ᐃᖃᓗᐃᑦ ᓄᓇᓕᐸᐅᔭᓄᑦ ᑲᑎᒪᔩᑦ ᐱᓕᕆᐊᖃᓪᓗᐊᑕᖅᑐᑦ ᑭᒃᑯᓕᒫᓂᒃ ᐅᓗᕆᐊᓇᙱᑦᑐᒦᑎᑦᑎᓂᕐᒥᒃ
“ᖃᓄᖅ ᐊᑯᓂᐅᑎᒋᔪᖅ ᐅᑕᕿᔭᕆᐊᖃᕐᒪᑕ ᐃᖃᓗᖕᒥᐅᑕᑦ ᐅᓗᕆᐊᓇᙱᑦᑐᒦᑦᑐᓐᓇᕐᓂᕐᒥ? ᐱᓕᕆᐊᖃᒻᒪᕆᒋᐊᖃᓕᕐᑐᑦ.”
ᐊᐅᐸᖅᑐᒥ ᐊᕐᓇᙴᔪᑎᒥ ᓂᕕᖓᔪᖃᖅᐳᖅ ᑲᑎᒪᔨ ᔪᐊᓇᓯ ᐊᑯᒪᓕᐅᑉ ᑭᐳᖓᓂ ᐊᐃᑉᐹᓂ ᐃᖃᓗᐃᑦ ᓄᓇᓕᐸᔭᓄᑦ ᑲᑎᒪᔩᑦ ᑲᑎᒪᑎᓪᓗᒋᑦ. (ᐊᔾᔨᓕᐅᕆᔨ ᑕᔅᑎᓐ ᐸᑖᕐ)
For an English version of this story, see Iqaluit city council meeting centres on public safety concerns
ᐃᖃᓗᐃᑦ ᓄᓇᓕᐸᐅᔭᓄᑦ ᑲᑎᒪᔩ ᑲᑎᒪᑎᓪᓗᒋᑦ ᐊᐃᑉᐹᓂ, ᕕᕗᐊᕆ 11-ᒥᑦ ᐅᖃᐅᓯᖃᕐᓂᕐᓴᐅᓚᐅᕐᑐᑦ ᑭᒃᑯᓕᒫᓂᒃ ᐅᓗᕆᐊᓇᙱᑦᑐᒦᑎᑦᑎᓂᕐᒥᒃ ᑕᕝᕙᓂ ᐃᖃᓗᖕᓂ ᒪᕐᕉᖕᓂᒃ ᖁᐊᕐᓵᕐᓇᖅᑐᖃᒻᒪᕆᓚᐅᖅᑎᓪᓗᒍ.
ᕕᕗᐊᕆ 7-ᐅᑎᓪᓗᒍ ᐃᖃᓗᖕᓂᑦ ᐸᓖᓯᒃᑯᑦ ᐸᓯᔭᒃᓴᙳᖅᑎᑦᑎᓚᐅᕐᑐᑦ ᐊᖑᑎᒥ ᐃᓄᐊᕐᓯᓂᕐᒧᑦ, ᓇᓂᓯᓚᐅᖅᑎᓪᓗᒋᑦ 43-ᓂ ᐅᑭᐅᓕᖕᒥ ᐊᕐᓇᒥ ᑐᖁᖓᔪᒥᒃ ᓄᓇᕗᑦ ᓯᓚᑦᑐᖅᓴᕐᕕᐅᑉ ᐃᒡᓗᖁᑎᖓᓂᒃ.
ᐊᒻᒪᓗ, ᐱᓇᓱᐊᕈᓯᐅᑉ ᓄᙳᐊᓂᒃ, ᐸᓖᓯᒃᑯᑦ ᐃᑲᔪᖅᑕᐅᔪᒪᓚᐅᕐᓯᒪᔪᑦ ᕿᓂᕐᑎᓪᓗᒋ ᒨᓯᓯ ᓇᑲᓱᒃᒥᑦ, 50, ᑖᓐᓇᓗ ᐸᓯᔭᒃᓴᙳᖅᑎᑕᐅᓪᓗᓂ ᐊᐃᑉᐹᓂᒃ, ᕕᕗᐊᕆ 11, ᐃᓄᐊᕐᓯᓇᓱᓚᐅᕐᓂᖓᓄᑦ 37-ᓂ ᐅᑭᐅᓕᖕᒥᒃ ᐊᕐᓇᒥ.
“ᑕᐃᒃᑯᐊ ᑕᒪᒃᑯᓂᖓ ᐱᕋᔭᐅᑎᓂᒃ ᐊᑐᕋᓱᒋᔭᐅᓯᒪᔪᑦ ᒫᓐᓇ ᑎᒍᔭᐅᓯᒪᓕᕐᑐᑦ ᐊᒻᒪᓗ ᖁᔭᓕᔪᒪᓪᓗᖓ ᐃᑲᔪᖅᑕᐅᓚᐅᕐᓂᑦᑎᓐᓂᒃ ᑭᒃᑯᓕᒫᓂᒃ,” ᐅᖃᖅᑐᖅ ᐃᖅᑲᓇᐃᔭᖅᑎᓄᑦ ᐊᖓᔪᖅᑳᕆᔭᐅᔪᖅ ᒑᕕᐅᑦ ᐃᓕᐊᑦ, ᐅᐸᒍᑎᓯᒪᓚᐅᕐᒪᓐ ᓄᓇᓕᐸᐅᔭᓄᑦ ᑐᓂᓯᔭᖅᑐᖅᖢᓂ 2019-ᒥᑦ ᐱᕋᔭᒍᑎᐅᓯᒪᓂᑯᓂᒃ ᑭᖑᓪᓕᖅᐹᓂᒃ.
ᐊᕐᕌᓂ, ᑲᑎᖢᑎᒃ ᐃᑲᔪᖅᑕᐅᔪᒪᓂᕐᒧᑦ ᐅᖄᓚᔪᑦ ᐅᓄᕐᓯᕚᓪᓕᓚᐅᕐᑐᑦ 834-ᓂᒃ, ᐅᕙᙵᑦ 8,651-ᓂ ᐅᖄᓚᔪᓂᒃ ᒪᐅᖓ 9,485-ᓄᑦ 2019-ᒥᑦ. ᐅᓇ ᐅᓄᕐᓯᕚᓪᓕᕐᓂᖃᖅᑐᖅ 9.6 ᐳᓴᓐᑎᒥ.
“ᐊᕐᕌᒍᓂ ᐱᓕᕆᐊᒃᓴᐅᔪᑦ ᐅᓄᕐᓯᕚᓪᓕᓚᐅᕐᑐᑦ 3,100-ᖑᓕᖅᖢᑎᒃ, ᐃᒪᐃᓕᖓᔪᖅ 1,000 ᐱᓕᕆᐊᒃᓴᑦ ᐊᕐᕌᒍᒧᑦ, ᑕᐃᒪᓕ ᑕᒪᓐᓇ ᐅᓄᕐᓯᕚᓪᓕᕐᓂᖃᒻᒪᕆᒃᑐᖅ,” ᐅᖃᖅᑐᖅ ᐃᓕᐊᑦ.
ᐃᓄᐃᑦᑕᐅᖅ ᑎᒍᔭᐅᔪᑦ ᐸᓖᓯᑯᓐᓄᑦ ᐅᓄᕐᓯᕚᓪᓕᓚᐅᕐᒥᔪᑦ 2019-ᒥᑦ, ᒫᙵᑦ 2,925-ᒥᑦ ᐊᕐᕋᓂ ᒪᐅᖓ 3,164-ᒧᑦ. ᑕᒪᓐᓇ ᐅᓄᕐᓯᕚᓪᓕᕐᓂᖃᖅᑐᖅ 8 ᐳᓴᓐᑎᒥ.
ᑭᖑᓪᓕᖅᐹᒥᑦ ᑲᑎᒪᔨᓄᑦ ᐅᐸᒍᑎᑎᓪᓗᒍ ᓄᕕᐱᕆᐅᑉ ᓄᙳᐊᓂᒃ, ᐅᓂᒃᑲᐅᓯᖃᓚᐅᕐᓯᒪᔪᖅ ᐃᖅᑲᓇᐃᔭᖅᑎᒃᑲᓐᓂᕐᓂᒃ ᐱᓂᐊᕐᓂᕋᖅᖢᓂ ᐅᓄᕐᓯᕙᓪᓕᐊᓂᖏᓐᓄᑦ ᐃᑲᔪᖅᑕᐅᔪᒪᓂᕐᒧᑦ ᐅᖄᓚᕙᒃᑐᑦ.
ᑎᓯᐱᕆ ᐱᒋᐊᖅᑎᓪᓗᒍ, ᐃᓕᐊᑦ ᐅᖃᓚᐅᕐᑐᖅ ᐃᖅᑲᓇᐃᔭᖅᑎᑦ ᐅᓄᕐᓂᕐᓴᐅᓕᕐᓂᖏᓐᓄᑦ ᐃᒥᕐᕕᐅᕙᒃᑐᒃᑰᕈᓐᓇᕐᓂᕐᓴᐅᓕᓚᐅᕐᓂᖏᓐᓂᒃ.
ᐃᓚᒋᓪᓗᒍ “ᐃᒥᕐᕕᖕᓄᑦ ᐃᓯᕈᓐᓇᕐᓂᖅ,” ᐃᓕᐊᑦ ᐅᖃᓚᐅᕐᒥᔪᖅ ᐸᓖᓯᒃᑯᑦ ᑲᒪᒋᔭᖃᕈᓐᓇᕐᓂᕐᓴᐅᓕᕐᓂᖏᓐᓂᒃ ᐃᖃᖅᑐᐃᕕᒃᑯᑦ ᒪᓕᖁᔭᐅᓯᒪᔪᓂᒃ.
“ᐊᑎᕐᓂᒃ ᐱᓯᒪᒐᑦᑕ ᐃᖃᖅᑐᐃᕕᒃᑯᑦ ᒪᓕᒋᐊᖃᕐᓯᒪᔪᓂᒃ ᐊᒻᒪᓗ ᑎᓕᓯᕙᒃᖢᑕ—ᐊᑐᓂ ᖃᐅᔨᓴᖅᑎᓂᒃ—ᑖᑯᓂᖓ ᑕᑯᒋᐊᖅᑕᐅᑎᑦᑎᕙᒃᖢᑕ ᐊᒻᒪᓗ ᐱᓕᕆᐊᕆᔭᕆᐊᖃᖅᑕᑦᑎᓐᓄᑦ ᖃᐅᔨᒋᐊᖅᑕᐅᕙᒃᖢᑎᒃ,” ᐅᖃᖅᑐᖅ ᐃᓕᐊᑦ.
“ᐱᓕᕆᑲᑕᖕᓇᕈᓘᔭᕐᐸᑦ ᐅᖄᓚᔪᓄᑦ, ᑕᐃᒪᓕ ᐃᓯᑐᐃᓐᓇᕆᐊᖃᖃᑦᑕᖅᑐᒍᑦ ᑭᓯᐊᓂᓕ ᐱᓕᕆᓐᓇᓗᐊᙱᑉᐸᑦ ᑲᓱᒃᑐᖃᑦᑕᖅᑐᒍᑦ ᐊᒻᒪᓗ ᖃᐅᔨᓇᓱᒃᐸᒃᖢᑕ ᐃᓯᕐᓯᒪᔭᕆᐊᓕᖕᓂᒃ ᐅᕝᕙᓘᓐᓃᑦ ᐃᒥᐊᓗᒋᐊᖃᙱᑦᑐᓂᒃ.”
“ᑕᒪᓐᓇ ᑐᓴᑦᑎᐊᕐᓇᖅᑐᖅ,” ᐅᖃᖅᑐᖅ ᑲᑎᒪᔨ ᓰᓚ ᕕᓕᐅᕋᑎ.
ᒪᐃᔭ ᑭᐊᓂ ᐱᐊᓪ ᑕᒪᑐᒥᖓ ᐊᖏᖃᑕᐅᔪᖅ. “ᐅᕙᖓᑦᑕᐅᖅ ᖁᕕᐊᓱᒃᑐᖓ ᐱᒋᐊᓚᐅᕐᓂᔅᓯᓐᓂᒃ ᑎᓯᐱᕆᒥ ᐃᓄᖕᓂ ᖃᐅᔨᓇᓱᑲᑕᖕᓂᕐᒥᓐ, ᓲᖃᐃᒻᒪ ᑐᓴᒐᒃᓴᓕᐊᕆᔭᐅᔪᓂᒃ ᐸᓖᓯᓄᑦ ᐃᒪᐃᓕᖓᖃᑦᑕᕐᒪᑕ ᐸᓯᔭᒃᓴᐅᔪᖅ ᓱᕋᐃᓂᖓᓂᒃ ᐃᒥᐊᓗᒃᑕᐃᓕᓂᕐᒥᒃ ᐅᕝᕙᓘᓐᓃᑦ ᐃᓯᕐᓯᒪᓕᕆᐊᖃᕐᓂᖓᓂᒃ.”
“ᐅᐸᒍᑎᖔᕈᑦᑕ ᐱᑦᑎᐊᙱᓗᐊᓚᐅᙱᓐᓂᖏᓐᓂᒃ ᐅᕝᕙᓘᓐᓃᑦ ᐊᐃᑉᐸᖓᓂᒃ ᐱᑦᑎᐊᙱᔾᔪᑎᖃᙱᓐᓂᖏᓐᓂᒃ—ᖃᐅᔨᒪᙱᒃᑲᓗᐊᖅᑐᖓ ᖃᓄᐃᒋᐊᖃᕐᓂᖏᓐᓂᒃ—ᑕᐃᒪᓐᓇ ᐃᑲᔫᑎᐅᓇᔭᒻᒪᕆᒃᑐᖅ. ᑕᒪᓐᓇ ᐅᖃᐅᓯᕆᔪᒪᖅᑲᐅᔭᕋ ᐅᓐᓅᔪᖅ, ᐊᓕᐊᓇᐃ ᐅᖃᐅᓯᕆᒐᕕᐅᒃ.”
“ᐱᔭᒃᓴᕋ ᐅᖃᕈᓐᓇᕐᓗᖓ ᐊᔪᕐᓇᙱᑦᑕᕌᖓᑦ”
ᑭᖑᓂᐊᒍᑦ, ᑲᑎᒪᔨ ᔮᓇᑦ ᐳᕉᔅᑐ ᑲᑎᒪᔨᐅᓂᕐᒥᓄᑦ ᐅᖃᓪᓚᓚᐅᕐᑐᖅ ᐱᑦᑎᐊᖃᑦᑕᙱᓗᐊᕐᓂᐊᓗᖕᒥᑦ ᐊᕐᓇᓄᑦ.
“ᐃᓚᒋᔭᐅᓪᓗᖓ ᐊᓯᐅᓯᒪᔪᓂᒃ ᐊᒻᒪ ᐃᓄᐊᕐᑕᐅᓯᒪᔪᓂᒃ ᐊᕐᓇᓂᒃ ᐊᒻᒪᓗ ᑕᐃᒪᓐᓇ ᐊᓯᐅᔨᓯᒪᓪᓗᖓ ᐃᓅᓯᕐᒥ ᐊᒻᒪ ᐊᒃᑐᐃᓯᒪᓪᓗᓂ ᐃᓚᑦᑎᓐᓂᒃ, ᑕᐃᒪᓕ ᐅᖃᕆᐊᖃᕋᒪ ᐊᔪᕐᓇᙱᑦᑕᕌᖓᑦ,” ᐅᖃᖅᑐᖅ ᐳᕉᔅᑐ.
“ᐊᓯᐅᔨᓯᒪᓂᕋ ᐊᑦᑕᓐᓂᒃ ᓯᐊᕕᐊᒥ, ᓯᐊᕕᐊ ᐋᓐ ᓚᐃᐅᓪ ᐅᕙᓂ ᓄᓇᓕᐸᐅᔭᓂ ᐃᓱᒪᒃᑯᑦ ᒪᒥᓯᒪᔾᔪᑎᒋᙲᓐᓇᖅᑕᕋ. ᑖᔅᓱᒥᖓ ᐃᓚᒋᔭᐅᓂᕋ ᖃᐅᔨᕚᓪᓕᕈᑎᒋᓯᒪᒐᒃᑯ ᐋᓐᓂᕐᓯᕆᓂᐊᓗᖕᒥ ᐊᑐᕐᓯᒪᔭᒪ ᓱᕈᓯᐅᑎᓪᓗᖓ ᐊᕐᓇᐅᓕᕐᖢᖓᓗ ᐅᖓᑖᒍᑦ. ᐃᒃᐸᒃᓴᕐᑕᐅᖅ ᓯᐊᐱᐊᑉ ᓇᓪᓕᐅᑎᕝᕕᒋᓚᐅᖅᖢᓂᐅᒃ.”
“ᕿᒃᓵᒍᑎᖃᖅᖢᑕ ᓇᒡᓕᒋᔭᑦᑎᓐᓂᒃ ᐊᓯᐅᔨᓯᒪᓂᑦᑎᓐᓂᒃ ᐱᑦᑎᐊᙱᓗᐊᕐᓂᐊᓗᒃᑯᑦ, ᐅᕝᕙᓘᓐᓃᑦ ᐃᒃᐱᒋᓗᒋ ᓇᒡᓕᒋᔭᕗᑦ ᑕᐃᒪᓐᓇ ᐋᓐᓂᖅᑕᐅᓗᐊᖅᑐᐊᓗᐃᑦ ᑐᑭᖃᙱᓗᐊᖅᑐᒃᑯᑦ, ᑕᒪᓐᓇ ᐃᓱᒪᒧᑦ ᐅᖁᒪᐃᓕᕐᓇᕐᒪᑦ. ᐊᒃᑐᖅᑕᐅᓯᒪᑐᐃᓐᓇᙱᑦᑐᒍᑦ ᐊᓯᐅᔨᓂᕐᒥᒃ, ᐋᓐᓂᕐᓂᕐᒥᒡᓘᓐᓃᑦ, ᐊᒃᑐᖅᑕᐅᕙᒃᐳᒍᑦ ᐊᕐᓇᓄᑦ ᖃᐅᔨᒪᔭᑦᑎᓐᓄᑦ ᖃᐅᔨᒪᙱᑕᑦᑎᓐᓄᓪᓘᓐᓃᑦ, ᑕᐃᒪᐃᓯᒪᔪᒧᑦ, ᐅᕝᕙᓘᓐᓃᑦ ᑕᐃᒪᐃᑕᐅᔪᒧᑦ, ᐋᓐᓂᕐᓱᖅᑕᐅᓂᒃᑯᑦ ᐊᓯᐅᔨᓯᒪᓂᒃᑯᓪᓘᓐᓃᑦ ᐃᓅᓯᕐᒥᒃ,” ᐅᖃᖅᑐᖅ ᐳᕉᔅᑐ.
“ᑕᐃᒪᓕ ᑲᑉᐱᐊᒋᔭᕗ ᓄᖅᑲᖅᑎᓚᐅᕐᓚᕗ, ᐱᓇᓱᐊᒐᖃᒻᒪᕆᓕᕐᓗᑕ, ᐊᓯᙳᕈᑎᒃᓴᓕᕆᓗᑕ ᐊᒻᒪᓗ ᐃᑲᔪᕐᓗᑎᒍᑦ ᒐᕙᒪᕗᑦ, ᐃᓄᐃᑦ ᑲᑐᔾᔨᖃᑎᒌᖏᔭᕗᑦ ᐊᒻᒪᓗ ᑕᒪᕐᒥ ᓄᓇᓕᐸᐅᔭᓄᑦ ᑲᑎᒪᔨᐅᔪᑦ ᐅᕙᖓᓗ, ᐃᓕᓐᓂᐊᕐᕕᑦᑎᒍᑦ, ᑐᓴᒐᒃᓴᓕᐅᕐᓂᒃᑯᑦ ᐊᒻᒪᓗ ᐃᓅᓯᓕᕆᓂᕐᒨᖓᔪᑎᒍᑦ ᐊᒻᒪᓗ ᑎᒍᑎᒥᐊᖅᑎᐅᔪᓄᑦ ᐊᒃᓱᕈᕐᓗᑎᒃ ᐊᒃᑐᐃᓂᖃᕈᓐᓇᖅᑐᒥ ᑕᒪᒃᑯᐊ ᑐᑭᖃᙱᑦᑐᐊᓗᐃᑦ ᖃᓄᐃᓕᐅᕈᑎᐅᕙᒃᑐᑦ ᓄᖅᑲᖅᑎᒐᓱᒡᓗᒋᑦ. ᐋᖅᑭᒃᓯᒪᓂᕐᓴᒃᑯᑦ ᑕᒪᓐᓇ ᐱᓕᕆᐊᖑᕙᓪᓕᐊᕆᐊᖃᕐᑐᖅ.”
ᐳᕉᔅᑐ ᓄᓇᕗᑦ ᒐᕙᒪᒃᑯᓐᓄᑦ ᑎᓕᐅᕆᓚᐅᕐᑐᖅ ᐱᕋᔭᖕᓂᕐᒥᒃ ᓄᖅᑲᖅᑎᑦᑎᒍᑎᒃᓴᓂᒃ ᐱᓕᕆᐊᖃᖁᓪᓗᓂᒋᑦ.
“ᖃᓄᖅ ᐊᑯᓂᐅᑎᒋᔪᖅ ᐅᑕᕿᔭᕆᐊᖃᕐᒪᑕ ᐃᖃᓗᖕᒥᐅᑕᑦ ᐅᓗᕆᐊᓇᙱᑦᑐᒦᑦᑐᓐᓇᕐᓂᕐᒥ?” ᐊᐱᕆᔪᖅ. “ᐱᓕᕆᐊᖃᒻᒪᕆᒋᐊᖃᓕᕐᑐᑦ.”
“ᐅᓪᓗᒥ, ᓄᓇᕗᑦ ᒐᕙᒪᒃᑯᑦ ᐱᓕᕆᐊᖃᒃᑲᓐᓂᖁᕙᒃᑲ ᐆᒥᖓ ᐃᓚᒌᑦᓯᐊᕐᓂᖅ ᐱᓕᕆᔨᐅᔪᑦ ᐃᓚᒌᓄᑦ ᐱᑦᑎᐊᙱᓗᐊᕐᓂᐅᕙᒃᑐᒥᑦ, ᑕᒪᓐᓇ ᐱᓕᕆᐊᖑᐊᓂᒃᓯᒪᙱᓗᐊᕐᒪᑦ. ᐱᓕᕆᓕᖁᔨᓂᐅᔪᑦ ᐊᒻᒪ ᐊᑐᓕᖅᑎᑦᑎᖁᔨᓂᖅ ᖃᓄᐃᓕᐅᕈᑎᖁᔭᐅᔪᓂᒃ ᑐᓴᖅᑎᑦᑎᒍᑎᐅᔭᕆᐊᖃᖅᑐᑦ ᑐᓴᖅᑕᐅᔪᓐᓇᖅᑎᐊᖅᑐᓂᒃ ᓄᓇᓕᖕᓂᑦ ᐱᓕᕆᔨᓄᑦ ᐊᒻᒪ ᐅᖓᑖᓅᕐᐸᓪᓕᐊᓗᑎᒃ.”
“ᑕᒪᒃᑯᐊ ᐃᓱᒪᓕᐊᕆᔭᐅᓯᒪᔪᑦ ᐃᒻᒪᖄᓪᓘ*ᓃᑦ ᖃᓄᐃᓕᐅᕈᑎᒃᓴᑦᑎᐊᕙᐅᓂᕐᓴᐅᔪᑦ ᐱᓕᕆᐊᖑᑲᐅᑎᒋᓗᑎᒃ,” ᐅᖃᖅᑐᖅ ᐳᕌᔅᑐ.
“ᑕᒪᓐᓇ ᑕᒪᑦᑕ ᐱᓕᕆᐊᕆᕙᓪᓕᐊᓚᐅᕐᓚᕗ, ᐃᖃᓗᖕᒥᐅᑕᑦ ᐅᓗᕆᐊᓇᖅᑐᕐᒦᖁᓇᒋᑦ, ᑕᒪᓐᓇ ᐱᑦᑎᐊᖃᑦᑕᙱᓐᓂᐊᓗᒃ ᓄᖅᑲᖅᑎᓪᓗᒍ ᐊᒻᒪ ᐅᔾᔨᕈᓱᓕᖅᑎᑦᑎᒃᑲᓐᓂᕐᓂᕐᒥᒃ ᐱᔾᔪᑎᒋᔭᐅᕙᒃᑐᓂᒃ ᐊᒻᒪ ᖃᓄᐃᑕᐅᔾᔪᑎᐅᓇᔭᖅᑐᓂᒃ ᐱᑦᑎᐊᙱᓐᓂᖅ ᐊᒻᒪᓗ ᐱᓕᕆᖃᑎᒌᖕᓂᕐᒥᒃ ᐋᖅᑭᒃᓱᐃᓗᑎᒃ ᐱᑦᑎᐊᙱᑦᑕᐃᓕᑎᑦᑎᓂᕐᒧᑦ ᐊᒻᒪ ᖃᓄᐃᓕᐅᕈᑎᐅᔪᓐᓇᖅᑐᓄᑦ.”
ᐳᕉᔅᑐ ᐅᖃᐅᓯᕆᔭᖏᑦ ᐅᖃᐅᓯᕆᓚᐅᕐᒥᔭᖏᑦ ᑐᕕᑐᒃᑯᑦ (Twitter).
“ᐊᑐᖅᑕᐅᖃᑦᑕᐃᓐᓇᖅᑐᐊᓗᐃᑦ ᓄᓇᑦᑎᓐᓄᑦ ᐊᒃᑐᐃᒍᑎᐅᔪᑦ”
ᑲᑎᒪᔨ ᔪᐊᓇᓯ ᐊᑯᒪᓕᒃ ᐅᖃᓪᓚᓚᐅᕐᒥᔪᖅ ᖃᓄᐃᓕᐅᕈᑎᐅᓵᕐᓯᒪᔪᓂᒃ ᐱᓇᓱᐊᕈᓯᐅᓚᐅᕐᑐᒥᓐ.
“ᑕᒪᓐᓇᓘᓐᓃᑦ ᖃᓄᖅ ᐱᓕᕆᐊᕆᓂᐊᕆᐊᒃᓴᖅ ᓇᓗᒐᒃᑯ,” ᐅᖃᖅᑐᖅ.
“ᓄᓇᖃᑎᑦᑎᓐᓂᒃ ᐊᓯᐅᔨᓚᐅᕋᑦᑕ ᐱᓇᓱᐊᕈᓯᐅᓚᐅᕐᑐᒥᓐ ᑕᐃᓐᓇᓗ ᐃᓱᒪᒋᓪᓗᒍ ᑕᐃᒪᓐᓇ ᐊᐅᐸᖅᑐᒥ ᐊᕐᓇᖒᔾᔪᑎᒥ ᓵᑦᑎᐊᓐᓃᑦᑐᖃᖅᐳᖅ.”
ᐊᑯᒪᓕᒃ ᓄᓇᖃᖅᑐᓂᒃ ᐅᔾᔨᕈᓱᖕᓂᕐᓴᐅᖁᔨᓚᐅᕐᑐᖅ ᐊᒻᒪ ᐊᒃᓱᕈᕐᓂᕐᓴᐅᖁᔨᓪᓗᓂ.
“ᑕᒪᒃᑯᐊ ᑕᐃᒪᐃᑦᑐᐊᓘᖕᒪᑕ ᓄᓇᒋᔭᑦᑎᓐᓂᒃ. ᖃᓄᐃᒻᒪ? ᓲᖃᐃᒻᒪ ᐃᓱᒫᓘᑎᑕᖃᐅᓗᐊᓕᕐᒪᓐ, ᐱᐊ ᐊᒻᒪ ᕗᐊᐃᓐ, ᓱᐴᖅᑐᒐᐃᑦ ᐊᒻᒪ ᓄᓇᓖᑦ ᐱᕈᖅᐸᓪᓕᐊᓂᖓᓄᑦ,” ᐊᑯᒪᓕᒃ ᐅᖃᖅᑐᖅ.
“ᖁᕕᐊᓱᒃᐳᖓ ᑭᒃᑯᓕᒫᓂᒃ ᐅᓗᕆᐊᓇᙱᑦᑐᒦᑎᑦᑎᓂᕐᒧᑦ ᑲᑎᒪᔨᕋᓛᓂ ᑲᑎᒪᔾᔪᑎᒃᓴᖃᕋᑦᑕ.”
ᐅᓐᓄᙳᒃᑲᓐᓂᕐᑎᓪᓗᒍ, ᐱᐊᓪ ᐅᖃᓪᓚᓚᐅᕐᑐᖅ ᐃᒪᓐᓇ: “ᐱᒋᐊᖅᑎᑕᐅᒃᑲᓐᓂᕈᒪᕙᒃᑯ ᑭᒃᑯᓕᒫᓂᒃ ᐅᓗᕆᐊᓇᙱᑦᑐᒦᑎᑦᑎᓂᕐᒧᑦ ᑲᑎᒪᔨᕋᓛᑦ ᓄᓇᓕᐸᐅᔭᓄᑦ ᐊᐅᓚᑕᐅᕙᓚᐅᕐᑐᑦ ᐱᒋᐊᒃᑲᓐᓂᖁᓪᓗᒋᑦ, ᖃᐅᔨᒪᙱᓐᓇᒪ ᖃᖓ ᓄᖅᑲᓚᐅᕐᓯᒪᔭᕆᐊᒃᓴᖏᓐᓂᒃ ᑭᓯᐊᓂᓕ ᐱᒋᐊᒃᑲᓐᓂᖁᕙᒃᑲ.”
ᓴᐳᑦ ᐱᖁᔨᕗᖔᓕᐅᕈᑎᒋᓚᐅᕐᑕᖓ ᐊᒻᒪ ᐊᑯᒪᓕᐅᑉ ᐱᖃᑦᑎᖅᖢᓂᐅᒃ.
“ᑭᖑᓪᓕᖅᐹᖑᖅᑰᓚᐅᕐᑐᖓ ᐃᒃᓯᕙᐅᑕᐅᓪᓗᖓ ᑭᒃᑯᓕᒫᓂᒃ ᐅᓗᕆᐊᓇᙱᑦᑐᒦᑎᑦᑎᓂᕐᒧᑦ ᑲᑎᒪᔨᕋᓛᓄᑦ, ᑕᑯᔪᒪᔪᖓᓕ ᐊᒻᒪ ᕿᒥᕐᕈᐊᕐᓗᒋᑦ ᓄᑖᑦ ᖃᐅᔨᒋᐊᕐᕕᐅᔪᓐᓇᕐᑐᓂᒃ ᑖᒃᑯᓄᖓ ᑲᑎᒪᔨᕋᓛᓄᑦ,” ᐅᖃᖅᑐᖅ ᓴᐳᑦ.
“ᑲᑎᒪᔨᕋᓛᖃᕈᒪᕕᑕ ᓇᓗᓇᐃᒃᑯᑎᖃᙱᑦᑐᓂᒃ ᐱᓱᒡᕕᐅᔪᓐᓇᖅᑐᓂᒃ? ᐅᕝᕙᓘᓐᓃ ᑕᐅᑐᒍᒪᕕᑕ ᐊᑐᖅᑕᐅᖃᑦᑕᐃᓐᓇᔭᑦᑐᓂᒃ ᓄᓇᑦᑎᓐᓄᑦ ᐊᒃᑐᐃᒍᑎᐅᔪᓂ?”
ᐃᓱᒪᒋᔭᐅᓚᐅᕐᑐᕐᓕ ᐊᔾᔨᒌᙱᑦᑑᑎᓂᒃ ᐱᓕᕆᐊᖃᕐᓗᑎᒃ ᐊᑐᖅᑕᐅᖃᑦᑕᐃᓐᓇᔭᑦᑐᓂᒃ.
ᐱᖁᔨᕗᖔᕈᑎ ᐊᓂᒍᖅᑎᑕᐅᓚᐅᕐᑐᖅ ᑕᒪᐃᓐᓄᑦ, ᐋᖅᑭᒋᐊᕈᑎᖄᕐᔪᒃᖢᓂ ᖃᐅᔨᒋᐊᕐᕕᐅᔪᓐᓇᖅᑐᓂᒃ ᑖᒃᑯᐊᓗ ᕿᒥᕐᕈᐊᖅᑕᐅᒃᑲᓐᓂᕐᓂᐊᕐᓗᑎᒃ ᑲᑎᒪᔨᓄᑦ ᐊᖏᖅᑕᐅᔪᓐᓇᖅᑐᓂᒃ.
(0) Comments