ᐃᖃᓗᐃᑦ ᑐᙵᓱᒃᑎᑦᑎᕗᑦ ᓄᑖᒥ ᖃᑦᑎᕆᔨᓄᑦ ᐊᖓᔪᖅᑳᖑᓕᖅᑐᒥ

“ᒪᓐᑐᕆᐊ ᑲᓃᑎᐊᓐᔅᓄᑦ ᐃᑲᔪᖅᑐᐃᒐᓗᐊᖅᐲ?” ᐊᐱᕆᔪᖅ ᑲᑎᒪᓗᔨ ᔪᐊᓇᓯ ᐊᑯᒪᓕᒃ.

ᓂᐱᖃᙱᑯᑖᓚᐅᑲᒃᖢᓂ, ᕼᐊᐅᕙᑦ ᑭᐅᓕᓚᐅᕐᑐᖅ, “ᐋᒃᑲ.”

ᑕᕝᕙᓃᑦᑐᑦ ᐃᒡᓚᕐᓯᔪᐊᓘᓪᓗᑎᒃ.

ᐱᓇᓱᐊᕈᓯᖅ ᐊᓂᒍᖅᑎᓪᓗᒍ, ᐊᐱᕐᓱᖅᑕᐅᓪᓗᓂ ᓄᓇᑦᓯᐊᕐᒥ ᐱᕙᓪᓕᐊᔪᓂᒃ, ᕼᐊᐅᕙᑦ ᐅᖃᓚᐅᕐᑐᖅ, “ᑕᐃᒪᐃᓕᖕᒪᓪᓕ ᐃᓱᒪᓕᓚᐅᕐᑐᖓ ᐃᑲᔪᖅᑕᒃᑲ ᑐᓴᖅᑕᐅᙱᒃᑲᓗᐊᕐᓗᑎᒃ.”

ᕼᐅᕙᑦ, ᐱᕈᓴᕐᓂᑯᕕᓂᖅ ᕼᐋᒧᑕᓐᒥ, ᐃᖃᓘᓐᓅᓚᐅᕐᓯᒪᔪᑦ ᐅᕘᓈᖅᖢᓂ ᒦᐊᕗᑦ, ᐋᓐᑎᐅᕆᐅᒥ, ᓄᓇᓖ ᑳᓕᖕᕗᑦ ᖃᓂᒋᔭᖓᓃᑦᑐᖅ ᔪᐊᔾᔨᐊᓐ ᐸᐃᒥᑦ.

ᑕᒫᓃᑦᑕᕆᐅᕋᓗᐊᖅᖢᓂ, ᐅᑭᐅᕐᑕᖅᑐᕐᒥᐅᑕᐅᓯᒪᖕᒥᔪᖅ.

ᖁᓕᓂᒃ ᐊᕐᕌᒍᓂ ᑐᐊᕕᕐᓇᖅᑐᓕᕆᓂᕐᒧᑦ ᐋᓐᓂᐊᖃᕐᓇᙱᑦᑐᓕᕆᔾᔪᑎᓕᕆᔨᐅᓪᓗᓂ ᑲᓇᑕᒥ ᐅᓇᑕᖅᑐᒃᓴᓄᑦ, ᐊᕐᕕᐊᑦ ᖃᓂᒋᔮᓃᑦ ᑐᐱᕐᓯᒪᓂᑰᕗᖅ ᐅᑭᐅᒻᒪᕆᐊᓘᒃᑯᑦ.

“ᑕᐃᒪᓕ ᑐᑭᓯᐅᒪᕗᖓ ᐊᐳᑎᒥ, ᑐᑭᓯᐅᒪᕗᖓ ᓂᒡᓚᓱᒃᑐᒥᑦ, ᑭᓯᐊᓂᓕᑦᑕᐅᖅ ᖃᓄᐃᓕᐅᕈᑎᐅᔭᕆᐊᖃᕐᓯᒪᒋᓪᓗᑎᒃ. ᑕᒫᓂ ᓲᕐᓗ ᐊᓯᐊᓂᑦ ᓄᓇᕐᔪᐊᕐᒦᖂᔨᓐᓇᕐᒪᑦ ᑕᐃᒪᓐᓇᓗ ᑕᒪᐅᙵᕈᑎᒋᓯᒪᕙᕋ. ᐊᒻᒪᓗ ᐱᓕᕆᕝᕕᒃ ᖃᓄᐃᕈᓘᔭᕐᓇᖅᖢᓂ,” ᐅᖃᖅᑐᖅ ᕼᐊᐅᕙᑦ, ᐅᖃᐅᓯᖃᖅᖢᓂ ᐃᖃᓗᐃᑦ ᖃᑦᑎᕆᔨᖏᑦ ᑲᑎᕐᓱᐃᒐᐅᓂᖏᓐᓂᒃ—ᐃᓚᖏᑦ ᖃᑦᑎᕆᔨᒻᒪᕆᐅᓪᓗᑎᒃ ᐊᒻᒪ ᐃᓚᖏᑦ ᐃᑲᔪᕆᐊᑐᐃᓐᓇᖅᐸᒃᖢᑎᒃ.

ᑕᒪᓐᓇᑐᐊᖅ ᕼᐊᐅᕙᑦ ᐃᖃᓗᓅᕈᑎᒋᓚᐅᙱᑕᖓ.

ᐃᓚᒋᓪᓗᓂᖏᑦ ᐃᖅᑲᓇᐃᔮᖃᕐᓯᒪᓂᖏᑦ ᖃᑦᑎᕆᔨᐅᓂᑰᓂᕐᒥᒃ ᐊᒻᒪ ᑐᐊᕕᕐᓇᖅᑐᓕᕆᓂᖅ—ᑕᐃᒪᓐᓇᐃᑦᑐᖃᓗᐊᖅᐸᒃᑎᓐᓇᒍ ᐊᓯᖏᓐᓂᒃ—ᐆᒧᖓᑦᑕᐅᖅ ᐱᔾᔪᑎᖃᓗᐊᓚᐅᕐᒥᔪᖅ ᐃᖃᓗᖕᓂ ᐃᑭᑦᑐᖃᕋᔪᖕᓂᖓᓄᑦ.

“ᖃᓄᐃᓕᐅᕈᓯᐅᓯᒪᔪᑦ ᐅᕙᓂ ᐱᓕᕆᕝᕕᖕᒥᑦ ᐅᐊᑲᓪᓚᕈᓘᖕᒪᑕ,” ᐅᖃᖅᑐᖅ ᕼᐊᐅᕙᑦ.

“ᐅᕙᓂ ᐱᓕᕆᓐᓇᖅᑐᒻᒪᕆᐊᓗᒃ, ᐊᒻᒪᓗ ᐱᓕᕆᔾᔪᑎᖏᑦ ᑕᑯᓪᓗᒋᑦ ᐋᖅᑭᒃᓯᒪᐃᓐᓇᕈᓘᔭᖅᖢᑎᒃ.”

ᖃᓄᐃᓕᐅᕈᓰᑦ ᐱᓕᕆᕝᕕᖕᒥ ᐱᓕᕆᓂᐅᕙᒃᑐ ᒪᑯᓄᖓᐅᔪᑦ, ᐊᒻᒪᓗ ᒫᓐᓇ ᕼᐊᐅᕙᑦ, ᓄᑖᖅ ᑕᕙᓂ, ᒪᑯᓇᙵᑦ ᐃᒪᕐᒧᑦ ᓈᒻᒪᙱᓕᐅᕈᑎᐅᕙᒃᑐᓂᒃ ᐊᒻᒪ ᐃᑲᔪᖅᑎᖃᙱᓗᐊᖃᑦᑕᕐᓂᖅ, ᒪᐅᖓ ᐃᑭᑎᑦᑎᔭᑦᑐᓄᑦ ᐊᒻᒪᓗ ᖃᑦᑎᕆᕝᕕᒃ ᒥᑭᓗᐊᓕᕐᓂᖓᓄᑦ.

“ᑕᒪᓐᓇ ᐅᓐᓄᑐᐃᓐᓇᖅ ᐊᓯᙳᖅᑎᑦᑐᓐᓇᙱᓐᓇᑦᑎᒍᑦ ᐊᒻᒪᓗ ᐊᓯᙳᖅᑐᖃᓗᐊᕈᒪᖅᑰᔨᓇᓂ ᐅᓐᓄᑐᐃᓐᓇᒃᑯᑦ. ᓯᕗᒧᑦ ᑲᔪᓯᕙᓪᓕᐊᖏᓐᓇᕈᑦᑕ ᑭᖑᒻᒨᔭᙱᓪᓗᑕᓗ ᖁᕕᐊᓱᒃᑲᔭᖅᐳᖓ,” ᐅᖃᖅᑐᖅ ᕼᐊᐅᕙᑦ.

“ᐅᕙᓐᓄᓪᓕ, ᖁᕕᐊᓇᕈᓘᔭᖅᑐᖅ ᐱᓕᕆᐊᒃᓴᖅ. ᖁᕕᓇᕈᑎᒋᔭᖓ, ᖃᓄᐃᓕᐊᕋᓱᖕᓂᑦᑎᓐᓂᒃ ᐊᒻᒪ ᖃᐅᔨᒪᓕᖅᑕᑦᑎᒍᑦ ᖃᓄᐃᓕᐅᕈᓐᓇᑦᑎᐊᕈᓐᓇᓕᕐᓗᑎᒍᑦ.”

ᓯᕗᓪᓕᖅᐹᒧᑦ ᐊᐱᖅᑯᑎᐅᓂᑯᒧᑦ ᓄᓇᓕᐸᐅᔭᓂᑦ ᑎᒃᑯᐊᖅᑕᐅᓯᒪᓂᕐᒧᑦ ᑐᑭᒧᐊᖅᑎᑦᑎᔨᐅᓕᖅᖢᓂ ᑐᐊᕕᕐᓇᖅᑐᓕᕆᓂᕐᒧᑦ, “ᑐᕌᓐᑐᒥ ᐃᑲᔪᖅᑎᑎᐅᔪᖓ,” ᐅᖃᖅᑐᖅ ᕼᐊᐅᕙᑦ ᖁᖓᖢᓂ.

“ᐊᓕᐊᓇᐃᑦ ᐃᓚᖏᑦ ᖃᑎᕆᕝᕕᖕᒥ ᑐᕌᓐᑐᒥ ᐃᑲᔪᖅᑐᐃᔪᑦ. ᓴᐃᒻᒪᑎᒥ ᓇᒃᓴᓚᐅᕋᒪ, ᑕᐃᒪᓕ ᑕᑯᖅᑯᑎᔪᓐᓇᓛᖅᑕᒃᓯᕆᕙᕗᒃ ᓄᓇᓯᐅᑎᑦᑎᒍᑦ ᓯᑖᓐᓕ ᑲᑉᒥ ᓵᓚᒃᓴᕐᓂᕈᑎ ᐊᕐᕌᒍᑦ 20-30 ᐃᓗᐊᓂᑦ.”