ᐃᓇᑕᐃ ᓚᐃᒃᒥᑦ ᐃᓄᐃᑦ ᐊᑯᓂᐊᓗᒃ ᐅᑕᖅᑭᔭᖓᓂᒃ ᒪᒥᐊᕝᕕᐅᓂ ᓅᑕᐅᓚᐅᕐᓯᒪᓂᖏᓐᓄᑦ

ᑲᓇᑕᐅᑉ ᒐᕙᒪᖓᑦ ᒪᒥᐊᓚᐅᕐᐳᑦ ᐃᓄᖕᓄᑦ ᑭᕙᓪᓕᕐᒥᐅᑕᓄᑦ ᐊᒻᒪ ᓯᕗᕚᖏᓐᓄᑦ ᓅᑎᑕᐅᓚᐅᕐᓯᒪᔪᓄᑦ ᐊᖏᕐᕋᖏᓐᓂᑦ 1940-ᖏᑦ ᐃᓱᓕᓕᖅᑎᓪᓗᒋᑦ ᐊᒻᒪ 1950-ᖏᓐᓂᒃ.

ᐊᕼᐃᐊᕐᒥᐅᑦ, ᐃᓅᖃᑎᒌᑦ ᓄᓇᖅᐸᓯᒃᑐᕐᒥᐅᑕᕕᓃᑦ ᐃᓄᐃᑦ ᒫᓐᓇ ᐊᕐᕕᐊᕐᒥᐅᑕᐅᓂᕐᓴᐅᓕᕐᑐᑦ, ᐱᒋᐊᓚᐅᕐᓯᒪᕗᑦ 1998-ᒥ ᑕᒪᑐᒧᖓ ᖃᐅᔨᒪᔭᐅᔪᒪᓂᕐᓴᐅᓕᕐᖢᑎᒃ ᐊᒻᒪ ᑮᓇᐅᔭᖅᑖᕋᓱᒃᖢᑎᒃ ᒐᕙᒪᑐᖃᒃᑯᓐᓂᑦ ᐊᒃᓱᕈᕈᑎᒋᓚᐅᕐᓯᒪᔭᖏᓐᓄᑦ ᐊᔾᔨᒌᙱᑦᑑᑎᓄᑦ ᓅᑕᐅᖃᑦᑕᓚᐅᕐᓯᒪᓂᖏᓐᓄᑦ.

ᑖᒃᑯᐊ ᐊᖏᕈᑎᖃᓕᓚᐅᕐᓯᒪᔪᑦ 5 ᒥᓕᐊᓐ ᑖᓚᓂ ᐋᑐᕚᒥ ᐊᕐᕌᓂᐅᓚᐅᕐᑐᖅ. ᔭᓄᐊᕆ 22-ᒥᑦ, ᒐᕙᒪᑐᖃᒃᑯᓪᓗ-ᓄᓇᖃᖅᑳᖅᑐᓄᓪᓗ ᒥᓂᔅᑕ ᑭᐅᕈᓕᓐ ᐸᓇᑦ ᐊᕐᕕᐊᓄᙵᐅᓚᐅᕐᓯᒪᕗᖅ ᐱᓪᓚᕆᒃᑯᑦ ᒪᒥᐊᑦᑕᖅᑐᖅᖢᓂ 21-ᓄ ᓱᓕ ᐃᓅᔪᓄᑦ ᐊᕼᐃᐊᕐᒥᐅᕕᓂᕐᓄᑦ, ᐃᓚᖏᓐᓄᑦ ᐊᒻᒪ ᓄᓇᖃᑎᖏᓐᓄᑦ.

“ᒪᒥᐊᑉᐳᒍᑦ,” ᐸᓇᑦ ᐅᖃᖅᑐᖅ.

“ᒪᒥᐊᐳᒍᑦ ᐊᕼᐃᐊᕐᒥᐅᑦ ᓅᓚᐅᕐᓯᒪᒐᑦᑎᒍᑦ ᐃᓇᑕᐃ ᓚᐃᒃᒥᑦ. ᒪᒥᐊᑉᐳᒍᑦ ᐊᕼᐃᐊᕐᒥᐅᑦ ᐊᒃᓱᕈᖅᑎᒻᒪᕆᓚᐅᕐᓯᒪᒐᑦᑎᒍᑦ—ᑭᓲᙱᑦᑐᑎᑐᑦ ᐃᒃᐱᒋᔭᖃᖅᖢᑎᒃ, ᐱᕐᓕᕋᖅᖢᑎᒃ ᐊᒻᒪ ᐃᓅᔪᓐᓃᕐᖢᑎᒡᓗ—ᖃᓄᐃᓕᐅᕐᓂᕕᓂᑦᑎᓐᓄᑦ. ᒪᒥᐊᑉᐳᒍᑦ ᐱᑦᑎᐊᖅᑕᐅᓚᐅᕐᓯᒪᙱᓐᓇᔅᓯ, ᐃᓱᒪᒋᔭᐅᑦᑎᐊᓚᐅᕐᓯᒪᙱᓐᓂᔅᓯᓐᓄᑦ ᑕᐃᒪᐃᑕᐅᔭᕆᐊᖃᙱᑎᓪᓗᓯ,” ᐸᓇᑦ ᐅᖃᖅᑐᖅ.

“ᑭᖑᓪᓕᖅᐹᒥᓪᓕ, ᒪᒥᐊᑉᐳᒍᑦ ᐊᑯᓂᐊᓗᒃ ᐱᓕᕆᐊᖑᓯᒪᓂᖓᓂᒃ ᓅᑕᐅᓂᕕᓂᔅᓯᓐᓄᑦ ᐱᓇᓱᐊᕐᓯᒪᔭᓯ ᐊᒻᒪᓗ ᐱᑦᑎᐊᖅᑕᐅᙱᔾᔪᑎᕕᓃ ᑕᐃᔅᓱᒪᓂ.”

ᐸᓇᑦ ᓇᓗᓇᐃᓚᐅᕐᑐᖅ ᓅᑕᐅᑎᑦᑎᓂᖅ ᐃᒪᓐᓇᐅᓚᐅᕐᓯᒪᓂᖓᓂᒃ “ᓄᓇᖃᑎᒌᓕᖅᑎᑦᑎᓂᕐᒥᒃ ᐃᓱᒪᒋᔭᖃᙱᖢᑎᒃ ᐊᒃᑐᐊᓂᕆᔭᐅᔪᓂᒃ ᑕᒫᓂ ᓄᓇᒥ.”

1949-ᒥ, 80 ᐃᓚᒌᑦ ᓅᑕᐅᓚᐅᕐᓯᒪᖕᒪᑕ ᐊᖏᕐᕋᖏᓐᓂᒃ ᐊᖑᓇᓱᒡᕕᖏᓐᓂᒡᓗ ᐃᓇᑕᐃ ᓚᐃᒃ ᖃᓂᒋᔮᓃᑦᑐᓂᒃ—ᓯᕗᓕᖅᐹᖅ ᐊᒥᓱᓂ ᐊᓯᐊᓅᖅᑎᑕᐅᑲᑕᓕᖅᑎᓪᓗᒋ ᐊᕐᕌᒍᓂᒃ ᖁᓕᓂᒃ ᐊᒡᒋᖅᑐᓂᒃ.

ᐊᕐᕌᒍᓂ ᖁᓕᓂᒃ ᐃᓚᒌᖑᔪᑦ ᐊᑐᑲᑕᓕᓚᐅᕐᓯᒪᕗᑦ ᓂᕿᖃᑦᑎᐊᑲᑕᙱᓐᓂᕐᒥᒃ, ᐱᓕᕐᓱᑲᑕᖕᓂᕐᒥᒃ ᐊᒻᒪᓗ ᐃᓅᔪᓐᓃᑲᑕᒃᑐᓂᒃ.

1959 ᑎᑭᑎᓪᓗᒍ, ᐊᒥᐊᒃᑯᒋᔭᐅᔪᑦ ᐃᓚᒌᑦ ᓄᓇᓕᖕᓄᐊᓚᐅᕐᓯᒪᕗᑦ ᑕᓯᐅᔭᕐᔪᐊᑉ ᓯᒡᔭᖓᓃᑦᑐᓂᒃ, ᐃᓚᐅᓪᓗᓂ ᑕᐃᕕᑦ ᓯᖁᐊᒃ—ᑕᐃᔅᓱᒪᓂ 7-ᓂ ᐅᑭᐅᖃᓪᓗᐊᓕᖅᖢᓂ—ᐃᓚᖏᓪᓗ.

ᓯᖁᐊᕐᓗ ᐊᒥᐊᒃᑯᒋᔭᐅᔪᓪᓗ ᐃᓅᔪᐃᑦ ᓅᑕᐅᓂᑯᑦ ᐋᕿᒃᓯᖃᑕᐅᓕᓚᐅᕐᓯᒪᕗᑦ ᐊᕼᐃᐊᕐᒥᐅᑦ ᓅᑕᐅᓂᑯᐃᑦ ᑲᑐᔾᔨᖃᑎᒌᓂ 1998-ᖑᑎᓪᓗᒍ ᓇᓗᓇᐃᖅᑕᐅᓯᒪᖁᔨᓂᕐᒧᑦ ᖃᓄᐃᓕᐅᕈᓯᕕᓂᖏᑦ ᐊᒻᒪᓗ ᑮᓇᐅᔭᖅᑖᕋᓱᒃᖢᑎᒃ ᐊᓯᐅᔨᓯᒪᔭᖏᓐᓄᑦ.

ᐊᕐᕕᐊᓃᓚᐅᕐᑐᖅ ᔭᓄᐊᕆ 22-ᒥᑦ ᒪᒥᐊᕝᕕᐅᔭᖅᑐᖅᖢᓂ, ᖃᓄᐃᓕᐅᕐᓂᐅᔪᖅ ᐃᒃᐱᒍᓱᖕᓇᕐᓂᐅᓪᓗᓂ ᐊᒻᒪ ᐊᑐᕐᓂᐅᓪᓗᓂ ᐊᑐᖅᑕᐅᙱᓐᓇᖏᑦᑐᒥᒃ.

ᑕᐃᕕᑦ ᓯᖁᐊᖅ ᐊᒻᒪ ᐊᓯᖏᑦ ᓅᑕᐅᖃᑕᐅᓂᑯᕕᓃᑦ ᐋᕿᒃᓯᖃᑕᐅᓚᐅᕐᓯᒪᕗᑦ ‘ᐊᕼᐃᐊᕐᒥᐅᑦ ᓅᑖᐅᓂᑯᑦ ᑲᑐᔾᔨᖃᑎᒌᓂᒃ’ 1998-ᒥᑦ ᖃᓄᐃᓚᐅᕐᓯᒪᓂᖏᓐᓂᑦ ᑎᑎᕋᐅᓯᖃᕋᓱᒃᖢᑎᒃ ᐊᒻᒪᓗ ᐃᑲᔫᓯᐊᖅᑖᕋᓱᒃᖢᑎᒃ ᐊᓯᐅᔨᓯᒪᔭᖏᓐᓄᑦ. “ᐅᓇ ᐊᑐᒻᒪᕆᓚᐅᕐᑐᖅ,” ᐅᖃᖅᑐᖅ ᒐᕙᒪᒃᑯᑦ ᒪᒥᐊᔾᔪᑎᐊᓂᒃ ᔭᓄᐊᕆ 22-ᖑᑎᓪᓗᒍ. (ᐊᔾᔨᙳᐊᖅ ᑲᓇᑕᐅᑉ ᒐᕙᒪᖓᓂᑦ)

“ᑕᐃᑲᙵᑦ ᓯᕗᓕᖅᐹᒥ ᓅᑕᐅᓚᐅᕐᓯᒪᒐᑦᑕ ᐃᓇᑕᐃ ᓚᐃᒃᒥᑦ ᓄᐅᑎᓐ ᓚᐃᒃᒧᑦ (1949-ᒥᑦ) ᒫᓐᓇᒧᑦ, ᐊᕐᕌᒍᓂᒃ 70 ᐅᓇ ᑎᑭᐅᑎᕗᖅ,” ᓯᖁᐊᒃ ᐅᖃᖅᑐᖅ.

“ᐅᕙᑦᑎᓐᓄᓪᓕ, ᐃᓱᓕᑦᑎᒍᑎᐅᓚᐅᕐᐳᖅ ᐱᐅᙱᑦᑑᑎᐊᓗᖕᓂ ᐊᑐᓚᐅᕐᓯᒪᔭᑦᑎᓐᓂᒃ ᐊᑕᐅᑦᑎᒃᑯᑦ.”

ᑭᓯᐊᓂᓕ ᐅᖃᒃᑲᓐᓂᖅᖢᓂ, “ᖁᕕᐊᓇᑦᑎᐊᒻᒪᕆᓚᐅᕐᑐᖅ ᑖᓐᓇ ᐅᓪᓗᖅ.”

ᐊᒥᐊᒃᑯᒋᔭᐅᔪᑦ ᐃᓅᔪᑦ ᓱᓕ 21-ᖑᔪᑦ ᐊᕼᐃᐊᕐᒥᐅᑦ ᑲᑎᖃᑎᖃᓚᐅᕐᑐᑦ ᑖᒃᑯᐊᑐᐊᖅ ᐸᓇᑦᒥ ᒪᒥᐊᓚᐅᙱᑎᓪᓗᒍ ᐊᕐᕕᐊᑦ ᐱᙳᐊᕐᕕᖓᓂᒃ ᑕᑖᑦᑎᐊᖅᑐᒥᒃ ᐃᓚᖃᖅᖢᑎᒃ ᒐᕙᒪᑐᖃᒃᑯᓐᓂᙶᖅᑐᓂᒃ ᐊᒻᒪ ᓄᓇᕗᑦ ᒐᕙᒪᒃᑯᖏᓐᓂ ᐊᒻᒪᓗ ᐃᓄᐃᑦ ᑲᑐᔾᔨᖃᑎᒌᖏᑦ ᐅᐸᒍᑎᓯᒪᔪᓂᒃ.

ᓯᖁᐊᑉ ᐊᖓᔪᖓ, ᓴᐃᓚᔅ ᐃᓗᖏᐊᔪᒃ ᑖᔅᓱᒥᖓ ᐱᒋᐊᖅᑎᑦᑎᓚᐅᕐᑐᖅ ᕿᓚᐅᔾᔭᖅᖢᓂ, ᐊᒻᒪ ᐊᔮᔮᖅᖢᓂ ᑖᒃᑯᓇᓂ ᐊᖓᔪᒃᖠᖅᐹᖑᔪᖅ ᐃᓇᑐᖃᖅ ᐊᕼᐃᐊᕐᒥᐅᓂᑦ, ᒥᐊᓕ ᐊᓇᐅᑕᓕᒃ.

ᖁᕕᐊᓲᑎᖄᓚᓚᐅᖅᖢᑎᒃ, ᑖᒃᑯᐊ ᒪᑐᐃᕐᓯᓚᐅᕐᑐᖅ ᑎᑎᖃᓂᒃ ᐋᕿᒃᑕᐅᓂᐊᖅᑐᒥᑦ ᐸᓖᓯᒃᑯᑦ ᐃᒡᓗᖓᑕ ᖃᓂᒋᔭᖓᓂᒃ ᑖᒃᑯᐊ ᓅᑕᐅᓂᑯᑦ ᑎᒍᔭᐅᓯᒪᕝᕕᒋᓚᐅᕐᓯᒪᔭᖓᓂ ᐊᕐᕕᐊᓄᑦ ᓅᓵᖅᑎᓪᓗᒋ—ᖃᓪᓗᓈᑎᑐᑦ ᑕᐃᔭᐅᕙᓚᐅᕐᑐᖅ ᑕᐃᔅᓱᒪᓂ ᐊᔅᑭᒨ ᐳᐊᐃᓐᑦᒥᑦ—1950-ᖏᑦ ᐃᓱᓕᓕᖅᑎᓪᓗᒋᑦ.

ᐱᒋᐊᓕᓵᖅᑎᓪᓗᒋᑦ 67-ᐅᓚᐅᕐᓯᒪᔪᑦ ᐊᕼᐃᐊᕐᒥᐅᑦ ᓅᑕᐅᓂᑯᑦ ᐆᒪᔪᑦ. ᐅᑯᐊ ᐊᕼᐃᐊᕐᒥᐅᑦ ᓅᑕᐅᓂᑯᐃᑦ ᑲᑐᔾᔨᖃᑎᒌᖏᑦ ᒐᕙᒪᑐᖃᒃᑯᓐᓂᑦ ᐃᖅᑲᖅᑐᐃᕕᒃᑰᖅᑎᑦᑎᓕᓚᐅᕐᓯᒪᔪᑦ 2007-ᒥᑦ, 23-ᑐᐃᓐᓇᑦ ᐊᒥᐊᒃᑰᓕᓚᐅᕐᑐᑦ.

ᐊᖏᕈᑎᑎᒍᓪᓕ, ᑖᒃᑯᐊ 23 ᑐᓂᔭᐅᓚᐅᕐᓯᒪᔪᑦ $100,000-ᓂᒃ ᐊᑐᓂ ᐅᑎᖅᑎᕕᐅᓂᒃᑯᑦ, ᒪᕐᕉᒡᓕ ᐃᓅᔪᓐᓃᕐᓯᒪᓕᖅᑑ ᑖᒃᑯᐊᓗ ᑮᓇᐅᔭᖅᑖᕆᓇᔭᓚᐅᕐᑕᖏᑦ ᑭᖑᕚᖏᓐᓄᐊᖅᑕᐅᓂᐊᖅᖢᑎᒃ.

ᐃᓚᖃᒃᑲᓐᓂᖅᖢᓂ 167 ᑭᖑᕚᕆᔭᐅᔪᑦ ᓅᑕᐅᓚᐅᕐᓯᒪᔪᓂᒃ ᐊᑐᓂᒃ $3,000-ᓂ ᑐᓂᔭᐅᓂᐊᕐᑐᑦ.

ᑮᓇᐅᔭᑦ ᐃᓚᖓ ᓴᓂᕐᕙᒃᑕᐅᓂᐊᕐᑐᖅ ᐃᓚᒋᔭᐅᓗᓂ ᐅᑎᖅᑎᑦᑎᔾᔪᑎᒃᓴᓄᑦ ᐃᑲᔫᑎᒃᓴᖅᑖᕈᑎᐅᓂᐊᖅᖢᓂ.

ᓯᖁᐊᒃ, ᐃᓕᓴᐃᔨᐅᓂᑯ ᒫᓃᓕᕐᑐᖅ ᐋᑐᕚᒥ, ᐱᓕᕆᕙᓪᓕᐊᓕᕐᑐᖅ ᐃᓕᓐᓂᐊᕈᑎᒃᓴᓂᒃ ᐃᓅᓱᖕᓂᕐᓴᓄᑦ ᐊᕼᐃᐊᕐᒥᐅᑦ ᑭᖑᕚᖏᓐᓄᑦ, ᑖᒃᑯᐊᓗ ᕿᑐᕐᖓᖃᐅᓕᖅᖢᑎᒃ, ᐅᓂᒃᑳᓂᒃ ᑖᒃᑯᓄᖓ ᖃᐅᔨᒪᔭᐅᓂᐊᖅᑐᓂᒃ.

“ᑕᐅᑐᙳᐊᖁᒐᒃᑭᑦ ᐊᒃᓱᕈᕈᑎᒋᓚᐅᕐᓯᒪᔭᑦᑎᓐᓂᒃ,” ᐅᖃᖅᑐᖅ. “ᖃᐅᔨᒪᖁᒐᒃᑭ ᖃᓄᐃᓕᐅᕈᓯᐅᓚᐅᕐᓯᒪᔪᓂ ᑖᒃᑯᓄᖓ ᐊᒻᒪᓗ ᐅᐱᒍᓱᖁᓪᓗᒋᑦ.”  

“ᐃᓄᐃᑦ, ᐊᕼᐃᐊᕐᒥᐅᑕᓪᓗ, ᐃᓱᒪᒋᔭᖃᑦᑎᐊᓲᖑᕗᑦ; ᐃᓱᒪᒋᔪᓐᓃᕐᕕᖃᕈᓐᓇᖅᑐᒍᑦ, ᑭᓯᐊᓂᓕ ᐳᐃᒍᔾᔮᙱᑕᕗᑦ”.

ᐊᑖᓃᑦᑐᑦ 21 ᐊᑏ ᓱᓕ ᐃᓅᔪᑦ ᐊᕼᐃᐊᕐᒥᐅᓂᒃ ᓅᑕᐅᓂᑯᓂᒃ, ᑕᒪᕐᒥᒃ ᐅᐸᒍᑎᓚᐅᕐᑐᑦ ᐊᑕᐅᓯᖅ ᐃᓚᐅᙱᖢᓂ ᔭᓄᐊᕆ 22-ᒥᑦ:

ᒥᐊᓕ ᐊᓇᐅᑕᓕᒃ

ᓴᐃᓚᔅ ᐃᓗᖏᐊᔪᒃ

ᑕᐃᕕᑦ ᓯᖁᐊᒃ

ᐲᑕ ᐊᐅᓚᑦᔪᑦ

ᑖᒥ ᐊᐅᓕᔪᑦ

ᔭᐃᑯᑉ ᒪᒃᔭᓂᒃ

ᐹᓪ ᐊᓇᐅᑕᓕᒃ

ᓵᓕ ᐊᑦᑲᒃ

ᐋᓐᓂ ᐄᑕᒃ

ᒥᐊᓕ ᕼᐃᒃᔅ

ᒥᐊᓕ ᕗᐃᑦᒧᐊ

ᐋᓖᓐ ᐊᓄᐃ

ᐲᑕ ᐸᐅᖔᓛᒃ

ᐊᒡᓂᔅ ᑯᒪᒃᔪᐊᒃ

ᐋᓐᑎ ᐊᓕᑲᓱᐊ

ᐄᕙ ᕗᐊᐃᓯ

ᐊᓕᒃᔅ ᐊᓕᑲᓱᐊ

ᑕᐃᕕᒃ ᑲᕐᓚᒃ

ᒫᒍᕆᑦ ᐊᐅᓚᑦᔪᑦ

ᐃᓕᓴᐱ ᖃᕆᑕᖅ

ᐃᐊᓚ ᑲᕐᓚᒃ ᕗᐃᓕᐊᒻᓴᓐ