ᐃᖃᓗᐃᑦ ᐃᓕᓐᓂᐊᕐᑎᖏᑦ ᖃᓄᐃᓕᐅᖁᔨᕗᑦ ᓯᓚᐅᑉ ᐊᓯᙳᖅᐸᓪᓕᐊᓂᖓᓄᑦ

ᒪᖁᑲᑕᒃᑎᓪᓗᒍ ᐱᖓᑦᓯᐅᑉ ᐅᓪᓛᖓᓂᒃ ᐃᖃᓗᖕᓂᑦ, ᒫᓂ 100-ᖏᓐᓃᑦᑐᑦ ᐃᓄᒃᓱᒃ ᐃᓕᓐᓂᐊᕐᕕᐊᓗᒃᒥᑦ ᐃᓕᓐᓂᐊᕐᑎᐅᔪᑦ ᕿᑐᑦᑐᒐᐅᔭᒃᑯᑦ ᑎᑎᖃᖃᐅᖅᑐᓂᒃ ᑎᒍᒥᐊᖅᖢᑎᒃ ᑲᑎᖢᑎᒃ ᐃᓕᓐᓂᐊᕐᕕᒃᒥᑦ ᐊᓂᓚᐅᕐᑐᑦ.

ᐱᓱᓚᐅᕐᑐᑦ ᒪᓕᒐᓕᕆᕕᒡᔪᐊᕐᒧᑦ ᐅᑯᐊ ᓄᓇᕗᑦ ᓯᕗᓕᐅᕐᑎᖏᓐᓂᒃ ᖃᓄᐃᓕᐅᖁᔨᓪᓗᑎᒃ ᓯᓚᐅᑉ ᐊᓯᙳᖅᐸᓪᓕᐊᓂᖓᓄᑦ ᑕᐃᒪᐃᓕᐅᕐᓂᖓ ᐃᓚᒋᔭᐅᓚᐅᕐᑐᖅ ᓄᓇᕐᔪᐊᕐᒥᑦ ᐊᕙᑎᖓᑕ ᐅᓪᓗᖓᓂᒃ ᔫᓂ 5-ᖑᑎᓪᓗᒍ.

ᐃᖃᓗᐃᑦ-ᒪᓂᕋᔭᒃᒧᑦ ᒪᓕᒐᓕᐅᕐᑎ ᐋᑕᒻ ᓚᐃᑦᓯᑑᓐ ᑐᙵᓱᒃᑎᑦᑎᔨᐅᓚᐅᕐᑐᖅ ᐃᓕᓐᓂᐊᖅᑎᓂᒃ ᒪᓕᒐᓕᕆᕕᒡᔪᐊᑉ ᒪᔪᕋᐅᑎᖏᓐᓂᒃ, ᑐᓴᖅᑎᑦᑎᒋᓪᓗᓂ ᑖᒃᑯᓂᖓ ᐃᑲᔪᖅᑐᐃᓂᖏᓐᓂᒃ.

ᑕᑯᔭᒥᓄᑦ ᐊᒻᒪᓗ ᑐᓴᖅᑕᖏᓐᓂᒃ ᐃᓕᓐᓂᐊᖅᑎᓂᒃ ᐅᓪᓛᖓᓂᒃ, ᓚᐃᑦᓯᑑᓐ ᐊᐱᕐᓱᓕᓚᐅᕐᑐᖅ ᐅᓐᓄᒃᓴᐅᓕᖅᑎᓪᓗᒍ ᓯᕗᓕᐅᕐᑎᒥ ᒐᕙᒪᒃᑯ ᖃᓄᐃᓕᐅᕐᓂᐊᕆᐊᒃᒪᖏᓐᓂᒃ ᓯᓚᐅᑉ ᐊᓯᙳᖅᐸᓪᓕᐊᓂᖓᓂᒃ.

“ᖃᓄᐃᒻᒪ ᑲᓇᑕᒥᑦ ᐱᔪᓐᓇᕐᓂᖃᖅᑐᓂᒃ ᖃᓄᐃᓕᐅᕈᑎᒃᓴᖃᙱᑦᑐᑐᐊᖑᕕᑕ ᐅᕝᕙᓘᓐᓃᑦ ᐅᑎᖅᑎᑦᑎᔾᔪᑎᐅᓇᔭᖅᑐᓂᒃ ᐱᖃᙱᑉᐱᑕ ᓄᓇᕗᒻᒥᐅᑦ ᐊᑐᙱᓐᓂᕐᓴᐅᔪᓐᓇᖁᓪᓗᒋᑦ ᓄᓇᒥᙶᕐᓯᒪᔪᓂᒃ ᐅᕐᓱᐊᓗᖕᓂᒃ?” ᐊᐱᕆᔪᖅ.

ᓴᕕᑲᑖᖅ ᐅᖃᓚᐅᕐᑐᖅ ᓄᓇᕗᑦ ᓄᓇᒥᙶᖅᑐᓂᒃ ᐅᕐᓱᐊᓗᖕᓂ ᐊᑐᕆᐊᖃᕐᓂᖏᓐᓂᒃ ᓲᖃᐃᒻᒪ “ᓄᓇᕗᒥᑦ ᐊᓯᖏᓐᓂᒃ ᐱᔾᔪᑎᒃᓴᒃᑲᙱᓗᐊᕋᑦᑕ.”

“ᑖᓐᓇᓕ ᐃᓚᒋᔭᐅᔪᖅ ᖃᓄᐃᓕᐅᖃᑦᑕᖅᑐᒃᓴᐅᒋᕗᖅ ᓯᓚᐅᑉ ᐊᓯᙳᖅᐸᓪᓕᐊᓂᖓᓄᑦ. ᐆᓇᔪᒃᑐᑐᐃᓐᓇᕐᒥᒃᖃᐃᑦ ᐅᕕᓂᖕᓂᐊᖃᑦᑕᕐᒪᑦ ᐆᓇᖅᑐᐊᓗᖕᒥᐅᙱᑦᑐᖅ… ᐊᐅᓚᖃᑦᑕᙱᓐᓂᕐᓴᐅᕗᖅ ᖃᓪᓗᓈᓄᑦ ᐅᕐᓱᐊᓗᖕᒥᒃ ᐊᑐᓗᐊᔾᔮᙱᒻᒪᑦ,” ᓯᕗᓕᐅᕐᑎ ᐅᖃᖅᑐᖅ.

“ᓄᓇᕗᑦ ᑳᐸᓐᓕᐅᕐᓂᖓ 0.1-ᖑᔪᖅ. ᑖᓐᓇᓕ ᑳᐸᓐᒧᑦ ᐃᑲᔫᑎᒋᔭᕗᑦ ᑲᓇᑕᒥ. ᖃᒥᑦᑎᒍᑦᑕ ᑕᒪᐃᓐᓂᓕᒫᖅ ᖃᐅᔨᒻᒪᖁᑎᓂᒃ ᐊᒻᒪ ᑖᖅᑐᐊᓗᖕᒦᑐᐃᓐᓇᓕᕐᓗᑕ ᓂᒡᓚᓱᒃᑐ ᐃᒡᓗᕈᓯᕐᒥ ᓄᓇᕗᒥᑦ, ᑲᓇᑕᐅᑉ ᑳᐸᓐᒧᑦ ᖃᓄᐃᑉᐹᓪᓕᕈᑎᖓ ᑲᑕᒐᔭᖅᑐᖅ 0.1-ᒥᑦ,” ᐅᖃᒃᑲᓐᓂᖅᑐᖅ.

ᑳᓯᑎ-ᐋᓐ ᓇᑦᓯ, ᐋᓐᔨᓚ ᐋᔅᑐᕆᐊ ᐊᒻᒪ ᒫᒃ ᐹᕕᐊ, ᐱᖓᓱᑦ ᒍᕇᑦ 12-ᒥ ᐃᓕᓐᓂᐊᕐᑎᐅᔪᑦ ᐋᕿᒃᓱᐃᔨᐅᓚᐅᕐᑐᑦ ᐱᓱᓕᑐᐃᓐᓇᕐᓂᕐᒥᒃ, ᐃᒃᓯᕚᖃᑕᐅᓚᐅᕐᑐᖅ ᒪᓕᒐᓕᕆᕕᒡᔪᐊᖅ ᐱᒋᐊᓕᖅᑎᓪᓗᒍ ᐅᖃᓪᓚᑲᑕᒃᖢᑎᒃ, ᑭᓯᐊᓂᓕ ᑕᐃᑲᓃᓚᐅᙱᑦᑐᖅ ᓴᕕᑲᑖᖅ ᐅᖃᓪᓚᒃᑎᓪᓗᒍ.

ᑖᒃᑯᐊ ᐱᖓᓱᑦ ᐃᓕᓐᓂᐊᖅᑎᐅᔪᑦ ᐅᖃᓚᐅᕐᑐᑦ ᐸᕐᓇᒃᐸᓪᓕᐊᓕᓚᐅᕐᓯᒪᓂᖏᓐᓂᒃ ᖃᖓᑦᑎᐊᓵᖑᓚᐅᕐᑐᖅ ᐃᓕᓐᓂᐊᕐᕕᒃᒥᑦ ᐃᓕᓐᓂᐊᓚᐅᖢᑎᒃ ᓄᓇᕐᔪᐊᑉ ᑳᐸᓐ ᑕᐃᐊᒃᓴᐃᒃ ᖁᑦᑎᓕᕇᖕᓂᖏᓐᓂᒃ ᑕᒪᓐᓇᓗ ᖃᓄᐃᓕᐅᕈᑎᒋᓕᕆᐊᖅᖢᓂᔾᔪᒃ.

“ᐃᓕᓴᐃᔨᕗᑦ ᓴᕿᑎᑦᑎᓚᐅᕐᓯᒪᖕᒪᑦ ᐊᔾᔨᙳᐊᕐᒥᑦ ᓯᓚᐃᓐᓇᓕᕆᔨᒃᑯᓐᓂᑦ NASA, ᐊᒻᒪᓗ ᓴᕿᔮᖅᑎᑦᑎᓪᓗᓂ ᑳᐸᓐ ᑕᐃᐋᒃᓴᐃᑦ ᖁᑦᑎᓕᕇᖕᓂᖏ ᓯᓚᐃᓐᓇᕐᒦᑦᑐᑦ ᐊᒻᒪᓗ ᐅᖃᕐᓯᒪᓪᓗᓂ 411 ᖑᓂᖏᓐᓂᒃ 1 ᒥᓕᐊᓐᓂ. ᐅᓇ ᖁᑦᑎᖕᓂᖅᐹᖑᓛᖑᓯᒪᔪᖅ,” ᐅᖃᖅᑐᖅ ᓇᑦᓯᕐ.

ᐃᓕᓐᓂᐊᕐᑏᑦ ᓴᕿᑎᑦᑎᓚᐅᕐᓯᒪᔪᑦ ᑎᑎᕋᕐᓯᒪᔪᒥᒃ ᑐᒃᓯᕋᐅᑎᒥᒃ ᒪᓕᒐᓕᕆᕕᒡᔪᐊᒧᑦ ᐅᖃᕐᓯᒪᓪᓗᓂ ᒐᕙᒪᒃᑯ, ᐊᓯᖏᓐᓂᒡᓗ ᐋᕿᒃᓱᐃᖁᔨᓪᓗᑎᒃ ᐃᓅᓱᒃᑐᓂ ᐱᓕᕆᔨᐅᔪᓐᓇᕋᔭᖅᑐᓂᒃ, ᐅᖃᖅᖢᑎᒃ ᖁᐊᕐᓵᕐᓇᖅᑐᒦᓐᓂᖓ ᐊᕙᑎᒋᔭᕗᑦ, ᐊᑐᓕᖅᑎᑦᑎᓗᑎᒡᓗ ᓯᓚᐅᑉ ᐊᓯᙳᖅᐸᓪᓕᐊᓂᐊᓄᑦ ᖃᓄᐃᓕᐅᕈᑎᒃᓴᓂᒃ ᐊᒻᒪᓗ ᐊᖏᒡᓕᒋᐊᖅᑎᑦᑎᓗᑎᒃ ᓯᓚᒥ ᓴᓗᒪᑎᑦᑎᓇᓱᒍᑎᓂᒃ.

ᐅᖃᐅᓯᖃᖅᖢᓂ ᐃᓕᓐᓂᐊᖅᑏᑦ ᑐᒃᓯᕋᐅᑎᖓᓂᒃ, ᓚᐃᑦᓯᑑᓐ ᐊᐱᕆᓚᐅᕐᑐᖅ ᒐᕙᒪᒃᑯᑦ ᐋᕿᒃᓱᐃᓇᔭᕐᓂᖏᓐᓂᒃ ᐃᓅᓱᒃᑐᓄᑦ ᑲᑎᒪᔨᐅᓇᔭᖅᑐᓂᒃ.

ᓴᕕᑲᑖᖅ ᐅᖃᓚᐅᕐᑐᖅ ᓯᓚᐅᑉ ᐊᓯᙳᖅᐸᓪᓕᐊᓂᖓᓄᑦ ᑎᑎᕋᕐᕕᒃ ᒫᓐᓇ ᐱᓕᕆᐊᖃᓕᕇᕐᓂᕋᖅᖢᒍ ᐃᓅᓱᒃᑐᓂᒃ ᑲᑎᒪᔨᐅᓇᔭᖅᑐᓂᒃ ᐊᒻᒪᓗ ᐃᖅᑲᓇᐃᔭᖅᑎᒃᓴᒥᑦ ᐱᓕᕆᐊᖃᓕᕐᓂᐊᖅᑐᒥᑦ ᑖᒃᑯᓂᖓ.

ᐊᐱᕆᔭᐅᑎᓪᓗᒍ ᒪᐃᑦᓯᑑᓐᒧᑦ ᒐᕙᒪᒃᑯᑦ ᐱᒋᐊᖅᑎᑦᑎᓂᐊᕆᐊᒃᓴᖏᓐᓂᒃ ᐱᖁᔨᕗᖔᕈᑎᓯ ᐅᖃᕐᓯᒪᔪᒥᒃ ᓯᓚᐅᑉ ᐊᓯᙳᖅᐸᓪᓕᐊᓂᖓ ᑐᐊᕕᕐᓇᖅᑑᓂᖓᓂᒃ, ᓴᕕᑲᑖᖅ ᐅᖃᓚᐅᕐᑐᖅ ᑐᑭᓯᓯᒪᓗᐊᙱᓐᓂᖓᓂᒃ ᐆᒥᖓ “ᑐᐊᕕᕐᓇᕐᓂᕐᒥᒃ.”

“ᓄᓇᖃᕋᑦᑕ ᓄᓇᕐᔪᐊᑉ ᑎᕆᖅᑯᑯᓗᐊᓂᒃ ᐊᒃᑐᑕᖅᑕᐅᓯᒪᓛᖑᓪᓗᓂᓗ, ᑭᓯᐊᓂᓕ ᐊᒃᑐᐃᒍᑎᒋᕙᓪᓕᐊᔭᕗᑦ ᑲᓇᑕᐅᑉ ᓯᓚᑖᓂᙶᖅᐸᓪᓕᐊᖕᒥᖕᒪᑕ,” ᐅᖃᖅᑐᖅ. “ᐊᖏᖅᓂᖅᐹᑦ ᐊᒃᑐᐃᒍᑎᐅᔪᑦ ᑲᓇᑕᒥᙶᙱᒻᒪᑕ.”

ᓯᕗᓕᐅᕐᑎ ᐅᖃᓚᐅᕐᒥᔪᖅ ᖃᐅᔨᒪᙱᒃᑲᓗᐊᖅᖢᓂ ᓯᓚᐅᑉ ᑐᐊᕕᓐᓇᖅᑐᒦᓐᓂᖓᓂᒃ, ᓄᓇᕗᒻᒥᐅᓂᒃ ᐃᑲᔪᖅᑐᐃᖁᔨᓇᔭᕐᓂᕋᖅᖢᓂ ᒥᒃᖠᕚᓪᓕᖅᑎᑦᑎᓇᓱᖕᓂᕐᒥᒃ ᑳᐸᓐᒥᑦ ᓴᕿᑎᑦᑎᒍᑎᐅᓗᐊᕐᑐᓂᒃ.

ᐋᔅᑐᕆᐊ ᐅᖃᓚᐅᕐᑐᖅ ᐃᓕᓐᓂᐊᕐᑎᐅᔪᑦ ᑲᔪᓰᓐᓇᕐᓂᐊᕐᓂᕋᖅᖢᓂᒋᑦ ᐊᓯᙳᖅᑎᑦᑎᓇᓱᖕᓂᕐᒥᒃ, ᐊᒻᒪᓗ ᐃᓕᓐᓂᐊᕐᑎᓂᒃ ᐱᓇᓱᐃᓐᓇᖁᔨᓪᓗᓂ ᐊᓂᒍᐃᒐᓗᐊᖅᑎᓪᓗᒍ.

“ᐅᑭᐅᕐᑕᖅᑐᖅ ᐅᖂᓯᕙᓪᓕᐊᓂᖓ ᐱᖓᓱᐃᖅᖢᓂ ᓱᒃᑲᓂᕐᓴᐅᖕᒪᑦ ᓄᓇᕐᔪᐊᓕᒫᖅ ᑕᐅᑐᒃᖢᒍ. ᐃᓱᒪᔪᖓ ᐱᒻᒪᕆᐊᓘᓂᖓᓂᒃ ᐊᓯᙳᖅᑎᑦᑎᓇᓱᒃᓂᕗᑦ,” ᐅᖃᖅᑐᖅ. “ᓲᖃᐃᒻᒪ ᐊᖏᕐᕋᕆᕋᑦᑎᒍᑦ.”