ᐃᖃᓗᖕᓂ ᐃᓅᓱᒃᑐᖅ ᐱᓇᓱᐊᕈᓯᐅᑉ ᓄᙳᐊᓂᒃ ᑲᑎᕐᓱᐃᕙᒃᑐᖅ ᐱᓲᑎᓂᒃ ᐊᒃᑕᕐᕕᒃᒥ ᐋᖅᑭᒃᓱᕐᓂᐊᖅᑕᖏᓐᓂᒃ ᓱᕈᓯᕐᓄᑦ

‘ᓱᕋᓰᑦ’ ᖁᖓᒃᑳᖓᑕ ᐱᑖᖅᖢᑎ ᓄᑖᒥᒃ ᐱᓲᑎᒥ ᖁᕕᐊᒋᓛᕆᕙᒃᑕᕋ,’ ᐅᖃᖅᑐᖅ ᔫᓴᕝ ᑕᒃᐹᓂ

13-ᓂ ᐅᑭᐅᓕᒃ ᔫᓴᕝ ᑕᒃᐹᓂ ᑲᑎᕐᓱᐃᕙᒃᑐᖅ ᓱᕋᒃᓯᒪᔪᓂᒃ ᐱᓲᑎᓂᒃ (bikes) ᐃᖃᓗᐃᑦ ᐊᒃᑕᕐᕕᖓᓂᒃ ᓈᑦᑎᖑᔭᓛᕐᓂᐊᙳᕌᖓᑦ ᐱᓕᕆᐊᕆᓂᐊᖅᑕᖏᓐᓂᒃ ᐱᓇᓱᐊᕈᓯᕐᒥᒃ ᐊᒻᒪᓗ ᑐᓂᖅᑯᑎᒋᕙᒃᖢᓂᒋᑦ ᓱᕈᓯᕐᓄᑦ. (ᐊᔾᔨᓕᐅᕆᔨ ᒥᓚᓂ ᐅᕆᑦᓵᑦ)

By ᒥᓚᓂ ᐅᕆᑦᓵᑦ

For an English version of this story, see Iqaluit teen spends weekends gathering bikes from dump to fix for local kids

ᑲᑎᕐᓱᐊᖃᑦᑕᕐᓂᖅ ᐃᒋᑕᐅᓯᒪᔪᓂᒃ ᐱᓲᑎᓂᒃ, ᐊᔭᐅᕈᑎᓂᒃ ᐊᒻᒪᓗ ᑎᓱᕋᐅᑎᓂᒃ ᐃᖃᓗᐃᑦ ᐊᒃᑕᕐᕕᖓᓂ ᐱᓕᕆᐊᕆᖃᑦᑕᖅᑕᖓ ᓈᑦᑏᖑᔭᓛᕐᓂᐊᖑᓕᕌᖓᑦ ᐆᒪ 13-ᓂ ᐅᑭᐅᖃᖅᑑᑉ ᔫᓴᕝ ᑕᒃᐹᓂᐅᑉ.

ᐱᓇᓱᐊᕈᓯᐅᑉ ᓄᙳᖓᓂ ᑲᑎᑦᑎᖃᑦᑕᖅᑐᖅ ᒫᓂ 7-ᓂ ᐱᓲᑎᓂᒃ ᐋᖅᑭᒃᓱᑲᑕᖕᓂᐊᖅᑕᖏᓐᓂᒃ ᐱᓇᓱᐊᕈᓯᕐᒥ ᑐᓂᓂᐊᕐᓗᓂᒋᑦ ᓱᕈᓯᕐᓄᑦ.

ᖁᓕᕇᒃᑑᑎᑦ ᓱᕋᒃᓯᒪᔪᑦ ᐱᓲᑎᑦ ᐅᑕᕿᔪᑦ ᔫᓴᕝ ᑕᒃᐹᓂᒥᒃ ᐃᒡᓗᖓᑕ ᐅᖓᑎᑦᑎᐊᖓᓂᒃ, ᓴᓇᓂᐊᕐᒪᒋᑦ ᓄᑖᙳᕐᑎᓪᓗᓂᒋᑦ. (ᐊᔾᔨᓕᐅᕆᔨ ᒥᓚᓂ ᐅᕆᑦᓵᑦ)

“ᐃᓱᒪᓚᐅᕋᒪ, ‘ᐅᑯᐊ ᓱᕈᓰᑦ ᐱᓲᑎᖃᙱᑦᑐᑦ, ᐹᖃᑎᒌᖏᓐᓇᓲᑦ ᑖᒃᑯᓄᖓ, ᑕᐃᒪᓕ ᐋᖅᑭᒃᓱᐃᖃᑦᑕᓪᓗᐊᖅᑐᖓ ᑖᒃᑯᓄᖓ,” ᑕᒃᐹᓂ ᐅᖃᖅᑐᖅ.

“ᓱᕈᓯᑦᑎᐊᕙᐅᖕᒪᑕ ᐊᒻᒪᓗ ᐹᖃᑦᑕᐅᑎᓪᓗᐊᙱᖢᑎᒃ.”

ᒫᓐᓇᒧᓪᓕ ᑕᒃᐹᓂ ᐃᓱᒪᔪᑦ ᒫᓂ 100-ᖏᓐᓂ ᐋᖅᑭᒃᓯᓯᒪᓕᕐᓂᖓᓂ ᐊᒻᒪ ᑐᓂᖅᑯᑎᖃᕐᓯᒪᓕᕐᓂᖓᓂᒃ ᐊᕐᕌᒍᑦ ᐱᖓᓱᑦ ᐃᓗᐊᓂ.

ᐊᒥᓱᓪᓕ ᐋᖅᑭᒐᕐᓂᓚᐅᑐᑦ, ᓲᕐᓗ ᓄᑖᒥ ᓴᐃᓐᑖᕆᐊᓖ ᐊᒻᒪᓗ 20 ᒥᓂᑦᔅᓗᐊᓂ ᐋᖅᑭᐊᓂᒐᒃᓴᐅᓪᓗᑎᒃ, ᐅᖃᖅᑐᖅ.

ᐊᓯᖏᓪᓗ ᓴᓇᓂᕐᓴᐅᔭᕆᐊᖃᖅᖢᑎᒃ ᒪᑯᑎᑐᓇᖅ ᓱᒃᑲᓴᐅᑎᖓᑕ ᐊᓯᙳᖅᑎᑦᑎᔾᔪᑎᖓᑎᑐᑦ.

ᐊᓯᒃᑲᓐᓂᖓᓕ ᐱᓕᕆᒋᐊᖃᕐᓇᕈᑎᐅᓚᐅᕐᑐᖅ ᑕᒪᒃᑯᐊ ᐱᓲᑎᕕᓃᑦ ᐊᒃᑕᕐᕕᖕᒥ ᐱᓇᓱᑲᑕᖕᓂᒃ.

ᔫᓴᕝ ᑕᒃᐹᓂ ᐋᖅᑭᒃᓱᐃᔪᖅ ᐱᓲᑎᓂᒃ, ᓱᕈᓯᕐᒥ ᐊᕙᐅᕈᑎᒥᒃ, ᒪᕐᕉᖕᓂ ᑎᓱᕋᐅᑏᖕᓂᒃ ᐊᒻᒪᓗ ᓯᑰᑕᒥ ᓱᕈᓯᕐᓄᑦ ᐱᔭᐅᓂᐊᖅᑐᓂᒃ ᐅᒃᑑᐱᕆ 13-ᖑᑎᓪᓗᒍ. (ᐊᔾᔨᓕᐅᕆᔨ ᒥᓚᓂ ᐅᕆᑦᓵᑦ)

“ᕿᓂᖃᑦᑕᕐᓯᒪᒐᑦᑕ ᐱᓲᑎ ᐊᑕᐅᓯᕐᒥ ᐊᑯᓂᕈᓗ ᑭᓯᐊᓂᓕ ᓇᓂᔪᓐᓇᙱᑕᕗᑦ,” ᐅᖃᖅᑐᖅ.

“ᖃᓄᐃᙱᑦᑎᐊᖅᑐᖅ, ᓯᕗᓪᓕᖅ ᐊᒃᓴᓗᐊᖓ ᐳᓪᓚᒃᓴᕆᐊᖃᕐᒪᓐ

ᐃᒪᓐᓇᐅᕙᒃᖢᓂ ᑕᒃᐹᓂ, ᐊᑕᐅᓯᕐᒥ ᐋᖅᑭᒃᓱᐃᕙᒃᖢᓂ ᐱᓲᑎᓂᒃ ᐃᓕᓐᓂᐊᕌᓂᒃᑳᖓᓂᒃ. ᐋᖅᑭᒃᓯᒪᔪᑦ ᐅᓄᕐᓯᓕᕌᖓᑕ ᐋᖅᑭᒃᑕᐅᕙᒃᖢᑎᒃ ᓯᓚᒥ ᓱᕈᓯᕐᓄ ᐊᖓᔪᖅᑳᖏᓐᓄᓪᓗ ᐱᔭᐅᔪᓐᓇᕐᓂᐊᕐᒪᑕ.

“ᖁᕕᐊᒋᓂᖅᐹᕆᕙᒃᑕᕋᓕ ᓱᕈᓰᑦ ᖁᖓᒃᑳᖓᑕ ᓄᑖᒥ ᐱᓲᑎᒥ ᐱᑎᓪᓗᒋ,” ᑕᒃᐹᓂ ᐅᖃᖅᑐᖅ.

“ᖁᕕᐊᒋᖃᑦᑕᕋᒃᑯ ᓱᕈᓰᑦ ᑕᑯᓪᓗᒋᑦ ᖁᕕᐊᓱᒃᑐᑦ ᐊᒻᒪ ᐊᓯᖏᑦ.”

ᐱᖓᔅᓯᐅᓚᐅᕐᑐᒥ ᐅᓐᓄᓴᒃᑯᑦ ᐱᓯᒪᓚᐅᕐᑕᖏ ᒫᓂ 12 ᐱᓲᑎᒃ ᐊᖏᓕᕇᒃᑑᑎᑦ, ᐊᔭᐅᕈᑎ ᓄᑖᓂᒃ ᐊᒃᓴᓗᐊᓕᒃ ᐊᒻᒪ ᒪᕐᕉᒃ GT ᑎᓱᕋᐅᑏᒃ ᓄᑖᓂᒃ ᓯᐊᕐᕆᔮᕈᑎᖃᖅᖢᑎᒃ ᐊᑐᐃᓐᓇᐅᓕᕐᓯᒪᔪᑦ ᐅᑭᐅᕐᒧᑦ.

ᐅᓪᓗᖅ ᐃᓱᓕᑎᓪᓗᒍ ᑕᒪᕐᒥᓕᒫᖅ ᐱᓲᑏᑦ ᐱᔭᐅᓚᐅᕐᑐᑦ.

“ᐃᒡᓗᑦᑕ ᐅᖓᑖᓃᖃᑦᑕᕋᒪ, ᐅᔾᔨᕈᓱᒍᓐᓇᙱᑦᑐᖓ, ᑕᑯᒋᐊᕌᖓᑕ ᓱᓕ ᐱᑕᖃᕐᒪᖔᑦ, ᓄᖑᓯᒪᖃᑦᑕᕐᑐᑦ,” ᐅᖃᖅᑐᖅ.

ᑕᑯᖃᑦᑕᖅᑕᖏᑦ ᐱᓲᑎᑦ ᓴᓇᓯᒪᔭᖏ ᐊᑐᖅᑕᐅᑲᑕᒃᑐᑦ. ᒫᓐᓇᓵᕐᓕ ᑐᓂᓯᓇᓱᒃᑎᓪᓗᒍ ᐱᓲᑎᒥᒃ ᓱᕈᓯᕐᒧᑦ, ᐊᓯᖓᓂ ᓱᕈᓯᕐᒥ ᑕᑯᓚᐅᕐᑐᖅ ᐊᑐᖅᑐᒥᒃ ᓴᓇᓂᑯᖓᓂᒃ.

“ᑖᓐᓇ ᓱᕈᓯᖅ ᖁᕕᐊᓱᒻᒪᕆᓚᐅᕐᑐᖅ, ᐃᒡᓚᑲᑕᒃᖢᓂ ᐊᒻᒪᓗ ᐱᓲᑎᖃᑎᖃᑲᑕᒃᖢᑎᒃ,” ᐅᖃᖅᑐᖅ ᑕᒃᐹᓂ.

“ᐊᐱᕆᓪᓗᒍ ᐅᕙᓐᓂ ᐃᖅᑲᐅᒪᔭᕆᐊᒃᓴᖓᓂ…ᐅᖃᖅᖢᓂ, ‘ᐄ, ᐊᒻᒪ ᓇᑯᕐᒦ ᐊᒃᓱᐊᓗᒃ, ᐅᓇ ᐱᓲᑎ ᐱᐅᒋᑦᑎᐊᖅᑕᕋ.’”

ᑕᒃᐹᓂ ᐃᒡᓗᖓᑕ ᐅᖓᑖᓂ ᐋᖅᑭᒃᓱᐃᖃᑦᑕᖅᑐᖅ ᓱᕋᒃᓯᒪᔪᓂᒃ, ᖃᓂᒋᔭᖓᓂ ᐱᓲᑎᕕᓃᑦ ᐅᑕᖅᑭᔪᑦ ᐋᖅᑭᒃᓱᖅᑕᐅᓂᐊᕐᒪᑕ. ᓂᒡᓚᕐᓂᕐᓴᐅᓕᕋᓗᐊᖅᑎᓪᓗᒍ ᓯᓚ ᓱᓕ ᑕᒪᑐᒥᖓ ᐱᓕᕆᐊᖃᐃᓐᓇᕐᓂᐊᕐᑐᖅ.

ᔫᓴᕝ ᑕᒃᐹᓂ ᐅᖃᓚᐅᕐᑐᖅ ᓄᖅᑲᔾᔮᙱᓐᓂᕋᖅᖢᓂ ᐱᓲᑎᓂᒃ ᐋᖅᑭᒃᓱᐃᖃᑦᑕᕐᓂᖓᓂᒃ ᓯᓚ ᓂᒡᓚᕋᓗᐊᖅᐸᑦ ᐊᒻᒪᓗ ᑖᕐᓯᓴᕋᐃᓕᕋᓗᐊᖅᐸᑦ ᐅᑭᐅᖅ. (ᐊᔾᔨᓕᐅᕆᔨ ᒥᓚᓂ ᐅᕆᑦᓵᑦ)

“ᖃᓄᐃᒋᙱᑕᕋ ᐃᒃᑮᖑᑎᓪᓗᒍ, ᖃᐅᒪᖃᕋᒪ, ᐊᒻᒪᓗ ᐅᖅᑰᓴᐅᑎᖃᕐᖢᖓ.”

ᐃᓚᒃᓴᕆᖃᑦᑕᖅᑕᖏᑦ ᐊᒃᑕᕐᕕᖕᒥᙶᕐᒥᔪᑦᑕᐅᖅ, ᐃᓚᒃᓴᖃᐅᖅᖢᓂ ᐊᔾᔨᒌᙱᑦᑐᓂᙶᖅᑐᓂᒃ ᐱᓲᑎᓂᒃ. ᓇᓂᓯᖃᑦᑕᕐᒥᔪᖅ ᐱᓲᑎᕕᓂᕐᓂᒃ ᐋᖅᑭᖕᓂᑯᖏᑦ ᐊᒃᑕᕐᕕᖕᒦᑦᑐᓂᒃ.

“ᐃᓚᖏ ᐃᓄᐃᑦ ᐱᑐᐃᓐᓇᖅᖢᑎᒃ ᓱᕋᒃᓯᑐᐃᓐᓇᖃᑦᑕᕐᒪᑕ,” ᐅᖃᖅᑐᖅ.

ᓱᓕ, ᐋᖅᑭᒃᓱᐃᖃᑦᑕᐃᓐᓇᖅᑐᖅ ᑖᒃᑯᓂᖓ.

ᐃᓚᖏᑦ ᐱᓲᑎᑦ ᐱᓕᕆᐊᕆᓂᕐᓴᐅᔭᕆᐊᖃᖅᑎᓪᓗᓂᒋᑦ, ᑕᒃᐹᓂ ᐅᖃᓚᐅᕐᑐᖅ ᐊᒧᔭᐅᔪᒃᓴᓂ ᐱᐅᓂᕐᓴᓂᒃ ᐸᐃᓯᑰᓂᒃ ᐱᓕᕆᐊᖃᓛᕈᒪᓪᓗᓂ ᑮᓇᐅᔭᓕᐅᕋᓱᒡᓗᓂ ᐃᓚᒃᓴᖅᑖᕈᑎᒃᓴᓄᑦ.

ᐃᒻᒥᓂᒃ ᐊᔪᕈᓐᓃᕐᓯᒪᓪᓗᓂ, ᑕᒃᐹᓂ ᐊᔪᕈᓐᓃᓚᐅᕐᓯᒪᔪᖅ ᐱᓲᑎᓂᒃ ᐋᖅᑭᒃᓱᐃᔭᕆᐊᒃᓴᖅ ᑕᐅᑐᒃᖢᓂ ᓄᓇᓯᐅᑎᓂ ᐋᖅᑭᒃᓱᐃᕙᒃᑐᓂᒃ ᑕᓚᕖᓴᒃᑯᑦ.

“ᐃᓱᒪᒋᓚᐅᕋᒃᑭ ᓄᓇᓯᐅᑎᑐᑦ ᐋᖅᑭᒃᓯᒪᐸᓗᖕᓂᖏᓐᓂᒃ ᑕᐃᒪᓕ ᐊᔪᕐᓇᖅᑰᔨᙱᖢᓂ ᓴᓇᔭᕆᐊᒃᓴᖅ,” ᐅᖃᖅᑐᖅ. “ᐊᒻᒪᓗ ᑕᒪᓐᓇ ᐱᓕᕆᑐᐃᓐᓇᓕᓚᐅᖅᖢᒍ.”

ᑖᓐᓇ ᐃᓅᓱᒃᑐᖅ ᐱᓲᑎᓂᒃ ᐋᖅᑭᒃᓱᐃᔨ ᒫᓐᓇᒧ ᓴᓇᔭᕆᐊᖃᕐᓂᐊᓕᖅᑐᖅ 50 ᐅᖓᑖᓂ ᐱᓲᑎᓂᒃ ᓱᕈᓯᕐᓄ ᑐᓂᔭᐅᑎᓪᓗᒍ ᐅᒃᑑᐱᕆ 14-ᒥ. (ᐊᔾᔨᓕᐅᕆᔨ ᐊᐃᓇ ᑎᑭᕕᒃ)

ᑖᓐᓇ ᓄᓇᓯᐅᑎᓂᒃ ᓱᕋᒃᓯᒪᔪᓂ ᓴᓇᔨᐅᖃᑦᑕᓛᕈᒪᔪᖅ ᐅᖃᓚᐅᕐᑐᑦ ᓄᓇᓯᐅᑎᓂ ᐊᔪᕈᓐᓃᕐᓴᕈᒪᓂᕋᖅᖢᓂ ᐃᓕᓐᓂᐊᕐᕕᖕᒥ ᒍᕇᑦ 10-ᒥ ᐃᓕᓐᓂᐊᓕᕈᓂ ᐃᓄᒃᓱᒃ ᐃᓕᓐᓂᐊᕐᕕᐊᓗᒃᒥ ᐊᕐᕌᒎᓕᕐᐸᑦ.

“ᓄᓇᓯᐅᑎᓂᒃ ᓱᕋᒃᓯᒪᔪᓂᒃ ᓴᓇᖃᑦᑕᓛᖅᑐᖓ ᑭᓯᐊᓂᓕ ᓄᓇᓯᐅᑎᓂᒡᓗ ᐊᒻᒪ ᐱᓲᑎᓂᒃ ᐱᓕᕆᐊᖃᕈᓐᓇᕋᔭᖅᐳᖓ, ᐊᔪᕐᓇᙱᒻᒪᑕ.”

ᐅᒃᑑᐱᕆ 14-ᒥ, ᑕᒃᐹᓂ ᑐᓂᔭᐅᓚᐅᕐᓯᒪᔪᖅ 50 ᐅᖓᑖᓂᒃ ᐱᓲᑎᓂᒃ ᑕᓐᑐᕋ ᕚᓕᒥᐅᑕᒥᒃ ᑲᑎᑦᑎᔪᕕᓂᐅᓪᓗᓂ ᓱᕋᒃᓯᒪᔪᓂᒃ ᐊᕐᕌᒎᖕᓂ ᒪᕐᕉᖕᓂᒃ.

ᒫᓐᓇᓕ ᑕᒃᐹᓂ ᐱᓕᕆᐊᒃᓴᖃᑦᑎᐊᖅᑐᖅ.

Share This Story

(0) Comments

Join the Conversation

Your email address will not be published. Required fields are marked *

*