ᐃᖃᓗᐃᑦ ᐊᖅᑯᑎᖏᑦ ᐊᐅᐸᔮᕈᔪᓕᓚᐅᕐᑐᖅ ᐱᒋᐊᖅᑕᐅᓵᖅᑐᒧᑦ ᖃᓄᐃᓕᐅᕐᓇᒧᑦ

ᒫᓂ 300-ᖏᓐᓃᑦᑐᑦ ᐃᓄᐃᑦ ᓯᕗᓪᓕᖅᐹᒥᒃ ᑲᓇᑕᒥ ᓱᓕᓂᕐᒧᑦ ᐊᒻᒪ ᐱᒋᐊᒃᑲᓐᓂᕈᒪᓂᕐᒧᑦ ᐅᓪᓗᕐᒥ ᑲᑎᓚᐅᕐᑐᑦ ᐃᖃᓗᐃᑦ ᑕᐅᓐᑕᐅᓐᖓᓂ

ᓯᕗᓕᖃᖅᖢᑎᒃ ᔮᒃ ᐊᓇᕈᐊᕐᒥ, ᒐᕙᒪᑐᖃᒃᑯᓐᓄᑦ ᒪᓕᒐᓕᕆᔨᐅᓂᑯ ᐊᒻᒪ ᐃᓕᓐᓂᐊᕆᐊᑎᐅᓂᑯ, ᐃᓄᐃᑦ ᐱᓱᒃᑐᑦ ᐃᖃᓗᐃᑦ ᐊᖅᑯᑎᖓᒍᑦ ᓯᕗᓪᓕᖅᐹᒥᒃ ᑲᓇᑕᒥ ᓱᓕᓂᕐᒧᑦ ᐊᒻᒪ ᐱᒋᐊᒃᑲᓐᓂᕈᒪᓂᕐᒧᑦ ᐅᓪᓗᖅᒥᑦ ᓯᑎᐱᕆ 30. (ᐊᔾᔨᓕᐅᕆᔨ ᑕᐃᕕᑦ ᓛᕼᐄᑦ)

By ᑕᐃᕕᑦ ᓛᕼᐄᑦ

For an English version of this story, see Iqaluit streets turn orange during inaugural reconciliation walk

ᐃᓄᐃᑦ ᒫᓂ 300ᖏᓐᓃᑦᑐᑦ ᐃᖃᓗᖕᓂ ᐊᑐᖅᖢᑎᒃ ᐊᐅᐸᔮᖅᑐᓂᒃ ᐅᕕᓂᕈᕐᓂᒃ ᑲᑎᓚᐅᕐᑐᑦ ᐊᖅᑯᑎᒥ ᓯᑎᐱᕆ 30-ᒥ ᐆᒧᖓ ᐱᒋᐊᓕᓵᕐᑐᒧ ᑲᓇᑕᒥ ᓱᓕᓂᕐᒧᑦ ᐊᒻᒪ ᐱᒋᐊᒃᑲᓐᓂᕈᒪᓂᕐᒧᑦ ᐅᓪᓗᕐᒧᑦ.

ᐃᓚᒋᔭᐅᓚᐅᕐᒥᔪᖅ ᓄᓇᕗᒥᑦ ᒪᓕᒐᓕᕆᔨᐅᖃᑦᑕᕐᓯᒪᓂᑯ ᔮᒃ ᐊᓇᕈᐊᖅ, ᒪᓕᒐᓕᕆᕕᒡᔪᐊᕐᒥ ᐃᓚᒋᔭᐅᓚᐅᕐᓯᒪᔪᖅ ᐊᒻᒪᓗ ᐃᒡᓗᕗᑦ ᓵᑦᑎᐊᖓᓂ ᓇᖏᓚᐅᖅᖢᓂ ᑎᒍᒥᐊᖅᖢᓂ ᐊᐅᐸᔮᖅᑐᒥ ᓴᐃᒻᒪᑎᒥᒃ.

ᐊᓇᕈᐊᖅ ᐅᖃᓚᐅᕐᑐᖅ ᓇᓂᓯᓚᐅᕐᓯᒪᓂᖏᑦ ᓇᓗᓇᐃᒃᑯᑎᖃᐅᙱᑦᑐᓂᒃ ᓄᑕᖅᑲᑦ ᐃᓗᕕᖏᓐᓂᒃ ᐊᐅᔭᐅᓵᖅᑐᒥ ᒪᑯᓇᓂ ᐃᓕᓐᓂᐊᕆᐊᕐᕕᐅᖃᑦᑕᓚᐅᕐᓯᒪᔪᓂᒃ ᐊᒃᑐᐃᓂᖃᕐᔪᐊᕐᓂᐊᕐᓂᕋᖅᖢᓂᐅᒃ ᐆᒥᖓ ᑲᓇᑕᒥ ᓱᓕᓂᕐᒧᑦ ᐊᒻᒪ ᐱᒋᐊᒃᑲᓐᓂᕈᒪᓂᕐᒧᑦ.

“ᖃᓄᐃᓕᐅᕈᑎᕕᓂᐊᓗᐃᑦ ᒐᕙᒪᒃᑯᓐᓄᑦ ᐅᖃᐅᓯᕆᓇᓱᒃᓯᒪᔭᕗᑦ ᐊᕐᕌᒍᒐᓴᒻᒪᕆᖕᓂ, ᑕᐃᒪᓕ ᐃᓱᒪᔪᖓ ᑕᒪᑐᒥᖓ ᐅᒃᐱᕈᓱᖕᓂᖅᓴᐅᓕᕆᐊᒃᓴᖏᓐᓂᒃ,” ᐊᓇᕈᐊᖅ ᐅᖃᖅᑐᖅ.

ᐃᓕᓐᓂᐊᕆᐊᖅᑎᑕᐅᕙᓚᐅᖅᓯᒪᓪᓗᓂ ᐃᒻᒥᓂᒃ, ᐊᓇᕈᐊᖅ ᐅᖃᓚᐅᕐᑐᖅ ᒐᕙᒪᒃᑯ ᑖᔅᓱᒪ ᐅᖃᐅᓯᖓᓂᒃ ᐃᓕᖅᑯᓯᖓᓂᓪᓗ ᐊᑐᕈᓐᓃᖅᑎᑦᑎᓇᓱᓚᐅᕐᓯᒪᓂᖏᓐᓂᒃ.

“ᐊᓂᕐᓴᓗ ᐊᔪᓚᐅᕐᓯᒪᕗᑦ.”

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ ᐊᖓᔪᖅᑳᖅ ᐅᓛᔪᒃ ᐊᑭᓱᒃ ᐊᒻᒪᓗ ᓄᓇᕗᑦ ᑐᙵᕕᒃᑯᑦ ᐊᖓᔪᖅᑳᖓ ᐊᓗᑭ ᑰᑦᑎᖅ ᑕᒪᐃᓂ ᐃᓄᒋᐊᓄᑦ ᐅᖃᓪᓚᓚᐅᕐᓯᒪᖕᒥᔫᒃ.

ᐅᖃᓪᓛᓂᒃᑎᓪᓗᒍ ᓇᓂᔭᐅᓂᑯᓂᒃ ᓇᓗᓇᐃᒃᑯᑎᖃᙱᑦᑐᓂᒃ ᐃᓗᕕᕐᓂᒃ ᐊᒻᒪᓗ ᖃᓄᐃᓕᐅᕈᑎᕕᓂᐊᓗᖕᓂᑦ ᐃᓕᓐᓂᐊᕆᐊᕐᕕᕕᓂᕐᓂᒃ, ᑰᑦᑎᖅ ᐅᖃᓚᐅᕐᑐᖅ ᐃᓄᒋᐊᓄᑦ ᐃᓄᒃᓯᐅᑎᓂᒃ ᑐᓂᔭᐅᖃᑦᑕᕐᓂᐊᕐᓂᖏᓐᓂᒃ ᐃᓕᖅᑯᓯᖏᑦ ᐃᓱᒪᒋᓪᓗᒋᑦ.

“ᓱᓕ ᑕᒫᓂᑉᐳᒍ, ᐃᓅᓂᕗᑦ ᐱᒃᑯᒋᕙᕗᑦ, ᓂᕿᕗᓪᓗ ᒪᒪᕆᓪᓗᑎᒍᑦ ᐊᒻᒪᓗ ᓱᓕ ᐃᓅᓪᓗᑕ,” ᑰᑦᑎᖅ ᐅᖃᓚᐅᕐᑐᖅ ᐃᓄᒋᐊᓄᑦ ᐸᑦᑕᒃᑐᖅᖢᑎᒡᓗ.

ᐅᑲᓪᓚᑲᑖᓂᒃᑎᓪᓗᒋᑦ ᓂᐱᖃᙱᓚᐅᑲᓚᐅᕐᑐᑦ. ᑭᖑᓂᐊᒍᓪᓗ ᐊᓇᕈᐊᖅ ᓴᐃᒻᒪᑎᓂ ᑎᒍᒐᒥᐅᒃ ᓯᕗᓪᓕᐅᓪᓗᓂ ᐃᓄᖕᓂ ᐱᓱᖃᑎᖃᓚᐅᕐᑐᖅ ᑯᐃᓐ ᐃᓕᓴᐱᒃᑯᑦ, ᒪᓕᒃᑕᐅᓪᓗᓂ ᐊᐅᐸᔮᖅᑑᑎᕈᓘᔭᕐᓂᒃ ᐊᑐᖅᑐᓂᒃ.

ᑖᒃᑯᐊ ᐃᓄᒋᐊᑦ ᓄᐊᑦᒫᑦ ᖃᓂᒋᔮᒍᑦ ᐱᓱᓚᐅᕐᑐᑦ ᐃᖃᓗᐃᑦ ᓯᑯᐃᐊᒧᑦ, ᑕᒫᓂᓗ ᐃᓄᒃᓯᐅᑎᓂᒃ ᑐᓂᓯᑲᑕᒃᖢᑎᒃ.

ᑭᖑᓂᐊᒍᓪᓕ, ᓯᕿᓂᖅ ᓴᖅᑭᔮᕈᔪᓕᕐᑎᓪᓗᒍ ᓄᓇᓕᖕᓄᑦ, 80-ᖏᓐᓃᑦᑐᑦ ᐃᓄᐃᑦ ᑕᒫᓂ ᐅᖃᓪᓚᖃᑎᒌᕈᓘᔭᓚᐅᕐᑐᑦ.

ᓇᐃᑕᓐ ᐅᐱᐊᑦ, ᐃᓄᐃᑦ ᑕᐱᕇᑦ ᑲᓇᑕᒥ ᐊᖓᔪᖅᑳᖓ ᑐᓂᐅᖃᐃᓚᐅᕐᑐᖅ ᐊᐅᐸᔮᖅᑐᓂᒃ ᖃᑭᖅᑯᐊᓂᒃ ᑖᔅᓱᒥᖓ ᐅᓪᓗᕐᒥ ᐃᓱᒪᒋᔭᐅᔾᔪᑎᐅᓂᐊᖅᑐᓂᒃ.

ᐅᐱᐊᑦ ᐅᖃᓚᐅᕐᑐᖅ ᐃᓱᒪᓂᕋᖅᖢᓂ ᑕᒪᐃᓐᓂᑦᑎᐊᖅ ᐃᓄᐃᑦ ᐃᓕᓐᓂᐊᕆᐊᖅᑎᑕᐅᕙᓚᐅᕐᓯᒪᔪᑦ ᓈᒻᒪᙱᓕᐅᕈᑎᖃᖃᑦᑕᓕᕐᓂᖏᓐᓂᒃ ᐊᒻᒪᓗ ᖃᓄᐃᑦᑐᓐᓃᓚᐅᕐᓯᒪᙱᖢᑎᒃ ᐃᓅᔪᓐᓃᑐᐃᓐᓇᓚᐅᕐᓂᖏᓐᓂᒃ.

ᑭᖑᓪᓕᕐᒥᓪᓕ, ᐅᐱᐊᑦ ᐅᖃᓚᐅᕐᑐᖅ ᔫᓇᐃᑕᑦ ᓇᐃᓴᓐᔅ ᐅᖃᖅᓯᒪᔭᖓ ᓄᓇᖃᖅᑳᖅᑐᑦ ᐱᔪᓐᓇᐅᑎᖏᓐᓄᑦ ᒪᓕᒐᖅ ᐊᓂᒍᖅᑎᑕᐅᓚᐅᕐᓯᒪᔪᖅ ᒐᕙᒪᑐᖃᒃᑯᓐᓄᑦ ᐊᑐᓕᖅᑎᑕᐅᔭᕆᐊᖃᕐᓂᖓᓂᒃ.

ᑭᖑᓪᓕᖅᐹᒥᓪᓕ, ᐅᐱᐊᑦ ᐅᖃᓚᐅᕐᑐᖅ ᑖᓐᓇ ᐅᓪᓗᖅ ᖁᕕᐊᓲᑎᖃᕐᓂᕐᒨᖓᓂᖓᓂᒃ ᐃᓅᓂᕐᒧᑦ ᐊᒻᒪᓗ ᓯᕗᓂᒃᓴᒧᑦ, ᐅᖃᐅᓯᖏᓐᓂᒃ ᐸᐸᑦᑏᓐᓇᕈᓐᓇᕐᓂᖏᓐᓂᒃ, ᐃᓕᖅᑯᓯᖏᓐᓂᒃ ᐊᒻᒪᓗ ᓄᓇᖏᓐᓂᒃ ᖃᓄᐃᓕᐅᕐᓂᖅᑕᖃᓗᐊᓚᐅᖅᑎᓪᓗᒍ ᐃᓕᓐᓂᐊᕆᐊᖅᕕᕕᓂᕐᓂᒃ “ᑕᐃᒪᓐᓇᓗ ᐱᒃᑯᓇᓗᐊᖅᖢᓂ.”

Share This Story

(0) Comments