ᐃᖃᓗᐃᑦ ᕿᒧᒃᓯᖅᑎᑦ ᑎᒥᖁᑎᖓᑦ ᓴᖅᑮᕗᑦ ᐃᓱᒫᓗᒍᑎᖃᕐᕕᒋᔭᒥᓐᓂᒃ ᐆᒃᑐᕋᐅᑎᓕᐊᖑᓯᒪᓪᓗᑎᒃ ᒪᓕᒐᕋᓛᖑᓕᕋᔭᖅᑐᒧᑦ

ᐃᓱᒪᓕᐅᕈᑎᐅᓯᒪᔪᑦ ᐊᓯᔾᔩᓯᒪᓕᖁᔨᓂᕐᒧᑦ ᐊᒃᑐᐃᓯᒪᓕᕈᓐᓇᖅᑐᑦ ᑭᒃᑯᑦ ᐃᓚᒋᔭᐅᖃᑕᐅᔪᓐᓇᕐᓂᖏᓐᓄᑦ, ᐊᒻᒪᓗ ᐊᑭᓖᔭᕆᐊᖃᖅᑎᑦᑎᓯᒪᓕᕐᓗᑎᒃ ᕿᒻᒥᓂᒃ ᓇᖕᒥᓂᖃᖅᑐᑦ ᕿᓗᒃᐸᓗᓗᐊᖅᐸᒃᑐᓂᒃ

ᐋᒻᐳᕐ ᐊᒡᓘᒃᑲᖅ ᓇᑦᑎᐅᑉ ᓂᕿᖏᓂᒃ ᓂᕆᑎᑦᓯᑎᓪᓗᒍ ᕿᒻᒥᓄᑦ ᕿᒧᒃᓯᕈᑎᓄᑦ ᐃᑲᔪᖅᐸᒃᑕᒥᓄᑦ ᐃᖃᓗᖕᓂ (ᐊᔾᔨᓕᐅᖅᑕᖓ ᐃᒻᒪ ᑐᕌᓐᑐᕐ)

By ᐃᒻᒪ ᑐᕌᓐᑐᕐ

For English version, see Iqaluit dog team society raises concerns over draft bylaw

ᐋᒻᐳᕐ ᐊᒡᓘᒃᑲᖅ ᓂᒃᓯᒃᓱᓂ ᓇᑦᑎᐅᑉ ᓂᕿᖓᓂᒃ ᑐᖑᔪᖅᑕᐅᓪᓗᓂ ᐴᖓᓃᑦᑐᒥᑦ ᐊᒻᒪ ᖁᒻᒧᒃᓯᒪᑎᑦᓱᓂᐅᒃ ᓂᓯᒃᓯᒪᔭᓂ. ᖃᓂᒋᔭᖓᓂ, ᕿᒻᒥᖅ ᕿᒧᒃᓯᕈᑎᐅᕙᒃᑐᖅ ᐅᑕᖅᑭᐅᑦᑎᐊᕋᓱᒃᑎᓪᓗᒍ ᒪᓂᖅᑲᒧᑦ ᑲᑕᒃᑎᑦᓯᓂᒃᓴᖓᓂᒃ, ᓂᕆᓕᕐᓂᐊᖅᑕᒥᓂᒃ.

ᐊᒡᓘᒃᑲᖅ ᓂᒃᓯᒃᑲᓐᓂᖅᐸᒃᓱᓂ ᐴᕆᔭᐅᔪᒥᑦ, ᕿᒧᒃᓯᕐᓂᐅᑎᓂᒃ ᕿᒻᒥᓂᒃ ᓂᕆᑎᑦᓯᕗᖅ ᐃᑲᔪᕐᓂᖃᕐᕕᒋᕙᒃᑕᒥᓄᑦ ᐃᖃᓗᖕᓂ.

“ᖁᕕᐊᓱᓪᓚᕆᒃᐸᒃᑐᑦ ᓇᑦᑎᕕᓂᖅᑐᓕᕌᖓᒥᒃ,” ᐅᖃᖅᓱᓂ, ᓂᒃᓯᒃᑲᓐᓂᕋ ᓇᑦᑎᐅᑉ ᓂᕿᖓᓂᒃ.

ᐊᒡᓘᒃᑲᖅ ᐊᖏᔪᖅᑳᕆᔭᐅᕗᖅ ᐃᖃᓗᐃᑦ ᕿᒧᒃᓯᖅᑏᑦ ᑲᑎᒪᔨᖏᓐᓂ, ᑎᒥᒋᔭᐅᔪᒥᑦ ᐱᔾᔪᑎᖃᖅᑎᒋᔭᐅᓪᓗᑎᒃ ᕿᒧᒃᓯᕈᑎᓂᒃ ᕿᒻᒥᖃᖅᑎᓂᑦ ᑕᐃᑲᓂ. ᐊᑯᓂᐊᓗᒃᓗ ᓇᖕᒥᓂᖅ ᕿᒧᒃᓯᖃᑦᑕᖅᓯᒪᓕᖅᑑᓪᓗᓂ.

“ᑎᒥᒋᔭᐅᓪᓗᑕ ᑐᕌᕐᕕᒃᓴᖃᕋᑦᑕ ᐆᒻᒪᖅᑎᑦᑎᓯᒪᓕᒃᑲᓐᓂᕆᐊᒥᒃ ᐃᓄᐃᑦ ᕿᒥᒃᓯᕈᑎᒥᓐᓂᒃ ᕿᒻᒥᖃᖅᐸᓐᓂᖏᓂᒃ, ᐊᒻᒪᓗ ᒪᒃᑯᒃᑐᐃᑦ ᐃᓐᓇᕈᓵᖅᑐᓪᓗ ᕿᒧᒃᓯᕈᑎᒃᓴᒥᓐᓂᒃ ᕿᒻᒥᖃᓕᕈᒪᔪᑦ ᐃᓕᓐᓂᐊᖅᑎᑕᐅᓯᒪᓕᖁᓪᓗᒋᑦ ᐊᒻᒪᓗ ᐃᑲᔪᖅᑎᐅᖃᑦᑕᓕᕈᒪᔪᑦ, ᐅᖃᖅᓱᓂ.

ᑕᒪᒃᑯᐊ ᐱᓕᕆᐊᖑᓯᒪᓕᕆᐊᖅᑎᑦᓱᓂᒋᑦ, ᐱᓕᕆᖃᑎᒋᕙᒃᑕᖏᑦ ᐊᒻᒪᓗ ᐃᑲᔪᖅᑐᐃᕙᒃᓱᓂ ᒪᒃᑯᒃᑐᓂᒃ, ᓲᕐᓗ 10-ᓂᒃ ᐅᑭᐅᖃᖅᑐᒥᒃ ᐃᕐᓂᕐᒥᓂᒃ, ᕿᒧᒃᓯᕈᑎᓂᒃ ᕿᒻᒥᓂᒃ ᕿᒧᒃᓯᖅᑎᑦᑎᕙᓐᓂᕐᒥᒍᑦ.

ᑭᓯᐊᓂᓗ ᐆᒃᑐᕋᐅᑎᓕᐊᖑᓯᒪᓪᓗᓂ ᒪᓕᒐᕋᓛᖖᒍᖅᑎᑦᓱᒪᔭᖓᑦ ᐃᖃᓗᐃᑦ ᓄᓇᓕᐸᐅᔭᖓᑦᑕ ᑕᒪᑐᒥᖓ ᐊᓯᔾᔩᓯᒪᓕᖅᑎᑦᑎᔪᓐᓇᕐᒪᑦ. ᓈᒻᒪᒋᔭᐅᓯᒪᓕᕋᔭᖅᐸᑦ, ᐃᓚᖓ ᐊᕕᒃᑐᖅᓯᒪᓂᖏᓂᑦ ᐅᖃᖅᑕᐅᓯᒪᔪᑎᒍᑦ ᓄᖅᑲᖅᑎᑦᑎᓯᒪᓕᕋᔭᕐᒪᑕ ᑭᓇᑐᐃᓐᓇᒥᒃ ᑐᖔᓂ 18 ᐅᑭᐅᖃᖅᑐᑉ ᐃᖏᕐᕋᔾᔪᑎᖃᕈᓐᓇᖅᑎᑕᐅᕙᓐᓂᖓᓂᒃ ᕿᒧᒃᓯᒃᑯᑦ ᐃᓐᓇᕐᒥᒃ ᐃᑭᒪᔪᖃᖖᒋᑉᐸᑦ.

“ᒪᒃᑯᒃᑐᖃᕋᑦᑕ ᐅᑭᐅᓕᖕᓂᒃ 16-ᓂᒃ ᕿᒧᒃᓯᖃᑎᖃᖅᐸᒃᑐᓂᒃ ᐱᖃᑎᐊᓗᒋᔭᒥᓐᓂᒃ,” ᐊᒡᓘᒃᑲᖅ ᐅᖃᖅᓱᓂ.

“ᐊᒃᓱᕈᕈᑎᒋᔭᐅᓕᖅᓯᒪᔪᖅ ᐃᓚᖓᒍᑦ ᑕᒪᓐᓇ ᒪᒃᑯᒃᑐᕆᔭᑦᑎᓐᓂᑦ. ᐊᔪᓕᖅᑎᑕᐅᓯᒪᓂᕐᒥᓐᓂᒃ ᐃᒃᐱᒍᓱᓕᕐᓂᐊᕐᒪᑕ. ᑕᐃᒫᒃ ᐃᓕᑉᐸᓪᓕᐊᔾᔪᑎᒋᔭᒥᓐᓂᑦ ᐃᓕᑉᐸᓪᓕᐊᒋᐊᕈᓐᓇᕐᓂᑎᒃ ᑭᒡᓕᖃᓕᖅᑎᑕᐅᓯᓕᕐᓂᖏᓂᒃ ᐃᒃᐱᒍᓱᓕᖁᖖᒋᑕᕗᑦ ᐊᒻᒪ ᐊᔪᖖᒋᓐᓂᕆᓕᕈᓐᓇᖅᑕᒥᓐᓂᒃ.”

ᓄᓇᓕᐸᐅᔭᒃᑯᑦ ᑐᓂᐅᖅᑲᐃᓯᒪᓕᕐᒪᑕ ᐆᒃᑐᕋᐅᑎᓕᐊᕆᓯᒪᓪᓗᒋᑦ ᒪᓕᒐᕋᓛᖁᑎᐅᓕᖁᔭᒥᓐᓂᒃ, ᑕᐃᔭᐅᓪᓗᓂ ᑲᓇᑕᒥᐅᑦ ᐃᓄᐃᑦ ᕿᒧᒃᓯᖅᐸᓐᓂᖏᓐᓄᑦ ᒪᓕᒐᕋᓛᓂᒃ, ᕿᒧᒃᓯᕈᑎᒋᕙᒃᓱᒋᑦ ᕿᒻᒥᖃᖅᑐᓄᑦ ᐃᖃᓗᓐᓂ ᔫᓂᐅᑎᓪᒍ. ᓱᓕ ᓴᖅᑭᑕᐅᓯᒪᖖᒋᑦᑐᑦ ᓄᓇᓕᐸᐅᔭᒥ ᑲᑎᒪᔨᐅᔪᓄᑦ.

ᖃᕆᑕᐅᔭᑎᒍᑦ ᑎᑎᕋᕋᒥ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ, ᓄᓇᓕᐅᔪᒥ ᐱᕙᓪᓕᐊᔪᓕᕆᔨᐅᔪᖅ ᔨᐳᕆ ᐴᕐᓐ ᐅᖃᓚᐅᕐᑐᖅ ᓄᓇᓕᐸᐅᔭᒃᑯᑦ ᐆᒃᑐᕋᐅᑎᓕᐊᕆᓯᒪᓪᓗᒍ ᒪᓕᒐᕋᓛᖁᑎᒃᓴᓄᑦ ᐅᖃᐅᓯᒃᓴᖃᖖᒋᒻᒪᑕ ᐱᔾᔪᑎᒋᓪᓗᒍ ᓱᓕ ᐋᖅᑭᒃᓱᐊᖑᕙᓪᓕᐊᓂᖓᑕ.

“ᐱᓕᕆᖃᑕᐅᓕᖅᑎᑦᑎᓯᒪᔪᒍᑦ ᕿᒧᒃᓯᖅᑎᐅᕙᒃᑐᓂᒃ ᐃᖃᓗᓐᓂ ᐅᖃᐅᓯᒃᓴᖏᓂᒃ ᑐᓴᕐᕕᒋᓯᒪᓕᕆᐊᖅᓱᑎᒍ, ᑕᐃᒪᓗ ᕿᒥᕐᕈᔭᐅᓯᒪᓕᕐᓂᐊᕆᓪᓗᑎᒃ ᑭᒃᑯᑐᐃᓐᓇᐃᑦ ᖃᓄᐃᖖᒋᓯᐊᖅᑎᑕᐅᒋᐊᖃᕐᓂᖏᓄᑦ ᑲᑎᒪᔨᕋᓛᓂᑦ ᑐᓂᔭᐅᓚᐅᖅᑳᖅᑎᓐᓇᒋᑦ ᑎᑎᕋᖅᑕᐅᓯᒪᓕᖅᑐᑦ ᓄᓇᓕᐸᐅᔭᒥ ᑲᑎᒪᔨᐅᔪᓄᑦ ᓯᕗᓪᓕᖅᐹᒥᒃ ᐅᖃᓕᒫᖅᑕᐅᓂᐊᕐᓗᑎᒃ. ᑭᖑᓂᐊᓂ ᐅᖃᓪᓚᐅᓯᕆᒃᑲᓐᓂᕈᒫᕆᓪᓗᑎᒍ ᐃᓱᒪᓕᐅᕈᑎᓯᒪᓪᓗᑎᒃ ᒪᓕᒐᕋᓛᖖᒍᖁᔭᐅᔪᑦ,” ᐴᕐᓐ ᑎᑎᕋᖅᓱᓂ.

ᓄᓇᓕᐸᐅᔭᒥ ᒫᓐᓇᐅᔪᖅ ᕿᒻᒥᓄᑦ ᕿᒧᒃᓯᕐᓂᐅᑎᓄᑦ ᒪᓕᒐᕋᓛᖁᑏᑦ ᐊᑐᓕᖅᑎᑕᐅᓯᒪᓕᖅᐳᑦ ᑕᐃᒪᖖᒐᓂᑦ 2001-ᒥᑦ.

ᐊᒡᓘᒃᑲᖅ ᐅᖃᓚᐅᕐᑐᖅ ᐱᓕᕆᖃᑎᒋᒐᒥᒋᑦ ᑎᒥᖁᑎᒋᔭᐅᔪᑦ ᑲᑎᖅᓱᖅᑕᐅᓯᒪᓕᕆᐊᕐᓂᖏᓂ ᐃᓱᒫᓗᒍᑎᖃᕐᕕᐅᔪᑦ ᐊᒻᒪᓗ ᐅᖃᐅᓯᒃᓴᕆᔭᐅᔪᑦ ᐃᖃᓗᓐᓂ ᕿᒧᒃᓯᕈᑎᒋᕙᒃᓱᒋᑦ ᕿᒻᒥᖃᖅᑐᓄᑦ.

“ᓈᒻᒪᑦᓯᐊᖅᑐᓂᒃ ᐅᖃᐅᓯᒃᓴᕆᔭᐅᔪᓂᒃ ᑐᓂᓯᕝᕕᒋᓯᒪᓕᕈᒪᒐᑦᑎᒍ, ᑭᓯᐊᓂᓗᑦᑕᐅᖅ ᐅᔾᔨᕈᓱᓕᖅᑎᑦᓱᒪᒻᒥᔭᕗᑦ ᑖᒃᑯᐊ ᒪᓕᒐᕋᓛᖖᒍᖁᔭᐅᔪᑦ ᓈᒻᒪᑦᓯᐊᖖᒋᓐᓂᖏᑕ ᑎᒥᖁᑎᒋᔭᑦᑕ ᐱᔾᔪᑎᒋᔭᖏᓐᓄᑦ,” ᐅᖃᖅᓱᓂ.

“ᓂᕆᐅᖕᓂᖃᕐᕕᒋᔭᕗᑦ ᐊᒻᒪᓗ ᖁᓚᕆᖖᒋᑦᓱᑎᒍ ᐱᓕᕆᖃᑎᒋᓗᑎᒍ ᓄᓇᓕᐸᐅᔭᒃᑯᑦ ᒪᓕᑦᓯᐊᓕᖅᑎᑦᓱᓐᓇᕋᑦᑎᒍ ᑐᕌᕐᕕᒋᓇᓱᐊᖅᑕᑦᑎᓐᓂᒃ ᐊᒻᒪᓗ ᓄᓇᓕᐸᐅᔭᒥ ᒪᓕᒐᕋᓛᖁᑎᓂᒃ.”

ᐆᒃᑐᕋᐅᑎᓕᐊᖑᓯᒪᓪᓗᑎᒃ ᒪᓕᒐᕋᓛᑦ ᐅᖃᖅᓯᒪᓂᖃᕐᒥᔪᑦ ᕿᒧᒃᓯᕈᑎᒋᕙᒃᓱᒋᑦ ᕿᒻᒥᖃᖅᑐᑦ ᐊᑭᓖᔭᕆᐊᖃᖅᑎᑕᐅᕙᒍᓐᓇᕐᒪᑕ ᕿᒻᒥᖏᑦ ᕿᓗᒃᐸᓗᓗᐊᖃᑦᑕᕐᓂᖅᐸᑕ.

ᐱᔾᔪᑎᒋᓪᓗᒍ ᐊᒥᓲᓂᖅᓴᐅᓪᓗᑎᒃ ᕿᒧᒃᓯᕈᑎᐅᕙᒃᑐᑦ ᕿᒻᒥᖏᑦ ᐃᐱᖅᓯᒪᑎᑕᐅᓂᖏᑕ ᐅᐊᖕᓇᖓ 40-ᖓᓂ ᓄᓇᓕᐸᐅᔭᒥ, ᐊᒡᓘᒃᑲᖅ ᐅᖃᓚᐅᕐᑐᖅ ᕿᒻᒦᑦ ᐊᖏᕐᕋᕆᔭᐅᔪᓂᑦ ᐃᒡᓗᕐᔪᐊᓂᑦ ᐅᖓᓯᒃᑎᑕᐅᓯᒪᒐᔪᖕᓂᖅᓴᐅᓂᖏᑕ.

“ᖃᐅᔨᒪᓇᕐᒪᑦ, ᕿᒻᒦᑦ ᕿᓗᒃᐸᓗᒃᑲᐅᓂᖏᑕ. ᑕᒪᒃᑯᐊ ᕿᒧᒃᓯᕈᑎᒋᔭᐅᕙᒃᓱᑎᒃ ᕿᒻᒥᕆᔭᐅᒻᒪᑕ, ᐃᓕᑉᐸᓪᓕᐊᑎᑕᐅᓯᒪᔫᕙᖕᒪᑕ ᐊᒻᒪᓗ ᐊᐅᓚᑕᐅᕝᕕᖏᑕ ᐃᓗᐊᓃᑎᑕᐅᕙᒃᓱᑎᒃ,” ᐅᖃᖅᓱᓂ.

ᐊᒡᓘᒃᑲᖅ ᐅᖃᓚᐅᕐᑐᖅ ᓇᖕᒥᓂᖅ ᐊᒻᒪᓗ ᑲᑐᔾᔨᖃᑎᒌᒃᑯᑦ ᐃᓚᖓᒍᑦ ᓯᕗᓪᓕᕐᒥᒃ ᐃᓱᒫᓗᒍᑎᖃᕋᓗᐊᖅᑎᓪᓗᒋᑦ ᐆᒃᑐᕋᐅᑎᓕᐊᖑᓯᒪᓪᓗᑎᒃ ᒪᓕᒐᕋᓛᖖᒍᖅᑎᑕᐅᔪᒪᔪᓄᑦ, ᓂᕆᐅᖕᓂᖃᕋᒥ ᓄᓇᓕᐸᐅᔭᒃᑯᑦ ᐊᒻᒪᓗ ᕿᒧᒃᓯᖅᑏᑦ ᑲᑐᔾᔨᓗᑎᒃ ᐆᒃᑐᕋᐅᑎᓕᐅᕈᓐᓇᕐᒪᑕ ᑭᖑᓪᓕᕐᒥᒃ ᒪᓕᒐᕋᓛᖑᓕᕋᔭᖅᑐᓂᒃ ᓈᒻᒪᒋᔭᐅᓯᒪᓕᕈᓐᓇᖅᑐᓂᑦ ᑕᒪᐃᓐᓂᑦ.

“ᕿᒧᒃᓯᕈᑎᒋᕙᒃᓱᑎᒍ ᕿᒻᒥᖃᖅᑎᐅᓪᓗᑕ, ᓇᓗᓇᖖᒋᒻᒪᑦ ᑭᐅᔪᓐᓇᕆᐊᖃᕈᑎᒍᒐᑦᑎᒍ … ᐱᓕᕆᓂᖃᕈᒪᑦᓯᐊᖅᑐᒍ ᑕᒪᒃᑯᐊ ᐃᓅᖃᑎᒌᒃᑐᓕᒫᓄᑦ ᓈᒻᒪᒋᔭᐅᑦᓯᐊᖅᓯᒪᖁᓪᓗᑎᒍ,” ᐅᖃᖅᓱᓂ.

ᐊᒡᓘᒃᑲᖅ ᐅᖃᓚᐅᕐᑐᖅ ᓇᖕᒥᓂᖅ ᐊᒻᒪᓗ ᐊᒥᓲᖖᒋᒃᑲᓗᐊᖅᓱᑎᒃ ᐊᓯᖏᑦᑕᐅᖅ ᑎᒥᖁᑎᐅᔪᒥᑦ ᐸᕐᓇᒃᓯᒪᖕᒪᑕ ᓯᕗᓂᕐᒥ ᐱᓇᓱᐊᕈᓯᐅᓂᐊᖅᑐᑦ ᐊᑐᖅᑎᓪᓗᒋᑦ ᑲᑎᖖᒐᖃᑎᖃᕆᐊᒥᓐᓄᑦ ᓄᓇᓕᐸᐅᔭᒃᑯᓐᓂ.

“ᖃᐅᔨᒪᓇᑦᓯᐊᕐᒪᑦ ᐆᒃᑐᕋᐅᑎᓕᐊᖑᓯᒪᓪᓗᑎᒃ ᑎᑎᕋᖅᑕᐅᓯᒪᔪᑦ ᐋᖅᑭᒋᐊᖅᑕᐅᔭᕆᐊᖃᕐᓂᖏᑕ ᐊᒻᒪᓗ ᑐᕌᕐᕕᒃᓴᖁᑎᒋᔭᕗᑦ ᓇᓗᓇᐃᖅᓯᓯᒪᑦᓯᐊᕐᓂᖏᑕ,” ᐅᖃᖅᓱᓂ.

“ᐅᖃᐅᓯᒃᓴᑦᑎᓐᓂᒃ ᑕᕝᕘᓇ ᓴᖅᑮᕝᕕᒃᓴᖃᕋᑦᑕ. ᑕᕝᕗᖓᖅᐸᒃᑲᑦᑕ, ᐊᒻᒪᓗ ᓴᖖᒋᓂᖃᑦᓯᐊᖏᓐᓇᕈᓐᓇᕋᑦᑕ ᓄᓇᖅᑲᑎᒌᒃᑐᑎᒍᑦ ᓄᓇᓕᐸᐅᔭᒃᑯᓐᓂᑦ ᐃᑲᔪᖅᓱᒐᐅᓯᒪᓕᕈᒪᓪᓗᑕ ᐊᒻᒪᓗ ᑲᔪᓰᓐᓇᖅᑎᑦᑎᔪᓐᓇᕈᒪᓪᓗᑕ ᐱᓕᕆᓂᕆᔭᑦᑎᓐᓂᒃ ᖁᕕᐊᒋᑦᓯᐊᖅᓱᑎᒍ.”

Share This Story

(0) Comments

Join the Conversation

Your email address will not be published. Required fields are marked *

*