ᐃᖃᓗᐃᑦ ᐸᓕᓯᒃᑯᑦ ᑎᒥᖏᓐᓃᑦᑐᓂᒃ ᐊᔾᔨᓕᐅᕈᑎᓂᒃ ᐊᑐᖃᑦᑕᕐᓂᐊᓕᕐᑐᑦ

ᐅᓇ ᐊᒥᓱᓄᑦ ᐱᓕᕆᐊᒃᓴᖅ ᐱᒋᐊᕈᑎᐅᑐᐃᓐᓇᕆᐊᖃᖅᑐᖅ ᐸᓖᓯᒃᑯᑦ ᐱᓕᕆᔾᔪᑎᓂᒃ ᐊᑐᖃᑦᑕᓕᕐᓂᖏᓐᓂᒃ ᓄᓇᕗᒥᑦ, ᐅᖃᖅᑐᖅ ᓄᓇᕗᒥᑦ ᒪᓕᒐᓕᕆᔨᒃᑯᑦ ᒥᓂᔅᑕᖓ

ᑕᖅᑭᑦ ᑎᓴᒪᑦ ᐊᓂᒍᖅᑎᓪᓗᒍ ᐊᔾᔨᒌᖏᑦᑐᑦ ᒐᕙᒪᓕᕆᓂᒃᑰᖓᔪᑦ ᐊᒻᒪ ᒪᓕᒐᓕᕆᔨᐅᔪᑦ ᓄᓇᕗᒥᓐ ᐊᒻᒪ ᐊᓯᐊᖏᓐᓃᑦᑐᑦ ᐊᑐᖃᑦᑕᖁᔨᓕᓚᐅᕐᓯᒪᑎᓪᓗᒋᑦ ᐸᓖᓯᒃᑯᑦ ᑎᒥᖓᓃᑦᑐᒥᒃ ᐊᔾᔨᓕᐅᕈᑎᓂᒃ, ᑖᒃᑯᐊ ᐸᓖᓯᒃᑯᑦ ᐅᖃᓕᓚᐅᕐᓯᒪᔪᑦ ᐅᒃᑑᐱᕆ 21-ᒥᑦ ᑕᒪᒃᑯᐊ ᐊᔾᔨᓕᐅᕈᑏᑦ ᐊᑐᖅᑕᐅᓕᕐᓂᐊᕐᓂᖏᓐᓂᒃ ᐃᖃᓗᖕᓂ ᑕᖅᑭᐅᓂᐊᖅᑐᒥ ᐃᓚᒋᔭᐅᓗᓂ ᐱᓕᕆᐊᒃᓴᒧᑦ ᐃᑲᔪᕈᑎᐅᓂᐊᕐᓗᓂ ᑲᓇᑕᓕᒫᒃᑯᑦ ᖃᓄᐃᓕᐅᕈᑎᒃᓴᐅᓂᐊᕐᑐᒧᑦ. (ᐊᔾᔨᙳᐊᖁᑎᒋᔭᐅᔪᑦ)

By ᑕᔅᑎᓐ ᐸᑖᕐ

For an English version of this story, see RCMP to begin using body-worn cameras in Iqaluit next month

ᓄᕕᐱᕆ ᐱᒋᐊᕐᐸᑦ ᐸᓖᓯᒃᑯᑦ ᐃᖃᓗᖕᓂ ᐊᑐᖃᑦᑕᕐᓂᐊᓯᔪᑦ ᑎᒥᒦᑦᑐᓐᓇᖅᑐᓂᒃ ᐊᔾᔨᓕᐅᕈᑎᓂᒃ ᐃᓚᒋᔭᐅᓗᓂ ᑲᓇᑕᒥ ᐊᖏᔪᒥᒃ ᐱᓕᕆᐊᒃᓴᒧᑦ.

ᐅᓇ ᑐᓴᒐᒃᓴᐅᓕᓚᐅᕐᑐᖅ ᐅᓄᕐᓯᕙᓪᓕᐊᔪᓂᒃ ᐅᖄᓚᕝᕕᐅᑲᑕᓕᕐᑎᓪᓗᒋ ᐊᔾᔨᒌᙱᑦᑐᓂᒃ ᒐᕙᒪᓕᕆᔨᓂᒃ ᓄᓇᕗᒥᑦ ᐊᒻᒪ ᐊᓯᖏᓐᓂᙶᖅᑐᓂᒃ.

“ᖁᕕᐊᒋᒻᒪᕆᒃᑕᕋ ᑖᓐᓇ ᐱᓕᕆᐊᒃᓴᖅ,” ᐅᖃᖅᑐᖅ ᓄᓇᕗᒥᑦ ᒪᓕᒐᓕᕆᓂᕐᒧᑦ ᒥᓂᔅᑕ, ᔩᓂ ᐃᕼᐊᓗᐊᒃ, ᐱᖓᔅᓯᐅᑎᓪᓗᒍ, ᐅᒃᑑᐱᕆ 21, ᑐᓴᖅᑎᑕᐅᓚᐅᕐᑎᓪᓗᒍ ᑕᕝᓂᑦᑕᐃᓐᓇᖅ ᐅᓪᓗᕐᓯᒥᑦ ᒐᕙᒪᑐᖃᒃᑯᑦ ᑭᒃᑯᓕᒫᓂᒃ ᐅᓗᕆᐊᓇᙱᑦᑐᒦᑎᑦᑎᓂᕐᒧᑦ ᒥᓂᔅᑕᒧᑦ ᐱᐊᓪ ᐱᓕᐅᒧᑦ.

“ᓂᕆᐅᒃᑐᒍᑦ ᑖᓐᓇ ᐅᓄᕈᓘᔭᕐᑐᓄᑦ ᐱᓕᕆᐊᒃᓴᖅ ᐊᓂᒍᑦᑎᐊᕈᓐᓇᖁᓪᓗᒍ, ᐊᒻᒪᓗ ᒪᓕᒃᑕᐅᔪᓐᓇᕐᓯᓂᐊᕐᓗᓂ ᑕᒪᒃᑯᓂᖓ ᑎᒥᒦᑦᑐᓂᒃ ᐊᔾᔨᓕᐅᕆᑎᓂᒃ ᐊᑐᖃᑦᑕᓕᕐᓂᖅ ᓄᓇᕗᒥᑦ.”

ᐅᑯᑎᒎᓇᕐᓕ ᐸᓖᓯᒃᑯᑦ ᑐᓴᒐᒃᓴᓕᐊᖏᑦᑎᒍᑦ ᑕᒪᐅᓇ, ᑐᕌᒐᕆᔭᐅᔪᖅ ᐃᓄᒋᐊᓄᑦ ᐱᓕᕆᐊᒃᓴᖅ “ᐃᒪᓐᓇ ᖃᐅᔨᓇᓱᒡᓗᑎᒃ ᖃᓄᐃᖅᐸᓪᓕᐊᒍᑎᓂᒃ ᐊᒻᒪᓗ ᐱᐅᓂᖅᐹᓂᒃ ᐱᓕᕆᔾᔪᓯᕐᓂᒃ ᒫᓐᓇ ᐱᓕᕆᔾᔪᑎᖏᑦᑎᒍᑦ, ᐊᒻᒪᓗ ᓄᓇᖃᖅᑐᑦ ᑕᒪᑐᒥᖓ ᖃᓄᖅ ᐃᓱᒪᒋᔭᖃᕆᐊᒃᓴᖏᓐᓂᒃ ᐊᒻᒪ ᐱᐅᒃᓴᕆᐊᒃᓴᖏᓐᓂᒃ ᐱᓕᕆᔾᔪᑎᒥᒃ ᖃᐅᔨᓇᓱᒡᓗᑎᒃ.”

ᐊᐱᕆᔭᐅᒐᒥ ᖃᓄᖅ ᖃᐅᔨᓇᔭᕆᐊᒃᓴᖓᓂᒃ ᑕᒪᒃᑯᐊ ᐊᔾᔨᓕᐅᕈᑏᑦ ᐃᑲᔫᑎᖃᕐᒪᖔᑕ ᐃᑲᔫᑎᖃᙱᒻᒪᖔᑕᓘᓐᓃᑦ ᓄᓇᓖᑦ ᑖᒃᑯᐊᓂᖓ ᐅᒃᐱᕈᓱᒍᓐᓇᕐᓂᕐᓴᐅᓕᕈᓐᓇᕐᓂᖏᓐᓂᒃ, ᐅᑭᐅᕐᑕᖅᑐᓕᕆᔨᒃᑯᑦ ᑲᓇᑕᒥ ᒥᓂᔅᑕᖓ ᑖᓐ ᕚᓐᑐᓪ ᑭᐅᓚᐅᕐᑐᖅ, “ᓯᕗᓪᓕᕐᒥᓪᓕ, ᑕᒪᓐᓇ ᐱᒋᐊᓕᖅᑎᒋᐊᖃᕐᒪᑦ.”

ᕚᓐᑐᓪ ᐅᖃᓕᓚᐅᕐᒥᔪᖅ ᑕᒪᕐᒥᒃ ᐱᓕᕆᐊᒃᓴᑦ ᐊᒻᒪ ᐱᓕᕆᐊᖑᔪᒪᔪᑦ ᕿᒥᕐᕈᐊᖅᑕᐅᖃᑦᑕᕐᓂᕋᖅᖢᓂᒋᑦ.

“ᑕᐃᒪᓕ ᑖᓐᓇ ᖃᐅᔨᓴᕈᑎᒻᒪᕆᐅᓂᐊᕐᑐᖅ,” ᐅᖃᖅᑐᖅ.

“ᑭᓯᐊᓂᓕ ᒪᓕᒃᖢᑕ ᓯᕗᓂᐊᒍᑦ ᐱᓕᕆᐊᖑᓚᐅᕐᑐᓂᒃ, ᓯᕗᓂᐊᒍᑦ ᖃᓄᐃᓕᕈᑎᕕᓂᕐᓂᒃ ᐊᒻᒪ ᐅᖃᓪᓚᖃᑎᖃᑲᑕᖕᓂᒃᑯᑦ, ᑕᐃᒪᓕ ᐅᓇ ᖃᓄᐃᓕᐅᕐᓂᖅ ᐱᒻᒪᕆᐊᓘᓂᐊᕐᑐᖅ ᓴᙱᒃᑎᕚᓪᓕᖅᑎᑦᑎᒐᓱᖕᓂᕐᒥᒃ ᐅᒃᐱᕈᓱᒍᓐᓇᕐᓂᕐᒥᒃ ᐊᒻᒪᓗ ᓴᖅᑭᔮᕈᓐᓇᕐᓂᕐᓴᐅᓂᕐᒥᒃ, ᑖᓐᓇᑦᑕᐅᖅ ᐱᒻᒪᕆᐊᓘᖕᒥᒻᒪᑦ ᐊᒻᒪᓗ ᓴᖅᑭᔮᕐᓂᕐᓴᒃᑯᑦ ᖃᓄᐃᓕᐅᕈᑎᖃᖅᐸᑕ ᐃᓄᖕᓂᒃ ᐊᒻᒪ ᐸᓖᓯᒃᑯᓐᓂᑦ ᑕᐃᒪᓕ ᑭᐅᔨᐅᓂᕐᒧᑦ ᐱᓕᕆᐊᖃᕐᓂᕐᓴᐅᒍᑎᐅᓂᐊᕐᑐᖅ.”

ᐃᕼᐊᓗᐊᒃ ᐅᖃᓚᐅᕐᓯᔪᖅ “ᐅᒃᐱᕈᓱᑦᑎᐊᕐᓂᖓᓂᒃ” ᑖᒃᑯᐊ ᐊᔾᔨᓕᐅᕈᑏᑦ ᓴᖅᑭᔮᖅᑎᑦᑎᒍᑎᐅᓂᐊᕐᓂᖏᓐᓂᒃ.

ᐸᓖᓯᒃᑯᑦ ᑐᓴᒐᒃᓴᓕᐊᖓᑦ ᐅᖃᕐᑎᓪᓗᒋᑦ ᐊᑐᖃᑦᑕᕐᓂᐊᓕᕐᓂᖏᓐᓂᒃ ᐊᔾᔨᓕᐅᕈᑎᓂᒃ, ᑐᓴᖅᑎᑦᑎᓚᐅᙱᑦᑐᑦ ᖃᓄᓪᓚᕆᒃ ᐊᑐᖅᑕᐅᓂᐊᕆᐊᒃᓴᖏᓐᓂᒃ.

ᓄᓇᕕᒻᒥᓪᓕ ᐅᑯᐊ ᑲᑎᕕᒃᑯᑦ ᐸᓖᓯᖏᑦ ᑎᒥᒃᑯᑦ ᐊᑐᖅᑕᐅᔪᓂᒃ ᐊᔾᔨᓕᐅᕈᑎᓂᒃ ᐊᑐᖃᑦᑕᕐᓯᒪᓕᕐᑐᑦ ᔭᓄᐊᕆᒥ ᐱᒋᐊᕐᓯᒪᓪᓗᑎᒃ, ᑭᓯᐊᓂᓕ ᐱᓕᕆᕝᕕᓪᓚᕆᖕᒥᑦ ᐊᑐᖅᑕᐅᔭᕆᐊᓕᖕᓂᒃ ᑕᒪᒃᑯᐊ ᐊᔾᔨᓕᐅᕈᑏᑦ ᖃᓄᖅ ᐊᑐᖅᑕᐅᓂᖏᑦ ᑭᒃᑯᑐᐃᓐᓇᕐᓄ ᑕᑯᑎᑕᐅᔪᓐᓇᙱᑦᑐ.

ᐆᒧᖓᓕ ᐃᐅᕆᒃ ᓚᒥᖕᑯᑎᒍᑦ, ᐅᓇ ᓴᐹᑦ ᐅᐹᑦᔪᐊᓐ ᓄᓇᖃᖅᑳᖅᑐᓄᑦ ᐊᓪᓚ ᐱᕋᔭᒃᑐᓕᕆᓂᕐᒧᑦ ᐱᓇᓱᐊᕐᑐᖅ ᐅᕙᓂ ᔫᓂᕘᓯᑎᒥ ᑐᕌᓐᑐᒥ, ᐅᖃᓚᐅᕐᑐᖅ ᑕᒪᓐᓇ ᑲᒪᓇᙱᓐᓂᕋᖅᑕᖓ.

“ᒑᒍᕆᒥᓐ, ᐊᔾᔨᓕᐅᕈᑎᖃᓚᐅᕐᓯᒪᔪᑦ ᐊᕐᕌᒍ ᐃᓚᓪᓗᒍ ᑕᒪᕐᒥᒃ ᐸᓖᓯᐅᔪᑦ ᐊᒻᒪᓗ ᑖᒃᑯᐊᑦᑕᐅᖅ ᐊᑐᐃᓐᓇᐅᙱᒻᒥᔪᑦ ᑭᒃᑯᑐᐃᓐᓇᕐᓄᑦ, ᑭᓯᐊᓂᓕ ᐅᑯᑎᒎᓈᕐᓗᓂ ᐱᔪᒪᒋᐊᖃᕐᓇᖅᑐᖅ FOI (ᑐᓴᕈᒪᓂᕐᒥᒃ ᐃᓱᒪᕐᓲᑎᖃᕐᓂᕐᒧᑦ ᑐᒃᓯᕋᐅᑎᓂᒃ), ᐅᖃᓚᐅᕐᓯᒪᔪᖅ ᔫᓂᒥ.

“ᑕᐃᒪᓕ ᖃᐅᔨᒪᙱᒃᑲᓗᐊᕈᑦᑕ ᐊᑐᐊᒐᕐᒥᒃ ᑭᒃᑯᓕᒫᓅᖓᔪᒥᒃ ᑕᐃᒪᓕ ᖃᓄᐊᓗᒃ ᐅᒃᐱᕆᔪᓐᓇᖅᐱᑎᒍᑦ ᖃᓄᐃᓕᐅᕈᓯᐅᔪᑦ?”

ᐊᐱᕆᔭᐅᑎᓪᓗᒍ ᑭᓇ ᐊᑐᐃᓐᓇᖃᕋᔭᕆᐊᒃᓴᖓᓂᒃ ᐱᒋᐊᕈᑎᓂᒃ, ᐃᕼᐊᓗᐊᒃ ᐅᖃᓚᐅᕐᑐᖅ “ᖃᐅᔨᒪᙱᑦᑎᐊᕐᓂᕋᖅᖢᓂ” ᐊᒻᒪᓗ ᑕᒪᑐᒥᖓ ᑐᓴᖅᑎᑕᐅᑕᐃᓐᓇᓚᐅᕐᓂᕋᖅᖢᓂ ᐃᒃᐸᒃᓴᖓᓂᒃ.

ᖃᓄᐃᓕᐅᕐᓂᖅᑕᖃᓚᐅᕐᓯᒪᑎᓪᓗᒍ ᑲᑎᕕᒃ ᓄᓇᓕᓕᒫᓄᑦ ᐸᓕᓯᓄᑦ ᐊᔾᔨᓕᐅᕈᑎᒥ ᐊᑐᕐᑐᒥ ᔫᓂᐅᑎᓪᓗᒍ, ᐊᖓᔪᖅᑳᕆᔭᐅᔪᖅ ᐅᖃᓕᓚᐅᕐᓯᒪᔪᖅ, “ᕿᒥᕐᕈᐊᓚᐅᕋᒃᑯᑦ ᐊᔾᔨᓕᐅᕈᑎᒦᑦᑐᖅ ᐊᒻᒪᓗ ᖃᓄᐃᓕᐅᕈᑎᐅᔪᑦ ᐸᓖᓯᒧᑦ ᓈᒻᒪᑐᐃᓐᓇᓚᐅᕐᑐᑦ ᐊᒻᒪ ᐊᑐᐊᒐᖅᑎᒎᖓᓪᓗᑎᒃ.”

ᐆᒧᖓᓕ ᓖᒥᖕᒧᑦ, ᐅᓇ ᑲᒪᒋᔭᐅᔾᔪᑎᖓ ᐃᓱᒫᓘᖕᓇᖅᑐᐊᓘᓂᕋᖅᖢᓂᐅᒃ.

“ᐊᑐᕈᕕᓪᓕ ᑎᒥᒃᑯᑦ ᐊᔾᔨᓕᐅᕈᑎᓂᒃ ᑲᒪᔨᑕᖃᙱᓪᓗᓂ ᖃᐅᔨᓴᖅᑎᐅᓇᔭᖅᑐᓂᒃ, ᑕᐃᒪᓕ ᓲᕐᓗ ᓱᕙᓕᑭᐊᖑᕗᖅ ᓲᖃᐃᒻᒪ ᐸᓖᓯᒃᑯᑦ ᖃᐅᔨᓴᕋᔭᕐᒪᑕ ᑖᔅᓱᒥᖓ ᐸᓖᓯᒥᒃ ᕿᒥᕐᕈᐊᕐᓗᑎᒃ ᐊᔾᔨᓕᐅᕐᓯᒪᔪᓂᒃ,” ᐅᖃᖅᑐᖅ.

ᒫᓐᓇᐅᔪᕐᓕ, ᓄᓇᕗᒥᑦ, ᐸᓖᓯᓂᒃ ᐊᓯᐊᓂᙶᕐᓯᒪᔪᓂᒃ ᑎᑭᑎᑦᑎᕙᒃᑐᖅ ᖃᐅᔨᓴᕆᐊᕐᑐᖅᑐᓂᒃ ᐸᓖᓰᒃᑰᖓᔪᓂᒃ ᖃᓄᐃᓕᐅᕈᑎᓂᒃ, ᓲᕐᓗ ᐆᑐᓇᖅ ᔫᓂᐅᓚᐅᕐᑐᒥ ᑭᙵᓂᑦ, ᑭᓯᐊᓂᓕ ᐅᓇ ᐊᓯᙳᕐᓵᓕᑐᐃᓐᓇᕆᐊᖃᖅᑐᖅ ᓴᖅᑭᑎᑦᑎᒍᑎᒃ ᒪᓕᒐᖅ 53-ᒥᑦ, ᒪᓕᒐᖅ ᐋᖅᑭᒋᐊᕈᑎᒃᓴᖅ ᐸᓘᓯᒃᑯᑦ ᐊᖏᕈᑎᖏᓐᓄᑦ ᒪᓕᒐᕐᒥᒃ, ᒫᓐᓇ ᒪᓕᒐᓕᕆᔩᑦ ᑲᑎᒪᑎᓪᓗᒋᑦ.

ᓴᖅᑭᑕᐅᓯᒪᓪᓗᓂ ᐃᕼᐊᓗᐊᒃᒧᑦ ᔫᓂᐅᑎᓪᓗᒍ, ᐋᖅᑭᒋᐊᕈᑎᐅᔪᖅ ᓄᑖᑦ ᑐᑭᖃᓕᕈᓐᓇᖅᑐᖅ ᓄᓇᕗᑦ ᓄᑖᒥ ᐱᓕᕆᔨᑐᐃᓐᓇᕐᓂᒃ ᕿᒥᕐᕈᐊᖅᑎᐅᔪᓐᓇᕋᔭᖅᑐᓂᒃ ᐸᓖᓯᒃᑯᓐᓄᑦ.

ᐃᕼᐊᓗᐊᒃᑎᒍᓪᓕ, ᐱᓕᐅ ᐃᑲᔪᖅᑐᐃᓂᐊᕐᓂᕋᓚᐅᕐᑕᖓ ᓄᓇᕗᑦ ᒐᕙᒪᒃᑯᓐᓂ ᑮᓇᐅᔭᑎᒍᑦ ᐃᑲᔫᑎᐅᔪᓐᓇᖅᑐᓂᒃ ᑖᓐᓇ ᖃᓄᐃᓕᐅᕈᑎ ᓄᓇᕗᓕᒫᒥᑦ ᐱᓕᕆᐊᖑᓂᐊᕈᓂ.

ᐃᖃᓗᖕᓂ ᐅᓄᕐᑐᓄᑦ ᐱᓕᕆᐊᒃᓴᖅ ᑐᑭᖃᖅᑎᑕᐅᔪᖅ ᖃᐅᔨᕚᓪᓕᕈᑎᐅᓂᐊᕐᓗᓂ ᐅᓇ ᑲᓇᑕᒥ ᑎᒥᒃᑯᑦ ᐊᑐᖅᑕᐅᕙᖕᓂᖓᓄᑦ ᖃᓄᐃᓕᐅᕈᑎᐅᕙᒃᑐᓂᒃ.

ᓴᖅᑭᒃᑎᕚᓪᓕᖅᑎᑦᑎᒐᓱᖕᓂᐅᑉ, ᓴᖅᑭᔮᕐᓂᕐᓴᐅᓂᖅ ᐊᒻᒪᓗ ᑭᐅᔨᐅᔪᓐᓇᕐᓂᖅ ᖃᓄᐃᓕᐅᕈᓯᕐᓄᑦ ᐊᓯᐊᒍᓪᓕ, ᕚᓐᑐᓪ ᑖᔅᓱᒥᖓ ᐱᓕᕆᐊᒃᓴᒥ ᐃᓱᒪᒋᔭᖃᖅᑐᖅ ᐆᒥᖓ ᐊᔾᔨᐅᙱᑎᑦᑎᕙᖕᓂᕐᒥ ᐱᓕᕆᐊᖃᓕᖅᐸᓪᓕᐊᓂᕐᒨᓂᖓᓂᒃ ᒪᑯᓇᓂ ᒐᕙᒪᒃᑯᑦ ᓴᓇᕝᕕᒋᕙᒃᑕᖏᓐᓂᒃ ᐅᑯᐊ ᐃᓚᐅᓪᓗᑎᒃ ᐸᓖᓯᒃᑯᑦ.

ᑲᓇᑕᓕᒫᒥᑦ ᐱᓕᕆᐊᖑᓇᓱᒃᑐᖅ ᐃᒪᐃᓕᒍᑎᐅᓇᓱᒃᑐᖅ ᐸᓖᓯᒃᑯᑦ ᐊᒻᒪ ᑭᒃᑯᓕᒫᑦ ᖃᓄᐃᓕᐅᕈᓯᖏᑦ ᐱᐅᓯᕚᓪᓕᕈᓐᓇᕐᓗᑎᒃ, ᓈᒻᒪᙱᓕᐅᕈᑎᐅᕙᒃᑐᓂᒃ ᑲᒪᒋᔭᖃᕐᓵᓕᓂᕐᓴᐅᕙᒡᓗᑎᒃ, ᐊᒻᒪᓗ ᐸᓯᔭᒃᓴᐅᔾᔪᑎᒃᓴᓂᒃ ᓄᐊᑦᑎᓂᕐᓴᐅᔪᓐᓇᕐᐸᒡᓗᑎᒃ ᑎᒍᔭᐅᔭᕆᐊᖃᖅᑐᓄᑦ.

ᐸᓖᓯᒃᑯᑎᒍᓪᓕ ᑐᓴᒐᒃᓴᓕᐊᖓᒍᑦ, ᐱᓕᕆᓂᖅᑕᖃᕆᐊᖃᒻᒪᕆᒃᑲᔭᕐᓂᖓ ᐊᐅᓚᑦᑎᓂᕐᒥᒃ ᑕᒪᐃᓐᓂᓕᒫᖅ ᐊᔾᔨᓕᐅᖅᑕᐅᕙᓪᓕᐊᓯᒪᔪᓂᒃ ᐊᔾᔨᓕᐅᕈᑎᓄᑦ, ᐱᓗᐊᕐᑐᒥᑦ ᓄᓇᓕᖕᓂ ᐱᓕᕆᔾᔪᑎᑕᖃᓗᐊᖅᑎᓐᓇᒍ.

ᑕᒪᒃᑯᐊ ᐊᐅᓚᑦᑎᓂᕐᒧᑦ ᐊᑐᖅᑕᐅᔭᕆᐊᖃᕐᑐᓂ ᐱᓇᓱᖕᓂᐊᕐᓗᑎᒃ, ᑭᒃᑯᓕᒫᓄᑦ ᐱᔨᑦᑎᕋᐅᑎᓕᕆᔨᒃᑯᑦ ᐊᒻᒪ ᐱᓕᕆᓕᖅᑎᑦᑎᔨᒃᑯᑦ ᑲᓇᑕᒥ ᓴᖅᑭᑎᑦᑎᓯᒪᓕᕐᑐᑦ ᑐᓴᕈᒪᓪᓗᑎᒃ ᓂᐅᕕᕐᕕᐅᔪᓐᓇᖅᑐᓂᒃ ᐊᒻᒪᓗ ᑭᖑᓂᐊᒍᑦ ᐊᑭᑦᑐᕋᐅᑎᒍᑎᐅᑎᑕᐅᓕᕐᓗᓂ ᑕᒪᓐᓇᓗ ᐱᒋᐊᓕᕋᔭᕋᓱᒋᔭᐅᓪᓗᓂ 2021 ᐱᒋᐊᓕᓵᕐᓯᒪᑎᓪᓗᒍ.

Share This Story

(0) Comments

Join the Conversation

Your email address will not be published. Required fields are marked *

*