ᐱᓇᓱᐊᕈᓯᖅ ᐃᓱᓕᑎᓪᓗᒍ ᐃᓕᓐᓂᐊᖅᓚᐅᖅᖢᑎᒃ ᐅᖃᐅᓯᓕᕆᓂᕐᒥᒃ, ᐅᑯᐊ ᒍᕇᑦ 8-ᒥ ᐃᓕᓐᓂᐊᖅᑎᐅᔪᑦ ᐊᖅᓴᖅᓃᑦ ᐃᓕᓐᓂᐊᖅᕕᒃᒥᑦ ᐊᑭᓐᓇᕐᒥᐅᑕᒃᓴᒥᓐ ᓴᓇᖁᔭᐅᓚᐅᖅᓯᒪᔪᑦ ᓱᓕᙱᑦᑐᓂᒃ ᑐᓴᒐᒃᓴᙳᐊᓂᒃ ᐃᑲᔪᕈᑎᐅᓂᐊᕐᓗᓂ ᐃᓕᓐᓂᐊᖅᑎᓄᑦ ᐅᖃᓕᒫᖅᑕᖏᓐᓂᒃ ᖃᕋᓴᐅᔭᒃᑯᑦ ᐅᔾᔨᕈᓱᖕᓂᖅᓴᐅᔪᓐᓇᓕᕐᓗᑎᒃ. (ᐊᔾᔨᙳᐊᖅ ᐅᕙᙵᑦ ᕆᐊᓇᓐ ᐳᕌᓴ)

ᐃᖃᓗᖕᓂ ᐃᓕᓐᓂᐊᖅᑏᑦ ᖃᐅᔨᔪᓐᓇᖅᓯᕗᑦ ᓱᓕᙱᑦᑐᓂᒃ ᑐᓴᒐᒃᓴᓕᐊᕆᔭᐅᓯᒪᔪᓂᒃ, ᓴᖅᑭᑎᑦᑎᔪᓐᓇᖅᖢᑎᒃ ᐃᓱᒪᒋᔭᐅᖏᓐᓇᐅᔭᖅᑐᓂᒃ ᐃᓚᖏᑦ ᑕᐃᒪᐃᑉᐸᙱᓐᓂᖏᓐᓂᒃ

ᐊᖅᓴᖅᓃᑦ ᕿᑎᐊᓃᑦᑐᓄᑦ ᐃᓕᓐᓂᐊᖅᕕᒃᒥᑦ ᐃᓕᓴᐃᔨ ᕆᐊᓇᓐ ᐳᕌᓴ ᐃᓕᓐᓂᐊᖅᑎᑕᖏᓐᓂᒃ ᐃᓕᓐᓂᐊᖅᑎᑦᑎᔪᖅ ᑖᒃᑯᐊ ᖃᕋᓴᐅᔭᒃᑯᑦ ᑕᑯᔭᖏᓐᓂᒃ ᐃᓱᒪᒃᓴᖅᓯᐅᕈᑎᖃᕈᓐᓇᖅᓯᓂᖅᒥᒃ

By ᑕᐃᕕᑦ ᕕᐊᓐ
ᓄᓇᓕᖕᓂ ᑐᓴᒐᒃᓴᓕᐅᕐᑎᐅᓂᕐᒧᑦ ᐱᓕᕆᐊᒃᓴᓄᑦ ᑐᓴᒐᒃᓴᓕᐅᕐᑎ

For an English version of this story, see Iqaluit students learn to spot fake news, debunk stereotypes

ᐃᓕᓐᓂᐊᖅᕕᒋᔭᐅᔪᒥ ᐃᖃᓗᒃᓂᑦ ᐊᖅᓴᖅᓃᑦ ᐃᓕᓐᓂᐊᖅᕕᒃᒥᑦ, ᕆᐊᓇᓐ ᐳᕌᓴ ᐅᖃᓚᐅᕐᑐᖅ ᑎᑎᕋᖅᕕᒃᒧᑦ ᑎᑎᕋᖅᖢᓂ “ᐊᖑᑎᑦ” ᑎᑎᕋᖅᕕᐅᑉ ᐃᒡᓗᐊᒍᑦ ᐊᒻᒪ ᐃᓗᖓᓂᒃ ᑎᑎᕋᖅᖢᓂ “ᐊᕐᓇᐃᑦ” ᑖᒃᑯᐊᓗ ᒍᕇᑦ 8-ᒥᑦ ᐃᓕᓐᓂᐊᖅᑎᑕᖏᑦ ᐃᓱᒪᒋᔭᐅᖏᓐᓇᐅᔭᖅᑐᓂᒃ ᐅᖃᐅᓯᖃᕈᓐᓇᖅᓯᓚᐅᖅᑐᑦ ᐊᒻᒪ ᑎᑎᕋᖅᐸᒃᖢᑎᒃ ᑐᓴᖃᑦᑕᖅᓯᒪᔭᖏᓐᓂᒃ ᖃᕋᓴᐅᔭᒃᑯᑦ ᑖᒃᑯᐊᒃ ᑎᑎᕋᖅᓯᒪᔪᑦ ᐊᑖᒍᑦ.

ᐳᕌᓴ ᐅᖃᓚᐅᖅᑐᖅ ᑖᒃᑯᐊ ᑎᑎᕋᖅᓯᒪᔪᑦ ᐊᑖᒍᑦ ᑎᑎᕋᑲᑕᓚᐅᕐᓂᖏᓐᓂᒃ: ᐊᖑᑎᑦ ᐊᑖᑯᑦ, ᑖᒃᑯᐊ ᓱᕈᓰᑦ ᑎᑎᕋᖅᖢᑎᒃ ᐃᓄᒋᐊᓄᑦ ᐱᙳᐊᕈᑎᓂᒃ ᐱᙳᐊᖅᐸᖕᓂᖏᓐᓂᒃ, ᓴᙱᓂᖏᓐᓂᒃ ᐊᒻᒪᓗ ᑮᓇᐅᔭᓕᐅᖅᑎᐅᓂᖏᓐᓂᒃ. ᐊᕐᓇᐃᑦ ᐊᑖᒍᑦ, ᐅᖃᓚᐅᖅᑐᑦ ᓂᕿᓕᐅᖅᑎ, ᓴᓗᒻᒪᖅᓴᐃᔨ ᐊᒻᒪ ᓱᕈᓯᕐᓂᒃ ᐱᕈᖅᓴᐃᔨᑦ.

ᐳᕌᓴ ᐅᖃᓚᐅᖅᑐᑦ ᑭᖑᓂᐊᒍᑦ ᐃᓕᓐᓂᐊᖅᑎᑕᖏᑦ ᐅᖃᐅᓯᖃᑲᑕᓚᐅᕐᓂᖏᓐᓂᒃ ᐃᓱᒪᒋᔭᐅᔪᑐᖃᐅᕙᒃᑐᑦ ᑕᒻᒪᖅᓯᒪᙱᒻᒪᖔᑕ, ᐊᒻᒪᓗ ᑖᒃᑯᐊ ᐃᓕᓐᓂᐊᖅᑎᐅᔪᑦ ᐃᓅᓯᖏᓐᓂᒃ ᑕᐃᒪᐃᑦᑕᕆᐊᒃᓴᖏᓐᓂᒃ.

“ᑕᐃᒪᓐᓇ ᑕᑯᖃᑦᑕᖅᐱᑕ ᖃᐅᑕᒫ ᐃᓅᓯᑦᑎᓐᓃ? ᐊᖓᔪᖅᑳᓯ ᐊᕕᓯᒪᖕᒪᑖ ᑕᒪᒃᑯᓄᖓ ᐱᓕᕆᐊᒃᓴᓄᑦ?” ᐳᕌᓴ ᑕᐃᒪᓐᓇ ᐊᐱᕆᓚᐅᕐᓂᖅᒥᓂᒃ ᐃᖅᑲᐅᒪᔪᖅ.

ᐊᒻᒪᓗ ᐊᕕᒃᑐᖅᓯᒪᓪᓗᑎ ᑖᒃᑯᐊ ᐃᓕᓐᓂᐊᖅᑏᑦ ᒪᓂᓴᐅᑎᐅᕙᒃᑐᓂᒃ ᕿᒥᕐᕈᐊᓚᐅᖅᑐᑦ ᐊᒻᒪ ᓇᓕᐊᒃ ᐃᓱᒪᒋᔭᐅᖏᓐᓇᐅᔭᖅᑐᒥᒃ ᐃᓕᖅᑯᓯᐅᓂᖓᓂᒃ ᓴᖅᑭᔮᖅᑎᑦᑎᔭᕆᐊᒃᓴᖏᓐᓂᒃ, ᐃᒡᓘ ᓴᓂᕋᖓᓅᖅᑐᒃᓴᒥ ᓴᓇᓪᓗᑎᒃ ᐊᒻᒪ ᐅᖃᐅᓯᖃᖅᖢᑎᒃ ᑕᒪᒃᑯᐊ ᐃᓱᒪᒋᔭᐅᖏᓐᓇᐅᔭᖅᑐᑦ ᐃᓕᖅᑯᓯᐅᓇᓱᒋᒡᓗᒍ ᐊᒻᒪᓗ ᐊᔾᔨᒋᙱᔾᔪᑎᖃᕈᑎᐅᔪᑦ ᓇᑭᙶᖅᓯᒪᔭᕆᐊᒃᓴᖏᓐᓂᒃ.

ᐅᓇ ᐃᓚᒋᔭᐅᓚᐅᖅᑐᖅ ᐃᓕᓐᓂᐊᕈᑎᒃᓴᓂᒃ ᐳᕌᓴᐅᑉ ᓴᓇᔭᖏᓐᓂᒃ ᐃᓕᓐᓂᐊᖅᑎᑕᖏᓐᓄᑦ ᖃᓄᖅ ᖃᐅᔨᒪᔪᓐᓇᕐᓂᖅᒥᒃ ᑐᓴᒐᒃᓴᓕᐊᖑᕙᒃᑐᓂᒃ ᐊᒻᒪᓗ ᓇᓗᓇᐃᖅᓯᔪᓐᓇᖅᓯᓗᑎᒃ ᐊᔾᔨᒌᙱᓐᓂᕐᒧᑦ ᐃᓅᖃᑎᒌᖕᓂᒃᑯᑦ ᐊᒻᒪ ᐊᕐᓇᐅᓂᕐᒧᑦ/ᐊᖑᑎᐅᓂᕐᒧᑦ ᐃᓱᒪᒋᔭᐅᖏᓐᓇᐅᔭᖅᑐᓂᒃ.

ᐳᕌᓴ ᐅᖃᓚᐅᖅᑐᖅ ᐃᓕᓐᓂᐊᖅᑎᑕᖏ ᑖᔅᓱᒧᖓ ᐅᐸᖃᑦᑕᓚᐅᖅᑐᑦ ᖃᓄᐃᑉᐸᓪᓕᐊᔪᓄᑦ ᖃᓄᐃᓕᐅᕈᑎᐅᓇᓱᒋᔭᖏᓐᓂᒃ ᐊᒻᒪᓗ ᖃᕋᓴᐅᔭᒃᑯᑦ ᑕᑯᔭᖏᓐᓂᒃ ᐅᖃᐅᓯᖃᕈᓘᔭᖅᐸᒃᖢᑎᒃ ᖃᓄᐃᑦᑕᕆᐊᒃᓴᖏᓐᓂᒃ.

ᐅᖃᐅᓯᖃᓚᐅᖅᑐᑦ ᖃᓄᖅ ᑕᒪᓐᓇ ᑕᐃᒪᐃᑦᑎᐊᕐᓂᖓᓂᒃ ᐊᒻᒪᓗ ᐅᓗᕆᐊᓇᕆᐊᒃᓴᖓᓂᒃ ᐋᒃᑲᓘᓐᓃᑦ, ᐅᖃᖅᑐᖅ.

ᑖᒃᑯᐊ ᐃᓕᓐᓂᐊᕈᑎᒃᓴ ᕕᕝᕗᐊᕆᒥ, ᒫᔅᓯᓗ ᐱᒋᐊᓕᖅᑎᓪᓗᒍ ᐱᓕᕆᐊᕆᓕᓚᐅᖅᓯᒪᔭᖏᑦ ᐳᕌᓴᐅᑉ ᑕᒪᓐᓇ ᐅᖃᓪᓚᑲᑕᒍᑎᒋᔭᖓᑦ ᐊᕕᒃᓯᒪᐅᕐᓗᑎᒃ ᐱᓕᕆᐊᖑᓕᖅᑎᓪᓗᓂᐅᒃ.

“ᑐᓴᒐᒃᓴᓕᕆᓂᒃᑯᑦ ᐃᓅᓯᖃᓗᐊᓕᕋᑦᑕ,” ᐳᕌᓴ ᐅᖃᖅᑐᖅ, ᑖᓐᓇ ᐃᓕᓴᐃᔨᐅᓯᒪᓕᖅᑐᖅ ᐊᖅᓴᖅᓃᑦ ᐃᓕᓐᓂᐊᖅᕕᒃᒥ ᐊᕐᕌᒎᖕᓂ ᒪᕐᕉᓕᖅᑑᖕᓂ. “ᐃᓱᒪᓚᐅᖅᓯᒪᒐᒪ ᐱᐅᓇᔭᕆᐊᒃᓴᖓᓂᒃ ᑕᒪᑐᒥᖓ ᐅᖃᐅᓯᖃᕈᑦᑕ ᐃᓕᓐᓂᐊᖅᕕᑦᑎᓐᓂ ᐊᒻᒪᓗ ᐊᔪᕈᓐᓃᖅᓴᕈᑎᒋᕙᓪᓕᐊᓗᒋᑦ … ᑕᐃᒪᓐᓇ ᐅᓗᕆᐊᓇᙱᑦᑐᒦᓐᓂᖅᓴᐅᓇᔭᕐᒪᑕ ᑐᓴᐅᒪᔾᔪᑎᓕᕆᕐᒧᑦ.”

ᐳᕌᓴ ᐅᖃᓚᐅᖅᑐᖅ ᐃᓕᓐᓂᐊᖅᑎᑕᖏᑦ ᐃᓕᓐᓂᐊᓚᐅᕐᓂᖏᓐᓂᒃ ᐊᔾᔨᒌᙱᔾᔪᑎᖏᓐᓂᒃ ᑐᓴᒐᒃᓴᓕᐊᕆᔭᐅᕙᒃᑐᑦ ᐊᒻᒪ ᐅᓂᒃᑲᐅᓯᐊᖑᑐᐃᓐᓇᖅᑐᓂᒃ, ᖃᓄᕐᓗ ᕿᓂᕈᓐᓇᕐᒪᖔᑦ ᑎᑎᕋᖅᑕᐅᓯᒪᔪᓄᑦ ᑎᑎᕋᖃᑦᑕᖅᑐᓂᒃ ᐊᒻᒪᓗ ᑭᒃᑯᑦ ᓇᖕᒥᓂᖃᖅᑎᐅᖕᒪᖔᑕ ᑐᓴᒐᒃᓴᓕᕆᔨᓂᒃ, ᐊᒻᒪᓗ ᖃᓄᖅ ᖃᐅᔨᓴ)ᒋᐊᒃᓴᖅ ᐅᓂᒃᑳᓕᐊᖑᔪᓂᒃ ᖃᕋᓴᐅᔭᒃᑯᑦ ᓴᖅᑭᔮᒐᑦ ᐊᑐᕐᓗᒋᑦ ᐆᑐᓇᖅ Snopes.

“ᖃᐅᔨᒪᓇᔭᙱᒻᒪᑕ ᓈᒻᒪᒃᓴᙱᓐᓂᖅᒥᒃ ᑭᓯᐊᓂᓕ ᑕᒪᒃᑯᐊ ᑐᑭᖏᓐᓂᒃ ᓇᓗᓇᐃᖅᓯᒍᑦᑕ ᐊᒻᒪ ᐅᖃᐅᓯᕆᕙᒡᓗᒋᑦ. ᑕᐃᒪᓕ ᐃᓱᒪᔪᖓ ᑕᒪᑐᒥᖓ ᖃᐅᔨᔪᒪᓪᓚᕆᖕᓂᖏᓐᓂᒃ ᑭᓱᑦ ᓇᑭᙶᖅᓯᒪᔭᕆᐊᒃᓴᖏᓐᓂᒃ,” ᐅᖃᖅᑐᖅ ᐳᕌᓴ.

ᕿᒥᕐᕈᐊᓚᐅᖅᑐᑦ ᐱᐅᔪᐊᓗᖕᓂᒃ ᐅᓂᒃᑳᓕᐊᖑᓯᒪᔪᓂᒃ ᑐᓴᒐᒃᓴᓕᕆᔨᓂᒃ ᑕᒪᒃᑯᓂᖓ ᐃᓕᓴᕐᓇᓗᐊᖅᐸᒃᑐᓂᒃ ᓴᖅᑭᑎᑦᑎᓯᒪᓪᓗᑎᒃ ᖃᓄᑐᐃᓐᓇᖅ, ᐊᒻᒪᓗ ᐅᓇ ᖃᓄᐃᓕᐅᕈᑎᐅᓯᒪᔪᖅ ᓄᕙᒡᔪᐊᕐᓇᖅ-19-ᒧᑦ ᑲᐴᑎ ᐃᓚᓯᒪᓂᖓᓂᒃ ᓇᓗᓇᐃᒃᑯᑎᒥᒃ, ᐳᕌᓴ ᐅᖃᖅᑐᖅ.

ᐅᖃᐅᓯᖃᓚᐅᕐᒥᔪᑦ ᐊᔾᔨᒌᙱᓐᓂᖏᓐᓂᒃ ᓱᓕᙱᑦᑐᓂᒃ ᑐᓴᒐᒃᓴᓕᕆᔪᓂᒃ ᐊᒻᒪᓗ ᐱᐅᑎᑦᑎᓗᐊᖅᐸᒃᑐᓂᒃ ᐅᓂᒃᑳᓕᐊᓂᒃ ᖃᕋᓴᐅᔭᒃᑯᑦ ᓴᖅᑭᔮᖅᑎᑕᐅᔪᓂᒃ ᐅᑯᑎᑐᓇᖅ Beaverton ᐅᕝᕙᓘᓐᓃᑦ Onion.

ᐃᓕᓐᓂᐊᕌᓂᒃᑳᖓᑕ ᐃᓕᓐᓂᐊᖅᑎᐅᔪᑦ ᖃᐅᔨᓇᓱᓕᖃᑦᑕᖅᑐᑦ ᐊᔾᔨᒌᙱᔾᔪᑎᐅᔪᓂᒃ ᒪᑯᐊ ᑕᐃᔭᖏᑦ ᓱᓕᙱᑦᑐᑦ ᑐᓴᒐᒃᓴᐃᑦ, ᓇᓗᓇᖅᖢᓂᒋᑦ ᐊᒻᒪᓗ ᐋᒃᑭᒃᓱᐃᓪᓗᑎᒃ ᐊᑭᓐᓇᖅᒥᐅᑕᒃᓴᓂᒃ ᓄᓇᑕᐅᓂᕐᓴᓄᑦ ᐃᓕᓐᓂᐊᖅᑎᓄᑦ ᖃᐅᔨᔭᐅᕙᓪᓕᐊᓂᐊᕐᒪᑕ, ᐳᕌᓴ ᐅᖃᓚᐅᖅᑐᖅ.

“ᐅᔾᔨᕈᓱᖕᓂᖅᓴᒻᒪᕆᐅᖕᒪᑦ ᖃᓄᐃᑉᐸᓪᓕᐊᔪᓂᒃ ᑕᐃᒪᐃᓐᓇᓱᒋᙱᒃᑲᓗᐊᖅᖢᑎᒍᑦ.” ᐅᖃᖅᑐᖅ.

ᒫᓐᓇᓕ, “ᐃᓕᓴᖅᓯᔪᓐᓇᖅᓯᔪ ᑕᒪᒃᑯᐊ ᐃᓚᖏᑦ ᐊᓯᖏᓐᓄᑦ ᑕᑯᔭᐅᑎᑕᖏᑦ ᐅᓗᕆᐊᓇᑐᐃᓐᓇᕆᐊᖃᕐᓂᖏᓐᓂᒃ ᐊᒻᒪᓗ ᖃᐅᔨᑎᑦᑎᔪᓐᓇᖅᖢᑎᒃ ᐊᓯᖏᓐᓂᒃ ᑕᒪᑐᒥᖓ.”

Share This Story

(0) Comments

Join the Conversation

Your email address will not be published. Required fields are marked *

*