ᐃᖃᓗᖕᒥᐅᑖᒃ ᐊᖓᔪᖅᑳ ᐃᕐᓂᕋᓛᖓᓂ ᐃᓅᔪᓐᓃᕈᔾᔨᕗᑦ

ᐃᓚᒋᔭᐅᔪᖅ ᑖᒃᑯᓄᖓ ᐃᑲᔫᑎᒃᓴᓂᒃ ᑲᑎᕐᓱᐃᓇᓱᒃᑐᖅ ᔮᑭ ᓯᐅᑎᐊᐱᐅᑉ ᐃᓗᕕᖅᑕᐅᔾᔪᑎᒃᓴᖓᓄᑦ

ᐃᓚᒋᔭᐅᓚᐅᕐᑐᑦ ᐆᒧᖓ ᔮᑭ ᓯᐅᑎᐊᕕᒃ ᓄᒫᓲᑎᖃᕐᑐᑦ ᑖᓐᓇ ᑕᕿᓕᒃ ᑕᓪᓕᒪᓂᒃ ᐃᓅᔪᓐᓃᑳᓪᓚᒃᑎᓪᓗᒍ ᐄᐳᕈᓪ 6-ᒥ ᐃᖃᓗᖕᓂ. ᑖᒃᑯᓄᖓ ᐃᓚᒋᔭᐅᔪᖅ ᖃᕋᓴᐅᔭᒃᑯᑦ ᐃᑲᔫᑎᒃᓴᓂᒃ ᐱᔪᒪᓂᕐᒥᒃ ᐋᖅᑭᒃᓯᓚᐅᕐᑐᖅ ᐃᓗᕕᖅᑕᐅᓂᖓᓄᑦ ᐊᑭᓕᐅᑎᐅᓂᐊᕐᑐᓂᒃ. (ᐊᔾᔨᙳᐊᖅ ᐅᕙᙵᑦ ᑐᒃᓯᐊᒐᒃ ᓯᐅᑎᐊᐱᒃ)

By ᒫᑕᓕᓐ ᕼᐊᐅᕕᑦ

For an English version of this story, please see Iqaluit family grieves sudden loss of infant son

ᐃᓚᒌᒃᑐᑦ ᐃᖃᓗᖕᒥᐅᑕ ᓄᒫᓲᑎᖃᕐᑐᑦ ᐊᒻᒪᓗ ᑮᓇᐅᔭᑎᒍᑦ ᓈᒻᒪᙱᓕᐅᕈᑎᖃᓕᕐᖢᑎᒃ ᐃᓅᔪᓐᓃᖅᑎᓪᓗᒍ ᓄᑕᕋᓛᖓ.

ᔮᑭ ᓯᐅᑎᐊᐱᒃ, ᑕᕿᓕᒃ ᑕᓪᓕᒪᓂᒃ, ᐃᓅᔪᓐᓃᑳᓪᓚᓚᐅᕐᓯᒪᖕᒪᓐ ᐄᐳᕈᓪ 6-ᖑᑎᓪᓗᖓ ᐊᖏᕐᕋᖓᓂ. “ᖁᖓᐃᓐᓇᐅᔭᓚᐅᕐᑐᖅ ᑭᒃᑯᑐᐃᓐᓇᕐᓄᑦ,” ᐊᓈᓇᖓ, ᑐᒃᓯᐊᒐᒃ ᓯᐅᑎᐊᐱᒃ, 29, ᐅᖃᓚᐅᕐᑐᖅ ᖁᕝᕕᐅᖅᖢᓂ.

ᐅᖃᓚᐅᕐᑐᖅ ᐊᓂᖓ ᔮᑭᒥ ᐊᒻᒪ ᐱᖓᓱᒃᑲᓐᓂᕐᓂᒃ ᕿᑐᕐᖓᖏᓐᓂᒃ ᑲᒪᒋᔭᖃᓚᐅᕐᑐᖅ ᐅᓪᓛᒃᑯᑦ ᐊᓂᑎᓪᓗᒍ. ᐊᐃᑉᐸᖓ ᐊᒻᒪ ᔮᑭᐅᑉ ᐊᑖᑕᖓ, ᑭᐊᕕᓐ ᐅᓂᐅᕐᓵᒐᖅ ᐃᖃᓗᒐᓱᒋᐊᖅᓯᒪᓪᓗᓂ ᐅᒥᐊᒃᑯᑦ.

ᓯᐅᑎᐊᐱᒃ ᐊᖏᕐᕋᐅᕙᓪᓕᐊᓕᕐᖢᓂ ᐊᓂᖓᑕ ᓇᓂᓪᓗᓂᐅᒃ ᐊᒻᒪ ᐅᖃᓕᖅᖢᓂ ᔮᑭ ᐋᓐᓂᐊᕕᖕᒦᓐᓂᖓᓂᒃ.

ᓯᐅᑎᐊᐱᐅᑉ ᐃᕐᓂᖓᑕ 8-ᓂ ᐊᕐᕌᒍᓕᒃ ᔮᑭᒥ ᑕᑯᒋᐊᖅᖢᓂ ᐃᒡᓕᕐᒦᑦᑐᕐᒥ ᑭᓯᐊᓂᓕ ᐊᓂᕐᓂᖃᙱᑦᑐᖅ. ᐃᓱᒪᒋᔭᐅᓚᐅᕐᑐᖅ ᑖᓐᓇ ᐃᐱᓇᓱᒋᔭᐅᓪᓗᓂ ᐊᐅᓚᓂᖓᓄᑦ ᐊᒻᒪ ᐊᔪᓕᕋᓱᒋᔭᐅᓪᓗᓂ ᓯᓂᖕᓂᖓᓂ.

ᑎᒥᖓ ᖃᐅᔨᓴᖅᑕᐅᓚᐅᕐᑐᖅ ᐋᑐᕚᒥ, ᐊᒻᒪᓗ ᐱᐊᓂᒃᑕᐅᖕᒪᑦ ᑎᒥᖓ ᐃᖃᓗᖕᓄ ᐅᑎᖅᑎᑕᐅᓂᐊᖅᖢᓂ ᐄᐳᕈᓪ 13-ᒥ. ᐃᓅᔪᓐᓃᕐᓂᖓ ᐸᓯᓇᖅᑐᒃᑰᖓᓚᐅᙱᑦᑐᖅ.

ᐃᓚᒌᓄᑦ ᐃᓚᒋᔭᐅᔪᖅ ᑮᓇᐅᔭᓂᒃ ᐱᕈᖅᑎᑦᑎᓇᓱᓕᓚᐅᕐᑐᖅ ᑖᒃᑯᓂᖓ ᐃᓚᒌᓂᒃ ᐃᑲᔪᕋᓱᒃᖢᓂ ᐃᓗᕕᖅᑕᐅᓂᖓᓄᑦ ᐊᑭᓕᐅᑎᒃᓴᒥ. ᓄᓇᕗᒥᑦ ᓄᓇᕋᓛᑦ ᐃᓅᔪᓐᓃᕐᑐᑦ ᐅᓄᓛᐅᔪᑦ ᑲᓇᑕᒥ. ᑭᖑᓪᓕᖅᐹᑦ 2018-ᒥ ᖃᐅᔨᓴᕈᑏ ᐅᖃᐅᓯᖃᓚᐅᕐᓯᒪᔪᖅ 17.7 ᐃᓅᔪᓐᓃᖃᑦᑕᕐᓂᖏᓐᓂᒃ 1,000-ᓂ ᓄᑕᕋᓛᓂᒃ.

ᔮᑭ ᐃᓅᓚᐅᕐᓯᒪᔪᖅ ᐅᒃᑑᐱᕆ 20, 2021 ᐊᒻᒪᓗ ᖁᕕᐊᓱᐃᓐᓇᐅᔭᖅᖢᓂ ᑕᐃᒪᙵᑦ, ᐅᖃᕐᑐᖅ ᐊᓈᓇᖓ.

ᓇᒡᓕᒋᔭᐅᑦᑎᐊᓚᐅᕐᑐᖅ ᐱᖓᓱᓄᑦ ᖃᑕᙳᑎᖏᓐᓄᑦ. ᐊᕐᕌᒍᓖᑦ 8, 4 ᐊᒻᒪ 2 ᐊᒻᒪᓗ ᐃᓚᓕᒫᖏᓐᓄᑦ.

“ᑭᒃᑯᓕᒫᓄᑦ ᓇᒡᓕᒋᔭᐅᓚᐅᕐᑐᖅ,” ᓯᐅᑎᐊᐱᒃ ᐅᖃᓚᐅᕐᑐᖅ ᐃᕐᓂᑯᓗᖕᒥᓂᒃ. “ᐊᒃᓱᐊᓗ ᐱᐅᒋᔭᐅᓚᐅᕐᑐᖅ.”

ᑕᓪᓕᒪᓂᒃ ᑕᕿᓕᒃ ᔮᑭ “ᖁᖓᐃᓐᓇᐅᔭᓚᐅᕐᓯᒪᔪᖅ ᑭᓇᑐᐃᓐᓇᕐᒧᑦ,” ᐅᖃᕐᑐᖅ ᐊᓈᓇᖓ ᑐᒃᓯᐊᒐᒃ ᓯᐅᑎᐊᐱᒃ. (ᐊᔾᔨᙳᐊᖅ ᐅᕙᙵᑦ ᑐᒃᓯᐊᒐᒃ ᓯᐅᑎᐊᐱᒃ)

ᐃᓚᒌᖑᔪᑦ ᐃᓗᕕᕐᓯᐅᕐᓂᐊᕈᒪᔪᑦ ᔮᑭᒥ ᐱᓇᓱᐊᕈᓯᕐᓂ ᐊᒡᒋᖅᑐᓂᒃ.

ᐃᓚᒌᓄᑦ ᐃᓚᒋᔭᐅᔪᖅ ᔪᐊᓐ ᒪᑲᓐᔨ ᑖᒃᑯᓂᖓ ᐃᑲᔪᕈᒪᓚᐅᕐᒪ ᐊᓯᐅᔨᑎᓪᓗᒋᑦ ᑕᐃᒪᓕ ᐊᑐᓕᓚᐅᕐᑐᖅ ᐆᒥᖓ GoFundMe ᖃᕋᓴᐅᔭᒃᑯᑦ ᐃᑲᔪᖅᑕᐅᔪᒪᔾᔪᑎ ᐃᑲᔫᑎᒃᓴᓂᒃ ᐱᓇᓱᒃᖢᓂ ᐃᓗᕕᖅᑕᐅᓂᖓᓄᑦ ᔮᑭᐅᑉ ᐊᑭᓕᐅᑎᐅᓂᐊᖅᑐᓂᒃ.

ᒪᑲᓐᔨ ᓯᐅᑎᐊᐱᒃᑯᓐᓂ ᐃᓚᒌᓂᒃ ᖃᐅᔨᒪᓕᓚᐅᕐᓯᒪᔪᖅ ᐃᖃᓗᖕᓂ ᐃᖅᑲᓇᐃᔭᖅᖢᓂ ᐊᕐᕌᓂ ᐸᓖᓯᒃᑯᓐᓂᒃ ᑭᐅᔨᐅᕙᒃᖢᓂ ᐅᖄᓚᐅᑎᓂᒃ.

“ᐅᐸᒃᓯᒪᒐᒃᑭ ᐅᕙᑦᑎᖓᓄᑦ ᐊᒻᒪᓗ ᕿᑐᕐᖓᖏᑦ ᖃᐅᔨᒪᓪᓗᒋᑦ ᐊᒻᒪᓗ ᐃᓅᑦᑎᐊᕚᓘᓪᓗᑎᒃ,” ᒪᑲᓐᔨ ᐅᖃᕐᑐᖅ.

ᒫᓐᓇᓕ ᐊᖏᕐᕋᖃᓕᕐᑐᖅ ᐳᕌᒃᐱᐊᓪ, ᐋᓐᑎᐅᕆᐅᒥ ᑭᓯᐊᓂᓕ ᓯᐅᑎᐊᐱᒃᒥ ᐅᖃᖃᑎᖃᐃᓐᓇᓲᖅ ᑐᓴᐅᒪᔾᔪᑎᓕᕆᓂᒃᑯᑦ ᐊᒻᒪᓗ ᔮᑭᐅᑉ ᐊᔾᔨᙳᐊᖏᓐᓂᒃ ᓇᒡᓯᐅᔾᔨᕕᐅᓯᒪᓪᓗᓂ

“ᓇᒡᓕᒋᔭᐅᑦᑎᐊᕐᑐᖅ ᓄᑕᕋᓛᖅ ᐊᒻᒪ ᓇᒡᓕᖕᓇᖅᖢᓂ,” ᒪᑲᓐᔨ ᐅᖃᕐᑐᖅ.

ᑐᓴᖅᑎᓪᓗᒍ ᔮᑭ ᐃᓅᔪᓐᓃᕐᓂᖓᓂᒃ “ᖁᒃᓴᓪᓚᖕᓇᒻᒪᕆᓚᐅᕐᑐᖅ ᐊᒃᓱᐊᓗᒃ,” ᐅᖃᕐᑐᖅ. “ᑕᐃᒪᓐᓇᓘᓐᓃᑦ ᑕᐅᑐᙳᐊᕈᓐᓇᓚᐅᙱᑦᑐᖓ.”

2020-ᒥ ᐃᖃᓗᖕᓂ ᐃᓗᕕᖅᓯᓂᐊᖅᖢᓂ ᐊᑭᖃᕐᒪᑦ ᒫᓂᒃ $4,635.00.

“ᑕᐃᒪᓐᓇᐅᕙᖕᒪᓐ ᐅᑭᐅᕐᑕᖅᑐᕐᒥ, ᐄᓛ? ᐃᑲᔪᖃᑦᑕᐅᑎᕙᖕᒪᑕ ᑕᒪᕐᒥᒃ,” ᒪᑲᓐᔨ ᐅᖃᕐᑐᖅ.

“ᐃᑲᔪᖃᑦᑕᐅᑎᓚᐅᕐᑕ ᑕᒪᑐᒧᖓ ᐃᓕᔭᐅᑦᑎᐊᕐᓂᐊᕐᒪ ᑕᐃᒪᐃᑕᐅᔭᕆᐊᖃᕐᑎᓪᓗᒍ.”

Share This Story

(0) Comments

Join the Conversation

Your email address will not be published. Required fields are marked *

*