ᐃᓅᓱᒃᑐᑦ ᐅᑭᐅᕐᑕᖅᑐᕐᒥᐅᑕᑦ ᑕᒪᑐᒪᓂ ᐊᕐᕌᒍᒥ ᓵᓚᒃᓴᐅᓯᐊᕐᓯᒪᓂᕐᓴᐅᕗᑦ ᑮᓇᐅᔭᓂᒃ

“ᓂᕈᐊᖅᑎᐅᕙᒃᑐᑦ ᐅᕙᑦᑎᓐᓂ ᐃᕿᐊᙳᖂᕐᒪᑕ ᑭᓯᐊᓂᓕ … ᖁᕕᐊᓱᒃᐳᒍᑦ ᐅᕙᓃᓐᓂᑦᑎᓐᓂᒃ!”

ᓄᑕ ᐆᓴᓐ-ᕼᑯᖓᒃ, ᑕᓕᕐᐱᐊᓃᑦᑐᖅ, ᐊᒻᒪ ᔭᓯᑲ ᓴᑉᑕᐃ ᑐᓂᔭᐅᕘᒃ $140,000 ᐅᑭᐅᕐᑕᖅᑐᕐᒥ ᐱᓕᕆᓕᕈᒪᓕᖅᑎᑦᑎᓂᕐᒧᑦ ᓵᓚᒃᓴᐅᓯᐊᕐᒥ (AIP) ᐅᑯᓄᖓ ᓄᓇᕗᒥᑦ ᒪᓕᒐᓕᕆᓂᕐᒧᑦ ᐃᓕᓐᓂᐊᒐᒃᓴᓂᒃ ᖁᕕᐊᓲᑎᖃᖅᑎᓪᓗᒋᑦ ᐱᖓᑦᓯᕐᒥᑦ, ᕕᕗᐊᕆ 5. (ᐊᔾᔨᓕᐅᕆᔨ ᓖᓴ ᒍᕆᒍᕋ)

By ᓖᓴ ᒍᕆᒍᕋ ᓄᓇᑦᓯᐊᕐᒥ ᐱᕙᓪᓕᐊᔪᑦ

For an English version of this story, see Young northerners the focus of this year’s Arctic prize money

ᑕᑯᑲᐅᕐᑐᕋᔭᙱᓚᑎᑦ ᐆᒻᒪᕆᖕᓂᕐᓴᓂᒃ ᐊᒻᒪ ᐃᒃᐱᒍᓱᖕᓂᖃᑦᑎᐊᖅᑐᓂᒃ ᐅᑭᐅᕐᑕᖅᑐᕐᒥᐅᑦ ᐊᓯᖏᓐᓂᒃ ᐅᕙᓂ ᐅᑭᐅᕐᑕᖅᑐᕐᒥ ᐱᓕᕆᓕᕈᒪᓕᖅᑎᑦᑎᓂᕐᒧᑦ ᓵᓚᒃᓴᐅᓯᐊᓕᕆᓂᕐᒥ (AIP), ᐱᖓᔅᓯᕐᒥ, ᕕᕗᐊᕆ 5, ᐋᑐᕚᒥ. ᐊᒻᒪᓗ ᐅᔾᔨᕐᓇᓗᐊᓚᐅᕐᖢᓂ ᖃᓄᐃᓕᐅᕐᓇᒥ ᐅᓇ: ᓯᕗᓂᒃᓴᕗᑦ ᓄᓇᖃᖅᑳᖅᑐᓅᖓᔪᖅ.

8-ᖑᔪᐃ ᐱᓕᕆᖃᑎᒌᒃᑐ ᑲᓇᑕᐃ ᐅᑭᐅᕐᑕᖅᑐᖓᓂᒃ—ᑎᓴᒪᑦ ᓄᓇᕕᒃᒥᙶᖅᖢᑎᒃ—ᐊᖏᕐᕋᐅᔾᔨᓚᐅᕐᐳᑦ $2.6 ᒥᓕᐊᓐᑖᓚᓂ ᑲᑎᖢᑎᒃ ᑐᓐᓂᖁᓯᐊᖅᑖᕐᓇᒥᑦ ᕕᕗᐊᕆ 5-ᒥ ᑕᕝᕙᓂ ᑕᑯᓐᓇᓚᐅᕐᒥᔪᖅ ᓄᓇᖃᖅᑳᖅᑐᓂᒃ ᐃᙱᕐᑎᓂᒃ, ᑎᑕᒃᑎᓂᒃ ᐊᒻᒪ, ᐃᓚᐅᑎᒃᑯᕕᐅ ᐅᑯᐊ ᐅᖃᓪᓚᒃᑎᐅᑉ ᖁᕕᐊᓱᖕᓇᒥ ᑖᒪᔅ ᐊᖑᑎ ᔮᓐᔅᑕᓐᑯᑦ ᒧᒥᖅᑎᖏᓐᓂᒃ.

ᐊᖏᓂᖅᐹᖅ ᑐᓐᓂᖁᓯᐊᖅ ᐅᓇ $1 ᒥᓕᐊᓐ ᑖᓚ ᑐᓂᔭᐅᓚᐅᕐᑐᖅ ᐅᑯᓄᖓ ᓄᐊᑕᓐ ᑲᒻᐸᔅ, ᐱᓕᕆᐊᕆᔭᐅᔪᖅ ᐃᑲᔪᕈᑎᐅᓪᓗᓂ ᓄᓇᕗᒥᑦ ᐊᒻᒪ ᓄᓇᑦᓯᐊᕐᒥ ᐃᓅᓱᒃᑐᓂᒃ ᖃᐅᔨᒋᐊᒃᑲᓐᓂᕈᑎᒃᓴᓄᑦ ᖃᓪᓗᓈᓂ ᐃᓕᓐᓂᐊᒃᑲᓐᓂᕈᑎᒃᓴᐅᓇᔭᖅᑐᓂᒃ ᐱᓇᓱᒍᓐᓇᕐᓂᕐᓴᐅᓕᕐᑎᓪᓗᒍ ᐊᒻᒪ ᐊᓂᒍᐃᔪᓐᓇᕐᓂᒃᑯᑦ.

ᐅᓇ ᐱᖓᔪᒋᔭᐅᓕᕐᑐᖅ ᑖᒃᑯᐊ ᐅᑯᓇᓂ ᐅᑭᐅᕐᑕᖅᑐᕐᒥ ᐱᓕᕆᓕᕈᒪᓕᖅᑎᑦᑎᓂᕐᒧᑦ ᓵᓚᒃᓴᐅᓯᐊᓕᕆᓂᕐᒥ (AIP) ᑭᖑᓪᓕᐅᓯᒪᓪᓗᑎᒃ, ᑕᐃᒪᓐᓇᓗ ᐅᓇ ᐅᓖᐱᑲ ᐱᓴᓐ ᐃᒪᐃᓕᓕᓚᐅᕐᑐᖅ ᑐᓂᔭᐅᑎᓪᓗᒋᑦ ᐅᖃᓪᓚᓕᕐᑎᓪᓗᒍ, “ᓂᕈᐊᖅᑎᐅᕙᒃᑐᑦ ᐅᕙᑦᑎᓐᓂ ᐃᕿᐊᙳᖂᕐᒪᑕ ᑭᓯᐊᓂᓕ … ᖁᕕᐊᓱᒃᐳᒍᑦ ᐅᕙᓃᓐᓂᑦᑎᓐᓂᒃ!”

ᑎᓴᒪᑦ ᐱᓕᕆᖃᑎᒌᖑᔪᑦ ᑐᓂᔭᐅᓚᐅᕐᒥᔪᑦ ᑎᑭᑐᒥᑦ $500,000 ᑲᑎᖢᑎᒃ ᓵᓚᒃᓴᐅᓯᐊᓂᒃ ᑮᓇᐅᔭᓂᒃ ᐊᒻᒪ ᐱᖓᓱᒃᑲᓐᓃᑦ ᐊᑐᓂ ᑐᓂᔭᐅᓂᐊᖅᖢᑎᒃ ᒪᐅᓇ ᑎᑭᑦᑐᓂᒃ $100,000 ᐃᓅᓱᒃᑐᓄᑦ ᑐᕌᖓᔪᓄᑦ.

ᐊᕐᕕᐊᕐᒥᐅᑕᖅ ᓲᓴᓐ ᐊᒡᓘᑲᖅ ᑐᓂᔭᐅᔪᖅ $450,000 ᑮᓇᐅᔭᒃᓴᒥ ᐅᑯᓇᙵᑦ ᐅᑭᐅᕐᑕᖅᑐᕐᒥ ᐱᓕᕆᓕᕈᒪᓕᖅᑎᑦᑎᓂᕐᒧᑦ ᓵᓚᒃᓴᐅᓯᐊᕐᒥ (AIP) ᐱᓕᕆᐊᖓᓄᑦ ᐃᓕᓐᓂᐊᕐᓇᐅᑉ ᓯᕗᓂᐊᓂ ᐊᒻᒪ ᐃᓕᓐᓂᐊᕌᓂᒃᑳᖓᑕ ᖃᓄᐃᓕᐅᕈᑎᖏᔭᖏᓐᓄᑦ, ᑲᒪᔩᑦ, ᑖᓐᓇᓗ ᐱᖓᓱᓂᒃ ᓄᓇᓕᖕᓂ ᓄᓇᕗᒥᑦ ᐃᑲᔪᕈᑎᐅᓂᐊᖅᖢᓂ ᐃᓕᓐᓂᐊᕐᕕᐊᓗᖕᒦᑦᑐᓂ ᐃᓕᓐᓂᐊᖏᓐᓇᖅᑎᑦᑎᓇᓱᖕᓂᕐᒧᑦ ᐊᒻᒪ ᐊᓂᒍᐃᔪᓐᓇᕐᓯᑎᑦᑎᓂᕐᒧᑦ.

ᐅᑯᐊ ᔫᑳᓐᒥ ᐱᓕᕆᖃᑎᒌᖑᔪᑦ ᒪᒥᓴᕐᓂᕐᒧᑦ ᐅᑯᓇᓂ ᖃᓄᐃᑦᑕᐃᓕᓂᕐᒥᒃ ᐊᔪᕈᓐᓃᕐᓴᖅᑎᑦᑎᓂᕐᒧᑦ ᐊᒻᒪ ᒪᒥᓴᕐᓂᕐᒧᑦ ᐱᓕᕆᐊᖃᖅᑐᑦ (Resilience Training and Healing Program) ᑐᓂᔭᐅᓚᐅᕐᑐᑦ ᓵᓚᒃᓴᐅᓯᐊᖓᓂ $410,000-ᓂᒃ ᐃᑲᔪᕈᑎᐅᓂᐊᖅᖢᓂ ᐃᓅᓱᒃᑐᓂᒃ ᓇᐹᖅᑐᓕᖕᓂ ᖃᑦᑎᕆᔨᓂᒃ ᐃᑲᔪᕈᑎᒋᓗᒍ ᐃᓱᒪᓕᕆᓂᕐᒧᑦ, ᐊᑐᓗᐊᔭᓐᓂᕐᒧᑦ ᐊᒻᒪ ᐃᒻᒥᓃᖅᑎᑦᑎᑦᑕᐃᓕᓂᕐᒧᑦ ᑕᒫᓂ ᔫᑳᓐᒥ. ᐱᕙᓪᓕᐊᔪᓕᕆᓂᕐᒧᑦ ᒥᓂᔅᑕ ᒥᓚᓂ ᔪᓕ ᐅᖃᓪᓚᓕᓚᐅᕐᒥᔪᖅ ᓂᕆᐅᓇᙱᑦᑐᒥᒃ ᑐᓴᒐᒃᓴᖃᖅᖢᓂ ᐅᑯᐊ ᒐᕙᒪᑐᖃᒃᑯ ᐃᓚᒋᐊᖅᑎᑦᑎᓂᐊᕐᓂᖏᓐᓂᒃ $600,000-ᓂ ᐃᑲᔪᕈᑎᒃᑲᓐᓂᐅᓂᐊᖅᑐᓂᒃ ᑖᔅᓱᒥᖓ ᐱᒻᒪᕆᐊᓗᖕᒥ ᐱᓕᕆᐊᕆᔭᖓᓄᑦ. ᐅᐸᒍᑎᓯᒪᔪᑦ ᑕᒪᑐᒥᖓ ᖁᕕᐊᒋᔭᖃᒻᒪᕆᓚᐅᕐᑐᑦ.

ᑕᒪᓐᓇ ᐃᒃᐱᒍᓱᖕᓇᓗᐊᓚᐅᙱᑉᐸᑦ, ᐆᒪ ᓲᓴᓐ ᐊᒡᓘᒃᑲᖅ ᐅᖃᓪᓚᓕᕐᑎᓪᓗᒍ ᖁᕝᕕᐅᖄᑎᓕᓚᐅᕐᑕᖏ, ᐃᒻᒥᓂᒡᓗ, ᖁᔭᓕᑎᓪᓗᒍ ᐊᓈᓇᒥᓄ ᐅᐸᖃᑕᐅᓯᒪᔪᓂ “ᐊᓯᙳᕐᓂᕐᒥ ᐊᑐᓚᐅᕐᓂᖓᓂᒃ,” ᐊᓯᖏᑦᑎᑐᑦ ᑭᖑᕚᕆᔭᐅᔪᓂᒃ ᑕᐃᒪᐃᖁᓴᐅᓯᒪᓂᖏᓐᓄᑦ.

ᐊᒡᓘᒃᑲᐅᑉ ᐱᓕᕆᐊᖓ, ᑲᒪᔩᑦ, ᑐᓂᔭᐅᓚᐅᕐᑐᖅ $450,000 ᐃᑲᔪᕈᑎᐅᓗᓂ ᐃᓕᓐᓂᐊᙱᓐᓂᖏᓐᓂᒃ ᐊᒻᒪ ᐃᓕᓐᓂᐊᕌᓂᒃᑳᖓᑕ ᖃᓄᐃᓕᐅᕈᑎᒃᓴᓄᑦ ᐅᑯᓄᖓ ᐱᖓᓱᓄᑦ ᓄᓇᕗᒥᑦ ᓄᓇᓕᖕᓄᑦ ᐱᓕᕆᐊᖃᖅᑐᓂᒃ ᓱᕈᓰᑦ ᐃᓕᓐᓂᐊᖏᓐᓇᕈᓐᓇᕐᑎᓪᓗᒋᑦ ᐊᒻᒪ ᐊᓂᒍᐃᓕᕈᓐᓇᖁᓪᓗᒋᑦ.

ᐅᓐᓄᙳᕐᑎᓪᓗᒍ ᖁᕕᐊᓲᑎᖃᕐᓇᒥ ᓵ ᑲᑎᕕᒃᒥᑦ, ᑐᙵᓱᒃᑎᑦᑎᔨᖃᖅᖢᑎᒃ ᐊᖑᑎ ᔮᓐᔅᑕᓐᒥ ᐊᒻᒪ ᓰᐲᓰᑦ ᐅᓪᓛᒃᑯᑦ ᐅᖃᓪᓚᒃᑎᖓ ᔫᑳᓐᒥ ᑯᕆᔅᑏᓐ ᔭᓂᐅ ᐊᒻᒪᓗ ᓴᖅᑭᔮᖅᑎᑕᐅᓪᓗᓂ ᐄᐲᑏᐊᓐᑯᓐᓂᑦ, ᐊᔾᔨᒌᙱᑦᑑᑎᓂᒃ ᖁᙱᐊᑲᑕᖕᓇᓚᐅᕐᑐᖅ ᑎᑕᒃᑎᒐᓚᖕᓂᒃ ᐅᑯᐊ ᐃᓚᐅᓪᓗᑎᒃ ᑎᐊᓐᑕ ᐃᐊᑦᒪᓐᔅ, ᑲᓇᑕᒥ ᓯᕗᓪᓕᖅᐹᖅ ᐃᓄᒃ ᐃᙱᖅᑎ ᑲᓛᓯᑰᓂᕋᖅᑕᐅᔪᓂᒃ ᐊᒻᒪ ᓂᐱᓕᐅᖃᑦᑕᕐᓯᒪᓪᓗᓂ, ᐊᒻᒪ ᔮᔅ ᑭᐅ ᐊᒻᒪ ᑐᕇᑦ ᐋᕝᔅ, ᐊᒻᒪᓗ ᑰᔾᔪᐊᕐᒥᐅᑕᖅ ᓯᐊᕕᐊ ᑯᓘᑎᐃ.

ᑕᑯᔭᒐᖃᕐᓂᖅ ᐱᒋᐊᓚᐅᕐᑐᖅ ᐃᑲᕐᕌᖕᓂ ᒪᕐᕉᖕᓂ ᓇᑉᐸᒥᓪᓗ ᑲᑎᖃᑎᒌᓚᐅᕐᑎᓪᓗᒋ ᑕᕝᕙᓂᓗ ᐊᕐᓇᐃ ᐊᓐᓄᕌᕐᓯᒪᓪᓗᑎᒃ ᕿᓪᓕᖅᑕᓕᖕᓂᒃ ᐊᒻᒪ ᐊᖓᑏᑦ ᐊᓐᓄᕌᑦᑎᐊᕐᓯᒪᔪᑦ ᓂᕆᓪᓗᑎᒃ ᑐᓕᒫᕐᓂᒃ, ᐃᖃᓗᖕᓂᑦ ᓴᓇᓯᒪᔪᓂᒃ ᐊᒻᒪᓗ ᐊᔾᔨᒌᙱᑦᑐᓂᒃ ᓰᓯᓂ ᑯᐸᐃᒃ ᖃᓂᒋᔮᓃᑦᑐᓂᒃ ᐱᐅᓂᖅᐹᓂᒃ.

ᐅᑯᐊ ᐅᑭᐅᕐᑕᖅᑐᕐᒥ ᐱᓕᕆᓕᕈᒪᓕᖅᑎᑦᑎᓂᕐᒧᑦ ᓵᓚᒃᓴᐅᓯᐊᕐᒥ (AIP) ᐃᓅᓱᒃᑐᓅᖓᔪᖃᖅᖢᑎᒃ, ᑕᒪᐃᓐᓂ 8-ᖑᔪᑦ ᓵᓚᑦᓴᕈᑎᐅᔪᑦ ᖃᓄᐃᓕᐅᕈᑎᖏᑦ ᑐᕌᖓᔪᐃᓐᓇᐅᔪᑦ ᐃᓅᓱᒃᑐᓄᑦ, ᒪᑯᓇᙵᑦ ᐃᓕᓐᓂᐊᕐᓂᕐᒥᓐ ᐊᒻᒪ ᐊᔪᕈᓐᓃᕐᓴᕐᓂᕐᒥᓐ, ᐃᖅᑲᓇᐃᔭᖅᑎᑦᑎᓂᕐᒥᓐ, ᐃᓕᓐᓂᐊᒃᑲᓐᓂᕐᓂᕐᒧᑦ ᐃᑲᔪᕈᑎᒃᓴᓂᒃ, ᐃᓱᒪᓕᕆᓂᕐᒧᑦ, ᐊᑐᓗᐊᓕᔭᓐᓂᕐᒧᑦ ᐊᒻᒪ ᐃᓕᖁᓯᑐᖃᕐᓂᒃ ᐊᔪᕈᓐᓃᕐᓴᕈᑎᓄᑦ.

ᑕᒪᓐᓇ ᑐᕌᖓᒍᑎᐅᔪᖅ ᖁᕕᐊᒋᔭᐅᔪᒃᓴᐅᕗᖅ ᑐᓴᖅᖢᒍ ᑲᓇᑕᐅᑉ ᐅᑭᐅᕐᑕᖅᑐᖓᓃᑦᑐᓄᑦ, ᑕᒫᓂ ᐃᒻᒥᓃᖅᑐᑦ ᐅᓄᓗᐊᖅᑐᐊᓘᓂᖏᓐᓄᑦ, ᐊᓂᒍᐃᕌᓂᒃᓯᒪᙱᓗᐊᖅᑐᓄᑦ ᐃᓕᓐᓂᐊᕐᕕᖕᒥ ᐊᒻᒪ ᐊᓯᖏᓐᓄᑦ ᐊᑲᐅᙱᓕᐅᕈᑎᐅᔭᑦᑐᓄᑦ ᐊᒃᑐᐊᔪᓂᒃ ᐊᑐᓗᐊᓕᔭᓐᓂᕐᒧᓐ, ᑲᑉᐱᐊᓱᓗᐊᕐᓂᑰᓂᕐᒧᑦ ᐊᒻᒪ ᐃᓱᒫᓗᓗᐊᕐᓂᕐᒧᑦ ᑕᒪᐃᓐᓂ ᑐᕌᖓᓪᓗᑎᒃ ᐃᓅᓱᒃᑐᓄᑦ ᐃᓅᓯᖃᑦᑎᐊᕈᓐᓇᖁᓪᓗᒋᑦ ᐊᒻᒪ ᑐᑭᓕᖕᒥᑦ ᐃᓅᓯᖃᕈᓐᓇᕐᓗᑎᒃ. ᐅᓇ ᑕᐃᒪᐃᓗᐊᕐᑐᖅ ᓄᓇᓕᖕᓂ ᐃᓄᑭᑦᑐᓃᑦᑐᓂᒃ ᑖᒃᑯᐊ ᖃᓄᐃᓕᐅᕈᑎᖃᙱᓗᐊᕐᓂᖏᓐᓄᑦ ᒪᐅᓇ ᐱᙳᐊᒐᓚᖕᓂᕐᒧᑦ ᖃᓄᐃᓕᐅᕈᑎᒃᓴᓂᒃ, ᐃᖅᑲᓇᐃᔮᒃᓴᖃᙱᓐᓂᖅ ᐊᒻᒪ ᐃᓄᓕᕆᔨᖃᙱᓗᐊᕐᓂᖅ.

ᓄᓇᕗᒥᐅᑕᖅ ᑭᐅᕋᓐ ᐊᒡᓘᒃᑲᖅ, ᓲᓴᓐ ᐊᒡᓘᒃᑲᐅᑉ ᐊᙵᖓ, ᐊᖓᔪᖅᑳᖑᖃᑕᐅᓚᐅᕐᑐᖅ ᓄᐊᑕᓐ ᑲᒻᐸᔅᑯᑦ ᐱᓇᓱᒃᑎᓪᓗᒋᑦ. ᐅᖃᓚᐅᕐᑐᖅ ᓯᕗᓂᐊᒍᑦ ᓄᐊᑕᓐ ᑲᒻᐸᔅᑯᑦ ᐃᓱᒪᓚᐅᕐᓂᕋᖅᖢᓂᒋᑦ ᐅᑭᐅᕐᑕᖅᑐᕐᒥ ᐃᓅᓱᒃᑐᑦ ᐃᓕᓐᓂᐊᕌᓂᒃᓯᒪᙱᓗᐊᕐᓂᖏᑦ ᐊᒻᒪ ᑲᑕᖓᒍᑎᖏᑦ ᐃᒪᓐᓇᖔᖅ ᐋᖅᑭᒃᓯᓗᑎᒃ ᐊᓂᒍᐃᔪᓐᓇᖅᓯᑎᑦᑎᓂᕐᒥᒃ ᐃᓕᓐᓂᐊᑲᓐᓂᕈᑎᓕᕆᓂᒃᑯᑦ.

ᐱᒋᐊᕐᓯᒪᓪᓗᑎᒃ ᐅᑯᓇᙵᑦ ᐅᑭᐅᕐᑕᖅᑐᕐᒥ ᐃᓅᓱᒃᑐᑦ ᐊᑭᐊᓃᑦᑐᓂᒃ (Northern Youth Abroad), ᑖᔅᓱᒪᓗ ᑭᐅᕋᓐ ᐃᓚᒋᔭᐅᕝᕕᒋᓪᓗᓂᒋᑦ ᐊᒻᒪ ᑲᑎᒪᔨᐅᖃᑕᐅᓂᑰᓪᓗᓂ, ᓄᐊᑕᓐ ᑲᒻᐸᔅᑯᑦ ᒪᓂᒻᒪᐃᓯᒪᓂᐊᕐᑐᑦ ᐃᑲᔪᕈᑎᒃᓴᓂᒃ ᐅᑭᐅᕐᑕᖅᑐᕐᒥ ᐃᓅᓱᒃᑐᓄᑦ ᐃᓕᓐᓂᐊᒃᑲᓐᓂᕈᒪᓯᒪᔪᓂᒃ—ᓇᒧᙵᐅᓇᔭᕆᐊᒃᓴᖏᓐᓄᑦ, ᑮᓇᐅᔭᖅᑖᕋᓱᖕᓂᕐᒥᒃ, ᐊᖏᕐᕋᕆᔪᓐᓇᖅᑕᖏᓐᓂᒃ ᐊᒻᒪᓗ ᐊᖏᕐᕋᕐᓯᖅᑕᐃᓕᒪᑎᑦᑎᓂᕐᒥᒃ, ᐃᓕᖁᓯᕐᒥᒡᓗ ᑕᑯᔭᕆᐅᕐᓯᒪᓂᕐᒥᒃ ᐊᒻᒪᓗ ᖃᓄᐃᑳᓪᓚᒍᑎᐅᑐᐃᓐᓇᕆᐊᓕᖕᓂᒃ.

ᐃᓚᖏ ᓱᕈᓰᑦ ᐃᑲᔪᖅᑕᐅᓗᐊᕆᐊᖃᔾᔮᙱᑦᑐᑦ ᐊᒻᒪ ᐃᓚᖏᑦ ᐃᑲᔪᖅᑕᐅᔭᕆᐊᖃᒻᒪᕆᒡᓗᑎᒃ, ᐅᖃᖅᑐᖅ. ᖃᓄᐃᓕᖓᒐᓗᐊᖅᐸᑕ, ᓄᐊᑕᓐ ᑲᒻᐸᔅ ᐱᔨᑦᑎᕋᐅᑎᖃᕐᓂᐊᖅᑐᑦ ᐃᓕᓐᓂᐊᕐᓂᓕᕆᔨᒻᒪᕆᐅᓗᑎᒃ, ᐃᑲᔪᕐᐸᒡᓗᑎᒃ ᐃᓅᓱᒃᑐᓂᒃ ᐃᑲᔪᖅᑕᐅᔾᔪᑎᒋᔭᕆᐊᖃᖅᑕᖏᓐᓂᒃ, ᐃᑲᔪᖅᑕᐅᒋᐊᖃᕌᖓᒥᒃ, ᐅᖃᖃᑎᖃᕈᓐᓇᕐᓗᑎᒃ ᐊᒻᒪ ᐃᑲᔪᖅᑐᐃᔨᖃᕐᓗᑎᒃ ᑲᓇᑕᓕᒫᒥᑦ.

“ᓱᕈᓯᕗᑦ ᐅᖃᐅᑎᖃᑦᑕᖅᑕᕗᑦ ᑭᐅᖃᑦᑕᕆᐊᖃᕐᓂᖏᓐᓂᒃ ᐅᖄᓚᒍᑦᑕ ᓲᖃᐃᒻᒪ ᐱᓇᓱᒍᑎᖏᓐᓂᒃ ᑭᖑᕙᖅᑎᑦᑕᐃᓕᒪᖃᑦᑕᕋᑦᑎᒍᑦ. ᐅᓇ ᖃᐅᔨᒪᑎᑦᑎᒍᑎᐅᔪᖅ ᐃᑲᔪᕈᓐᓇᖃᑦᑕᕐᓂᑦᑎᓐᓂᒃ ᐊᒻᒪᓗ ᓂᕆᐅᒋᓇᔭᖅᖢᑎᒍᑦ ᐃᓚᐅᑦᑎᐊᕆᐊᖃᕐᓂᕐᒥᑦ ᐱᓕᕆᖃᑎᒌᖕᓂᒃᑯᑦ,” ᐅᖃᖅᑐᖅ ᐊᒡᓘᒃᑲᖅ, ᑖᓐᓇᓕ ᐃᓕᓐᓂᐊᒃᑲᓐᓂᖅᑐᖅ ᓇᓗᓇᐃᒃᑯᑎᒃᓴᒧᑦ ᐅᕙᓂ ᔫᓂᕘᓯᑎ ᐊᕝ ᐋᑐᕚᒥ ᐊᒻᒪᓗ ᐃᓱᒪᓪᓗᓂ ᐋᓐᓂᐊᕕᖕᒥ ᐃᓱᒪᓕᕆᔨᙳᕈᒪᓪᓗᓂ.

ᐸᖕᓂᕐᑑᒥᐅᑕᖅ ᓇᐃᑕᓐ ᒪᓐᓂᐊᐱᒃ, 18, ᕿᓯᖕᒥ ᐊᐃᑭᑦᑐᕐᓯᒪᓪᓗᓂ ᐋᓐᓄᕌᖏᑦᑕ ᓯᓚᑖᒍᑦ, ᑐᓂᔭᐅᕗᖅ $100,000 ᐅᑭᐅᕐᑕᖅᑐᕐᒥ ᐱᓕᕆᓕᕈᒪᓕᖅᑎᑦᑎᓂᕐᒧᑦ ᓵᓚᒃᓴᐅᓯᐊᕐᒥ (AIP) ᐃᓅᓱᒃᑐᓄᑦ ᑭᒡᒐᖅᑐᐃᓪᓗᓂ ᐃᓕᖁᓯᒃᑯᑦ ᖃᓄᐃᓕᐅᕈᓯᕐᓂᒃ ᐱᓕᕆᔪᓂᒃ.

ᐅᓇ ᐃᑲᔪᖅᑐᐃᔪᒪᓂᖅ ᐊᒻᒪ ᐃᑲᔪᖃᑦᑕᕈᒪᓂᖅ ᐅᖃᐅᓯᕆᔭᖓ ᑭᐅᕋᓐ ᐊᒡᓘᒃᑲᐅᑉ ᐊᔾᔨᐸᓗᖓᒎᖓᔪᖅ ᐱᕈᖅᐸᓪᓕᐊᑎᓪᓗᒍ ᖁᕕᐊᒋᓚᐅᕐᓯᒪᔭᖓᓂᒃ. ᐊᑦᑕᖓ ᓲᓴᓐ ᒪᓕᒍᒥᓇᖅᑐᑐᐊᖑᓚᐅᙱᒻᒪᑦ ᐃᓚᒌᓂᒃ.

“ᐃᓚᖃᓚᐅᕋᑦᑕ ᖃᓄᐃᓕᐅᕐᓯᒪᒻᒪᕆᒃᑐᓂᒃ, ᑕᐃᒪᓕ ᐃᓱᒪᓇᐃᓐᓇᐅᔭᖅᐳᖅ ᐊᔪᕐᓇᙱᓐᓂᖓᓂᒃ,” ᐊᒡᓘᒃᑲᖅ ᐅᖃᖅᑐᖅ. “ᐃᓛᓐᓂᒃᑯᑦ ᑕᐅᑐᙳᐊᕈᓐᓇᙱᓐᓇᑦᑕ ᑎᑭᐅᓗᑕ ᐋᖅᑭᒃᓯᒪᒐᓱᒃᑕᑦᑎᓐᓄᑦ, ᑭᓯᐊᓂᓕ ᑕᐅᑐᒃᑯᑦᑕ ᐃᓄᖕᓂᑦ ᑕᐃᒪᐃᑦᑐᓂᒃ, ᑕᐃᒪᓕ ᑕᐅᑐᙳᐊᕈᓐᓇᖅᐳᒍᑦ ᑕᐃᒪᐃᑦᑐᓐᓇᕐᓂᑦᑎᓐᓂᒃ.

“ᐋᖅᑭᒃᓯᒍᑦᑕ ᐃᓕᖅᑯᓯᐅᓕᕐᓂᐊᖅᑐᓂᒃ ᐊᓂᒍᐃᒍᑎᒃᓴᓂᒃ ᐃᓕᓐᓂᐊᒃᑲᓐᓂᕈᑎᒃᑯᑦ, ᐊᒻᒪᓗ ᐃᖅᑲᓇᐃᔮᒃᓴᓄᑦ ᐱᕙᓪᓕᐊᔪᓕᕆᓂᕐᒥ ᓱᕈᓯᕐᓄᑦ ᓄᓇᕗᒥᑦ ᐊᒻᒪ ᓄᓇᑦᓯᐊᕐᒥ, ᐊᒻᒪᓗ ᐃᒪᐃᓕᖓᑎᓪᓗᒋᑦ ᖃᓄᐃᓕᐅᕈᓐᓇᖅᑐᑎ ᖃᓄᐃᓕᐅᕈᒪᔭᕐᓂᒃ, ᑕᐃᒪᓕ ᐊᓯᙳᖅᑎᑦᑎᓇᔭᖅᐳᒍᑦ. ᑕᒪᓐᓇᓕ ᑕᐅᑐᙳᐊᖅᑕᕗᑦ.”

ᐊᔾᔨᒌᒃᑐᓂᒃ ᓵᓚᒃᓴᐅᓯᐊᕐᓂᖏ ᐊᑦᑕᒌ ᑕᐃᒪᐃᑦᑐᑑᓚᐅᙱᓚᖅ ᑕᒪᑐᒪᓂ ᐊᕐᕌᒍᒥᑦ ᓵᓚᒃᓴᐅᓯᐊᖅᑐᓂᒃ ᐅᕙᓂ ᐅᑭᐅᕐᑕᖅᑐᕐᒥ ᐱᓕᕆᓕᕈᒪᓕᖅᑎᑦᑎᓂᕐᒧᑦ ᓵᓚᒃᓴᐅᓯᐊᓕᕆᓂᕐᒥ (AIP).

ᐃᓅᓱᒃᑐᖅ ᓵᓚᒃᓯᐊᓯᐊᓚᐅᕐᑐᖅ ᐃᓅᓱᒃᑐᓅᖓᔪᓄᑦ ᑕᒪᑐᒪᓂ ᐊᕐᕌᒍᒥ ᐋᖅᑭᒃᓱᐃᓚᐅᕐᓯᒪᔪᖅ ᐊᖑᓇᓱᒍᓐᓇᕐᓂᕐᒧᑦ ᐱᓕᕆᐊᒃᓴᒥᑦ—ᐊᒻᒪᓗ ᐱᓇᓱᓕᕐᖢᓂ ᐅᑭᐅᕐᑕᖅᑐᕐᒥ ᐱᓕᕆᓕᕈᒪᓕᖅᑎᑦᑎᓂᕐᒧᑦ ᓵᓚᒃᓴᐅᓯᐊᒥᒃ (AIP)—ᐃᑲᔪᖅᑕᐅᓪᓗᓂ ᐅᑯᓇᙵᑦ ᐅᑭᐅᕐᑕᖅᑐᕐᒥ ᐃᓅᓱᒃᑐᑦ ᐱᔨᑦᑎᕋᐅᑎᓕᖕᓂᑦ, ᑖᒃᑯᐊᓗ ᐱᒋᐊᓕᕐᓂᑯᑦ ᐅᑭᐅᕐᑕᖅᑐᕐᒥ ᐃᓅᓱᒃᑐᑦ ᐊᑭᐊᓃᑦᑐᑦ ᐱᓕᕆᐊᑎᒍᑦ.

ᐸᖕᓂᕐᑑᕐᒥᐅᑕᖅ ᓇᐃᑕᓐ ᒪᓐᓂᐊᐱᒃ, 18, ᐅᐱᕐᖔᖅ ᐊᓂᒍᐃᓂᐊᕋᓱᒋᓪᓗᓂ ᐃᓕᓐᓂᐊᕐᕕᐊᓗᖕᒥ, ᐃᓚᐅᓚᐅᕐᓯᒪᖕᒪᑦ ᐅᑭᐅᕐᑕᖅᑐᕐᒥ ᐃᓅᓱᒃᑐᑦ ᐱᔨᑦᑎᕋᐅᑎᓕᖕᓄᑦ ᐱᓕᕆᐊᒥ ᐋᑐᕚᒥ ᐅᑭᐊᒃᓵᖅ ᐊᒻᒪ ᐱᓕᕆᖃᑎᖃᖅᖢᓂ ᐋᖅᑭᒃᓱᐃᓚᐅᕐᓯᒪᔪᑦ ᑕᓪᓕᒪᓄᑦ ᓄᓇᓕᖕᓄᑦ ᑐᒃᓯᕋᐅᑎᒥ ᐆᒧᖓ ᐅᑭᐅᕐᑕᖅᑐᕐᒥ ᐱᓕᕆᓕᕈᒪᓕᖅᑎᑦᑎᓂᕐᒧᑦ ᓵᓚᒃᓴᐅᓯᐊᕐᒥᑦ (AIP) ᑕᐃᔭᐅᔪᒥᒃ ᐃᓕᖁᓯᒃᑯᑦ ᐱᓕᕆᐊᒃᓴᑦ (Trades of Tradition).

ᐃᓕᖁᓯᒃᑯᑦ ᐱᓕᕆᐊᒃᓴᑦ ᐃᓅᓱᒃᑐᓂᒃ ᐃᓐᓇᑐᖃᕐᓂ ᐱᖃᑎᖃᖅᑎᑦᑎᓗᑎᒃ ᒪᑯᓂᖓ, ᐅᓇᑕᖅᑐᒃᓴᙳᐊᓂᒃ, ᕿᓚᐅᔾᔭᖅᑎᓂᒃ ᐊᒻᒪ ᒥᕐᓱᖅᑎᓂᒃ ᐊᔪᕈᓐᓃᕐᓴᖅᑎᑕᐅᓗᑎᒃ ᐃᓕᖁᓯᒃᑯᑦ ᐱᓕᕆᔾᔪᓯᐅᔪᓂᒃ. ᐅᓇᒃ $100,000 ᓵᓚᒃᓴᐅᓯᐊᕆᔭᐅᔪᖅ ᐊᕕᒃᑐᖅᑕᐅᓂᐊᖅᑐᖅ ᐱᓕᕆᐊᖑᔪᓄᑦ ᓇᓕᒨᒌᓂᒃ ᐅᑯᓄᖓ ᓄᓇᓕᖕᓄᑦ ᐸᖕᓂᕐᑑᖅ, ᖃᒪᓂᑦᑐᐊᖅ, ᕗᐊᑦ ᐳᕌᕕᑕᓐᔅ, ᐃᒡᓗᓕᒃ ᐊᒻᒪ ᖃᒪᓂᑦᑐᐊᖅ.

ᐃᖃᓗᖕᓂ ᓄᓇᓕᒃ ᐳᕆᑦᓂ ᒪᐃᓴᓐ, ᑕᓕᕐᐱᐊᓂᒃ, ᐊᒻᒪ ᓖᑎᐊ ᐃᔨᔅᓯᐊᖅ ᑐᓂᔭᐅᕘᒃ $100,000 ᐅᑭᐅᕐᑕᖅᑐᕐᒥ ᐱᓕᕆᓕᕈᒪᓕᖅᑎᑦᑎᓂᕐᒧᑦ ᓵᓚᒃᓴᐅᓯᐊᕐᒥ (AIP) ᐃᓅᓱᒃᑐᓄᑦ ᐆᒧᐊ ᕿᑭᖅᑖᓗᖕᒥ ᓯᓚᒥ ᐃᓕᓐᓂᐊᕈᑎᓕᕆᓂᕐᒧᑦ.

ᒪᓐᓂᐊᐱᒃ ᐅᖃᓚᐅᕐᑐᖅ ᐱᓇᓱᐊᕈᓯᐅᓚᐅᕐᑐᒥ ᐅᓄᕐᑐᑦ ᐃᓅᓱᒃᑐᑦ ᐸᖕᓂᕐᑑᒥ ᖃᐅᔨᒪᙱᓐᓂᕋᖅᖢᓂᒋᑦ ᖁᕕᐊᓇᕈᓘᔭᕐᓂᖓᓂᒃ ᐊᒻᒪ ᑐᑭᖃᕐᓂᖓᓂᒃ ᐊᐅᓪᓛᕐᓯᒪᓪᓗᓂ ᐊᒻᒪᓗ ᐊᖑᓇᓱᑲᑕᒃᖢᓂ ᐃᓚᒌᖑᓪᓗᑎᒃ ᓲᖃᐃᒻᒪ ᐱᓯᒪᙱᓗᐊᓕᕐᒪᑕ ᐱᔾᔪᑎᐅᓇᔭᖅᑐᓂᒃ, ᐊᔪᙱᓐᓂᕐᒥᒃ ᐊᒻᒪ ᐱᓇᓱᒍᓐᓇᕐᓂᕐᒥᑦ. ᐊᖑᓇᓱᒋᐊᕋᓗᐊᖅᖢᓂ ᐊᒻᒪ ᑭᓱᙱᓪᓗᓂ ᐅᑎᕐᓗᓂ, ᓱᓕ ᑎᒥᒧᑦ ᐊᑲᐅᓂᕐᓴᕙᒃᑐᖅ ᐊᒻᒪ ᐃᓱᒪᒧᑦ ᓄᓇᐃᓐᓇᕐᒦᖢᓂ, ᐅᖃᖅᑐᖅ. ᐊᒻᒪᓗ ᐃᓅᓱᒃᑑᖃᑎᖏᓐᓂᒃ ᑕᒪᑐᒥᖓ ᐊᑐᖃᑦᑕᖁᔨᓪᓗᓂ.

“ᐃᓱᒪᔪᖓ ᐃᑲᔪᕈᓐᓇᕐᓂᐊᓂᖓᓂᒃ ᐃᖕᒥᖕᓂᒃ ᐃᓱᒫᓗᙱᓗᐊᖅᑐᓂᒃ. ᓄᓇᒥ ᑕᑯᑲᑕᒍᓐᓇᕐᒪᑕ ᐊᒻᒪ ᖁᕕᐅᓱᑐᐃᓐᓇᕐᓗᑎᒃ, ᐃᓄᖕᓃᒍᓐᓇᕐᓯᓗᑎᒃ, ᐊᒻᒪ ᐅᖃᓪᓚᖃᑎᖃᕈᓐᓇᕐᓯᓗᑎᒃ ᑭᓇᑐᐃᓐᓇᕐᒥᓐ, ᑭᓱᓕᕆᔭᒃᓴᖃᓕᕐᓗᑎᒃ, ᐊᒻᒪ ᐃᓐᓇᑐᖃᕐᓂᒃ ᑐᓵᕙᒡᓗᑎᒃ. ᐱᐅᓇᔭᕐᒪᑦ ᐊᓯᐊᓅᓚᐅᑲᖃᑦᑕᕐᓗᑎᒃ,” ᐅᖃᖅᑐᖅ.

ᐊᓯᖓᑦᑕᐅᖅ ᓄᓇᕗᑦ ᐃᓅᓱᒃᑐᖏᓐᓄᑦ ᐱᓕᕆᐊᖃᖅᑐᖅ ᑐᓂᔭᐅᓚᐅᕐᒥᔪᖅ $100,000 AIP ᑮᓇᐅᔭᒃᓴᒥᑦ ᐅᓇ ᕿᑭᖅᑖᓗᒃᒥᑦ ᐃᓅᓱᒃᑐᑦ ᓯᓚᒥ ᐃᓕᓐᓂᐊᖅᑎᑦᑎᓂᕐᒥ ᐱᓕᕆᐊᒍᔪᖅ, ᐊᐅᓚᑕᐅᓪᓗᓂ ᐃᖃᓗᖕᒥᐅᑕᒧᑦ ᐳᕆᑦᓂ ᒪᐃᓴᓐᒧᑦ. ᐱᓕᕆᐊᒃᓴᖅ ᐃᓕᓐᓂᐊᖅᑎᑦᑎᒍᑎᐅᔪᒪᔪᖅ ᓄᓇᐃᓐᓇᕐᒥ ᐃᓅᓇᓱᖕᓂᕐᒥᑦ ᕿᑭᖅᑖᓗᖕᒥᐅᑦ ᐃᓅᓱᒃᑐᖏᓐᓂᒃ ᐊᒻᒪᓗ ᑕᒪᒃᑯᓄᖓ ᐳᓚᕋᖅᑐᓕᕆᓂᕐᒥ ᐱᓕᕆᐊᖃᕈᓐᓇᓕᕐᓗᑎᒃ, ᒪᐅᓇ ᐊᐅᓪᓚᖃᑎᖃᕐᓂᕐᒥᒃ ᐊᒻᒪ ᐊᖑᓇᓱᒃᑎᑦᑎᓂᕐᒥᒃ.

ᐱᓕᕆᐊᖃᕈᑎᐅᓕᕋᔭᖅᑐᖅ ᐃᓄᒋᐊᐸᓗᖕᓂ ᕿᒧᒃᓯᖃᑕᕐᓂᕐᒥ ᐃᖃᓗᖕᓂᑦ ᑭᒻᒥᕈᒻᒧᑦ.

ᓯᓚᒥ ᐃᓕᓐᓂᐊᕐᓂᖅ ᐱᕕᖃᕈᑎᐅᓇᔭᖅᑐᖅ ᐃᓅᓱᒃᑐᓂᒃ ᐃᓐᓇᑐᖃᕐᓂᒃ ᑲᑎᖃᑎᖃᑦᑎᐊᕈᓐᓇᓕᕐᓗᑎᒃ ᐊᒻᒪ ᐊᓯᖏᓐᓂᒃ ᐃᓕᖁᓯᕕᓂᕐᓂᒃ ᖃᐅᔨᒪᔨᐅᔪᓂᒃ, ᒪᐃᓴᓐ ᐅᖃᖅᑐᖅ. ᑭᓯᐊᓂᓕ ᑕᒪᑐᒪ ᐅᖓᑖᓅᕐᒥᖕᒪᑦ.

“ᐋᖅᑭᒃᑕᐅᓚᐅᕐᓯᒪᔪᖅ ᐃᓅᓱᒃᑐᓂ ᐱᓕᕆᐊᖃᕈᓐᓇᖅᑐᓂᒃ ᐊᒻᒪ ᐱᕕᖃᕈᓐᓇᖅᑎᓪᓗᒋᑦ ᓄᓇᐃᓐᓇᒨᖃᑕᐅᓂᕐᒥᒃ ᐊᒻᒪ ᐊᓃᑲᑕᖕᓂᕐᒥᓐ, ᐱᓕᕆᓂᕐᓴᐅᔪᓐᓇᖁᓪᓗᒋᑦ ᐊᒻᒪ ᐱᓕᕆᖃᑎᒌᒍᓐᓇᓕᕐᓗᑎᒃ. ᑕᒪᒃᑯᐊ ᐃᓅᖃᑎᒌᖕᓂᕐᒨᖓᔪᑦ ᐊᒻᒪᓗ ᓄᓇᓕᖕᓃᕐᓂᖅ ᐃᑲᔪᕈᑎᐅᓇᔭᖅᑐᖅ ᐃᓱᒪᒃᑯᑦ ᐊᒻᒪ ᖃᓄᐃᑦᑕᐃᓕᓂᕐᒧᑦ,” ᐅᖃᖅᑐᖅ.

ᑭᖑᓕᖅᐹᖅ ᓄᓇᕗᒥᐅᓅᖓᔪᓄᑦ ᓵᓚᒃᓴᐅᓯᐊᖃᑕᐅᓚᐅᕐᒥᔪᖅ ᐅᓇ ᐃᖃᓗᖕᓃᑦᑐᖅ ᓄᓇᕗᒥᑦ ᒪᓕᒐᓕᕆᓂᕐᒥ ᐃᓕᓐᓂᐊᒐᒃᓴᖅ, ᐊᐅᓚᑕᐅᓪᓗᓂ ᓯᑏᕙᓐ ᒫᓐᓱᒧᑦ ᐊᒻᒪ ᐋᔫ ᐲᑕᒧ. ᒫᓐᓇ ᐱᓕᕆᐊᕆᔭᐅᔪᖅ ᑐᓂᔭᐅᒃᑲᓐᓂᖅᑐᖅ $140,000 AIP ᑕᒪᒃᑯᐊ ᐊᓂᒍᐃᓯᒪᔪᑦ ᐃᓕᓐᓂᐊᒃᑲᓐᓂᕈᑎᒃᓴᖏᓐᓂᒃ ᐊᒻᒪ ᑐᙵᕕᖃᑦᑎᐊᕈᓐᓇᕐᓯᓂᕐᒧᑦ ᐃᓄᐃᑦ ᐃᓕᖁᓯᖏᑦᑎᒍᑦ ᒪᓕᒐᖏᓐᓂᒃ ᒪᐅᓇ ᐅᑭᐅᕐᑕᖅᑐᕐᒥ ᐃᓕᓐᓂᐊᖅᑎᑦᑎᓂᒃᑯᑦ ᐅᕙᓂ ᔫᓂᕘᓯᑎ ᓛᑉᓚᓐᒥ.

ᐅᓇ ᐅᑭᐅᕐᑕᖅᑐᕐᒥ ᐱᓕᕆᓕᕈᒪᓕᖅᑎᑦᑎᓂᕐᒧᑦ ᓵᓚᒃᓴᐅᓯᐊᓕᕆᓂᕐᒥ (AIP) ᑲᓇᑕᒥ ᐊᖏᓂᖅᐹᖑᔪᖅ ᐅᑭᐅᕐᑕᖅᑐᕐᒥᐅᓄᑦ ᓵᓚᒃᓴᐅᓯᐊᖅᑖᕈᑎᓕᕆᓂᕐᒥᒃ ᐊᒻᒪ ᑐᓐᓂᓯᕙᒃᖢᑎᒃ ᐱᓕᕆᖃᑎᒌᓄᑦ ᐊᑕᐅᓯᑐᐊᙳᙱᑦᑐᓄᑦ ᐊᕐᕌᒍᑕᒫᑦ ᖁᕕᐊᓲᑎᖃᕐᓂᕐᒧᑦ ᐃᓚᖏᓐᓂᒃ ᐅᑭᐅᕐᑕᖅᑐᕐᒥᑦ ᐱᓕᕆᐊᖑᕙᒃᑐᓂᒃ ᐊᒻᒪ ᐱᓕᕆᐊᖑᔪᒪᔪᓂᒃ.

Share This Story

(0) Comments

Join the Conversation

Your email address will not be published. Required fields are marked *

*