ᐃᖃᓗᐃᑦ ᒪᐃᔭᖓ ᐅᓪᓘ ᐃᓚᐃᓐᓇᖓᓂ ᐱᓕᕆᖃᑦᑕᕐᓂᐊᖅᑐᖅ ᑭᓯᐊᓂ ᓂᕈᐊᕐᓇᖅᓯᒃᐸᑦ, ᑲᑎᒪᔩ ᑕᐃᒪᐃᖁᔨᔪᑦ

For English version, see Iqaluit mayor to work part-time until next election, council decides

ᐃᖃᓗᐃᑦ ᒪᐃᔭᖓ ᐅᓪᓘ ᐃᓚᐃᓐᓇᖓᓂ ᐱᓕᕆᖃᑦᑕᕐᓂᐊᖅᑐᖅ ᐊᒻᒪ ᐊᑭᓕᖅᑕᐅᕙᒡᓗᓂ ᐅᓪᓘ ᓇᑉᐸᖓᓄᑦ ᑭᓯᐊᓂ ᓄᓇᓖᑦ ᓂᕈᐊᖅᑎᑦᑎᐊᓂᒃᐸᑕ ᐅᒃᑑᐱᕆ 2023-ᒥ.

ᓄᓇᓕᐸᐅᔭᐃᑦ ᑲᑎᒪᔨᖏᑦ ᐊᖏᓚᐅᕐᑐᑦ ᖃᓄᐃᓕᐅᕈᑎᐅᔪᒪᔪᓂᒃ ᓄᕕᐱᕆ 8-ᒥ ᑲᑎᒪᑎᓪᓗᒋᑦ.

ᑕᖅᑭᐅᓚᐅᕐᑐᒥᓐ, ᑲᑎᒪᔩᑦ ᓂᕈᐊᓚᐅᕐᒪᑕ ᓵᓚᒪᓐ ᐊᕙ ᒪᐃᔭᐅᑲᐃᓐᓇᕐᓂᐊᕐᓗᓂ ᑭᓯᐊᓂ ᓂᕈᐊᕐᓇᐅᓕᖅᐸᑦ, ᐃᓇᖏᕐᓯᓪᓗᓂ ᒪᐃᔭᐅᓚᐅᕐᑐᒥᒃ ᑭᐊᓂ ᐱᐊᓪᒥ, ᑖᓐᓇ ᓄᖃᓚᐅᕐᒪᓐ ᐅᒃᑑᐱᕆᐅᑉ ᕿᑎᐊᓂ ᐊᕐᕌᒍᒥ ᒪᐃᔭᐅᑲᓐᓂᓪᓗᐊᖅᖢᓂ ᐊᕐᕌᒍᓂ ᑎᓴᒪᓂᒃ ᐃᓂᖓᓂᒃ.

ᐊᕙ — ᓄᓇᓕᐸᐅᔭᓄᑦ ᑲᑎᒪᔨᐅᖃᑕᐅᔪᖅ ᐊᒻᒪᓗ ᒪᐃᔭᐅᑉ ᑐᒡᓕᕆᓪᓗᓂᐅᒃ — ᐃᖅᑲᓇᐃᔭᖃᑦᑕᕐᒥᖕᒪᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᓄᑦ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᐱᓕᕆᔨᒋᔭᐅᓪᓗᓂ.

ᑲᑎᒪᔩᑦ ᓂᕈᐊᓚᐅᕐᒥᔪᑦ ᐊᕙᒥ ᐊᑭᓕᕐᓱᐃᖃᑦᑕᕐᓂᐊᕐᓗᑎᒃ ᓇᑉᐸᖓᓂᒃ ᑮᓇᐅᔭᓕᐊᓂᒃ ᐃᒪᓐᓇ $5,000 ᑕᖅᑭᒧᑦ, ᐃᓚᒍᑕᖃᙱᓪᓗᓂ ᐅᕝᕙᓘᓐᓃᑦ ᐱᔪᓐᓇᐅᑎᖃᙱᓪᓗᓂ.

ᐆᒧᖓᓕ ᐃᓂᒋᓵᖅᑕᖓᓄᑦ ᑲᑎᒪᔨᐅᓂᕐᒧᑦ, ᒪᐃᔭᐅᑉ ᑐᒡᓕᖓ ᑲᐃᐅᓪ ᓴᐳᑦ ᐅᖃᓚᐅᕐᑐᖅ ᑖᓐᓇ ᐃᓄᖃᙱᓪᓗᓂ ᑭᓯᐊᓂ ᑲᑎᒪᔨᓂᒃ ᓂᕈᐊᕌᓂᒃᐸᑕ ᐊᕐᕌᒍ.

“ᐃᓱᒪᒐᒪᓕ ᐅᑯᐊ 7 ᑲᑎᒪᔩᑦ ᐊᒻᒪ ᒪᐃᔭ ᐱᓕᕆᐊᖃᕈᓐᓇᕐᓂᐊᕐᓂᖏᓐᓂᒃ ᐊᕐᕌᒍ ᑎᑭᓪᓗᒍ,” ᐅᖃᕐᑐᖅ.

ᑭᓯᐊᓂᓕ, ᓴᐳᑦ ᐅᖃᒃᑲᓐᓂᓚᐅᕐᑐᖅ ᓂᕈᐊᖅᑐᓕᕆᔨᒃᑯᑦ ᓄᓇᕗᒥᑦ ᓇᓗᓇᐃᕐᓯᖁᓪᓗᓂᒋᑦ ᑕᐃᒪᐃᑦᑐᓐᓇᕐᒪᖔᑕ. ᓄᓇᓖᑦ ᐊᐅᓚᑦᑎᔨᖓᑦ ᐊᐃᒥ ᐃᐊᒍᔅᒪ ᐅᖃᓚᐅᕐᑐᖅ ᖃᐅᔨᓇᓱᖕᓂᐊᕐᓂᖓᓂᒃ ᓂᕈᐊᖅᑐᓕᕆᔨᒃᑯᑦ ᓄᓇᕗᒥᒃ ᑭᖏᓪᓕᕐᒥ ᑲᑎᒪᓕᓚᐅᙱᓐᓂᖏᓐᓂᒃ.

ᐊᓯᖏᓐᓄᓪᓕ ᑲᑎᒪᔩᑦ ᖃᓄᐃᓕᖓᓂᖏᓐᓄᑦ, ᑲᑎᒪᔨ ᓵᒻ ᑎᐊᓕ — ᑎᒃᑯᐊᖅᑕᐅᓂᑯ ᑲᑎᒪᔨᓄᑦ ᑕᖅᑭᐅᓚᐅᕐᑐᒥ ᐅᓇ ᑲᑎᒪᔨᐅᓚᐅᕐᑐᖅ ᔪᐊᓇᓯ ᐊᑯᒪᓕᒃ ᓄᖅᑲᖅᑎᓪᓗᒍ — ᓂᕆᐊᕆᔭᐅᓚᐅᕐᒪᓐ ᐃᒃᓯᕙᐅᑕᐅᑉ ᑐᒡᓕᕆᓂᐊᕐᓗᓂᐅᒃ ᐸᕐᓇᐅᑎᓕᕆᔨᓄᑦ ᐊᒻᒪ ᓄᓇᓕᕆᓂᕐᒧᑦ ᑲᑎᒪᔨᕋᓛᓄᑦ, ᑖᒃᓯᓂ ᕿᒥᕐᕈᐊᖅᑎᓄᑦ ᑲᑎᒪᔨᕋᓛᓄᑦ ᐊᒻᒪᓗ ᐱᙳᐊᖅᑐᓕᕆᔨᒃᑯᓐᓄᑦ.

ᐊᕙ ᐃᒃᓯᕙᐅᑎᐅᓂᕐᒧᑦ ᑎᒃᑯᐊᖅᑕᐅᓚᐅᕐᑐᖅ ᐱᕐᕈᓗᐊᕿᑎᑦᑎᑦᑕᐃᓕᓂᕐᒧᑦ ᑲᑎᒪᔨᕋᓛᓄᑦ ᐊᒻᒪᓗ ᑲᑎᒪᔨ ᑭᒻᐳᓕ ᓯᒥᑦ ᑎᒃᑯᐊᖅᑕᐅᓪᓗᓂ ᐃᒃᓯᕙᐅᑕᐅᓂᐊᕐᓗᓂ ᐱᙳᐊᖅᑐᓕᕆᔨᒃᑯᑦ ᑲᑎᒪᔨᖏᓐᓄᑦ.