ᐃᓕᓯᒪᐃᓐᓇᕐᓂᐊᖅᑐᒥ ᓯᐊᕐᕆᔮᕐᕕᖕᒥ ᐃᓄᒃᔪᐊᕐᒧᐊᖅᑕᐅᔪᖃᕐᓂᐊᖅᑐᖅ

ᐃᓕᓴᐃᔨ ᑐᕌᖅᑎᑦᑎᔪᒥ ᐱᓕᕆᐊᒃᓴᐅᔪᒥ ᓂᕆᐅᒃᐳᖅ ᐱᕙᓪᓕᐊᑎᑦᑎᓂᕐᒥ ‘ᓯᐊᕐᕆᔮᕐᓂᕐᒧᑦ ᐃᓅᓯᐅᔪᒥ,’ ᑐᓂᓯᓗᓂ ᓄᑖᖑᔪᒥ ᐊᐅᔭᒃᑯᑦ ᖃᓄᐃᓕᐅᕐᓂᐅᔪᒥ ᓄᓇᓕᖕᓄᑦ ᒪᒃᑯᒃᑐᓄᑦ

ᓴᐅᒥᖕᒥ, ᓲᐱ ᒧᐊᕐᕼᐊᐅᔅ, ᐊᐃᕗᕆ ᑲᓱᓪᓗᐊᒃ, ᔅᑳᓕᑦ ᑲᓱᓪᓗᐊᒃ, ᒐᐃᐳᕆᐋᓚ ᑲᓱᓪᓗᐊᒃ ᐊᒻᒪ ᑲᑕᕇᓇ ᐱᐊᕐᑎ ᓇᖏᕐᕕᐅᓪᓗᑎᒃ ᓯᐊᕐᕆᔮᕈᑎᖏᓐᓂ ᐃᓄᒃᔪᐊᕐᒥ. ᐃᓕᓴᐃᔨ ᑳᓚᐃᓐ ᒋᓖᓴᓐ ᐅᖃᓚᐅᖅᐳᖅ ᑕᓪᓕᒪᐃᑦ ᒪᒃᑯᒃᑐᑦ ᓯᐊᕐᕆᔮᖅᑏᑦ ᖁᕕᐊᑉᐳᑦ ᓄᑖᖑᔪᒥ ᓯᐊᕐᕆᔮᕐᕕᒃᓴᖓᓂ ᓴᓇᔭᐅᓂᐊᕐᓂᖓᓂ ᓄᓇᓕᖏᓐᓂ (ᐊᔾᔨᓕᐅᖅᑕᐅᔪᖅ ᑳᓚᐃᓐ ᒋᓖᓴᓐᒧᑦ)

By ᔨᐊᕝ ᐱᓕᑦᑎᐊᐃ

For English version, see Permanent skatepark coming to Inukjuak

ᒪᒃᑯᒃᑐᑦ ᐃᓄᐃᑦ ᐃᓄᒃᔪᐊᕐᒥ ᕿᓚᒻᒥᐅᔪᒥ ᐃᓂᒋᔭᐅᖏᓐᓇᕐᓂᐊᖅᑐᒥ ᐃᓂᒃᓴᖃᓕᖅᐳᑦ ᓇᖏᕐᕕᐅᓪᓗᓂ ᓯᐊᕐᕆᔮᕐᓂᖓᓂ.

ᓄᑖᖅ ᓯᐊᕐᕆᔮᕐᕕᒃᓴᖅ, ᐃᓂᖃᕐᓂᐊᖅᑐᒥ ᒫᓐᓇᐅᔪᒥ ᐱᕙᓪᓕᐊᑎᑕᐅᓯᒪᙱᑦᑐᒥ ᓄᓇᐅᔪᒥ ᐸᐃᕆᕝᕕᐅᑉ ᑐᓄᐊᓂ ᓄᓇᓕᖕᓂ ᓄᓇᖃᕐᕕᖓᓂ, ᒪᑐᐃᖅᑐᒃᓴᐅᑕᐅᕗᖅ ᐋᒍᔅᑎ 20−ᒥ.

ᓄᓇᓕᖕᓂ ᐃᓕᓴᐃᔨ ᑳᓚᐃᓐ ᒋᓖᓴᓐ ᑐᕌᖅᑎᓯᒪᔭᖓ ᐱᓕᕆᐊᒃᓴᐅᔪᒥ ᖃᔅᓯᒐᓚᖕᓄᑦ ᑕᖅᑭᓄᑦ. ᐅᖃᓚᐅᖅᐳᖅ ᑕᑯᔪᒪᓚᐅᖅᐳᖅ ᓯᐊᕐᕆᔮᕐᕕᒃᓴᐅᔪᒥ ᓴᓇᔭᐅᔪᒥ ᓱᕈᓯᕐᓄᑦ ᐊᐅᔭᖅᓯᐅᖅᐸᒃᑐᓂ ᓄᓇᓕᖕᓂ.

“ᐊᒥᓱᐊᓗᖕᓂ ᓱᕈᓯᕐᓂ ᓄᓇᓕᖕᓃᖏᓐᓇᖅᐸᒃᑐᓂ, ᐊᒻᒪ ᖃᓄᐃᓕᐅᒐᒃᓴᖃᓗᐊᖃᑦᑕᙱᑦᑐᑦ,” ᐅᖃᓚᐅᖅᐳᖅ.

“ᐃᓂᐅᕗᖅ ᐅᐸᒍᓐᓇᖅᑕᖓᓂ ᐊᒻᒪ ᓇᖕᒥᓂᕆᓕᕐᓗᓂᔾᔪᒃ, ᑕᑯᔪᓐᓇᕋᔭᖅᑕᑦᑎᓐᓂ ᐃᓴᒃᓯᒪᓂᐅᔪᒥ ᐱᓕᕆᐊᖑᓂᐊᖅᑐᒥ ᑕᐃᑲᓂ ᓄᓇᓕᖕᓂ ᓯᕗᓕᐅᖅᑎᐅᔪᓄᑦ.”

ᐱᓕᕆᐊᒃᓴᐅᔪᖅ ᐱᒋᐊᖅᑎᑕᐅᓂᖓᓂ, ᒋᓖᓴᓐ ᑲᑎᖃᑎᖃᓚᐅᖅᐳᑦ ᐊᔾᔨᒌᙱᕈᓘᔭᖅᑐᓂ ᐱᓕᕆᖃᑎᒋᔭᐅᔪᓂ ᓇᖕᒥᓂᖃᖅᑎᐅᔪᓂ ᐊᒻᒪ ᐃᓄᓕᒫᓄᑦ ᐱᓕᕆᕝᕕᐅᔪᓂ.

ᐅᔾᔨᕐᓇᓗᐊᖅᑐᒥ, ᐱᔪᓐᓇᓚᐅᖅᐳᖅ ᐃᑲᔪᖅᓱᐃᓂᐅᔪᒥ CRT ᓇᑉᐸᖅᑎᕆᔨᐅᔪᓂ — ᑲᑉᐸᓂᐅᔪᒥ ᓴᓇᔪᓂ ᖃᓂᒋᔭᖓᓂ ᓴᐳᓗᔭᕐᒥ ᐃᒪᕐᒧᑦ ᐆᒻᒪᖅᑯᑎᓕᕆᔨᒃᑯᓐᓄᑦ-ᑯᐸᐃᖕᒧᑦ — ᐃᑲᔪᖅᑐᒥ ᐅᒥᐊᕐᔪᐊᒃᑰᖅᑎᑦᑎᓂᕐᒥ ᓱᓇᒃᑯᑖᓂ ᓄᓇᓕᖕᓄᑦ, ᑐᓂᓯᓗᑎᒃ ᓴᓇᔨᓂ ᐊᒻᒪ ᐊᑐᐃᓐᓇᖃᖅᑎᑦᑎᓗᑎᒃ ᐅᖃᐅᔾᔨᓂᐅᔪᒥ ᐃᓚᖏᓐᓄᑦ ᓯᓚᒧᑦ−ᐱᔾᔪᑎᓕᖕᓄᑦ ᓇᑉᐸᖅᑎᕆᓂᕐᓂ ᐊᒃᓱᕈᕐᓇᐅᔪᓂ.

ᐊᓯᖏᑦ ᐱᓕᕆᖃᑎᒌᖑᔪᑦ ᒋᓖᓴᓐ ᑎᑎᕋᓚᐅᖅᑕᖏᑦ ᐃᓚᖃᖅᐳᖅ ᐅᑭᐅᖅᑕᖅᑐᒥ ᓄᓇᐅᔪᒥ ᐃᓄᒃᔪᐊᕐᒥ, ᐱᑐᕕᒃ ᑎᒥᖁᑕᐅᔪᑦ, ᓄᓇᕕᖕᒥ ᐊᕕᒃᑐᖅᓯᒪᔪᓂ ᑲᑎᒪᔨᐅᔪᓂ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ ᐊᒻᒪ ᐃᓄᓕᕆᔨᒃᑯᓐᓂ, ᑮᓇᐅᔾᔭᒃᓴᒐᓱᙱᖦᖢᑎᒃ ᓯᐊᕐᕆᔮᕐᓂᕐᒧᑦ ᐃᓅᓯᐅᔪᒥ, ᐊᒻᒪ ᖃᔅᓯᒐᓚᖕᓂ ᓄᓇᓕᖕᓂ ᓂᐅᕕᕐᕕᐅᔪᓂ.

ᒋᓖᓴᓐ ᐅᓂᒃᑳᕆᓚᐅᖅᐳᖅ ᓯᐊᕐᕆᔮᕐᕕᒃᓴᐅᔪᒥ “ᒥᓕᐊᓐ ᐅᖓᑖᓂ ᐱᓕᕆᐊᒃᓴᐅᓂᖓᓂ.” ᑭᓯᐊᓂ ᐅᓄᕐᓂᐅᔪᓂ ᑐᓂᔭᐅᑐᐃᓐᓇᖅᑐᓂ ᓱᓇᒃᑯᑖᓂ, ᑐᒃᓯᕋᑐᐃᓐᓇᕆᐊᖃᓚᐅᖅᐳᖅ $315,000−ᐸᓗᖕᓂ ᐃᓄᒃᔪᐊᖅ ᓄᓇᓖᑦ ᐊᑐᖅᐸᒃᑕᖏᓐᓂ ᐊᐅᓚᔪᓐᓇᖁᓪᓗᒋᑦ ᑮᓇᐅᔭᖃᖅᑎᑦᑎᔨᐅᔪᓂ.

“ᐃᓱᒪᕗᖓ, ᐱᔭᕆᐊᖃᓪᓚᕆᒃᑐᖅ ᐊᒻᒪ ᐱᐅᔪᒻᒪᕆᐊᓗᒃ ᓄᓇᓕᒃ ᑲᑎᖃᑎᒌᖕᒪᑕ ᐃᑲᔪᖅᓱᐃᓂᕐᒧᑦ ᒪᒃᑯᒃᑐᓂ,” ᐅᖃᓚᐅᖅᐳᖅ.

ᓯᐊᕐᕆᔮᕐᕕᒃ ᒪᑭᑕᓕᕈᓂ ᐊᒻᒪ ᐊᐅᓚᓕᕈᓂ, ᒋᓖᓴᓐ ᐅᖃᓚᐅᖅᐳᖅ ᐱᓕᕆᐊᖑᓂᐅᔪᓂ ᓲᕐᓗ ᓇᖏᕐᕕᐅᓪᓗᓂ ᓯᐊᕐᕆᔮᕐᓂᖓᓂ ᐊᒻᒪ ᐊᑦᑕᓇᔾᔭᐃᖅᓯᒪᓂᕐᒧᑦ ᐃᓕᓐᓂᐊᕐᓂᐅᔪᓂ ᐊᑐᐃᓐᓇᐅᑎᑕᐅᓂᐊᖅᐳᑦ.

ᑭᓯᐊᓂ ᑕᐃᒪᐃᓚᐅᖅᑳᕋᓂ, ᓯᐊᕐᕆᔮᕐᕕᒃ ᑲᒪᒋᔭᖃᕐᓂᐊᖅᐳᖅ ᒪᑐᐃᖅᑕᐅᓂᖓᓂ ᖁᕕᐊᓱᒍᑕᐅᔪᒥ ᑕᑯᒃᓴᐅᔪᖃᕐᓗᓂ ᓇᖏᕐᕕᐅᓪᓗᓂ ᓯᐊᕐᕆᔮᕐᕈᑎᒻᒪᕆᐅᔪᒥ ᔫ ᐸᕙᓘᒥ.

ᐸᕙᓘ, ᓵᒻᓴᓐ ᑯᕇᖑᓪᓗᓂ ᐃᐊᓪᐴᑕᒥᐅᑕᖅ, ᐊᐅᓪᓚᖅᑎᑕᐅᓪᓗᓂ ᐃᓕᓐᓂᐊᕆᐊᖅᐸᓚᐅᖅᓯᒪᔪᒥ ᐅᖃᐅᓯᐅᓯᒪᒋᓪᓗᓂ 2021−ᒥ New Yorker ᓇᐃᑦᑐᒥ ᐊᑐᖅᑕᐅᓪᓚᕆᒃᓯᒪᔪᒥ ᑕᕐᕆᔭᓕᐊᖑᓯᒪᔪᒥ, ᐃᓱᒻᒥᖅᑐᐃᔨᒥ−ᓴᖅᑭᑕᐅᓯᒪᔪᒥ ᐊᒥᐊᓕᑲᒥ ᓇᖏᕐᕕᐅᓪᓗᓂ ᓯᐊᕐᕆᔮᕐᓂᖓᓂ ᖃᐅᔨᒪᔭᐅᕐᔪᐊᖅᑐᒥ ᑑᓂ ᕼᐋᒃᒧᑦ.

“ᖃᐃᖁᔨᔪᒪᓚᐅᖅᐳᒍᑦ ᓲᕐᓗ ᔫ ᐸᕙᓘᑎᑐᑦ ᑎᑭᓐᓂᖓᓂ ᐊᒻᒪ ᐊᔪᕆᖅᓱᐃᓗᓂ ᖃᓄᖅ ᐱᔪᓐᓇᕐᓂᖏᓐᓂ,” ᒋᓖᓴᓐ ᐅᖃᓚᐅᖅᐳᖅ, ᐅᖃᕆᓪᓗᓂ ᓇᖏᕐᕕᐅᓪᓗᓂ ᓯᐊᕐᕆᔮᕐᓂᖓ ᒫᓐᓇᐅᔪᒥ ᐱᙳᐊᕐᓂᐅᕗᖅ ᐊᐅᔭᒃᑯᑦ ᐱᙳᐊᕕᒡᔪᐊᕐᓂᐅᔪᓂ ᐅᓕᒻᐱᒃᔅᓂ.

ᐅᖃᓚᐅᖅᐳᖅ ᑕᐃᒪᑐᖅ ᓯᐊᕐᕆᔮᕐᕕᒃ ᑐᕌᖅᑎᑦᑎᓂᐊᖅᐳᖅ ᐱᕈᖅᐸᓪᓕᐊᓂᖓᓂ ᓇᖏᕐᕕᐅᓪᓗᓂ ᓯᐊᕐᕆᔮᕐᓂᖓᓂ ᓄᓇᓕᐅᔪᒥ. ᐃᓚᖏᑦ ᓱᕈᓰᑦ ᓇᑎᕐᕕᐅᓪᓗᓂ ᓯᐊᕐᕆᔮᖅᐸᒃᑎᓪᓗᒋᑦ ᑕᐅᓅᓇ ᐃᓄᒃᔪᐊᑉ ᑐᐊᐸᖕᒥ ᐊᖅᑯᑕᐅᔪᒥ, ᐅᖃᓚᐅᖅᐳᖅ ᓂᕆᐅᖕᓂᖃᕐᓂᖓᓂ ᐊᑦᑕᓇᙱᑦᑐᒥ, ᐃᓕᓯᒪᐃᓐᓇᖅᑐᒥ ᐃᒡᓗᕐᔪᐊᒥ — ᐃᓚᖃᕐᓗᓂ ᓇᖏᕐᕕᐅᔪᓂ ᓯᐊᕐᕆᔮᕐᕕᓂ ᐊᒻᒪ ᐊᑦᑕᓇᙱᑦᑐᖅᓯᐅᑎᓂ ᐊᑐᕆᐊᓕᖕᓂ ᑐᓂᔭᐅᔪᓂ ᓄᓇᓕᖕᓄᑦ — ᐃᑲᔪᕐᓂᐊᖅᐳᖅ ᓴᓇᓂᖓᓂ ᓇᖏᕐᕕᐅᓪᓗᓂ ᓯᐊᕐᕆᔮᕐᓂᖓᓂ ᐃᓚᒋᔭᐅᓕᕐᓂᖓᓂ ᓄᓇᓕᖕᓂ ᐃᓅᓯᐅᔪᒥ ᐅᖅᑰᓂᖅᓴᐅᑎᓪᓗᒍ ᑕᖅᑭᐅᔪᓂ.

“ᓯᐊᕐᕆᔮᕐᓂᕐᒧᑦ ᓄᓇᓕᒃᑕᖃᙱᒻᒪᑦ ᐃᓄᒃᔪᐊᕐᒥ, ᑕᐃᒫᒃ ᑭᒃᑯᓕᒫᓂ ᐃᓚᐅᑎᑦᑎᓂᐅᔪᓐᓇᖅᐳᖅ,” ᒋᓖᓴᓐ ᐅᖃᓚᐅᖅᐳᖅ.

Share This Story

(0) Comments

Join the Conversation

Your email address will not be published. Required fields are marked *

*