ᐃᓅᓱᒃᑐᑦ ᑲᐱᔭᐅᔭᕆᐊᓖᑦ ᐅᐸᒍᑎᓂᖏᑦ ‘ᑐᓴᕐᓂᖅᑐᐊᓗᐃᑦ’: ᓄᓇᕗᒥᑦ ᓘᒃᑖᓄᑦ ᐊᖓᔪᖅᑳᖅ

ᓯᕗᓪᓕᕐᓂᒃ 48-ᓂ ᐃᑲᕐᕋᓂᒃ 639-ᓂ ᑲᐱᓯᓚᐅᖅᑐᑦ ᐆᒥᖓ ᕙᐃᓱ (Pfizer-BioNTech) ᑲᐴᑎᒧᑦ

ᐱᒋᐊᖅᖢᓂ ᔫᓂ 17-ᒥ, ᓄᓇᕗᒥᑦ 639-ᓂ ᐃᓅᓱᒃᑐᓂᒃ ᑲᐱᓯᓯᒪᓕᖅᑐᑦ Pfizer-BioNTech ᑲᐴᑎᒥ ᐃᖃᓗᖕᓃᑦᑐᑦ ᐅᓄᓛᖑᓪᓗᑎ. (ᐊᔾᔨᓕᐅᖅᑕᐅᔪᖅ ᐃᐊᒪ ᑐᕌᓐᑐ)

By ᑕᔅᑎᓐ ᐸᑖᕐ

For an English version of this story, see Youth vaccine turnout ‘good news’: Nunavut top doctor

ᓄᓇᕗᒥ ᐃᓅᓱᒃᑐᓂᒃ ᐅᑭᐅᖃᖅᑐᓂᒃ 12-ᓂ 17-ᒧ ᑲᐱᓯᑲᑕᓯᒋᐊᓚᐅᖅᑐᑦ ᔫᓂ 15-ᖑᑎᓪᓗᒍ, ᐊᒻᒪᓗ ᑕᒪᑐᒧᖓ ᐃᓱᒪᒋᔭᐅᓂᐅᔪᑦ ᓈᒻᒪᑐᐃᓐᓇᖅᓯᒪᑲᑕᒃᖢᑎᒃ, ᐄᓕ ᐅᕘᓇ ᓄᓇᕗᒥᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ ᐊᖓᔪᖅᑳᒧᑦ.

ᑐᓴᒐᒃᓴᓂ ᐅᖃᐅᓯᖃᖅᑎᓪᓗᒍ ᔫᓂ 17-ᒥ, ᓘᒃᑖᖅ ᒪᐃᑯᓪ ᐹᑐᓴ ᑐᓴᖅᑎᑦᑎᓚᐅᖅᓯᒪᔪᖅ 638-ᓂ ᑲᐱᓯᓯᒪᓂᕋᓕᖅᖢᑎᒃ ᐆᒥᖓ Pfizer-BioNTech ᑲᐴᑎᒥ ᓯᕗᓪᓕᕐᓂᒃ 48 ᐃᑲᕐᕋᓂᒃ, ᐃᖃᓗᖕᓂ ᑲᐱᓯᑲᑕᓛᖑᓪᓗᑎᒃ.

“ᑕᒪᓐᓇ ᑐᓴᒐᒃᓴᑦᑎᐊᕙᒻᒪᕆᐊᓗᒃ,” ᐅᖃᖅᑐᖅ.

ᑲᐱᓯᑲᑕᖕᓂᐅᔪᖅ ᐃᖃᓗᖕᓂ ᐱᒋᐊᓚᐅᖅᑎᓪᓗᒍ ᐊᒻᒪ ᐃᓅᓱᒃᑐᓄᑦ ᑲᐱᓯᑲᑕᒡᕕᒃᓴᒥ ᐱᒋᐊᖅᑎᑦᑎᓚᐅᕐᒥᔪᑦ ᐸᖕᓂᖅᑐᒥ, ᒥᑦᑎᒪᑕᓕᒃ, ᕿᑭᖅᑖᖅᔪᐊᖅ, ᓴᓂᕋᔭᒃ, ᖃᐅᓱᐃᑦᑐᖅ, ᓇᐃᔮᑦ, ᑲᖏᖅᑐᒑᐱᒃ, ᐃᒡᓗᓕᒃ ᐊᒻᒪ ᐃᒃᐱᐊᕐᔪᒃᒥ.

ᔫᓂ 14-ᒥᑦ, ᒫᓂ 18,085 ᐃᓄᐃᑦ ᓄᓇᕗᒥᑦ ᓯᕗᓪᓕᖅᐹᒥ ᑲᐱᔭᐅᓯᒪᓕᓚᐅᖅᑐᑦ ᒪᑑᓇ ᑲᐴᑎᒥ ᐊᒻᒪᓗ 15,169 ᐃᓄᐃᑦ ᑲᐱᔭᐅᕌᓂᒃᓯᒪᓕᖅᖢᑎᒃ.

ᐅᓪᓗᕆᓕᖅᑕᖓᓂ ᑐᒡᓕᐊᓂ ᐋᓐᓂᐊᖃᓕᖅᑐᒥᒃ ᑐᓴᕐᓇᙱᑦᑐᖅ ᐅᕝᕙᓘᓐᓃᑦ ᖃᓄᐃᑦᑐᓐᓃᖅᐸᓪᓕᐊᔪᓂᒃ ᓄᓇᕗᒥᑦ. ᔫᓂ 17-ᖑᑎᓪᓗᒍ 8-ᖑᓚᐅᖅᓯᒪᖕᒪᑕ ᐋᓐᓂᐊᖃᕐᓂᕋᖅᑕᐅᔪᑦ, ᑕᒪᕐᒥᒡᓗ ᐃᖃᓗᖕᓃᖢᑎᒃ.

ᐹᑐᓴᓐᒧᓪᓕ, ᐅᓇ ᑐᓴᕐᓂᑐᐃᓐᓇᖅᑐᖅ, ᓲᖃᐃᒻᒪ ᖃᖓᑦᑎᐊᓵᖅ ᐱᑕᖃᓵᓚᐅᕐᒪᑦ ᐋᓐᓂᐊᖃᖅᑐᓂᒃ ᐊᒻᒪᓗ ᓇᓗᓇᐃᖅᑕᐅᓪᓗᑎᒃ ᒪᕐᕉᒃ ᐃᓕᓐᓂᐊᖅᑎᐅᓂᖏᓐᓂᒃ ᐋᓐᓂᐊᖃᓕᖅᑑᒃ.

ᓄᓇᕗᒥᑦ ᐃᓅᓱᒃᑐᓂᒃ ᑲᐱᓯᑲᑕᖕᓂᖅ ᐱᒋᐊᑦᑎᐊᕋᓗᐊᖅᑎᓪᓗᒍ, ᓄᓇᕗᑦ ᑕᒪᐃᓐᓂ ᑕᐅᑐᒃᖢᒍ ᑲᐱᓯᑲᑕᖕᓂᖏᑦ ᐅᑯᓄᖓ ᖃᓪᓗᓈᓂ ᑐᓴᒐᒃᓴᓕᐅᖅᑎᓄᑦ ᐅᑯᑎᑐᓇᖅ ᒍᓘᑉ ᐊᓐ ᒥᐊᓪ (Globe and Mail) ᐅᖃᐅᓯᐅᓯᒪᓕᖅᑐᑦ “ᓄᓇᕗᒥᑦ ᕿᓚᒥᕈᓗᒃ ᐅᓄᖅᑐᐊᓗᖕᓂᒃ ᐱᑎᑕᐅᓚᐅᖅᓯᒪᖕᒪᑕ ᑲᐴᑎᓂᒃ ᑭᓯᐊᓂᓕ ᐊᑦᑎᖕᓂᖅᐹᖑᔪᑦ ᑲᐱᔭᐅᔪᓂᒃ ᑲᓇᑕᓕᒫᖅ ᑕᐅᑐᒃᖢᒍ.”

“ᐃᓱᒫᓘᑎᒋᔭᕋᓕ ᑎᑎᕋᐅᓯᐅᑲᑕᒃᑐᑦ ᑕᐃᒪᓐᓇ ᐱᔾᔪᑎᖃᕆᐊᒃᓴᖏᓐᓄᑦ ᒪᑯᐊ ᐋᓐᓂᐊᖃᕐᓇᙱᑦᑐᓕᕆᔨᓄᑦ ᐃᖅᑲᓇᐃᔭᖅᑎᐅᔪᑦ ᑕᒻᒪᕐᓂᑰᔭᕆᐊᒃᓴᖏᓐᓂᒃ ᐅᕝᕙᓘᓐᓃᑦ ᓄᓇᕗᒻᒥᐅᑦ ᐊᔾᔨᒋᙱᑕᖓᓂᒃ ᐊᑐᖅᓯᒪᔭᕆᐊᒃᓴᖏᓐᓂᒃ ᖃᓪᓗᓈᓃᑦᑐᓂᒡᓕ,” ᐅᖃᖅᑐᖅ ᐹᑐᓴᓐ.

“ᓇᓕᐊᒃ ᑖᒃᑯᐊ ᓱᓕᙱᒻᒪᑕ.”

ᐹᑐᓴᓐᑯᑎᒍᓪᓕ, ᑲᐴᑎᑦ ᐳᓴᓐᑎᑎᒍ ᓄᓇᕗᒥᐅᑦ ᐱᔭᖏᑦ ᐊᒻᒪᓗ ᐊᑐᖅᓯᒪᓕᖅᑕᖏᑦ ᖁᑦᑎᖕᓂᖅᓴᐅᓂᕋᖅᖢᓂᒋᑦ ᐊᓯᖏᓐᓃᑦᑐᓂᒃ ᑲᒪᒋᔭᐅᔪᓂᒃ. ᐅᖃᓚᐅᕐᒥᔪᖅ ᓄᓇᕗᒥᑦ ᐳᓴᓐᑎᑎᒍᑦ ᑲᐱᔭᐅᕌᓂᑦᑎᐊᖅᑐᑦ ᖁᑦᑎᖕᓂᖅᓴᐅᓂᖏᓐᓂᒃ ᖃᓪᓗᓈᓃᑦᑐᓂᒡᓕ.

ᑲᓇᑕᒥ ᒐᕙᒪᒃᑯᑦ ᑲᑎᑉᐸᓪᓕᐊᔭᖏᑦ ᔫᓂ 5 ᑎᑭᖢᒍ ᓇᓗᓇᐃᖅᓯᓯᒪᔪᖅ ᓄᓇᕗᑦ ᐱᖓᔪᒋᔭᐅᓂᖓᓂᒃ ᑲᓇᑕᒥ, ᔫᑳᓐ ᐊᒻᒪ ᓄᓇᑦᓯᐊᑉ ᐅᖓᑎᑦᑎᐊᖓᓂᒃ, ᑕᐅᑐᒃᖢᒋᓪᓕ ᐅᓄᕐᓂᖏᑦ ᑲᐱᔭᐅᕌᓂᑦᑎᐊᖅᑐᑦ.

ᑭᓯᐊᓂᓕ ᑕᕝᕙᓂᑦᑕᐃᓐᓇᖅ ᑲᑎᑕᐅᕙᓪᓕᐊᔪᓂᒃ ᒐᕙᒪᑐᖃᒃᑯᓐᓄᑦ, ᓄᓇᕗᒥᑦ ᑭᖑᓪᓕᖅᐹᖑᑎᑕᐅᓯᒪᔪᖅ ᐳᓴᓐᑎᑎᒍᑦ ᐅᓄᕐᓂᖏᑦᑎᒍᑦ ᑲᐱᔭᐅᔪᑦ ᓯᕗᓪᓕᕐᒥᒃ ᑲᐱᔭᐅᕌᓂᖕᓂᑯᓂᒃ.

“ᐊᔾᔨᒌᙱᑦᑑᑎᒻᒪᕆᐊᓘᖕᒪᑕ ᐊᒃᑐᐃᒍᑎᐅᔪᑦ ᑕᒪᒃᑯᓄᖓ ᐃᓄᖕᓄᑦ ᐊᑕᐅᓯᕐᒥᙶᖅᑐᓄᓪᓘᓐᓃᑦ ᑲᐱᔭᐅᓂᐊᕆᐊᒃᓴᖏᓐᓄᑦ ᖃᓄᐃᓕᐅᒍᑎᐅᔪᓐᓇᖅᑐᑦ. ᐅᑭᐅᕆᔭᐅᔪᖅ ᐃᓚᒋᔭᐅᖕᒥᔪᖅ,” ᐅᖃᖅᑐᖅ ᐹᑐᓴᓐ.

“ᓄᑲᖅᖠᐅᒍᕕᓪᓕ ᑲᐱᔭᐅᓂᐊᕐᓂᕐᓂᒃ ᐅᑕᖅᑭᑎᑕᐅᓂᖅᓴᐅᓇᔭᖅᑐᑎᑦ ᑕᒪᓐᓇᓗ ᓄᓇᕗᒥ ᑕᐃᒪᐃᓕᖓᓂᖓ ᐊᔾᔨᒋᔭᐅᙱᒃᑭᓪᓗᒍ ᐊᓯᖏᓐᓂᒃ ᑲᓇᑕᒥᐅᑕᓂᒃ.”

ᓄᓇᕗᒥᑦ ᐃᓅᓱᒃᑐᖏᑦ ᑲᐱᔭᐅᔪᓐᓇᖅᓯᒐᓗᐊᖅᑎᓪᓗᒋᑦ, ᓲᕐᓗ ᓄᓇᕗᒻᒥᐅᑦ ᓇᑉᐸᖓᑕ ᓇᑉᐸᖏᑦ ᐅᑭᐅᖃᕐᒪᑕ 12 ᑐᖔᓂᒃ ᐊᒻᒪᓗ ᑲᐱᔭᐅᔪᓐᓇᙱᑎᑕᐅᓪᓗᑎᒃ.

ᑕᐅᑐᒃᖢᒋᓪᓗ ᐅᑯᐊ ᑯᐸᐃᒃ ᐅᕝᕙᓘᓐᓃᑦ ᒫᓂᑑᐸ, ᑖᒃᑯᐊᓗ ᐅᓄᖅᑎᒋᓂᖏᑦ ᐃᓅᓱᒃᑐᑦ ᐊᕐᕌᒍᖃᖅᑐᑦ 12 ᑐᖔᓂ ᒫᓂ 14 ᐳᓴᓐᑎᖏᓐᓃᓪᓗᐊᕐᒪᑕ ᑲᑎᖢᒋᑦ ᐃᓅᓕᒫᖏᑦ ᑖᒃᑯᐊ ᐳᕌᕕᓐᓯᐅᔪᑦ ᑕᐃᒪᓕ ᑕᒪᓐᓇ ᐊᔾᔨᒌᙱᓐᓂᖓ ᐅᔾᔨᕐᓇᓗᐊᖅᑐᖅ.

ᐹᑐᓴᓐᒧᓪᓕ, ᑐᒑᕋᐅᔪᖅ ᐊᔾᔨᑐᐃᓐᓇᕆᔭᖓ: “ᑭᒃᑯᑐᐃᓐᓇᑦᑎᐊᓂᒃ ᑲᐱᔭᐅᔪᓐᓇᖅᑐᓂᒃ ᑲᐱᔭᐅᖁᔨᔪᒍᑦ.”

ᓄᓇᓕᖕᓂ ᑲᐱᓯᑲᑕᖕᓂᖅ ᐃᓅᓱᒃᑐᓄᑦ ᐅᑭᐅᖃᖅᑐᓂᒃ 12-ᓗ 17-ᓗ ᐊᑯᓐᓂᖓᓂ ᑲᔪᓯᓂᐊᖅᑐ ᔪᓚᐃᓕᒫᒧᑦ.

Share This Story

(0) Comments