ᐃᖃᓗᖕᓂ ᐃᒪᕐᒧᑦ ᐆᒻᒪᖅᑯᑎᖃᕐᓂᕐᒧᑦ ᐊᐅᓚᐅᑎᖃᕐᕕᖓ ᐃᓕᕗᖅ ᑳᓂᐅᑉ ᓱᒃᑲᒃᑎᒋᐊᖅᑕᐅᓂᖓᓂ

For English version, see ‘What a day this is’: Iqaluit hydroelectric plant could be ready 3 years sooner than expected

ᐃᒪᕐᒧᑦ ᐆᒻᒪᖅᑯᑎᖃᕐᓂᕐᒧᑦ ᐊᐅᓚᐅᑎᖃᕐᕕᖕᒥ ᓴᓇᔭᐅᔪᖃᕐᓂᐊᖅᐳᖅ ᑐᓂᓯᓂᕐᒥ ᐆᒻᒪᖅᑯᑎᖃᕐᓂᕐᒥ ᐃᖃᓗᖕᓄᑦ ᓴᖅᑭᑎᑦᑎᓂᐊᖅᐳᖅ “ᕼᐊᓐᓇᓚᖏᓐᓂ” ᐃᖅᑲᓇᐃᔮᒃᓴᓂᑦ, ᓇᑲᑦᑎᓗᓂ ᓯᓚᕐᔪᐊᑉ ᐅᔅᓯᒃᓯᕙᓪᓕᐊᔾᔪᑎᖏᓐᓂ ᐊᓂᐊᑎᑦᑎᓂᐅᔪᓂ ᐊᒻᒪ ᖁᕝᕙᕆᐊᖅᑎᑦᑎᓗᓂ ᓄᓇᓕᐸᐅᔭᐅᑉ ᓴᙱᓂᖓᓂ, ᐅᖃᖅᐳᖅ ᒐᕙᒪᑐᖃᒃᑯᑦ ᒥᓂᔅᑕᖓ ᑭᖕᒧᑦ−ᓄᓇᖃᖅᑳᖅᓯᒪᔪᓄᑦ ᐱᓕᕆᖃᑎᑲᕐᓂᕐᒧᑦ.

ᕇᐱᑲ ᐋᓪᑎ ᐅᖃᓪᓚᓚᐅᖅᐳᖅ ᐱᓕᕆᐊᒃᓴᐅᔪᒥ ᐃᖃᓗᖕᓂ ᓄᕕᐱᕆ 13−ᒥ, ᐃᑲᕐᕋᒐᓴᓂᑦ ᑭᖑᓂᐊᒍᑦ ᑲᓇᑕᒥ ᐊᖓᔪᖅᑳᕐᔪᐊᖓ ᒫᒃ ᑳᓂ ᐊᑦᑎᖅᓯᓚᐅᖅᑎᓪᓗᒍ ᐃᖃᓗᖕᓂ ᓄᒃᑭᒃᓴᐅᑏᑦ ᐃᒪᕐᒧᑦ ᐆᒻᒪᖅᑯᑎᖃᕐᓂᕐᒧᑦ ᐱᓕᕆᐊᒃᓴᐅᔪᒥ ᐊᑕᐅᓯᐅᓪᓗᓂ 6−ᖑᔪᓂ ᓄᑖᖑᔪᓂ “ᑲᓇᑕᒥ-ᓴᓇᓂᕐᒧᑦ” ᐱᓕᕆᐊᒃᓴᐅᔪᓂ ᒐᕙᒪᑐᖃᒃᑯᑦ ᓱᒃᑲᒃᑎᒋᐊᖅᓯᔪᒪᓂᖏᓐᓂ ᐊᖏᖅᑕᐅᓂᕐᒧᑦ.

“ᐅᓇ ᐱᒻᒪᕆᐅᓪᓗᓂ ᑎᑭᐅᑎᔭᐅᔪᓐᓇᖅᓯᓂᐅᕗᖅ ᒪᑭᒪᔾᔪᑎᒃᓴᓄᑦ, ᑮᓇᐅᔾᔭᒃᓴᓂᑦᑎᓐᓂ ᐊᒻᒪ ᐅᑭᐅᖅᑕᖅᑐᒥ ᐱᔪᓐᓇᕐᓂᖃᕐᔪᐊᕐᓂᖓᓂ, ᐊᒻᒪ ᐊᖏᔪᒥ ᓯᕗᒻᒧᑦ ᐱᓱᖕᓂᐅᔪᒥ ᓴᐃᒻᒪᖃᑎᒌᖕᓂᐅᔪᒧᑦ ᐊᒻᒪ ᐃᓄᖕᓄᑦ ᑮᓇᐅᔾᔭᒃᓴᓂᕐᒧᑦ ᓯᕗᓕᐅᖅᑎᐅᓂᕐᒧᑦ,” ᐋᓪᑎ ᐅᖃᓚᐅᖅᐳᖅ, ᐅᖃᓪᓚᒃᖢᓂ ᓂᐱᖃᖅᑐᓄᑦ ᐅᐊᔭᒧᑦ ᐱᓕᕆᔾᔪᑎᓂ ᑐᓴᒐᒃᓴᓕᐊᖑᔪᒥ ᐃᓗᐊᓂ ᐃᖃᓗᖕᓂ ᐅᖅᓱᐊᓗᑐᐃᓐᓇᕐᒨᖅᑐᓂ-ᐊᐅᓚᑕᐅᔪᒥ ᐊᐅᓚᐅᑎᖃᕐᕕᖓᓂ.

ᑐᒃᓯᕋᖅᑕᐅᔪᖅ ᐃᖃᓗᖕᓂ ᐃᒪᕐᒧᑦ ᐆᒻᒪᖅᑯᑎᖃᕐᓂᕐᒧᑦ ᐱᓕᕆᐊᒃᓴᐅᔪᖅ 50-ᒦᑕᒥ-ᖁᑦᑎᒃᑎᒋᔪᒥ ᓴᐳᑎᒥᒃ ᐊᒻᒪ ᐊᐅᓚᐅᑎᖃᕐᕕᖕᒥ ᓴᓂᓕᐊᓂ ᑰᒐᓗᒃ ᑰᖓᓂ ᓴᓇᓚᐅᖅᐳᖅ ᒐᕙᒪᑐᖃᒃᑯᑦ ᑲᓇᑕᒥᔾᓴᓇᓂᕐᒧᑦ ᐱᓕᕆᐊᒃᓴᐅᔪᓂ ᑎᑎᕋᖅᓯᒪᓂᐅᔪᓂ ᓄᕕᐱᕆ 13−ᒥ. (ᓄᓇᕗᒻᒥ ᓄᒃᑭᒃᓴᐅᑏᑦ ᑎᒥᖁᑎᖓᑕ ᐊᔾᔨᖁᑎᖓ)

ᐱᓕᕆᐊᒃᓴᖅ ᓱᓕ ᐅᕘᓈᕆᐊᖃᖅᐳᖅ ᓄᓇᕗᒻᒥ ᐱᔪᓐᓇᖅᑎᑦᑎᓂᐅᔪᓂ ᐱᓕᕆᓂᐅᔪᒥ ᐊᒻᒪ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓄᑦ, ᐱᔭᕆᐊᖃᖅᑎᑕᐅᔪᒥ ᐅᕘᓇ ᓄᓇᕗᒻᒥ ᐊᖏᕈᑕᐅᔪᒥ.

ᑭᓯᐊᓂ ᓱᒃᑲᓂᖅᓴᒥ ᒐᕙᒪᑐᖃᒃᑯᓐᓂ ᐱᔪᓐᓇᐅᑎᓂᑦ, ᓇᑉᐸᖅᑎᕆᓂᑦ ᐱᒋᐊᕈᓐᓇᖅᐳᑦ 2028−ᒥ — ᐊᕐᕌᒍᓄᑦ ᒪᕐᕉᖕᓄᑦ ᕿᓚᒻᒥᐅᓂᖅᓴᒥ ᓯᕗᓪᓕᕐᒥ ᓇᓚᐅᑦᑖᕆᔭᐅᓚᐅᕐᓂᖓᓂ — ᐅᖃᓚᐅᖅᐳᖅ ᕼᐃᐊᑐᕐ ᓯᐅᓪᑎᓐ, ᓄᒃᑭᒃᓴᐅᑏᑦ ᐃᓱᒻᒥᖅᑐᐃᔨᖓ.

“ᑕᐅᑐᒃᑲᔭᖅᐳᒍᑦ ᐊᕐᕌᒍᓄᑦ-ᐱᖓᓱᓄᑦ ᓇᑉᐸᖅᑎᕆᓂᐅᔪᒥ ᐃᒐᓛᖑᔪᒥ, ᑕᐃᒫᒃ 2030 ᑐᕌᒐᕆᔭᐅᓇᔭᖅᐳᖅ ᐱᓕᕆᐊᒃᓴᐅᓂᖓᓂ,” ᐅᖃᓚᐅᖅᐳᖅ.

ᓯᕗᓪᓕᐅᔪᒥ, ᐃᑲᔪᖅᓱᐃᔨᐅᔪᑦ ᓂᕆᐅᓚᐅᖅᐳᑦ ᐊᐅᓚᐅᑎᖃᕐᕕᖓᓂ ᐊᐅᓚᓕᕐᓂᖓᓂ 2033−ᖑᓕᖅᐸᑦ.

$500-ᒥᓕᐊᓐᑐᖅᑐᒥ ᐃᒪᕐᒧᑦ ᐆᒻᒪᖅᑯᑎᖃᕐᓂᕐᒧᑦ ᐊᐅᓚᐅᑎᖃᕐᕕᖓᓂ ᓴᓇᔭᐅᓂᐊᖅᐳᖅ ᓴᓂᓕᐊᓂ ᑰᒐᓗᒃ ᑰᖓᓂ, 60 ᑭᓛᒥᑐᐸᓗᖕᓂ ᐅᐊᖕᓇᒥ ᑲᓇᖕᓇᕐᒥ ᐃᖃᓗᖕᓂ. ᐃᓚᖃᕐᓂᐊᖅᐳᖅ 50-ᒦᑕᐸᓗᖕᓂ-ᖁᑦᑎᒃᑐᒥ ᓴᐳᑎᒥᒃ ᐊᒻᒪ ᐊᐅᓚᐅᑎᖃᕐᕕᖕᒥ ᐊᐅᓚᑦᑎᔪᓐᓴᖅᑐᒥ 15 ᒥᐊᒐᐅᐊᑦᓂ ᐆᒻᒪᖅᑯᑎᓂ ᐊᕐᕌᒍᐸᓗᖕᓄᑦ 100−ᓄᑦ.

ᓈᒻᒪᒃᑲᔭᖅᐳᖅ ᐃᓇᖏᖅᓯᓂᕐᒥ ᐃᖃᓗᖕᓂ ᐅᖅᓱᐊᓗᑐᐃᓐᓇᕐᒥ-ᐃᑭᑦᑎᔪᒥ ᐆᒻᒪᖅᑯᑎᓂ ᔭᓄᕋᐃᑕᖓᓂ, ᐱᔭᕆᐊᖃᖅᑐᒥ 15 ᒥᓕᐊᓐ ᓖᑕᓂ ᑎᑭᑎᑕᐅᔪᓂ ᐅᖅᓱᐊᓗᑐᐃᓐᓇᕐᒥ ᐊᕐᕌᒍᑕᒫᒥ, ᐅᖃᓚᐅᖅᐳᖅ ᕼᐃᐊᕆ ᕙᓚᕈᑎ, ᐊᖓᔪᖅᑳᖑᔪᖅ ᓄᓇᕗᒻᒥ ᓄᒃᑭᒃᓴᐅᑏᑦ ᑎᒥᖁᑎᖓᓐᓂ, ᐱᓚᐅᖅᑐᓂ ᐱᓕᕆᐊᒃᓴᐅᔪᒥ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᓐᓂ ᑎᒥᖁᑕᐅᔪᓂ 2022−ᒥ.

ᓄᓇᕗᒻᒥ ᑲᑎᒪᔨᕐᔪᐊᖑᔪᓂ ᐊᒥᓱᓂ ᐅᖃᐅᓯᒃᓴᖃᓚᐅᖅᐳᑦ ᐅᐱᒋᔭᖃᕐᓂᕐᒥ ᐱᕙᓪᓕᐊᑎᑕᐅᓂᐅᔪᒥ.

“ᐅᐊᑲᓪᓚᖔ ᐅᓪᓗᒥ ᐅᓪᓘᕗᖅ,” ᐅᖃᓚᐅᖅᐳᖅ ᓯᕗᓕᖅᑎ P.J. ᐊᕿᐊᕈᖅ. “ᐅᓇ ᑎᑭᐅᑎᔭᐅᔪᓐᓇᖅᓯᒪᔪᒥ ᑕᑯᒃᓴᐅᑎᑦᑎᓪᓚᕆᒃᐳᖅ ᑐᕌᖓᓂᖃᕐᓂᐅᔪᒥ ᐊᒥᓱᓂᑦ.”

ᓄᓇᕗᒻᒥ ᑐᙵᕕᒃᑯᑦ ᐊᖓᔪᖅᑳᖓ ᔨᐊᕋᒥ ᑑᙶᓗᒃ ᐅᖃᓚᐅᖅᐳᖅ ᐱᓕᕆᐊᒃᓴᖅ ᑐᑭᓕᐅᕆᕗᖅ “ᐱᔪᓐᓇᕐᓂᖃᕐᔪᐊᕐᓂᓪᓚᕆᐅᓂᖓᓂ ᑐᑭᖃᕐᓂᖓᓂ.” ᐊᒻᒪ ᐅᓛᔪᒃ ᐊᑭᓱᒃ, ᐊᖓᔪᖅᑳᖅ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖑᔪᒥ ᓴᖕᒥᓂᖃᖅᑐᒥ ᓄᒃᑭᒃᓴᐅᑏᑦᑯᓐᓂᒪ ᑕᐃᓯᓚᐅᖅᐳᖅ “ᐅᓪᓗᑦᑎᐊᕙᒻᒪᕆᐊᓘᓂᖓᓂ ᑲᑐᔾᔨᖃᑎᒌᑦᑎᓐᓄᑦ.”

ᒐᕙᒪᑐᖃᒃᑯᑦ ᓂᕆᐅᒋᔭᐅᕗᑦ ᐱᓕᕆᐊᒃᓴᐅᔫᑉ ᑮᓇᐅᔭᖃᖅᑎᑦᑎᓪᓚᕆᐅᓂᐊᕐᓂᖓᓂ ᐊᒻᒪ ᑐᓂᓯᓯᒫᓂᒃᐳᑦ $26 ᒥᓕᐊᓐᓂ ᖃᐅᔨᓴᖅᑕᐅᓂᕐᒧᑦ. ᒐᕙᒪᑐᖃᒃᑯᑦ ᐊᖏᔪᓂ ᐱᓕᕆᐊᒃᓴᐅᔪᓂ ᑎᑎᕋᕐᕕᖓᑕ ᐃᖅᑲᓇᐃᔭᖅᑎᖏᑦ “ᐃᒃᓯᕚᖃᑎᖃᕐᓂᐊᖅᐳᑦ ᐃᑲᔪᖅᓱᐃᔨᐅᔪᓂ ᐊᒻᒪ ᐅᖃᓪᓚᒃᐸᓪᓕᐊᓕᕐᓗᑎᒃ ᑮᓇᐅᔭᖃᖅᑎᑕᐅᓂᐅᔪᒥ,” ᐋᓪᑎ ᐅᖃᓚᐅᖅᐳᖅ.

ᓂᕈᐊᒐᒃᓴᓂ ᐃᓚᖃᕈᓐᓇᖅᐳᖅ ᑮᓇᐅᔭᖃᖅᑎᑕᐅᓂᐅᔪᒥ $1-ᐱᓕᐊᓐᓂ ᐅᑭᐅᖅᑕᖅᑐᒥ ᓄᓇᓖᑦ ᐊᑐᖅᐸᒃᑕᖏᓐᓂ ᐊᐅᓚᔪᓐᓇᖁᓪᓗᒋᑦ ᑮᓇᐅᔭᓂᒃ ᒫᓐᓇᓕᓴᐅᔪᒥ ᓴᖅᑭᑎᑕᐅᓚᐅᖅᑐᒥ 2025−ᒥ ᒐᕙᒪᑐᖃᒃᑯᑦ ᑮᓇᐅᔭᓂ ᐊᑐᖅᑕᐅᔪᒃᓴᓂ, ᐅᕝᕙᓘᓐᓃᑦ ᐊᑐᖅᑐᐊᕐᓂᐅᔪᒥ ᑲᓇᑕᒥ ᓄᓇᓖᑦ ᐊᑐᖅᐸᒃᑕᖏᓐᓂ ᐊᐅᓚᔪᓐᓇᖁᓪᓗᒋᑦ ᑮᓴᐅᔭᒃᑯᕕᖓᓐᓂ.

ᐊᑕᐅᓯᙳᖅᖢᓂ “ᐊᖏᔪᓂ ᐱᓕᕆᐊᒃᓴᐅᔪᓂ” ᐊᑦᑎᖅᑕᐅᓂᖓᓂ ᑳᓂᒧᑦ ᕙᕆᐊᖅᑎᑦᑎᓂᐊᕆᕗᖅ ᑲᑎᖅᓱᖅᑕᐅᕙᓪᓕᐊᔪᑦ ᑮᓇᐅᔭᑦ ᑐᖅᑯᖅᑕᐅᓯᒪᓪᓗᑎᒃ ᐱᕈᖅᐸᓪᓕᐊᑎᑦᑎᔨᐅᔪᓂ ᐅᒃᐱᕈᓱᖕᓂᖏᓐᓂ ᐃᒪᕐᒧᑦ ᐆᒻᒪᖅᑯᑎᖃᕐᓂᕐᒧᑦ ᐊᐅᓚᐅᑎᖃᕐᕕᖕᒧᑦ, ᐊᕿᐊᕈᖅ ᐅᖃᓚᐅᖅᐳᖅ.

“ᑮᓇᐅᔭᖃᖅᑎᑦᑎᓂᐅᔪᒥ ᐊᒻᒪ ᐃᑲᔪᖅᓱᐃᓂᕐᒥ ᒐᕙᒪᑐᖃᒃᑯᓐᓂ ᒪᑐᐃᖅᓯᓂᐊᖅᐳᑦ ᓄᑖᖑᔪᓂ ᐃᑲᔪᕈᑎᒃᓴᓂ,” ᐅᖃᓚᐅᖅᐳᖅ.