ᐃᖃᓗᐃᑦ ᐊᐱᕆᓚᐅᕐᑐᑦ ᓄᓇᕗᒥᑦ ᒐᕙᒪᒃᑯᓐᓂ ᐃᑲᔪᖅᑕᐅᔪᒪᓪᓗᑎᒃ ᐊᑭᓕᕆᐊᖃᖅᑕᖏᓐᓂᒃ $1.5 ᒥᓕᐊᓐ ᐃᒪᕐᒧᑦ ᑐᐊᕕᕐᓇᖅᑐᓕᕆᓂᕐᒧᑦ

ᑲᑎᒪᔨᓄᑦ ᐊᖏᖅᑕᐅᓯᒪᔪᖅ ᐃᒪᕐᒧᑦ ᐊᑭᓕᐅᑎᓂᒃ ᐅᑎᖅᑎᑦᑎᓂᒃᓴᖅ ᒫᐅᓇ ᑎᑭᐅᑎᓯᒧᓪᓗᐊᕐᒪᑦ $1M ᐊᑭᓕᐅᑎᒃᓴᓄᑦ ᐅᒃᑑᐱᕆ 12ᒥ 31ᒧ

ᓄᓇᓕᐸᐅᔭᓄᑦ ᐃᖅᑲᓇᐃᔭᖅᑎᐅᔪᑦ ᐃᖃᓗᐃᑦ ᑰᖓᓂᒃ (Sylvia Grinnell) ᓄᕕᐱᕆ 5-ᖑᑎᓪᓗᒍ. ᐃᖃᓗᐃᑦ ᑲᑎᒪᔨᖏᑦ ᐅᖃᓚᐅᕐᑐᑦ ᐃᒪᕐᒥ ᑐᐊᕕᕐᓇᖅᑐᓕᕆᓂᖅ ᓄᓇᓕᐸᐅᔭᓄᑦ ᐊᑭᓖᔾᔪᑎᐅᔭᕆᐊᖃᓕᓚᐅᕐᓂᖓᓂᒃ $1.5 ᒥᓕᐊᓐ ᑖᓚᓂ ᐱᓇᓱᐊᕈᓯᕐᓄᑦ ᐱᖓᓱᓄᑦ ᐅᒃᑑᐱᕆᐅᓚᐅᕐᑐᒥᑖ ᑖᓐᓇᓗ ᑮᓇᐅᔭᖅ ᓄᓇᕗᒥᑦ ᒐᕙᒪᒃᑯᓐᓂ ᐱᔭᐅᔪᒪᓪᓗᓂ ᑐᐊᕕᕐᓇᖅᑐᓕᕆᓂᕐᒧᑦ ᐃᑲᔫᑎᖏᓐᓂᒃ. (ᐊᔾᔨᙳᐊᖅ ᐅᕙᙵᑦ ᒥᓚᓂ ᐅᕆᑦᓵᑦ)

By ᑕᐃᕕᑦ ᓛᕼᐄᑦ

For an English version of this story, please see Iqaluit asks GN to cover $1.5M in water-crisis expenses.

ᐃᖃᓗᐃᑦ ᓄᓇᓕᐸᐅᔭᓄᑦ ᑲᑎᒪᔨᑦ ᓄᓇᕗᒥᑦ ᒐᕙᒪᒃᑯᓐᓂ ᐱᔪᒪᔪᑦ ᓄᓇᓕᐸᐅᔭᐃᑦ ᐊᑭᓕᕆᐊᖃᖅᑕᖏᓐᓄᑦ ᐃᒪᕐᒧᑦ ᓈᒻᒪᙱᐅᓕᕈᑎᓄᑦ ᒫᓂ $1.5 ᒥᓕᐊᓐ ᐱᓇᓱᐊᕈᓯᑦ ᐱᖓᓱᓪᓗᐊᓄᑦ.

ᑲᑎᒪᔩᑦ ᑕᒪᒃᑭᖅᖢᑎᒃ ᐊᖏᓚᐅᕐᑐᑦ ᓄᕕᐱᕆ 5ᒥ ᐱᓇᓱᒍᒪᓗᑎᒃ ᓄᓇᕗᒥᑦ ᓄᓇᓕᖕᓂᒃ ᐃᑲᔪᕈᑎᒃᓴᓂᒃ ᑐᒃᓯᕋᐅᑎᒥ.

ᐅᓇ ᐊᑭᓕᐅᑎ ᐊᑐᖅᑕᐅᓚᐅᕐᑐᖅ ᐃᒪᕐᒥ ᑐᐊᕕᕐᓇᖅᑐᖃᖅᑎᓪᓗᒋᑦ ᐅᒃᑑᐱᕆ 12ᒥ ᐅᒃᑑᐱᕆ 31ᒧ.

ᐃᒪᕐᒧᑦ ᐊᑭᓕᐅᑎᕕᓂᕐᓂᒃ ᐅᑎᖅᑎᑦᑎᔭᕆᐊᖃᕐᓂᖅ ᐅᓄᓛᕆᔭᐅᔪᖅ ᐊᑭᓕᐅᑎᒃᓴᓅᖓᔪᓂᒃ $965,000 ᐅᖓᑎᑦᑎᐊᖓᓂ. ᐊᓯᖏᓪᓕ ᐊᑭᓕᐅᑎᒃᓴᓅᖓᔪᑦ ᐅᓇ $190,000 ᐃᒪᕐᒥ ᓴᓗᒪᕐᓴᐃᑎᑦᑎᓂᕐᒧᑦ ᐅᑯᓇᙵᑦ ᕿᑭᖅᑖᓗᒃ ᐊᕙᑎᓕᕆᔨᒃᑯᑦ (Qikiqtaaluk Environmental); $43,000 ᐃᖅᑲᓇᐃᔭᖅᑎᓄᑦ ᐃᑲᕐᕋᓕᐊᖏᑦᑕ ᐅᖓᑖᓅᑲᑕᖕᓂᕐᒧᑦ; $197,000 ᖃᐅᔨᓴᖅᑕᐅᑎᑦᑎᓂᕐᒧᑦ, ᐱᖁᑎᒃᓴᓄᑦ ᐊᒻᒪᓗ ᐸᕐᓇᐅᑎᓕᐅᕐᓂᕐᒥᒃ ᐅᑯᓇᙶ ᐊᐅᓚᑦᑎᔾᔪᑎᓕᕆᓂᕐᒧᑦ ᑲᒻᐸᓂᐅᔪᓂᒃ WSB; ᐊᒻᒪᓗ $36,000 ᐃᒪᖃᐅᑎᓄᑦ, ᖃᑦᑕᕐᓄᑦ ᐊᒻᒪ ᒪᑐᖏᓐᓂᒃ ᐅᑯᓇᙵᑦ Uline.

ᓄᓇᓕᐸᐅᔭᐃᑦ ᑐᓂᔭᐅᓚᐅᕐᒥᔪᑦ $38,000 ᐃᑲᔫᑎᒃᓴᓂᒃ ᐃᒥᖃᐅᑎᓄᑦ ᐅᑯᓇᙵᑦ ᓄᓇᕗᑦ ᑐᙵᕕᒃᑯᓐᓂ ᐊᒻᒪᓗ ᒐᕙᒪᑐᖃᒃᑯᓐᓂ.

ᒪᐃᔭ ᑭᐊᓂ ᐱᐊᓪ ᐅᖃᓚᐅᕐᑐᖅ ᓄᓇᓕᐸᐅᔭᓄᑦ ᑲᑎᒪᔩᑦ ᐊᖏᕐᓂᐊᕋᓱᒋᓪᓗᓂᒋᑦ ᐃᒪᕐᒧᑦ ᐊᑭᓕᐅᑎᕕᓃᑦ ᐅᑎᖅᑎᑕᐅᓂᐊᕈᒪᓂᖏᑦ ᐅᓇ ᑐᐊᕕᕐᓇᖅᑐᓕᕆᓂ ᐊᓂᒍᕐᓯᒪᓕᖅᐸᑦ.

ᐊᒻᒪᓗ, ᐅᖃᓚᐅᕐᒥᔪᖅ ᐃᒪᕐᒧᑦ ᐊᑭᓕᐅᑎᒋᔭᐅᔪᑦ ᓄᓇᓕᐸᐅᔭᓄᑦ ᐅᒃᑑᐱᕆᒥ ᓱᖁᓯᖅᑕᐅᔾᔮᙱᑦᑐᑦ ᐊᑭᓕᕈᑎᖏ ᑭᓯᐊᓂᓕ ᑕᐃᒪᐃᑯᑖᔾᔮᕋᓱᒋᙱᑕᖓ.

ᐱᐊᓪ ᐅᖃᑲᓐᓂᓚᐅᕐᑐᖅ ᓄᓇᓕᐸᐅᔭᐃᑦ ᐅᓂᒃᑳᓂᒃ ᐃᖃᓗᐃᑦ ᐃᒪᖓᓄᑦ ᑐᓂᓯᓚᐅᕐᓂᕋᖅᖢᓂᒋᑦ ᓄᓇᕗᒥᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐊᖓᔪᖅᑳᖓᓄᑦ ᓄᕕᐱᕆ 4ᒥ, ᐅᖃᖅᖢᑎᒃ ᓄᓇᓕᐸᐅᔭᐃᑦ ᐃᒪᖓ ᖃᐅᔨᓴᖅᑕᐅᑎᓪᓗᒍ ᓈᒻᒪᓕᓚᐅᕐᓂᕋᖅᖢᓂᐅᒃ ᑲᓇᑕᒥ ᐃᒥᖅᑕᐅᔪᓐᓇᖅᑐᓄᑦ ᑐᑭᒧᐊᕈᑎᑎᒍᑦ ᐊᒻᒪᓗ ᐅᑯᐊ CPHO ᕿᒥᕐᕈᐊᓛᕐᓂᖏᓐᓂᒃ ᑐᓴᒐᒃᓴᕆᔭᐅᔪᓂᒃ.

ᑕᖅᑭᐅᓚᐅᕐᑐᒥ ᓄᓇᓕᐸᐅᔭᐃᑦ ᐊᐅᓚᑦᑎᔨᖓᑦ, ᐊᐃᒥ ᐊᒍᔅᒪ, ᐅᖃᓚᐅᕐᑐᖅ ᓄᓇᓕᐸᐅᔭᐃᑦ ᐅᑕᖅᑭᓂᖏᓐᓂᒃ ᓘᒃᑖᖅ ᒪᐃᑯᓪ ᐹᑐᓴᓐ ᐊᖏᕐᓂᐊᕐᓂᖓᓂᒃ ᐅᓇ ᐊᑐᕈᓐᓃᖅᑎᑕᐅᔪᒪᓂᖓ ‘ᐃᒥᙱᓗᒍ’ ᒪᓕᖁᔭᐅᓚᐅᕐᑐᖅ ᐅᒃᑑᐱᕆ 12ᖑᑎᓪᓗᒍ. ᐅᓇ ᐊᑐᖁᔭᐅᔾᔪᑎ ᓱᓕ ᒪᓕᖁᔭᐅᓯᒪᔪᖅ ᑭᓯᐊᓂ ᐅᓇ CPHO ᐊᑐᕈᓐᓃᖅᑎᑕᐅᒃᐸᑦ.

ᑭᓯᐊᓂᓕ ᓄᕕᐱᕆ 5ᒥ, ᓄᓇᕗᒥᑦ ᒐᕙᒪᒃᑯᑦ ᑐᓂᓯᓚᐅᕐᓯᒪᖕᒪᑕ ᐅᖃᐅᓯᒃᓴᓂᒃ ᐅᖃᕐᓯᒪᔪᓂᒃ ᐅᑯᐊ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ “ᓄᖑᕈᑎᓂᖏᓐᓂᒃ ᐅᔾᔨᕈᓱᑦᑎᐊᖁᔨᓯᒪᓂᕐᒥᒃ” ᐊᓯᒃᑲᓐᓂᖏᓐᓂᒃ ᖃᐅᔨᓴᖁᔨᓕᖅᖢᑎᒃ ᓄᓇᓖᑦ ᖃᐅᔨᓴᕈᑎᒋᓂᑯᖏᓐᓂᒃ.

ᐅᑯᐊ ᑲᓇᑕᒥ ᐅᓇᑕᖅᑐᒃᓴᐃᑦ ᐋᖅᑭᒃᓯᓚᐅᕐᑎᓪᓗᒋᑦ ᒪᕐᕉᖕᓂ ᐃᒪᕐᒥ ᐱᐅᓯᕚᓪᓕᕈᑎᒃᓴᓂᒃ ᐅᕙᙶᖅᑐᓂᑦ ᐃᖃᓗᐃᑦ ᑰᖓᓂ (Sylvia Grinnell River), ᐅᑯᐊ ᐅᓇᑕᖅᑐᒃᓴᐃᑦ ᐃᑲᔪᕐᓂᖏᑦ ᓴᓗᒪᔪᒥ ᐃᒪᖃᕈᓐᓇᖅᑎᑦᑎᓂᕐᒥ ᐃᓱᒪᒋᔭᐅᔪᖅ ᐊᑭᒃᖠᕚᓪᓕᕈᑎᐅᓇᔭᕆᐊᒃᓴᖓᓂᒃ ᓄᓇᓕᐸᐃᔭᐃᑦ ᐊᑭᓕᐅᑎᒋᓐᓂᒃ, ᐱᐊᓪ ᐅᖃᖅᑐᖅ. ᒥᒃᖡᕚᓪᓕᕈᑎᐅᓇᔭᕐᑐᕐᓕ ᓄᓇᕗᒥᑦ ᒐᕙᒪᒃᑯᑦ ᐊᑭᓕᖅᓱᐃᓂᖏᓐᓂᒃ ᐃᒪᕐᒥ ᑎᑭᑎᑦᑎᕙᓪᓕᐊᓂᖏᓐᓂᒃ, ᐅᖃᒃᑲᓐᓂᖅᑐᖅ.

ᐱᐊᓪ ᐃᓱᒪᖕᒥᔪᖅ ᓄᓇᕗᒥ ᒐᕙᒪᒃᑯᑦ ᐃᑲᔪᖅᑕᐅᔭᕆᐊᖃᕐᓂᐊᕐᓂᖏᓐᓄᑦ ᒐᕙᒪᑐᖃᒃᑯᓐᓂᒃ ᐊᑭᓕᐅᑎᒃᓴᓄᑦ ᐃᒪᕐᒧᑦ ᑐᐊᕕᕐᓇᖅᑐᓕᕆᓂᕐᒧᑦ.

“ᖃᓄᐃᓕᐅᕈᑎᒋᔪᓐᓇᖅᑕᖏᑦ ᐃᓱᖃᕐᒥᖕᒪᑕ ᐅᕙᑦᑎᑐᑦ,” ᐱᐊᓪ ᐅᖃᖅᑐᖅ.

2021-ᒥ ᓄᓇᓕᐸᐅᔭᐃᑦ ᐊᐅᓚᑦᑎᓂᕐᒧᑦ ᑮᓇᐅᔭᖅᑖᕆᓚᐅᕐᓯᒪᔭᖏᑦ ᒫᓃᓚᐅᕐᓯᒪᔪᑦ $51 ᒥᓕᐊᓐᓂ.

ᑐᕕᑐᒃᑯᓪᓕ ᐅᓇ ᑲᑎᒪᔨ ᑲᐃᐅᓪ ᓴᐳᑦ ᐅᖃᓚᐅᕐᓯᒪᔪᖅ ᓄᓇᓕᐸᐅᔭᐃᑦ ᐊᐅᓚᑦᑎᓂᕐᒧᑦ ᑮᓇᐅᔭᖏᑦ ᒥᕿᓐᓂᕐᓴᐅᖕᒪᑕ ᐋᑐᕚᒥ ᐅᖃᓕᒫᒐᖃᕐᕕᒃᒥᑦ ᐊᑐᖅᑕᐅᔭᕆᐊᓕᖕᓂᒃ.

“ᐊᐅᓚᑦᑎᕈᓘᔭᖅᑐᒍᑦ ᑕᐃᒪᓐᓇᑎᒋ ᑮᓇᐅᔭᓂ ᐊᑐᖅᖢᑕ,” ᐱᐊᓪ ᐅᖃᖅᑐᖅ.

ᐱᐊᓪ ᐅᖃᓚᐅᕐᒥᔪᖅ ᓄᓇᓕᐸᐅᔭᐃᑦ ᖃᐅᔨᓴᖅᑎᑦᑎᓂᖏᓐᓂᒃ ᖃᓄᐃᒻᒪ ᓄᓇᓖᑦ ᐃᒥᖃᕐᕕᖓ ᐅᐊᖕᓇᒦᑦᑐ ᐱᐅᔪᓐᓃᓚᐅᕐᓯᒪᔭᕆᐊᒃᓴᖓᓂᒃ ᕼᐊᐃᑐᕈᑳᐸᓐᒧᑦ, ᐊᒻᒪᓗ ᐊᕙᑎᓕᕆᓂᒃᑯᑦ ᖃᐅᔨᓴᖅᑎᑦᑎᓪᓗᑎᒃ ᐃᒪᖃᐅᑎᑦ ᖃᓂᒋᔭᖏᓐᓂᒃ.

ᓯᕗᓂᒃᓴᒧᓪᓕ ᐱᐊᓪ ᐅᖃᓚᐅᕐᑐᖅ ᓄᓇᓕᐸᐅᔭᐃᑦ ᓄᑖᒥ ᐃᒥᖃᐅᑎᖃᕐᕕᒃᑳᑖᕆᐊᖃᕐᒪᑦ.

“ᐊᔪᕐᓇᕋᔭᙱᑦᑎᐊᕐᒪ ᐃᒥᖃᐅᑎᑖᕈᑦᑕ ᓄᑖᒥᒃ ᐆᒻᒪᖅᑯᑎᓕᕆᕝᕕᐅᑉ ᖃᓂᒋᔭᖓᓂᒃ.”

Share This Story

(0) Comments

Join the Conversation

Your email address will not be published. Required fields are marked *

*