ᐃᓄᓕᕆᔨᒃᑯᑦ ᒥᓂᔅᑕᖓ ᒪᒥᐊᑉᐳᖅ ᓄᓇᕗᒻᒥ ᒐᕙᒪᒃᑯᑦ ᑲᒪᒋᔭᐅᓂᖏᓐᓂ ᓱᕈᓯᕐᓂ ᐸᖅᑭᔭᐅᔪᓂ

For the English version of this story, see Family Services minister says sorry for GN’s handling of children in its care.

ᓄᓇᕗᒻᒥ ᒐᕙᒪᒃᑯᑦ ᒪᒥᐊᖅᐳᑦ ᓴᐳᔾᔨᓯᒪᑦᑎᐊᕈᓐᓇᓚᐅᙱᒻᒪᑕ ᐊᒃᑐᖅᑕᐅᓴᕋᐃᑦᑐᓂ ᓱᕈᓯᕐᓂ ᐸᖅᑭᔭᐅᔪᓂ.

ᐃᓄᓕᕆᔨᒃᑯᑦ ᒥᓂᔅᑕᖓ ᒫᒡᒍᓕ ᓇᑲᓱᒃ ᒪᒥᐊᓚᐅᖅᐳᖅ ᑭᒡᒐᖅᑐᐃᓪᓗᓂ ᒐᕙᒪᒃᑯᓐᓂ ᐊᒻᒪ ᐱᓕᕆᕝᕕᖓᓂ ᐅᒃᑐᐱᕆ 19−ᒥ ᒪᓕᒐᓕᐅᕐᕕᖕᒥ, ᓯᕗᓪᓕᖅᐹᖓᓂ ᐅᓪᓗᖓᓂ ᐅᑭᐊᒃᓵᒥ ᐃᒃᓯᕚᕐᓂᖓᓂ.

“ᐅᖃᖅᑏ, ᑭᒡᒐᖅᑐᐃᓪᓗᖓ ᐃᓄᓕᕆᔨᒃᑯᓐᓂᑦ, ᒪᒥᐊᑉᐳᖓ ᑕᐃᒃᑯᓄᖓ ᓱᕈᓯᐅᔪᓄᑦ ᐊᒻᒪ ᐃᓚᒌᖏᓐᓄᑦ,” ᐅᖃᓚᐅᖅᐳᖅ, ᐃᓚᒋᐊᖅᓯᓪᓗᓂ “ᐊᖏᖅᓯᒪᓂᖏᓐᓂ” ᓇᓗᓇᐃᖅᓯᓂᖏᓐᓂ ᐱᓕᕆᔾᔪᓯᐅᔪᖅ ᐱᐅᓯᒋᐊᖅᑕᐅᓂᖓᓂ.

ᒪᐃᒥ, ᑲᓇᑕᐅᑉ ᑕᒻᒪᖅᓯᒪᔪᖅᓯᐅᑎᒻᒪᕆᓕᕆᔨᖓ ᑭᐊᕆᓐ ᕼᐆᒋᓐ ᓴᖅᑭᑎᑦᑎᓚᐅᖅᐳᖅ ᐅᓂᒃᑳᓕᐊᒥ — ᑕᐃᒎᓯᓕᖕᒥ “ᑐᐊᕕᕐᓇᖅᑐᒥ ᖃᐃᖁᔨᓂᐅᔪᒥ ᖃᓄᐃᓕᐅᕐᓂᕐᒧᑦ” — ᓈᒻᒪᒃᓴᙱᕐᔪᐊᓂᖓᓂ ᓱᕈᓯᕐᓄᑦ ᐊᒻᒪ ᐃᓄᓕᕆᔨᒃᑯᓐᓂᑦ ᓄᓇᕗᒻᒥ ᐱᓕᕆᓂᖃᖅᑐᒥ ᔭᓄᐊᕆ 1, 2019−ᒥ, ᒪᐃ 31, 2022−ᒧᑦ.

“ᐱᓕᕆᔾᔪᓯᐅᔪᒥ ᐃᓚᑰᓂᐅᔪᑦ ᓇᓗᓇᐃᖅᑕᐅᔪᑦ ᑕᒻᒪᖅᓯᒪᔪᖅᓯᐅᑎᒻᒪᕆᐅᑉ ᐅᓂᒃᑳᓕᐊᖓᓂ ᑐᕌᖅᑎᑦᑎᓯᒪᕗᖅ ᐱᐅᙱᑦᑐᓄᑦ ᖃᓄᐃᓕᖓᓂᐅᔪᓄᑦ ᓱᕈᓯᕐᓄᑦ ᐊᒻᒪ ᐃᓚᒡᒋᓄᑦ ᐱᔨᑦᑎᕋᖅᑕᑦᑎᓐᓂ,” ᓇᑲᓱᒃ ᐅᖃᓚᐅᖅᐳᖅ.

“ᐃᓄᓕᕆᔨᒃᑯᑦ ᓈᒻᒪᒍᓱᑦᑎᐊᖅᐳᑦ ᓇᓂᔭᐅᓂᐅᔪᓂ ᑕᒻᒪᖅᓯᒪᔪᖅᓯᐅᑎᒻᒪᕆᐅᑉ ᐅᓂᒃᑳᓕᐊᖓᓂ [ᓱᕈᓯᕐᓄᑦ ᐊᒻᒪ ᐃᓚᒌᖑᔪᓄᑦ].”

ᑕᒻᒪᖅᓯᒪᔪᖅᓯᐅᑎᒻᒪᕆᐅᑉ ᐅᓂᒃᑳᓕᐊᖓ ᐱᖓᔪᒋᔭᐅᓚᐅᖅᐳᖅ, ᑕᐃᒪᓐᓇᐸᓗᒃ ᐱᓪᓚᕆᐅᔪᓂ ᓴᖅᑭᑎᑕᐅᓚᐅᖅᑎᓪᓗᒋᑦ 2011−ᒥ ᐊᒻᒪ 2014−ᒥ.

ᒪᓕᒐᓕᐅᖅᑎ ᔮᓂᑦ ᐱᑦᓯᐅᓛᖅ ᐳᕉᔅᑐᕐ ᖁᔭᓕᓚᐅᖅᐳᖅ ᐃᓄᓕᕆᔨᒃᑯᑦ ᒥᓂᔅᑕᖓ ᒫᒡᒍᓕ ᓇᑲᓱᖕᒥ ᒪᒥᐊᓐᓂᖓᓄᑦ ᑭᒡᒐᖅᑐᐃᓪᓗᓂ ᒐᕙᒪᒃᑯᓐᓂ ᓯᕗᓪᓕᖅᐸᐅᔪᒥ ᐃᒃᓯᕚᕐᓂᐅᔪᒥ ᐅᑭᐊᒃᓵᒥ ᒪᓕᒐᓕᐅᕐᕕᖕᒥ ᐅᒃᑐᐱᕆ 19−ᒥ. (ᑐᓴᒐᒃᓴᓕᕆᔨᒃᑯᑦ ᐊᔾᔨᖁᑎᖓ)

“ᖄᖏᖅᓯᒪᔪᓂ ᐊᕐᕌᒍᓂ 12−ᓂ ᑎᑎᕋᐅᔭᖅᓯᒪᕗᒍᑦ ᐊᔾᔨᙳᐊᒥ ᐱᓕᕆᑦᑎᐊᙱᑉᐸᓪᓕᐊᔪᒥ ᐱᓕᕆᔾᔪᓯᐅᔪᒥ,” ᕼᐆᒋᓐ ᐅᖃᓚᐅᖅᐳᖅ ᑕᐃᔅᓱᒪᓂ. “ᐊᑕᐅᓯᖅ ᐱᓕᕆᑦᑎᐊᙱᓐᓂᐅᔪᖅ ᐃᓄᖕᓄᑦ ᐊᒻᒪ, ᐱᓗᐊᖅᑐᒥ, ᓱᕈᓯᕐᓂ ᓴᐳᔾᔨᓯᒪᔭᕆᐊᖃᖅᑕᖏᓐᓂ.”

ᐅᓂᒃᑳᓕᐊᖅ ᐅᓂᒃᑳᕆᓯᒪᕗᖅ ᐱᓕᕆᑦᑎᐊᙱᓐᓂᐅᔪᓂ ᑐᓴᒐᒃᓴᓂ ᑐᓴᐅᒪᑎᑦᑎᔭᕆᐊᖃᕐᓂᖏᓐᓂ, ᓈᒻᒪᙱᑦᑐᓂ ᑎᑎᕋᖅᑕᐅᓯᒪᔪᓂ ᐱᓯᒪᑦᑎᓂᕐᒥ ᐊᒻᒪ ᐱᑕᖃᙱᓗᐊᕐᓂᖓᓂ ᓈᒻᒪᒃᑐᓂ ᖃᐅᔨᒋᐊᒃᑲᓐᓂᕐᓂᐅᔪᓂ ᓇᓗᓇᐃᖅᓯᓂᕐᒧᑦ ᐊᑦᑕᓇᔾᔭᐃᖅᓯᓯᒪᓂᖓᓂ ᓱᕈᓯᕐᓂ ᒐᕙᒪᒃᑯᑦ ᐸᖅᑭᔭᖏᓐᓂ.

ᐅᓂᒃᑳᓕᐊᖅ ᐅᔾᔨᕆᓚᐅᖅᐳᖅ ᐱᓕᕆᕝᕕᒃ ᑐᓂᓯᔪᓐᓇᓚᐅᙱᓐᓂᖓᓐᓂ ᓇᓚᐅᓯᒪᑦᑎᐊᖅᑐᒥ ᓇᐃᓴᐃᓂᐅᔪᒥ ᐅᓄᕐᓂᐅᔪᓂ ᓱᕈᓯᕐᓂ ᐸᖅᑭᔭᐅᔪᓂ.

ᓇᑲᓱᒃ ᓇᓗᓇᐃᖅᓯᓚᐅᕆᕗᖅ ᐃᖏᕐᕋᓂᐅᔪᒥ ᐱᓕᕆᕝᕕᖓ ᐱᓕᕆᓯᒪᓂᖓᓂ ᐸᕐᓇᐅᑎᖓᓂ ᐋᖅᑭᒃᓯᓂᕐᒧᑦ ᐊᑲᐅᙱᓕᐅᕈᑕᐅᔪᓂ ᐃᓄᓕᕆᔨᒃᑯᓐᓂ, ᐅᖃᖅᖢᓂ “ᐃᓚᖃᕐᓂᖓᓂ ᖃᓂᑦᑐᓂ ᑲᑐᔾᔨᖃᑎᒌᖕᓂᕐᒥ ᐃᓗᐊᓂ ᓄᓇᕗᒻᒥ ᐊᒻᒪ ᐊᕕᒃᑐᖅᓯᒪᓂᐅᔪᒥ ᐃᖅᑲᓇᐃᔭᖅᑎᓂ ᐃᓄᓕᕆᔨᒃᑯᓐᓂᑦ ᐊᒻᒪ ᐊᓯᖏᓐᓂ ᒐᕙᒪᒃᑯᓐᓂ ᐱᓕᕆᕝᕕᐅᔪᓂ.”

ᐅᖃᓚᐅᖅᐳᖅ ᓂᕆᐅᒃᐳᖅ ᓴᖅᑭᑎᑕᐅᓂᖏᓐᓂ ᐱᓇᓱᐊᕈᑎᒃᓴᓕᕆᓂᕐᒧᑦ ᐸᕐᓇᐅᑎᒥᒃ ᒪᓕᒐᓕᐅᕐᕕᖕᒥ ᑎᑭᑉᐸᓪᓕᐊᔪᓄᑦ ᑕᖅᑭᐅᔪᓄᑦ.

ᑭᖑᓂᐊᒍᑦ ᐃᒃᓯᕚᕐᓂᐅᔪᒥ, ᐃᖃᓗᐃᑦ-ᓯᓈ ᒪᓕᒐᓕᐅᖅᑎ ᔮᓂᑦ ᐱᑦᓯᐅᓛᖅ ᐳᕉᔅᑐᕐ ᖁᔭᓕᓚᐅᖅᐳᖅ ᐃᓄᓕᕆᔨᒃᑯᓐᓂᑦ ᐱᓕᕆᓂᖏᓐᓂ ᒫᓐᓇᒧᑦ ᑎᑭᖦᖢᒍ.

“ᑕᒪᑐᒪᓂ ᐱᕕᒃᓴᖃᕐᓂᐅᔪᒥ ᖁᔭᓕᔪᒪᕗᖓ ᒥᓂᔅᑕ ᓇᑲᓱᖕᒧᑦ ᑕᐃᔅᓱᒧᖓ ᒪᒥᐊᓐᓂᐅᔪᒧᑦ. ᖃᐅᔨᒪᕗᖓ ᐊᒥᓱᓂ ᓄᓇᕗᒻᒥᐅᓂ ᐊᒃᑐᖅᑕᐅᓯᒪᓂᐊᖅᑐᓂ ᑖᒃᑯᓄᖓ ᐅᖃᐅᓯᐅᔪᓄᑦ,” ᐳᕉᔅᑐᕐ ᐅᖃᓚᐅᖅᐳᖅ, ᓂᐱᖓ ᓴᔪᒃᖢᓂ, ᕿᐊᑦᑕᐃᓕᒪᓪᓗᓂ.

“ᖃᐅᔨᒪᕗᒍᑦ ᒪᒥᓴᕐᓂᖅ ᐱᒋᐊᓲᖑᕗᑦ ᒪᒥᐊᓐᓂᐅᔪᓂ ᐊᒻᒪ ᑲᒪᒋᔭᖃᓕᕐᓂᕐᒥ.”

ᑐᓄᓂᕐᒥ ᒪᓕᒐᓕᐅᖅᑎ ᑭᐊᕆᓐ ᓄᑕᕋᖅ ᐃᓚᒋᐊᖅᓯᓚᐅᖅᐳᖅ: “ᐃᒃᐱᒍᓱᒃᐳᖓ ᔮᓂᑦ ᐅᖃᐅᓯᒃᓴᓕᐊᖓᓐᓂ, ᐊᒻᒪ ᖁᔭᓕᕗᖓ ᒫᒡᒍᓕᖕᒥᑦᑕᐅᖅ [ᓇᑲᓱᒃ].”

ᓇᑲᓱᒃ ᐅᖃᓚᐅᖅᐳᖅ ᓇᓗᓇᐃᖅᓯᕗᖅ ᓄᓇᕗᒻᒥᐅᓂ “ᐱᓕᕆᕝᕕᒐ ᐃᕐᙲᓐᓇᑲᐅᑎᒋ ᐊᒻᒪ ᒪᑭᒪᔾᔪᑕᐅᔪᓐᓇᖅᑐᓂ ᐱᓕᕆᓂᖃᕐᓂᐊᕐᓂᖏᓐᓂ ᑭᐅᓂᕐᒧᑦ ᑕᒻᒪᖅᓯᒪᔪᖅᓯᐅᑎᒻᒪᕆᐅᑉ ᐅᓂᒃᑳᓕᐊᖓᓂ ᐊᒻᒪᓗ ᓇᓗᓇᐃᖅᓯᓂᕐᒥ ᐱᐅᓛᖑᔪᒧᑦ ᐱᔪᒪᓂᐅᔪᓄᑦ ᓱᕈᓯᑦᑎᓐᓂ ᐸᖅᑭᔭᑦᑎᓐᓂ ᓯᕗᓂᐊᓃᓐᓂᐊᕐᓂᖓᓂ.

“ᐱᓕᕆᕝᕕᒃ ᑐᑭᓯᐅᒪᑦᑎᐊᖅᐳᑦ ᐅᓴ ᑐᐊᕕᕐᓇᕐᓂᖓᓂ ᐊᒻᒪᓗ ᐊᖏᖅᓯᒪᓂᖃᕐᔪᐊᖅᖢᑎᒃ ᐊᓯᔾᔨᕐᓂᖃᕐᓂᐊᕐᓂᖏᓐᓂ ᐱᔭᕆᐊᓕᖕᓂᑦ.”