ᐃᓱᒪᒋᔭᖃᖅᐱᑦ ᐸᐸᑦᑏᓐᓇᕐᓂᕐᒧᑦ ᐃᓄᐃᑦ ᐃᓕᖅᑯᓯᖓᓐᓂ? ᑐᓂᕐᕈᑎᑕᖃᖅᐳᖅ

For the English version of this story, please see Have an idea to preserve Inuit culture? There’s a grant for that.

ᓄᓇᕗᒻᒥᐅᑕᐃᑦ ᐊᒻᒪ ᑲᑐᔾᔨᖃᑎᒌᖑᔪᑦ ᐃᓱᒪᓕᐅᕐᓂᖃᖅᑐᓂ ᖃᓄᖅ ᐸᐸᑦᑏᓐᓇᕈᓐᓇᕐᓂᖏᓐᓂ ᐃᓄᐃᑦ ᐃᓕᖅᑐᓯᖓᓐᓂ ᐊᒻᒪ ᐅᖃᐅᓯᕐᓂ ᐱᔪᓐᓇᖅᐳᑦ ᑐᓂᕐᕈᑕᐅᔪᒥ ᐅᕘᓇ ᓄᓇᕗᒻᒥ ᒐᕙᒪᒃᑯᑦ ᐃᓕᖅᑯᓯᓕᕆᔨᒃᑯᓐᓂ ᐊᒻᒪ ᐃᑦᑕᕐᓂᓴᓕᕆᓂᕐᒧᓪᓗ.

ᐊᕐᕌᒍᑕᒫᑦ, ᑮᓇᐅᔭᓂ ᑐᓂᔭᐅᕙᒃᐳᑦ ᓄᓇᓕᖕᓂ−ᐊᐅᓚᑕᐅᔪᓂ ᐱᓕᕆᐊᒃᓴᐅᔪᓄᑦ ᐊᒻᒪ ᐱᒋᐊᕈᑕᐅᔪᓂ ᐅᑯᓂᖓ ᐱᓕᕆᓂᐅᔪᓄᑦ:

• ᐸᐸᑦᑏᓐᓇᕐᓂᕐᒥ ᐊᒻᒪ ᖁᕝᕙᖅᓴᐃᓂᕐᒥ ᓄᓇᕘᑉ ᐃᓕᖅᑯᓯᖓᓐᓂ ᕿᒻᒪᑯᓂᑦ;
• ᐃᑲᔪᖅᓱᐃᓂᖅ ᐃᓄᑐᖃᕐᓄᑦ ᐊᒻᒪ ᒪᒃᑯᒃᑐᓄᑦ ᖃᓄᐃᓕᐅᕐᓂᐅᔪᓄᑦ;
• ᐋᖅᑭᐅᒪᑎᑦᑎᓂᖅ ᐊᒻᒪ ᐅᖃᐅᓯᖃᕐᓂᕐᒥ ᐃᓄᐃᑦ ᐃᓅᖃᑎᒌᖑᔪᓄᑦ ᐱᓐᓇᕆᔭᐅᔪᓂ;
• ᐅᖃᐅᓯᕐᒥ ᖁᕝᕙᖅᓴᐃᓂᐅᔪᒥ, ᓴᐳᔾᔨᓯᒪᓂᕐᒧᑦ ᐊᒻᒪ ᐸᐸᑦᑏᓐᓇᕐᓂᐅᔪᒥ.

ᐱᓕᕆᕝᕕᒃ ᑮᓇᐅᔭᖃᖅᑎᑦᑎᓚᐅᖅᐳᑦ 193−ᖑᔪᓂ ᐱᒋᐊᕈᑕᐅᔪᓂ ᓄᓇᕗᒻᒥ 2021-22 ᑮᓇᐅᔭᓕᕆᓂᕐᒧᑦ ᐊᕐᕌᒍᖓᓂ ᑐᓂᕐᕈᑕᐅᔪᓂ ᐊᒻᒪ ᐃᑲᔪᖅᓯᕈᑎᓂᑦ ᐊᔾᔨᒌᙱᖦᖢᑎᒃ ᐅᕙᙵᑦ $1,800−ᒥ $1.1 ᒥᓕᐊᓐᓄᑦ ᐃᓕᒃᑯᐊᒥ ᑮᓴᐅᔭᖃᖅᑎᑕᐅᓂᐅᔪᒥ, ᐅᖃᐅᓯᐅᓪᓗᓂ ᐅᓂᒃᑳᓕᐊᒥ ᑮᓇᐅᔭᓕᕆᔨᒃᑯᓐᓂ.

ᐊᑕᐅᓯᐅᔪᒥ ᑕᐃᒃᑯᓂᖓ ᐱᒋᐊᕈᑕᐅᔪᓂ ᐊᑕᐅᓯᐅᓚᐅᖅᐳᖅ ᓇᑦᑎᓕᒃ ᐃᑦᑕᕐᓂᓴᓕᕆᓂᕐᒧᑦ ᑲᑐᔾᔨᖃᑎᒌᖑᔪᒥ, ᐋᖅᑭᒃᓱᐃᕙᒃᑐᒥ ᖃᓄᐃᓕᐅᕐᓂᐅᔪᓂ ᐃᑲᔪᖅᓱᐃᓂᕐᒧᑦ ᐅᖃᐅᓯᕐᒥ ᐸᐸᑦᑏᓐᓇᕐᓂᐅᔪᒥ ᐃᓚᖃᖅᑐᒥ ᑐᑭᓕᐅᕆᓂᕐᒥ ᐅᖃᓕᒫᒐᕐᓂ ᓱᕈᓯᕐᓄᑦ ᐊᒻᒪᓗᑦᑕᐅᖅ ᐊᓯᖏᓐᓂ ᐅᓂᒃᑳᖅᑐᐊᕐᓂᕐᓂ ᐊᒻᒪ ᐃᓕᖅᑯᓯᒧᑦ ᖃᓄᐃᓐᓂᐅᔪᓂ.

ᐃᖅᑲᓇᐃᔭᖅᑎᐅᔪᑦ ᐱᓕᕆᕝᕕᖕᒥ ᐸᕐᓇᓚᐅᖅᐳᑦ ᐳᓚᕋᕐᓂᕐᒥ ᓇᐅᔮᓄᑦ ᓄᕕᐱᕆ 30−ᒥ ᐅᖃᓪᓚᖕᓂᕐᒧᑦ ᓄᓇᓕᖕᒥᐅᑕᓄᑦ ᑐᓂᕐᕈᑕᐅᑉ ᐊᒻᒪ ᐃᑲᔪᖅᓯᕈᑎᓂᒃ ᐱᓕᕆᐊᖑᔪᒥ ᐊᒻᒪ ᑭᐅᓗᑎᒃ ᐊᐱᖅᑯᑎᒃᓴᐅᔪᓂ ᐱᓕᕆᐊᖑᔪᒥ ᐊᒻᒪ ᑐᒃᓯᕋᕐᓂᕐᒧᑦ ᐱᓕᕆᓂᐅᔪᒥ.

ᐱᓕᕆᕝᕕᒃ ᐱᓕᕆᕗᖅ ᐅᐸᒃᓯᒪᓗᑎᒃ ᑕᑯᒃᓴᐅᑎᑦᑎᓂᐅᔪᒥ ᓄᓇᓕᖕᓂ ᐊᑦᑎᒃᑐᒥ ᐅᓄᕐᓂᐅᔪᓂ ᑐᒃᓯᕋᕐᓂᖃᖅᓯᒪᔪᓂ ᑮᓇᐅᔭᖃᖅᑎᑕᐅᓂᐅᔪᒧᑦ, ᐅᖃᓚᐅᖅᐳᖅ ᐋᓐᔨᓚ ᒪᐃᑯᓪᓯᓐ, ᐅᖃᖅᑎᐅᔪᖅ ᐱᓕᕆᕝᕕᖕᒧᑦ, ᖃᕋᓴᐅᔭᑎᒍᑦ ᑎᑎᕋᕐᓂᐅᔪᒥ ᐅᖃᐅᓯᒃᓴᓕᐊᒥ ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᓐᓄᑦ.

ᑮᓇᐅᔭᐃᑦ ᐊᑐᐃᓐᓇᐅᕗᑦ ᓄᓇᖃᖅᑎᓕᒫᖑᔪᓄᑦ ᐊᒻᒪ ᑎᑎᕋᖅᓯᒪᔪᓂ ᑲᑐᔾᔨᖃᑎᒌᖑᔪᓂ ᓄᓇᕗᒻᒥ, ᐊᒻᒪ ᑐᒃᓯᕋᕐᓂᕐᒧᑦ ᒪᓕᒋᐊᓕᖏᑦ ᐊᒻᒪ ᑕᑕᑎᕆᔾᔪᑎᑦ ᐊᑐᐃᓐᓇᐅᕗᑦ ᖃᕋᓴᐅᔭᑎᒍᑦ.

ᐃᓱᓕᕝᕕᒃᓴᖓ ᑐᒃᓯᕋᕐᓂᕐᒧᑦ ᔭᓄᐊᕆ 31−ᖑᕗᖅ 5 ᐅᓐᓄᒃᑯᑦ ᑲᓇᖕᓇᕐᒥ ᓯᕿᙳᔭᖓᓂ.