓯᒪᓂᑯᖏᓐᓄᑦ ᑐᓴᒐᒃᓴᓕᐅᖅᐳᖅ ᓄᓇᕐᔪᐊᒥᑦ ᐃᓄᐃᑦ ᐅᓪᓗᖓᓂ

By ᓄᓇᑦᓯᐊᕐᒥ ᐱᕙᓪᓕᐊᔪᑦ

For an English version of this story, please see Inuit must continue ‘drive’ to reclaim traditional values and rights, Mary May Simon says.

ᐃᓄᐃᑦ ᑲᓇᑕᒥ ᑲᔪᓯᔭᕆᐊᖃᖅᑐᑦ ᐊᓯᙳᖅᑎᑦᑎᓇᓱᖕᓂᕐᒧᑦ ᓈᒻᒪᒃᑐᓄᑦ ᐊᒻᒪᓗ ᐃᓕᖅᑯᓯᖏᑦᑎᒍᑦ ᐱᒻᒪᕆᒋᔭᖏᓐᓂᒃ ᐊᒻᒪ ᐱᔪᓐᓇᐅᑎᖏᓐᓂᒃ, ᐅᖃᖅᑐᖅ ᒐᕙᓇ ᔭᓄᕈᓪ ᒥᐊᓕ ᒪᐃ ᓴᐃᒪᓐ — ᓯᕗᓪᓕᖅᐹᖅ ᓄᓇᖃᖄᖅᑐᖅ ᒐᕙᓇ ᔭᓄᕈᓪ — ᓄᓇᕐᔪᐊᒥ ᐃᓄᐃᑦ ᐅᓪᓗᖓᓂ ᓇᓗᓇᐃᕐᓯᓯᒪᑎᓪᓗᒍ

“ᖁᕕᐊᓇᖅ ᐅᓂᒃᑳᕗᑦ ᑕᑯᔭᐅᓂᕐᓴᐅᕙᓕᕐᒪᑕ ᐊᒻᒪ ᑐᓵᔭᐅᓂᕐᓴᐅᓕᖅᖢᑎᒃ, ᒪᐅᓇᑦ ᑎᑕᐅᓯᕆᓂᒃᑯᑦ, ᑎᑎᕋᐅᔭᒐᖅᑎᒍᑦ, ᐅᖃᓕᒫᒐᖅᑎᒍᑦ, ᖃᐅᔨᓴᕐᓂᒃᑯᑦ, ᐊᕙᑎᒋᔭᒥ ᑲᒪᒋᔭᖃᖅᑎᐅᓂᒃᑯᑦ, ᓄᑖᓪᓗ ᒐᕙᒪᓕᕆᓂᒃᑯᑦ ᐋᖅᑭᒃᓱᖅᑕᐅᓯᒪᔪᓂᒃ ᐊᒻᒪᓗ ᓄᑖᓂ ᐃᓱᒪᖃᓕᕐᓂᕐᒥᒃ ᑲᓇᑕᐅᑉ ᐊᑐᖅᑕᐅᕕᓂᖏᑦᑎᒍᑦ.” ᒥᐊ ᒪᐃ ᓴᐃᒪᓐ ᑎᑎᕋᓚᐅᕐᑐᖅ ᑐᓴᒐᒃᓴᖓᓂᒃ ᓈᑦᑎᖑᔭᐅᑉ ᐅᓪᓛᖓᓂ ᑖᓐᓇ ᐅᓪᓗᖅ ᓇᓗᓇᐃᕐᓯᒪᓇᓱᖢᓂᐅᒃ.

ᓄᓇᕐᔪᐊᕐᒥ ᐃᓄᐃᑦ ᐅᓪᓗᖓ ᐱᒋᐊᖅᑕᐅᓚᐅᕐᓯᒪᔪᖅ 2006ᒥ ᐅᑯᐊ ᐃᓄᐃᑦ ᓄᓇᕐᔪᐊᕐᒧᑦ ᑲᑎᒪᔨᕐᔪᐊᑦ ᐋᖅᑭᒃᓯᑎᓪᓗᒋᑦ ᓄᕕᐱᕆ 7 ᖁᕕᐊᓱᓐᓇᐅᓂᐊᕐᓗᓂ ᐅᑭᐅᕐᑕᖅᑐᕐᒥ ᐃᓄᖕᓂᓪᓗ ᓄᓇᖃᖅᑐᓂᒃ. ᑖᓐᓇ ᐅᓪᓗᖅ ᓂᕈᐊᖅᑕᐅᓚᐅᕐᓯᒪᔪᖅ ᓇᓪᓕᐅᑎᕝᕕᐅᓂᖓᓂᒃ ᐆᒧᖓ ᐄᐸᓐ ᕼᐋᑉᓴᓐ ᐊᖏᔪᒃᖠᖅ, ᐅᑭᐅᕐᑕᖅᑐᕐᒥ ᒪᓕᒐᓕᕆᔨᐅᕙᒃᑐᖅ ᐊᒻᒪᓗ ᐱᒋᐊᖅᑎᑦᑎᓂᑰᓪᓗᓂ ᐃᓄᐃᑦ ᓄᓇᕐᔪᐊᕐᒧᑦ ᑲᑎᒪᔨᕐᔪᓂᒃ (ICC), ᑖᒃᑯᐊ ᓴᖅᑭᔮᒐᖓ ᐅᖃᖅᓯᒪᔪᖅ.

ᒪᐃ ᓴᐃᒪᓐ, ᒐᕙᓇ ᔭᓄᕈᙳᓚᐅᕐᑐᖅ ᐊᐅᔭᖅ, ᐃᖅᑲᓇᐃᒪᔭᖏᓐᓂᒃ ᐊᑐᖅᖢᓂ ᐱᕈᖅᓴᖅᑎᓪᓗᒍ ᓄᓇᕕᒻᒥ ᑖᔅᓱᒥᖓ ᐅᓪᓗᕐᒥᒃ ᐃᖅᑲᐅᒪᔾᔪᑎᖃᓚᐅᕐᑐᖅ ᓄᓇᕐᔪᐊᕐᒥ ᐃᓄᐃᑦ ᐅᓪᓗᖓᓂᒃ.

ᑐᓴᒐᒃᓴᖏᑦ ᓴᖅᑭᑕᐅᓚᐅᕐᑐᑦ ᐅᕇᑑᓪ ᕼᐋᒥ, ᒐᕙᓇ ᔭᓄᕈᒧᑦ ᐊᖏᕐᕋᕆᔭᐅᔪᖅ, ᒪᐃ ᓴᐃᒪᓐ ᐅᖃᓚᐅᕐᑐᖅ ᐅᓂᒃᑳᖏᑦ ᓇᖕᒥᓂᖅ ᐊᑐᓚᐅᕐᓯᒪᔭᖏᑦ “ᑭᓴᖅᓯᒪᖕᒪᑕ” ᐅᖃᐅᓯᖓᓂ ᐊᓐᓂᕈᓱᖕᓂᖓᓄᑦ, ᐃᓄᒃᑎᑐᑦ, ᐊᒻᒪᓗ ᐃᓄᐃᑦ ᐃᓕᖅᑯᓯᖏᓐᓂᒃ. ᐅᖃᐅᓯᖃᓚᐅᕐᑐᖅ ᓄᓇᐃᓐᓇᕐᒥᒃ ᐊᐅᓪᓚᕐᓯᒪᕙᖕᓂᕐᒥᒃ, ᐊᖓᓇᓱᖃᑦᑕᕐᓂᕐᒥᒃ, ᐃᖃᓗᒐᓱᖃᑦᑕᕐᓂᕐᒥᒃ ᐊᒻᒪᓗ ᑲᑎᕐᓱᐃᖃᑦᑕᕐᓂᕐᒥᒃ ᓂᕿᓂᒃ “ᑐᙵᕕᒐ ᐱᕈᖅᐸᓪᓕᐊᓕᖅᑎᓪᓗᖓ.”

“ᖁᕕᐊᒋᓛᕆᓚᐅᕐᓯᒪᔭᕋᑦ ᑐᐱᑦᑎᓐᓃᖢᑕ ᔪᐊᔾ ᑰᒃ, ᐃᒡᓕᕐᒥ ᑐᒃᑑᑉ ᐊᒥᐊᓂ ᓇᓚᓪᓗᑕ, ᑐᓵᓪᓗᑕ ᑎᖕᒥᐊᓂᒃ ᐅᓪᓛᒃᑯᑦ ᐊᒻᒪᓗ ᕿᒻᒦᑦ ᓂᓪᓕᐊᑲᑕᒃᑐᑦ ᐊᐳᑎᒥ ᖃᓄᐃᓕᐅᕈᓘᔭᕐᖢᑎᒃ,” ᑎᑎᕋᖅᑐᖅ.

ᑭᓯᐊᓂᑦᑕᐅᖅ “ᐱᒻᒪᕆᖕᓂ ᐱᑕᖃᖃᑦᑕᓚᐅᕐᒥᔪᖅ” ᐃᓄᐃᑦ ᐊᑐᖅᐸᓪᓕᐊᔭᖏᑦᑎᒍᑦ ᐃᓅᓯᖓᓄᑦᑕᐅᖅ ᐋᖅᑭᒃᓱᐃᔾᔪᑎᐅᖕᒥᔪᓂᒃ, ᐆᒥᖓ ᐃᓄᐃᑦ ᐃᓄᒋᐊᓃᑎᑕᐅᓕᖃᑦᑕᓕᕐᓂᖏᑦ ᐊᒃᑐᐃᓯᒪᓂᖓᓂᒃ ᐃᓄᒃᑎᑐ ᐅᖃᐅᓯᕐᒥᒃ ᐊᒻᒪᓗ ᐃᓄᐃᑦ ᐃᓕᖅᑯᓯᖏᓐᓂᒃ, ᑎᑎᕋᖅᑐᖅ.

ᐃᓄᐃᑦ ᓴᙱᒃᑎᓯᒪᖕᒪᑕ ᖁᕕᐊᓇᑲᑕᙱᓗᐊᖅᑐᓄᑦ ᓵᙵᔭᖏᓐᓄᑦ.

“ᐱᓕᕆᐊᖃᕐᓯᒪᒐᑦᑕ ᑐᑭᓯᑎᑦᑎᒃᑲᓐᓂᕋᓱᖕᓂᕐᒥᒃ ᐊᒻᒪ ᒪᒥᓴᕋᓱᖕᓂᕐᒥᒃ, ᖃᐅᔨᒪᒐᑦᑕ ᓄᖅᑲᖓᑐᐃᓐᓇᕆᐊᖃᙱᓐᓇᑦᑕ ᓈᒻᒪᒃᑐᒧᑦ ᐊᓯᙳᖅᑎᑦᑎᓇᓱᖕᓂᕐᒧᑦ ᐊᒻᒪᓗ ᐅᑎᖅᑎᑦᑕᕆᐊᖃᖅᖢᑎᒍᑦ ᐃᓕᖅᑯᓯᒃᑯᑦ ᐱᒻᒪᕆᒋᔭᕗᑦ ᐊᒻᒪ ᐱᔪᓐᓇᐅᑎᕗᑦ,” ᒪᐃ ᓴᐃᒪᓐ ᑎᑎᕋᓚᐅᕐᑐᖅ.

ᓄᓇᕐᔪᐊᒥ ᐃᓄᐃᑦ ᐅᓪᓗᖓᓂ, ᒪᐃ ᓴᐃᒪᓐ ᐅᐸᒍᑎᓕᒑᓚᐅᕐᑐᖅ ᐋᑐᕚᒥ ᖁᕕᐊᓲᑎᒋᔭᐅᔪᒥᑦ ᒥᕐᖑᐃᕐᓯᕕᒃ ᐊᑦᑎᖅᑕᐅᓂᐊᖅᑎᓪᓗᒍ ᑎᑎᕋᐅᔭᒐᖅᑎᐅᓚᐅᕐᓯᒪᔪᒧᑦ ᐋᓂ ᐳᑐᒍᕐᒥ, ᑖᓐᓇ ᐋᑐᕚᒥ ᐃᓅᔪᓐᓃᓚᐅᕐᓯᒪᔪᖅ 2016-ᒥ.

Share This Story

(0) Comments

Join the Conversation

Your email address will not be published. Required fields are marked *

*