ᐃᖃᓗᖕᓂ ᐃᓕᓐᓂᐊᖅᑎ ᓵᓚᖃᖅᐳᖅ New York Times ᑎᑎᕋᕐᓂᕐᒧᑦ ᓵᓚᖃᕋᓱᐊᕐᓂᐅᔪᒥ

For English version, see Iqaluit student wins New York Times writing contest

ᐃᓚᒋᔭᐅᓪᓗᓂ ᐅᓄᕐᓂᖅᓴᐅᔪᓂ 1,400−ᓂ ᐃᓅᓱᒃᑐᓂ ᐊᒻᒪ ᒪᒃᑯᒃᑐᓂ ᓄᓇᕐᔪᐊᓕᒫᒥ ᓵᓚᖃᕋᓱᐊᓚᐅᖅᑐᓂ ᑎᑎᕋᖅᑕᒥᓂ ᓴᖅᑭᑎᑕᐅᓂᖓᓂ New York Times−ᒥ ᑕᒪᑐᒪᓂ ᐊᕐᕌᒎᔪᒥ, ᐃᖃᓗᖕᓂᕐᒥᐅᑕᖅ ᑲᐃᑎ ᔫ ᓴᖅᑭᓚᐅᖅᑐᒥ ᐊᑕᐅᓯᐅᓪᓗᓂ 10−ᓂ ᓵᓚᖃᖅᑎᐅᔪᓂ.

“ᒥᓂᑦ−ᒐᓚᖕᒥ ᑐᑭᓯᓪᓚᕆᖕᓂᖃᕐᓇᓚᐅᖅᐳᖅ,” ᔫ ᐅᖃᓚᐅᖅᐳᖅ ᑕᐃᑲᓂ ᑐᓴᕋᒥ ᑐᓴᒐᒃᓴᐅᔪᒥ.

ᔭᓄᐊᕆᒥ, ᐃᓚᐅᖃᑕᐅᓚᐅᖅᐳᖅ ᑎᑎᕋᕐᓂᕐᒥ ᓵᓚᖃᕋᓱᐊᕐᓂᐅᔪᒥ ᐋᖅᑭᑦᓱᖅᑕᐅᓯᒪᔪᒥ ᐃᓕᑦᑎᓂᕐᒧᑦ ᑲᓱᖃᑎᒌᒃᓯᒪᔪᓄᑦ, ᐃᓕᓐᓂᐊᕐᓂᓕᕆᓂᕐᒥ ᐃᓚᖓᓐᓂ New York Times−ᑯᓐᓂ.

ᐃᓚᐅᖃᑕᐅᔪᑦ ᐅᑭᐅᖃᕆᐊᓕᖕᓂ ᕿᑎᐊᓂ 11−ᒥ ᐊᒻᒪ 19−ᒧᑦ, ᑐᓂᓯᓚᐅᖅᐳᑦ ᐊᐱᖅᑯᑕᐅᔪᒥ-ᐊᒻᒪ-ᑭᐅᓂᕐᒥ ᑭᓇᐅᓂᖓᓂ 700 ᐅᖃᐅᓯᕐᓂᑦ ᐅᓄᙱᓐᓂᖅᓴᐅᔪᒥᓪᓘᓐᓃᑦ ᑭᓇᑐᐃᓐᓇᒥᒃ ᑲᒪᓇᕆᕐᔪᐊᖅᑕᖓᓂ.

ᓵᓚᖃᖅᑎᐅᔪᑦ ᑎᑎᕋᖅᑕᖏᓐᓂ ᑎᑎᕋᖅᑕᐅᓇᔭᖅᐳᑦ Times−ᓂ, ᐊᑕᐅᓯᐅᔪᒥ ᓄᓇᕐᔪᐊᑉ ᐱᓐᓇᕆᔭᐅᓛᖓᓂ ᑐᓴᒐᒃᓴᓂ ᑎᑎᕋᖅᑕᐅᕙᒃᑐᓂ ᓄᓇᕐᔪᐊᓕᒫᒥ ᑐᓐᓂᖅᓴᖅᑕᐅᓲᖑᔪᒥ.

ᔫ, 16-ᓂ-ᐅᑭᐅᓕᒃ ᐃᓕᓐᓂᐊᖅᑎᐅᔪᖅ ᐃᓄᒃᓱᒃ ᖁᑦᑎᒃᑐᒥ ᐃᓕᓐᓂᐊᕐᕕᖕᒥ, ᓂᕈᐊᓚᐅᖅᐳᖅ ᐊᐱᖅᓱᕐᓂᕐᒥ ᓇᐃᐊᑐᕐ ᓯᐅᓪᑎᓐᒥ, ᑐᑭᒧᐊᒃᑎᑦᑎᔨ ᓄᓇᕗᒻᒥ ᓄᒃᑭᒃᓴᐅᑏᑦ ᑎᒥᖁᑕᐅᔪᓂ, ᐃᓄᖕᓄᑦ ᓇᖕᒥᓂᕆᔭᐅᔪᒥ ᓄᓇᒥᙶᖅᑐᒥ ᐆᒻᒪᖅᑯᑎᓂ ᐱᕙᓪᓕᐊᑎᑦᑎᓂᐅᔪᒥ ᑲᑐᔾᔨᖃᑎᒌᖑᔪᓂ ᑐᙵᕕᖃᖅᑐᒥ ᐃᖃᓗᖕᓂ.

ᐊᓯᖏᓐᓂ ᓵᓚᖃᕋᓱᐊᕐᓂᐅᔪᒥ ᓵᓚᒃᓴᖅᑐᑦ ᐊᔾᔨᒌᙱᕈᓘᔭᖅᑐᓂ ᑎᑎᕋᐅᓯᖃᓚᐅᖅᐳᑦ: ᐊᑕᐅᓯᖅ ᐊᐱᖅᓱᓚᐅᖅᐳᖅ ᐊᕐᓇᒥ ᐊᖏᕐᕋᖓ ᕕᓕᐲᓐᓂ ᓱᔪᐃᑦᑎᐊᖅᑕᐅᓚᐅᖅᑐᒥ ᐆᓇᖅᑐᒥᐅᑕᓂ ᓯᓚᓗᕐᔪᐊᕐᓂᐅᔪᒥ; ᐊᓯᐊᓂ ᐅᖃᓪᓚᖃᑎᖃᓚᐅᖅᐳᖅ ᓵᓚᖃᐅᓯᐊᒥ−ᓵᓚᖃᖅᑎᒥ ᓴᓇᐅᒐᓕᕆᔨᒥ ᐅᖃᐅᔾᔭᐅᓚᐅᖅᑐᒥ ᑕᖅᑭᓂ 6−ᓂ ᐆᒪᑐᐃᓐᓇᕆᐊᖃᕐᓂᖓᓂ.

ᔫᒧᑦ, ᓵᓚᖃᕋᓱᐊᕐᓂᖅ ᐃᓚᖃᑦᑎᐊᖅᐳᖅ ᐱᔪᒪᓂᕆᔭᖓᓂ ᑎᑎᕋᕐᓂᕐᒥ ᐊᒻᒪ ᑎᑎᕋᖅᑎᐅᔪᒥ ᑐᓴᒐᒃᓴᓕᕆᓂᕐᒧᑦ, ᐃᒻᒥᓂᒃ ᐱᔪᓐᓇᖅᑎᑦᑎᔪᒥ ᐅᓂᒃᑳᖅᑎᐅᓂᖓᓂ, ᐅᖃᓚᐅᖅᐳᖅ.

“ᐅᖃᓪᓚᖃᑎᖃᕈᒪᓲᖑᕗᖓ ᑭᓱᑐᐃᓐᓇᓂ ᑐᓴᒃᑲᓐᓂᕈᒪᔭᓐᓂ, ᐹᖅᓯᓂᕐᒥ ᐃᓄᖕᓂ ᐊᒻᒪ ᐃᓕᑦᑎᓂᕐᒥ ᐊᑐᕐᓂᑯᖏᓐᓂ,” ᐅᖃᓚᐅᖅᐳᖅ.

ᔫ ᐹᖅᓯᓂᖃᓚᐅᖅᐳᖅ ᓯᐅᓪᑎᓐᒥ ᑕᑯᒃᓴᐅᑎᑦᑎᓂᖃᖅᑎᓪᓗᒍ ᑲᑎᙵᓂᐅᔪᓄᑦ ᖁᑦᑎᒃᑐᒥ ᐃᓕᓐᓂᐊᕐᕕᖕᒥ. ᖃᐅᔨᒃᑲᓐᓂᕈᒪᓪᓗᓂ ᐱᓕᕆᓂᕆᕙᒃᑕᖓᓂ — ᐊᒻᒪᓗ ᖁᕕᐊᒋᔭᖃᑦᑎᐊᕐᓂᖓᓂ ᓯᓚᐅᑉ ᒪᓕᒐᓕᕆᓂᕐᒥ ᐊᒻᒪ ᓄᓇᒥᙶᖅᑐᒥ ᐆᒻᒪᖅᑯᑎᓄᑦ ᐃᒻᒥᓂᒃ — ᓂᕈᐊᖅᓯᓚᐅᖅᐳᖅ ᓯᐅᓪᑎᓐᒥ ᐊᐱᖅᓱᖅᑕᐅᓂᐅᔪᒥ ᐅᖃᐅᓯᒃᓴᖓᓄᑦ, ᔫ ᐅᖃᓚᐅᖅᐳᖅ.

ᐊᐱᖅᓱᕐᓂᖓᓴ ᐊᐱᖅᑯᑎᖏᑦ ᐱᓕᕆᓂᖃᓚᐅᖅᐳᖅ ᑐᙵᕕᐅᔪᒥ ᐃᓱᒪᒋᔭᐅᓂᐅᔪᓂ ᓵᓚᖃᕋᓱᐊᕐᓂᕐᒥ ᓯᓚᐅᑉ ᐊᓯᔾᔨᐸᓪᓕᐊᓂᖓᓂ ᐊᒻᒪ ᖃᓄᖅ ᑕᐅᑦᑐᖃᕋᔭᕐᓂᖓᓂ ᐃᓄᖕᓂ ᓄᓇᓕᐅᔪᓂ, ᓲᕐᓗ “ᒪᓕᒐᓕᕆᓂᖃᑦᑎᐊᖅᑐᒥ ᓅᓐᓂᐅᔪᒥ” ᓄᓇᒥᙶᖅᑐᒥ ᐆᒻᒪᖅᑯᑎᖃᕐᓂᕐᒥ ᑐᑭᖃᕋᔭᕐᓂᖓᓂ ᓄᓇᕗᒻᒧᑦ.

“[ᐊᐱᖅᑯᑏᑦ] ᐅᕙᙶᓚᐅᖅᐳᑦ ᖃᐅᔨᔪᒪᓂᓐᓂ ᐊᒻᒪ ᐱᓕᕆᓂᖃᕈᒪᓐᓂᓐᓂ,” ᔫ ᐅᖃᓚᐅᖅᐳᖅ.

ᑭᓇᐅᓂᖓᓄᑦ, ᓴᖅᑭᑎᑕᐅᔪᒥ ᒪᐃ 31−ᒥ ᐊᒻᒪ ᑕᐃᒎᓯᓕᖕᒥ ᐆᒻᒪᖅᑯᑎᑦ ᐃᒻᒥᓂᒃ ᓴᙱᒃᑎᑦᑎᓲᖑᕗᖅ, ᔫ ᐃᓚᓕᐅᔾᔨᓚᐅᕆᕗᖅ ᖃᔅᓯᐊᕐᔪᖕᓂ ᒫᓐᓇᐅᔪᒥ ᐊᑐᖅᑕᐅᒐᔪᒃᑐᒥ ᐃᓕᖅᑯᓯᐅᔪᒥ ᐊᐱᖅᑯᑕᐅᔪᓂ, ᐊᐱᕆᓪᓗᓂ ᓯᐅᓪᑎᓐᒥ ᐃᓱᒪᒋᓂᕆᔭᖏᓐᓂ ᐊᕙᑎᒧᑦ−ᐱᔾᔪᑎᓕᖕᒥ ᑕᕐᕆᔭᓕᐊᖑᔪᒥ, Don’t Look Up−ᒥ.

ᑕᕐᕆᔭᓕᐊᖑᔪᖅ ᐅᖃᓪᓚᖕᓂᖃᕐᔪᐊᖅᑎᑦᑎᓚᐅᖅᐳᖅ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓂ ᑕᐃᔅᓱᒪᓂ ᐊᐱᖅᓱᖅᑕᐅᓂᐅᔪᒥ ᔭᓄᐊᕆᒥ, ᑕᐃᒫᒃ ᔫ ᐃᓱᒪᓚᐅᖅᐳᖅ ᐃᓚᓕᐅᔾᔨᓪᓗᐊᕐᓂᖓᓂ.

ᑭᓯᐊᓂ ᐊᒃᓱᕈᕐᓇᖅᑐᒃᑰᕐᓂᕐᒥ, ᐃᓗᐊᓃᑦᑕᕆᐊᖃᕐᓂᖓᓂ ᐃᓗᐊᓂ 700-ᐅᖃᐅᓯᕐᓂ ᑭᒡᓕᐅᔪᒥ ᐊᑕᐅᓯᐅᓚᐅᖅᐳᖅ ᐊᖏᓂᖅᓴᐅᔪᓂ ᔫ ᐅᖃᓚᐅᖅᐳᖅ ᓵᙵᓚᐅᖅᑕᖓᓂ.

ᑕᑭᔪᐊᓗᖕᒥ ᑎᑎᕋᖅᓯᒪᓂᖃᓚᐅᖅᐳᖅ ᐅᖃᐅᓯᐅᓂᒃᑯᑦ ᐊᒻᒪ ᐊᒥᓱᓂ ᐊᐱᖅᓱᕐᓂᖃᓚᐅᖅᐳᖅ ᐊᐱᖅᓱᕐᓂᐅᔪᒥ, ᑭᓯᐊᓂ ᐅᖃᐅᓯᕐᓄᑦ ᑭᒡᓕᖓ ᓂᕈᐊᖅᑎᑦᑎᓂᖃᓚᐅᖅᐳᖅ ᓇᓕᐊᖕᓂ ᐊᐱᖅᑯᑎᓂ ᐊᒻᒪ ᑭᐅᓂᐅᔪᓂ ᐲᖅᓯᓇᔭᕐᓂᖓᓂ ᑎᑎᕋᖅᑕᖓᓂ.

“ᐄᓪᓚᕆᒃ, ᐊᒥᓱᓂ ᐋᖅᑭᒋᐊᖅᓯᒃᑲᓐᓂᕐᓂᐅᔪᒥ ᐊᒻᒪ ᐃᓱᒪᓕᐅᕆᓂᕐᒥ ᑭᓱᑦ ᐱᒻᒪᕆᐅᓛᖑᓂᖏᓐᓂ,” ᔫ ᐅᖃᓚᐅᖅᐳᖅ.

ᓯᓚᑖᓂ ᑎᑎᕋᕐᓂᕐᓄᑦ ᓵᓚᖃᕋᓱᐊᕐᓂᐅᔪᓂ, ᔫ ᐃᓚᒋᔭᐅᖃᑕᐅᕗᖅ 13−ᓂ ᒪᒃᑯᒃᑐᓂ ᑲᓇᑕᒥᐅᑕᓂ ᒐᕙᒪᑐᖃᒃᑯᓐᓂ ᐃᖅᑲᖅᑐᒐᒃᓴᙳᖅᑎᑦᑎᓇᓱᐊᕐᓂᕐᒥ ᒪᓕᒐᐅᔪᒥ ᐱᔪᓐᓇᖅᑎᑦᑎᙱᑦᑐᓂ ᑲᓇᑕᒥᐅᑕᓂ ᐅᑭᐅᓕᖕᓂ 18 ᑐᖔᓂ ᓂᕈᐊᕈᓐᓇᕐᓂᕐᒧᑦ.

ᑎᓯᐱᕆᒥ, ᔫ ᐅᖃᓚᐅᖅᐳᖅ ᓂᕈᐊᕐᓂᕐᒧᑦ ᐅᑭᐅᕆᔭᖓ ᐊᑦᑎᒃᓯᒋᐊᖅᑕᐅᓪᓗᐊᖅᐳᖅ ᐊᑲᐅᙱᓕᐅᕈᑎᑕᖃᕐᒪᑦ ᑲᓇᑕᒥ ᐊᒃᑐᐃᕙᒃᑐᓂ ᒪᒃᑯᒃᑐᓂ ᑲᓇᑕᒥᐅᑕᓂ ᕿᓚᒻᒥᐅᔪᒥ ᐊᒻᒪ ᐊᑯᓂᐅᔪᒥ, ᓲᕐᓗ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓂ, ᐃᓱᒪᒧᑦ ᐋᓐᓂᐊᖃᕐᓇᙱᑦᑐᓕᕆᓂᕐᒥ ᐊᒻᒪ ᐃᓅᓯᐅᔪᒥ ᑭᖑᓂᐊᒍᑦ ᐊᒥᓱᓄᑦ ᖃᓂᒻᒪᓐᓇᐅᔪᒥ.

ᑎᑎᕋᖅᑕᖓᓂ New York Times−ᒦᓕᕐᓂᖓᓂ, ᐅᖃᓚᐅᖅᐳᖅ ᑎᑎᕋᐃᓐᓇᖃᑦᑕᕐᓂᐊᖅᐳᖅ ᐊᔪᙱᓐᓂᐅᖕᒪᑦ ᐃᓚᓕᐅᔾᔭᐅᔪᓐᓇᖅᑐᒥ ᑭᓱᑐᐃᓐᓇᑦᑎᐊᒧᑦ ᐱᓕᕆᕙᒃᑕᖓᓂ.

ᐊᒻᒪᓗᑦᑕᐅᖅ ᐅᓂᒃᑳᖅᑐᐊᕐᓂᕐᒥ, ᐱᐅᓪᓗᑎ ᐱᓕᕆᓂᐅᕗᖅ ᐃᑲᔪᖅᓱᐃᓂᕐᒥ ᐃᒻᒥᓄᑦ, ᐃᓚᒋᐊᖅᓯᓚᐅᖅᐳᖅ.

“ᐱᓯᒪᐃᓐᓇᓪᓚᕆᖕᓂᐊᖅᐸᕋ ᐃᓚᒋᔭᐅᓗᓂ ᐱᓕᕆᕙᒃᑕᓐᓂ.”