ᐃᖃᓗᐃᑦ ᐸᓖᓯᖏᑦ ᐊᑐᓕᕐᑐᑦ ᐊᔾᔨᓕᐅᕈᑎᓂ ᑲᓇᑕᒥ ᑕᒪᓐᓇ ᐱᒋᐊᓚᐅᖅᑎᓐᓇᒍ

For English version, see Iqaluit RCMP don body cameras ahead of national rollout

ᐸᓖᓯᒃᑯᑦ ᐃᖃᓗᖕᓂ ᐱᒋᐊᕐᓂᐊᓕᕐᑐᑦ ᑭᖑᓪᓕᖅᐹᒥ ᖃᐅᔨᓴᕈᑎᒥ ᐸᓖᓯᑦ ᐊᑐᕐᓗᑎᒃ ᐊᔾᔨᓕᐅᕈᑎᓂᒃ ᐃᖅᑲᓇᐃᔭᕐᓂᖏᓐᓂ.

ᑕᐃᒪᓐᓇᑦᑕᐃᓐᓇᖅ ᐊᔾᔨᐸᓗᖏᓐᓂᒃ ᖃᐅᔨᓴᕈᑎᖃᕐᒥᔪᑦ ᐸᓖᓯᒃᑯᓐᓂ ᓅᕙ ᓯᑰᓯᐊᒥ ᐊᒻᒪ ᐋᐴᑕᒥ.

ᐅᑯᐊ ᐊᔾᔨᓕᐅᕈᑎᑦ ᐃᖃᓗᖕᓂ ᐱᒋᐊᖅᑕᐅᓚᐅᕐᑐᑦ ᒪᐃ 19ᒥ, ᐅᖃᓚᐅᕐᑐᖅ ᐸᓖᓯᓄᑦ ᐅᖃᖅᑎᒋᔭᐅᔪᖅ ᓵᔾᔭᓐ ᐹᓖᓐ ᒥᓛᓐᓴᓐ. 8-ᖑᔪᑦ ᑲᑎᖢᑎᒃ ᐊᔾᔨᓕᐅᕈᑎᑦ ᐊᑐᕐᑕᐅᔪᑦ, ᑕᐃᒪᓗ ᐃᖅᑲᓇᐃᔭᕐᓂᖏᓐᓂ ᒪᕐᕉᒃ ᐊᑐᖅᑕᐅᕙᒃᑐᑦ, ᐅᖃᕐᑐᖅ.

ᓯᕗᓪᓕᖅᐹᒥ ᑐᓴᕈᑎᐅᓚᐅᕐᓯᒪᓪᓗᓂ 2022 ᐅᐱᕐᖔᖓᓂ, ᑖᒃᑯᐊ ᖃᐅᔨᓴᕈᑎᐅᔪᑦ ᓯᕗᓪᓕᕐᐹᖓᓂ ᐱᒋᐊᖅᑕᐅᓚᐅᕐᓯᒪᔪᖅ ᐅᑯᓄᖓ ᒨᑐᕉᓚ ᓴᓘᓴᓐᔅ ᑲᓇᑕᒥ, ᐅᖃᓚᐅᕐᑐᖅ ᒥᓛᓐᓴᓐ ᖃᕋᓴᐅᔭᒃᑯᑦ ᑎᑎᕋᖅᖢᓂ.

ᐱᖓᓱᓂᒃ ᖃᐅᔨᓴᕐᕕᒋᔭᐅᔪᓂᒃ 300 ᐸᓖᓯᓄᑦ ᐃᖅᑲᓇᐃᔭᖅᑏᑦ ᐅᓄᓛᖑᓪᓗᑎᒃ ᐸᓖᓯᑦ ᐊᑐᓚᐅᕐᓯᒪᔪᑦ ᐊᔾᔨᓕᐅᕈᑎᓂᒃ. ᑭᖑᓂᐊᒍᓪᓕ ᑕᖅᑭᓂ 12ᓂ 18ᓄ ᐱᓕᕆᐊᖑᓕᕐᓂᐊᖅᖢᓂ ᑕᒪᐃᓐᓂ ᐸᓖᓯᓂ ᑲᓇᑕᒥ.

ᑭᖑᓂᐊᒍᓪᓕ ᑖᒃᑯᐊ ᐊᔾᔨᓕᐅᕈᑎᑦ ᐊᑐᖅᑕᐅᔪᑦ ᐊᑐᖅᑕᐅᖃᑦᑕᐃᓐᓇᓕᕐᓂᐊᖅᑐᑦ ᐸᓖᓯᓄᑦ ᐱᓕᕆᐊᖃᓕᖅᑳᓲᓄᑦ. ᐅᓇ ᓯᕗᓪᓕᖅᐹᖑᙱᑦᑐᖅ ᓄᓇᕗᒥᑦ ᐸᓖᓯᒃᑯᑦ ᐃᓚᐅᓂᖏᓐᓂᒃ ᐊᔾᔨᓕᐅᕈᑎᓂᒃ ᐊᑐᕐᓂᕐᒥᒃ ᖃᐅᔨᓴᕈᑎᓂᒃ.

ᓯᕗᓪᓕᖅ ᑕᒪᑐᒥᖓ ᐱᓕᕆᐊᖑᓚᐅᕐᓯᒪᔪᖅ ᐃᖃᓗᖕᓂ ᐸᓖᓯᑦ ᐃᓚᐅᓪᓗᑎᒃ ᓄᕕᐱᕆ 2020ᒥ ᒪᐃ 2021 ᑎᑭᖢᒍ. ᖃᐅᔨᓴᕈᑎᐅᔪᖅ ᖃᐅᔨᔾᔪᑎᐅᓕᓚᐅᕐᓯᒪᔪᖅ ᐱᐅᒋᔭᐅᑐᐃᓐᓇᖅᑐᓂᒃ. ᑭᓯᐊᓂᓕ 13 ᐃᓅᓚᐅᕐᑐᑦ 73ᓂ ᐃᓚᐅᔪᓂᒃ ᑖᔅᓱᒥᖓ.

ᓄᓇᓕᖕᓂ ᐃᓚᒋᔭᐅᔪᑦ ᐊᒻᒪ ᓯᕗᓕᐅᕐᑎᐅᔪᑦ ᐊᔾᔨᒌᙱᑦᑑᑎᓂ ᒐᕙᒪᓕᕆᕝᕕᖕᓂ ᐱᑕᖃᖁᔨᓯᒪᖕᒪᑕ ᑎᒥᒃᑯᑦ ᐊᔾᔨᓕᐅᕈᑎᖃᖁᔨᓪᓗᑎᒃ ᐱᐅᓯᕚ[ᓕᖅᑎᓐᓇᓱᒃᖢᒍ ᓴᖅᑭᔮᕆᐊᖃᕐᓂᖅ ᐊᒻᒪ ᑭᐅᔨᐅᔪᓐᓇᕐᓂᕐᒥᒃ ᖃᓄᐃᓕᐅᕐᓂᕐᒧᑦ.

ᐅᑯᑎᒎᓇᕐᓕ ᐸᓖᓯᒃᑯᑦ ᑐᓴᒐᒃᓴᖏᑦᑎᒍᑦ ᒪᑯᐊ ᑎᒥᒃᑯᑦ ᐊᑐᖅᑕᐅᔪᑦ ᐊᔾᔨᓕᐅᕈᑏᑦ ᐱᐅᓯᕚᓪᓕᕈᑎᐅᓚᐅᕐᑐᖅ ᐃᓄᐃᑦ ᐅᒃᐱᕋᕈᓱᒍᓐᓇᕐᓂᕐᓴᐅᓪᓗᑎᒃ ᐸᓖᓯᓂ “ᐃᒻᒥᒃᑰᖓᓂᒃᑯᑦ, ᐊᔾᔨᒌᒃᑎᑦᑎᓂᒃᑯᑦ ᐊᒻᒪ ᑐᓴᐅᒪᑎᑦᑎᓇᓱᖕᓂᒃᑯᑦ” ᒪᑯᑎᒎᓇᖅ ᐸᓖᓯᑦ ᐃᓄᖕᓂ ᐅᖃᖃᑎᒌᖃᑦᑕᕐᓂᖏᑦᑎᒍᑦ.

ᓂᐱᓕᐅᕐᓯᒪᔪᑦ ᐊᒻᒪ ᐊᔾᔨᓕᐅᕐᓯᒪᔪᑦ ᑖᒃᑯᑎᒎᓇᖅ ᐊᔾᔨᓕᐅᕈᑎᑎᒍᑦ ᐋᖅᑭᒃᑕᐅᕙᒃᑐᑦ ᐊᒻᒪ ᑲᒪᒋᔭᐅᓪᓗᑎᒃ ᓴᖅᑭᔮᕈᓐᓇᐅᑎᓂᒃ ᑕᒪᐅᖓᒥᐊᑐᐃᓐᓇᕈᓐᓇᙱᑦᑐᒃᑯᑦ.