‘ᐃᓕᓴᐃᔨᑦᑎᐊᒻᒪᕆᐊᓗᒃ’ ᒥᒃ ᒫᓕᓐ ᐃᖅᑲᐅᒪᔭᐅᕗᖅ ᐃᓄᒃᑎᑐᑦ ᐱᐅᒋᑦᑎᐊᕐᓂᖓᓂ

For English version, see ‘Brilliant teacher’ Mick Mallon remembered for his love of Inuktitut

ᒥᒃ ᒫᓕᓐ ᐹᖅᓯᓚᐅᖅᓯᒪᙱᓚᖅ ᐅᖃᐅᓯᕐᒥ ᐱᐅᒋᙱᑕᖓᓂ.

ᑕᒪᓐᓇ ᐃᓚᖃᖅᐳᖅ ᐊᓪᓗᓈᑎᑐᑦ, ᐅᐃᕖᑎᑐᑦ, ᔅᐹᓂᔅ, ᑕᒐᓚᒡ (ᐅᖃᓪᓚᒃᑕᐅᓲᖅ ᕕᓕᕇᓐᔅᓂ), ᐊᒻᒪᓗ ᐃᓚᖓᓐᓂ ᒫᓐᑐᕆᓐ ᓴᐃᓃᓯᒥ. ᐊᑕᐅᓯᐊᖅᖢᓂ, ᐹᓇᒫᒦᑎᓪᓗᒍ ᐱᓇᓱᐊᕈᓯᕐᒥ, ᐃᓕᑦᑎᓇᓱᐊᓚᐅᖅᐳᖅ ᓄᓇᓕᖕᓂ ᓄᓇᖃᖅᑳᖅᓯᒪᔪᓄᑦ ᐅᖃᐅᓯᖓᓐᓂ.

ᑭᓯᐊᓂ ᐱᓕᕆᓂᖓᓂ ᐸᐸᑦᑏᓐᓇᕐᓂᕐᒧᑦ, ᐆᒻᒪᕆᐊᖅᑎᑦᑎᒃᑲᓐᓂᕐᓂᕐᒥ ᐊᒻᒪ ᐃᓕᓐᓂᐊᖅᑎᑦᑎᓂᕐᒥ ᐃᓄᒃᑎᑐᒻᒥ ᐱᔾᔪᑎᒋᓚᐅᖅᐸᖓ ᑲᓇᑕᒥ ᐃᑲᔪᕐᓂᕐᒧᑦ ᐃᓕᓴᕆᔭᐅᓂᖃᕐᓂᕐᒥ 2008−ᒥ.

ᒫᓕᓐ, ᖄᖏᖅᓯᒪᔪᓂ ᐊᕐᕌᒍᓄᑦ 70−ᖏᓐᓂ ᐃᓕᓐᓂᐊᖅᑎᑦᑎᓂᕐᒥ ᐅᖃᐅᓯᕐᒥ ᓄᓇᕗᒻᒥ ᐊᒻᒪ ᐅᑭᐅᖅᑕᖅᑐᒥ, ᐃᓅᔪᓐᓃᓚᐅᖅᐳᖅ ᓯᑎᐱᕆ 18−ᒥ ᕚᓐᑰᕙᒥ. 90−ᓂ ᐅᑭᐅᖃᓚᐅᖅᐳᖅ.

“ᐊᓕᐊᓇᐃᒋᔭᖃᑦᑎᐊᓚᐅᖅᐳᖅ ᐅᖃᐅᓯᕐᓂ ᐊᒻᒪ ᖃᐅᔨᓴᐃᓂᕐᒥ ᐅᖃᐅᓯᕐᓂ, ᐊᒻᒪ ᐊᑐᓚᐅᖅᐸᖓ ᐊᒥᓱᐊᓗᖕᓄᑦ ᐊᕐᕌᒍᓄᑦ ᐃᓄᒃᑎᑐᒻᒥ,” ᐅᖃᓚᐅᖅᐳᖅ ᑕᐃᕝ ᐅᐃᓪᒪᓐ, ᐃᖃᓗᖕᓂᕐᒥᐅᑕᖅ, ᐃᓕᓴᐃᔨᐅᖃᑎᖓ ᐊᒻᒪ ᐱᖃᓐᓇᕆᔭᐅᓪᓗᓂ ᒫᓕᓐᒧᑦ ᐅᓄᕐᓂᖅᓴᐅᔪᒥ ᐊᕐᕌᒍᓄᑦ 50−ᓄᑦ.

ᑕᐃᓯᓚᐅᖅᐳᖅ ᒫᓕᓐᒥ “ᐃᓕᓴᐃᔨᑦᑎᐊᕙᒻᒪᕆᐊᓘᓂᖓᓂ” “ᐃᖅᑲᓇᐃᔮᕆᔪᒪᔭᖓᓂ−ᐊᑯᓂᐅᔪᒥ ᐊᖏᖅᓯᒪᓂᖃᖅᖢᓂ ᐃᓄᒃᑎᑐᒻᒧᑦ.”

ᐅᖃᔨᒫᒐᖅ ᒫᓕᓐ ᑎᑎᕋᓚᐅᖅᑕᖓᓂ 1990−ᖏᓐᓂ ᑕᐃᔭᐅᔪᒥ ᐱᒋᐊᖅᑎᑦᑎᓂᐅᔪᒥ ᐃᓄᒃᑎᑐᒻᒧᑦ, ᐊᑐᖅᑕᐅᓚᐅᖅᐳᖅ ᓄᓇᕗᒻᒥ ᐊᒻᒪ ᒥᒋᐅᓪ ᓯᓚᑦᑐᖅᓴᕐᕕᒡᔪᐊᖓᓂ ᒪᓐᑐᕆᐋᓪᒥ ᐊᒻᒪ ᓯᓚᑦᑐᖅᓴᕐᕕᒡᔪᐊᒥ ᐅᐊᓯᖕᑕᓐᒥ, ᖃᕋᓴᐅᔭᑎᒍᑦ ᐃᓕᓐᓂᐊᖅᑎᑦᑎᓇᐅᖅᖢᓂ ᑭᓯᐊᓂ ᖃᖓᓕᓵᕐᓂ ᐊᕐᕌᒎᔪᓂ, ᐅᐃᓪᒥᓐ ᐅᖃᓚᐅᖅᐳᖅ.

ᒫᓕᓐ ᐸᓂᖓ, ᐊᒫᓐᑕ, ᐅᖃᓚᐅᖅᐳᖅ ᓇᓚᐅᑦᑖᕈᓐᓇᓚᐅᙱᓚᖅ ᖃᔅᓯᓂ ᐃᓄᖕᓂ ᐊᑖᑕᖓ ᐃᓕᓐᓂᐊᖅᑎᑦᑎᓚᐅᕐᓂᖓᓂ ᐃᓄᒃᑎᑐᒻᒥ ᐊᕐᕌᒍᒐᓴᐅᔪᓂ. ᕼᐊᓐᓇᓚᖏᓐᓂ, ᐃᒻᒪᖄ ᐅᓄᕐᓂᖅᓴᓂ.

“ᐃᓄᖕᓂ ᓴᖅᑭᑦᑐᖃᖅᐸᒃᐳᖅ, ᐊᒻᒪ ᐃᓅᔪᓐᓃᕋᑖᕐᓂᖓᓂ ᐃᓄᖕᓂ ᑎᑎᕋᖅᐸᒃᐳᑦ ᐅᖃᖅᑐᓂ, ᖃᐅᔨᒪᙱᑕᒋᑦ, ᑭᓯᐊᓂ ᐊᑖᑕᕕᑦ ᐃᓕᓐᓂᐊᖅᑎᓚᐅᖅᐹᖓ,’” ᐅᖃᓚᐅᖅᐳᖅ.

ᐃᓅᓂᑰᓪᓗᓂ ᐊᐃᕋᓕᓐ ᐅᐊᖕᓇᖓᓂ, ᒫᓕᓐ ᐊᒻᒪ ᓯᕗᓪᓕᖅᐹᒥ ᓄᓕᐊᖓ, ᓯᓐᑎᐊ, ᑎᑭᑦᑕᕐᓂᓚᐅᖅᐳᑦ ᑲᓇᑕᒧᑦ. ᐃᓕᓐᓂᐊᖅᑎᑦᑎᒐᓛᓚᐅᖅᐳᖅ ᐋᓐᑎᐊᕆᐅᒥ, ᐊᓱᐃᓛᒃ 1959−ᒐᓚᖕᒥ ᓅᓚᐅᖅᓯᒪᕗᑦ ᐳᕕᕐᓂᑐᖅ ᓄᓇᕕᖕᒧᑦ ᒫᓕᓐ ᐃᓄᒃᑎᑐᑦ ᐃᓕᑦᑎᓪᓗᓂ.

1968−ᒥ, ᓅᓚᐅᖅᓯᒪᕗᑦ ᑲᖏᖅᖠᓂᕐᒧᑦ ᒫᓕᓐ ᐋᖅᑭᒃᓯᓚᐅᖅᐳᖅ ᐃᓄᖕᓄᑦ ᐅᖃᐅᓯᕐᒥ ᐃᓕᓐᓂᐊᕐᕕᖕᒥ ᒐᕙᒪᑐᖃᒃᑯᓐᓄᑦ, ᑐᓂᓯᓪᓗᓂ ᒪᕐᕈᖓᓂ−ᐅᖃᐅᓯᕐᒥ ᐱᓕᒻᒪᒃᓴᐃᓂᐅᔪᒥ ᐃᓄᒃᑎᑐᑦ ᒐᕙᒪᑐᖃᒃᑯᓐᓄᑦ ᐊᒻᒪ ᓄᓇᕗᒻᒥ ᒐᕙᒪᖏᓐᓄᑦ ᐃᖅᑲᓇᐃᔭᖅᑎᖏᓐᓄᑦ.

ᐊᕐᕌᒍᒐᓴᓂ, ᒫᓕᓐ, ᖁᑦᑎᖕᓂᖅᓴᒥ ᐃᓕᓴᕆᔭᐅᓂᖃᓚᐅᖅᐳᖅ ᐅᖃᐅᓯᓕᕆᓂᕐᒥ, ᐃᓕᓐᓂᐊᖅᑎᑦᑎᓚᐅᕆᕗᖅ ᑲᖏᖅᖠᓂᕐᒥ, ᓄᓇᕗᒻᒥ ᐅᑭᐅᖅᑕᖅᑐᒥ ᓯᓚᑦᑐᖅᓴᕐᕕᖓᓂ, ᓯᓚᑦᑐᖅᓴᕐᕕᒡᔪᐊᖅ ᓴᔅᑳᑦᓱᐊᓐᒥ ᐊᒻᒪᓗ ᐊᕐᕌᒍᒐᓴᓄᑦ ᑕᓪᓕᒪᓄᑦ ᐳᐊᓂᐊᒥ 1960−ᖏᓐᓂ.

ᐊᒻᒪᓗ ᑐᖁᑲᓴᓚᐅᖅᓯᒪᒋᓪᓗᓂ ᐃᖃᓗᖕᓂ 2007−ᒥ.

ᒫᓕᓐ ᐱᓱᔪᓚᐅᖅᓯᒪᕗᖅ ᓂᐊᖁᙴᒥ; ᐅᓪᓗᖅ ᐊᑕᐅᓯᕐᒥ ᒪᕐᕉᖕᓂᓪᓘᓐᓃᑦ ᐱᖅᓯᓚᐅᖅᑎᓪᓗᒍ, ᐊᒻᒪ ᓯᓚᐅᑉ ᖃᓄᐃᓐᓂᖓ ᖁᐊᐃᑦᑖᕐᓇᓚᐅᖅᐳᖅ ᐊᒻᒪ ᓂᒡᓚᓱᕐᔪᐊᖅᖢᓂ.

ᖃᓕᕈᓯᕐᒥ ᑲᑕᓚᐅᖅᐳᖅ ᐊᒻᒪ ᓇᓂᔭᐅᓚᐅᙱᓚᖅ ᕿᓂᖅᑎᐅᔪᓂ ᑭᓯᐊᓂ ᐃᑲᕐᕋᑦ 8−ᓂ ᐊᓂᒍᕐᒪᑦ, ᐊᒡᒐᖏᑦ ᐊᒻᒪ ᐃᓯᒐᖏᑦ ᖁᐊᖅᖢᑎᒃ ᐊᒻᒪ ᖃᔅᓯᒐᓚᖕᓂ ᓴᐅᓂᖏᓐᓂ ᓱᕋᒃᖢᑎᒃ.

ᒫᓕᓐ ᕿᒻᒥᓂ ᐱᐅᒃᓴᑦᑎᐊᓚᐅᖅᐳᖅ ᐅᖃᓚᐅᖅᐳᖅ ᐸᓂᖓ, ᐊᒻᒪ ᐃᑲᔪᓚᐅᖅᐳᑦ ᐅᖅᑰᑎᑦᑎᓂᕐᒥ ᑕᐃᑲᓂ ᐅᓪᓗᖓᓂ ᑭᓯᐊᓂ ᓇᓂᔭᐅᒐᒥ.

“ᐱᐅᒃᓴᑦᑎᐊᓚᐅᖅᐳᖅ ᓂᕐᔪᑎᓂᑦ. ᐃᓅᓯᓕᒫᖓᓐᓂ ᕿᒻᒥᖃᓚᐅᖅᐳᖅ,” ᐅᖃᓚᐅᖅᐳᖅ. “ᕿᒻᒪᖃᙱᒃᑯᓂ, ᕿᒻᒥᒥᒃ ᐊᑐᖅᑐᐊᖅᐸᓚᐅᖅᐳᖅ ᐱᓱᖃᑎᒋᓂᐊᖅᑕᖓᓂ.”

ᐃᓅᔪᓐᓃᓚᐅᖅᑎᓪᓗᒍ ᓯᕗᓪᓕᖅᐹᖅ ᓄᓕᐊᖓᓂ, ᓯᓐᑎᐊᒥ, 1998−ᒥ, ᒫᓕᓐ ᐃᓕᓐᓂᐊᖅᑎᑦᑎᓚᐅᖅᐳᖅ ᓄᓇᕗᒻᒥ ᐅᑭᐅᖅᑕᖅᑐᒥ ᓯᓚᑦᑐᖅᓴᕐᕕᖓᓂ ᓴᓂᓕᕆᓪᓗᓂᐅᒃ ᒪᕐᕈᖓᓂ ᓄᓕᐊᖓᓂ, ᐋᓕᒃᓰᓇ ᑯᑉᓗᒥ, ᓄᓇᕗᒻᒥ ᐅᖃᐅᓯᕐᒧᑦ ᑲᒥᓴᓇᐅᓚᐅᖅᓯᒪᔪᖅ.

ᐱᕙᓪᓕᐊᑎᑦᑎᓚᐅᖅᐳᑦ ᐃᓄᒃᑎᑐᑦ ᐃᓕᓐᓂᐊᕈᑎᓕᐅᖅᑕᐅᓯᒪᔪᓂ ᐱᒋᐊᓕᓵᖅᑐᓄᑦ ᑕᐃᑯᖓ ᐅᖃᕈᓐᓇᑦᑎᐊᖅᑐᓄᑦ ᐅᖃᖅᑎᐅᔪᓄᑦ.

ᐊᒫᓐᑕ ᒫᓕᓐ ᐅᖃᓚᐅᖅᐳᖅ ᖄᖏᖅᓯᒪᓕᖅᑐᓂ ᐊᕐᕌᒍᐸᓗᖕᓂ ᑕᓪᓕᒪᓄᑦ ᐊᑖᑕᖓ ᖃᓂᒪᑎᓪᓗᒍ ᐃᓕᖅᑯᓯᖅᓱᕈᓐᓃᖅᑐᒥ ᐳᐃᒍᖅᑕᕐᓂᖃᓕᖅᖢᓂ. ᑭᓯᐊᓂ ᑕᒪᒃᑭᒐᓚᖕᒥ ᑕᐃᑲᓂ, ᐅᖃᓪᓚᒍᓐᓇᓚᐅᖅᐳᖅ.

“ᐃᖏᕐᕋᕙᓪᓕᐊᑎᓪᓗᒍ ᐋᓐᓂᐊᕐᓇᐅᔪᒥ, ᑕᑯᕙᓚᐅᖅᐸᒃᑲ ᐅᖃᐅᓯᓕᕆᓂᕐᒧᑦ ᑲᑎᙵᓂᐅᔪᓂ ᐃᓚᒋᔭᐅᔪᓂ — ᑕᒪᒃᑭᑦ ᐅᖃᐅᓯᕐᓂ ᐱᓕᕆᓯᒪᓂᖓᓂ, ᐃᒻᒥᓂᒃ ᑐᑭᓯᐅᒪᔭᒃᓴᐅᑎᑦᑎᖃᑦᑕᓚᐅᖅᐳᖅ,” ᐅᖃᓚᐅᖅᐳᖅ.

“ᐅᖃᓲᖑᕗᑦ ᐅᖃᐅᓯᖅ ᖃᕋᓴᕐᓂ ᓴᙱᒃᑎᒋᐊᖅᓯᓲᖑᓂᖓᓂ, ᐊᒻᒪ ᑕᑯᒃᓴᐅᓪᓚᕆᓚᐅᖅᐳᖅ ᐃᖏᕐᕋᕙᓪᓕᐊᑎᓪᓗᒍ ᐋᓐᓂᐊᖓᓂ.”

ᒥᒃ ᒫᓕᓐ ᕿᒪᐃᕗᖅ ᐱᖓᓱᓂ ᕿᑐᕐᙵᖏᓐᓂ — ᐊᒫᓐᑕ, ᐃᕐᓂᖓ ᒫᑎᐅ, ᐊᒻᒪ ᐸᓂᖓ ᑭᓕᐊᕐ ᕼᐋᓗᕙᐃ ᐊᒻᒪ ᐅᐃᖓ ᑯᕆᔅ; ᖃᖏᐊᖓ ᒫᑕᓕᓐ ᔅᑑᓐ, ᐊᒻᒪ ᓄᓕᐊᖓᑕ ᐋᓕᒃᓰᓇ ᑯᑉᓗᒥ, ᐸᓂᖓ ᐊᕙᓕᓐ ᐸᐸᑦᓯ ᑯᑉᓗ−ᕼᐃᐅᓪ ᐊᒻᒪ ᐃᕐᓂᖓ ᓘᒐᓐ, ᑕᐃᓯᕙᓚᐅᖅᑐᒥ “Stampa−ᒥ.”