ᐃᖃᓗᐃᑦ ᓄᓇᕗᒥᑦ ᒐᕙᒪᒃᑯᓐᓄ ᐱᓕᕆᐊᕆᔭᐅᖁᔭᐅᔪᓂᒃ ᐱᓕᕆᐊᖃᕐᑐᑦ ᐃᒪᖓᓂ ᐊᑐᐃᓐᓇᖃᓕᕈᒪᓂᕐᒧᑦ

ᐃᖅᑲᓇᐃᔭᕐᑎᐅᔪᑦ ᐅᖃᐅᔾᔭᐅᓯᒪᙱᑦᑐᑦ ᖃᑯᒍ ᐱᓕᕆᐊᕆᔭᐅᔪᑦ ᐱᐊᓂᒃᑕᐅᓂᐊᕆᐊᒃᓴᖏᓐᓂᒃ

ᐃᖃᓗᖕᓂ ᐃᒥᕐᑕᕐᕕᒃ. ᓄᓇᕗᒥᑦ ᒐᕙᒪᒃᑯ ᐋᖅᑭᒃᓯᓚᐅᕐᒪᑕ 8ᓂ ᐱᓕᕆᐊᕆᔭᐅᔭᕆᐊᓕᖕᓂ ᓄᓇᓕᐸᐅᔭᓄᑦ ᐅᓇ ᐃᒪᕐᒥ ᐃᒥᖅᑕᐃᓕᓂᖅ ᐱᒋᐊᖅᑕᐅᓚᐅᕐᓯᒪᔪᖅ ᐅᒃᑑᐱᕆᐅᑉ ᕿᑎᐊᓂ ᐊᑐᕈᓐᓃᕐᑎᑕᐅᓇᓱᒡᓗᓂ. (ᐊᔾᔨᖁᑎᖓ ᒥᓚᓂ ᐅᕆᑦᓵᑦ)

By ᑕᐃᕕᑦ ᕕᐊᓐ
ᓄᓇᓕᖕᓂ ᑐᓴᒐᒃᓴᓕᐅᕐᑎᐅᓂᕐᒧᑦ ᐱᓕᕆᐊᒃᓴᓄᑦ ᑐᓴᒐᒃᓴᓕᐅᕐᑎ

For an English version of this story, see Iqaluit working on GN requirements to lift water order

ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐅᓄᕈᓘᔭᕐᑐᓂᒃ ᐊᑐᖅᑕᐅᔭᕆᐊᓕᖕᓂ ᓄᓇᓕᐸᐅᔭᓄᑦ ᑐᓂᓯᓚᐅᕐᒪᑕ ᐃᖃᓗᖕᓂ ᓄᓇᖃᕐᑐᑦ ᐃᒥᕈᓐᓇᕐᓯᓂᐊᕐᒪᑕ ᐃᒪᖃᐅᑎᖏᓐᓂᒃ.

ᑕᖅᑭᐅᓕᕐᑐᖅ ᓇᑉᐸᕐᓗ ᐊᓂᒍᖤᖅᐳᖅ ᑕᐃᒪᙵ ᓄᓇᕗᒥᑦ ᒐᕙᒪᒃᑯᑦ ᐃᖃᓗᐃᑦ ᐃᒥᕐᑕᒐᖓᓂ ᐃᒥᖃᑦᑕᖁᔨᔪᓐᓃᓚᐅᕐᓯᒪᑎᓪᓗᒋ ᖃᐅᔨᔪᖃᓚᐅᕐᑎᓪᓗᒍ ᐅᕐᓱᐊᓗᖃᕐᓂᖓᓂ ᐃᖃᓗᖕᓂ ᐃᒥᖅᑕᕐᕕᐅᖃᑦᑕᕐᑐᖅ.

ᖃᓄᐃᓕᐅᕈᑎᐅᖁᔭᐅᔪᑦ ᐊᔾᔨᒌᙱᑦᑑᑎᑦ, ᖃᓄᐃᓕᐅᕈᑎᖃᐅᖅᖢᑎᒃ ᐅᓇ ᐃᒪᖅ ᐃᒥᒐᒃᓴᐅᓕᕐᑎᑕᐅᓇᓱᖕᓂᖓᓂ ᐊᒻᒪᓗ ᐃᖅᑲᓇᐃᔭᖅᑏᑦ ᓄᓇᓕᐸᐅᔭᓄᑦ ᑐᑭᓯᔭᕆᐊᖃᕐᓗᑎᒃ ᖃᓄᖅ ᐅᕐᓱᐊᓗᒃ ᐃᒥᖅᑕᕐᕕᖕᒧᐊᕐᓂᕐᒪᖔᑦ ᐊᒻᒪᓗ ᖃᓄᖅ ᐅᕐᓱᐊᓗᕈᔪᒃ ᓴᓗᒻᒪᖅᓴᖅᑕᐅᓂᐊᕆᐊᒃᓴᖓᓂᒃ.

“ᐅᓇ ᐱᒻᒪᕆᐅᓛᖅ ᐊᒃᓱᓪᓘᓐᓃᑦ ᐃᒪᖃᐅᑎᖃᕐᕕᒃ ᑯᕕᖅᑕᕈᓐᓇᕐᓯᖕᒪᑦ, ᐊᒻᒪᓗ ᐃᒪᖃᓕᖅᖢᓂ ᐃᒪᑦᑎᐊᕙᖕᒥ,” ᑎᑎᕋᓚᐅᕐᑐᖅ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᑐᓴᐅᒪᑎᑦᑎᔨᖓ ᑏᓇᕇ ᓴᒧᕕᐊᓪ ᖃᕋᓴᐅᔭᒃᑯ ᑎᑎᕋᖅᖢᓂ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ.

ᓄᓇᓕᐸᐅᔭᐃᑦ ᐃᖅᑲᓇᐃᔭᕐᑎᖏ ᓴᖅᑭᑎᑦᑎᔭᕆᐊᖃᕐᒪᑕ ᐱᖓᓱᓂᒃ ᓴᓗᒻᒪᓂᕐᒧᑦ ᖃᐅᔨᓴᕈᑎᓂᒃ, ᐅᓪᓗᕐᓂ ᐊᔾᔨᒌᙱᑦᑐᓂᒃ ᐱᔭᐅᓂᑯᓂᒃ ᐅᓇ ᐃᒪᖃᕐᕕᒃ ᐱᓕᕆᐊᖑᑎᓪᓗᒍ ᐊᒻᒪ ᐃᒪᕐᒧᑦ ᐊᖅᑯᑎᐅᕙᒃᑐᑦ, ᓴᒧᕕᐊᓪ ᐅᖃᖅᑐᖅ.

ᓄᓇᓕᐸᐅᔭᐃᑦ ᖃᐅᔨᓴᕐᑕᐅᑎᑦᑎᔭᕆᐊᖃᕐᒥᔪᖅ ᐃᒪᕐᓄᑦ ᓱᓪᓗᓕᖕᓂ ᐅᕐᓱᐊᓗᖃᕈᓐᓃᕋᓗᐊᕆᐊᒃᓴᖓᓂᒃ ᓄᓇᓕᐸᐅᔭᓄᑦ ᐱᖁᑎᒋᔭᐅᔪᓂᒃ.

ᐅᓂᒃᑳᓕᐅᖁᔭᐅᖕᒥᔪᖅ ᓴᖅᑭᑎᑦᑎᓯᒪᔪᓂ ᖃᓄᖅ ᐅᕐᓱᐊᓗᒃ ᐃᒪᖃᐅᑎᖃᕐᕕᖕᒧᐊᕆᐊᒃᓴᖓᓂᒃ, ᓇᑭᙶᕋᓗᐊᕐᒪᖔᑕ ᐱᐅᔪᓐᓃᕈᑎᐅᔪᖅ ᐊᒻᒪᓗ ᖃᓄᐃᒻᒪ ᐃᓚᖏ ᐱᐅᔪᓐᓃᓗᐊᓚᐅᙱᑦᑕᕆᐊᒃᓴᖏᓐᓂᒃ ᓇᓂᓯᕝᕕᐅᔪᒥᓪᓕ. ᐅᓇ ᐅᓂᒃᑳᓕᐊᖑᔪᑦ ᑖᒃᑯᐊ ᐊᓯᖏᓐᓄᑦ ᕿᒥᕐᕈᐊᖅᑕᐅᔭᕆᐊᖃᕐᓂᐊᕐᑐᖅ.

ᐅᕐᓱᐊᓗᕈᔪᒃ ᑲᑎᓯᒪᓗᐊᓚᐅᕐᑐᖅ ᐊᑕᐅᓯᕐᒦᓐᓂᕐᓴᐅᓪᓗᓂ ᓄᓇᐅᑉ ᐊᑖᓂ ᐃᒪᖃᐅᑎᒥ ᐃᒥᖃᕐᕕᒃᒥᑦ, ᑕᐃᔭᐅᔪᖅ ᓄᐊᑦ ᑭᓕᐅ ᐃᒪᖃᕐᕕᒃ. ᐅᒃᑑᐱᕆ 12ᒥ, ᓴᓗᒻᒪᕐᓴᐃᓚᐅᙱᑎᓪᓗᒋ, ᐱᐅᔪᓐᓃᕈᑎᐅᔪᑦ hydrocarbon ᖁᑦᑎᖕᓂᕐᓴᒻᒪᕆᐊᓘᓚᐅᕐᑐᖅ ᑲᓇᑕᒥ ᑐᑭᒧᐊᕈᑎᖏᓐᓄᑦ ᓇᓗᓇᐃᒃᑯᑎᖏᓐᓂᒃ ᐃᒥᖅᑕᐅᔪᓐᓇᕐᑐᒧ. ᓲᕐᓗ ᐃᒪᓐᓇ, ᐱᐊᓐᔩᓐ (benzene), ᖃᐅᔨᒪᔭᐅᔪᖅ ᐱᐅᔪᓐᓃᕈᑎᐅᔭᓐᓂᖓᓂᒃ (carinogen), ᐱᑕᖃᓚᐅᕐᓯᒪᖕᒪᑦ ᑕᕝᕙᓂ ᐃᒪᕐᒥ ᐱᐅᔪᓐᓃᕐᓯᒪᔪᒥ ᖃᐅᔨᓴᖅᑕᐅᑎᓪᓗᒍ ᖃᐅᔨᔭᐅᓕᓚᐅᕐᑐᖅ 600ᖏᓱᖅᖢᓂ ᖁᑦᑎᖕᓂᕐᓴᒻᒪᕆᐊᓘᓚᐅᕐᓂᖓᓂ ᐅᓗᕆᐊᓇᙱᓐᓂᕋᖅᑕᐅᔪᒥᒃ.

ᓄᓇᓕᐸᐅᔭᐃᑦ ᖃᓂᑦᑐᒥ ᖃᐅᔨᓴᕈᑎᓂᒃ ᖁᐱᕐᕈᖃᕆᐊᒃᓴᖓᓂ, ᐅᓇ ᓴᒧᕕᐊᓪ ᐅᖃᓚᐅᕐᑐᖅ ᐃᒪᕐᒥ ᖃᓛᖅᑎᑦᑎᖃᑦᑕᖁᔭᐅᑐᐃᓐᓇᕆᐊᓖᑦ.

ᓄᓇᓕᐸᐅᔭᐃᑦ ᐸᕐᓇᐅᓯᐅᕆᐊᖃᕐᒥᖕᒪᑕ ᐱᖓᓱᓂ, ᐃᓚᒋᔭᐅᓗᓂ ᖃᓄᖅ ᖃᐅᔨᓴᖃᑦᑕᕐᓂᐊᕐᒪᖔᖏᓐᓂᒃ ᐃᒪᕆᕙᒃᑕᖓᓂᒃ, ᐊᓯᐊᒎᕈᑎᐅᔪᓐᓇᖅᑐᓂᒡᓗ ᐸᕐᓇᐅᑎᓂᒃ ᐅᕐᓱᐊᓗᖕᒥ ᐃᒪᕐᒧᐊᖅᑐᖃᒃᑲᓐᓂᕐᓂᕐᐸᑦ, ᐊᒻᒪᓗ ᖃᓄᐃᓕᐅᖅᐸᓪᓕᐊᓂᖏᓐᓂᒃ ᐱᓕᕆᐊᑎᒍᑦ ᑎᑎᕋᐅᓯᖃᕐᒥᓗᑎᒃ.

ᓄᓇᓕᐸᐅᔭᐃᑦ ᐱᓕᕆᔾᔪᑎᓕᕆᔨᓂᒃ ᐅᑯᓇᙵᑦ WSP Canada ᐱᓕᕆᑎᑦᑎᓚᐅᕐᑐᑦ ᑕᒪᑐᒥᖓ ᐱᓕᕆᐊᖑᔭᕆᐊᓕᖕᒥᒃ.

ᑭᒡᒐᖅᑐᐃᔨᑦ ᐅᑯᓄᖓ WSP ᑲᑎᒪᔨᓄᑦ ᐅᓂᒃᑳᕆᐊᖅᑐᓚᐅᕐᓯᒪᔪᑦ ᓄᕕᐱᕆ 15-ᖑᑎᓪᓗᒍ, ᐅᖃᐅᓯᖃᖅᖢᑎᒃ ᖃᐅᔨᓴᕈᑎᒋᔭᖏᓐᓄᑦ ᑲᑎᑉᐸᓪᓕᐊᔭᖏᓐᓂᒃ ᐊᒻᒪᓗ ᖃᓄᖅ ᐅᕐᓱᐊᓗᒃ ᐃᒪᖃᐅᑎᒧᐊᓚᐅᕐᓂᖓᓂᒃ.

ᓇᓗᓇᓚᐅᙱᒻᒪ ᑯᕕᔪᖅ ᐃᒻᒪᑲᓪᓚᒃ ᐅᕐᓱᐊᓗᖃᐅᑎᖃᕐᕕᖕᒥᙶᓚᐅᕐᓂᖓᓂ ᑖᓐᓇᓗ ᐃᓚᒋᔭᐅᓚᐅᕐᓯᒪᓪᓗᓂ ᐃᒥᕐᑕᕐᕕᒃᓴᒥ ᓴᓇᑎᓪᓗᒋᑦ 1962-ᒥ, ᐅᖃᓚᐅᕐᑐᖅ ᐃᐊᓐ ᒧᕋᓐ ᑭᒡᒐᖅᑐᐃᓪᓗᓂ WSP-ᑯᓐᓂᒃ.

ᐅᓇ ᓄᓇᐅᑉ ᐊᑖᓂ ᐅᕐᓱᐊᓗᖃᐅᑎᖃᕐᕕᒃ ᒫᓃᒻᒪ ᐊᑯᓐᓂᖓᓂ ᐃᒪᖃᐅᑎᖃᕐᕕᐅᓪᓗ ᐊᒻᒪᓗ ᐅᔭᕋᓱᒡᔪᐃᑦ ᓴᖅᕿᔮᖅᑐᓂᒃ.

ᐅᓇ ᑭᓱᖃᙱᓐᓂᐅᔪᖅ ᐊᒃᑯᐊᙱᔾᔪᑎᒋᔭᐅᓚᐅᕐᑐᖅ ᐃᒪᖃᐅᑎᖃᕐᕕᒃᒥᓪᓗ ᓯᓚᐃᓐᓇᒥᓪᓗ. ᑕᒪᕐᒥ ᖃᐅᔨᔭᐅᔾᔪᑎᐅᓚᐅᕐᑐᖅ ᐃᒪᖃᕐᕕᖕᒧᐊᖅᐸᓪᓕᐊᓚᐅᕐᓂᖓᓄᑦ ᒪᐅᓇ ᑯᕕᕐᑕᕕᒋᔭᐅᔪᒃᑰᕐᓂᑰᒋᐊᒃᓴᖓᓂᒃ.

ᐃᒪᖃᕐᕕᖕᒧᐊᓕᕐᑎᓪᓗᒍ, ᐱᐅᔪᓐᓃᕈᑎᐅᔪᖅ ᐳᔪᙳᑐᐃᓐᓇᖅᖢᓂ ᐊᒻᒪᓗ ᐃᒪᖃᐅᑎᒧᐊᓕᖅᖢᓂ. ᑕᕝᕙᙵᓪᓕ ᑖᓐᓇ ᐱᐅᔪᓐᓃᕈᑎᐅᔪᖅ ᐃᒪᖃᐅᑎᖃᕐᕕᒃᑰᖅᖢᓂ ᐊᒻᒪᓗ ᐅᕗᙵᖅᐸᓪᓕᐊᓪᓗᓂ ᓄᐊᑦ ᑭᓕᐅ ᐃᒪᖃᕐᕕᒃᒧᑦ.

WSP ᐋᖅᑭᒃᓯᓚᐅᕐᒥᔪᑦ ᐳᔪᙳᖅᐸᓪᓕᐊᔪᓄᑦ (hydrocarbon) ᖃᐅᔨᓴᕈᑎᐅᓂᐊᕐᑐᒥ ᑕᕝᕙᓂ ᐃᒪᖃᕐᕕᒃᒥᑦ. ᐃᖃᓗᐃᑦ ᓄᓇᓕᐸᐅᔭᖓᓄᑦ ᐊᐅᓚᑦᑎᔨ ᐊᖓᔪᖅᑳᖓ ᐊᐃᒥ ᐃᐊᒍᔅᒪ ᐅᖃᓚᐅᕐᑐᖅ ᑲᑎᒪᔨᓄᑦ ᓄᕕᐱᕆ 15ᒥ ᓄᓇᓕᐸᐅᔭᐃᑦ ᓴᓇᑎᑦᑎᓚᐅᕐᓂᖏᓐᓂᒃ ᓴᓗᒻᒪᕐᓴᐃᓂᐊᖅᑐᓂᒃ ᐅᕐᓱᐊᓗᒃᒥ ᑯᕕᕝᕕᐅᓂᑯᒥᒃ ᑖᓐᓇ ᐱᒋᐊᕐᕕᒋᔭᐅᓇᓱᒋᔭᐅᓪᓗᓂ.

ᐅᖃᓚᐅᕐᑐᖅ ᓄᓇᓕᐸᐅᔭᐃᑦ ᖃᐅᔨᒪᙱᓐᓂᕋᖅᖢᓂᒋᑦ ᖃᑯᒍ ᐱᓕᕆᓂᐅᔪᖅ ᐱᐊᓂᒃᑕᐅᓂᐊᕆᐊᒃᓴᖓᓂᒃ.

ᓴᒧᕕᐊᓪ ᐅᖃᓚᐅᕐᑐᖅ ᓄᓇᕗᒥᑦ ᒐᕙᒪᒃᑯᑦ ᐱᓕᕆᐊᖃᕐᓂᖏᓐᓂᒃ ᖃᐅᔨᓴᕈᑎᓄᑦ ᖃᐅᔨᔾᔪᑎᐅᓇᓱᒃᑐᓂᒃ ᐅᑯᐊ ᓄᓇᕗᒥᑦ ᒐᕙᒪᒃᑯ ᑲᑎᓚᐅᖅᑕᖏᓐᓂᒃ ᓄᓇᓖᑦ ᐃᒪᖃᕐᕕᖓᓂᒃ, ᐊᒻᒪᓗ ᖃᐅᔨᔭᐅᔾᔪᑎᐅᔪᑦ ᑭᒃᑯᓕᒫᓄᑦ ᐅᖃᐅᓯᐅᓛᖅᖢᑎᒃ ᐱᐊᓂᒃᑕᐅᑐᐊᖅᐸᑕ. ᐅᖃᓚᐅᙱᑦᑐᑦ ᖃᓄᒍ ᑕᒪᓐᓇ ᑕᐃᒪᐃᓛᕆᐊᒃᓴᖓᓂᒃ.

Share This Story

(0) Comments

Join the Conversation

Your email address will not be published. Required fields are marked *

*