ᐃᓕᓐᓂᐊᕐᓂᕐᒧᑦ ᖃᐅᔨᒋᐊᕐᕕᒃ ᐊᒻᒪ ᐃᓕᓴᐃᔨ ᒥᐊᓕ ᑰᓕ-ᓴᓪᓗᕕᓂᒃ ᐃᓄᒃᑎᑐᑦ ᐃᓕᓐᓂᐊᕈᑎᒃᓴᓂᒃ ᒪᓂᒻᒪᐃᓯᒪᖕᒪᑦ ᑕᐃᒪᙵᓂᒃ ᔭᓄᐊᕆᐅᓚᐅᕐᑐᒥᓐ. ᐅᖃᓚᐅᕐᑐᖅ “ᐱᓕᕆᔪᒪᓪᓚᕆᒃᑐᓂᒃ” ᐃᓕᓐᓂᐊᕐᑎᓂᒃ ᓄᐊᑦ ᐊᒥᐊᓕᑲᒥᙶᖅᑐᓂᒃ ᐃᓕᓐᓂᐊᕈᒪᔪᓂᒃ ᐅᖃᐅᓯᕐᒥᒃ. (ᐊᔾᔨᙳᐊᖅ ᐅᕙᙵᑦ ᒥᐊᓕ ᑰᓕ-ᓴᓪᓗᕕᓂᒃ)

ᐃᓄᒃᑎᑐᑦ ᐊᔪᕈᓐᓃᕐᓴᕐᓂᒃ ᑲᑎᖃᑎᒌᕈᓘᔭᕐᓇᕐᑐᖅ, ᐅᖃᖅᑐᖅ ᐃᓕᓴᐃᔨ

ᒥᐊᓕ ᑰᓕ-ᓴᓪᓗᕕᓂᒃ ᖃᐅᔨᔪᖅ ”ᐱᓕᕆᔪᒪᓪᓚᕆᒃᑐᓂᒃ” ᐃᓄᒃᑎᑐᑦ ᐊᔪᕈᓐᓃᕐᓴᕈᒪᓂᕐᒥᒃ ᖃᕋᓴᐅᔭᒃᑯᑦ

By ᒫᑕᓕᓐ ᕼᐊᐅᕕᑦ

For an English version of this story, please see Learning Inuktitut fosters connections, says teacher.

ᒥᐊᓕ ᑰᓕ-ᓴᓪᓗᕕᓂᒃ ᐃᓄᒃᑎᑐᑦ ᐃᓕᓴᐃᓕᕌᖓᒥ ᐃᓕᓐᓂᐊᕐᑎᖏᓐᓄᑦ ᖃᕋᓴᐅᔭᒃᑯᑦ, ᐅᔾᔨᕈᓱᒃᑎᑦᑎᕙᒃᑐᖅ ᐅᖃᐅᓯᐅᑉ ᐅᖃᖅᑕᐅᔾᔪᓯᖓᓂᒃ ᐊᒻᒪ ᖃᓄᖅ ᓂᐱᖏᓐᓂᒃ..

ᐅᓇ ᐱᒻᒪᕆᐅᓗᐊᕐᑐ ᓲᖃᐃᒻᒪ ᐃᓕᓴᐃᖃᑦᑕᕐᒪᑦ ᓄᓇᒥ ᑕᐃᔭᐅᑦᑎᐊᕈᓐᓇᖅᐸᙱᑦᑐᒥᒃ.

“ᖃᐅᔨᒪᙱᑦᑐᖓ ᖃᔅᓯᑦ ᐃᓄᐃᑦ ᐅᖃᑦᑎᐊᕈᓐᓇᙱᓐᒪᑕ ᐆᒥᖓ ‘ᐃᖃᓗᐃᑦ’ ᑖᓐᓇᓗ ᓄᓇᕗᑦ ᐊᖓᔪᖅᑳᖃᕐᕕᒋᓪᓗᓂᐅᒃ ᑲᓇᑕᒥ,” ᐅᖃᕐᑐᖅ ᑰᓕ-ᓴᓪᓗᕕᓂᒃ, ᐃᓕᓴᐃᔨᐅᓚᐅᕐᓯᒪᔪᖅ ᑭᓯᐊᓂ ᐊᐅᓚᑦᑎᔨᐅᓕᕐᑐᖅ ‘ᐊᓪᓗᕐᕕᒃ’, ᐃᓕᓐᓂᐊᖅᑐᓕᕆᓂᕐᒧᑦ ᐊᒻᒪ ᑭᐱᙳᐃᔭᐅᑎᓕᓂᕐᒧᑦ ᖃᐅᔨᒋᐊᕐᕕᐅᓪᓗᓂ ᐱᓕᕆᐊᖑᔪᖅ ᓄᓇᓕᐸᐅᔭᓂᒃ.

ᐅᖃᓚᐅᕐᑐᖅ ᐅᓄᕐᑐᑦ ᐃᓄᐃᑦ ᐅᖃᑦᑎᐊᕈᓐᓇᙱᓐᓂᕋᖅᖢᓂᒋ ᐆᒥᖓ ‘ᐃᖃᓗᐃᑦ’ ᐅᖃᖅᐸᒃᖢᒍ ‘ᑲ’-ᓚᓪᓗᒍ ᑭᓯᐊᓂᓕ ᐃᒪᓐᓇ ᐅᖃᖅᑕᐅᔭᕆᐊᖃᕐᑎᓪᓗᒍ ‘ᖃ’.

“ᖃᐅᔨᔪᒪᑐᐃᓐᓇᕐᑐᖓᓕ ᖃᔅᓯ ᐃᓄᐃᑦ ᑕᐃᒎᓯᓪᓚᕆᐊᓂᒃ ᐅᖃᕋᓱᖃᑦᑕᕆᐊᒃᓴᖏᓐᓂᒃ ᐆᒪ ‘ᐃᖃᓗᐃᑦ’ ᐊᒻᒪᓗ ᖃᓄᐃᒻᒪ ᓴᐱᓕᕇᖃᑦᑕᕆᐊᒃᓴᖏᓐᓂᒃ,” ᐅᖃᕐᑐᖅ.

“ᐃᓄᐃᑦ ᐅᖃᕋᓱᒃᑐᓂᒃ ᑐᓴᕌᖓᒥᒃ, ᑕᐃᒪᓕ ᐅᖃᑐᐃᓐᓇᖃᑦᑕᕐᒪᑕ … ᐊᒃᓱᓪᓘᓐᓃᑦ ᐅᖃᕋᓱᒃᖢᓂ.”

ᐅᓇ ᐅᖃᐅᓯᕐᒥ ᖃᐅᔨᑎᑦᑎᔪᒪᓂᖓ “ᐱᐅᔪᐊᓗᖕᒥ” ᐱᕈᖅᐸᓪᓕᐊᓪᓗᓂ ᐊᑐᓚᐅᓯᒪᔭᖓ ᐊᖏᕐᕋᖓᓂ ᐱᔾᔪᑎᒋᖃᓯᐅᑎᔭᖓ ᐆᒪ ᑰᓕ-ᓴᓪᓗᕕᓂᐅᑉ ᐃᓄᒃᑎᑐᑦ ᐃᓕᓐᓂᐊᖅᑎᑦᑎᓕᓚᐅᕐᓂᖓᓂᒃ ᖃᕋᓴᐅᔭᒃᑯᑦ ᔭᓄᐊᕆᐅᑎᓪᓗᒍ.

“ᖃᐅᔨᓚᐅᕋᒪ ᐃᓕᓐᓂᐊᕐᓂᖅᑕᖃᕆᐊᖃᕐᓂᖓᓂᒃ ᖃᕋᓴᐅᔭᒃᑯᑦ,” ᐅᖃᓚᐅᕐᑐᖅ ᓴᖅᑭᔮᕈᓐᓇᖅᑐᒃᑯᑦ ᐃᓕᓐᓂᐊᕈᑎᒋᖃᑦᑕᖅᑕᖓᓂᒃ.

“ᐅᓇ ᐱᓕᕆᐊᒃᓴᐅᔪᒥᓇᑦᑎᐊᕐᑐᖅ ᐃᓗᐊᕐᑐᒥ ᐃᓄᖕᓄᑦ ᑕᒪᑐᒥᖓ ᐊᑐᐃᓐᓇᖃᙱᑦᑐᓂᒃ ᓄᓇᖏᓐᓂᒃ.” ᑰᓕ-ᓴᓪᓗᕕᓂᒃ ᐱᓕᕆᐊᖃᖂᔨᓚᐅᕐᑐᖅ ᓈᒻᒪᓈᖅᖢᓂ ᖃᕋᓴᐅᔭᒃᑯᑦ ᐅᖃᐅᓯᕐᒥ ᐃᓕᓐᓂᐊᖅᑎᑦᑎᓂᖓᓂᒃ.

ᔭᓄᐊᕆ ᐱᒋᐊᕕᒋᔭᐅᓂᖓᓂᒃ ᐅᑯᓄᖓ UNESCO’s ᓄᓇᕐᔪᐊᕐᒥ ᓄᓇᖃᕐᑳᖅᑐᑦ ᐅᖃᐅᓯᖏᓐᓂᒃ ᓴᖅᑭᑎᑦᑎᒃᑲᓐᓂᕋᓱᖕᓂᕐᒥᒃ ᐊᒻᒪᓗ ᐃᓕᓐᓂᐊᖅᑎᑦᑎᔾᔪᑎᓕᕆᓂᕐᒥᒃ ᐅᖃᐅᓯᑐᖃᙱᓐᓂᒃ ᐱᒋᐊᖅᑎᑦᒃᑎᔪᒪᓂᕐᒥᒃ.

ᒫᓐᓇᒧᓪᓕ, ᐃᓕᓐᓂᐊᖅᑎᑦᑎᓯᒪᔪᖅ ᐃᓕᓐᓂᐊᕐᑐᓂᒃ ᐅᑯᓇᙶᖅᑐᓂᒃ ᒥᐊᓕᒐᕐᒥ, ᐊᓛᔅᑲ ᐊᒻᒪ ᑲᓇᑕᒥᙶᖅᑐᓂᒃ ᓇᑭᑐᐃᓐᓇ. ᐅᖃᓚᐅᕐᑐᖅ ᐅᔾᔨᕆᓂᕋᖅᖢᓂ “ᐱᓕᕆᔪᒪᓪᓚᕆᒃᑐᓂᒃ” ᐃᓕᓐᓂᐊᕐᑐᓂᒃ ᐱᓗᐊᕐᑐᒥᒃ ᑲᓇᑕᐅᑉ ᓂᒋᐊᓂᙶᖅᑐᓂᒃ ᐊᒻᒪᓗ ᐃᓄᖕᓂᑦ ᓄᓇᕗᒥᐅᑕᓂᒃ ᐊᔪᕈᓐᓃᒃᑲᓐᓂᕈᒪᔪᓂᒃ ᐅᖃᐅᓯᕐᒥᒃ.

“ᐃᓕᓐᓂᐊᕐᑎᖃᑦᑕᖅᑕᒃᑯ ᐃᖅᑲᓇᐃᔭᖅᑎᐅᔪᑦ ᐊᔾᔨᒌᙱᑦᑑᑎᓂᒃ ᓄᓇᕗᒥᑦ, ᑕᐃᒪᓕ ᐅᓄᕈᓘᔭᕐᑐᑦ ᑐᑭᓯᕚᓪᓕᕋᓱᒃᖢᑎᒃ ᐅᖃᐅᓯᕐᒥᒃ ᐊᒻᒪᓗ ᐃᓅᖃᑎᖏᓐᓂᒃ ᐅᖃᖃᑎᖃᕈᓐᓇᕐᓂᖅᓴᐅᔪᒪᓪᓗᑎᒃ,” ᐅᖃᕐᑐᖅ.

ᖃᐅᔨᓚᐅᕐᒥᔪᖅ ᐃᓄᖕᓂᒃ ᐃᓄᒃᑎᑐᑦ ᐅᖃᓪᓚᒍᓐᓇᕐᓂᕐᓴᐅᓕᕈᒪᔪᓂᒃ. “ᐃᓄᒃᑕᖃᐅᕐᒪᑦ, ᐃᓚᒌᑦ ᓱᕈᓯᖃᖅᖢᑎᒃ ᐊᒻᒪᓗ ᐅᖃᐅᓯᖏᓐᓂᒃ ᐊᑐᕈᓐᓃᕐᓯᒪᓪᓗᑎᒃ ᐊᒻᒪᓗ ᐅᖃᓪᓚᒍᓐᓇᕐᓯᒃᑲᓐᓂᕈᒪᓪᓗᑎᒃ.”

ᐅᖃᓚᐅᕐᑐᖅ ᐃᓚᖓᒍ ᑐᕋᒐᖃᕐᓂᕋᖅᖢᓂ ᐃᓄᒃᑎᑐᑦ ᐃᓕᓐᓂᐊᖅᑎᑦᑎᓛᕈᒪᓪᓗᓂ ᐃᓄᖕᓂ ᐊᑭᖃᙱᓪᓗᓂ ᐊᒻᒪᓗ ᑕᐅᑐᒃᖢᓂᐅᒃ ᐃᓕᓴᐃᓂᖅ ᓄᓇᖃᖅᑳᖅᑐᑦ ᐅᖃᐅᓯᖓᓂᒃ “ᓯᕗᒧᑦ ᐱᒋᐊᓕᓵᕈᑎᐅᓂᖓᓂᒃ” ᒪᐅᖓ ᐃᓕᖅᑯᓯᕐᒧᑦ ᐊᒃᑐᐊᓂᖃᓕᕐᓂᖅ.

“ᐊᒻᒪᓗ ᐅᓄᕈᓘᔭᕐᒥᖕᒪᑕ ᐃᓄᒃᑎᑐᑦ ᐃᓕᓐᓂᐊᕈᒪᔪᑦ ᓲᖃᐃᒻᒪ ᐅᖃᐅᓯᕐᒥ ᐊᔪᕈᓐᓃᕈᒪᖕᒪᑕ ᐅᕝᕙᓘᓐᓃᑦ ᖁᕕᐊᓇᕈᒥᓇᕐᒪᑕ ᐅᕝᕙᓗᑭᐊᖅ ᐅᖃᐅᓯᕈᓘᔭᕐᓂ ᐃᓕᓐᓂᐊᕈᒪᖕᒪᑕ ᐊᒻᒪᓗ ᖁᕕᐊᒋᕈᓘᔭᕐᖢᓂᔾᔪᒃ,” ᐅᖃᒃᑲᓐᓂᕐᑐᖅ.

“ᑰᓕ-ᓴᓪᓗᕕᓂᒃ ᐃᓕᓐᓂᐊᖅᑎᑦᑎᕙᒃᑐᖅ ᐊᖅᑭᒃᓯᒪᓪᓗᓂᒋᑦ ᒪᐅᓇ ᐅᖃᖅᑕᐅᔾᔪᑎᓕᕆᓂᕐᒥᒃ, ᐅᖃᓪᓚᖕᓂᒃᑯᑦ ᐃᓕᓐᓂᐊᖅᑎᑦᑎᓪᓗᓂ ᐊᒻᒪᓗ ᐅᖃᓪᓚᖃᑎᖃᑲᑕᖕᓂᒃᑯᑦ ᐊᔪᕈᓐᓃᖅᓴᖅᑎᑦᑎᕙᒃᖢᓂ, ᐃᓛᓐᓂᓪᓗ ᐃᓐᓇᑐᖃᕐᒥᒃ ᐃᓚᐅᑎᑦᑎᕙᒃᖢᓂ ᑖᒃᑯᐊ ᐃᓕᓐᓂᐊᕐᑐᖅ ᐊᔪᕈᓐᓃᕐᓴᕈᓐᓇᕐᓂᐊᕐᒪᑕ ᐃᓕᓐᓂᐊᓵᖅᑕᖏᓐᓂᒃ.”

ᐅᖃᓚᐅᕐᑐᖅ ᐃᓕᓐᓂᐊᕐᑎᑕᖏ ᐃᓕᓐᓂᐊᕐᓯᒪᓂᖏᑦ ᐃᓄᒃᑎᑐᑦ ᓇᓕᒧᒌᙱᑦᑑᑎᐅᓚᐅᕐᑐᑦ ᐃᓚᐅᓕᕐᑎᓪᓗᒋᑦ ᑕᐃᒪᓕ ᖃᕋᓴᐅᔭᒃᑯᑦ ᐃᓕᓐᓂᐊᕐᑎᓂᒃ ᐊᐱᖅᓱᖅᑎᑦᑎᖃᑦᑕᕐᑐᖅ ᐃᓕᓐᓂᐊᕐᓂᖏᓐᓂᒃ ᐊᒻᒪᓗ ᐅᖃᓪᓚᑲᑕᒃᑎᖢᓂᒋᑦ ᐅᖃᕈᓐᓇᕐᓂᖏᑦᑎᒍᑦ.

“ᐃᓕᓐᓂᐊᕐᑎᑦᑎᓕᕌᖓᒪ ᐊᔾᔨᒌᒃᑎᑦᑎᑦᑕᐃᓕᖃᑦᑕᕋᒪ ᐃᓚᖓᒍᑦ,” ᐅᖃᕐᑐᖅ, ᐅᖃᒃᑲᓐᓂᖅᖢᓂ ᐃᓕᓐᓂᐊᖅᑎᑦᑎᒃᑲᓐᓂᓛᕈᒪᓪᓗᓂ ᓄᑖᓂᒃ ᐄᐳᕈᓪ ᕿᑎᐊᓂ.

ᐅᖃᖅᖢᓂ ᖃᕋᓴᐅᔭᒃᑯᑦ ᐃᓕᓐᓂᐊᕐᑎᑦᑎᑲᑕᖕᓂᖓ “ᖁᕕᐊᓇᒻᒪᕆᒃᑐᖅ” ᑭᓯᐊᓂᓕ ᖃᐅᔨᒪᓂᕋᕐᑐᖅ ᓄᑖᒥᒃ ᐅᖃᐅᓯᕐᒥᒃ ᐊᔪᕈᓐᓃᕋᓱᒃᖢᓂ ᐊᒃᓱᕈᕈᓘᔭᕐᓇᕐᓂᖓᓂᒃ.

“ᐅᖃᐅᓯᕐᒥ ᐊᕐᕌᒍᒐᓴᖕᓂ ᐊᔪᕈᓐᓃᕐᓴᕐᓇᖅᑐᖅ ᐊᒻᒪᓗ ᐱᓕᕆᑲᑕᐃᓐᓇᕆᐊᖃᕐᓇᖅᖢᓂ ᐊᒻᒪ ᐊᔪᕈᓐᓃᕐᓴᕆᐊᖃᕐᓇᖅᖢᓂ. ᒥᑭᑦᑐᕈᓘᒐᓗᐊᕐᒥ ᖃᕋᓴᐅᔭᒃᑯᑦ ᐊᔪᕈᓐᓃᕐᓴᖅᑎᑦᑎᒐᓗᐊᕐᑎᓪᓗᖓ ᐅᓄᕈᓘᔭᕐᑐᐃᑦ ᑕᒪᑐᒥᖓ ᖁᕕᐊᒋᔭᖃᒻᒪᕆᒃᑐᑦ, ᑭᓯᐊᓂᓕ ᖃᐅᔨᒪᔪᖓ ᐃᓕᓐᓂᐊᖅᑎᑦᑎᓂᕐᒪ ᐅᖓᑖᓅᕆᐊᖃᕐᓂᖓᓂᒃ,” ᐅᖃᕐᑐᖅ.

“ᐅᖃᐅᑎᖃᑦᑕᕐᑕᒃᑲ ᐊᔪᕈᓐᓃᕐᓴᐃᓐᓇᕋᓱᖃᑦᑕᖁᓪᓗᒋᑦ. ᖃᐅᔨᒪᒍᕕᐅᒃ ᐅᖃᐅᓯᖅ ᓇᑭᙶᕐᒪᖔᑦ ᖃᓂᕐᓂᒃ ᑕᐃᒪᓗ ᖃᐅᔨᒪᕗᑎᑦ ᐃᒡᒋᐊᒃᑰᖃᑦᑕᕐᓂᖏᓐᓂᒃ ᐊᒻᒪᓗ ᖃᓄ ᓂᓕᕈᓯᖃᕆᐊᒃᓴᖏᓐᓂᒃ ᐃᓄᒃᑎᑑᕋᓱᖕᓂᒃᑯᑦ, ᑕᐃᒪᓕ ᖁᕕᐊᒋᓕᕋᔭᕐᑕᐃᑦ ᐅᖃᐅᓯᖅ.”

Share This Story

(0) Comments