ᐃᖃᓗᐃᑦ ᒪᓕᒐᓕᐅᕐᑎᖓ ᓄᓇᕗᑦ ᒐᕙᒪᒃᑯᓐᓂᑦ ᐱᓇᓱᐊᖁᔨᒻᒪᕆᓕᖅᐳᖅ ᓱᕈᓯᕐᓂᒃ ᖁᓄᔪᕐᓂᐊᕐᓂᕐᒥᒃ ᓄᖃᖅᑎᑦᑎᒐᓱᖕᓂᕐᒥᒃ ᓄᓇᕗᒥᑦ

“ᐃᓕᓐᓂᐊᖅᑎᑦᑕᕆᐊᖃᕋᑦᑎᒍᑦ ᐃᓕᓴᐃᔨᕗᑦ ᐊᒻᒪ ᐋᓐᓂᐊᓯᐅᕐᑎᕗᑦ ᖃᓄᖅ ᖃᐅᔨᔪᓐᓇᕈᑎᒃᓴᓂᒃ ᓱᕈᓰᑦ ᖁᓄᔪᕐᓂᐊᖅᑕᐅᓂᖏᓐᓂᒃ”

ᓱᕈᓯᕐᓂ ᖁᓄᔪᕐᓂᐊᖃᑦᑕᕐᓂᖅ ᖁᓖᕐᓱᖅᖢᓂ ᖁᑦᑎᖕᓂᕐᓴᐅᕗᖅ ᓄᓇᕗᒥᑦ ᑲᓇᑕᓕᒫᖅ ᑕᐅᑐᒃᖢᒍ, ᑭᓯᐊᓂᓕ ᑕᒪᑐᒧᖓ ᖃᓄᐃᓕᐅᖅᑐᖃᓗᐊᙱᑦᑐᖅ, ᐃᖃᓗᐃᑦ-ᒪᓂᕋᔭᒃᒧᑦ ᒪᓕᒐᓕᐅᕐᑎ ᐋᑕᒻ ᐋᕆᐊᒃ-ᓚᐃᑦᓯᑑᓐ ᐅᖃᓚᐅᕐᑐᖅ ᐊᐃᑉᐹᓂᑦ, ᕕᕝᕗᐊᕆ 19-ᒥᑦ ᓄᓇᕗᑦ ᒪᓕᒐᓕᕆᕕᒡᔪᐊᖓᓂᒃ. (ᐊᔾᔨᙳᐊᖁᑎᒋᔭᐅᔪᖅ)

By ᐱᐊᑦ ᐳᕋᐅᓐ ᐊᒻᒪ ᑯᐊᑦᓂ ᐃᐊᑦᒍ

For an English version of this story, see Nunavut must do more to help abused women and children, says MLA.

ᐃᖃᓗᐃᑦ-ᒪᓂᕋᔭᒃᒧᑦ ᒪᓕᒐᓕᐅᕐᑎ ᐋᑕᒻ ᐋᕆᐊᒃ ᓚᐃᑦᓯᑑᓐ ᐱᖁᔨᒻᒪᕆᓯᕗᖅ ᓄᓇᕗᑦ ᒐᕙᒪᒃᑯᑦ ᐱᓕᕆᐊᖃᕐᓂᕐᓴᐅᖁᓪᓗᒋᑦ ᓱᕈᓯᕐᓂ ᖁᓄᔪᕐᓂᐊᕐᓂᐊᓗᒃ ᓄᓇᕗᒥᑦ.

“ᐅᖃᐅᓯᖃᕐᓂᐊᕋᒪ ᐱᐅᙱᑦᑐᐊᓗᖕᒥᑦ ᐅᖃᐅᓯᒃᓴᒥᑦ ᐃᓄᐃᑦ ᐅᖃᐅᓯᕆᔪᒪᕙᙱᑖᓂᒃ—ᐆᒥᖓ ᓱᕈᓯᕐᓂᒃ ᖁᓄᔪᕐᓂᐊᖅᐸᖕᓂᕐᒥᒃ ᓄᓇᕗᒥᑦ,” ᓚᐃᑦᓯᑑᓐ ᐅᖃᖅᑐᖅ ᓄᓇᕗᑦ ᒪᓕᒐᓕᕆᕕᒡᔪᐊᖓᓂᒃ ᐊᑉᐹᓂᒃ, ᕕᕝᕗᐊᕆ 19-ᒥᑦ, ᑲᑎᒪᔩᑦ ᐅᖃᓪᓚᒃᑎᑕᐅᑎᓪᓗᒋᑦ ᓯᕗᓪᓕᖅᐹᒥᑦ ᐅᓪᓗᕐᒥᑦ ᐱᓇᓱᐊᕈᓯᕐᓂᒃ ᐱᖓᓱᓂᒃ ᐅᑭᐅᖅ ᑲᑎᒪᓂᐊᖅᖢᑎᒃ.

“ᐱᔭᒃᓴᕆᒐᑦᑎᒍᑦ ᓴᐳᑎᓯᒪᓗᑎᒍᑦ ᐃᖕᒥᖕᓂᒃ ᓴᐳᑎᓯᔪᓐᓇᙱᑦᑐᑦ,” ᐅᖃᖅᑐᖅ.

ᐅᖃᐅᓯᖃᖅᖢᓂ ᐅᓂᒃᑳᓕᐊᕕᓂᕐᒥᒃ ᐅᑯᓇᙵᑦ ᐅᑭᐅᕐᑕᖅᑐᕐᒥᑦ ᓱᕈᓰᑦ ᐊᒻᒪ ᐃᓅᓱᒃᑐᐃᑦ ᑐᙵᕕᖓᓂᒃ, ᓚᐃᑦᓯᑑᓐ ᐅᖃᓚᐅᕐᑐᖅ ᓄᓇᕗᑦ ᓱᕈᓯᖏ ᑕᐃᒪᓐᓇ ᐱᑦᑎᐊᖅᑕᐅᕙᙱᓐᓂᕐᓴᐅᖕᒪᑕ ᖁᓖᕐᓱᖅᖢᑎᒃ ᑲᓇᑕᓕᒫᖅ ᑕᐅᑐᒃᖢᒍ.

ᒫᓂ 500 ᖃᓂᒋᔭᖓᓂᒃ ᖁᓄᔪᕐᓂᐊᕐᓂᕐᒧᑦ ᐱᕋᔭᒃᓯᒪᔪᑦ ᓇᓗᓇᐃᖅᑕᐅᓯᒪᒻᒪᕆᖕᒪᑕ ᓄᓇᕗᒥᑦ, ᓚᐃᑦᓯᑑᓐ ᐅᖃᖅᑐᖅ, ᓇᐃᓴᐅᑎᓂᒃ ᐅᖃᐅᓯᖃᖅᖢᓂ ᒪᓕᒐᓕᕆᔨᒃᑯᓐᓂᑦ ᑐᓐᓂᖁᑎᓂᒃ.

“ᑐᓴᐃᓐᓇᐅᔭᖅᐳᒍᑦ ᑐᓴᒐᒃᓴᑎᒍᑦ … ᑭᓯᐊᓂᓕ ᖃᓄᐃᓕᐅᕈᑎᐅᖂᔨᙱᑦᑐᖅ ᐱᓕᕆᐊᕆᔭᐅᓂᒃᑯᑦ,” ᐅᖃᖅᑐᖅ.

“ᑕᐃᒪᓕ ᒐᕙᒪᒃᑯᓐᓂᑦ ᐱᖁᔨᓕᖅᐳᖓ ᐋᕿᒃᓯᖁᓪᓗᒋᑦ ᐅᔾᔨᕈᓱᓕᖅᑎᑦᑎᕚᓪᓕᕐᓂᕐᒥᒃ ᐱᓕᕆᔨᐅᖄᕐᓗᑎᒃ, ᐊᒻᒪᓗ ᐊᖓᔪᖅᑳᖑᔪᑦ ᐊᒻᒪᓗ ᓱᕈᓰᑦ. ᐃᓕᓐᓂᐊᖅᑎᑦᑕᕆᐊᖃᕋᑦᑎᒍᑦ ᐃᓕᓴᐃᔨᕗᑦ ᐊᒻᒪ ᐋᓐᓂᐊᓯᐅᕐᑎᕗᑦ ᖃᓄᖅ ᖃᐅᔨᔪᓐᓇᕈᑎᒃᓴᓂᒃ ᓱᕈᓰᑦ ᖁᓄᔪᕐᓂᐊᖅᑕᐅᓂᖏᓐᓂᒃ.”

ᓄᓇᕗᒥᑦ ᒪᓕᒐᓕᕆᔨᒃᑯᑦ ᐊᒃᓱᕈᖃᑦᑕᕐᒪᑖ ᐸᓯᔭᒃᓴᐅᑎᑦᑎᒐᓱᒃᖢᑎᒃ?

“ᐅᑯᐊ ᓱᕈᓰᑦ ᖁᓄᔪᕐᓂᐊᖅᑕᐅᓂᕋᕐᓯᒪᔪᑦ ᐃᖃᖅᑐᐃᕕᓕᕆᓂᒃᑯᑦ ᐃᓚᐅᔭᕆᐊᖃᕋᔭᕐᒪᑕ ᑕᒪᓐᓇᓗ ᐃᓱᒪᖏᓐᓄᑦ ᐊᒃᓱᕈᕐᓇᓗᐊᕋᔭᖅᖢᓂ,” ᐅᖃᖅᑐᖅ ᓚᐃᑦᓯᑑᓐ, ᐅᖃᖃᓯᐅᑎᓪᓗᓂ, ᐃᒪᓐᓇᐅᒡᒍᖕᒪᑦ, ᓱᕈᓰᑦ ᐊᒃᓱᕉᑎᒋᔭᖏᓐᓂᒃ ᐊᑐᒃᑲᓐᓂᓕᕐᓗᑎᒃ ᐊᐱᖅᓱᖅᑕᐅᓕᕈᑎᒃ ᖃᓄᐃᑕᐅᕕᓂᕕᓂᖏᓐᓂᒃ.

ᓚᐃᑦᓯᑑᓐ ᐊᐱᕆᓚᐅᕐᑐᖅ ᒪᓕᒐᓕᕆᔨᒧᑦ ᒥᓂᔅᑕᒥ ᔩᓂ ᐃᕼᐊᓗᐊᒃ ᑕᑯᓯᒪᔭᕆᐊᒃᓴᖓᓂᒃ ᓱᕈᓯᕐᓂᒃ ᖁᓄᔪᕐᓂᐊᖅᑕᐅᓂᕐᒧᑦ ᖃᐅᔨᓴᖅᑕᐅᕙᒃᑐᑦ ᖃᓄᐃᓕᖓᓂᖏᓐᓂᒃ ᓄᓇᕗᒥᑦ.

ᐊᒻᒪᓗ ᐊᐱᕆᓪᓗᓂ ᓄᓇᕗᒥᑦ ᐃᖃᖅᑐᐃᔨᐅᔪᑦ ᐊᒃᓱᕈᖃᑦᑕᕆᐊᒃᓴᖏᓐᓂᒃ—ᐊᓯᖏᑦᑎᑐᑦ ᓄᓇᓕᖕᓂᑦ—ᐸᓯᔭᒃᓴᙳᖅᑎᑦᑎᒐᓱᒃᑎᓪᓗᒋᑦ ᓱᕈᓰᑦ ᖁᓄᔪᓐᓂᐊᖅᑕᐅᓂᕋᕐᓯᒪᔪᓄᑦ.

“ᐸᓯᔭᒃᓴᙳᖅᑎᑦᑎᔨᐅᔪᑦ ᓄᓇᕗᒥᑦ ᑕᐃᒪᓐᓇ ᐊᒃᓱᕈᕈᑎᖃᖃᑦᑕᕆᕚ, ᐊᒻᒪᓗ ᖃᓄᐃᑦᑑᖕᒪᑕ?” ᓚᐃᑦᓯᑑᓐ ᐊᐱᕆᔪᖅ.

ᐃᕼᐊᓗᐊᒃ ᐅᖃᓚᐅᕐᑐᖅ ᓇᓗᓂᕋᖅᖢᓂ, ᑭᓯᐊᓂᓕ ᖃᐅᔨᓇᓱᒍᓐᓇᕐᓂᕋᖅᖢᓂ ᓄᓇᕗᒥᑦ ᐃᖃᖅᑐᐃᔩᑦ ᓗᐊᐃᔭᐃᓪᓗ ᐊᒃᓱᕈᕈᑎᖃᖃᑦᑕᕆᐊᒃᓴᖏᓐᓂᑦ ᐱᓕᕆᐊᖃᕐᓂᒃᑯᑦ ᐸᓯᔭᒃᓴᙳᖅᑎᑦᑎᒐᓱᒃᖢᑎᒃ ᓱᕈᓯᕐᓂᒃ ᖁᓄᔪᕐᓂᐊᕐᓂᕐᒧᑦ ᐸᓯᔭᒃᓴᙳᕐᓯᒪᔪᓂᒃ.

“ᐊᖏᒡᓕᒋᐊᖅᐸᓪᓕᐊᓂᐅᔪᖅ ᐱᕋᔭᒍᑎᐅᔪᓂᒃ ᓱᕈᓯᕐᓄᑦ ᓄᓇᕗᒥᑦ ᐃᓱᒫᓗᒍᑎᐅᓐᓇᖅᑐᖅ,” ᐅᖃᖅᑐᖅ, ᐅᖃᕆᓪᓗᓂ ᓱᕈᓯᕐᓄᑦ ᐱᑦᑎᐊᙱᔾᔪᑎᐊᓗᐃᑦ ᐱᕚᓪᓕᕐᓯᒪᓂᖏᓐᓂᒃ ᒪᕐᕈᐃᕐᓯᒪᓪᓗᓂ ᓄᓇᕗᒥᑦ ᐊᕐᕌᒎᓕᖅᑐᓂᒃ ᐅᑭᐅᓂᒃ ᐊᓂᒍᓵᖅᓯᒪᔪᓂᒃ, ᐱᔾᔪᑎᖃᓗᐊᕐᑐᕐᓕ ᓱᕈᓰ ᐅᖃᐅᓯᖃᕐᓂᕐᓴᐅᓕᕐᒪᑕ ᖃᓄᐃᓕᐅᕈᑎᓂᒃ.

ᓱᕈᓯᕐᓂ ᐃᑲᔫᑎᒃᓴᑦ ᖃᓄᐃᓕᐅᖅᑕᐅᓯᒪᔪᓂᒃ ᒪᑯᓇᙶᕐᓯᒪᕙᒃᑐᑦ ᓄᓇᓕᖕᓂᑦ ᒪᓕᒐᓕᕆᔨᓂᒃ, ᐃᓄᓕᕆᔨᒃᑯᑦ ᐃᖅᑲᓇᐃᔭᖅᑎᖏᓐᓂᒃ ᐊᒻᒪ ᐸᓖᓯᒃᑯᓐᓂᒃ, ᐅᖃᖅᑐᖅ.

“ᐱᔨᑦᑎᕋᐅᑎᑕᖃᕐᒪᑦ ᓄᓇᑦᑎᓐᓂ ᓱᕈᓯᕐᓄᑦ ᐃᑲᔪᖅᑕᐅᔭᕆᐊᓕᖕᓂᑦ ᐃᓅᓯᖏᑦᑎᒍᑦ ᖃᐅᑕᒫᓐ, ᐊᒻᒪ ᐱᓱᒍᓐᓇᕈᓐᓇᕐᓗᑎᒃ ᑲᑉᐱᐊᓱᖕᖏᓪᓗᑎᒃ ᓄᓇᖏᓐᓂ,” ᐃᕼᐊᓗᐊᒃ ᐅᖃᖅᑐᖅ.

ᓚᐃᑦᓯᑑᓐ ᐅᖃᐅᓯᖃᓚᐅᕐᑐᖅ ᐊᓯᐊᒍᑦ ᑐᓴᒐᒃᓴᓕᕆᓂᒃᑯᑦ ᐅᓂᒃᑲᐅᓯᖃᓚᐅᕐᑎᓪᓗᒋᑦ ᓇᓂᔭᐅᔪᓐᓇᙱᑦᑐᒥᑦ ᐃᒃᓯᕋᕐᔪᐊᕐᒥ ᓄᓇᕗᒥᑦ ᓱᕈᓯᕐᓂᒃ ᖁᓄᔪᕐᓂᐊᖃᑦᑕᖅᑐᕕᓂᖅ ᑎᒍᔭᐅᔭᕆᐊᖃᕈᓐᓃᕐᓯᒪᓕᕐᓂᖓᓂᒃ.

ᐅᖃᐅᓯᖃᓚᐅᕐᒥᔪᖅ ᐅᓇ ᐅᐱᕐᖔᖑᓚᐅᕐᑐᖅ ᓴᓂᑭᓗᐊᕐᒥᐅᑕ ᐃᓕᓴᐃᔨᕕᓂᖅ ᔮᓂ ᒦᑯ ᑎᒍᔭᒃᓴᙳᖅᑎᑕᐅᓚᐅᕐᑎᓪᓗᒍ ᐊᕐᕌᒍᓂ 8-ᓂ ᓱᕈᓯᕐᓂ ᖁᓄᔪᕐᓂᐊᖃᑦᑕᓚᐅᕐᓯᒪᓂᕐᒧᑦ ᐊᕐᕌᒍᓂ 35-ᓂ, ᐊᒻᒪᓗ ᐅᓇ ᓴᕿᑕᐅᓚᐅᕐᑎᓪᓗᒍ ᐃᒡᓗᓕᒃᒥᑦ ᓇᖕᒥᓂᖅ ᐱᓕᕆᐊᖃᖅᑎᐅᔪᖅ ᐊᐃᓴᑭ ᕼᐊᐅᓕ ᓱᕈᓯᕐᓂ ᖁᓄᔪᕐᓂᐊᖅᑎᐅᓂᖓᓄᑦ, ᐊᑭᓖᖁᔭᐅᓚᐅᕐᓯᒪᑎᓪᓗᒍ $1.22 ᒥᓕᐊᓐᑖᓚᓂ ᑎᓴᒪᓄᑦ ᑕᐃᒪᐃᓕᐅᕐᓯᒪᓂᑯᖏᓐᓄᑦ.

ᐅᑭᐊᒃᓵᖅ, ᑲᓇᑕᒥ ᐃᓄᐃᑦ ᑲᑐᔾᔨᖃᑎᒌᖏᑦ ᐱᓂᐊᕐᓂᕋᓪᓚᕆᓚᐅᕐᓯᒪᔪᑦ ᐱᓕᕆᐊᖃᕐᓂᐊᕐᓂᖏᓐᓂᒃ ᓱᕈᓯᕐᓂᒃ ᐃᓄᖕᓂ ᖁᓄᔪᕐᓂᐊᕐᓂᐅᕙᒃᑐᒥᑦ.

ᓚᐃᑦᓯᑑᓐ ᐱᒃᑯᒋᔭᖃᕐᓂᕋᓚᐅᕐᑐᖅ ᐱᓇᓱᐊᖅᑕᐅᓇᓱᒃᑐᓂᒃ ᐃᓄᐃᑦ ᑕᐱᕇᑦ ᑲᓇᑕᒥ ᐊᖓᔪᖅᑳᖓᓄᑦ ᓇᐃᑕᓐ ᐅᐱᐊᑦ ᐊᒻᒪ ᐅᖃᖅᖢᓂ ᐅᑯᐊ ᓄᓇᕗᑦ ᒐᕙᒪᒃᑯᑦ ᐊᒻᒪ ᐊᓯᖏᑦ ᐃᓄᐃᑦ ᑲᑐᔾᔨᖃᑎᒌᖏ ᐱᓇᓱᐊᕆᐊᖃᕋᓱᖕᓂᕋᖅᖢᓂᒋᑦ ᒥᒃᖠᕚᓪᓕᖅᑎᑦᑎᓂᕐᒥᒃ ᓄᓇᕗᒥᑦ ᓱᕈᓯᕐᓂ ᖁᓄᔪᕐᓂᐊᕐᓂᕐᒥᒃ.

“ᐱᒻᒪᕆᐊᓘᖕᒪᑦ ᐅᖃᐅᓯᖃᖃᑦᑕᕆᐊᖃᕐᓂᖅ ᓱᕈᓯᕐᓂ ᖁᓄᔪᕐᓂᐊᕐᓂᐅᕙᒃᑐᒥᑦ ᓄᓇᒋᔭᑦᑎᓐᓂᒃ,” ᓚᐃᑦᓯᑑᓐ ᐅᖃᖅᑐᖅ. “ᑕᐃᒪᓕ ᒐᕙᒪᒃᑯᓐᓂ ᑕᒪᑐᒥᖓ ᐱᓕᕆᐊᖃᖁᕙᒃᑲ ᐊᒻᒪ ᓴᐳᔾᔨᓯᒪᓗᑎᒃ ᓱᕈᓯᕐᓂ ᖃᓄᐃᑕᐅᓴᕋᐃᑦᑐᓂᒃ.”

ᓚᐃᑦᓯᑑᓐ ᓴᕿᑦᑎᓚᐅᕆᕗᖅ 19-ᓂ ᑎᑎᕋᕐᓯᒪᔪᓂᒃ ᐊᐱᖁᑎᓂᒃ ᒪᓕᒐᓕᕆᔨᒃᑯᓐᓄᑦ ᐊᒻᒪ ᐅᖃᓕᒫᖅᖢᓂᒋᑦ ᑎᑎᕋᖅᑕᐅᓯᒪᓂᐊᕐᒪᑕ.

ᐊᒥᓲᓂᕐᓴᑦ ᐊᐱᕆᓚᐅᕐᑐᑦ ᓄᓇᕗᑦ ᒐᕙᒪᒃᑯᑦ ᐊᑐᐊᒐᖏᓐᓂᒃ ᓇᓗᓇᐃᖅᑕᐅᓯᒪᔪᓂᒃ ᖁᓄᔪᕐᓂᐊᕐᓂᕐᒧᑦ ᐱᕋᔭᒃᓯᒪᔪᓂᒃ, ᐊᑐᐊᒐᓂᒃ ᓇᓗᓇᐃᕐᓯᒍᑎᐅᔪᓐᓇᖅᑐᓂᒃ ᖁᓄᔪᕐᓂᐊᕐᓂᕐᒧᑦ ᐱᕋᔭᒃᓯᒪᔪᓂᒃ ᐊᒻᒪᓗ ᖃᔅᓯᐅᖕᒪᖔᑕ ᖁᓄᔪᕐᓂᐊᕐᓂᕐᒧᑦ ᑎᒍᔭᐅᓯᒪᔪᑦ ᓱᕈᓰᑦ ᒥᒃᓵᓅᖓᔪᓄᑦ.

ᐊᐱᖁᑎᐅᔪᑦ ᐃᓚᖃᓚᐅᕐᒥᔪᑦ ᒪᑯᐊ ᓇᓗᓇᐃᖅᑕᐅᓯᒪᔪᑦ ᖁᓄᔪᕐᓂᐊᕐᓂᕐᒧᑦ ᐱᕋᔭᒃᓯᒪᔪᑦ ᓇᓗᓇᐃᖃᑦᑕᕆᐊᖃᕐᓂᖏᓐᓂᒃ ᓄᓇᕗᑦ ᒐᕙᒪᒃᑯᓐᓄᑦ ᐊᓯᐊᓂᒃ ᑐᕌᕈᑎᑖᕌᑕᖓᑖ, ᐊᑎᖏᓪᓘᓐᓃᑦ ᐅᕝᕙᓘᓐᓃᑦ ᓄᓇᓕᖕᓂᑦ ᐊᐅᓪᓚᕐᓂᐊᕌᖓᒥᒃ.

ᒐᕙᒪᒃᑯ ᑭᐅᒡᒍᖕᒪᑕ ᑎᑎᕋᕐᓯᒪᔪᓂᒃ ᐊᐱᖁᑎᓂᒃ ᑎᑎᕋᖅᖢᑎᒃ ᓇᓗᓇᐃᕐᓯᒪᔪᓂᒃ ᐅᖃᐅᓯᐅᔫᑉ ᒥᒃᓵᓅᖓᔪᓂᒃ ᒪᓕᒐᓕᕆᕕᒡᔪᐊᒥᑦ, ᐃᓛᓐᓂᒃᑯᑦ ᑭᖑᓪᓕᕐᒥᑦ ᑲᑎᒪᓂᒃᓴᒥᑦ.

Share This Story

(0) Comments