ᐃᖃᓗᐃᑦ ᓄᓇᓕᐸᐅᔭᖓᓂ ᑲᑎᒪᔨᒋᔭᐅᖅ ᐃᑲᔪᖅᑐᐃᕗᖅ ᐊᕐᓇᖏᓂᒃ ᐃᓄᐃᑦ ᐃᓚᒋᔭᐅᖃᑕᐅᓕᕋᓱᐊᖁᓪᓗᒋᑦ ᑲᑎᒪᔨᓄᑦ

For an English version of this story, see Iqaluit city councillor encourages Inuit women to apply for council.

ᓰᓚ ᕕᓕᐊᕆᑎ ᐅᖃᓚᐅᕐᐳᖅ ᐃᖃᓗᐃᑦ ᓄᓇᓕᐸᐅᔭᖓᓂ ᑲᑎᒪᔨᐅᓕᕈᒫᕋᒥ ᐃᓱᒪᕙᓚᐅᖖᒋᓐᓂᕐᒥᓂᒃ, ᑭᓯᐊᓂᓕ ᒪᐃᔪᕐᒋᔭᐅᓚᐅᕐᑐᖅ ᒫᑦᓚᓐ ᕆᑦᕘᕐᓐ ᐅᖃᓪᓚᐅᓯᖃᕋᒥ ᐃᑲᔪᖅᑐᐃᓚᐅᕐᒪᑦ ᐊᕐᓇᐃᑦ ᐃᓄᐃᑦ ᑲᑎᒪᔨᓄᑦ ᐃᓚᒋᔭᐅᖃᑕᐅᓕᕐᓂᒃᓴᓐᓂᒃ, ᖁᒡᕕᐅᕈᑎᒋᓚᐅᕐᓯᒪᒐᒥᐅᒃ.

“ᐃᓱᒪᕙᓚᐅᕋᒪ ᐊᓯᓐᓄᑦ ᐱᓕᕆᐊᒃᓴᐅᓇᓱᒋᓪᓗᒍ, ᓲᕐᓗ ᐃᒪᓐᓇ, ᐊᔪᕆᓂᐊᖅᑕᕋ, ᑕᐃᒪᐃᒃᑲᓗᐊᕐᒪᑦ ᑲᑎᒪᔨᖖᒍᕋᓱᓕᓚᐅᖅᑐᖓ, ᑕᒫᓃᖃᑕᐅᓕᖅᐳᖓ,” ᕕᓕᐅᕆᑎ ᑐᓴᒐᒃᓴᓕᕆᔨᒧᑦ ᐅᖃᓚᐅᕐᐳᖅ. “ᓄᓇᓕᐸᐅᔭᒥ ᑲᑎᒪᔨᐅᖃᑕᐅᓕᖅᐳᖓ.”

ᒪᕐᕉᖕᒪᑎᒃ ᐃᓂᒋᔭᐅᓕᕈᖕᓇᖅᑑᒃ ᐃᖃᓗᐃᑦ ᓄᓇᓕᐸᐅᔭᖓᓂ ᑲᑎᒪᔨᓂ. ᓄᓇᓕᐸᐅᔭᒥ ᐃᓂᖃᓕᕋᓱᐊᕈᒪᔪᑦ ᐱᕕᒃᓴᖃᖅᑎᑕᐅᓂᐊᖅᑐᑦ ᑎᑭᓪᓗᒍ ᕕᑉᕈᐊᕆ 28-ᒧᑦ ᐅᓐᓄᒃᓴᒃᑯᑦ 4:30-ᒥ.

ᐃᓂᒋᔭᐅᓕᕈᖕᓇᖅᑐᓂᒃ ᒪᑐᐃᖅᑕᐅᓯᒪᔪᖃᓕᓚᐅᕐᐳᖅ ᑕᐃᒪ ᒪᐃᔪᕐᒧᑦ ᑐᖓᓕᕆᔭᐅᔪᖅ ᔮᓂᑦ ᐱᑦᓯᐅᓛᖅ ᐳᕉᕐᔅᑐᕐ ᓵᓚᒃᓴᐅᑎᖃᕐᒪᑦ ᐃᖃᓗᐃ-ᓯᓈ ᐃᒃᓯᕙᐅᑕᖓᓂᒃ ᓄᓇᕗᑦ ᒪᓕᒐᓕᐅᕐᑎᖏᓐᓂ ᐅᒃᑐᐱᕆᐅᑎᓪᓗᒍ, ᐊᒻᒪᓗ ᑕᐃᒪ ᑲᑎᒪᔨᐅᖃᑕᐅᔪᕕᓂᖅ ᔮᓐ ᕚᓯᑦ ᓄᖅᑲᓚᐅᖅᓯᒪᖕᒪᑦ ᐃᓅᓯᕐᒥᓄᑦ ᑐᕌᖓᔪᑦ ᐱᔾᔪᑎᒋᓪᓗᒋᑦ ᐃᓱᐊᓂ 2021.

ᐃᓄᖃᓕᖁᓪᓗᒋᑦ ᐃᓂᒋᔭᐅᓕᕈᖕᓇᖅᑐᑦ, ᑲᑎᒪᔨᐅᔪᑦ ᒪᕐᕉᖕᓂᒃ ᓂᕈᐊᒐᒃᓴᖖᒍᖅᓯᒪᔪᓐᓂᒃ ᓂᕈᐊᖅᖠᔭᕆᐊᖃᓚᐅᕐᒪᑕ ᑭᒃᑯᑦ ᐃᓇᖏᖅᑎᐅᓂᐊᕐᓗᑎᒃ ᓂᕈᐊᖅᑕᐅᓯᒪᓕᕈᖕᓇᕐᓂᖏᑕ 2019-ᒥ ᓂᕈᐊᖅᖠᓂᖃᖅᑎᑦᓯᑎᓪᓗᒋᑦ, ᐅᕝᕙᓘᓐᓃᑦ ᑭᒃᑯᑐᐃᓐᓇᓄᑦ ᑐᓴᖅᑎᑦᑎᓯᒪᓕᕐᓗᑎᒃ ᒪᕐᕉᖕᓂᒃ ᑎᓕᓯᓯᒪᓕᕈᓐᓇᕐᓂᕐᒧᑦ ᑲᑎᒪᔨᓄᑦ.

ᐳᕉᔅᑐᕐ ᐃᖅᑲᓇᐃᔭᕐᕕᒋᓕᖅᑕᒥᓄᑦ ᒪᓕᒐᓕᐅᖅᑎᓂ ᐃᓂᖃᓕᕐᒪᑦ, ᕕᓕᐊᕆᑎ ᐃᓱᒪᓕᐅᖅᓯᒪᓕᓚᐅᕐᐳᖅ ᐃᓂᖃᓕᕋᓱᐊᖅᑎᑦᓯᖔᖁᓪᓗᒋᑦ ᓂᕈᐊᖅᖠᖔᖖᒋᓪᓗᑎᒃ 2019-ᒥᑦ ᓂᕈᐊᖅᖠᓂᐅᓚᐅᖅᑐᒥᑦ.

ᑕᒪᑐᒧᖓ ᐱᔾᔪᑎᖃᓚᐅᖅᐳᑦ ᐳᕌᔅᑐᕐ ᑐᒡᓕᕆᔭᐅᓪᓗᓂ ᐊᕐᓇᐅᓪᓗᓂ ᐃᓄᒃ ᑲᑎᒪᔨᓂᑦ ᓄᖅᑲᖅᓯᒪᓕᓚᐅᕐᒪᑦ ᑕᐃᒪᖖᒐᓂᑦ 2019-ᒥ ᓂᕈᐊᖅᖠᓯᒪᓕᓚᐅᕐᓂᖏᑕ, ᐊᒻᒪᓗ ᕕᓕᐊᕆᑎ ᐅᖃᖅᓱᓂ ᐊᕐᓇᐃᑦ ᐃᓄᐃᑦ ᐱᕕᒃᓴᖃᖅᑎᑕᐅᓯᒪᖁᓪᓗᓂᒋᑦ ᐅᑎᖅᑎᑕᐅᓯᒪᓕᕐᓂᐊᕐᒪᑕ ᖃᔅᓯᐅᓂᕆᓚᐅᖅᑕᖏᓐᓄᑦ ᐊᕐᓇᐃᑦ ᑲᑎᒪᔨᓂ ᐃᓚᒋᔭᐅᖃᑕᐅᔪᓄᑦ.

“ᐊᕐᓇᖏᓂᒃ ᐃᓄᐃᑦ ᓯᕗᒻᒧᒃᐸᓪᓕᐊᔪᓂᒃ ᑕᑯᖃᑦᑕᓕᕈᒪᒐᒪ ᐃᓱᒫᓘᑎᒋᓗᐊᕈᖕᓃᕐᓗᓂᒋᑦ ᐊᑭᓕᖅᑐᒐᐅᓇᑎᒃ ᐃᑲᔪᖅᑎᐅᓕᕐᐸᖕᓂᐅᔪᑦ ᐅᕝᕙᓘᓐᓃᑦ ᓄᓇᓕᐅᔪᒥ ᐃᓚᒋᔭᐅᖃᑕᐅᔭᕆᐊᖃᕐᓂᕐᒥᖕᓄᑦ ᐱᔾᔪᖃᖅᑐᓄᑦ ᐱᔾᔪᑎᒋᓪᓗᒍ ᐃᒪᓐᓇᐃᒻᒪᑦ, ᐅᕙᓐᓄᓂᓛ, ᐊᕐᓇᐃᑦ ᐃᓄᐃᑦ ᐃᓱᒪᔾᔪᓯᕆᔭᖏᑦ ᐊᒻᒪᓗ ᐃᓅᓯᑦᑎᓐᓂ, ᐊᑐᖅᓯᒪᔭᕗᑦ, ᐃᑲᔪᕈᑎᐅᕙᒻᒪᑕ ᑐᓴᐅᒪᑦᓯᐊᖅᑑᓪᓗᑎᒃ ᓄᓇᓕᐸᐅᔭᒥ ᑲᑎᒪᔨᐅᔪᐃᑦ ᐃᓱᒪᓕᐅᕈᑎᓕᐊᕆᕙᒃᑕᖏᓐᓄᑦ,” ᐅᖃᖅᓱᓂ.

ᕕᓕᐊᕆᑎ ᐅᖃᓚᐅᕐᐳᖅ ᑲᑎᒪᔩᑦ ᕿᒥᕐᕈᓂᐊᕐᒪᑕ ᐃᓂᖃᓕᕈᒪᔾᔪᑎᓂᒃ ᑐᒃᓯᕋᐅᑎᓂᒃ ᐊᒻᒪᓗ ᓂᕈᐊᖅᖠᓕᕐᓗᑎᒃ ᑭᓇ ᑎᓕᔭᐅᓯᒪᓕᕐᓂᐊᕐᒪᖔᑦ. ᐅᖃᖅᓱᓂ ᖃᐅᔨᒪᖖᒋᓐᓇᒥ ᓂᕈᐊᖅᖠᓂᐅᔪᖅ ᑭᒃᑯᑐᐃᓐᓇᓄᑦ ᒪᑐᐃᖖᒐᑎᑕᐅᓂᐊᕐᒪᖔᓪᓘᓐᓃᑦ.

ᐃᖃᓗᒻᒥᐅᑦ ᐃᓂᖃᓕᕋᓱᐊᕈᒪᔪᑦ ᐱᓕᕆᐊᖑᔭᕆᐊᓕᖕᓂᒃ ᐱᓕᕆᓂᖃᖅᓯᒪᔭᕆᐊᖃᖅᑐᑦ, ᓲᕐᓗ ᓄᓇᓕᐸᐅᔭᒧᑦ ᐊᑭᓖᒃᓴᖃᖖᒋᓪᓗᑎᒃ ᐊᒻᒪᓗ ᑭᖑᕙᖖᒋᓪᓗᒋᑦ ᓇᖕᒥᓂᖃᕐᓂᕐᒥᓐᓄᑦ ᑖᒃᓰᓂᒃ ᐊᑭᓖᓯᒪᔫᓗᑎᒃ. ᐊᓯᐊᒍᓪᓕ, ᕕᓕᐊᕆᑎ ᐅᖃᖅᓱᓂ ᐃᓂᖃᓕᕋᓱᐊᕈᒪᔪᑦ ᓴᐱᓕᕈᑎᖃᖁᓇᒋᑦ ᐱᓇᓱᐊᕆᐊᒃᓴᒥᓐᓂᒃ ᐱᔾᔪᑎᖃᕐᓗᑎᒃ ᐱᓕᕆᓂᖃᕐᓯᒪᖖᒋᓗᐊᕋᓱᒋᒐᒥᒃ.

“ᑕᐃᒪᓕ, ᐃᖕᒥᓂᒃ ᖁᓚᕆᓂᖅ ᐊᑐᕈᖕᓃᕐᓗᒍ,” ᐅᖃᖅᓱᓂ. “ᐱᔾᔪᑎᖃᖅᑎᐅᔪᓐᓇᕐᓂᕐᒧᑦ ᑐᕌᖓᒻᒪᑕ ᐊᒻᒪᓗ ᐅᖃᐅᓯᒃᓴᕆᔭᕗᑦ ᐱᒻᒪᕆᐅᔫᕙᖕᒪᑕ. ᐊᕐᓇᐃᑦ ᐃᓄᐃᑦ ᓂᐱᖏᑦ ᐊᑐᕐᓂᖃᒻᒪᕆᖕᒪᑕ.”