ᐃᓪᓚᐅᖅ ᐊᖏᖅᑎᑕᐅᕗᖅ ᓄᓇᕗᒧᑦ ᒪᓕᒐᓕᐅᖅᑎᐅᓂᐊᕐᓂᕐᒧᑦ ᐃᓄᒃᑎᑐᑦ ᐊᒻᒪ ᖃᓪᓗᓈᑐᑦ

ᓘᕆ ᐃᓪᓚᐅᖅ ᐃᒃᐱᒍᓱᒻᒪᕆᒪᐅᕐᑐᖅ “ᐱᒃᑯᓕᓪᓚᕆᖕᓂᕐᒥᒃ ᓄᓇᕗᒥᐅᓄᑦ” ᐊᖏᖅᑎᑕᐅᑎᓪᓗᒍ — ᐃᓄᒃᑎᑐ ᐊᒻᒪ ᖃᓪᓗᓈᑎᑐᑦ — ᓄᓇᕗᒧᑦ ᐃᓚᒋᔭᐅᓕᖅᑎᓪᓗᒍ ᑲᓇᑕᒥ ᒪᓕᒐᓕᕆᕕᒡᔪᐊᕐᒥ ᓄᕕᐱᕆ 12-ᖑᑎᓪᓗᒍ.

ᖁᙱᐊᖅᑕᐅᓪᓚᕆᒃᖢᓂ ᒪᓕᒐᓕᕆᕕᒡᔪᐊᒧᑦ ᑎᑎᕋᖅᑎᒥ ᓵᔅ ᐅᕌᐳᑦ ᐋᑐᕚᒦᑦᑐᒧᑦ, ᐃᓪᓚᐅᖅ ᐊᖏᖅᑎᑕᐅᓚᐅᕐᑐᖅ 10-ᒥ ᐅᓪᓛᒃᑯᑦ. ᐅᐸᒍᑎᔪᑦ ᒫᓃᑦᑐᑦ 40-ᖏᓐᓂ ᓇᖏᕐᓯᓪᓗᑎᒃ ᐸᑦᑕᒃᑐᓚᐅᕐᑐᑦ ᖃᖃᔮᕐᒥ ᐃᒡᓗᐊᓗᖕᒥᑦ.

ᓘᕆ ᐃᓪᓚᐅᖅ ᐊᒻᒪ ᐊᓈᓇᖓ, ᑳᒪᓐ ᐃᓪᓚᐅᖅ, ᐃᕿᖃᑦᑕᐅᑎᔫᒃ ᓘᕆ ᐊᖏᖅᑎᑕᐅᓚᐅᖅᑎᓪᓗᒍ ᓄᓇᕗᒧᑦ ᒪᓕᒐᓕᐅᖅᑎᐅᓂᕐᒧᑦ. (ᐊᔾᔨᓕᐅᕆᔨ ᑕᐃᕕᑦ ᕕᐊᓐ)

“ᐊᒃᓱᐊᓗᒃ ᖁᕕᐊᓱᒃᐳᖓ ᓂᕈᐊᕆᔭᐅᓚᐅᕐᓂᓐᓂᒃ ᓄᓇᕗᒥᑦ ᑭᒡᒐᖅᑐᐃᔨᐅᓂᕐᒧᑦ,” ᐅᖃᓚᐅᕐᑐᖅ ᐊᐱᖅᓱᖅᑕᐅᓪᓗᓂ.

ᐅᑯᐊ ᖁᕕᐊᓲᑎᖃᖅᑐᑦ ᖁᙱᐊᓚᐅᕐᒥᔪᑦ ᐃᙱᖅᑎᒥ ᐃᓕᓴᐱ ᑕᑎᒡᒐᑦ ᐊᕕᙵᖅᒥᒃ, ᑲᑕᔾᔭᖅᑎᓂᒃ ᑯᕆᔅᑕᓐ ᖃᐅᓇᒃ ᐊᒻᒪ ᐊᓕᒃᓴ ᐊᓚᐃᙵ ᐊᒻᒪ ᕿᓚᐅᔾᔭᖅᑎᒥ ᒫᑎᐅ ᓄᕿᙵᖅᒥᓐ.

ᐃᓪᓚᐅᖅ ᐅᖃᓚᐅᕐᑐᖅ ᐃᓱᒪᖅᓱᖅᑎᑕᐅᒐᒥ ᐅᖓᓯᒃᑐᒥ ᐊᖏᖅᑎᑕᐅᔪᓐᓇᕐᓂᖓᓂᒃ, ᐃᓄᐃᑦ ᐃᓕᖅᑯᓯᖓᓂ ᐃᓚᐅᑎᑦᑎᔪᒪᓕᓚᐅᕐᑐᖅ ᐊᒻᒪᓗ ᑭᐱᙳᐃᔭᖅᑎᓄᑦ ᖃᐅᔨᓇᓱᑲᑕᓕᖅᖢᓂ.

“ᐃᓅᓂᓐᓂ ᐱᒃᑯᓕᖃᑎᖃᕈᒪᓚᐅᕋᒪ ᐊᒻᒪᓗ ᐃᓕᖅᑯᓯᑦᑎᓐᓂ ᑕᑯᔭᐅᖁᔨᓪᓗᖓ ᑭᐱᙳᐃᔭᖅᑎᓂᒃ,” ᐃᓪᓚᐅᖅ ᐅᖃᓚᐅᕐᑐᖅ ᐅᐸᒍᑎᔪᓄᑦ.

ᓕᐳᕈᑯᓐᓄᑦ ᒪᓕᒐᓕᐅᕐᑎᐅᓚᐅᕐᑐᖅ ᔮᒃ ᐊᓇᕈᐊᖅ ᑐᙵᓱᒃᑎᑦᑎᔨᐅᓚᐅᕐᑐᖅ ᖁᕕᐊᓲᑎᒋᔭᐅᔪᒥᒃ ᐊᒻᒪᓗ ᐅᖃᖅᖢᓂ ᐱᕈᖅᐸᓪᓕᐊᑎᓪᓗᒍ ᐃᓱᒪᓚᐅᕐᓯᒪᙱᓐᓂᕋᖅᖢᓂ ᐃᓄᒃᒥ ᒪᓕᒐᓕᕆᕕᒡᔪᐊᕐᒦᑦᑐᒥᒃ.

ᐃᓕᓴᐱ ᐊᓂᖕᒥᐅᖅ ᖁᓪᓕᖅᒥ ᐃᑯᒻᒥᕐᓯᔪᖅ ᑐᒃᓯᐊᓚᐅᖅᖢᑎᒃ ᐃᓪᓚᐅᖅ ᐊᖏᖅᑎᑕᐅᓂᐊᓕᖅᑎᓪᓗᒍ. (ᐊᔾᔨᓕᐅᕆᔨ ᑕᐃᕕᑦ ᕕᐊᓐ)

“ᐅᓇ ᑕᐅᑐᙳᐊᕈᓐᓇᓚᐅᕐᓯᒪᙱᑕᕗᑦ ᑕᐃᔅᓱᒪᓂ. ᐊᓱᐃᓛᒃ ᑕᕝᕙᓃᓕᕐᐳᒍᑦ,” ᐊᓇᕈᐊᖅ ᐅᖃᓚᐅᕐᑐᖅ ᖁᕕᐊᓲᑎᖃᕐᓂᖅ ᐃᓱᓕᓕᖅᑎᓪᓗᒍ.

ᐃᓕᓴᐱ ᐊᓂᖕᒥᐅᖅ, ᖁᓪᓕᕐᒥ ᐃᑯᒻᒥᕐᓯᓚᐅᕐᑐᖅ ᖁᕕᐊᓲᑎᖃᕐᓂᖅ ᐱᒋᐊᕈᑎᒋᓪᓗᓂᐅᒃ, ᐅᖃᓚᐅᕐᑐᖅ ᐊᐱᖅᓱᖅᑕᐅᑎᓪᓗᒍ ᐅᓇ ᖁᓪᓕᖅ ᐱᒻᒪᕆᐊᓘᖕᒪᑦ ᓇᓗᓇᐃᒃᑯᑎᒋᔭᐅᓪᓗᓂ ᖃᓄᐃᓕᐅᕈᑎᓄᑦ.

“ᖁᕕᐊᓇᕐᒪᑦ ᖁᓪᓕᕐᒥ ᐃᓚᐅᑎᑦᑎᖃᓯᐅᑎᓪᓗᓂ, ᑖᓐᓇ ᖃᐅᒪᓂᖃᖅᑎᑦᑎᖕᒪᑦ ᐊᒻᒪ ᓂᕆᐅᖕᓂᖃᖅᖢᓂ ᐊᒻᒪ ᐅᖅᑰᑦᑎᐊᕐᓇᖅᖢᓂ,” ᐊᓂᖕᒥᐅᖅ ᐅᖃᖅᑐᖅ.

ᐃᓪᓚᐅᖅ ᐅᖃᓚᐅᕐᑐᖅ ᓂᕆᐅᖕᓂᕋᖅᖢᓂ ᐱᓕᕆᐊᕆᓂᐊᖅᑕᖓᓂᒃ ᐊᒻᒪᓗ ᓯᕗᓪᓕᖅᐹᖑᓛᖅᑐᒥᒃ ᒪᓕᒐᓕᕆᕕᒡᔪᐊᕐᒥ ᐃᒃᓯᕚᕐᓇᐅᓛᖅᑐᒥᒃ ᓄᕕᐱᕆ 22-ᖑᓕᖅᐸᑦ.