ᐃᓕᓴᐃᔨᒧᑦ ᐃᑲᔪᖅᑎ ᐃᖃᓗᖕᓂ ᐸᓯᔭᒃᓴᐅᓕᕐᑐᖅ ᖁᓄᔪᕐᓂᐊᕐᓂᕐᒨᖓᔪᓄᑦ

ᓵᒥᐅᓪ ᑕᕐᕋᓕᒃ, 30, ᐃᖅᑲᓇᐃᔭᓚᐅᕐᑐᖅ ᐃᓕᓴᐃᔨᓂ ᐃᑲᔪᖅᑎᐅᓪᓗᓂ ᓇᑲᓱᒃ ᐃᓕᓐᓂᐊᕐᕕᒃᒥ

ᐸᓖᓯᒃᑯᑦ ᐃᖃᓗᖕᓂ ᐊᕐᕌᒍᓕᒃ 30-ᓂ ᐃᓕᓴᐃᔨᓂ ᐃᑲᔪᖅᑎ ᓇᑲᓱᒃ ᐃᓕᓐᓂᐊᕐᕕᒃᒥ ᐸᓯᔭᒃᓴᐅᑎᑕᐅᔪᖅ ᑎᓴᒪᓄᑦ ᖁᓄᔪᕐᓂᐊᕐᓂᕐᒨᖓᔪᓂᒃ. (ᐊᔾᔨᙳᐊᖁᑎᒋᔭᐅᔪᖅ)

By ᓄᓇᑦᓯᐊᕐᒥ ᐱᕙᓪᓕᐊᔪᑦ

For English version, see Teacher’s aide in Iqaluit faces sex-crime charges

ᐃᓕᓴᐃᔨᓂ ᐃᑲᔪᕐᑎᖅ ᐃᖅᑲᓇᐃᔭᕐᓂᑯ ᓇᑲᓱᒃ ᐃᓕᓐᓂᐊᕐᕕᒃᒥ ᐃᖃᓗᖕᓂ ᐸᓯᔭᒃᓴᙳᖅᑎᑕᐅᓚᐅᕐᑐᖅ ᓯᑎᐱᕆ ᐃᓱᓕᓕᕐᑎᓪᓗᒍ ᑎᓴᒪᓂᒃ ᖁᓄᔪᕐᓂᐊᕐᓂᕐᒧᑦ ᐸᓯᔭᒃᓴᐅᔾᔪᑎᓂᒃ, ᐸᓖᓯᑦ ᐱᓇᓱᐊᕈᓯᐅᓚᐅᕐᑐᒥ ᐅᖃᓚᐅᕐᑐᑦ.

ᓵᒥᐅᓪ ᑕᕐᕋᓕᒃ, 30, ᐸᓯᔭᒃᓴᙳᖅᑎᑕᐅᓚᐅᕐᓯᒪᔪᖅ ᓯᑎᐱᕆ 25-ᒥ ᑎᓴᒪᓂᒃ ᒪᓕᒐᕐᓂᒃ ᓱᕋᐃᓂᕐᒧᑦ — ᐱᓕᕆᐊᖃᕐᓂᕐᒥᒃ, ᐊᖑᑎᐊᒍᑦ ᐊᒃᑐᖅᑕᐅᔪᒪᓯᒪᓂᕐᒧᑦ, ᖃᐃᖁᔨᓂᕐᒧᑦ ᐊᒻᒪᓗ ᓱᕈᓯᕐᓂ ᐊᓐᓄᕋᐃᙶᖅᑐᓂᒃ ᐊᔾᔨᙳᐊᓂ ᐱᓯᒪᓂᕐᒧᑦ, ᐸᓖᓯᒃᑯᑦ ᑐᓴᒐᒃᓴᑎᒍᑦ ᑐᓴᖅᑎᑦᑎᓚᐅᕐᑐᑦᖅ ᐅᒃᑑᐱᕆ 13-ᖑᑎᓪᓗᒍ.

ᐸᓖᓯᒃᑯᑦ ᐅᖃᕐᑎᖓ ᓵᔾᔭᓐ ᐹᓖᓐ ᒥᓛᓐᓴᓐ ᐅᖃᓕᓚᐅᕐᑐᖅ ᑭᖑᓂᐊᒍᑦ ᑕᒪᒃᑯᐊ ᐸᓯᔭᒃᓴᐅᔾᔪᑎᑦ ᐃᓕᓐᓂᐊᕐᕕᖕᒦᓚᐅᖏᓐᓂᖏᓐᓂᒃ ᐊᒻᒪᓗ ᐃᓕᓐᓂᐊᖅᑎᑦ ᐃᓕᓐᓂᐊᕐᕕᖕᒥ ᐃᖅᑲᓇᐃᔭᕐᕕᖓᓂᙶᓚᐅᙱᖢᑎᒃ.

ᐊᒻᒪᓗ ᑐᓴᖅᑎᑦᑎᓚᐅᙱᖢᑎᒃ ᐱᓇᓱᐊᕈᓯᑦ ᐱᖓᓱ ᐸᓯᔭᒃᓴᙳᖅᑎᑕᐅᓚᐅᖅᑎᓪᓗᒍ ᖃᓄᐃᓯᒪᓂᖏᓐᓂᒃ ᐊᒻᒪᓗ ᖃᓄᐃᒻᒪ ᑐᓴᒐᒃᓴᓕᐅᓕᕐᓂᖏᓐᓂᒃ ᑐᓂᓯᑎᓪᓗᒋᑦ ᑐᓴᒐᒃᓴᓕᐅᖅᑎᓄᑦ 4:30 ᐅᓐᓄᓴᒃᑯᑦ.

ᐅᓇ ᖃᐅᔨᓴᖅᑕᐅᓚᐅᕐᑐᖅ ᐸᓖᓯᒃᑯᑦ ᖃᐅᔨᓴᖅᑎᖏᓐᓄᑦ. ᖃᐅᔨᓴᖅᑎᐅᔪᑦ ᐱᓕᕆᐊᖃᓕᓚᐅᕐᑐᑦ ᐸᓖᓯᒃᑯᑦ ᑖᔅᓱᒥᖓ “ᖃᓄᐃᓕᐅᕈᑎᕕᓂᕐᓂ ᐊᑐᖅᑕᐅᓂᑯᕕᓂᕐᓂ 2018-ᖑᑎᓪᓗᒍ ᐃᓕᓐᓂᐊᖃᑦᑕᕐᓂᑯᓄᑦ ᑕᕝᕙᓂ.”

ᐸᓖᓯᑦ ᐅᓂᒃᑳᖏ ᐅᖃᕐᓯᒪᓚᐅᙱᑦᑐᑦ ᐱᖓᓱᑦ ᐸᓯᔭᒃᓴᐅᔾᔪᑎᖏᑦ ᒫᓇᓕᓵᖑᔭᕆᐊᒃᓴᖏᓐᓂᒃ ᐅᕝᕙᓘᓐᓃᑦ ᖃᖓᑲᓪᓚᐅᓕᕐᑐᖅ. ᐸᓖᓯᓄᑦ ᐅᖃᖅᑎᒋᔭᐅᔪᖅ ᐅᖃᕐᕕᐅᔪᓐᓇᓚᐅᙱᒻᒪ ᓇᓗᓇᐃᕐᓯᒃᑲᓐᓂᖁᔭᐅᒐᓗᐊᖅᖢᓂ.

ᓇᓗᓇᖅᑐᖅ ᑕᕐᕋᓕᒃ ᒫᓐᓇ ᐃᖅᑲᓇᐃᔭᕆᐊᒃᓴᖓᓂ ᓱᓕ ᐃᓕᓐᓂᐊᕐᕕᒃᒥ.

ᐃᓕᓐᓂᐊᕐᓂᓕᕆᔨᒃᑯ ᐅᖃᐅᓯᖃᕈᓐᓇᓚᐅᙱᑦᑐᑦ ᑕᕐᕋᓕᒃ ᖃᓄᐃᓕᖓᓕᕆᐊᒃᓴᖓᓂ ᐃᓕᓐᓂᐊᕐᕕᒃᒥ, ᐅᖃᖅᖢᑎᒃ ᑕᐃᒪᐃᓂᖏᓐᓂᒃ ᐅᕘᓇ ᓄᓇᕗᒥᑦ ᓴᐳᔾᔨᓯᒪᔾᔪᑎᓄᑦ ᒪᓕᒐᕐᓂᒃ.

“ᐅᖃᐅᓯᖃᑲᑕᖁᔭᐅᙱᓐᓇᑦᑕ ᑕᒪᐅᖓᒥᐊᖅ ᐅᖃᐅᓯᐅᖁᔭᐅᙱᑦᑐᓂᒃ ᐃᖅᑲᓇᐃᔭᖅᑏᑦ ᒥᒃᓵᓅᖓᔪᓂᒃ ᐃᖅᑲᓇᐃᔭᕐᓂᖏᓐᓂᒃ ᐅᕝᕙᓘᓐᓃᑦ ᐃᖅᑲᓇᐃᔮᕕᓂᖏᓐᓂᒃ, ᐅᓇ ᐃᓚᖃᕐᑐᖅ ᐃᓕᓴᐃᔨᓂᒃ ᐊᒻᒪ ᐃᓕᓐᓂᐊᕐᕕᒃᒥ ᐃᖅᑲᓇᐃᔭᖅᑎᓄᑦ,” ᐃᓕᓐᓂᐊᕐᓂᓕᕆᔨᒃᑯᑦ ᐅᖃᖅᑎᖓᑦ ᑯᕆᔅᑕ ᐊᐃᒥ ᐅᖃᓚᐅᕐᑐᖅ ᑎᑎᕋᖅᖢᓂ ᖃᕋᓴᐅᔭᒃᑯᑦ.

ᑕᕐᕋᓕᒃ ᐃᖅᑲᖅᑐᐃᕕᒃᒥ ᐱᓕᕆᐊᖑᓕᓛᕐᑐᖅ ᐅᒃᑑᐱᕆ 30-ᒥ.

Share This Story

(0) Comments