ᐃᖃᓗᐃᑦ ᒪᐃᔭᖓ ᑮᓇᐅᔭᓕᕆᔨᒃᑯᑦ ᒥᓂᔅᑕᖓᓂᒃ ᐃᒥᐊᓗᖕᒥ ᐊᐅᓚᑕᐅᓂᖅᓴᐅᖁᔨᔪᖅ

ᒥᓂᔅᑕ ᐅᖃᖅᑐᖅ ᓄᓇᕗᑦ ᐃᒥᐊᓗᒃᒧᑦ ᒪᓕᒐᖏᑦ ᐊᓯᙳᖅᑎᑕᐅᔭᕆᐊᖃᖅᑐᑦ

ᑮᓇᐅᔭᓕᕆᔨᒃᑯᑦ ᒥᓂᔅᑕᖓ ᔪᐊᔾ ᕼᐃᒃᔅ ᐅᖃᓚᐅᖅᑐᖅ ᓄᓇᕗᒥᑦ ᐃᒥᐊᓗᖕᒥ ᑲᒪᒋᔭᖃᕐᓂᕐᒥ ᓄᑕᐅᙱᓗᐊᖅᑐᐊᓘᓕᕐᒪᓐ ᐊᒻᒪᓗ “ᐃᑲᔪᖅᑕᐅᔪᓐᓇᕋᔭᖅᖢᓂ ᒫᓐᓇᓕᓴᓄᑦ ᐋᖅᑭᒃᓱᖅᑕᐅᒍᓂ.” (ᐊᔾᔨᙳᐊᖁᑎᒋᔭᐅᔪᖅ)

By ᑕᐃᕕᑦ ᕕᐊᓐ
ᓄᓇᓕᖕᓂ ᑐᓴᒐᒃᓴᓕᐅᕐᑎᐅᓂᕐᒧᑦ ᐱᓕᕆᐊᒃᓴᓄᑦ ᑐᓴᒐᒃᓴᓕᐅᕐᑎ

For an English version of this article, see Iqaluit mayor presses finance minister for tougher liquor restrictions

ᐃᖃᓗᐃᑦ ᒪᐃᔭᖓ ᑭᐊᓂ ᐱᐊᓪ ᓈᒻᒪᒃᓴᓚᐅᙱᑦᑐᖅ ᑮᓇᐅᔭᓕᕆᔨᒃᑯᑦ ᒥᓂᔅᑕᖓᓂᒃ ᔪᐊᔾ ᕼᐃᒃᔅ, ᐅᖃᖅᖢᓂ ᑖᓐᓇ ᒥᓂᔅᑕ ᐱᓕᕆᕝᕕᒋᔭᖓᓗ ᐱᓇᓱᒃᓯᒪᙱᓐᓂᕋᖅᖢᓂᒋᑦ ᐊᑐᐊᒐᓂᒃ ᐊᐅᓚᑦᑎᔾᔪᑎᐅᓇᔭᖅᑐᓂᒃ ᖃᓄᑎᒋ ᐃᒥᐊᓗᒃᒥᑦ ᓄᓇᕗᒧᑦ ᑎᑭᑦᑐᖃᕈᓐᓇᕐᓂᖓᓄᑦ ᐋᖅᑭᒃᓯᓯᒪᓇᔭᖅᑐᓂᒃ.

ᐱᐊᓪ ᑕᐃᒪᐃᓕᓚᐅᕐᓯᒪᔪᖅ ᐸᓖᓯᒃᑯᑦ ᐅᓂᒃᑳᓕᐅᖅᑎᓪᓗᒋᑦ ᓄᓇᓕᐸᐅᔭᐃᑦ ᑲᑎᒪᔨᖏᓐᓄᑦ ᔫᓂ     22-ᖑᑎᓪᓗᒍ, ᐅᓇ ᐸᓖᓯᒃᑯᓐᓄᑦ ᐊᖓᔪᖅᑳᖅ ᓇᓗᓇᐃᖅᓯᑎᓪᓗᒍ ᐸᓖᓯᒃᑯᓐᓄᑦ ᐅᖄᓚᖃᑦᑕᖅᑐᓂᒃ 63 ᐳᓴᓐᑎᖏᑦ ᐃᒥᐊᓗᖕᒨᖓᔪᓅᖓᓚᐅᖅᑐᑦ.

“ᑕᒪᕐᒥᑦᑎᐊᖅ ᒪᐃᔭᐅᔪᑦ ᓄᓇᕗᒥᑦ ᐅᑯᓂᖓ ᓄᓇᕗᒥᑦ ᒐᕙᒪᒃᑯᓐᓂᒃ ᐋᖅᑭᒃᓯᓯᒪᖁᔨᓂᖏᓐᓂᒃ ᖃᓄᑎᒋ ᐃᒥᐊᓗᒃᒥᑦ ᓴᙱᔪᒥ ᓄᓇᓕᖕᓄᑦ ᑎᑭᑎᑦᑎᖃᑦᑕᕆᐊᖃᕐᓂᖏᓐᓂᒃ,” ᐅᖃᖅᑐᖅ. “ᐊᒻᒪᓗ ᓄᓇᕗᒥᑦ ᒐᕙᒪᒃᑯᑦ ᑕᒪᑐᒥᖓ ᓱᓕ ᐱᓕᕆᐊᖃᓚᐅᙱᑦᑐᑦ.”

ᐅᑯᐊ ᓄᓇᕗᒥᑦ ᓄᓇᓖᑦ ᑲᑐᔾᔨᖃᑎᒌᖏᑦ ᑲᑎᒪᑎᓪᓗᒋᑦ ᐊᕐᕌᓂᐅᓚᐅᖅᑐᖅ, ᓄᓇᓖᑦ ᒪᐃᔭᖏ ᐱᖁᔨᕗᖔᕈᑎᒥ ᐊᓂᒍᖅᑎᑦᑎᓚᐅᖅᓯᒪᖕᒪᑕ ᐃᒪᐃᓕᖓᓪᓗᓂ ᓄᓇᕗᒥᑦ ᒐᕙᒪᒃᑯᑦ ᐃᒥᐊᓗᐃᑦ ᑎᑭᓴᖅᑕᐅᖃᑦᑕᖅᑐᑦ ᓄᓇᕗᒧᑦ ᐅᓄᖃᑦᑕᕐᓂᖏᓐᓂᒃ ᐋᖅᑭᒃᓯᓯᒪᖁᔭᐅᓪᓗᑎᒃ.

“ᐅᓇ ᓱᓕ ᑕᐃᒪᓐᓇ ᐋᖅᑭᒃᑕᐅᓚᐅᙱᑦᑐᖅ ᐊᒻᒪᓗ ᖃᓄᐃᒻᒪ ᑐᑭᓯᓯᒪᙱᖢᖓ,” ᐅᖃᖅᑐᖅ ᐱᐊᓪ, ᑖᓐᓇᓗ ᑲᑐᔾᔨᖃᑎᒌᓄᑦ ᐊᖓᔪᖅᑳᕆᔭᐅᓪᓗᓂ.

“ᓴᙱᔪᑦ ᐃᒥᐊᓗᐃᑦ ᓄᓇᓕᑦᑎᓐᓂᒃ ᑐᖁᕋᐃᕙᓪᓕᐊᖕᒪᑦ ᓄᓇᕗᒥᑦ. ᑕᒪᕐᒥᑦᑎᐊᖅ ᒪᐃᔭᐅᔪᑦ ᑕᐃᒪᓐᓇ ᐅᖃᖅᓯᒪᓕᖅᑐᑦ,” ᐱᐊᓪ ᐅᖃᖅᑐᖅ. “ᐅᕙᑦᑎᓐᓂ ᑐᓵᖁᒐᓗᐊᕋᑦᑎᒍᑦ.”

ᓄᓇᑦᓯᐊᕐᒥ ᐱᕙᓪᓕᐊᔪᓄᑦ ᑎᑎᕋᖅᖢᓂ, ᕼᐃᒃᔅ ᐅᖃᓚᐅᖅᑐᖅ ᖃᐅᔨᒪᓂᕋᖅᖢᓂ ᐃᒥᐊᓗᒃ ᐅᓗᕆᐊᓇᖅᑐᐊᓘᔭᓐᓂᖓᓂᒃ ᓄᓇᕗᒥᑦ ᐊᒻᒪᓗ ᐅᓄᖅᑐᐃ ᓄᓇᕗᒻᒥᐅᑦ ᐃᒥᐊᓗᒃᖢᑎ ᖃᓄᐃᓕᐅᕈᓘᔭᖅᐸᙱᓐᓂᖏᓐᓂᒃ.

“ᐃᓱᒫᓘᑎᒋᓗᐊᖅᑕᕗᓪᓗ ᐃᒪᓐᓇ ᖃᓄᑎᒋ ᐃᒥᐊᓗᖃᑦᑕᕐᓂᖏᓐᓂᐅᙱᑦᑐᖅ ᓄᓇᕗᒥᑦ, ᑭᓯᐊᓂᓕ ᐃᒥᐊᓗᒃ ᑕᒪᐅᙵᕌᖓᑦ ᖃᓄᐃᓕᐅᕈᑎᐅᓚᔭᓂᖓᓂᒃ — ᓇᒧᙵᐅᕙᖕᒪᖔᑦ, ᑭᓇᒧᙵᐅᖕᒪᖔᑦ ᐊᒻᒪᓗ ᖃᓄᖅ ᐃᓄᐃᑦ ᐃᒥᖅᑎᒋᖃᑦᑕᕐᒪᖔᑕ,” ᐅᖃᖅᑐᖅ.

ᕼᐃᒃᔅ ᐅᖃᓚᐅᖅᑐᖅ ᑕᒪᓐᓇ “ᐅᔾᔨᕆᓯᒪᓕᖅᑕᕗᑦ ᐊᑯᓂᐸᓗᕈᓘᓕᖅᑐᖅ” ᐊᒻᒪᓗ ᐅᖃᖅᖢᓂ ᑖᒃᑯᐊ ᐱᓕᕆᕝᕕᐅᔪᑦ ᐃᓱᒪᒃᓴᖅᓯᐅᕐᓂᕋᖅᖢᓂᒋᑦ ᖃᓄᖅ ᐊᖏᔪᓂᒃ ᑎᑭᑎᑕᐅᔪᓂᒃ ᐅᓄᕈᓐᓃᖅᐹᓪᓕᖅᑎᑦᑎᔪᓐᓇᕐᒪᖔᑦ.

“ᖃᐅᔨᒪᔪᖓ ᐃᓄᐃᑦ ᒐᕙᒪᒃᑯᓐᓂ ᖃᐅᔨᒪᖃᑦᑕᙱᒻᒪᑕ ᖃᓄᐃᓕᐅᖃᑦᑕᕐᓂᖏᓐᓂᒃ ᓴᖅᑭᔮᙱᑦᑐᒃᑯᑦ ᐱᓕᕆᐊᖃᖅᖢᑎᒃ,” ᐅᖃᖅᑐᖅ. “ᑭᓯᐊᓂᓕ, ᖃᓄᐃᓕᐅᕈᓘᔭᕆᐊᖃᕋᑦᑕ ᐊᓯᙳᖅᑎᑦᑎᓂᐊᕈᑦᑕ ᐱᖁᔭᑎᒍᑦ ᒪᑯᑎᑐᓇᖅ ᖃᓄᑎᒋ ᐅᓄᖅᑎᒋᔪᓂᒃ ᑎᑭᑎᑦᑎᖃᑦᑕᕈᓐᓇᕐᒪᖔᖏᓐᓂᒃ.”

ᒐᕙᒪᒃᑯ ᐃᒪᐃᑎᑦᑎᔪᒪᙱᒻᒪᑕ ᓄᖃᖅᑎᑦᑎᓯᒪᓗᑎᒃ “ᑭᓇᑐᐃᓐᓇᖅᒥᒃ ᐊᖏᕐᕋᖏᓐᓂᒃ ᐱᒋᓂᐊᖅᑕᖏᓐᓂᒃ ᐅᕝᕙᓘᓐᓃᑦ ᐊᕐᕌᒍᓕᒫᖅ ᕗᐊᐃᓐᒋᔭᐅᓂᐊᖅᑐᓂᒃ,” ᐅᖃᖅᑐᖅ, ᑭᓯᐊᓂᓕ ᐅᓄᓗᐊᖅᑐᐊᓗᖕᓂᒃ ᐃᓱᖃᖅᑎᑦᑎᔪᓐᓇᕐᓗᑎᒃ.

ᐊᒻᒪᒃᑲᓐᓂᖅ, ᕼᐃᒃᔅ ᐅᖃᓚᐅᕐᒥᔪᖅ ᒐᕙᒪᒃᑯᑦ ᐃᓱᒪᔭᕆᐊᖃᕐᓂᖏᓐᓂᒃ ᐊᑐᓂ ᓄᓇᓕᐅᔪᑦ ᐃᒥᐊᓗᖕᒧᑦ ᒪᓕᒐᕆᔭᖏᓐᓂᒃ.

ᐊᕐᕕᐊᓂᒃ ᐊᒻᒪ ᓴᓪᓕᓂᒃ, ᓇᓗᓇᐃᒃᑯᑎᐅᓗᑎᒃ, ᐃᒥᐊᓗᖃᖁᔭᐅᙱᑦᑐᑦ, ᐅᑯᑎᒎᓇᕐᓕ ᑭᖑᓪᓕᖅᐹᒥᒃ ᓄᓇᓖᑦ ᓂᕈᐊᖅᑎᑕᐅᑎᓪᓗᒋᑦ ᓄᕕᐱᕆ 2020-ᒥ. ᖃᒪᓂᑦᑐᐊᕐᒥᓪᓕ, ᓄᓇᓖᑦ ᓂᕈᐊᓚᐅᕐᑐᑦ ᐅᐱᕐᖔᖅ ᐃᒥᐊᓗᒃᑖᕋᓱᖕᓂᒃ ᐃᓱᖃᖅᑎᑕᐅᖁᔭᐅᙱᖢᓂ.

ᐱᐊᓪ ᐅᖃᓚᐅᖅᑐᖅ ᒪᓕᒐᖃᖁᔨᓂᕋᖅᖢᓂ ᐊᑐᕈᓐᓇᖅᑐᓂᒃ ᑖᒃᑯᐊ ᒐᕙᒪᐅᓂᖏᓐᓂᒃ, ᑭᓯᐊᓂᓕ ᕼᐃᒃᔅ ᐅᖃᕈᓐᓇᙱᓐᓂᕋᖅᑐᖅ ᑕᐃᒪᐃᓐᓇᔭᕆᐊᒃᓴᖓᓂᒃ ᐊᔾᔨᒌᙱᑦᑑᑎᓂᒃ ᑕᒪᓐᓇ ᐊᐅᓚᑕᐅᓂᖃᓗᐊᕐᓂᖓᓄᑦ.

“ᐅᖃᕈᓐᓇᖅᑐᖓᓕ ᐱᓕᕆᔨᒋᔭᒃᑲ ᐊᒻᒪ ᐅᕙᖓ ᑕᒪᑐᒥᖓ ᓯᕗᒧᑦ ᐱᓕᕆᓂᖅᓴᐅᔪᓐᓇᕐᓂᑦᑎᓐᓂᒃ,” ᐅᖃᖅᑐᖅ.

“ᐱᓕᕆᔾᔪᓯᕆᔭᕗᑦ ᐃᒥᐊᓗᒃᒥᑦ ᐊᐅᓚᑦᑎᓂᒃᑯᑦ … ᐊᑯᓂᐊᓗᒃ ᓄᑖᙳᕆᐊᖅᑕᐅᓯᒪᙱᓗᐊᕐᒪᑦ ᐊᒻᒪᓗ ᐃᑲᔪᕋᔭᖅᖢᓂ ᓄᑖᙳᕆᐊᖅᑕᐅᒻᒪᕆᒃᑯᓂ,” ᕼᐃᒃᔅ ᐅᖃᖅᑐᖅ, ᐅᖃᒃᑲᓐᓂᖅᖢᓂ ᒐᕙᒪᒃᑯᑦ ᐋᖅᑭᒃᓱᐃᒃᑲᓐᓂᕐᓂᖏᓐᓂᒃ ᒪᓕᒐᐅᔪᓂᒃ.

Share This Story

(0) Comments

Join the Conversation

Your email address will not be published. Required fields are marked *

*