ᐃᖃᓗᒃᒥᐅᑖᒃ ᐊᖓᔪᖅᑳᖑᔫᒃ ᐃᓱᒪᒃᑯᑦ ᐋᓐᓂᐊᖃᖅᑕᐃᓕᓂᖅᒧᑦ ᐃᑲᔪᕈᑎᒃᓴᑕᖃᕐᓂᖓᓂᒃ ᓇᓗᓇᐃᖅᓯᕘᒃ ᐃᕐᓂᖓ ᐃᓅᔪᓐᓃᓚᐅᖅᑎᓪᓗᒍ

For an English version of this story, see Iqaluit parents highlight mental health supports after son’s death.

ᓄᓇᓕᖕᓂ ᑐᓴᒐᒃᓴᓕᐅᕐᑎᐅᓂᕐᒧᑦ ᐱᓕᕆᐊᒃᓴᓄᑦ ᑐᓴᒐᒃᓴᓕᐅᕐᑎ

ᐅᑯᐊ ᔩᓚ ᐊᒻᒪ ᓯᑕᕚᓐ ᐸᓪᓗᖅ-ᑯᓘᑎᐊᐃ ᐃᕐᓂᖓ ᐃᓅᔪᓐᓃᖅᑎᓪᓗ ᐳᐃᒍᖃᑦᑕᓚᐅᕐᑑᒃ ᓂᕆᔭᕆᐊᒃᓴᖅ ᕿᒃᓵᓗᐊᒧᑦ.

“ᐃᓛᓐᓂ ᐃᒃᓯᕙᐅᑖᓗᒦᖏᓐᓇᑐᐃᓐᓇᓕᖃᑦᑕᓚᐅᖅᑐᒍᑦ,” ᔩᓚ ᐅᖃᖅᑐᖅ.

ᓴᐃᒪᓐ ᐊᑕᒍᔪᒃ ᐃᓅᔪᓐᓃᓚᐅᕐᓯᒪᖕᒪᓐ ᐃᒻᒥᓃᖅᖢᓂ ᓯᑎᐱᕆᐅᓚᐅᖅᓯᒪᔪᒥ, ᑕᐃᒪᙵᓪᓗ ᑖᒃᑯᐊ ᐊᐃᑉᐸᕇᒃ ᕿᓂᖅᓯᒪᔫᒃ ᐊᓯᐅᔨᓯᒪᓂᖅᒧᓐ ᒪᑭᒪᓇᓱᒍᑎᒃᓴᖏᓐᓂᒃ.

ᐃᑲᔪᕈᑎᒃᓴᖅᑕᖃᐅᕐᒪᑦ ᓇᓂᑐᐃᓐᓇᖅ, ᑭᓯᐊᓂᓕ ᓯᕗᓪᓕᕐᒥ ᔩᓚᓗ ᐊᒻᒪ ᓯᑕᕚᓐ ᓇᓂᓯᔪᓐᓇᓚᐅᙱᑦᑐᑦ. ᐱᒃᑲᖅᑎᑦᑎᓂᕐᓴᐅᓚᐅᖅᑑᒃ ᐋᓐᓂᐊᕕᒡᔪᐊᕐᓇᖅᒥᒃ ᐊᒻᒪᓗ ᓇᒧ ᕿᓂᓕᕐᓂᐊᕆᐊᒃᓴᖅ ᓇᓗᓂᖏᓐᓄᑦ.

ᑎᓯᐱᕆ ᐃᓱᓕᓕᖅᑎᓪᓗᒍ ᑭᓯᐊᓂ — ᑕᖅᑭᑦ ᑎᓴᒪᓐ ᐊᓂᒍᖅᑎᓪᓗᒋᑦ — ᓯᑕᕚᓐ ᓯᕗᓪᓕᖅᐹᒥ ᐃᓅᓯᓕᕆᔨᒥ ᑕᑯᓕᓚᐅᖅᓯᒪᔪᖅ ᐅᑯᑎᒎᓇᖅ ᐃᖃᓗᖕᓂ ᐃᓱᒪᓕᕆᔨᒃᑯᑎᒍᑦ.

“ᑕᒪᓐᓇ ᐊᑯᓂᓗᐊᕌᓗᒃ ᑕᐃᒪᐃᓕᓚᐅᕐᒪᓐ, ᐊᒻᒪᓗ ᐊᒃᓱᐊᓗᒃ ᐊᒃᓱᕈᕐᓇᖅᖢᓂ,” ᐅᖃᖅᑐᖅ.

ᑭᓯᐊᓂᓕ ᓄᓇᕗᒥ ᒐᕙᒪᒃᑯᑦ ᐊᓯᔾᔨᖅᓯᕕᒡᔪᐊᕐᒪᑕ ᐆᒥᖓ ᐃᓱᒪᒃᑯᑦ ᐋᓐᓂᐊᖃᖅᑐᓕᕆᓂᖅᒥᒃ ᐋᕐᕌᓂᐅᓚᐅᖅᑐᒥᓪᓕ, ᐊᒻᒪᓗ ᓯᑕᕚᓐ ᖁᕕᐊᒋᑐᐃᓐᓇᙱᑕᖓ ᑖᒃᑯᓂᖓ ᑕᑯᔪᓐᓇᕐᓂᖓᓂᒃ, ᑭᓯᐊᓂᓕᑦᑕᐅᖅ ᑐᓴᐅᒪᔭᐅᖁᖕᒥᔭᖏᑦ.

“ᐅᐸᑐᐃᓐᓇᒐᒃᓴᐅᓕᕐᒪᑕ,” ᐅᖃᖅᑐᖅ.

“ᑕᐃᒪᓕ ᐅᓪᓛᒃᑯ ᐅᖄᓚᕝᕕᒋᓗᒋ ᐊᒻᒪᓗ ᐃᓂᒃᓴᖅᑕᖃᕈᓂ ᑖᔅᓱᒧᖓ ᐅᓪᓗᕐᒧᑦ ᑕᐃᒪᓕ ᑕᑯᔭᐅᔪᓐᓇᖅᑐᑎᑦ ᑕᕝᕙᓂᑦᑕᐃᓐᓇᖅ ᐅᓪᓗᕐᒥᒃ. ᐅᓇ ᐊᓯᙳᕈᑎᒻᒪᕆᖓ.”

ᐊᑕᒪᓐᓇ ᐊᕐᕌᒍ ᐱᒋᐊᓕᓵᖅᑎᓪᓗᒍ ᓄᓇᕗᑦ ᐋᓐᓂᐊᖃᕐᓇᙱᑦᑐᓕᕆᔨᖏᑦ ᐱᓕᕆᖃᑎᖃᓕᓚᐅᖅᓯᒪᖕᒪᑕ ᐃᖃᓗᖕᓂ ᐃᓱᒪᒃᑯᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂᒃ ᐊᒻᒪ ᐊᑐᓗᐊᖅᑐᓕᕆᓂᖅᒧᑦ ᐱᓕᕆᔨᐅᔪᓂᒃ ᐊᔪᕐᓇᙱᓐᓂᖅᓴᐅᑎᑕᐅᓇᓱᒃᖢᓂ ᐃᓱᒪᒃᑯᑦ ᐋᓐᓂᐊᖃᕐᓇᙱᑦᑐᓕᕆᔭᐅᓂᕐᒧᑦ.

ᔭᓄᐊᕆ ᓄᖑᓕᖅᑎᓪᓗᒍ, ᑖᓐᓇ ᐃᓱᒪᒃᑯᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᑕᑯᔭᐅᑲᐅᑎᒋᔪᒪᔪᓂᒃ ᑕᖁᖃᑦᑕᓕᓚᐅᖅᓯᒪᔪᑦ ᐱᓇᓱᐊᕈᓯᖅ ᐱᖓᓱᐃᖅᐸᒃᖢᒍ, ᐅᖃᓚᐅᖅᑐᖅ ᑎᓇᕇ ᓴᒧᕕᐅᓪ, ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ ᐅᖃᓪᓚᒃᑎᒋᔭᐅᔪᖅ.

“ᑕᑯᔭᐅᔪᒪᓂᕐᒧᑦ ᐅᑕᕿᔪᓂᒃ ᐅᖃᓗᒍᓐᓇᓕᓚᐅᖅᓯᒪᒐᑦᑕ ᐃᓂᒃᓴᓕᐅᑲᑕᒃᖢᑎᒍᑦ,” ᑎᑎᕋᖅᑐᑦ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ ᖃᕋᓴᐅᔭᒃᑯᑦ. “ᖃᔅᓰᑐᐃᓐᓇᑯᓗᒃᖢᑎᒃ ᐃᓄᖕᓂᒃ ᐅᖄᓚᔪᓂᒃ ᖃᐅᒃᐸᒧᑦ ᐅᑕᕿᖁᔨᓯᒪᔪᑦ ᐃᓅᓯᓕᕆᔨᒥᒃ ᐅᖃᓪᓚᖃᑎᖃᕐᓂᐊᖅᑐᓂᒃ.”

ᔩᓚ ᐃᓅᓯᓕᕆᔨᒥ ᐅᖃᖃᑎᖃᕈᓐᓇᓕᓚᐅᖅᓯᒪᔪᖅ ᐋᓐᓂᐊᖃᕐᓇᙱᑦᑐᓕᕆᔨᒃᑯᑎᒍᑦ.

“ᐅᕙᓐᓄ ᐃᑲᔪᕈᑎᖃᓚᐅᕐᒪᑦ ᑐᕌᒐᕆᔪᒪᔭᓐᓄᑦ ᐊᒻᒪ ᖃᓄᐃᓕᐅᖅᐸᓪᓕᐊᒍᑎᒋᖃᑦᑕᕐᓂᐊᖅᑕᓐᓄᑦ,” ᐅᖃᖅᑐᖅ. “ᐅᖃᕈᓐᓇᖅᓯᓪᓗᖓᓗ ᐊᐃᑉᐸᓐᓄᑦ ᐅᖃᕈᓐᓇᖅᓯᒪᙱᑕᓐᓂᒃ.”

ᓯᑕᕚᓐ ᓱᓕ ᐊᓯᐊᒍᑦ ᐃᑲᔪᕈᑎᒃᓴᓂ ᕿᓂᕋᓱᒃᑐᖅ ᑖᔅᓱᒧᖓ ᐃᑲᔪᕈᑎᐅᔪᓐᓇᕐᓂᐊᖅᑐᓂᒃ — ᓱᓕ ᓇᓂᓯᓚᐅᙱᒻᒪᑦ ᐃᑲᔪᖃᑎᒌᒃᑐᓂᒃ ᐃᖃᓗᖕᓂ ᐃᒻᒥᓃᖅᑐᓂᒃ ᐃᓚᐃᖅᓯᒪᓂᑯᓄᑦ.

ᐅᖃᖅᖢᓂ ᐃᓚᐅᓕᕋᔭᕐᓂᖓᓂᒃ ᐃᓄᑑᓗᐊᖅᑰᔨᙱᓐᓇᔭᕐᓂᖓᓄᑦ.

“ᑕᐃᒪᓕ ᐅᕙᑦᑎᓐᓄ ᐅᖃᓪᓚᖃᑎᒌᒍᓐᓇᕐᓯᓂᐊᖅᐳᒍ ᐊᒻᒪᓗ ᒪᒥᓴᕈᑎᒃᓴᓂ ᐃᓱᒪᓕᐅᕆᖃᑦᑕᐅᑎᓗᓄ,” ᓯᑕᕚᓐ ᐅᖃᖅᑐᖅ. “ᐅᕝᕙᓘᓐᓃᑦ ᕿᐊᔪᓐᓇᑐᐃᓐᓇᕐᓗᓄᒃ.”

ᐃᓴᒃᓯᒪᒋᑦ ᐃᓅᓯᕐᒥ ᑲᑐᔾᔨᖃᑎᒌᑦ (Embrace Life Council), ᑮᓇᐅᔭᓕᐅᕋᓱᙱᖢᑎᒃ ᐃᒻᒦᓂᖅᑎᑦᑎᑦᑕᐃᓕᓂᖅᒧᑦ ᑲᑐᔾᔨᖃᑎᒌᖑᔪᑦ ᐃᖃᓗᖕᓂ ᐊᕐᕌᓂ ᑲᑎᖃᑎᒌᒃᑎᑦᑎᖃᑦᑕᒪᐅᕐᓯᒪᖕᒪᑕ, ᑭᓯᐊᓂᓕ ᐅᓇ ᐋᓐᓂᐊᕕᒡᔪᐊᕐᓇᖅ ᐊᓯᐊᓅᖓᑎᑦᑎᓕᓚᐅᕐᒪᑦ, ᐅᖃᖅᑐᖅ ᐱᓕᕆᐊᒧᑦ ᑐᑭᒧᐊᖅᑎᑦᑎᔨ ᐃᓕᓴᐱ ᔮᓐᔅᑕᓐ.

ᑲᑎᒪᔩ ᐱᓕᕆᐊᖃᕋᓱᖃᑦᑕᖅᑐᑦ ᖃᕋᓴᐅᔭᒃᑯᑦ ᐃᑲᔪᕈᑎᖃᕋᓱᒃᖢᑎᒃ ᑭᓯᐊᓂᓕ ᒫᓐᓇᒧᓐ ᐋᖅᑭᒃᓯᓪᓚᕆᒃᓯᒪᙱᑦᑐᑦ, ᐅᖃᖅᑐᖅ.

ᔮᓐᔅᑕᓐ ᐅᖃᓚᐅᖅᑐᖅ ᑐᓗᖅᑕᕐᓇᖅᑐᖃᕐᒪᑦ ᑐᙵᓱᒃᑎᑦᑎᔨᐅᓇᓱᒃᖢᓂ ᐱᔨᑦᑎᕋᐅᑎᓕᕆᓂᕐᒧᑦ, ᒪᑐᑎᑐᓇᖅ ᐱᓕᕆᔾᔪᑎᓕᕆᓂᕐᒧᑦ ᐊᑐᐃᓐᓇᐅᙱᔭᓗᐊᖅᑐᑦ, ᑭᓯᐊᓂᓕ ᐱᒻᒪᕆᐊᓘᖕᒪᑦ ᐱᔨᑦᑎᕋᐅᑎ ᑕᐃᒪᓐᓇᓗ ᑖᒃᑯᐊ ᐋᖅᑭᒃᓱᐃᓇᓱᖕᓂᐊᖅᑐᑦ.

“ᖃᐅᔨᒪᙱᑦᑐᒍᑦ ᖃᓄᖅ ᐊᑯᓂᐅᑎᒋᓂᐊᕐᒪᖓᑦ ᓄᕙᒡᔪᐊᕐᓇᖅ ᐃᓅᓯᑦᑎᓐᓂᒃ ᐊᒃᑐᐃᓯᒪᓂᐊᓂᓄᑦ,” ᔮᓐᔅᑕᓐ ᐅᖃᖅᑐᖅ. “ᒪᓂᑐᐃᓐᓇᔾᔮᙱᑦᑐᒍᑦ.”

ᒫᓐᓇᐅᔪᕐᓕ, ᔩᓚ ᐊᒻᒪ ᓯᑕᕚᓐ ᐃᖃᓗᖕᓂ ᓄᓇᖃᖅᑑᒃ ᕿᒥᖓᓪᓗ, ᐳᕆᓐᕼᐊᐃᑐ. ᐃᕐᓂᖓᑕ ᐃᓚᖓᓄᑦ ᑐᓂᔭᐅᓂᖓ ᓴᐃᒪᓐ ᐃᓅᔪᓐᓃᖅᑎᓪᓗᒍ, ᐊᒻᒪᓗ ᑎᒍᐊᖅᑖᕆᔭᐅᓪᓗᓂ ᓄᕕᐱᕆᒥᓐ.

ᑖᓐᓇᓕ ᐊᓂᑲᑕᒍᓐᓇᖅᑎᑦᑎᓚᐅᖅᓯᒪᔪ ᐊᒻᒪ ᓄᖃᖓᑐᐃᓐᓇᙱᖢᑎᒃ ᐃᑲᔪᖅᑕᐅᓚᐅᖅᑎᓐᓇᒋᑦ ᐃᓱᒪᓕᕆᔨᓄᑦ.

“ᐅᕙᑦᑎᓐᓂ ᐃᑲᔪᒻᒪᕆᓚᐅᖅᑐᖅ ᖃᓄᐃᓕᐅᕈᓐᓇᖅᓯᔾᔫᒥᓪᓗᑕ,” ᔩᓚ ᐅᖃᖅᑐᖅ.

ᐅᓪᓗᐃᑦ ᓱᓕᐊ ᐊᓂᒍᖅᐸᓪᓕᐊᔪᑦ ᐊᒻᒪᓗ ᑖᒃᑯᐊ ᐃᑲᔪᕈᑎᒃᓴᓂ ᐃᑲᔪᕈᑎᖃᑲᑕᒃᖢᑎᒃ, ᑭᓯᐊᓂᓕ ᓯᑕᕚᓐ ᐅᖃᖅᑐᖅ ᓱᓕ ᐅᓄᖅᑐᓂᒃ ᐊᐱᖅᑯᑎᓂᒃ ᑭᐅᔭᐅᓯᒪᙱᑦᑐᖃᕋᓗᐊᕐᓂᕋᖅᖢᓂᐅᒃ.

“ᖃᐅᔨᒪᙱᑦᑐᖓ ᖃᖓ ᐋᓐᓂᐊᕈᓐᓃᓛᕆᐊᒃᓴᑦᑎᓐᓂᒃ ᑕᐃᒪᐃᓪᓛᕋᓗᐊᕐᒪᖔᑕᓘᓐᓃᑦ,” ᓯᑕᕚᓐ ᐅᖃᖅᑐᖅ. “ᑭᓯᐊᓂᓕ ᒫᓐᓇ ᐃᑲᔫᑎᓴᖃᕈᓐᓇᖅᓯᔪᒍᑦ ᑕᒪᑐᒥᖓ ᐊᑐᕈᓐᓇᕐᓂᖅᒥᒃ.”

ᐃᓄᐃᑦ ᐊᒻᒪ ᐃᓅᙱᑦᑐᑦ ᐃᓂᒃᓴᓕᐅᖅᑕᐅᔪᒪᔪᓐᓇᖅᑐᑦ ᑕᑯᔭᐅᔪᒪᓗᑎᒃ ᓇᒡᒐᔭᐅᒥᒃ, ᐱᖓᔅᓯᒥᒃ ᐊᒻᒪ ᑎᓴᒻᒥᕐᒥᒃ ᐅᕗᖓ ᐅᖄᓚᓗᑎᒃ 867-975-5900 ᒪᑐᐃᖅᐸᑦ 8:30-ᒥᑦ ᐅᓪᓛᒃᑯᑦ ᑕᑯᔭᐅᕝᕕᒃᓴᓕᐅᕈᒪᓗᑎᒃ.

ᐃᑲᕐᕋᓂᒃ 22-ᓂ ᐃᓅᓯᓕᕆᔭᐅᓐᓇᖅᒪᑦ ᐋᓐᓂᐊᕐᕕᓕᐊᕈᓐᓇᐅᑎᑎᒍᑦ ᐅᑯᑎᒎᓇᖅ ᒐᕙᒪᑐᖃᒃᑯᑎᒍᑦ, ᐊᒻᒪᓗ ᐃᑲᕐᕋᒃᑲᓐᓂᕐᓂᒃ ᐃᓚᒋᐊᖅᑕᐅᑐᐃᓐᓇᕆᐊᖃᖅᖢᑎᒃ.

ᐊᒻᒪᓗ ᓄᓇᕗᒥᑦ ᒐᕙᒪᒃᑯᑦ ᐃᖅᑲᓇᐃᔭᖅᑎᖏᑦ ᑖᒃᑯᓂᖓ ᐊᑐᐃᓐᓇᖃᖅᑎᑕᐅᔪᓐᓇᖅᑐᑦ ᐃᓚᒌᓄᓪᓗ ᐃᑲᔪᕈᑎᒃᓴᓂᒃ, ᑕᕝᕗᓇᓗ ᐃᓅᓯᓕᕆᔭᐅᔪᓐᓇᖅᖢᑎᒃ ᐃᖅᑲᓇᐃᔭᖅᑎᒋᔭᐅᔪᑦ ᐊᒻᒪᓗ ᐃᓚᒋᔭᐅᔪᑦ.

ᐃᓱᒫᓘᑎᖃᓗᐊᕐᕈᕕᑦ ᐊᒻᒪᓗ ᐅᖃᖃᑎᖃᕈᒪᓗᑎᒃ, ᐅᖄᓚᒍᓐᓇᖅᑐᑎᑦ ᓄᓇᖃᖅᑳᖅᑐᓄᑦ ᐊᒻᒪ ᐃᓄᖕᓄᑦ ᐃᑲᔪᖅᑕᐅᕝᕕᒃᒧᑦ ᐅᕗᖓ 1-855-242-3310 ᖃᕋᓴᐅᔭᒃᑯᓪᓘᓐᓃᑦ ᐅᖃᓪᓚᖃᑎᖃᕈᓐᓇᖅᖢᑎᑦ ᐅᕙᓂ hopeforwellness.ca. ᐅᑯᐊ ᐃᑲᔪᕈᑎᒃᓴᑦ ᐊᐅᓚᑕᐅᔪᑦ ᖃᖓᓕᒫᖅ ᐃᑲᕐᕋᑦ 24-ᓂᒃ ᐅᓪᓗᓂᒃ 7-ᓂᒃ ᐱᓇᓱᐊᕈᓯᕐᒥᒃ.