ᐃᖃᓗᐃᑦ ᑲᑎᒪᔨᖏᑦ ᐋᖅᑭᒃᓯᔪᑦ ᐊᑭᓕᕐᓯᐊᓂᒋᐊᖃᕐᓂᖓᓂᒃ ᐅᓪᓗᕐᒥ ᐅᓇ ᒪᐃᔭᐅᓚᐅᕐᑐᖅ ᐆᒥᖓ $9,500-ᓂᒃ

For English version, see Iqaluit council sets deadline for former mayor to pay back $9,500

ᐃᖃᓗᐃᑦ ᓄᓇᓕᐸᐅᔭᐃᑦ ᑲᑎᒪᔨᖏᑦ ᒪᐃᔭᐅᓚᐅᕐᑐᖅ ᑭᐊᓂ ᐱᐊᓪ ᐊᑭᓕᕐᓯᖁᔨᔪᑦ $9,500 ᖃᓂᒋᔭᖓᓂ ᑮᓇᐅᔭᓂᒃ ᑐᓂᔭᕆᐊᖃᕐᑕᖏᑦ ᐊᐃᔅᓚᓐᒧᑦ ᐊᐅᓪᓚᖅᑎᓪᓗᒍ.

ᑲᑎᒪᔩᑦ ᑕᒪᕐᒥ ᐱᖁᔨᕗᖔᕈᑎᒥᒃ ᐊᓂᒍᖅᑎᑦᑎᓚᐅᕐᑐᑦ ᑕᒪᑐᒥᖓ ᐅᒃᑑᐱᕆ 25-ᒥ, ᐃᓱᖃᖅᑎᑕᐅᓪᓗᓂ.

ᐅᓇ ᐱᖁᔨᕗᖔᕈᑎ, ᐱᒋᐊᖅᑕᐅᓂᑯ ᑲᑎᒪᔨ ᐹᓪ ᖁᐊᓴᒧ ᐊᒻᒪ ᑐᒡᓕᕆᔭᐅᓪᓗᓂ ᑲᑎᒪᔨ ᕈᒦᓐ ᓯᑏᕙᓐᓴᓐ ᐅᖃᕐᖢᑎᒃ: “ᑲᑎᒪᔩᑦ ᐊᑭᓖᓚᐅᕐᑐᑦ ᒪᐃᔭᐅᓚᐅᕐᑑ ᑭᐊᓂ ᐱᐊᓪ ᐊᐃᔅᓚᓐᒧᐊᕐᓂᐊᕐᓗᓂ ᐅᒃᑑᐱᕆ 13, 2022-ᒥ, ᑭᒡᒐᕐᑐᐃᓗᓂ ᐃᖃᓗᐃᑦ ᓄᓇᓕᐸᐅᔭᖓᓂᒃ.”

ᐱᐊᓪ, ᓄᓇᓕᐸᐅᔭᓄᑦ ᒪᐃᔭᐅᓚᐅᕐᓯᒪᔪᖅ ᑕᐃᔅᓱᒪᓂᒃ, ᖃᖓᑕᓚᐅᕐᓯᒪᔪᖅ ᐅᕆᒃᑭᕕᒃ, ᐊᐃᔅᓚᓐᒧᑦ ᐅᒃᑑᐱᕆᒥ 2022 ᑲᑎᒪᔭᕐᑐᖃᑕᐅᓪᓗ ᐅᑭᐅᕐᑕᖅᑐᕐᒥ ᑲᑎᒪᓂᕐᔪᐊᕐᒧᑦ (Arctic Circle Assembly) ᑕᕝᕙᓂᓗ ᐅᖃᓪᓚᒡᕕᖃᖅᖢᑎᒃ ᑲᑎᒪᔨᓄᑦ. ᑭᓯᐊᓂᓕ ᐅᖃᓪᓚᒋᐊᖃᖅᑎᓪᓗᒍ ᐅᐸᒍᑎᖃᑦᑕᓚᐅᙱᒻᒪᓐ.

ᐱᐊᓪ ᓄᖅᑲᓕᓚᐅᕐᓯᒪᔪᖅ ᒪᐃᔭᐅᓂᕐᒧᑦ ᑲᑎᒪᓂᖅ ᐊᓂᒍᕐᓯᒪᓕᕐᑎᓪᓗᒍ, ᐅᖃᕐᖢᓂ ᑕᐃᒪᓐᓇᐅᓕᓚᐅᕐᓂᖓᓂ ᐅᖃᖃᑎᖃᓚᐅᖅᖢᓂ ᐃᓚᖏᓐᓂᒃ ᐊᒻᒪ ᐱᖃᓐᓇᕆᔭᖏᓐᓄᑦ.

ᐊᖓᔪᖅᑳᖅ ᐊᐅᓚᑦᑎᔨ ᐊᐃᒥ ᐃᐊᒍᔅᒪ ᐅᖃᓚᐅᑦᑐᖅ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ ᑕᖅᑭᐅᓚᐅᕐᑐᒥ ᐱᐊᓪ ᐅᖃᓚᐅᕐᓂᖓᓂᒃ ᐊᑭᓖᔪᒪᓂᕋᖅᖢᓂ ᐊᐅᓪᓚᕈᑎᕕᓂᖓᓂᒃ, ᑖᓐᓇᓗ ᐃᓚᖃᖅᖢᓂ $4,691.20 ᖃᖓᑕᔾᔪᑎᓄᒃ, $3,938.18 ᑐᔪᕐᒥᕕᖕᓄᑦ ᐊᒻᒪ $855.40 ᐃᓚᐅᔾᔪᑎᒃᓴᓄᑦ.

ᐱᐊᓪ ᑭᐅᓚᐅᙱᑦᑐᖅ ᐊᐱᕐᓱᖅᑕᐅᔪᒪᑎᓪᓗᒍ ᑲᑎᒪᔩᑦ ᐱᖁᔨᕗᖔᕈᑎᖓᑕ ᒥᒃᓵᓄᑦ.

ᓇᓗᓇᖅᖢᓂ, ᐱᑕᖃᕈᓂ, ᖃᓄᖅ ᑲᑎᒪᔩᑦ ᐱᔪᓐᓇᕐᓂᖏᑦᑎᒍᑦ ᐅᓇ ᐊᑭᓖᕝᕕᒃᓴᖅ ᐃᓱᖃᕐᑎᑕᐅᓂᖓ ᐱᐊᓪ ᐊᑭᓖᖁᔭᐅᓪᓗᓂ ᑮᓇᐅᔭᓂᒃ. ᓄᓇᑦᓯᐊᕐᒥ ᐱᕙᓪᓕᐊᔪᑦ ᐊᐱᕆᓚᐅᕐᑐᑦ ᖁᐊᓴᒥ ᓇᓗᓇᐃᕐᓯᖁᔭᐅᓪᓗᓂ ᑕᒪᑐᒥᖓ. ᑖᓐᓇ ᖃᐅᔨᔪᒪᔾᔪᑎ ᐊᐅᓚᑦᑎᔨᒧᑦ ᑐᕌᖓᑎᑕᐅᑎᓚᐅᕐᑕᖓ. ᑕᒪᕐᒥᒃ ᓱᓕ ᑭᐅᓚᐅᙱᑦᑐᑦ.