ᐃᖃᓗᒃᑐᑦᑎᐊᕐᒥᐅᑕᖅ ᐊᕐᓇᖅ ᖁᕕᐊᓲᑎᒋᔭᐅᕗᖅ ᐃᓄᐃᑦ ᐃᓕᖅᑯᓯᖓᓂᒃ ᓴᖅᑭᑎᑦᑎᒃᑲᓐᓂᕐᓂᖓᓂᒃ
ᔫᓕᐊ ᐅᒋᓇ ᑐᓂᔭᐅᓂᐊᕐᑐᖅ ᒐᕙᓇ ᔭᓄᕈᒧᑦ ᐆᒥᖓ ᐃᓕᓴᕆᔭᐅᔾᔪᑎᒥ Meritorious Service Decoration
ᔫᓕᐊ ᐅᒋᓇ ᐱᑐᐃᓐᓇᕆᐊᖃᓕᕐᓯᒪᔪᖅ ᒐᕙᓇ ᔭᓄᕈᒧᑦ ᐃᓕᓴᕆᔭᐅᔾᔪᑎᒥᑦ ᐃᒪᐃᑦᑐᒥᒃ Meritorious Service Decoration. ᐅᕙᓂ ᓴᖅᑭᔮᕐᑐᖅ ᒧᒥᕐᖢᓂ 2019-ᒥ ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᑦ ᓂᕆᕕᔨᔪᐊᖅᑎᑦᑎᑎᓪᓗᒋ ᐃᖃᓗᒃᑑᑦᑎᐊᓂᒃ. (ᐊᔾᔨᓕᐅᕆᔨ ᔭᐃᓐ ᔪᐊᔾ)
For an English version of this story, see Cambridge Bay woman honoured for work revitalizing Inuit culture
ᐃᖃᓗᒃᑑᑦᑎᐊᕐᒥᐅᑕᖅ ᐊᕐᓇᖅ ᐃᓄᐃᑦ ᐃᓕᖅᑯᓯᖓᓂᒃ ᐊᒻᒪ ᐅᖃᐅᓯᖓᓂᒃ ᐱᓕᕆᐊᖃᕐᑐᖅ ᐃᓄᐃᑦ ᐃᓕᖅᑯᓯᓯᖓᓂᒃ ᐊᒻᒪ ᐅᖃᓪᓚᐅᓯᖏᓐᓂᒃ ᒪᐅᓇ ᕿᓚᐅᔾᔭᖃᑦᑕᕐᓂᒃᑯᑦ ᐸᕐᓇᓯᔪᖅ ᑲᓇᑕᒥ ᐃᓕᓴᕆᔭᐅᔾᔪᑎᒃᓴᒧᑦ.
ᐅᓇ ᑎᑎᕋᕐᕕᒃ ᑎᑎᕋᖅᑎᒧᑦ ᒐᕙᓇ ᔭᓄᕈᒧᑦ ᑐᓴᖅᑎᑦᑎᓚᐅᕐᑐᑦ ᕕᕝᕗᐊᕆ 25-ᒥ ᐅᓇ ᔫᓕᐊ ᐅᒋᓇ ᑐᓂᔭᐅᓂᐊᕐᓂᖓᓂᒃ ᐆᒥᖓ Meritorious Service Decoration ᐱᓕᕆᐊᖃᕐᓯᒪᓂᖓᓄᑦ “ᓯᕗᓕᐅᕐᑎᐅᓪᓗᓂ ᓴᐳᔾᔨᓯᒪᓂᕐᒥᒃ, ᓴᖅᑭᑎᑦᑎᒃᑲᓐᓂᕐᓂᕐᒥᒃ ᐊᒻᒪ ᐱᕚᓪᓕᖅᑎᑦᑎᓂᕐᒥᒃ ᐃᓄᐃᑦ ᐃᓕᖅᑯᓯᖓᓂᒃ, ᐊᑐᖃᑦᑕᐃᓐᓇᐅᔭᖅᑕᖏᓐᓂᒃ ᐊᒻᒪ ᐅᖃᐅᓯᕐᒥᒃ.”
ᐅᒋᓇ ᐃᑲᔪᕐᓯᒪᔪᖅ ᐱᓇᓱᐊᕈᓯᑕᒫᓐ ᕿᓚᐅᔾᔭᕆᐅᕐᓴᖅᑎᑦᑎᕙᒃᖢᓂ ᐃᖃᓗᒃᑑᑦᑎᐊᕐᒥᑦ, ᒪᑐᐃᓐᓇᓪᓗᓂ ᑭᓇᑐᐃᓐᓇᕐᒧᑦ ᓄᓇᖃᖅᑐᓄᑦ ᖃᔅᓯᓂ ᐅᑭᐅᖃᕋᓗᐊᕐᐸᑦ. ᓴᖅᑭᑎᑦᑎᓯᒪᖕᒥᔪᖅ ᐃᓄᖕᓂ ᖃᓄᖅ ᓴᓇᔪᓐᓇᕐᓂᕐᒥᒃ ᐃᓄᒃᓯᐅᑎᓂᒃ ᐊᓐᓄᕌᓂᒃ, ᒪᑯᑎᑐᓇᖅ ᑲᒥᖕᓂ ᐊᑐᖅᑕᐅᕙᒃᑐᓂᒃ ᕿᓚᔾᔭᖅᑎᓄᑦ.
ᐅᖃᓚᐅᕐᑐᖅ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ ᖁᕕᐊᓱᒻᒪᕆᖕᓂᕋᖅᖢᓂ ᐃᓕᓴᕆᔭᐅᔾᔪᑎᑖᕐᓂᐊᕐᓂᖓᓂᒃ.
“ᖁᕕᐊᓇᕐᑐᒥ ᐱᒋᐊᕐᑐᖃᓯᕗᖅ ᑕᒪᒃᑯᐊ ᓱᕈᓰᑦ ᐃᓚᒌᓪᓗ ᐃᖏᑲᑕᓕᕐᒪᑕ ᐊᖏᕐᕋᖏᓐᓂᒃ, ᐊᔪᕈᓐᓃᕐᓴᖅᐸᒃᖢᑎᒃ ᐃᓕᓐᓂᐊᕐᐸᓪᓕᐊᔭᖏᓐᓂᒃ ᐱᓇᓱᐊᕈᓯᕐᒥ,” ᐅᒋᓇ ᐅᖃᕐᑐᖅ.
ᐅᒋᓇ ᐅᖃᓚᐅᕐᑐᖅ ᑭᖑᓪᓕᕐᓕ ᐱᔭᐅᓯᒪᔭᕆᐊᖃᕐᓂᐊᖅᑐᖅ ᐃᓕᓴᐃᔨᓄᑦ “ᑲᔪᓯᔪᓐᓇᕐᓂᐊᕐᒪᑕ ᖃᐅᔨᒪᔭᖏᓐᓂᒃ ᓯᕗᓂᒃᓴᖏᓐᓄᑦ ᐊᑐᖅᑕᐅᔪᒃᓴᓂᒃ.”
ᐃᒻᒪᑲᓪᓚᓕᓴᓕᕆᓂᕐᒥᒃ ᐊᒻᒪ ᐃᓕᖅᑯᓯᓕᕆᓂᕐᒥ ᖁᕕᐊᒋᔭᖃᕐᒪᑦ ᐊᑯᓂᐊᓗᒃ — ᐅᒋᓇ ᐅᖃᓚᐅᕐᑐᖅ ᓯᕗᓪᓕᕐᐹᒥ ᐃᖅᑲᐅᒪᓂᕋᖅᖢᓂ ᕿᓚᐅᔾᔭᖅᑐᓂᒃ ᒧᒥᕆᐊᕐᑐᓂᒃ ᐊᒪᐅᖓᑕ ᐃᒡᓗᖓᓄᑦ.
2019-ᒥ, ᐅᒋᓇ ᐱᓕᕆᐊᖃᓚᐅᕐᓯᒪᖕᒥᔪᖅ ᐋᖅᑭᒃᓱᐃᓂᕐᒥᒃ ᐆᒥᖓ Huqqullaarutit Unipkaangit ᕿᓚᐅᔾᔭᕐᓂᕐᒧᑦ ᐃᙱᐅᑎᒃᓴᒥᑦ, ᑖᓐᓇᓗ ᓴᖅᑭᑕᐅᓯᒪᓪᓗᓂ ᐃᓐᕼᐊᐱᑦ ᒦᑎᐊ ᑐᓴᐅᑎᓕᕆᔨᓂᒃ (Inhabit Media).
ᐃᙱᐅᑏᑦ ᐅᕙᓃᑦᑐ Huqqullaarutit Unipkaangit, ᐅᕝᕙᓘᓐᓃᑦ ᐅᓂᒃᑳ ᕿᓚᐅᑎᔾᔮᖅᑎᓄᑦ ᐃᙱᐅᑎᒃᑯᑦ, ᐅᐊᓕᓂᕐᒥᐅᑕᐃᑦ ᐅᖃᐅᓯᖏᑦᑎᒍᑦ, ᐅᕙᙵᑦ ᐅᒌᓇᐅᑉ ᓄᓇᖓᓂᒃ ᐅᓗᕐᓴᖅᑑᒥᑦ ᑕᓗᕐᔪᐊᓄᑦ ᐊᒻᒪ ᑰᒑᕈᒃᒧᑦ ᕿᑎᕐᒥᐅᑉ ᑲᓇᖕᓇᖅᐸᓯᐊᓃᑦᑐᓂᒃ.
ᐅᖃᓕᒫᒐᖅ ᐱᓕᕆᐊᖑᓚᐅᕐᓯᒪᔪᖅ ᐊᕐᕌᒍᑦ ᖁᓕᑦ ᐅᖓᑖᓂᒃ ᐃᓐᓇᑐᖃᕐᓂᒃ ᖃᐅᔨᓇᓱᒃᐸᒃᖢᑎᒃ ᐃᖅᑲᐅᒪᔭᖃᖅᑐᓂᒃ ᐃᙱᐅᓯᕐᓂᒃ, ᑕᒪᒃᑯᐊᓗ ᓈᒻᒪᒋᔭᐅᓯᒪᙱᓯᒪᓪᓗᑎᒃ ᐊᔪᕆᕐᓱᐃᔨᕈᔪᖕᓄᑦ.
1996-ᒥ, ᑎᑎᕋᖃᑕᐅᓚᐅᕐᓯᒪᔪᖅ ᐅᖃᓕᒫᒐᕐᒥ ᐅᓇᓗ ᐃᓅᔪᓐᓃᐃᕐᓂᑯ ᐅᕆᑦᓱᑦ ᔩ. ᑳᓐᑕᓐ, ᑕᐃᔭᐅᔪᖅ The Northern Copper Inuit: A History, ᐊᑐᖅᑐᕕᓂᕐᓂᒃ ᓴᖅᑭᑕᐅᓯᒪᓪᓗᓂ ᔫᓂᕘᓯᑎ ᑐᕌᓐᑐ ᐳᕋᔅᑯᓐᓄᑦ.
ᐅᖃᓚᐅᕐᓯᒪᔪᖅ ᐅᒃᐱᕈᓱᖕᓂᕋᖅᖢᓂ ᐃᙱᐅᑎᑦ ᐊᒻᒪ ᐅᓂᒃᑳᑦ ᐱᒻᒪᕆᐊᓘᓂᖏᓐᓂᒃ ᐃᓕᖅᑯᓯᕐᒥ ᐊᓯᐅᑎᑦᑎᑦᑕᐃᓕᓂᒃᑯᑦ.
ᐅᓇ ᑕᐃᒪᐃᓗᐊᕐᑐᖅ ᐃᖃᓗᒃᑑᑦᑎᐊᓂ, ᑕᕝᕙᓂ ᐃᓄᐃᓐᓇᖅᑐᑦ ᓈᒻᒪᙱᓕᐅᑎᓯᒪᓯᒪᖕᒪᑦ: 2016-ᒥᑦ, 13.8 ᐳᓴᓐᑎᖏᑦ ᐃᓕᓐᓂᐊᕐᓂᐊᓵᖅᑐᑦ ᐃᓄᐃᑦ ᓱᕈᓰᑦ ᐃᓄᒃᑎᑐᑦ ᐅᖃᓪᓚᒍᓐᓇᓚᐅᕐᑐᑦ, ᐊᑦᑎᒃᓯᕚᓪᓕᖅᖢᓂ 2001-ᒥ, ᐅᕘᓇᓕ 2019-ᒥᑦ ᓇᐃᓴᐅᓯᕆᔨᒃᑯᑦ ᑲᓇᑕᒥ ᐅᓂᒃᑳᖏᓐᓂᒃ.
ᐅᒌᓇᐅᑉ ᓂᕈᐊᒐᒃᓴᐅᑎᑕᐅᓂᖓ ᐆᒧᖓ Meritorious Service Decoration ᐅᕙᙶᓚᐅᕐᓯᒪᔪᖅ ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᑦ ᐊᖓᔪᖅᑳᖓᓂᒃ ᓯᑖᓐᓕ ᐊᓇᑉᓚᒃᒥᑦ.
ᐊᓇᑉᓚᒃ ᐅᖄᓚᓪᓗᓂ ᐅᒌᓇᒧᑦ, ᐃᖅᑲᓇᐃᔭᖅᑎᐅᑯᑖᒃᑐᖅ ᐃᓄᐃᑦ ᑲᑐᔾᔨᖃᑎᒌᓄᑦ, “ᐊᔪᙱᑦᑐᐊᓘᓂᖓᓂᒃ” ᐃᓄᒃ.
“ᐃᓅᓯᕐᒥᓂ ᐊᑐᕐᒪ ᓴᙱᓂᕐᒥᓂ ᐱᓇᓱᐊᖅᑕᒥᓂᒡᓗ ᐱᓕᕆᐊᖃᖅᑎᓪᓗᒍ ᐃᓄᐃᑦ ᐅᖃᐅᓯᖓᓂᒃ ᐊᒻᒪ ᐃᓕᖅᑯᓯᖏᓐᓂᒃ ᐃᓄᐃᑦ ᖃᔅᓯᑐᐃᓐᓇᕐᓂ ᐅᑭᐅᖃᖅᑐᓂᒃ ᐊᒻᒪ ᐃᓕᖅᑯᓯᖃᖅᑐᓂᒃ,” ᐅᖃᖅᑐᖅ ᓂᕈᐊᒐᒃᓴᐅᑎᑦᑎᓂᕐᒧᑦ ᑎᑎᕋᖅᑕᖏᓐᓂᒃ.
“ᔫᓕᐊ ᐅᔾᔨᕆᓇᓂ ᐱᔪᒪᓕᕐᑎᑦᑎᓯᒪᖕᒪᑦ ᐅᓄᕐᑐᓂᒃ ᐋᖅᑭᒃᓱᐃᕙᓪᓕᐊᑎᓪᓗᒍ ᐃᓂᒃᓴᐅᓂᐊᕐᑐᒥᒃ ᐊᒻᒪ ᖃᓄᐃᓕᐅᖃᑎᒋᓂᐊᕐᑕᖏᓐᓄᑦ ᐃᓄᖕᓄ ᐅᖃᐅᓯᓕᕆᓂᒃᑯᑦ ᐊᒻᒪ ᐃᓕᖅᑯᓯᓕᕆᓂᒃᑯᑦ ᑕᒪᕝᕙᓂᓗ ᑐᙵᓇᖅᖢᓂ ᐃᓱᒪᒋᔭᖃᑦᑎᐊᕐᓂᒃᑯᓪᓗ ᐊᔪᙱᑕᖃᐅᖅᖢᓂ.”
ᐅᒋᓇ ᐃᓕᓴᕆᔭᐅᓚᐅᕐᓯᒪᖕᒥᔪᖅ ᐃᓄᒃᑐᑦ ᓴᖅᑭᑎᒃᑲᓐᓂᕐᓂᖓᓄᑦ 2017-ᒥᑦ ᐅᕙᓂ ᐃᓄᐃᑦ ᐅᖃᐅᓯᖏᓐᓂᒃ ᑕᐃᒎᓯᓕᐅᖅᑎᑦ ᑲᑎᒪᓂᖓᓂᒃ, ᑕᕝᕙᓂᓕ ᑐᓂᔭᐅᓚᐅᕐᓯᒪᔪᖅ ᐱᓇᓱᐊᕐᓯᒪᓪᓚᕆᖕᓂᖓᓂᒃ ᐅᖃᐅᓯᕐᒥ ᐱᒋᐊᖅᑎᑦᑎᒃᑲᓐᓂᕐᓂᕐᒧᑦ ᐃᓕᓴᕆᔭᐅᔾᔪᑎᒥᒃ, ᐊᕐᕌᒍᑕᒫᑦ ᑐᓐᓂᖅᑯᑎᐅᕙᒃᑐᖅ ᐃᓕᓴᕆᔭᐅᓯᒪᔪᓄᑦ ᑐᓂᓯᓯᒪᔪᓄᑦ ᐱᕙᓪᓕᐊᔪᓕᕆᓂᕐᒧᑦ ᐊᒻᒪ ᐊᓯᐅᑎᑦᑎᑦᑕᐃᓕᓂᕐᒧᑦ ᐃᓄᐃᑦ ᐅᖃᐅᓯᖓᓂᒃ.
“ᔫᓕᐊ ᐱᓕᕆᐊᖓ ᐊᒃᑐᐃᓂᖃᒻᒪᕆᒃᓯᒪᖕᒪᑦ ᑕᒪᓃ ᓄᓇᒋᔭᑦᑎᓐᓂ,” ᐅᖃᖅᑐᖅ ᔩᓂ ᐃᕼᐊᓗᐊᒃ, ᐃᖃᓗᒃᑑᑦᑎᐊᕐᒧᑦ ᒪᓕᒐᓕᐅᕐᑎ, ᑎᑎᕋᖅᖢᓂ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ.
“ᐱᓕᕆᐊᖃᓪᓚᕆᒃᓯᒪᖕᒪ ᐅᓇ ᐅᖃᐅᓯᕗᑦ, ᐃᓕᖅᑯᓯᕗᑦ ᐊᒻᒪ ᑭᖑᕚᖃᕈᑎᕗᑦ ᐊᓯᐅᑎᑦᑕᐅᓕᓪᓗᓂᒋᑦ ᐊᒻᒪ ᖃᐅᔨᒪᔭᐅᑎᓐᓇᓱᒃᖢᓂᒋᑦ. ᖁᕕᐊᓇᒻᒪᕆᖕᒪᑦ ᐃᓅᓱᒃᑐᑦ ᐃᓄᐃᑦ ᒧᒥᕐᑎᓪᓗᒋᑦ, ᒥᕐᓱᑲᑕᒃᑎᓪᓗᒋᑦ ᐊᒻᒪ ᐃᓄᒃᑐᑦ ᐅᖃᕈᓐᓇᕐᓯᓇᓱᒃᑎᓪᓗᒋᑦ. ᐅᓇ ᐃᓕᓴᕆᔭᐅᔾᔪᑎ ᑖᔅᓱᒧᖓ ᓈᒻᒪᑦᑎᐊᖅᑐᖅ. ᖁᕕᐊᓲᑎᕙᒋᑦ ᔫᓕᐊ.”
(0) Comments